1-2. (a) Ukulingana ni Imilumbe 16:31, uzye tuzipizile twalola wuli awakote? (b) Amawuzyo ci yano twandi twasuke mwe co-o icipande?

 AMAWE ye diamond nga mwayazana pano watani wayazifye, mungayapitilila nu kuyapitilila ukwasowa nu kumanya ukuti mwapitilila icuuma.

² Awanawitu na wankazi awakote na wonye wawa ngati ayanye amawe ye diamond. Wacindama nkaninye mwi wungwe lya kwe Yehova. Izwi lwa kwe Leza lyakolanya umutwe wamvwi ku kamba ka kucindamikwa nanti kucisote icicindame nkaninye. (Wazyani Imilumbe 16:31; 20:29) Lelo nga ca kuti tutawisileko amano tungapitilila vyo-o ivyuuma. Nga cakuti awacitici wiluka ukuti awakote wacindama, wangawa ni vintu ivicindame ukucila na pa cuuma. Mwe co-o icipande twakwasuka amawuzyo yatatu. Ilya kutalicila: Amulandu ci wuno Yehova akalolela awakote ukuti wacindama? Ilya citi wili: Amulandu ci wuno awanawitu na wankazi awakote wacindamila mwi wungwe lya kwe Yehova? Nilya kulecelezya: Tungacita wuli pa kuti tuwasambililako ku vyakulolelako vyawo?

3. Ukulingana na Amalumbo 92:12-15, amulandu ci wuno awakote awacisinka wacindamila kwe Yehova?

³ Awakote wano wawa ni cisinka kwe Yehova wacindama nkaninye. E Yehova akalola mukasi ka myezo yawo. Wawamanya icete swinya wakunda imiwele yino wakwata. Cinji acakuti akakunda nkaninye nga walola awakote wakupandako amano awacitici yano wasambilila pa myaka yonsinye yino wasumba mu mulimo wa kwe Yehova. (Job 12:12; Imilu. 1:1-4) E Yehova akakwivwa icete pa kusipicizya kwawo. (Mala. 3:16) Swinya nanti aca kuti wapita mu  ntazi imvule watwalilila ukuwa ni suwilo iliwome. Pe yo-o impindi isuwilo lyawo pa malayo ya kunkolelo lyawomelako ukucila vino lyalinji pano wasambilizile vye icisinka ca mu Baibolo. E Yehova wawakunda sana amuno watwalilila ukusambilizya wanji pi zina lyakwe ‘na pano wakota.’​—Wazyani Amalumbo 92:12-15.

4. Amazwi ci yano yangawomelezya awanawitu na wankazi awakote?

⁴ Wanawitu na wankazi awakote, manyani ukuti e Yehova akakwizuka vyonsinye vino mwamuwombela. (Hebe. 6:10) Umukwasi witu uwa kwi yulu akasecelela nkaninye pe vino mwawombesyanga mu mulimo wa kuwizya. Asa coco conga, mwapita mu ntazi imvule. Zimwi zyamiletelanga uwulanda, lelo mwazisipizya. Swinya mwatwalilila ukwivwila nu kulanjizya ukuti vino Baibolo yikalanda vyacindama nkaninye kwe sweswe. Cinji aca kuti mwawikangako sana amano ku milimo iyili yonsinye yino wamipa mwi wungwe. Mwawombesyanga ukufika pano papelezile amaka yinu ukukonka ukupiluka ukuli konsinye kuno kwacitika mwi wungwe lya kwe Yehova. Mwavwako na wanji wano wasolapo ukuwomba umulimo wa mpindi zyonsi. Ala e Yehova wamikunda nkaninye pe vino mwatwalilila ukuwa awacisinka. Walaya ukuti, “atalilecelezya awantu wakwe awasuwilwa.” (Amalu. 37:28) Walanda nu kuti: “Alilanga akuwasayila musuke mwize mukote mumele nimvwi.” (Ayize. 46:4) Acino mutalola ngati mutacindama mwi wungwe lya kwe Yehova pa mulandu vye wa kuti mukosile. Mwacindama nkaninye!

