1, 2. 1) Tojo tso Proverbios 16:31, jósʼin tjínnele jchatokoán je ndsʼee xi jekoanjchínga. 2) Jmé xi chótʼayajiaan i̱ kjoaʼmiya jebi.

YA JÑA Arkansas ʼmi ya Estados Unidos, jngo parque tíjna jñani totjíotsʼotjen je diamante. Tonga nga kje nindakjoanjin diamante jebi alikui kuenta sʼín je chjota ninga ya faʼatʼale.

² Je ndsʼee xi jekoanjchínga yaa mangóson je diamante xi nʼio chjíle. Je Énle Niná jngo corona síngósonkao kʼianga jemachxoa ntsja̱jkoaa (tʼexkiai Proverbios 16:31; * 20:29). Tonga sakʼoa tsín kuenta nʼia jokji chjíle je ndsʼee xi jekoanjchínga. Nʼio binyakao je ndsʼee xi sʼa xti kʼianga bechjí je ndsʼee xi jekoanjchínga. I̱ kjoaʼmiya jebi jan koya tjínni xi chótʼayajiaan. Xi títjon, ánni nga nʼio chjí bekonni Jeobá je ndsʼee xi jekoanjchínga. Xi majaoni, ánni nga nʼio chjínile ndsʼee jebi jinnaxinandále Niná. Kʼoa xi majanni, jméni xi sʼiaan nga kuinyakaoná je choa̱ xi batío.

3. Tojo tso Salmo 92:12-15, ánni nga nʼio chjí beni Jeobá je ndsʼee xi jekoanjchínga.

³ Je Jeobá nʼio chjí be je ndsʼee xi jekoanjchínga. Be jokjoan kʼoa josʼín ndsʼee jebi. Ndsʼee jebi nʼio tse kjoafaʼaitsjen tjínle jojekji tse tjíosíxále Jeobá. Kʼoa kʼianga bʼéyanajmíle je xi sʼa xti nʼio tsjoa sʼe kon je Jeobá (Job 12:12; Prov. 1:1-4). Kʼoati chjí be nga tjíokale (Mal. 3:16). Ningalani tse kjoa tjíofaʼatojin ndsʼee jebi, tjíobakó nga nʼio tjío  kjoamakjainle xi kao Jeobá. Ngisaa titjíojngongáni kon nga sitjoson jmeni xi tso je Jeobá tikʼoajinni nga tokʼia kiskotʼaya. Kʼoa je Jeobá nʼio tsjoake ndsʼee jebi nga̱ tsín tjíobájñále nga tjíotsoya xi tʼatsʼe ninga jekoanjchínga (tʼexkiai Salmo 92:12-15). *

4. Jméni xi koasenkao je ndsʼee xi jekoanjchínga.

⁴ Kʼiatsa jekjimajchíngai, kuenta tʼiain nga je Jeobá faʼaitsjenle jmeni xi kinʼiai ngasʼa nga je tinixálai (Heb. 6:10). Nʼio tsjoa sʼele je Niná nga ñaki kao kjoatsjoa ʼmiyasuin je Énle. Tíchókjoajinli ninga ñʼai tjín kjoa tibitjatojin, tinitoánntjainí jmeni xi tso Énle Niná, tinitjosonní je xá xi sʼeneli, kʼoa tiʼmiyalai xi kjaʼaí. Kʼoasʼin tiʼmitjenngi josʼin tíbándiaaná je naxinandále Niná. Kʼoati tininʼiojin je xi ñaki to xále Niná tjíosʼín. Je Jeobá tsjoakeli nga kixi tiʼmitʼalai, nga̱ kʼoatso nga tsín tsjionkon je xi kixi fitʼale (Sal. 37:28). Je Niná kʼoati i̱ tso: “Saʼnda nga jekoa̱nchxoa ntsja̱jkui, tosi tonda an koasenkaole” (Is. 46:4). Ali kʼoajinsʼin nikjaʼaitsjain nga tsín tichjínile jmeni xi nʼiai jinnaxinandále Jeobá tokuini nga jekjimajchíngai. Je Niná nʼio chjí bekonli.

5. Jmé xi machjén nga sikjaʼaitsjenjin je ndsʼee xi jekoanjchínga.

⁵ Nʼio binyakaoná je ndsʼee xi jekoanjchínga. Ningalani tsín tikʼoakji nganʼio tjínnile joni ngasʼa, tonga nʼio tse kjoafaʼaitsjen tjínle. Nkjín koya josʼin síchjén Jeobá je ndsʼee xi jekoanjchínga, tojosʼin chótʼayajiaan jokoan nichxin kjoatse kʼoa jokjima ndʼaibi.

