1-2. a) Mutindu ke zonzá Bingana 16:31, wa’ faso beto me lunga kutadila bampangi ya beto yina me nuná? b) Na wapi byuvu beto ke kuzwa bamvutu na artikle yayi?

 NA BRUSE mosi ya kitoko na États-Unis, bantu ke kwendá talá bibulu mpe bayinti. Na kote yango, ya ke ve mpasi na kulokota matadi ya ntalu to diamants. Kasi, samu matadi yango ke ya kuvukana na ntoto, bantu mingi ke lendá ve kuzaba ti ya ke na valere ya mingi. Na yawu, ba lenda luta pene-pene na matadi yango, mpe kukanisa ve kulokota yawu.

² Faso matadi yayi ya ntalu, bampangi ya beto yina me nuná ke na valere ya mingi. Biblia ke zonzá ti bansuki ya mpembe ke faso yimpu ya kimfumu. (Tanga Bingana 16:31; 20:29) Kasi, si beto sala ve keba, beto lenda tala bawu faso bantu ya mpamba. Si beto ndima ti bampangi ya beto yina me nuná ke ntalu, beto ke kuzwa na bawu bima yina me lutila bimvwama na valere. Na artikle yayi, beto ke kuzwa bamvutu na byuvu yayi: Samu na yinki bampangi yina me nuná ke ntalu na meso ya Yehova? Samu na yinki ba ke mfunu na kati ya kimvuka? Wa’ faso beto lenda longoka na sika ya bawu?

3. Faso me zonza Nkunga 92:12-15, samu na yinki bampangi yina me nuná ke ntalu na meso ya Yehova?

³ Bampangi ya beto yina me nuná ke ntalu na meso ya Yehova. Yandi zaba mbote-mbote faso ke bantima ya bawu. Mpe yandi ke sepelá mingi na bifu ya bawu ya mbote. Yandi ke vandá na kilengi ntangu ba ke kabulá mayela yina ba me kuzwa luzingu ya bawu nyonso na kisalu ya yandi, na bampangi yina  ke ntete jeune. (Yobi 12:12; Bin. 1:1-4) Yehova ke mpe na kilengi yina ba me vanda ya kukangama na yandi luzingu ya bawu nyonso. (Mal. 3:16) Ata ba kutaná na bampasi, kiminu ya bawu vandá kaka ngolo. Kivuvu ya bawu bubu yayi me lutila ngolo na ntangu yina ba zabá mbala ya ntete mambu ya Yehova. Mpe Yehova ke zolá bawu samu ba me bika ve kuzonzila nkumbu ya yandi ‘ata na buboba.’—Tanga Nkunga 92:12-15.

4. Yinki lenda pesa ngolo na bampangi ya kento na ya bakala yina me nuná?

⁴ Si bubu yayi nge me nuná, zaba na ntima ya nge nyonso ti Yehova me zimbana ata fioti ve kisalu yina nge salá na ntama. (Ebr. 6:10) Nge salá na tiya nyonso kisalu ya predikasion, mpe nge pesá Tata ya nge ya zulu kilengi. Nge kangá ntima na mantwala ya bakwamusu mpe bampasi. Nge landá misiku ya Nzambi mpe nge biká ve kusadila yawu ata ntangu bantu ya nkaka vandá sosa kunata nge na kusala dyaka ve yawu. Na ntima mosi, nge salá bisalu yina ba vandá pesa nge na kati ya organizasion ya Yehova, mpe nge sadisá bampangi ya nkaka na kuzaba faso ya kusala bisalu ya nkaka. Nge vandá salá nyonso samu na kulanda malongi mpe bafaso ya kusala ya malu-malu yina organizasion ya Yehova vandá nata. Nge sadisá mpe nge pesá bukindi na ba yina vandá sala kisalu ya ntangu nyonso. Yehova Nzambi ke zolá nge mingi samu nge ke ya kukangama na yandi. Yandi zonzá ti ‘yandi ke bika ve bantu yina ke ya kukwikama.’ (Nku. 37:28) Yandi me zonza dyaka na nge mambu yayi: ‘Tii ntangu nsuki ya beno ke kuma mpembe, mu ke lemba ve kubaka kilo ya beno.’ (Iza. 46:4) Na yawu, kukanisa ve ti samu nge me nuna, nge me sadila deja ntangu ya nge. Nge ke ntete na kisalu na kati ya organizasion ya Yehova.

