1-2. (a) Mowiwanana ni Provérbios 16:31, monelo wehu okale oovi wodhela addibila eri anakalaba? (b) Yohudhera ela nnawakule makoho baani?

WARKANSA, Estadu Unidu ohukalawo mburo winafwanyeya oru mwamakalelo ookweya. Woona wi mabwe ale eri ootakalene owinjhiva kinaavaha thima.

² Nimakalelo mamodhave, addibila eri anakalaba enakala ninga ethu ya oru; aliwa mabwe oojerimela. Madhu a Mulugu enihina dhimbwi dhewa dhihikanna thima. (Omwileri Provérbios 16:31; 20:29) Mbwenye thima ela, athu owinjhiva podi ohoonaga. Ale eri azombwe enonelamo thima enna anakalaba podi opuravo ethu yathima okwaranya dhoorela. Ohudhera wula nnere woona dhowakula dha makoho mararu: Mwahaya bwaddi Yehova agawoona addibila eri anakalaba ninga athu athima? Mwahaya bwaddi aliwa ekala athima munikuruni na Yehova? Nnahudhere ddi ni dhopadduwa dhewa?

3. Mowiwanana ni Salmos 92:12-15, mwahaya bwaddi addibila oororomeleya eri anakalaba ekala athima vamentoni va Yehova?

³ Addibila oororomeleya eri anakalaba bathima vamentoni va Yehova. Oliye onowedha woona ele eri mmurimani mwewa; ohaanona ni onovaha thima dhikalelo dhewa dhapama. Yehova onodhiveliwa awonaga addibila eri anakalaba yawaddelagamo azombwe thotho enniwana mwaha wa mabasa yapariliwa yaka dhowinjhivadhene. (Jó 12:12; Pro. 1:1-4) Yehova onovaha thima ovilela wewa. (Mal. 3:16) Kahi wera mwigumini mwewa dhatedhene dhahaweddela pama. Naari dhigarive ndo, nroromelo newa ni Yehova kannakwerebeyege. Ejhehero enniwana yosogolo eri yolibene okwaranya mudhidhi ehudheragawene  ebaribari. Yehova onowadhivela vanlubale mwaha wi, ‘podive eguluvale,’ enna ovuwihave ndina naaye. — Omwileri Salmos 92:12-15.

4. Enaalibiha addibilihu eri anakalaba ddiniyani?

⁴ Akala onna wuluvala kudduwale wihina Yehova onowubuwela mabasa aatene ompareliwe. (Heb. 6:10) We ohakavihera ni murima wamutene mabasa oolaleya, siyeyo enamuhiya Baabo oodhulu oohagalalene. We ohufwanyiwa makathamiho​—naaleya yathabwile orusa—​ohakihedha ebaribari ya mBibliyani, ohusamalela mutholo dhonyemela munikuruni na Yehova ni ohaxagiha amodha. Oherana dhatedhene wihina ohanyedhege masadduwo enereya munikuruni na Yehova. Ohukavihera ni ohakongomedha ale enaapara mabasa amudhidhi wamutene. Ororomeleya wawo winna wenjhedhedha odhivela Yehova anniyena ni we. Oliye onopaganya wihina ‘kanadha anyanyala ale enamwiwelela!’ (Sal. 37:28) Oliye onowaroromeliha anakalaba: ‘Ofiyera nyu okanna dhimbwi, ginerege odhowave gusamalelagani.’ (Isa. 46:4) Vowindo kuwiwonege wi, woona wi ohuluvala kunna thima munikuruni na Yehova. Mwebaribarene wo oli athima vanlubale!

5. Anakalaba ehidduwalege ddiniyani?

⁵ Anakalaba ehikanna makalelo owinjhiva ookavihera. Ebaribari wi kinna kopolo ninga kale, mbwenye mwaha ovira yaka dhowinjhivadhene emulabelaga Yehova ehikanna thotho. Yehova podi waparihedhagave mabasa mwamakalelo oohiyana-iyana. Siyeyo nnafunihu woona ni dhopadduwa dhovanene ni dhakale.

6-7. Dhotajhiha baani Bibliya anasorihiye dha adhaari yaari anakalaba yarelihiwe mwaha ororomeleya wewa?

⁶ MBibliyani iyo nnofwanyamo dhotajhiha dha adhaari oororomeleya a Yehova yahaselele omulabela Yehova naarive eguluvale. Motajhiha, Moses anna yaka 80 nubajha olaba ninga namavuhulela a Yehova ni musogoleli aamwaana Ezarayeli. Podi wera Daniyeli aganna yaka 90 Yehova oomulabihedhave ninga namavuhulela. Podi wera murumiwi Juwawu anna yaka 90 nuvetheliwa wihina alebe livuru na Apocalipse.