6, 7. Tikʼaxki̱ kʼai je choa̱ xi faʼaitʼa Biblia xi tʼatsʼe choʼndale Niná xi jekoanjchínga xi nʼio tse kjoanichikontʼain kisokole nga kixi kitʼale Niná.

⁶ Ya Biblia nkjín choa̱ faʼaitʼa tʼatsʼe chjota xi tosi tonda kisixále Jeobá ninga jekoanjchínga. Jolani je Moisés, jela 80 nóle kʼianga profeta koan kʼoa nga  tsakándiaale naxinandá Israel. Je Daniel ninga jetsʼato 90 nóle tojo profetale Jeobá ma nga kʼia. Kʼoa je pastro Juan, tochale jetsʼato 90 nóle kʼianga kiski je libro xi tsʼe Apocalipsis.

⁷ Nʼio nkjín chjota xi kixi kitʼale Niná xi tsín nʼio tsaʼyale. Kʼoa je chjota saʼnda tsínjin tsabechjí chjota jebi. Tonga je Jeobá kuenta kisʼin kʼoa tsee kjoanichikontʼain kitsjoale nga kixi kitʼale. Tobʼelañá, je Biblia tochoaa síkʼaxki̱ xi tʼatsʼe Simeón, jngo chjota xi kixi kitʼale Niná kʼoa “xi nda tsabexkón”, tonga je Jeobá nʼio nda tsabexkon chjota jebi kʼoa kui kjoanda kitsjoale nga tsabexkon Jesús kʼianga sʼa ʼndílee, kʼoa jngo én xi tongini kinchja̱ xi tʼatsʼe Jesús kʼoa kao xi tʼatsʼe na̱le (Luc. 2:22, 25-35). Kʼoa je Ana, jngo ʼndíchjoónkʼan xi 84 nóle xi ntsjaintsjai ki ya yo̱ngo̱. Kʼoati nʼio tse kjoanda tsakakóle je Jeobá nga kixi kitʼale nga tsabe nga sʼa ʼndílee je Jesús. Alikui jao tjín tokoán nga nʼio chjí tsabekon Jeobá je Simeón kao Ana (Luc. 2:36-38).

8, 9. Jósʼin tjíotsjoánganʼio jinnaxinandále Niná je tichjaa xi jekʼien xʼinle.

⁸ Nichxin xi tiyoaa ndʼaibi, nʼio nkjín ndsʼee kao tichjaa xi jekoanjchínga xi nʼio nda choa̱ batíole je xi sʼa xti. Kataʼyala je choa̱le tichjaa Lois Didur. Precursora especial sʼin kisixá ya Canadá kʼianga tosʼa 21 nóle. Kʼoa nga koanskanni, kao John, xi xʼinle mani, nʼio nkjín nó nga superintendente xi tsʼe circuito sʼin kisixá. Kʼoa xi koanskanni, tsʼato 20 nó nga ya Betel xi tíjna ya Canadá kisixá. Kʼianga 58 nóle tichjaa jebi, kʼoatsakʼinle nga ya Ucrania koaitsjoánganʼio kao xʼinle. Jósʼin kisikjaʼaitsjen nga kʼoatsakʼinle. A kʼoakitso nga jenʼio jchínga kʼoa nga tsín tikoa̱nni nga xin naxinandá koai. Ki nga kʼoatsakʼinle, kʼoa je John yaa tsakʼejnajinle je Comité xi tsʼe Sucursal. Kʼianga jeñato nó ya tjío, kʼiaa kʼien je John kʼoa je tichjaa tosi tonda ya tsakʼejna. Ndʼaibi, 81 nóle je tichjaa Lois kʼoa tosi tonda je Jeobá tísíxále ya Betel xi tíjna ya Ucrania, kʼoa nʼio tsjoake ngatsʼi ndsʼee.

⁹ Tsakui nichxin tjíokʼa tichjaa xi kʼoama joni tichjaa Lois kʼianga jemʼe xʼinle nga tsín ʼya xi tinanda beni josʼin síxále Jeobá, tonga je Jeobá tojo nʼio chjí bekon. Nʼio chjí bekon josʼin kitsjoanganʼiole je xʼinle kʼoa nga tosi tonda kixi tjíofitʼale Niná (1 Tim. 5:3). Kʼoati nʼio tsjoánganʼiole je xi sʼa xti.

