1-2. (a) Kuliya na Visimo 16:31, vati tua pande ku muenamo vamuanetu va vakulupe? (b) Vihula vika tu simutuila mu cilongesa cino?

DIAMANTE nga kanda va ci i kuakule kaha ili mu cifua cayo mpundu, ka ye ku viakula ni ku soloka ku vuaha. Ngeci mukemuo, nga muntu na i uana a hasa ku tuvakana ngueni mavue a ngoco, nkuma vupite vua seho.

² Na vuno vene, vamuanetu va vakulupe va pua ngue diamante, va pua vupite vua seho cikuma. Lizi lia Njambi lia setekesa vuele vuavo na cilongo. (Tandenu Visimo 16:31; 20:29) Vutuhu va pua vupite vua seho, vunoni ci hasa ku pua ca casi ku hona ku va tuala mana. Nga vakuendze va nongonona ngecize vamuanetu va vakulupe va kala na seho, va ka hasa ku uanamo vukuasi vua kama. Mu cilongesa cino, tu kumbulula vihula vitatu: (1) Omo lia vika Yehova ue ku mona ava vakulupe ngue vupite vua seho? (2) Omo lia vika ava vamuanetu vaco, va pua va seho mu lukungulukilo lua Yehova? (3) Vika tu hasa ku linga mangana tu uane vukuasi ku malungano avo?

3. Kuliya na Visamo 92:12-15, omo lia vika vamuanetu va vakulupe va pua va seho kuli Yehova?

³ Vamuanetu va vakulupe va kala na seho kuli Yehova Njambi. A tantekeya vifua viavo mpundu kaha ua haka seho ku vifua viavo via cili. Ce ku muya ku mutima ku mona vakulupe va longesa vakuendze viuma via seho vi va lilongesa ku miaka i vali na ku pangela Yehova. (Yombi 12:12; Visi. 1:1-4) Yehova ua haka naua seho ku lukakatela luavo. (Mal. 3:16) Eci ka ca lombolokele ngecize ka ve ku hita mu visoti. Ve ku hitamo  vene, vunoni ka ve ku zeya mu lutsilielo. Lulavelelo luavo lua ku lutue, lua kaniama ku hiana ha ntsimbu i va lilongesele vusunga. Kaha Yehova ua va lema, muomu ve ku ambulula lizina lieni na “ku vusinakazi vuavo.”—Tandenu Visamo 92:12-15.

4. Vika vi hasa ku kaniamesa vamuanetu va vakulupe?

⁴ Nga muli na ku kulupa, kalenu na vusunga ngecize Yehova ue ku vuluka viose vi mua mu lingila. (VaHe. 6:10) Mue ku fuitangana na ntuima yose mu ku tuala cipanga ca ku ambulula ku lutue, kaha evi vie kuya Tatetu ua muilu ku mutima. Mua kolesa mu vimo vieseko via ku linga na ha meso vui, na ku hakuila vitume via mu Mbimbiliya. Cikuavo naua, mua puisamo viteli via kama mu lukungulukilo kaha na ku longesa vakuenu vutongue. Kaha naua mue ku lihakela kapandi ka kuendela hamo na lukungulukilo lua Yehova, luze lu li na ku tunta mua kama. Mue ku kuasa na ku kaniamesa vamuanetu vaze ve ku kovela mu cipanga ca ntsimbu yose. Yehova ua mi lema cikuma omo lia lukakatela luenu. Ua kulahesa ngecize ka ka “seza veni vakua ku lela”! Ni nguetu, vakua lukakatela. (Visa. 37:28) Kaha ua kulahesa enu vakulupe mu vose ngueni: “Na mu ku heta ku mutue ua vuele nji ka mi ambata.” (Isaya 46:4) Ngeci mukemuo, vutuhu muli na ku kulupa kati mu singanieke ngecize ka muesi naua na seho mu lukungulukilo lua Yehova. Mua kala na seho ya kama!

