1-2. (a) Kwesekeja naYishimu 16:31, twatela kayimonaña ñahi amanakwetu niahela ashinakaja dehi? (b) Malwihwinyi itukwakula muchinu chibaaba?

KUUNITED STATES, kwekala iluña kumunateli kuwana dayimondi hamaseki. Hela chochu, iyi dayimondi yekala yakukosa wanyi. Dichi antu amavulu ayimonaña iyi dayimondi, ayihitaña nakutoñojoka nawu hiyalemaku.

² Munjila yoyimu, amanakwetu niahela ashinakaja dehi adi neyi iyi dayimondi, alema chikupu. Izu daNzambi desekeja invu jawu nachibañula. (Tañenu Yishimu 16:31; 20:29) Chinateli kwila chaswayi kuyimona netu alema wanyi. Atwansi amonaña nawu atushinakaji alema nankashi, adizilañaku yuma yayivulu kudi wena. Muchinu chibaaba, tukwakula malwihu asatu: Muloñadi Yehova chayimwenañayi amanakwetu niahela ashinakaja dehi nindi alema? Muloñadi amanakwetu niahela akula dehi chekalilawu alema mukuloñesha kwaYehova? Yumanyi yitwatela kwila hakwila tudiziliku kudi wena?

3. Kwesekeja naMasamu 92:12-15, muloñadi Yehova chayilemeshelayi atushinakaji?

³ Yehova Nzambi wayilemesha nankashi atushinakaji ashinshika. Wayimonaña chekalawu nawa walemesha yilwilu yayiwahi yikwetiwu. Watiyaña kuwaha neyi yamona atushinakaji anakulejaku atwansi yuma yayiwahi yinadiziwu hayaaka yejima yinamukalakeliwu Yehova. (Yoba 12:12; Yish. 1:1-4) Yehova watiyaña cheñi kuwaha chomikañawu. (Mal. 3:16) Anamoni kukala kwakuvulu muchihandilu chawu, ilaña anatwalekihu kumukuhwelela Yehova. Anakuhweleli chikupu muyikaninu yakumbidi kubadika chiyadiña hampinji  yadiziliwu chalala. Yehova wayikeña chikupu muloña anatwalekihu kushimwina ijina dindi “nimuwushinakaji.”—Tañenu Masamu 92:12-15.

4. Mazwinyi anateli kuyikolesha amanakwetu niahela ashinakaja dehi?

⁴ Neyi himukushinakaja, anukenuña nenu Yehova wanukaña nyidimu yejima yimunamukalakeli yaaka yejimiyi. (Heb. 6:10) Munadikiti nankashi mumudimu wakushimwina nawa ichi chuma chamuzañaleshaña Tata yetu wamwiwulu. Munomiki kukala kwakuvulu kushilahu nikukala kwayineñesheli nankashi. Munatwalekihu kwovwahila nikuhakwilaku nshimbi jaYehova jaloña, munazati nyidimu yayivulu mukuloñesha kwaYehova nawa munadizishiku amakwawu. Munazati nañovu kulonda mwendeleña hamu nakuloñesha kwaYehova. Munakwashi nikukolesha antu amakwawu kulonda eñili mumudimu wampinji yejima. Yehova Nzambi wayikeña nankashi muloña mwekala ashinshika. Wayikana nindi, “hashiyaña antu indi ajilaku.” (Mas. 37:28) Wayikana nindi: “Kushika nikuwushinakaji wenu . . . Nukuyelekaña.” (Isa. 46:4) Dichi, bayi mutoñojokaña nenu chineli munashinakaji dehi kwosi mudimu wumwatela kuzata mukuloñesha kwaYehovaku. Mwalema nankashi!

5. Yumanyi yatela kwanukañawu atushinakaji?

⁵ Yehova nateli kuyizatisha atushinakaji munjila jamboka-mboka. Hela chakwila hiyakweti ñovu neyi chiyadiñaku, anadizi yuma yayivulu hayaaka yayivulu yinakalakaliwu. Yehova nateli kutwalekahu kuyizatisha munjila jamboka-mboka neyi chikumwekeshawu muyakutalilahu yinashimuniwu yakunyima niyamakonu.

6-7. Shimunenu yakutalilahu yawatushinakaji amuBayibolu akiswililiwu muloña wakwila amukalakeleli Yehova nakashinshi?

⁶ MuBayibolu mwekala yakutalilahu yawantu amukalakeleli Yehova muwushinakaji. Chakutalilahu, Mosi wadiña nayaaka 80 hampinji yatachikiliyi kumukalakela Yehova neyi kaprofwetu nawa ñimeni wamuza waIsarela. Yehova watwalekelihu kumuzatisha Danyeli kwikala mukwakumuhoshelaku hadaha hampinji yadiñayi nayaaka kubadika ha 90. Nawa kapostolu Yowana hadaha  niyena wadiña nayaaka kubadika ha 90 hampinji yamoneneniwu kusoneka mukanda waChimwekeshu.