10. Jméni xi bakóyaná je choa̱le Tony.

¹⁰ Nkjín ndsʼee xi jekoanjchínga xi ya tjío ʼnde jñani toxá makuindani, kʼoa kʼoati nʼio chjíle ndsʼee jebi. Yaa tíjna ʼnde jebi jngo ndsʼee xi Tony ʼmi. Kʼiaa nga 20 nóle kisʼenngindá nga sá agosto nó 1942 ya Pensilvania (Estados Unidos). Nga tochriankʼia kisʼenngindá, jao nó basen nga ndoyá kinikʼéjnaʼya nga̱ tsín kisitjoson  xi tʼatsʼe servicio militar. Chjoónle ndsʼee jebi, Hilda ʼmi kʼoa kitsoyale Énle Niná nga jao ʼndíxtile. Jokji tífaʼato nó, jan jtín jñani superintendente presidente sʼin tsakʼejnale je Tony (ndʼaibi je xi coordinador sʼin tjíole je xi chjotajchínga sʼin tjío). Kʼoati superintendente sʼin tsakʼejnale nga kisatio kjoajtíntse xi jao nichxin. Kʼoati kikatío kjoajtín ya yandoyá kʼoa kitsoyale Biblia je chjota xi ya tjíoʼya. Ndʼaibi nga 98 nóle tosi tonda tísíxále je Jeobá kʼoa títsjoánganʼio ya jtín jñani tíjna.

11. Jósʼin koakoá nga chjí ʼyatokoán je ndsʼee xi ya tjío jñani makuinda chjotajchínga kʼoa tsa jeje̱ xi tsín tichókjoanile nga bitjo ndʼiale.

¹¹ Jósʼin koakoá nga chjí ʼyatokoán je ndsʼee xi ya tjío jñani makuinda chjotajchínga kʼoa tsa jeje̱ xi tsín tichókjoanile nga bitjo ndʼiale. Je xi chjotajchínga sʼin tjío ya jinjtín koaan kuinyakao nga kuitsoyason, nga koai kjoajtín kʼoa tsa tokjuinrʼoéleje̱. Kʼianga kjuinnixatʼaa ndsʼee jebi kʼoa tsa kao videollamada kuinókjoalee kʼoasʼin koakonilee nga mandosinná. Ngisaa machjén nga kuenta sʼiaan ndsʼee jebi xi ngisa kjintʼa tjíole je jtín. Alikui koa̱n nga tokuinjíotokoán. Tsakui nichxin tsín kuitso kon nga kʼoeyanajmíná jotjío kon, tonga nʼio koasenkaoná kʼiatsa chjónangilee jokji tsjoa tjío kon nga je Jeobá tjíosíxále, kʼoa nda kuinóʼyalee jme xi kuitsoná.

12. A tjío je ndsʼee xi jekoanjchínga ya jinjtínná.

¹² Tsakui nichxin tjíokʼa je ndsʼee xi jekoanjchínga ya jinjtínná xi kixi tjíofitʼale Niná. Jngo tichjaa xi Harriette ʼmi, xi ya Estados Unidos tsʼe, xi nʼio nkjín nó nga ya kitsjoanganʼio jtín xi tíjna ya Nueva Jersey. Xijekoan, yaa kikʼejnakao je tsotile. Je ndsʼee xi tjío ya jtín jñani kicho tichjaa jebi, tsabe nga nʼio chjíle je xá xi tísʼín kʼoa nga nʼio ndasʼin tísíxále je Jeobá. Tichjaa jebi kui tsakʼéyanajmíle je ndsʼee josʼin tsakʼinyason nga nó 1925 kʼianga tosʼa tsabe je Énle Niná. Nga kui nichxin, kʼianga kitsoyason tichjaa jebi ntsjaintsjai tsakʼa jngo cepillo xi sítsjengini niʼño nga̱ kʼoasʼin kisikjaʼaitsjen tsa totsejinni ndoyá si̱kʼéjnaʼya. Kʼianga nó 1933 jao kʼa nga ndoyá kinikʼéjnaʼya kʼoa jngó jngó xomana kinikʼéjnaʼya ndoyá. Ningalani tsín testigole Jeobá ma je xʼinle tsakasenkao nga kisikuinda nga jan ʼndíxtile kʼianga ndoyá kinikʼéjnaʼya je tichjaa. Je ndsʼee kao tichjaa xi jejchínga xi kixi tjíofitʼale Niná joni Harriette machjén nga chjí jchatokoán.