 ⁷ Adhaari owinjhiva oororomeleya kiyathabwile ononiwa; podi wera athu amodhaya kiyanonne. Mbwenye Yehova owawoona ni ahareeliha mwaha ororomeleya wewa. Motajhiha, Bibliya anasoriha vang’no wodhela mulobwana dhala aari ‘owogowa ni amoova Mulugu’ ithaniwa Simiyawu, mbwenye Yehova ahimunona pama ni ahinvaha ofuru womoona Yesu nuubaliwa, ni osoriha dhovuhulela ngasi-ngasi wodhela oliye vamodha ni maye. (Luc. 2:22, 25-35) Kubuwela yopadduwa ya mwanakalaba aari namavuhulela ithaniwa Ana. Naarive aganna yaka 84, iyo podi owoga negi ‘kanayelelege newene mutugumano mmodha.’ Bibliya anasoriha wihina oliye ‘kaajhobawo otempulu,’ bumwahaya, Yehova ahinvaha ofuru womoona Yesu agaari mwaana. Enowoneya wihina vamentoni va Yehova Simiyawu ni Ana yaari athima.​—Luc. 2:36-38.

8-9. Owoge yotajhiha enoniha wi arogola eri amamukwele ehikanna thima munikuruni na Yehova?

⁸ Malabo apeeno, addibila oororomeleya eri anakalaba yotajhiha yapama wodhela azombwe. Kasugwa thalako ya murogola Lois Didur. Ambele olaba ninga piyonera avayeka aganna yaka 21 oKanada. Vano nuuteliwa, oliye ni mamune John, olaba mudhidhi wowinjhivene ninga anameeddela mulogo. Mudhidhi nuuvira, aliwa ehilaba oBeteli yoKanada yaka dhokwaranya 20. Lois nuwakwaniha yaka 58 oliye ni John withaniwa wihina yalabege oBeteli yoUkraniya. Aliwa yonile aavi withaniwa wule? Nerege yahubuwela yegi: Iyo nihimala wuluvala wihina ntamele elabo emodha? Naari. Aliwa orumedha teto John othomiwa wihina akose epaddi ya nikuru yoFiliyale yoUkraniya. Nuuvira yaka 7, John okwa; mbwenye Lois odhowagave amulabelaga Yehova oBeteli. Peeno ohukanna yaka 81, Lois anna omulabelave Yehova nuroromeleya Beteli yoUkraniya, teto addibila aatene enomudhivela.

⁹ Arogola owunnuwelavo eri amamukwele ninga Lois, podi wera kinarihiwa ninga yarihiwiwa mamuniwa ahinakwe. Mbwenye mwaha okala amamukwele thima enniwana emodhave yanniwana ehinakale amamukwele. Yaka dhowinjhivadhene arogola ala ehakavihera amamuniwa, teto enna odhowave emulabelaga Yehova nuuroromeleya. (1 Tim. 5:3) Enowoneleyamo mwahaya bwaddi Yehova agawoona ninga athima, teto aliwa athu enaalibiha addibila ni arogola eri azombwe.

10. Yotajhiha baani yapama ddibila Tony ananihudhihiye?

¹⁰ Addibila owinjhiva eri anakalaba enakala nyumba dha guvernu naaliwaya bathima. Motajhiha, ddibila anithaniwa Tony anakala mburo yoyo. Oliye abaddiziwe aganna yaka 20 mweri wa Agosto yaka ya 1942, elabo yo Estadu Unidu oPensilvaniya. Kuvirile mudhidhi, wambela owaddihedhiwa wihina adhowe mukoddoni. Mwaha okoodda  odhowa mukoddoni oliye ovokeriwa mukambura yaka bili nimeya. Oliye nimwariye, Hilda, ehalela aniwa abili mwibaribarini. Yaka dhiviraga, Tony ohulaba mulogo miraru ninga namaholela aanamaholela mulogo, ni ninga namasogolela a musonkano wamurudda. Oliye owoona mutugumano ni omuhudhiha Bibliya mukambura. Naarive peeno aganna yaka 98, Tony kanubuwela ohogolowela mundduli. Oliye anna wilibihera wapara mabasa a Yehova ni addibila ammulogoni mwaaye!

11. Nnatonyihedhe addi wi nnowariiha addibila ala oofuneya enakala nyumba dha guvernu?

¹¹ Nnaanone addi waariha addibila eri anakalaba enakala nyumba dha guvernu? Anamaholela mulogo kidduwalege olaba vamodha naliwa yakanna mabasa ammulogoni eyo yenyeya. Iyo podi otonyihedha wi nnowapwatha mwaha wawaredhela ni waligarela. Akala nihimunona ddibila ari mwanakalaba anakala nyumba dha guvernu mbwenye alapele mulogo waye, enohoweleya omuriha ni makalelo avayekiwa. Nahikala pasope, iyo podi ofiyera waddiwala addibila ala oofuneya. Amodhaya podi wera kinakweya owoga wodhela egumi yewa obe podi warusaga werana ndo. Mbwenye naakohaga ni nanona wavuruwana ohagalala yanniwana mwaha wapara mabasa munikuruni na Yehova, ni iyowa nnere oliba.