5. Avyani vino awakote wazipizile wakwizuka?

⁵ Awakote wawa ni vivule ivyakuwomba mwi wungwe. Nanti aca kuti pe yo-o impindi watawa na maka ndi vino walinji kali, wapita muvivule. Fwandi e Yehova angawawomvya mu nzila izilekane lekane. Lekani tulole pa vyakulolelako vya wakote awakukali na wape yo-o impindi.

6-7. Landani pa cakulolelako ca mu Baibolo ica wakote wano walambuzilwe pa mulandu wa kutwalilila ukuwombela Yehova ni cisinka.

⁶ Mu Baibolo mwawa awantu wano watwalilizile ukuwombela Yehova na pano wakosile. Ku cakulolelako, e Musa walinji ni myaka mu ma 80 pano wasonsilwe ukuwa antunguluzi ya wina Israeli na pano watalisile ukuwomba umulimo wa kwe Yehova uwa wukasesema. Swinya e Yehova watwalilizile ukuwomvya e kasesema Daniel  na pano wafisizye imyaka ukucila 90 ukuwa awakumulandilako. Winji nawe amutumwa Yohani. Afwile lyo wafisya imyaka ya kukwatwa ku ma 90 pano umuzimu wutele walenzile alembe ibuku lya Ukuwumbulika.

⁷ Kwawa awawomvi wa kwe Leza na wanji wano watamanyisilwe nu kumanyikwa. Lelo weni e Yehova wa wamanyile swinya wawalambuzile pa wucisinka wawo. Ku cakulolelako, e Simeoni “umuntu umuzima wino watinanga e Leza” watamulandapo na nkani mu Baibolo. Nomba Yehova wamumanyile swinya wamulambuzile. Wamupileko ulongo lwakulola e Yesu lyo acili akanya, nu kulandila lyankani pa nkwatwa yakwe na pe mama wakwe e Mariya. (Luk. 2:22, 25-35) Teyelenganyani pe kasesema Ana wino walinji we mukamfwilwa. Cingatenga walinji ni myaka 84 “atafumanga mu nganda yakupepela,” wazanwanga lyonsinye mukulongana. Co-o calenzile ukuti e Yehova amulambule. Nawenye wizile awa nu longo ulwakulola e Yesu lyo acili akanya. Wonsinye wa-a wawili, e Simeoni ne Ana, wacindime nkaninye kwe Yehova.​—Luk. 2:36-38.

8-9. Amilimo ci yino wamukamfwilwa watwalilila ukuwomba?

⁸ Mwe ya-a amanda awakote wano wakawombela Yehova mu wucisinka wawa avya kulolelako ivizima nkaninye kuwacitici. Lolani icakulolelako ca kwe nkazi Lois Didur. We-e e nkazi pano wafisizye imyaka 21 wamutumile ukuya mukuwomba wu painiya uwuyiwele ku Canada. Pa nsizi ya kwe coco wizile awombako ne wakwakwe e John mu mulimo wa kutandalila amawungwe. Wawomvile wo-o umulimo pa myaka imivule. Swinya wizile awawombelako na pa Bethel ya ku Canada ukucila pa myaka 20. Pano e Lois wafisizye imyaka 58 wawatumile ukuya mukuwombela ku musambo wa ku Ukraine. Walinji nu kucita wuli? Uzye walinji nukulanda ukuti wakuzile watanga wakumanisye ukuya mukuwombela ku nsi zinji? Wazumizile ukuwomba umulimo wuno wawapile. Swinya e wakwakwe wizile asontwa ukuwa mwe Komiti ya Musambo. Pa nsizi ya myaka 7 ukufuma pano e John wafwizile, e Lois wasozilepo ukutwalilila ukuwomba umulimo wuno wamupile pa Bethel. Pe yo-o impindi ali ni myaka 81, swinya watwalilila ukuwombela Yehova mu wucisinka. Awanawitu na wankazi wonsinye pa Musambo wa Ukrainee wamukunda nkaninye.

⁹ Na peyonye impindi kwawa wamukamfwilwa wano wawa ngati we Lois. Manda yamwi cisipepuka ukulola ukuti wakawombesya ndi wulyanye vino wawombesyanga pano walinji na walume. Lelo nanti ciwe wo-o wacindama nkaninye. E Yehova wakunda wankazi wano watunjililanga awalume pa myaka imivule, swinya wano watwalilila ukumuwombela ni cisinka. (1 Tim. 5:3) Cinji acakuti watwalilila ukuwomelezya na wacitici.

