တၢ်မၤလိ ၃၅
ပာ်လုၢ်ပာ်ပှ့ၤ ဒီပုၢ်ဝဲၢ်သးပှၢ်လၢ အသးတီတဖၣ်တက့ၢ်
“ခိၣ်ဝါန့ၣ် . . . မ့ၢ်တၢ်ခိၣ်သလုးအိၣ်ဒီးအလၤကပီၤလီၤ.”—ကတိၤဒိ ၁၆:၃၁.
တၢ်သးဝံၣ် ၁၃၈ ခိၣ်ဆူၣ်ဝါ မ့ၢ်တၢ်လၢအဃံလၤ
တၢ်မၤလိအံၤ အတၢ်တိာ်ပာ် *
၁-၂. (က) ဒ် ကတိၤဒိ ၁၆:၃၁ ပာ်ဖျါထီၣ်ဝဲအသိး ပကဘၣ်ထံၣ် ဒီပုၢ်ဝဲၢ်သးပှၢ်တဖၣ်ဒ်လဲၣ်. (ခ) လၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤလဲၣ်.
ဖဲပှၤဟးကွၢ်ကီတၢ်ဖိတဖၣ် လဲၤလၢတၢ်လီၢ်အၣ်ခဲၤစီၤ လၢကီၢ်အမဲရကၤအခါ ဘၣ်သ့ၣ်သ့ၣ် အဝဲသ့ၣ်ထံၣ်န့ၢ် တၢ်မျၢ်လၢအလုၢ်ဒိၣ်ပှ့ၤဒိၣ်သ့. ဘၣ်ဆၣ် တၢ်မျၢ်သ့ၣ်တဖၣ်အံၤ ပှၤတမၤဃံမၤလၤ ထီၣ်ဘၣ်အီၤဒံးဘၣ်. လၢတၢ်န့ၣ်အဃိ ဖဲပှၤထံၣ်တၢ်မျၢ်တဖၣ်အံၤအခါ ပှၤတသ့ၣ်ညါဝဲလၢအမ့ၢ်တၢ်လုၢ်ဒိၣ်ပှ့ၤဒိၣ်ဘၣ် ဒီးပှၤလဲၤကပၤကွံာ်အီၤလီၤ.
၂ ဒ်န့ၣ်အသိး ပဒီပုၢ်ဝဲၢ်သးပှၢ်တဖၣ်အံၤ အလီၤဂာ်ဒ်သိးဒီး တၢ်မျၢ်လၢအလုၢ်ဒိၣ်ပှ့ၤဒိၣ်တဖၣ်လီၤ. ကစၢ်ယွၤအကလုၢ်ကထါ ထိၣ်သတြီၤဝဲ ပှၤခိၣ်ဆူၣ်ဝါတဖၣ်ဒီး ခိၣ်သလုးလီၤ. (ဖး ကတိၤဒိ ၁၆:၃၁ တက့ၢ်; ၂၀:၂၉) ဘၣ်ဆၣ် တၢ်လုၢ်ဒိၣ်ပှ့ၤဒိၣ်တဖၣ် ပှၤကွၢ်ကပာ်ကွံာ်အီၤသ့လီၤ. ဖဲပှၤသးစၢ်တဖၣ် ပာ်လုၢ်ပာ်ပှ့ၤဝဲ ပှၤသးပှၢ်တဖၣ်အခါ အဝဲသ့ၣ်ကဒိးန့ၢ်ဘၣ်ဝဲ အဘျုးအဖှိၣ်အါမး. လၢတၢ်မၤလိအံၤအပူၤ ပကစံးဆၢတၢ်သံကွၢ်သၢဖျၢၣ်. ဘၣ်မနုၤအဃိ ယဟိဝၤယွၤ ထံၣ်ဝဲလၢ ပှၤသးပှၢ်တဖၣ် မ့ၢ်ပှၤလုၢ်ဒိၣ်ပှ့ၤဒိၣ်လဲၣ်. ဘၣ်မနုၤအဃိ ဒီပုၢ်ဝဲၢ်သးပှၢ်တဖၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအတၢ်ကရၢကရိအဂီၢ်လဲၣ်. ပမၤလိန့ၢ်တၢ်လၢ ဒီပုၢ်ဝဲၢ်သးပှၢ်တဖၣ်အံၤ အတၢ်လဲၤခီဖျိ ကသ့ဒ်လဲၣ်.
ဘၣ်မနုၤအဃိ ယဟိဝၤယွၤထံၣ် ဒီပုၢ်ဝဲၢ်သးပှၢ်တဖၣ် ဒ်တၢ်လုၢ်ဒိၣ်ပှ့ၤဒိၣ်လဲၣ်
ပှၤသးပှၢ်လၢအိၣ်ဒီး တၢ်သးတီတဖၣ်န့ၣ် မ့ၢ်ပှၤလုၢ်ဒိၣ်ပှ့ၤဒိၣ်လၢ ယဟိဝၤယွၤဒီး ဒီပုၢ်ဝဲၢ်မုၣ်ခွါတဖၣ်အဂီၢ် (ကွၢ်လံာ်အဆၢ ၃)
၃. ဒ် စံးထီၣ်ပတြၢၤ ၉၂:၁၂-၁၅ ပာ်ဖျါထီၣ်ဝဲအသိး ဘၣ်မနုၤအဃိ ပှၤသးပှၢ်တဖၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လဲၣ်.