⁷ Antu amakwawu ashinshika ayiluka nankashi wanyi nawa hadaha ayidiwileña. Hela chochu, Yehova wayilukili nawa wayikiswilili hakwikala ashinshika. Chakutalilahu, Simeyona iyala “wadiña waloña” nawa wamwakama Nzambi amutena hohu chantesha muBayibolu, ilaña Yehova wamwilukili nawa wamulemesheli kulonda yamoni nkemba Yesu nikuprofweta kutalisha hadi mwana nimama yindi. (Luka 2:22, 25-35) Toñojokenu cheñi hadi nfwila Ana, kaprofwetu wamumbanda. Wadiña nayaaka 84, ilaña mpinji yejima ‘wawanikileña hatembeli.’ Wayileña hatembeli mpinji yejima nawa wamumweni Yesu hadiñayi nkemba. Wejima wawu ayedi adiña alema kudi Yehova.—Luka 2:36-38.

8-9. Mudimwinyi wunatwalekiwu kuzatawu anfwila?

⁸ Makonu, atushinakaji amavulu ashinshika hiyakutalilahu yayiwahi kudi atwansi. Talenu yuma yamumwekeneni muhela Lois Didur. Wadiña nayaaka 21 hekaliliyi payiniya wadimena muCanada. Hanyima yachumichi, yena ninfumwindi John, azatili yaaka yayivulu mumudimu wakwenda. Kuhiñahu azatilili haBeteli yamuCanada hadi yaaka kubadika ha 20. Muhela Lois chashikijiliyi yaaka 58, yena nimanakwetu John ayitambikili kuya nakuzatila kuUkraine. Chumanyi cheliliwu? Komana atoñojokeli nawu twashinakaja dehi, tukutwesha wanyi kuya nakuzatila kwituña dacheñi? Etejeli mudimu wayinkeliwu, nawa manakwetu John amutondeli kwikala membala wamuKometi Yamutayi kweniku kwayiliwu. Chelili munahiti yaaka 7 hanyima yakufwa kwamanakwetu John, muhela Lois wafukwilihu kutwalekahu muniwu mudimu. Chayinu mpinji muhela Lois wudi nayaaka 81, natwalekihu kumukalakela Yehova nakashinshi nawa chisaka chaBeteli chamuUkraine chamukeña nankashi.

⁹ Antuluwa adi neyi muhela Lois hiyanateli kuyilemesha neyi chayilemesheleñawu hadiñawu anfumwawu achidi amomiku, ilaña alema chikupu kudi Yehova. Yehova wayilemesha nankashi ahela akalakeli nawanfumu jawu hadi yaaka yayivulu nawa anatwalekihu kumukalakela nakashinshi. (1 Tim. 5:3) Kubombelahu, ayikoleshaña cheñi atwansi.

10. Yumanyi yayiwahi yeliliyi manakwetu Tony?

¹⁰ Atushinakaji amavulu ashinshika ashakamaña mumatala mwahembelañawu antu ashinakaja dehi, niwena alema chikupu. Chakutalilahu, manakwetu Tony washakamaña mwitala damuchidiwu. Wapapatisheweli muAugust 1942 muPennsylvania, U.S.A., hadiñayi nayaaka 20. Hanyima yakupapatishewa, amukasili hamuloña wakubula kudiñija munsañu jamatuña nachiyuulu hadi yaaka yiyedi nachikunku. Iwu manakwetu  niñodindi Hilda, akwashili anyanawu ayedi kumwiluka Yehova. Hadi yaaka yayivulu yinahitihu, manakwetu Tony wadiña nloñeshi wenzanvu dawakulumpi muyipompelu yisatu yakalakeleliyi nawa wadiña nkoñi wañinza. Wayileña mutuleya nakulombola kupompa nikulombola atudizi aBayibolu. Ichi manakwetu Tony wudi nayaaka 98 nawa waleka wanyi kumukalakela Yehova. Natwalekihu kumukalakela Yehova hakumina ñovu jindi nikuzatila hamu nawamanakwetu niahela muchipompelu mudiyi.

11. Tunateli kumwekesha ñahi netu twayakamenaña atushinakaji ashakamaña mumatala mwahembelañawu atushinakaji?

¹¹ Tunateli kumwekesha ñahi netu twalemesha atushinakaji ashakamaña mumatala mwahembelañawu atushinakaji? Neyi chinatwesheki, akulumpi atela kuyikwasha, chidi neyi kuyikwasha kulonda ayeña nakupompa nikushimwina. Tukumwekesha netu twayakamenaña neyi tuyihempulaña hela kuhanjeka nawu hamafoni kuzatisha mavidiyo. Tunakukeña kuyakamena atushinakaji ashakamaña mumatala mwahembelañawu atushinakaji ekala kwakulehi nachipompelu chawu. Neyi kubabala neyi, tunateli kuyivulamena awa akulumpi. Neyi tunakuhanjeka nawamanakwetu niahela ashinakaja dehi, mpinji yikwawu chinateli kuyikalila kuhosha hayuma yinayikundami. Ilaña tukudizilaku yuma yayivulu neyi tuyihulaña malwihu nikutiyilila chinakutulejawu yuma yayiwahi yinadiluñishiwu mukuloñesha kwaYehova.