5. Yinki ba yina me nuná zolá zimbana ve?

⁵ Bampangi yina me nuná ke na mingi ya kupesa. Ata ba lenda vanda ve na ngolo ya mingi, kasi ba zaba bamambu mingi samu na bamvula nyonso yina ba me lutisa na kisalu ya Yehova. Na yawu, Yehova lenda sadila bawu na bafaso mingi. Beto ke tala ba-ekzample yina ke na lakisak’ yawu.

6-7. Zonzila bisadi ya Yehova ya kununa yina kuzwá bima ya mbote samu ba vandá ya kukangama na yandi.

 ⁶ Na Biblia, ya ke na masolo ya bantu yina lembá ve kusadila Yehova ata ntangu ba nuná. Na kifwani, Moyize vandá na bamvula 80 ntangu yandi kumá profete ya Yehova mpe ntwadisi ya dikanda ya Izraele. Ata ntangu Danyele lutá bamvula 90, Yehova vandá sadilá kaka yandi faso profete. Apotre Yoane mpe lutá ntangu ya nkaka bamvula 90 ntangu Yehova sadilak’ yandi samu na kusonika buku ya Luzabusu.

⁷ Bisadi mingi ya nkaka ya Yehova ya kununa vandá ve ya kuzabana. Kasi, Yehova talá bawu mpe pesá bawu bima ya mbote samu ba vandá ya kukangama na yandi. Na kifwani, Siméon vandá ‘muntu ya mbote mpe yina ke wá Nzambi boma.’ Ata Biblia ke zonzilá ve mingi yandi, kasi Yehova talak’ yandi mpe pesak’ yandi bweso ya kutala Yesu ntangu Yesu vandá mwana fioti. Mpe yandi zonzilá profesi mosi yina zolá lungana na Yesu mpe na Marie. (Luke 2:22, 25-35) Beto kanisa mpe na Anne, kisadi mosi ya Yehova yina fwidilá bakala. Ata ntangu yandi kumá na bamvula 84, yandi “[vandá] katuka ve na Yinzo ya Nene ya Nzambi.” Samu yandi vandá ntangu nyonso na balukutakanu, yandi mpe kuzwá bweso ya kutala Yesu ntangu Yesu vandá mwana fioti. Siméon na Anne vandá na valere ya mingi na meso ya Yehova.—Luke 2:36-38.

8-9. Zonzila kifwani mosi yina ke na lakisá ti bampangi ya kento yina me fwidila babakala ke salá kaka mingi samu na Yehova?

⁸ Bubu yayi, bampangi yina me nuná ke bifwani ya mbote samu na ba-jeune. Beto zonzila mpangi ya kento Loïs Didur. Yandi vandá kaka na bamvula 21 ntangu yandi banda kisalu ya pionye spesial na Canada. Ntangu yandi kwelá, yandi na bakala ya yandi John, lutisá bamvula mingi na kisalu ya sirkonskripsion. Na manima, ba lutisá bamvula 20 na Betel ya Canada. Ntangu Loïs lungisá bamvula 58, ba filisá yandi na John na Betel ya Ukraine. Yinki ba zolá sala? Samu ba nuná, ba zolá ndima kwandi kukwenda sala na bwala ya nkaka? Ba ndimá kukwenda. Kuna, John kumá mosi ya bampangi ya komite ya filiale. Na manima ya bamvula 7, John kufwá. Kasi, Loïs bikaná na Ukraine. Bubu yayi, Loïs me kuma na bamvula 81, mpe yandi ke kaka na salá na Betel ya Ukraine. Bampangi ya Betel ke zolak’ yandi mingi.

⁹ Ya ke ve mpasi na kupesa buzitu na mpangi ya kento yina ke na bakala yina ke na baresponsabilite mingi. Kasi, ntangu faso Loïs, yandi ke fwidilá bakala, beto lenda banda kupesa dyaka ve yandi valere faso na ntama. Yehova ke pesá valere na bampangi ya kento yina salá mingi na kote ya babakala ya bawu, mpe yina bubu yayi ke kaka ya kukangama na yandi. (1 Tim. 5:3) Kifwani ya bawu ke pesá bampangi ya nkaka nsatu ya kusala mingi.