၃ ဒီပုၢ်ဝဲၢ်သးပှၢ်တဖၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအအဂီၢ် အဃိ ယဟိဝၤယွၤသ့ၣ်ညါဝဲလၢ အဝဲသ့ၣ်မ့ၢ်ပှၤဒ်လဲၣ် ဒီးပာ်လုၢ်ပာ်ပှ့ၤအဝဲသ့ၣ် အတၢ်ဂ့ၤတၢ်ဝါတဖၣ်လီၤ. ဖဲဒီပုၢ်ဝဲၢ်သးပှၢ်တဖၣ် ဟ့ၣ်နီၤလီၤပှၤသးစၢ်လၢ အတၢ်ကူၣ်သ့အခါ ယဟိဝၤယွၤသးခုဒိၣ်မး. (ယိၤဘး ၁၂:၁၂; ကတိၤဒိ ၁:၁-၄) ယဟိဝၤယွၤ ပာ်လုၢ်ပာ်ပှ့ၤအဝဲသ့ၣ် အတၢ်တူၢ်န့ၢ်ခီၣ်ကဲလီၤ. (မၤလကံ ၃:၁၆) ဒီပုၢ်ဝဲၢ်သးပှၢ်တဖၣ် ထံၣ်ဘၣ်တၢ်ကီတၢ်ခဲ ဘၣ်ဆၣ် အဝဲသ့ၣ်ဆဲးသးတီဒီး ယဟိဝၤယွၤလီၤ. အဝဲသ့ၣ်တၢ်မုၢ်လၢ် ဘၣ်ဃးဒီးခါဆူညါန့ၣ် အဝဲသ့ၣ်ထံၣ်ဝဲ ၡဲဒိၣ်န့ၢ်ဒံး ဖဲအဝဲသ့ၣ်ဒိးန့ၢ်ဘၣ် တၢ်မ့ၢ်တၢ်တီ သီသီအခါလီၤ. ယဟိဝၤယွၤ အဲၣ်အဝဲသ့ၣ်ဒိၣ်မး မ့ၢ်လၢအဝဲသ့ၣ် ဆဲးတဲဘၣ်ပှၤဂၤလၢ ကစၢ်ယွၤအမံၤ “တုၤအသးပှၢ်” ထီၣ်တစုလီၤ.—ဖး စံးထီၣ်ပတြၢၤ ၉၂:၁၂-၁၅ တက့ၢ်.
၄. တၢ်မနုၤဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်သးပှၢ်တဖၣ်လဲၣ်.
၄ ဖဲနသးပှၢ်ထီၣ်အခါ နီၣ်ဘၣ်လၢ တၢ်လၢနမၤတ့ၢ် လၢအပူၤကွံာ်တဖၣ်န့ၣ် ယဟိဝၤယွၤ ပာ်လုၢ်ပာ်ပှ့ၤဝဲ သပှၢ်ကတၢၢ်. (ဧ့ၤဘြံၤ ၆:၁၀) ခီဖျိလၢနဆီၣ်ထွဲ တၢ်စံၣ်တဲၤတဲလီၤတၢ်မၤအဃိ ယဟိဝၤယွၤသးခုဝဲဒိၣ်မး. နထံၣ်ဘၣ်တၢ်ကီတၢ်ခဲအါမး, ပှၤမၤဘၣ်ဒိနသး, နဒီသဒၢ လံာ်စီဆှံတၢ်သိၣ်တၢ်သီ, နမၤယဟိဝၤယွၤတၢ်မၤ လၢတၢ်သးတီအပူၤ ဒီးနသိၣ်လိပှၤဂၤလံာ်စီဆှံ. တကးဒံးဘၣ် နဂုာ်ကျဲးစၢးမၤထွဲ ယဟိဝၤယွၤအတၢ်ကရၢကရိ အတၢ်ဟံးစုနဲၣ်ကျဲ လၢအဂ့ၤကတၢၢ် ဒီးနဆီၣ်ထွဲ ဒီးဟ့ၣ်ဂံၢ်ဟ့ၣ်ဘါပှၤဂၤလၢ ကမၤကစၢ်ယွၤအတၢ်မၤလၢ တၢ်ဆၢကတီၢ်လၢပှဲၤလီၤ. အဃိ ယဟိဝၤယွၤအဲၣ်နၤဒိၣ်မး ဒီးအထံၣ်ဝဲလၢ နအိၣ်ဒီးတၢ်သးတီ. ဒီးယဟိဝၤယွၤအၢၣ်လီၤဝဲလၢအ “တလဲၤသဒၣ်ဘၣ် အပှၤစီဆှံဘၣ်.” (စံးထီၣ်ပတြၢၤ ၃၇:၂၈) ယဟိဝၤယွၤအၢၣ်လီၤနၤလၢ “တုၤသုခိၣ်ဝါ, ယကစိာ်သုလီၤ.” (ယၡါယၤ ၄၆:၄) အဃိ နတဘၣ်ဆိကမိၣ်လၢ နသးပှၢ်ထီၣ်အဃိ နတမ့ၢ်ပှၤလုၢ်ဒိၣ်ပှ့ၤဒိၣ်လၢ ယဟိဝၤယွၤအတၢ်ကရၢကရိ အဂီၢ်န့ၣ်တဂ့ၤ. နမ့ၢ်ပှၤလုၢ်ဒိၣ်ပှ့ၤဒိၣ် အနီၢ်ကီၢ်လီၤ.
ဒီပုၢ်ဝဲၢ်သးပှၢ်တဖၣ် မ့ၢ်ပှၤလုၢ်ဒိၣ်ပှ့ၤဒိၣ်လၢ ယဟိဝၤယွၤ အတၢ်ကရၢကရိအဂီၢ်
၅. ဒီပုၢ်ဝဲၢ်သးပှၢ်တဖၣ် ကဘၣ်နီၣ်ဘၣ်က့ၤ တၢ်မနုၤလဲၣ်.
