1-2. (a) Ka luwore gi Ngeche 16:31, ere kaka onego wane Jokristo ma hikgi oniang’ ma tiyo ne Jehova? (b) Gin penjo mage ma wabiro dwoko e sulani?

E PINY Amerka kamoro miluongo ni Arkansas ma ji yueyoega, yotga yudo kite mag almasi (diamonds) e wi lowo. Kata kamano, tek fwenyo kitego nikech pok olwokgi. Kuom mano, thoth ji kalogiga ma ok ging’eyo ni gikalo mwandu ma nengogi tek.

² E yo ma kamano, Jokristo ma hikgi oniang’ momakore gi Jehova inyalo pim gi kite mag almasi ma nengogi tekgo. Wach Nyasaye pimo lwar ma joma hikgi oniang’ nigo gi osimbo mar duong’. (Som Ngeche 16:31; 20:29) Kata kamano, yot ahinya kalo joma kamago ma ok wafwenyo ber ma wanyalo yudo kuomgi. Ka joma tindo ogeno joma hikgi oniang’ moloyo kaka ginyalo geno mwandu masie, ginyalo yudo ber mathoth. E sulani, wabiro dwoko penjo moko adek: Ang’o momiyo Jehova ogeno ahinya Jokristo ma hikgi oniang’? Ang’o momiyo wanyalo wacho ni Jokristo ma hikgi oniang’ omako kama duong’ e riwruok mar oganda Jehova? Gin ang’o ma wanyalo timo mondo wayud ber kuom Jokristo ma hikgi oniang’go?

3. Ka luwore gi Zaburi 92:12-15, ang’o momiyo Jehova ogeno jotichne ma hikgi oseniang’?

³ Jehova Nyasaye ogeno ahinya Jokristo ma hikgi oniang’, kendo onenogi kaka mwandu ma nengogi tek. Ogeno kido mabeyo ma gin-go, kata obedo ni koro hikgi oseniang’. Omor ahinya sama gikonyo joma tindo mondo osum rieko kod lony  kuomgi. (Ayub 12:12; Nge. 1:1-4) Bende, omor ahinya gi yo ma gisenanogo. (Mal. 3:16) Kata obedo ni giseromo gi pek mopogore opogore, pod gidhi nyime bedo gi yie motegno kuom Jehova. Gin gi geno motegno moloyo kinde ma ne gihango puonjore adiera, kendo Jehova oherogi nikech pod gidhi nyime lando nyinge “kata ka giti.”​—Som Zaburi 92:12-15.

4. Gin weche mage ma nyalo jiwo owete gi nyimine ma hikgi oseniang’?

⁴ Ka po ni hiki medo sudo, bed gadier ni Jehova paro gik moko duto ma ne isetimo e kinde mokalo. (Hib. 6:10) Isebedo kilendo gi kinda, kendo mano wach ma moro Wuonwa manie polo ahinya. Isebedo kinano e tembe madongo ma moko gin ma nyoso chuny ahinya. Isebedo kikedo ne adiera, itimo migepe mopogore opogore e riwruok mar oganda Jehova, kendo itiego jomamoko. Isetimo duto minyalo mondo idhi riat gi riwruok mar oganda Jehova mosebedo ka ringo matek. Isesiro jomamoko mosebedo ka tiyo ne Jehova gi thuologi duto e yore makende, kendo isejiwogi. Jehova oheri matek nikech imakori kode. Osingo ni “ok obi jwang’o joge momakore kode”! (Zab. 37:28) Bende, owacho ne joma hikgi oniang’ kama: “Kata ka yie wiu otimo lwar, pod anating’u ating’a.” (Isa. 46:4) Kuom mano, kik ipar ni nikech koro hiki medo bedo moniang’, onge kama imako e riwruok mar oganda Jehova. Imako kama duong’ ahinya!

