1-2. (a) Kweelana a Tushimpi 16:31, ino bacinene bashomeka tulyeelete kunoobabona buyani? (b) Ino njimiipusho nshi njeshi tucane shikumbulo mumutwi uyu?

 KULI musena umwi ku U.S.A., nkweenga mwacaana mabwe amakwebo eetwa ayi diamond patubabo. Sombi mabwe ayo tabana kwaabotesha kwaamba ayi muntu inga wapangamo cintu cimwi. Aboobo abo babona mabwe aya, inga tabashibi kwaamba ayi ngamabwe amakwebo alimwi inga baeendililabo.

² Bweenka mbuli mabwe eetwa ayi diamond, bamakwesu abenankashi bacinene mbuboni buyandika abuumbi. Maswi akwe Lesa alakoshanisha mfwi sha bacinene aba kumushini. (Amubelenge Tushimpi 16:31; 20:29) Nacibi boobo, inga katubona bacinene aba anga tabayandiki. Na bacanike banyumfwishisha kwaamba ayi bacinene balayandika, baleeya shintu shiyandika abuumbi kwiinda buboni. Mumutwi uyu, tutocana shikumbulo kumiipusho yotatwe: Ino nceebonshi Yehova alabona bacinene bashomeka ayi balayandika? Ino nceebonshi bamakwesu abenankashi bacinene balayandika mulibunga lyakwe Yehova? Ino nshiinshi nsheenga twaciita kwaamba ayi twiiye kucakubonenaako cabo?

3. Kweelana a Kulumbaisha 92:12-15, ino nceebonshi bacinene bashomeka balayandika kuli Yehova?

³ Bacinene bashomeka balayandika kuli Yehova Lesa. Alibeshi kabotu alimwi alalumba abuumbi pamibo ibotu njebacite. Alasangalala na bacinene kabalwiitako bacanike, nshobeeya kwamyaaka iinji njobasebensela Yehova cakushomeka. (Jobo 12:12; Tus. 1:1-4) Alimwi Yehova alalumba pakuliyumya kwabo. (Mala.  3:16) Nabi kwaamba ayi bakalinga kwiinda mumapensho, bakatolelela kuba alushomo luyumu muli Yehova. Lushomo ndobacite mushintu nshebatolangila nduyumu kwiinda mbolwakalinga ndyebakeeyabo cancine. Alimwi Yehova alibasuni mukwiinga batolelela kushimikila paliina lyakwe nabi ‘bacembela.’​—Amubelenge Kulumbaisha 92:12-15.

4. Ino nshiinshi sheenga shayuminisha bamakwesu abenankashi bacinene?

⁴ Na mutooya cicembela, amushome kwaamba ayi Yehova aleebaluka nshomwakacita kale kale. (Ebu. 6:10) Yehova alasangalala ceebo cakusebensa cankusu kwanu muncito yakushimikila. Mwaliyumya mumapensho, kwiilikaawo aayo akamupa kulinyumfwa cibiibi abuumbi. Mwakonkela njiisho shamu Baibo shiluleme, mwakalinga kucite mikuli inene alimwi mwakaiishako bamwi. Mwacita nsheenga mwacikonsha kwaamba ayi mukonkele kwaaluka kucitwa mulibunga lyakwe Yehova. Mulayuminisha akucafwa baabo bali muncito yaciindi coonse. Yehova Lesa alimusuni abuumbi ceebo cakushomeka kwanu. Wakashomesha ayi teshi ‘akalekeleshe bantu bakwe bashomeka’! (Kulu. 37:28) Wakamushomesha ayi: “Ndanoomulama kushikila misusu yanu yaakutuba.” (Isa. 46:4) Aboobo, mutanoobona ayi ceebo cakwaamba ayi mwacembela, tamuyandiki mulibunga lyakwe Yehova. Mulayandika abuumbi!