၅ ဒီပုၢ်ဝဲၢ်သးပှၢ်တဖၣ်န့ၣ် ကဲဘျုးကဲဖှိၣ်လၢ ယဟိဝၤယွၤအတၢ်ကရၢကရိအပူၤ လၢကျဲအါဘိလီၤ. အဝဲသ့ၣ်အဂံၢ်အဘါ မ့ၢ်တအိၣ်ဒ် လၢညါအသိးလၢၤဘၣ် သနာ်က့ အဝဲသ့ၣ်အိၣ်ဒီး တၢ်လဲၤခီဖျိ အါမး. ယဟိဝၤယွၤဆဲးသူ အဝဲသ့ၣ်သ့လၢ ကျဲအါဘိဒံး. တၢ်အဒိလၢအပူၤကွံာ် ဒီးခဲအံၤတဖၣ် ပာ်ဖျါထီၣ်န့ၢ်ပှၤလီၤ.
၆-၇. ယဟိဝၤယွၤဆိၣ်ဂ့ၤ ပှၤသးပှၢ်တဖၣ်ဒ်လဲၣ်န့ၣ် ဟ့ၣ်တၢ်အဒိ လၢလံာ်စီဆှံအပူၤတက့ၢ်.
၆ လၢလံာ်စီဆှံပူၤန့ၣ် ပထံၣ်န့ၢ် ပှၤသးပှၢ်လၢအဒိအတဲာ်ဂ့ၤ လၢအဆဲးမၤ ယဟိဝၤယွၤအတၢ်မၤလၢ တၢ်သးတီအပူၤသ့ဝဲလီၤ. အဒိ, စီၤမိၤၡ့န့ၣ် ဖဲအသးနံၣ်အိၣ် ၈၀ အခါ အဝဲစးထီၣ်မၤ ယဟိဝၤယွၤအတၢ်မၤ ဒ်ဝံတဂၤဒီး တီခိၣ်ရိၤမဲဝဲ ပှၤအံၣ်စရ့လးဖိ ဒီတကလုာ်ညါ. ဖဲစီၤဒၤနံးယ့လး အသးနံၣ်အိၣ် ၉၀ ဘျဲၣ်အခါ ယဟိဝၤယွၤဆဲးသူအီၤ ဒ်ဝံတဂၤအသိးဒံးလီၤ. ဒီးတၢ်မၢဖိယိၤဟၣ်စ့ၢ်ကီး ဖဲအကွဲးလံာ်လီၣ်ဖျါအခါ အသးနံၣ်ကအိၣ်လၢ ၉၀ ဘျဲၣ်လံ.
၇ ပှၤသးပှၢ်လၢအသးတီအါဂၤ ပှၤတသ့ၣ်ညါအဝဲသ့ၣ် အါအါဘၣ် ဒီးပှၤကွၢ်ကပာ်အဝဲသ့ၣ်လီၤ. ဘၣ်ဆၣ် ယဟိဝၤယွၤ ပာ်သူၣ်ပာ်သးအဝဲသ့ၣ် ဒီးပာ်လုၢ်ပာ်ပှ့ၤ အတၢ်သးတီလီၤ. အဒိ, စီၤစူၤမ့းအိၣ်လၢအမ့ၢ် “ပှၤအတီအလိၤ, ပျံၤကစၢ်ယွၤ” န့ၣ် ဘၣ်တၢ်ကွဲးဖျါထီၣ် အဂ့ၢ်လၢ လံာ်စီဆှံပူၤ ထဲတစဲးဖိ ဘၣ်ဆၣ် ယဟိဝၤယွၤ သ့ၣ်ညါအီၤဂ့ၤဂ့ၤ ဒီးဟ့ၣ်အီၤ တၢ်ခွဲးတၢ်ယာ်လၢ ထံၣ်ဘၣ်ဝဲဖိသၣ်ယ့ၣ်ၡူး ဒီးတဲဆိပာ်စၢၤ ဘၣ်ဃးဒီး တၢ်ကမၤအသးဒီး ဖိသၣ်အံၤဒီးအမိၢ်လီၤ. (လူၤကၣ် ၂:၂၂, ၂၅-၃၅) ဒီးဆိကမိၣ်ထီၣ် မုၣ်ကမဲနီၢ်အၣ်နၤ လၢအမ့ၢ်ဝံမုၣ်န့ၣ်တက့ၢ်. အသးနံၣ်အိၣ် ၈၄ နံၣ်လံ သနာ်က့ “အဝဲဟဲလၢ တၢ်လုၢ်ဟံၣ်ထီဘိ.” ခီဖျိလၢ အလဲၤလၢတၢ်လုၢ်ဟံၣ်ထီဘိအဃိ ယဟိဝၤယွၤဆိၣ်ဂ့ၤအီၤဒီး ဟ့ၣ်အီၤတၢ်ခွဲးတၢ်ယာ် လၢကထံၣ်ဘၣ် ဖိသၣ်ယ့ၣ်ၡူးလီၤ. ယဟိဝၤယွၤပာ်လုၢ်ပာ်ပှ့ၤ စီၤစူၤမ့းအိၣ်ဒီး နီၢ်အၣ်နၤဒိၣ်မး.—လူၤကၣ် ၂:၃၆-၃၈.