10. Uzye e Tony walanjizya wuli ukuti acakulolelako icizima?

¹⁰ Awakote awacisinka wano wakakwikala wonga, nawonye wacindama sana. Wonye wo-o avino cawa na ku mwanawitu e Tony. We-e umwanawitu wabatizizwe mu August 1942 ku  Pennsylvania, mu U.S.A lyo-o ali ni myaka 20. Pa nsizivye ya kubatizwa wamunenile ukutalika uwusoja. Lelo pamulandu wa kuti wakanile, wamunyefile imyaka yiwili ni myezi 6. Weliwe ponga ne wakwakwe e Hilda wakuzizye awana wawo wawili mu cine. Mukupita kwa mpindi e Tony wizile awa we kangalila wa kutanjilila (wano pe yo-o impindi tukati wakampanya). Wawombanga wo-o umulimo mu mawungwe yatatu lyo ko-o we kangalila wa kulongana kwa muputule. Swinya wayangako na kucifungo mukutungulula ukulongana na masambililo ye Baibolo. Cinji acakuti na nombanye ataleka ukuwombela Yehova nanti aca kuti ali ni myaka 98. Akakwelezya ukufika pano papelezile amaka yakwe ukuwombela ponga na wanawitu na wankazi mwi wungwe.

11. Tungalanjizya wuli ukuti twawika amano kuwakoloci wano twawa nawo mwi wungwe litu?

¹¹ Tungalanjizya wuli ukuti twawika amano ku wanawitu na wankazi awakote wano wawa mwi wungwe litu? Nga cingacitika waeluda wangawavwako ukuzanwa mukulongana, ukuya mu mulimo wa kuwizya nanti ukuwakopelakovye amalyasi ya pa kulongana. Tungalazizya ukuti twawawikako amano nga tukuwatandalilako nanti ukuwatumilako vye foni. Cinji aca kuti tuzipizile twawikako sana amano ku wakoloci wano wakakwikalila ukutali na kuno kwawela ing’anda ya wufumu. Tuzipizile ukucenjela sana pa kuti tutiwilizileko kwe wa-a wasongo wano twawa nawo. Manda yamwi nga ca kuti tukulanda na wanawitu na wankazi awakote, cisiwapepucila ukutalika ukulondolola vino wapitamo. Lelo nga cakuti tukuwakolowozya amawuzyo nu kuteyelezya pano wakulanda, tuliyitopwa nkaninye ukwivwa ku vintu ivizima vino wazana mwi wungwe lya kwe Yehova.

12. Uzye awanawitu na wankazi awamusango ci wano mungazana mwi wungwe linu?

¹² Mungazana ukuti na mwi wungwe linunye muno mwawa, muli awanawitu na wankazi awakote wano wapita muvivule vino mungasambililako. E nkazi Harriette pano atani acintile kwi wungwe linji, wawombezile e Yehova mu wucisinka pa myaka imivule mwi wungwe lino walinjimo ku New Jersey, mu U.S.A. Acino pano wayile mukwikala nu mwana wakwe umwanaci, awanawitu na wankazi mwi wungwe wamuwisileko sana amano pa kuti wamumanye. Ica kuti wizile awiluka ukuti wapocelezile icawila icicindame nkaninye. Wawasimicilangako pe vino wawombanga umulimo wa kuwizya pano wasambilizilevye icine mu ma 1920. Ya-a amalyasi yano wawasimicilanga yawawomyanga sana. Lyonsinye nga ca kuti akuya mu mulimo wasendanga tifibulasho [umusukusu nanti umuswaci] pa kuti nga wamulema nu kumutwala ku cifungo ayino ayize awawomvya ukuzifizyako mu mulomo. Co-o camuciticizilepo imiku yiwili mu 1933. Imiku yonsinye yino wamunyepanga wamalanga e sabata wenga mu cifungo. Swinya e wakwakwe wino atalinji we Nte awino wasyalanga akusakamala awana wawo watatu. Ukwasowa nu kuvwilika awakote wano wawa ngati we Harriette wayana ukucindikwa.