5. Ino nciinshi bacinene ncobeelete kunokwiibaluka?

⁵ Kuli shiinji bacinene nsheenga bacita mulibunga lyakwe Yehova. Nabi kwaamba ayi nkusu shabo inga shaceya, balicite lushibo abuumbi ndobeeya kwamyaaka iinji. Yehova inga watolelela kubasebensesha munshila shiinji shipusenepusene, kweelana ambweshi tubone mushakubonenaako shitokonkelaawo shakale kale asha munshiku shino.

6-7. Amwaambe shakubonenaako shamu Baibo sha bacinene bakapekwa shoolwe ceebo cakusebensela Yehova cakushomeka.

⁶ Mu Baibo muli shakubonenaako shiinji shibotu sha bantu bashomeka abo bakatolelela kusebensela Yehova nabi ndyebakacembela. Kucakubonenaako, Mose wakalinga kucite myaaka 80 ndyaakatalika kusebensa mbuli mushinshimi wakwe Yehova alimwi shikwiimikaninaako bene Isilaeli. Yehova wakatolelela kusebensesha Danyelo mbuli mushinshimi  nabi mpashi ndyaakalinga kucite myaaka iindilila 90. Alimwi mutumwi Joni alakwe alyeelete wakalinga kucite myaaka yamuma 90 ndyaakatanjililwa a mushimu usalashi kulemba libuku lya Ciyubululo.

⁷ Bantu bamwi bashomeka tabakalinga kupukite alimwi bamwi mpashi bakalinga kubasuula. Sombi Yehova wakalinga kubeshi alimwi wakabapa shoolwe ceebo cakushomeka kwabo. Kucakubonenaako, Baibo tayaambi shiinji pali Simyoni musankwa wakalinga ‘kululeme alimwi ulemeka Lesa,’ sombi Yehova wakalinga kumushi kabotu alimwi wakamupa coolwe cakubona Yesu ndyaakalinga kateta akwaamba bushinshimi bwakalinga kwaamba pali Yesu abanyina. (Luka 2:22, 25-35, NWT) Amuyeeye a pa mushinshimi mwanakashi waliina lya Aana. Nabi kwaamba ayi wakalinga kucite myaaka 84, lyoonse “wakalinga kuya kuŋanda yakwe Lesa.” Ceebo cakwaamba ayi wakalinga kuya ku tempele lyoonse, Yehova wakamupa coolwe cakubona Yesu ndyaakalinga kateta. Simyoni a Aana boonse bakalinga kuyandika kuli Yehova.​—Luka 2:36-38.

8-9. Ino nshiinshi nankashi umwi nshaakasalawo kucita mulibunga lyakwe Yehova ndyaakaba mukalubinje?

⁸ Munshiku shino, bacinene baanji bashomeka nshakubonenaako shibotu abuumbi kubacanike. Amuyeeye pacakubonenaako cakwe nankashi wacinene waliina lya Lois Didur. Wakalinga kucite myaaka 21 ndyaakatalika kusebensa bupainiya bulibetele ku Canada. Pesule lyakutalika kusebensa ncito iyi lakwe abeebaye ba John bakasebensa muncito yalubasu kwamyaaka iinji. Mukuya kwaciindi bakasebensela ku Bethel yaku Canada kwamyaaka iindilila 20. Ba Lois ndyebakalinga kucite myaaka 58, balo aba John bakapekwa coolwe cakuya mukusebensela ku Ukraine. Ino bakacita buyani? Sa bakayeeya ayi bacembela abuumbi aboobo inga tabacikoonshi kuya mukusebensela kucishi kumwi? Bakasumina ncito njebakapekwa alimwi ba John bakasalwa kuba womwi wa Mukomiti Yamusampi. Ndyepakeenda myaaka 7 kuswa ciindi ba John ndyebakafwa, ba Lois bakasalawo kutolelela kusebensela ku Ukraine. Pacecino ciindi ba Lois balicite myaaka 81. Batolelela kusebensela Yehova cakushomeka pomwi abamakwesu abenankashi bapa Bethel yaku Ukraine alimwi boonse balibasuni.