ခဲအံၤဒီပုၢ်ဝဲၢ်မုၣ်ဒံၤဒူ အသးနံၣ်အိၣ် ၈၀ ဘျဲၣ်လံ သနာ်က့ အဆဲးမၤ ယဟိဝၤယွၤအတၢ်မၤလၢ တၢ်သးတီအပူၤဒံး (ကွၢ်လံာ်အဆၢ ၈)
၈-၉. ဖဲဒီပုၢ်ဝဲၢ်မုၣ်တဂၤ အကဲထီၣ်မုၣ်ကမဲအခါ အမၤစၢၤတၢ်ကရၢကရိဒ်လဲၣ်.
၈ မုၢ်မဆါတနံၤအံၤ ပှၤသးပှၢ်လၢအသးတီအါဂၤ လၢအမၤကစၢ်ယွၤအတၢ်မၤန့ၣ် ပာ်လီၤဒိဂ့ၤတဲာ်ဘၣ် လၢပှၤသးစၢ်တဖၣ်အဂီၢ်လီၤ. ပကကွၢ်သကိး ဒီပုၢ်ဝဲၢ်မုၣ်လူဝံး(စ်) ဒံၤဒူ အတၢ်လဲၤခီဖျိ. ဖဲဒီပုၢ်ဝဲၢ်မုၣ်လူဝံး(စ်) အသးအိၣ် ၂၁ နံၣ်အခါ အစးထီၣ်မၤ ပှၤလဲၤလၢညါလီၤဆီ လၢကီၢ်ခဲနဒၣ်. လၢခံ အထီၣ်ပှၢ်ဒီးဒီပုၢ်ဝဲၢ်ခွါကၠီ(န်) ဝံၤအလီၢ်ခံ အဝဲသ့ၣ်မၤကဝီၤအတၢ်မၤ တဘျုးနံၣ်ညါ. လၢခံအဝဲသ့ၣ်က့ၤမၤတၢ်လၢ ကီၢ်ခဲနဒၣ်အဘ့ၤသ့လး န့ၢ်အနံၣ် ၂၀ ဘျဲၣ်. ဖဲဒီပုၢ်ဝဲၢ်မုၣ်လူဝံး(စ်) အသးအိၣ် ၅၈ နံၣ်အခါ အီၤဒီးအဝၤ လီၤဘၣ်မူဒါလၢထံကီၢ်ယူၣ်ခြ့. အဝဲသ့ၣ်ကမၤဒ်လဲၣ်. မ့ၢ်အဝဲသ့ၣ်ဆိကမိၣ်ထီၣ်ဝဲလၢ အသးပှၢ်ဒိၣ်တလၢ လၢကလဲၤမၤကစၢ်ယွၤတၢ်မၤလၢ ထံကီၢ်တဘ့ၣ်န့ၣ်ဧါ. ဒီးအဝဲသ့ၣ်တူၢ်လိာ်ဝဲမူဒါအသီအံၤဒီး ဒီပုၢ်ဝဲၢ်ခွါကၠီ(န်) ကဲထီၣ်ဘၣ်ဝဲၤတြၢ်ကမံးတံာ် ဖဲထံကီၢ်တဘ့ၣ်အံၤအပူၤလီၤ. ဖဲဒီပုၢ်ဝဲၢ်ခွါကၠီ(န်) သံဝဲနွံနံၣ် ဝံၤအလီၢ်ခံ ဒီပုၢ်ဝဲၢ်မုၣ်လူဝံး(စ်) ဆဲးမၤကစၢ်ယွၤတၢ်မၤဖဲန့ၣ်လီၤ. ခဲအံၤ ဒီပုၢ်ဝဲၢ်မုၣ်လူဝံး(စ်) အသးအိၣ် ၈၁ နံၣ်လံ ဘၣ်ဆၣ် အဝဲဆဲးမၤယဟိဝၤယွၤအတၢ်မၤ လၢတၢ်သးတီအပူၤ လၢထံကီၢ်ယူၣ်ခြ့ အဘ့ၤသ့လး ဟံၣ်ဖိဃီဖိအကျါ ဒီးအဝဲသ့ၣ်ခဲလၢာ် အဲၣ်ဒီပုၢ်ဝဲၢ်မုၣ်လူဝံး(စ်) ဒိၣ်မး.
၉ ဘၣ်သ့ၣ်သ့ၣ် ပှၤတသ့ၣ်ညါ ဒီပုၢ်ဝဲၢ်မုၣ်လူဝံး(စ်) အါအါဒ်အဝၤ အိၣ်မူဒံး အဆၢကတီၢ်ဘၣ် ဘၣ်ဆၣ် ပှၤလၢအအိၣ်ကမဲဒ်အံၤတဖၣ်န့ၣ် မ့ၢ်ပှၤလၢအလုၢ်ဒိၣ်ပှ့ၤဒိၣ်ဒံး. ယဟိဝၤယွၤ ပာ်လုၢ်ပာ်ပှ့ၤ ဒီပုၢ်ဝဲၢ်မုၣ်လၢ အဆီၣ်ထွဲအဝၤ လၢအနံၣ်တဖၣ် ဒီးဆဲးမၤယဟိဝၤယွၤအတၢ်မၤလၢ တၢ်သးတီအပူၤလီၤ. (၁ တံၤမသ့း ၅:၃) တကးဒံးဘၣ် ပှၤသးပှၢ်တဖၣ်န့ၣ် ဟ့ၣ်ဂံၢ်ဟ့ၣ်ဘါဝဲ ပှၤသးစၢ်တဖၣ်လီၤ.
၁၀. ဒီပုၢ်ဝဲၢ်ခွါထိနံၤ ပာ်လီၤဒိဂ့ၤတဲာ်ဘၣ်ဒ်လဲၣ်.