12. Muchipompelu chetu tunateli kuwanamu amanakwetu niahela amuchidinyi?

¹² Tunateli kuhayama hakwiluka netu muchipompelu chetu mudi amanakwetu niahela ashinshika ashinakaja dehi. Muhela Harriette namukalakeli Yehova nakashinshi muchipompelu chawu chekala muNew Jersey, U.S.A. Nkumininaku, wayili nakushakama namwanindi. Amanakwetu muchipompelu chabuukililiyi adiña nampinji yakuhanjeka nindi kulonda amwiluki nawa elukili nawu walema nankashi. Wayikolesheli nansañu yamudimu wakushimwina wazatiliyi hampinji yadiziliyi chalala mu 1925. Hayina mpinji, wasendeleña mufunfulu mpinji yejima neyi nakuya nakushimwina, nindi hadaha akumukasa mukaleya. Nawa mu 1933, amukasili mulungu wumu mukaleya kapampa kayedi. Haniyi mpinji nfumwindi wabula kwikala Chinsahu diyi washalileña nakuhemba anyanawu asatu. Mwamweni, twatela kuyilemeshaña atushinakaji ashinshika adi neyi muhela Harriette!

13. Yumanyi yituneluki kutalisha hamudimu wukwetiwu atushinakaji mukuloñesha kwaYehova?

¹³ Amanakwetu niahela ashinakaja dehi alema kudi Yehova nimukuloñesha kwindi. Anamoni Yehova chinakiswiliyi kuloñesha kwindi munjila jamboka-mboka nichinayikiswiliwu wena. Anadiziliku yuma yalema kuyiluwa yawu yakoñeleñawu. Yimonenuña nenu “[hi]kasulu kamaana,” nawa dizilenuña kudi wena. (Yish. 18:4) Neyi mwikalaña nampinji yakuyiluka, chikuhwelelu chenu chikukola nawa mukudizilaku yuma yayivulu kudi wena.

14. Nsona yaKuhituluka 32:7 yayikoleshaña atwansi kwila chumanyi?

¹⁴ Yenuña nakuhanjeka nawatushinakaji. (Tañenu Kuhituluka 32:7.) Hadaha analeki kumona chiwahi, anakwenda chovu-chovu nawa anakuhosha chovu-chovu, ilaña achidi adikita nawa anatuñi “ijina dadiwahi” naYehova. (Mukwa. 7:1) Anukenu  chuma chaleteshaña Yehova yayilemeshi. Twalekenuhu kuyilemesha. Ikalenu neyi Elisha. Wamukakeleleli Elija hefuku dakukumishaku dakwikala hamu. Elisha wahosheli kapampa kasatu nindi: “Hinukukushiyaku.”—2 Anya. 2:2, 4, 6.

15. Malwihwinyi itwatela kuyihula atushinakaji?

¹⁵ Mwekeshenuña nenu mwayikeña atushinakaji kuhitila mukuyihula malwihu. (Yish. 1:5; 20:5; 1 Tim. 5:1, 2) Yihulenuña malwihu adi neyi: “Himwadiña kansi, chumanyi chayiletesheli mukuhweleli nenu munawani chalala?” “Yuma yayimwekeneni yayikwashili ñahi kuswina kwakwihi naYehova?” “Chumanyi chinayikwashi kutwalekahu kwikala namuzañalu mumudimu waYehova?” (1 Tim. 6:6-8) Dichi tiyilenuña neyi anakuyilumbulwila.

16. Yumanyi yayiwahi yikufumamu neyi atushinakaji niatwansi ahanjekaña?

¹⁶ Neyi atushinakaji niatwansi ahanjekaña, akudikoleshaña wejima wawu. (Rom. 1:12) Enu atwansi mukwiluka chikupu nenu Yehova wakamenaña ambuñindi ashinshika nawa atushinakaji niwena akwiluka nawu ayikeña. Akutiya kuwaha kuyileja chinayikiswiliwu kudi Yehova.

17. Tukuhosheladi netu atushinakaji ashinshika lubanji lwawu lwaswejelañaku chaaka-nichaaka?

¹⁷ Lubanji lwakumesu lwamanaña, ilaña muntu washinshika kudi Yehova lubanji lwindi lwaswejelañaku chikupu hachaaka-hachaaka. (1 Tes. 1:2, 3) Muloñadi? Muloña hadi yaaka yayivulu, aneteji spiritu yaYehova kuyidizisha nikuyikwasha kwikala nayilwilu yayiwahi. Neyi tuyiluka chiwahi amanakwetu niahela, tukuyilemeshaña nawa tukudizilañaku kudi wena, tukuyimonaña netu hiheta dasweja kulema!

18. Chumanyi chitukahanjekahu muchibaaba chinalondelihu?

¹⁸ Chipompelu chaswejelañaku kukola neyi atwansi alemeshaña atushinakaji nawa atushinakaji niwena alemeshaña atwansi. Muchibaaba chinalondelihu, tukahanjeka atushinakaji chinateli kumwekeshawu nawu alemesha atwansi ekala muchipompelu chawu.