12. Addibila baani enafwanyeya mmulogoni mwehu?

¹² Podi wera nnotikina, mbwenye mmulogoni mwehu podi wafwanyamo addibila eri anakalaba oororomeleya eri yotajhiha yapama wahiyo. Murogola anithaniwa Harriette anamulabela Yehova yaka dhowinjhivadhene mmulogoni mwaaye oNova Jersey Estadu Unidu, oliye otama odhowa okalaga ni mwanaye. Addibila amulogo muxa aatameliye, aliwa opatha mudhidhi wihina emunone pama, vano aliwa ofwanya nibwe noojerimela. Murogola Harriette wawaddela thalako dhowinjhiva wodhela mabasa oolaleya yereya mudhidhi yole oliye nuuhudhera ebaribari, yaka ya 1925. Mudhidhi yoyo, aadhowaga mmalaleyelo, othukula mbolsani eskovaye ya meno — oovaga nlabo nimodha adhe avokeriwe mukambura ni ahikanne ethu yowikuthana meno. Mwebaribarene, dila bili, yaka ya 1933, oliye ahivokeriwa mukambura sumana yantero. Dila dhabilidhene, mamune ahaali mukiristawu, oomukavihera, wasamalela anaaye araru yaari ahimeene. Mwebaribarene, addibila oororomeleya eri anakalaba ninga Harriette enofwanelela naarihege!

13. Nihudhere ddi mwaha wavaha thima addibila eri anakalaba a munikuruni na Yehova?

¹³ Addibilihu naarogolihu emanle wuluvala bathima munikuruni na Yehova. Aliwa ehoona ni mentwiwa makalelo Yehova arelihiye nikuru naaye mwamakalelo ohiyana-iyana ni aareelihiye mwamakalelo avayekiwa. Aliwa ehihudhera dhithu dhowinjhiva mwaha dhoviriganiha dhewa. Vowindo wawoonege addibila ala ninga ‘ntxela nathotho’ ni ohudhere dhatedhene onawedhiwe ni dhithu dhapadduwele. (Pro. 18:4) Wagula mudhidhi wihina wanone pama, nroromelo nawo nnere oliba ni onere ohudhera ethu-siithu naliwa!

14. Deuteronómio 32:7, ananikongomedha ddiniyani?

¹⁴ Okanne elemelelo yoothapanya naaddibila ale eri anakalaba. (Omwileri Deuteronómio 32:7.) Aliwa podi ohoonaga pama obe ohukanna kopolo yowedda obe naari yowoga, mbwenye murima wewa ofiyera peeno ori ninga wezombwe, ni eherana ‘ndina napama’ vamentoni va Yehova. (Ecl. 7:1) Kuddiwale mwahaya bwaddi Yehova agawoona addibila ala ninga athima. Waweeddihege pama  ni warihege addibila ala. Weregena ninga Elizewu. Oliye ahimuwadelela Eliyaji wihina ekale vamodha nlabo naaye noogomihera. Dila tharu Elizewu ahimwaddela Eliyaji egi: ‘kagidha guhiyani.’ — 2 Reis 2:2, 4, 6.

15. Makoho baani nnafwanelelihu wakoha addibila eri anakalaba?

¹⁵ Otonyihedhege wi onowapwatha addibila ala eri anakalaba wodhela wawerana makoho apama. (Pro. 1:5; 20:5; 1 Tim. 5:1, 2) We podi wakoha wegi: “Mugaali azombwe, yukavihereni onona wi muhufwanya ebaribari ddi?” “Makathamiho yufwanyeni yukavihere addi onfiyera Yehova?” “Yukavihereni ddi omulabelagave Yehova nuuhagalala?” (1 Tim. 6:6-8) Windo wavuruwanege pama yasorihaga thalako yewa.

16. Addibila eri azombwe ni anakalaba yathapanyaga mareeliho baani enakalavo?

¹⁶ Addibila eri anakalaba ni azombwe yathapanyaga, aatene enolibihana. (Rom. 1:12) Azombwe enowenjhedhedha nroromelo newa ni Yehova wihina oliye anowaakavihera adharaaye oororomeleya, teto addibila ale eri anakalaba enowoona wihina nnorihiwa. Addibila eri anakalaba enere odhiveliwa wuwaddela mareeliho yawakenliwa ni Yehova mwigumini mwewa.

17. Mwahaya bwaddi nigawoga wi addibilihu oororomeleya eri anakalaba kadda yaka enowoma?

¹⁷ Mwebaribarene owoma muthu uuluvalaga winomala, mbwenye ale eri oororomeleya wa Yehova owoma wewa kawinamala vamentoni va Yehova. (1 Tes. 1:2, 3) Mwahaya bwaddi? Mwaha yaka dhiviraga aliwa ehenya wihina muzimu wa Mulugu watxenihe obe nere, wihakavihera wunnuwiha dhikalelo dhewa dhapama. Iyo napathaga mudhidhi wihina nanone addibilihu ala eri anakalaba ni nahudheraga naliwa, nnere woona wihina aliwa ehikanna thima yavayekiwa!

18. Ohudhera onaharela nnaasuze ddi?

¹⁸ Mulogo kunakala woliba baahi azombwe yavahaga thima addibila eri anakalaba, mbwenye naaddibilaya eri anakalaba yavahaga thima ale eri azombwe. Ohudhera winaharela, nnere woona addibila eri anakalaba enaatonyihedhe addi wi enowavaha thima azombwe ammulogoni.