1-2. (a) Thufingte 16:31-a sawi angin, engtin nge mi rinawm kum upate chu kan thlîr ang? (b) He thuziakah hian eng zawhnate nge chhân a nih ang?

 U.S.A., Arkansas khawpuia state park tlawhtute chuan leia an dah lunghlute chu an hmu thei a. Mahse, chûng lunghlute chu la tuai mâm rih loh a ni a. Chuvângin, a hmutu mi tam tak chuan an thil hmuhte chu lunghlu man to takte an ni tih an hriat loh mai theih avângin an en liam mai a ni.

² Kan zînga mi rinawm kum upate chu kawng eng emaw takin chûng lunghlute ang an ni a; anni chu ro hlu takte an ni. Bible chuan an lu ṭuakte chu lallukhum nên a khaikhin a. (Thufingte 16:31; 20:29 chhiar rawh.) Mahse, chûng ro hlute chu en liam mai a awlsam thei a. Ṭhalaite’n kum upate hlutna an hriatthiam hian ro sum aia hlu zâwk thil eng emaw an nei thei a ni. He thuziakah hian hêng zawhna pathum hi chhân a ni ang: Engvângin nge Jehova’n mi rinawm kum upate chu ro hlu anga a thlîr? Engvângin nge kum upa kan unaute chu Jehova inawpna pâwla mi pawimawh takte an nih? An entawn tûr siamte hlâwkpui pumhlûm tûrin eng nge kan tih theih? tihte hi.

3. Sâm 92:12-15-na nêna inmilin, engvângin nge mi rinawm kum upate chu Jehova tâna an hlut?

³ Mi rinawm kum upate chu Pathian Jehova tân an hlu hle a. Ani chuan an chhûngrîl nihna dik tak a hmuh bâkah, an mize duhawm takte chu a hriain, a ngaihlu hle a ni. Rinawm taka Jehova rawng an bâwl chhûnga an neih thiltawnte chu ṭhalaite hnêna an hlan chhâwn hian Jehova chu a lâwm hle a. (Job.  12:12; Thuf. 1:1-4) Jehova chuan an chhêlna pawh a ngaihlu a. (Mal. 3:16) An nun chu harsatnate lakah fihlîm bîk lo mah se, Jehova chungah rinna nghet tak an nei reng a. Hma lam hun atâna an beiseina pawh thutak an hriat tirh lai aiin a nghet zâwk a ni. Jehova chuan anni chu “târ hnuah pawh” a hming an puan chhunzawm zêl avângin a hmangaih hle a ni.—Sâm 92:12-15 chhiar rawh.

4. Engin nge kum upa kan unaute chu tichak thei?

⁴ Kum upa lam in nih tawh chuan, tûn hmaa in hnathawhte chu Jehova’n a theihnghilh lo tih hre reng ang che u. (Heb. 6:10) Thu hrilh rawngbâwlna chu ṭhahnemngai takin in thlâwp a, chu chuan kan Pa vâna mi a tilâwm a ni. Fiahna khirh takte pawh tiamin, harsatnate chhel takin in tuar chhuak a, Bible tehna felte chu in vuan tlat a; chu bâkah, mawhphurhna lian takte chelhin mi dangte chu in zirtîr a. Jehova inawpna pâwl hmasâwn chak tak nêna phai khai ruala kal zêl tûrin theih tâwp in chhuah tawh a. Unaute chu hunbi kim rawngbâwlnaa an tel zêl theih nân in ṭanpuiin, in fuih a. Pathian Jehova chuan in rinawm tlat avângin a hmangaih êm êm che u a ni. Ani chuan, “a mi rinawmte chu a kalsan ngai lo,” tih a tiam a. (Sâm 37:28, NW) Heti hian a tiam bawk che u a ni: “In lûa kêlsam a to vek thleng pawhin ka pawm ang che u,” tiin. (Is. 46:4) In kumte a lo upat tawh avângin, Jehova inawpna pâwlah pawimawhna nei tawh lo angin inngai suh ang che u. In hlu tak zet a ni!