5. En wach mane ma Jokristo ma hikgi oniang’ onego opar?

⁵ Jokristo ma hikgi oseniang’ nyalo konyo e riwruok mar oganda Jehova e yore mang’eny. Kata obedo ni samoro sani gionge teko kaka ma ne gin-go chon, gin gi lony mathoth ma giseyudo kuom higni ma gisetiyonego Jehova. Jehova pod dhi nyime tiyo kodgi e yore mopogore opogore, mana kaka wadwaro neno e ranyisi mag jotich Nyasaye ma kinde mokalo kod ma kindegi.

6-7. Chiw ane ranyisi moko e Muma ma nyiso kaka Jehova ne oguedho jotichne ma ne hikgi oniang’.

⁶ Muma oting’o ranyisi mang’eny mag joma nodhi nyime tiyo ne Jehova kata ka ne giseti.  Kuom ranyisi, Musa ne en jahigni 80 kama ka nochako tiyo ne Jehova kaka janabine kendo tayo oganda Jo-Israel. Jehova nodhi nyime tiyo gi Daniel kaka ng’at ma wuoyo e loye kata obedo ni janabino nosechopo higni 90 gi wiye. Bende, nyaka bed ni jaote Johana ne jahigni 90 gi wiye e kinde ma ne Nyasaye otaye gi rohone maler mondo ondik bug Fweny.

⁷ Nitie jotich Nyasaye mathoth ma ne ok ong’ere ahinya, kendo ne yot kalogi akala kamano. Kata kamano, Jehova to noneno kindagi kendo nodewogi. Kuom ranyisi, Muma wuoyo matin ahinya e wi Simeon ma ne en “ng’at makare moluoro Nyasaye.” Kata kamano, Jehova nong’eye kendo nomiye thuolo makende mar neno Yesu ka ne pod en nyathi, kendo nokoro weche moko e wi nyathino kaachiel kod min-gi. (Luka 2:22, 25-35) Par ane bende janabi ma dhako ma niluongo ni Ana. Kata obedo ni ne en chi liel ma jahigni 84, “ne ok obarega e hekalu.” Nikech mano, noyudo thuolo makende mar neno Yesu ka ne pod otin. Jehova nogeno Simeon kod Ana ahinya.​—Luka 2:36-38.

8-9. Gin ang’o ma mond liete pod nyalo timo e kanyakla mar Jehova?

⁸ E kindewagi, nitie Jokristo mathoth ma hikgi oniang’ moseketo ranyisi maber ne joma tindo. Ne ane ranyisi mar Nyaminwa Lois Didur. Nobedo painia makende ka ne en jahigni 21 e piny Canada. Bang’ mano, notiyo kanyachiel gi John jaode e tij jarit-alwora kuom higni mogwaro. Bang’e, ne gitiyo e Bethel ma Canada kuom higni mokalo 20. Ka ne Lois ochopo jahigni 58, en gi jaode ne omigi migawo machielo e piny Ukraine. Ne gidhi timo nang’o? Be ne gidhi paro ni koro giseti ahinya ma ok ginyal dhi timo migawo e piny machielo? Ne giyie gi migawono, kendo John nobedo achiel kuom owete manie Komiti mar Bad Ofis. Bang’ higni abiriyo, John notho, kata kamano, Lois noyie dong’ e migawo ma nosemigino. Lois sani jahigni 81, kendo pod odhi nyime tiyo ne Jehova ka en e Bethel ma Ukraine, kendo owete gi nyimine man kuno ohere ahinya.

⁹ Nitie mond liete mathoth kaka Lois ma samoro ok ong’ere ahinya kaka ne ging’erega ka ne chwogi pod ngima; kata kamano, bedo ni gin mond liete ok nyis ni koro onge kama gimako e kanyakla. Jehova ogeno ahinya nyimine kaka mago ma noriwo chwogi lwedo e kinde ma chwogigo ne pod ngima, kendo ma pod dhi nyime timo duto mondo gisik ka gimakore kode. (1 Tim. 5:3) Bende, gijiwo ahinya Jokristo ma pod tindo.