၁၀ ဒီပုၢ်ဝဲၢ်သးပှၢ်အါဂၤ လၢအအိၣ်လၢ ပှၤသးပှၢ်ဟံၣ်တဖၣ်န့ၣ် မ့ၢ်ပှၤလုၢ်ဒိၣ်ပှ့ၤဒိၣ်စ့ၢ်ကီးလီၤ. အဒိ, ဒီပုၢ်ဝဲၢ်ခွါထိနံၤ ခဲအံၤအအိၣ်လၢ ပှၤသးပှၢ်အဟံၣ်လီၤ. ဒီပုၢ်ဝဲၢ်ခွါထိနံၤ အသးအိၣ်အနံၣ် ၂၀ အခါ အဒိးဘျၢထံလၢ ဖဲစဲၣ်ဘ့နံယါ, ကီၢ်အမဲရကၤ ဖဲလါအီကူး ၁၉၄၂ နံၣ်န့ၣ်လီၤ. အဒိးဘျၢထံဝံၤ တယံာ်ဘၣ်ဒီး အဝဲဘၣ်လဲၤကဲသုး ဘၣ်ဆၣ် မ့ၢ်လၢအဂ့ၢ်လိာ်ကွံာ်ဝဲ အဃိ အလီၤဘၣ်လၢ ဃိာ်ပူၤခံနံၣ်ဘျဲၣ်. အဝဲဒီးအမါဟ့လ်ဒၤ ကွၢ်လုၢ်ဒိၣ်ထီၣ်အဖိခံဂၤ လၢတၢ်မ့ၢ်တၢ်တီအပူၤလီၤ. အကွၢ်ထွဲဝဲ တၢ်အိၣ်ဖှိၣ်သၢဖျၢၣ် ဒ်တၢ်အိၣ်ဖှိၣ်သးပှၢ်လၢ အရဲၣ်ကျဲၤတၢ်တဂၤ ဒီးကွၢ်ထွဲကဝီၤတၢ်အိၣ်ဖှိၣ်ဖးဒိၣ် အတၢ်ရဲၣ်တၢ်ကျဲၤ လၢအနံၣ်အါမးအတီၢ်ပူၤလီၤ. အဝဲလဲၤမၤတၢ်အိၣ်ဖှိၣ် လၢဃိာ်ပူၤ ဒီးသိၣ်လိပှၤဃိာ်ဖိ လံာ်စီဆှံလီၤ. ဒီပုၢ်ဝဲၢ်ခွါအံၤ အသးအိၣ် ၉၈ နံၣ်လံ သနာ်က့ အတပတုာ်မၤ ယဟိဝၤယွၤအတၢ်မၤဘၣ်. အဝဲဆဲးမၤ ယဟိဝၤယွၤတၢ်မၤလၢ အဂ့ၤကတၢၢ် ဒီးအမၤသကိးတၢ်ဒီး တၢ်အိၣ်ဖှိၣ်ဖိ ဘူးဘူးတံၢ်တံၢ်လီၤ.
၁၁. ပပာ်ဖျါထီၣ်လၢ ပပာ်လုၢ်ပာ်ပှ့ၤ ဒီပုၢ်ဝဲၢ်သးပှၢ်တဖၣ် ကသ့ဒ်လဲၣ်.
၁၁ ပပာ်ဖျါထီၣ်လၢ ပပာ်ကဲ ဒီပုၢ်ဝဲၢ်သးပှၢ်တဖၣ် ကသ့ဒ်လဲၣ်. တၢ်အိၣ်ဖှိၣ်သးပှၢ်တဖၣ် မၤစၢၤဝဲ ဒီပုၢ်ဝဲၢ်သးပှၢ်တဖၣ် ဒ်သိးကဒိကနၣ်ဘၣ် တၢ်အိၣ်ဖှိၣ်အတၢ်ရဲၣ်တၢ်ကျဲၤ ဒီးကစံၣ်တဲၤတဲလီၤဘၣ်တၢ်အဂီၢ်လီၤ. ပသးအိၣ် ဒီပုၢ်ဝဲၢ်သးပှၢ်တဖၣ်ခီဖျိ ပလဲၤဟးလၢ အဝဲသ့ၣ်အအိၣ် မ့တမ့ၢ် ကိးအဝဲသ့ၣ်လၢ တၢ်ဂီၤမူ (video chat) လီၤ. ပကဘၣ်သူၣ်အိၣ်သးအိၣ် ဒီပုၢ်ဝဲၢ်သးပှၢ်သ့ၣ်တဖၣ်အံၤ ဒီးပတဘၣ်သးပ့ၤနီၣ် အဝဲသ့ၣ်ဘၣ်. ဖဲပတဲသကိးတၢ်ဒီး ဒီပုၢ်ဝဲၢ်သးပှၢ်သ့ၣ်တဖၣ်အခါ ဘၣ်သ့ၣ်သ့ၣ် အဝဲသ့ၣ်တနီၤ ကတဲဖျါထီၣ်အတၢ်ထံၣ် ဒီးအတၢ်လဲၤခီဖျိအဂီၢ် တညီဝဲဘၣ်. ဘၣ်ဆၣ် ပကဘၣ်သံကွၢ် အဝဲသ့ၣ်အတၢ်လဲၤခီဖျိ ဒီးဖဲအဝဲသ့ၣ် တဲဖျါထီၣ် တၢ်သးခု လၢအဒိးန့ၢ်ဘၣ်ဝဲလၢ ကစၢ်ယွၤတၢ်မၤအပူၤအခါ ပမ့ၢ်ဒိကနၣ် လီၤတံၢ်လီၤဆဲးန့ၣ် ပကဒိးန့ၢ်ဘၣ် အဘျုးအါမး.