5. Kum upate’n eng nge an hriat reng ang?

⁵ Kum upate chu Jehova inawpna pâwlah mi pawimawh takte an ni a. Tûn hma angin chaknate nei tawh loh mah se, kum tam tak chhûngin thiltawn ṭhahnem tak an nei a. Tûn hma leh tûn laia an entawn tûr siamte’n a târ lang angin, Jehova’n anni chu kawng hrang hrangin a hmang zawm zêl thei a ni.

6-7. Rinawm taka rawng an bâwl avânga malsâwmna dawngtu kum upate chungchâng Bible aṭangin entîrna pe rawh.

⁶ Bible-ah hian, an kum a upat hnu pawha Jehova tâna ṭhahnemngai taka rawngbâwltu mi rinawmte entawn tûr siam ṭha tak tate kan hmu thei a. Entîr nân, Mosia chu Jehova zâwlnei leh Israelte aiawha rawng a bâwl lai  khân kum 80 vêla upa a ni a. Jehova chuan zâwlnei Daniela chu kum 90 a chuang hnuah pawh A aiawha thusawitu atân a la hmang a. Tirhkoh Johana pawh Thu Puan bu ziak tûra thlarauva thâwk khum a nih lai khân kum 90 a chuang tawh a ni.

⁷ Mi rinawm dang tam takte chu mi challang takte an nih loh avângin, mite chuan an hre lo pawh a ni thei. Mahse, Jehova chuan anni chu a hria a, an rinawmna avângin lâwmman a pe a ni. Entîr nân, “mi fel tak leh Pathian ngaihsak tak” Sumeona chungchâng chu Bible-ah lang tlêm hle mah se, Jehova chuan tu nge a ni tih a hriat avângin nausên Isua hmu theihna chanvo leh chu nausên leh a nu chungchâng hrilh lâwkna sawi tûrin chanvo hlu a pe a ni. (Lk. 2:22-35) Hmeithai zâwlnei Anni pawh hi han ngaihtuah teh. Ani chu kum 84-a upa ni mah se, ‘Pathian biak in a kalsan ngai lo.’ Jehova chuan biak ina a kal ziah avângin nausên Isua hmuh a phalsak a ni. Sumeona leh Anni te chu Jehova tân an hlu hle.—Lk. 2:36-38.

8-9. Unaunu pakhat chu hmeithai a nih hnuah pawh Jehova inawpna pâwlah eng nge a thawh?

⁸ Tûn laiah pawh, mi rinawm kum upate chuan ṭhalaite tân entawn tûr ṭha an siam a. Unaunu Lois Didur-i entawn tûr siam hi han ngaihtuah teh. Canada rama special pioneer nia rawng a bâwl ṭan chuan, kum 21 chauh a ni a. Pasal a neih hnu chuan, a pasal John-a nên bial kantu niin kum tam tak chhûng rawng an bâwl a. A hnuah, Canada Bethel-ah kum 20 chuang rawng an bâwl leh a. Unaunu Lois-i kum 58 a tlin chuan a pasal John-a nêna Ukraine rama rawngbâwl tûra sâwm an ni a. Engtin nge an chhân lêt? Ram danga rawngbâwl tûr chuan kum upa lutuk niin an inngai ang em? Sâwmna chu an pawm a, John-a chu chumi rama Branch Committee nia rawngbâwl tûra ruat a ni. Kum sarih a liam hnua John-a’n a boralsan hnu chuan Unaunu Lois-i chuan chuta rawngbâwl chhunzawm tûrin thu tlûkna a siam a. Tûnah chuan, kum 81-a upa Unaunu Lois-i chu rawngbâwlnaah hlawhtling zawm zêlin, Ukraine Bethel chhûngkuate chuan an hmangaih tak zet a ni.

⁹ Unaunu Lois-i te ang hmeithaite chu an pasalte dam lai angin, mite hriat hlawh an ni tawh lo thei a; mahse, hmeithai an nihna chuan an hlutna a tikiam chuang lo. Jehova chuan kum tam tak chhûng rinawm taka an pasalte thlâwpa rinawmna lantîr zawm zêltu unaunute chu a ngaihlu hle a. (1 Tim. 5:3) Chu bâkah, anni chu ṭhalaite tichaktu an ni tak zet a ni.