10. Yinki kifwani ya mpangi Tony ke na longá beto?

¹⁰ Bampangi ya beto ya kununa yina ke basiká dyaka ve na bayinzo ya bawu ke mpe na valere  ya mingi. Na kifwani, Tony, mpangi mosi ya bakala ke vandá na yinzo yina ba ke kipeke bantu ya kununa. Yandi kuzwá bateme na Pennsylvanie, mosi ya babwala ya États-Unis na Août 1942, ntangu yandi vandá na bamvula 20. Mwa ntangu fioti na manima ya bateme ya yandi, guvernema zonzá na yandi na kukuma militere. Samu yandi mangá, ba filisak’ yandi na boloko mpe kuna, yandi salá bamvula zole na ndambu. Yandi, na kento ya yandi Hilda, sadisá bana ya bawu zole na kukuma Batemwe ya Yehova. Na kati ya bamvula mingi, na bimvuka tatu yina yandi lutá, Tony vandá kordinatere ya kimvuka ya bakuluntu. Yandi vandá mpe ntwadisi ya komite ya balukutakanu ya nene. Yandi vandá longá mambu ya Biblia na ba yina vandá na boloko mpe vandá salá balukutakanu kuna. Ata yandi ke na bamvula 98 bubu yayi, Tony ke na talá ve ti ntangu ya yandi me luta. Yandi ke na salá bangolo samu na kubika ve kusadila Yehova na bampangi ya yandi ya kimvuka.

11. Wa’ faso beto lenda lakisa ti bampangi ya beto ya kununa ke ntalu na meso ya beto?

¹¹ Bampangi ya beto ya kununa yina ke ya kukangama na bayinzo ya bawu to yina ke vandá na bantu ya famiye ya bawu yina ke ve Batemwe, ke ntalu na meso ya beto. Wa’ faso beto lenda lakisa yawu? Bakuluntu lenda sadisa bawu na kulanda balukutakanu to kupreche depwi bayinzo ya bawu. Mosi na mosi ya beto lenda lakisa ti yandi ke zolá bawu si yandi kwenda tala bawu to bokila bawu na telefone. Si beto sala ve keba, beto lenda zimbana bawu. Ntangu beto ke sololá na bawu, beto zimbana ve ti ya lenda vanda mpasi na ba ya nkaka, na kuzonzila bamambu yina ke na bawu. Kasi, beto ke kuzwa bambote mingi si beto baka ntangu ya kunata bawu na kuzonzila beto bamambu nyonso ya mbote yina ba me tala na kati ya organizasion ya Yehova.

12. Yinki beto lenda kuzwa na kimvuka ya beto?

¹² Si beto tala na kati ya kimvuka ya beto mpe, ya ke na bampangi yina me nuná yina ke ba-ezample ya mbote. Harriette, mpangi mosi ya kento sadilá Yehova bamvula mingi na kati ya kimvuka ya yandi na New Jersey, mosi ya babwala ya États-Unis. Na manima, yandi kwendá vanda na mwana ya yandi ya kento. Bampangi ya kimvuka ya kote yina yandi kwendá sosá kuzaba yandi mbote-mbote, mpe ba kwizá tala ti yandi vandá ntalu mingi. Yandi vandá zonzila bawu faso predikasion vandá lutila ntangu yandi kumá Temwe ya Yehova na kati ya bamvula 1920. Masolo ya yandi vandá pesa bawu ngolo. Na kifwani, yandi zonzilá bawu ti ntangu nyonso yandi vandá basiká na predikasion, yandi vandá na brosse à dents ya yandi. Yandi vandá natak’ yawu samu ti si ba kanga yandi mpe ba tula yandi na boloko, yandi ke lenda kusukula yinwa ya yandi. Ni yina mpe salamá. Bambala zole na 1933, yandi lutisá bilumbu 7 na boloko. Bakala ya yandi vandá ve Temwe ya Yehova. Kasi, na kati ya bantangu yina Harriette vandá na boloko, yandi vandá kipe na faso ya mbote bana ya bawu tatu yina vandá ntete fioti. Ntembe ve, bampangi ya kununa faso Harriette ke ntalu mingi.