၁၂. လၢတၢ်အိၣ်ဖှိၣ်အပူၤ ပဒီပုၢ်ဝဲၢ်သးပှၢ်တဖၣ် အိၣ်ဒီးတၢ်လဲၤခီဖျိဒ်လဲၣ်.
၁၂ ဘၣ်သ့ၣ်သ့ၣ် ပကအိၣ်ဒီးဒီပုၢ်ဝဲၢ်သးပှၢ်လၢ အအိၣ်ဒီးတၢ်လဲၤခီဖျိ လၢအဂ့ၤတဖၣ် လၢပတၢ်အိၣ်ဖှိၣ်အပူၤလီၤ. ဒီပုၢ်ဝဲၢ်မုၣ်ဟဲရံထံၤ အမၤယဟိဝၤယွၤတၢ်မၤလၢ နူကၠၢၤစံၤ, ကီၢ်အမဲရကၤ န့ၢ်အနံၣ်အါမး. လၢခံ အဝဲလဲၤအိၣ်က့ၤလၢ အဖိမုၣ်အအိၣ်လီၤ. ဒီပုၢ်ဝဲၢ်မုၣ်ခွါတဖၣ်လၢ တၢ်အိၣ်ဖှိၣ်သီအပူၤန့ၣ် ရ့ဒီးအီၤဒီး အဝဲသ့ၣ်သ့ၣ်ညါထီၣ်လၢ ဒီပုၢ်ဝဲၢ်မုၣ်အံၤ အိၣ်ဒီးတၢ်ဒိဂ့ၤတဲာ်ဘၣ် လၢတၢ်နာ်တကပၤလီၤ. ဒီပုၢ်ဝဲၢ်မုၣ်ဟဲရံထံၤ တဲပၠးအဝဲသ့ၣ် အတၢ်လဲၤခီဖျိဘၣ်ဃးဒီး အထံၣ်န့ၢ်တၢ်မ့ၢ်တၢ်တီ ဖဲ ၁၉၂၅ နံၣ်အတီၢ်ပူၤလီၤ. ဖဲန့ၣ်အဆၢကတီၢ် ဒီပုၢ်ဝဲၢ်မုၣ်ခွါတဖၣ် မ့ၢ်ဟးစံၣ်တဲၤတဲလီၤတၢ်န့ၣ် ပှၤဖီၣ်အဝဲသ့ၣ်သ့အဃိ ဒီပုၢ်ဝဲၢ်မုၣ်အံၤ ဖဲအဟးစံၣ်တဲၤတဲလီၤတၢ် တဘျီလၢ်လၢ်အခါ အဝဲဟးစိာ်ဝဲဒီး အကသံၣ်ထူးမဲဘိ ထီဘိလီၤ. ဖဲ ၁၉၃၃ နံၣ်န့ၣ် အလီၤဘၣ်လၢ ဃိာ်ပူၤခံဘျီ ဒီးအဘၣ်အိၣ်ဝဲလၢ ဃိာ်ပူၤ တဘျီန့ၣ်ယံာ်ဝဲ တနွံလီၤ. ဖဲန့ၣ်အဆၢကတီၢ် အဝၤလၢအတမ့ၢ် ယဟိဝၤပှၤအုၣ်အသးဘၣ်န့ၣ် ကွၢ်ထွဲစၢၤအဖိသၢဂၤ. ဒီပုၢ်ဝဲၢ်သးပှၢ် လၢအသးတီ ဒ်သိးဒီး ဒီပုၢ်ဝဲၢ်မုၣ်ဟဲရံထံၤန့ၣ် ကြၢးလၢပပာ်လုၢ်ပာ်ပှ့ၤ အဝဲသ့ၣ်လီၤ.
၁၃. ဒီပုၢ်ဝဲၢ်သးပှၢ်တဖၣ် မ့ၢ်ပှၤလုၢ်ဒိၣ်ပှ့ၤဒိၣ်လၢ ယဟိဝၤယွၤဒီး အတၢ်ကရၢကရိအဂီၢ်န့ၣ် ပသ့ၣ်ညါဘၣ်ဒ်လဲၣ်.
၁၃ ပဒီပုၢ်ဝဲၢ်သးပှၢ်တဖၣ်န့ၣ် မ့ၢ်ပှၤလုၢ်ဒိၣ်ပှ့ၤဒိၣ်လၢ ယဟိဝၤယွၤဒီး အတၢ်ကရၢကရိ အဂီၢ်လီၤ. အဝဲသ့ၣ်ထံၣ်ဘၣ် ယဟိဝၤယွၤဆိၣ်ဂ့ၤ အတၢ်ကရၢကရိဒီးအဝဲသ့ၣ် လၢကျဲအါဘိလီၤ. အဝဲသ့ၣ်မၤလိန့ၢ်ဘၣ် တၢ်လၢ တၢ်ကမၣ်လၢအဝဲသ့ၣ် မၤတ့ၢ်ဘၣ်ဝဲတဖၣ်လီၤ. ပကဘၣ်ထံၣ် အဝဲသ့ၣ်ဒ် “တၢ်ကူၣ်သ့အထံထီၣ်ပၢၢ်” ဒီးမၤလိန့ၢ် တၢ်လၢအဝဲသ့ၣ်အအိၣ်လီၤ. (ကတိၤဒိ ၁၈:၄) ပမ့ၢ်ရ့ဒီး ဒီပုၢ်ဝဲၢ်သးပှၢ်တဖၣ်န့ၣ် ပတၢ်နာ်ကဂၢၢ်ကျၢၤဒိၣ်ထီၣ် ဒီးပကမၤလိန့ၢ် တၢ်လၢအဝဲသ့ၣ် အအိၣ်အါမးလီၤ.