10. Unau Tony-a’n eng entawn tûr ṭha nge a siam?

¹⁰ Târte enkawlna hmuna awm kan unau rinawm kum upa tam tak pawh thlarau lama ro hlute an ni a. Entîr nân, Unau Tony-a chu tûnah chuan chutiang hmunah a awm a. Ani chu kum 1942, August thla khân, U.S.A., Pennsylvaniaah kum 20 mi niin baptisma a chang a.  A chan hnu rei lo têah, sipaia ṭang tûra thupêk a ni a, chu thupêk a zawm loh avângin tân inah kum hnih leh a chanve khung a ni a. A nupui Hilda-i nên thutakah fa panih an enkawl seilian a. Kum tam tak chhûngin, Unau Tony-a chu kohhran pathumah kohhran upate enkawltu lû (tûnah chuan kohhran upate râwnkhâwmtu tia hriat a ni) leh bial kantu niin rawng a bâwl a. Ani chuan tân inte va tlawhin, chutah chuan inkhâwmte leh Bible zirnate a kaihruai a. Kum 98 mi, Unau Tony-a chuan tûnah pawh, Jehova rawngbâwl chu a la bânsan lo a ni. Jehova tân theih tâwp chhuahin tualchhûng kohhrana unaute rualin rawng a la bâwl zawm zêl a ni!

11. Engtin nge târte enkawlna hmuna awm kan unaute chu kan ngaihlutzia kan lantîr theih?

¹¹ Engtin nge târte enkawlna hmuna awm kum upate chu kan chawimawi theih ang? A theih phawt chuan, kohhran upate chuan anni chu kohhran thiltihnaahte an telh thei a. Anmahni va tlawhin emaw, video hmanga biain emaw mi mal ngaihsakna kan lantîr thei a ni. An kohhran lawina hmun aṭanga hla taka awm târte enkawlna hmuna kan unau kum upate chu a bîk takin, ngaihsak kan duh a. Chûng kan unau kum upate chu theihnghilh lo tûrin kan fîmkhur tûr a ni. An zînga ṭhenkhat chuan an chanchin min hrilh hreh thei a, a nih loh leh mahni chanchin sawi chu thil mawi lo angah an ngai thei a ni. Mahse, an tân hun pein, zawhnate kan zâwk ang a; tichuan, Jehova inawpna pâwla an thiltawnte min hrilh huna kan ngaihthlâksak chuan kan chak phah sawt ang.

12. Kan lawina kohhran ngeiah pawh eng nge kan hmuh theih?

¹² Kan lawina kohhran ngeiah pawh mi rinawm leh entawn tlâk tak tak kum upa unaute kan hmuh hian mak kan ti mai thei a. Unaunu Harriette-i chuan U.S.A., New Jersey khawpuia a lawina kohhranah kum sâwm têl rinawm takin Jehova rawng a bâwl a. Chumi hnuah, a fanu awmpui tûrin hmun dangah a insawn a. A lawina kohhran thara unaute chuan hun pea an kawm chian chuan, unaunu rinawm tak a ni tih an hria a. Kum 1920 chho bâwl vêla thutak a hmuh ṭan laia thlawhhma rawngbâwlnaa a hun hman dân chuan unaute chu a tichak hle a ni. Chutih hun lai chuan, man theih a nih avângin, thu hrila a chhuah apiangin ha nawhna a pai ṭhîn. Dik tak chuan, kum 1933 khân, chawlhkâr khat chhûngin vawi hnih lai tân ina khung a ni a. Chumi hun chhûng chuan, Thuhretu ni lo mah se, amah thlâwp tlattu a pasal chuan an fa pathumte chu a lo enkawl a ni. Ni e, Harriette-i te ang mi rinawm kum upate chuan chawimawi an va phu tak êm!