10. En ranyisi mane maber ma Tony noketonwa?

¹⁰ Jehova ogeno ahinya jotichne momakore kode ma hikgi oseniang’ modak kuonde miritoe joma oti. Kuom ranyisi, nitie owadwa moro miluongo ni Tony modak kuonde kaka mago. Nobatise Agost 1942 Pennsylvania e piny Amerka ka nojahigni 20. Mapiyo nono, notueye e jela kuom higni ariyo gi nus nikech  notamore riwo lwedo weche mag siasa kod lwenje. En kaachiel gi Hilda jaode ne ginyuolo nyithindo ariyo kendo ne gipuonjogi adiera. Kuom higni mogwaro, Tony nobedo jarit matayo kanyakla (ma sani iluongo ni jachan bura mar jodongo) e kanyakla adek, kendo nobedo jarit chokruok mar alwora. Ne ojalimoga jela moro kendo notayoga chokruoge kuno kendo puonjo ji Muma. Kata obedo ni Tony sani en jahigni 98, pok ool gi tiyo ne Jehova. Pod otemo mondo odhi nyime timo duto mondo oti ne Jehova kendo riwo lwedo owete gi nyimine e kanyakla ma entiere.

11. Ere kaka wanyalo nyiso ni wadewo Jokristo modak kuonde miritoe joma oti?

¹¹ Ere kaka wanyalo chiwo luor ne Jokristo ma hikgi oseniang’ modak kuonde miritoe joma oti? Jodong-kanyakla nyalo timo duto ma ginyalo mondo owete gi nyiminego oriwre gi kanyakla e timo gik motudore gi lamo. Wanyalo nyiso ni wadewogi ka walimogi kuonde ma gintierego kata tudore kodgi e yor vidio kata simu. Onego wadew ahinya-ahinya owete gi nyimine modak kuonde miritoe joma oti man mabor gi kanyakla ma thurgi. Ka ok watang’, wanyalo po ka wiwa owil gi Jokristo ma hikgi oseniang’go. Moko kuomgi nyalo winjo ka ok yotnegi wuoyo e wi ngimagi, kata ginyalo paro ni ok ochuno ni giwuo e weche kaka mago. Kata kamano, wanyalo yudo ber mathoth ka watemo matek mondo wawuo kodgi kendo chiko itwa malong’o sama ginyisowa ber ma giseyudo e tij Jehova.

12. En ang’o ma wanyalo fwenyo kuom owete gi nyimine moko ma wan-go e kanyaklawa?

¹² Wanyalo wuoro ahinya ka wafwenyo ni nitie Jokristo ma hikgi oseniang’ ma wan-go e kanyaklawa moseketo ranyisi maber. Nyaminwa moro miluongo ni Harriette notiyo ne Jehova kuom higni pieche e kanyakla ma korgi ma ni New Jersey, e piny Amerka. Nodar mondo odhi odag gi nyare. Owete gi nyimine ma ne ni e kanyakla manyien ma nodhiyeno notemo mondo ging’eye, kendo ne gifwenyo ni ne ginyalo puonjore gik mabeyo kuome. Nojiwogi gi weche mabeyo ma nojaromogo e tij lendo e kinde ma nokwongo puonjore adiera e higni mag 1920. E kindego ka nodhi e tij lendo, nojating’oga mswak ma nonyalo rudhogo lake ka di po ni omake. E higa mar 1933, ne omake diriyo, kendo e moro ka moro kuomgi, notueye e jela kuom juma achiel. E kinde kaka mago, jaode ma ne ok Janeno e ma koro ne konye e rito nyithindgi adek ma ne gin-go. Onge kiawa ni Jokristo ma hikgi oniang’ momakore gi Jehova kaka Harriette gin joma onego omi luor ahinya!