13. Yinki beto me longoka na plase yina bampangi ya kununa ke na yawu na kati ya kimvuka?

¹³ Bampangi yina me nuná ya kento na ya bakala ke na plase ya bawu na kati ya kimvuka. Ba me tala na bafaso mingi diboko ya Yehova na kati ya luzingu ya bawu mpe na organizasion ya yandi. Samu ba ke bantu ya masumu, ntangu ya nkaka, ba salá bamambu yina vandá ve ya kulunga. Kasi, ba longoká na yawu. Tadila bawu faso “kiteko ya mayela,” mpe longoka na bawu. (Bin. 18:4) Si nge baka ntangu ya kuzaba bawu, kiminu ya nge ke kuma ngolo, mpe nge ke longoka bamambu mingi.

14. Yinki Kulonga Misiku 32:7 ke zonzá na beto na kusala?

¹⁴ Sosa kusolola na bampangi yina me nuná. (Tanga Kulonga Misiku 32:7.) Ya vrai, meso ya bawu ke talá dyaka ve na faso ya mbote. Ba ke zonzá mpe ba ke tambulá malembe. Kasi, ntima ya bawu me nuna ve mpe ba ke na “nkumbu ya mbote” na mantwala ya Yehova. (Lon. 7:1) Kuzimbana ve samu na yinki Yehova ke zolá bawu. Kulemba ve na kupesa bawu buzitu. Vanda faso Elize. Kilumbu yina Eli zolá kwenda ntama na yandi, yandi mangá kubika yandi. Bambala tatu Elize zonzá na Eli: “Mu ke bika ve nge.”—2 Mf. 2:2, 4, 6.

15. Wapi bakesion nge lenda yufula na mpangi mosi yina me nuná?

¹⁵ Na kulakisa ti nge ke zolá bawu, na ntima ya mbote nyonso, yufula bawu bakesion. (Bin. 1:5; 20:5; 1 Tim. 5:1, 2) Nge lenda yufula bawu bakesion yayi: “Yinki natá nge na kundima ti mambu yina Batemwe ya Yehova vandá zonza na nge vandá matsyeleka?” “Wa’ faso bamambu yina kuminá nge na luzingu sadisá nge na kukuma pene-pene na Yehova?” “Yinki sadisá nge na kubumba kilengi ya nge na kisalu ya Yehova?” (1 Tim. 6:6-8) Na manima ya kuyufula bakesion, kuwa mambu yina ba ke zonzila nge.

16. Wa’ faso kusolola na mpangi yina me nuná ke natina beno zole bambote?

¹⁶ Si nge solola na mpangi yina me nuná, beno zole ke kuzwa bambote. (Rom. 1:12) Nge ke kwiza tala faso Yehova ke kipeke bisadi ya yandi, mpe mpangi yina me nuná ke tala ti ba ke zolak’ yandi. Yandi ke vanda na kilengi ya kuzonzila nge bima ya mbote yina Yehova me pesa yandi.

17. Samu na yinki beto lenda zonza ti bampangi ya beto yina me nuná ke dyaka kitoko ya kulutila?

¹⁷ Ata banzutu ya bawu ke dyaka ve kitoko faso na ntama, kasi kimuntu ya kati ya bampangi yina me nuná ke kwendá kumá kaka kitoko. (1 Tes. 1:2, 3) Samu na yinki? Samu na kati ya bamvula mingi, ba me bika mpeve ya santu ya Nzambi kubongisa kimuntu ya bawu, mpe kukulisa bifu ya mbote na kati ya bantima ya bawu. Si beto baka ntangu ya kuzaba bawu, kupesa bawu buzitu, mpe kulongoka na bawu, ba ke kuma dyaka ntalu na meso ya beto.

18. Yinki beto ke zonzila na artikle ke landa?

¹⁸ Kimvuka na kukuma ngolo, bampangi yina me nuná mpe zolá pesa valere na bampangi ya jeune. Na artikle ke landa, beto ke tala faso ba lenda sala yawu.