မၤလိန့ၢ်တၢ်လၢ ဒီပုၢ်ဝဲၢ်သးပှၢ်တဖၣ်အအိၣ် လၢလၢပှဲၤပှဲၤတက့ၢ်
ဒ်စီၤအလံၤၡါ မၤလိန့ၢ်တၢ်လၢ စီၤအ့ၤလံယၤအအိၣ်အသိးန့ၣ် ဒီပုၢ်ဝဲၢ်မုၣ်ခွါတဖၣ် မၤလိန့ၢ်တၢ်လၢ ဒီပုၢ်ဝဲၢ်သးပှၢ်လၢ အမၤယဟိဝၤယွၤတၢ်မၤ လၢအနံၣ်ယံာ်တဖၣ် အအိၣ်သ့ဝဲ (ကွၢ်လံာ်အဆၢ ၁၄-၁၅)
၁၄. ၅ မိၤၡ့ ၃၂:၇ န့ၣ် ဟ့ၣ်ဂံၢ်ဟ့ၣ်ဘါ ပှၤသးစၢ်တဖၣ်လၢ ကမၤတၢ်မနုၤလဲၣ်.
၁၄ ပကဘၣ်လဲၤတဲဆိတၢ်ဒီး ဒီပုၢ်ဝဲၢ်သးပှၢ်တဖၣ်လီၤ. (ဖး ၅ မိၤၡ့ ၃၂:၇ တက့ၢ်.) ဒီပုၢ်ဝဲၢ်သးပှၢ်တဖၣ် တထံၣ်တၢ်ဂ့ၤဂ့ၤလၢၤဘၣ်, ဟးထီၣ်ဟးလီၤတချ့လၢၤဘၣ် ဒီးတဲတၢ်လီၤကဘှၢ ဘၣ်ဆၣ် အဝဲသ့ၣ်သးဆူၣ်လၢ ကမၤကစၢ်ယွၤအတၢ်မၤ ဒီးအဝဲသ့ၣ်အိၣ်ဒီး “အမံၤအသၣ်ဂ့ၤ” လၢယဟိဝၤယွၤအမဲာ်ညါ. (စံၣ်တဲၤတဲလီၤတၢ် ၇:၁) ပကဘၣ်နီၣ်ထီၣ်လၢ ယဟိဝၤယွၤ ပာ်လုၢ်ပာ်ပှ့ၤအဝဲသ့ၣ်ဒီး ပကဘၣ်ဆဲးပာ်ကဲ အဝဲသ့ၣ်လီၤ. ပကဘၣ်လီၤဂာ်ဒ် စီၤအလံၤၡါအသိးလီၤ. ဖဲအဝဲသ့ၣ်အတၢ်လဲၤ အလီၢ်ခံကတၢၢ်တနံၤန့ၣ် စီၤအလံၤၡါအဲၣ်ဒိးအိၣ်ဒီး စီၤအ့ၤလံယၤတပူၤဃီ. စီၤအလံၤၡါတဲဘၣ်ဝဲ စီၤအ့ၤလံယၤသၢဘျီလၢ “ယတလီၤဖးဘၣ်ဒီးနၤဘၣ်.”—၂ စီၤပၤ ၂:၂, ၄, ၆.
၁၅. ပကဘၣ်သံကွၢ် ပှၤသးပှၢ်တဖၣ် တၢ်သံကွၢ်ဒ်လဲၣ်.
၁၅ ပကဘၣ်ပာ်ဖျါထီၣ် တၢ်သူၣ်အိၣ်သးအိၣ် ဒီပုၢ်ဝဲၢ်သးပှၢ်တဖၣ် ခီဖျိပသံကွၢ်အဝဲသ့ၣ် တၢ်သံကွၢ်တဖၣ်လီၤ. (ကတိၤဒိ ၁:၅; ၂၀:၅; ၁ တံၤမသ့း ၅:၁, ၂) ပကဘၣ်သံကွၢ် အဝဲသ့ၣ်လၢ “ဖဲနသးစၢ်အခါ နထံၣ်န့ၢ်တၢ်မ့ၢ်တၢ်တီလံန့ၣ် နသ့ၣ်ညါအီၤဒ်လဲၣ်.” “နတၢ်လဲၤခီဖျိတဖၣ်န့ၣ် မၤစၢၤနၤလၢ နကဘူးထီၣ်ဒီး ယဟိဝၤယွၤဒ်လဲၣ်.” “တၢ်မနုၤမၤစၢၤနၤလၢ နကမၤယဟိဝၤယွၤ အတၢ်မၤလၢ တၢ်သးခုအပူၤလဲၣ်.” (၁ တံၤမသ့း ၆:၆-၈) ဖဲအဝဲသ့ၣ်တဲဘၣ်နၤ အတၢ်လဲၤခီဖျိအခါ ဒိကနၣ်အီၤတက့ၢ်.
၁၆. ဖဲဒီပုၢ်ဝဲၢ်သးပှၢ်ဒီး ဒီပုၢ်ဝဲၢ်သးစၢ်တဲသကိးတၢ်အခါ အဝဲသ့ၣ်ခံဂၤလၢာ် ဒိးန့ၢ်ဘၣ် အဘျုးအဖှိၣ်ဒ်လဲၣ်.