13. Tojosʼin tiʼyaa, jókji chjíle jinnaxinandále Jeobá je ndsʼee xi jekoanjchínga.

¹³ Nʼio chjíle jinnaxinandále Jeobá je ndsʼee xi jekoanjchínga. Tjíobe josʼin tísíchikontʼain Jeobá je naxinandále kʼoa josʼin kjimachikontʼain je. Nkjín koya jmeni xi machoyale. Tsa kuenta sʼiaan, nʼio koasenkaoná je kjoachjine xi tjínle kao choa̱ xi batío (Prov. 18:4). Kʼianga ngisa ndasʼin jchaxkoaan ndsʼee jebi, sa nʼio sa nʼio sa̱tío je kjoamakjainná kʼoa nʼio kuinyakaoná.

14. Jmé kjoafaʼaitsjen xi tsjoále Deuteronomio 32:7 je xi sʼa xti.

¹⁴ Chja̱kaonajmiá je ndsʼee xi jekoanjchínga (tʼexkiai Deuteronomio 32:7). * Tsakui nichxin je ndsʼee xi jekoanjchínga tsín tinanda matsennile, tsín tinanda ma  bʼetsomani, kʼoa tsín tinanda ma nchja̱ni. Tonga ndsʼee jebi ñaki kʼoatjío kon nga tosi tonda je Jeobá sixále, kʼoa je Jeobá nʼio chjí bekon (Ecl. 7:1, nota). Kuenta sʼiaan ánni nga chjí bekonni je Jeobá kʼoa tosi tonda koakolee kjoaxkóntokon. Kʼoasʼiaan jokisʼin je Eliseo nga tsínkʼia kitsjionkon je Elías nga tokʼoatjínsa tsabe. Jan kʼa i kitsole: “Alikui sikʼéjnale” (2 Rey. 2:2, 4, 6).

15. Jmé xi koa̱n chjónangilee je ndsʼee xi jekoanjchínga.

¹⁵ Kʼianga ngasin nganda chjónangilee je ndsʼee xi jekoanjchínga tsa jmeni, kʼoasʼin koakonilee nga mandosinná xi tʼatsʼe (Prov. 1:5; 20:5). Koaan kui jebi chjónangilee: “Kʼianga sʼa xti, jméni xi tsakʼéjngo tokuin nga ñaki Énle Niná xi kichotʼayai”. “Jmé xi tíbasenkaoli nga ngisa kjimachriantʼalai je Jeobá”. “Jmé xi tíbasenkaoli nga tosi tonda kao kjoatsjoa tinixálai Jeobá” (1 Tim. 6:6-8). Nda kuinyañolee jmeni xi kuitsoná.

16. Kʼianga jngo xi sʼa xti fákaonajmí jngo ndsʼee xi jekoanjchínga, jósʼin binyakaongañá xínkjín.

¹⁶ Binyakaongañá xínkjín kʼianga fákaonajmí jngo ndsʼee xi jekoanjchínga kao jngo xi sʼa xti (Rom. 1:12). Je xi sʼa xti ñaki sʼejngo kon nga síkuinda Jeobá je choʼndale xi kixi fitʼale. Kʼoa je ndsʼee xi jekoanjchínga nda sʼe̱ kon nga kʼoeyanajmí josʼin tísíchikontʼain Jeobá jokjitse tísíxále, kʼoa skoee nga chjí ʼyatokon.

17. Ánni nga sa nʼio sa nʼio naskásʼin matsenni ngixko̱n Jeobá je ndsʼee xi jekoanjchínga kʼianga faʼato nó.

¹⁷ Kʼianga jemajchíngaa jebʼantjaiya josʼin matseen. Kʼianga jngó jngó nó faʼato, sa naská sa naskásʼin matsen ngixko̱n Jeobá je choʼndale xi kixi fitʼale (1 Tes. 1:2, 3). Ánni. Kuinga jokji faʼato nó tsjoáʼnde nga je nganʼiotsjele Jeobá síndaya. Ngisaa chjí jchatokoán je ndsʼee xi jekoanjchínga kʼianga ngisa nda jchaxkoaan kʼoa nga kjuintjenngiaa je choa̱le.

18. Jmé xi chótʼayajiaan ya kjoaʼmiya xi ijngo.

¹⁸ Nga nda kuiyoaa ngatsʼiaa ya jinjtín machjén nga chjí skoe̱ xi sʼa xti je xi jekoanjchínga, tonga kʼoati machjén nga kʼoati chjí skoe̱ xi jekoanjchínga je xi sʼa xti. Ya kjoaʼmiya xi ijngo kui chótʼayajiaan jósʼin koako je xi jekoanjchínga nga chjí bekon je xi sʼa xti.