⁹ Bamukalubinje mbuli ba Lois inga tabashibikwi bunene mbuli mbobakalinga kushibikitwe beebabo kabacili boomi. Nacibi boobo, balayandika abuumbi. Benankashi abo batolelela kusebensela Yehova cakushomeka alimwi abo bakalinga kucafwilisha beebabo kwamyaaka iinji, Yehova alababona ayi balayandika abuumbi. (1 Timo. 5:3) Alimwi balayuminisha bacanike.

10. Ino ncakubonenaako nshi cibotu abuumbi ba Tony ncobakatondesha?

¹⁰ Bacinene baanji bashomeka abo bekala mumisena mobalamina bacinene abalo balayandika. Kucakubonenaako, mukwesu waliina lya Tony alekala kumusena nkobalamina bacinene. Mukwesu uyu wakabombekwa mu August 1942  ku Pennsylvania, U.S.A., kaacite myaaka 20. Ndyepakeendabo ciindi ciniini pesule lya kubombekwa, wakalwiitikwa kunjila busoja. Ano ceebo cakwaamba ayi wakakaka, bakamubika mujeele kwamyaaka yobilo amyeenshi 6. Lakwe abakaakwe ba Hilda bakalinga kucite baana bobilo abo mbobakeeisha cancine. Kwamyaaka iinji mukwesu Tony wakasebensela mumabungano otatwe mbuli mutanjili walibungano (uyo wiitwa ayi shikubunganya likoto lya bamanene pacecino ciindi) alimwi wakasebensa ambuli mutanjilili wakubungana kwalubasu. Wakalinga kuya kujeele mukutanjilila mabungano akucita shiiyo sha Baibo. Ba Tony balicite myaaka 98, sombi batolelela kusebensela Yehova. Batolelela kucita shoonse nsheenga bacikonsha kusebensela Yehova pomwi abamakwesu abenankashi mulibungano mobabete!

11. Ino inga twacita buyani kwaamba ayi tutondeshe bulemu kubacinene bekala beenka?

¹¹ Ino inga twacita buyani kwaamba ayi tutondeshe bulemu kubacinene bekala beenka? Na kacikonsheka, bamanene inga babacafwa kukutika na kucanika kumabungano alimwi akushimikila. Inga twatondesha ayi tulababikila maano kwiinda mukubafwakashila na kubatuminaako fooni, kubandikaabo pa vidyo. Tulisuni kubikila maano abuumbi kubacinene bekala kulaale a libungano linemishaabo. Ndyetutobandika abamakwesu abenankashi bacinene, bamwi inga cababeta ciyumu kutulwiita shakabacitikila. Sombi tulaakuyuminishikwa abuumbi na tukacane ciindi cakubeepusha miipusho alimwi akukutika ndyebatotulwiita lusangalalo ndobacana mulibunga lyakwe Yehova.

12. Ino mbamakwesu abenankashi bali buyani mbeenga twacaana mulibungano linemisheesu?

¹² Inga twakankamana kushiba kwaamba ayi tulicite shakubonenaako shibotu abuumbi sha bacinene bashomeka mulibungano linemisheesu. Nankashi waliina lya Harriette wakasebensela Yehova cakushomeka kwamyaaka iinji mulibungano linemishaabo ku New Jersey, U.S.A. Lyalo wakalonga akuya mukutalika kukala a mwanaakwe mwanakashi. Bamakwesu mulibungano lipya mwaakaya bakacana ciindi cakumushiba kabotu alimwi bakacana ayi ncakubonenaako cibotu abuumbi ca lushomo. Wakabayuminisha kwiinda mukubalwiitako mbwakalinga kusebensa ncito yakushimikila ndyaakeeyabo cancine mumyaaka yamuma 1920. Paciindi cilya lyoonse wakalinga kunyamuna muswaaki na atooya muncito yakushimikila mukwiinga wakalinga kuyeeya ayi inga bamucata akumubika mujeele kwakaciindi. Alimwi ishi nsheshakacitika mu 1933. Mankanda obilo wakaangwa kwa nsondo yomwi mujeele. Nabi kwaamba ayi beebabo tabakalinga Bakamboni, paciindi ba Harriette ndyebakalinga mujeele bakalinga kubabikila maano abuumbi alimwi akulama bana babo baniini botatwe. Ncakutatoonsha kwaamba ayi bacinene bashomeka mbuli ba Harriette balyeelete kulumbwa!