13. Avyani vino twasambilila pa wakote wano wawa mwi wungwe lya kwe Yehova?

¹³ Awanawitu na wankazi awakote wacindama nkaninye kwe Yehova ni wungwe lyakwe. Walola vino Yehova wawapaala na vino akalanjizya ukuti awino akatungulula iwungwe lyakwe. Cinji aca kuti wasambililako ivivule kuviluwo vino wacisile. Mwawalola ukuti “ansulo ya mano” nu kusambililako kwe woliwo. (Imilu. 18:4) Nga ca kuti mukuwawikako sana amano pa kuti muwamanye, isuwilo linu liliwomelako. Swinya walimisambilizya ivivule.

14. Uzye iwaliko lya Amasundo 32:7 likawomelezya awacitici ukucita cani?

¹⁴ Mwakwatako impindi yakulanda na songo. (Wazyani Amasundo 32:7.) Kweni pamwi  aminso yawo yangaleka ukulola ndi vino yalolanga kali, watanga wapitisya ndi vino wapitisyanga pano watani wakote swinya manda yamwi izwi lyawo lingapiluka, lelo wakatwalilila ukuwombesya. Wapanga ni ‘zina ilizima’ ne Yehova. (Ekawi. 7:1) Lyonsinye mwakwizuka cino calenga e Yehova awawalola ukuti wacindama. Swinya na mwemwenye muwawacindika. Mwawa ngati we Elisha wino walondanga ukutwalilila ukuwa ne Eliya pa wanda wakulecelezya ukuwa ponga. Wino walanzile impindi zitatu ukuti “Ntandi kusye.”​—2 Izya. 2:2, 4, 6.

15. Amawuzyo ci yano tungakolowozya awakote?

¹⁵ Mwalanjizya ukuti mwawika amano ku wakote ukupitila mukuwakolowozya amawuzyo. (Imilu. 1:5; 20:5; 1 Tim. 5:1, 2) Mungawakolowozya amawuzyo ndi vino ya-a: “Pano mwalinji mwe watici, acani calenzile musinincizye ukuti muzanile ukupepa kwa cisinka? Uzye vino vyamiciticizile vyamyavwizye wuli ukupalamila kwe Yehova? Avyani vino vyamyavwa ukutwalilila ukuwa ni nsansa mu mulimo wa kwe Yehova?” (1 Tim. 6:6-8) Pano wakulondolola, mwawikako sana amano swinya mwateyelezya.

16. Avizima ci vino awakote nawacitici wangazana nga ca kuti wakulanzyanya ?

¹⁶ Nga cakuti awakote na wacitici wakulanzyanya, wonsinye wakalanga wakuwomelezyanya. (Roma. 1:12) Mwe wacitici nga mukulanzyanya na wakote mutaliwavwilika nanti katicinye ukuti e Yehova akasakamala awawomvi wakwe awacisinka. Swinya awakote nawo waliwalola ukuti mwawakunda. Cinji aca kuti waliwakwivwa icete nkaninye ukumisimicilako pe vino Yehova wawalambula.

17. Amulandu ci wuno tungalandila ukuti awakote wano wawa ni cisinka wakaya wakuzipilako pano wakukula?

¹⁷ Ukuyemba kwa pa minso kukaya kukusila pano umuntu akuya akukula. Lelo wano wawa ni cisinka kwe Yehova apano wakazipilako. (1 Tes. 1:2, 3) Amulandu ci wuno twalandila wo-o? Amuno pa myaka yonsinye yino wikala mu nsi, waleka umuzimu wa kwe Leza ukuwavwa nukuwasambilizya ukuwa ni miwele mizima. Nga ca kuti tukwelezya ukufika pano papelezile amaka yitu ukumanya awanawitu na wankazi awakote, tukuwacindika nu kusambililako kwe woliwo, tuliwawalola ukuti wacindama nkaninye!

18. Avyani vino tulisambilila mu cipande cino cikonsilepo?

¹⁸ Iwungwe lisiwomavyenye nga ca kuti awacitici wakuwika amano ku wakote. Lelo likawoma nkaninye nga ca kuti na wakolotenye wakuwika amano ku wacitici. Icipande cino cikonsilepo cililanda pe vino awakote wangacita pa kulanjizya ukuti wawika amano ku wacitici mwi wungwe.