13. Ang’o ma wasepuonjore kuom migawo ma Jokristo ma hikgi oniang’ omako e riwruok mar oganda Jehova?

¹³ Kuom adier, owete gi nyimine ma hikgi oseniang’ omako kama duong’ ahinya e riwruok mar oganda Jehova. Giseneno kaka Jehova osebedo ka guedho riwruok mar ogandane kendo kaka oseguedhogi giwegi. Gisepuonjore gik mathoth kuom kethogi giwegi. Onego wanegi kaka “soko mar rieko,” kendo wapuonjre kuom ranyisi maber ma giseketonwa. (Nge. 18:4) Kikawo thuolo mondo ing’eri kodgi, ibiro tego yie mari kendo ibiro puonjori gimoro kuomgi!

14. Rapar mar Chik 32:7 jiwo joma pod tindo ni gitim ang’o?

¹⁴ Kaw okang’ mokwongo mar wuoyo gi Jokristo ma hikgi oniang’. (Som Rapar mar Chik 32:7.) En adier ni samoro sani koro wengegi osechako dinore, ok ginyal wuotho piyo-piyo, kendo giwuoyo mos, kata kamano, pod gitegno e chunygi, kendo giseloso “nying maber” gi Jehova. (Ekl. 7:1) Par gimomiyo  Jehova pod ogenogi. Dhi nyime miyogi luor, kendo ibed kaka Elisha. Odiechieng’ mogik ma ne gin gi Elija, noramo ni ne ok odhi weyo Elija. Nowacho ne Elija nyadidek niya: “Ok abi weyi.”​—2 Ru. 2:2, 4, 6.

15. Gin penjo mage ma wanyalo penjo joma hikgi oniang’?

¹⁵ Nyis ni idewo joma hikgi oniang’ kuom wuoyo kodgi e yo mang’won. (Nge. 1:5; 20:5; 1 Tim. 5:1, 2) Penjgi penjo kaka ma luwogi: “Ka ne pod itin, en ang’o ma nomiyo ibedo gadier ni niseyudo adiera?” “Ere kaka gik miseneno e ngimani osemiyo isudo machiegni gi Jehova?” “En ang’o mosekonyi siko ka imor e tij Jehova?” (1 Tim. 6:6-8) Kae to chik iti malong’o sama gileroni wechego.

16. Ere kaka mbaka ma joma tindo gi joma hikgi oseniang’ goyo nyalo jiwogi?

¹⁶ Ka joma hikgi oniang’ kod joma tindo ogoyo mbaka kanyachiel, giduto gibiro yudo jip. (Rumi 1:12) Joma tindo biro bedo gadier ni Jehova rito joge, to joma hikgi oseniang’ be biro bedo gadier ni idewogi kendo ohergi. Joma hikgi oseniang’go biro mor pimoni kaka Jehova osebedo ka guedhogi.

17. Ang’o momiyo wanyalo wacho ni joma hikgi oniang’ medo bedo mabeyo kaka hikgi medo sudo?

¹⁷ Ber mineno gi oko medoga lal kaka ng’ato medo bedo moti, kata kamano, joma omakore gi Jehova to medo mana bedo mabeyone kaka hikgi medo sudo. (1 The. 1:2, 3) Ang’o momiyo wanyalo wacho kamano? En nikech kuom higni mang’eny, giseyie mondo roho mar Jehova otagi kendo okonygi nyago kido mabeyo. Kaka wamedo ng’eyo owete gi nyimine ma hikgi oseniang’, wamiyogi luor, kendo wapuonjore kuomgi, e kaka wabiro medo nyiso ni wagenogi gadier kendo ni wanenogi kaka joma nengogi duong’!

18. En ang’o ma wabiro puonjore e sula maluwo?

¹⁸ Kanyakla bedo motegno ka joma tindo ogeno joma hikgi oniang’, to jo ma hikgi oniang’ bende ogeno joma tindo. E sula ma luwo, wabiro neno kaka joma hikgi oseniang’ nyalo nyiso ni gigeno joma tindo manie kanyakla.