13. Ino nshiinshi nshotweeya pakuyandika kwa bacinene mulibunga lyakwe Yehova?

¹³ Bamakwesu abenankashi bacinene balayandika abuumbi kuli Yehova amulibunga lyakwe. Babona Yehova mbwaapa shoolwe libunga lyakwe alimwi ambabo munshila shiinji shipusenepusene. Bakeeya shiinji shiyandika kushilubo nshebakacita. Munoobabona mbuli “kantupu kabusongo” akwiiya kuli mbabo. (Tus. 18:4) Na mukacane ciindi cakubashiba kabotu lushomo lwanu lulaakuyuminaako alimwi mulaakwiiya shiinji!

14. Ino lilembo lya Dutolonomi 32:7 lilayuminisha bacanike kucita nshi?

¹⁴ Amucane ciindi cakubandika abacinene. (Amubelenge Dutolonomi 32:7.) Nabi kwaamba ayi inga kabataboni kabotu, inga kabeenda  paniini paniini alimwi inga kabaamba paniini paniini, balisuni kutolelela kusebensela Yehova alimwi bakapanga liina libotu anguwe. (Shiku. 7:1) Munookwiibaluka cipa kwaamba ayi Yehova anoobabona ayi balayandika. Amutolelele kubatondesha bulemu. Amube mbuli Elisha. Wakakaka kupansaana a Elija bushiku bwakweelaako kuba pomwi anguwe. Mankanda otatwe Elisha wakaamba ayi: “Teshi mpansaaneewo amwebo.”​—2 Baam. 2:2, 4, 6.

15. Ino njimiipusho nshi njeenga tweepusha bacinene?

¹⁵ Amutondeshe ayi mulibasuni bacinene kwiinda mukubeepusha miipusho cabulemu. (Tus. 1:5; 20:5; 1 Timo. 5:1, 2) Inga mwabeepusha miipusho mbuli: “Ino nciinshi cakamupa kushoma cakutatonsha kwaamba ayi mwacana cancine?” “Ino shakamucitikila shakamucafwa buyani kuba abushicibusa buyumu a Yehova?” “Ino nciinshi cimucafwa kutolelela kuba a lusangalalo muncito yakwe Yehova?” (1 Timo. 6:6-8) Lyalo amukutike ndyebatomulwiita shakabacitikila.

16. Ino kubandikishanya inga kwacafwa buyani bacinene abacanike?

¹⁶ Bacinene abacanike ndyebatobandika, boonse balayuminishikwa. (Loma. 1:12) Mwebo nobacanike lushomo lwanu lwakwaamba ayi Yehova alabikila maano kubasebenshi bakwe bashomeka lulaakuyuminaako, lyalo bacinene balaakulinyumfwa ayi mulibasuni. Balaakusangalala kumulwiita Yehova mbwabapa shoolwe.

17. Ino nceebonshi nceenga twaambila ayi bacinene balaya cibotelaako?

¹⁷ Kuboneka kabotu kulaya cimana muntu ndyatooya cicembela, sombi abo bashomeka kuli Yehova balaya cibotelaako. (1 Tesa. 1:2, 3) Ino nceebonshi ncocibetele boobo? Cili boobo mukwiinga balatolelela kusuminisha mushimu wakwe Lesa kubaiisha akubacafwa kuba amibo ibotu. Na twatolelela kushiba bamakwesu abenankashi aba bayandika, kubalemeka akwiiya kuli mbabo, tulaakunoobabona ayi mbuboni buyandika abuumbi!

18. Ino nshiinshi nsheshi tukeeye mumutwi utokonkelaawo?

¹⁸ Libungano lilayuma kuteshibo na bacanike kababona ayi bacinene balayandika, sombi na bacinene abalo kababona ayi bacanike balayandika. Mumutwi utokonkelaawo, tulaakwiiya mbweenga bacinene batondesha ayi balabona ayi bacanike balayandika mulibungano.