၁၆ ဖဲဒီပုၢ်ဝဲၢ်သးပှၢ်ဒီး ဒီပုၢ်ဝဲၢ်သးစၢ်တဲသကိးတၢ်အခါ အဝဲသ့ၣ်ခံဂၤလၢာ် ဒိးန့ၢ်ဘၣ်အဘျုးအဖှိၣ်လီၤ. (ရိမ့ၤ ၁:၁၂) ယဟိဝၤယွၤ ကဟုကယာ်အခ့အပှၤ လၢအသးတီတဖၣ်ဒ်လဲၣ်န့ၣ် သုဝဲပှၤသးစၢ်တဖၣ် သုကပာ်လုၢ်ပာ်ပှ့ၤအီၤလီၤ. ဒီးဒီပုၢ်ဝဲၢ်သးပှၢ်တဖၣ် ကတူၢ်ဘၣ်ဝဲလၢ ပှၤအဲၣ်အဝဲသ့ၣ်. ဒီးအဝဲသ့ၣ်ကတဲပၠးနၤ တၢ်ဆိၣ်ဂ့ၤလၢ အဒိးန့ၢ်ဘၣ်လၢ ယဟိဝၤယွၤအအိၣ်တဖၣ်လီၤ.
၁၇. ဘၣ်မနုၤလဲၣ်အဃိ ပတဲသ့လၢ ဒ်တၢ်ဆၢကတီၢ် လဲၤပူၤကွံာ်အသိး ပှၤသးပှၢ်တဖၣ် အတၢ်ဃံတၢ်လၤ ဟဲအိၣ်အါထီၣ်ဝဲလဲၣ်.
၁၇ ဒ်တၢ်ဆၢကတီၢ် လဲၤပူၤကွံာ်ဝဲအသိး ပှၤတဂၤအတၢ်ဃံတၢ်လၤ ကလီၤမၢ်ဝဲ ကယီကယီ. ဘၣ်ဆၣ် ပှၤလၢအသးတီဒီး ယဟိဝၤယွၤန့ၣ် ဒ်တၢ်ဆၢကတီၢ် လဲၤပူၤကွံာ်အသိး အတၢ်ဃံတၢ်လၤ လၢယဟိဝၤယွၤအမဲာ်ညါန့ၣ် ကဟဲအါထီၣ်ဝဲလီၤ. (၁ သ့းစၤလနံ ၁:၂, ၃) ဘၣ်မနုၤအဃိ ပတဲဒ်န့ၣ်လဲၣ်. ခီဖျိလၢအဝဲသ့ၣ် ပျဲလၢယဟိဝၤယွၤ ကသိၣ်လိဒီး မၤစၢၤအဝဲသ့ၣ် လၢကမၤအိၣ်ထီၣ် ခရံာ်ဖိအတၢ်ဂ့ၤတၢ်ဝါတဖၣ်လီၤ. ပမ့ၢ်ရ့အါထီၣ်ဒီး ဒီပုၢ်ဝဲၢ်သးပှၢ်တဖၣ်န့ၣ် ပကပာ်ကဲအဝဲသ့ၣ်, မၤလိန့ၢ်တၢ်လၢအဝဲသ့ၣ်အအိၣ် ဒီးပကထံၣ် အဝဲသ့ၣ်ဒ် တၢ်လုၢ်ဒိၣ်ပှ့ၤဒိၣ် အသိးလီၤ.
၁၈. တၢ်မၤလိလၢခံတခါန့ၣ် ပကတဲသကိး တၢ်မနုၤလဲၣ်.
၁၈ ဖဲပှၤသးစၢ်တဖၣ် ပာ်လုၢ်ပာ်ပှ့ၤပှၤသးပှၢ် ဒီးပှၤသးပှၢ်တဖၣ် ပာ်လုၢ်ပာ်ပှ့ၤ ပှၤသးစၢ်အခါ တၢ်အိၣ်ဖှိၣ်ဂၢၢ်ကျၢၤဒိၣ်ထီၣ်ဝဲလီၤ. တၢ်မၤလိလၢခံတခါ ပကတဲသကိး ပှၤသးပှၢ်တဖၣ် ပာ်ဖျါထီၣ်လၢ အပာ်လုၢ်ပာ်ပှ့ၤ ပှၤသးစၢ်ကသ့ဒ်လဲၣ်.
တၢ်သးဝံၣ် ၁၄၄ ကွၢ်ဆူခိၣ်ဖးထီဘိ
^ လံာ်အဆၢ. 5 ဒီပုၢ်ဝဲၢ်သးပှၢ်လၢ အသးတီတဖၣ်န့ၣ် လီၤဂာ်ဒ် တၢ်လုၢ်ဒိၣ်ပှ့ၤဒိၣ်တဖၣ်လီၤ. လၢတၢ်မၤလိအံၤအပူၤ ပကမၤလိဘၣ်လၢ ပအဲၣ်ဒီပုၢ်ဝဲၢ်သးပှၢ်တဖၣ် ဒီးပာ်ကဲအါထီၣ်အဝဲသ့ၣ် ကသ့ဒ်လဲၣ်. ဒီးပမၤလိန့ၢ်တၢ်ကူၣ်သ့ဒီး တၢ်လဲၤခီဖျိလၢအဝဲသ့ၣ်အအိၣ် ကသ့ဒ်လဲၣ်. ပမ့ၢ်ပာ်ကဲဒီး အဲၣ်ဒီပုၢ်ဝဲၢ်သးပှၢ်တဖၣ်န့ၣ် အဝဲသ့ၣ်ကတူၢ်ဘၣ်ဝဲလၢ အမ့ၢ်ပှၤလုၢ်ဒိၣ်ပှ့ၤဒိၣ်လၢ ယဟိဝၤယွၤ အတၢ်ကရၢကရိအပူၤလီၤ.