13. Jehova inawpna pâwla kan unau mi rinawm kum upate hnên aṭangin eng nge kan zir?

¹³ Mi rinawm kum upa kan unaute chuan Jehova inawpna pâwlah chanvo pawimawh tak an nei a. Anni chuan Jehova’n a inawpna pâwl chu kawng hrang hrangin mal a sâwm tih leh anmahni pawh a mi mal takin mal a sâwm tih an hmu a ni. An thiltih sual palhte aṭangin zir tûr pawimawh takte an zir a. Chûngte chu “finna lui,” anga thlîrin, chûng aṭangte chuan an inzîr a ni. (Thuf. 18:4) Anni chu hun pea i kâwm a nih chuan, i rinna tihchakin a awm ang a, an hnên aṭangin zir tûr tam tak i nei ngei ang!

14. Deuteronomy 32:7-na chuan ṭhalaite chu eng ti tûrin nge a fuih?

¹⁴ Kum upa kan unaute chu be hmasa tûrin hma la ang che. (Deuteronomy 32:7 chhiar rawh.) Ni e, an mitin khua a hmuh fiah tawh lo thei a, an pheikhai a zâng tawh lo  theiin, an âw pawh a chhuak ṭha tawh lo thei a; mahse, harhvâng taka awm chu an la duh reng a, Jehova hmaah “hming ṭha” an chhêr a ni. (Thur. 7:1) Jehova’n anmahni a ngaihhlut chhan chu hre reng ang che. Anni chu chawimawi zawm zêl la. Elisa ang ni ang che. Ani chuan Elija chu a thih dâwn thlengin a awmpui tlat a. Elisa’n: “Ka awmsan tawp lo vang che,” tiin ṭum thum lai a hrilh a ni.—2 Lal. 2:2, 4, 6.

15. Kum upate chu eng zawhnate nge kan zawh theih?

¹⁵ Kum upate chu ngilnei taka zawhnate zâwtin an chungah ngaihsakna dik tak lantîr ang che. (Thuf. 1:5; 20:5; 1 Tim. 5:1, 2) Hêng zawhnate hi zâwk ang che: “I tleirâwl laiin, thutak i hmu tih engin nge rinnghehtîr che?” “Engtin nge i thiltawnte chuan Jehova hnaih lehzual tûra a ṭanpui che?” “Jehova rawngbâwlnaa hlim reng theihna thurûk chu eng nge a ni i tih?” tihte hi. (1 Tim. 6:6-8) Tichuan, an chanchin an sawi hunah ngaithla an che.

16. Engtin nge kum upa unau leh ṭhalai unau chuan an inbiakna chu an hlâwkpui ve ve theih?

¹⁶ Kum upa unau leh ṭhalai unau an inbiak hian an in tichak tawn a. (Rom 1:12) Nangni ṭhalaite hian, Jehova’n a chhiahhlawh rinawmte a ngaihsak dân chu i ngaihlu lehzual ang a, kum upa unau chuan hmangaihna dawng nia inhriatna a nei ang a. Ani pawhin Jehova malsâwmnate a dawn dânte hrilh che chu nuam a ti ngei ang.

17. Engvângin nge kum upa unau rinawmte chu kumte a liam zêl rualin a mawina a pung chho zêl tia kan sawi theih?

¹⁷ Taksa mawinate chu kumte a lo rei chuan a chuai ta ṭhîn a; mahse, Jehova chunga mi rinawmte chu kumte a liam zêl rualin an mawina a pung chho zêl a. (1 Thes. 1:2, 3) Engvângin nge chutianga a nih? A chhan chu, kumte a liam zêl rualin, Pathian thlarau kaihhruaia awmin, an insiam ṭhat zêl vâng a ni. Kum upa kan unau hlu takte chu kan hriat chian a, kan chawimawi a, an hnên aṭanga kan inzir tam poh leh ro hlu takte angin kan thlîr lehzual thei ang!

18. A dawta thuziakah eng nge kan sawiho vang?

¹⁸ Kohhran chu ṭhalai unaute’n kum upa unaute an ngaihhlut hunah chauh ni lovin, kum upa unaute pawhin ṭhalai unaute an ngaihhlut hian a nghet lehzual a. A dawta thuziakah chuan, kum upa unaute’n kohhrana ṭhalai unaute chunga ngaihhlutna an lantîr dân sawiho a ni ang.