5. Vusunga vuka ka va pandele ku suva vakulupe?

⁵ Kua kala via vingi vi va hasa ku linga vakulupe mu lukungulukilo. Vutuhu ka vesi na ngolo i va kele nayo laza, vunoni va kala na vutongue vua seho vu va lilongesa mu ku hita ca miaka. Ngeci mukemuo, Yehova ue ku tualelelaho ku va pangesa mu vinjila via ku liseza-seza, ngue mu tu mona mu malungano a ku nima na a mu ntsimbu ino a na hatako.

6-7. Tumbulenu malungano a vantu va va tumbula mu Mbimbiliya va tambuile vivezikiso omo lia lukakatela luavo.

⁶ Mu Mbimbiliya mua kala malungano a cili a engi a vantu va tualeleleho ku pangela Yehova na ku vukulupe. Ca ku muenako, Mosesa mua puile kapolofeto ka Yehova na ntuamena  ua cifuti ca Isaleli, tele ali na miaka 80. Kaha vutuhu Ndaniele tele na tuvakana miaka 90, Yehova kasi ua mu pangesele ku pua muluua ueni. Cikuavo naua, kapostolo Yoano mu va mu huiminine ku soneka mukanda ua Ku-solola, tele halumo na tuvakana miaka 90.

⁷ Vamo vangamba va Yehova va va tumbula mu Mbimbiliya, ka va tsimanene ngeci muavo. Ngeci mukemuo, ce ku puile ca casi ku va suva. Vunoni Yehova ka va suvile, kaha ua lunguisile lukakatela luavo. Ca ku muenako, “mukua vuviuke mukua ku lemesa Njambi” Simione, Mbimbiliya ka ya handekele via vingi ku tuala hali ikeye. Vunoni Yehova ua mu tantekeyele na ku mu hana civezikiso ca ku mona kakeke Yesu. Kaha kati ovio lika, Simione ua handekele vumo vupolofeto ku tuala hali Yesu na naye. (Luka 2:22, 25-35) Singaniekenu naua hali kapolofeto ua mpuevo Ana, uze ua puile ntuluue. Vutuhu ua kele na miaka 84, Mbimbiliya nguayo: “Ikeye ka fumine ku tembele.” Yehova ua vezikisile kapandi ka lihakelele Ana mu ku kunguluka, kaha ua mu tavesele ku mona kakeke Yesu. Mua vusunga Simione na Ana, va puile va seho kuli Yehova.—Luka 2:36-38.

8-9. Vukuasi vuka ve ku tualelelaho ku hana vuntuluue mu lukungulukilo?

⁸ Ku matangua ano, cingi ca vamuanetu va vakulupe ve ku pua lungano lua cili ku vamuanetu va vakuendze. Halakanenu cimona ca ndumbuetu Lois Didur. Mua putukile ku linga vupioneiro vua ku lifuila ku Canada, tele ali lika na miaka 21. Mu nima yaco, neni na yalieni John, va lingile cipanga ca vuniungi vua ku zinguluka mu miaka ya ingi. Mu nima yaco, va ka pangelele ku Mbetele ya ku Canada imo miaka i tuvakana 20. Mua puisile miaka 58, neni na yalieni va va laniene ku ka pangela ku Ucrânia. Vati va lingile? Vuno va limuene ngecize va na kolo cikuma, ka va ka hasa ku ka pangela ku cifuti ceka ni? Houe, va tavele cipanga caco kaha muanetu John ua ka pangele ku civunga ca vakuluntu va Mbetele. Lelo lino, ndumbuetu Lois ali na miaka 81. Kaha kasi ue ku tualelelaho ku pangela ku Mbetele ya ku Ucrânia.

⁹ Vantuluue, ngeci mua ndumbuetu Lois, halumo ka ve ku kala na lutsimo ngue mu va kele naluo laza, tele yaliavo ali na muono. Vutuhu ngoco, vuntuluue ka vue ku tepulula seho i va kala nayo. Yehova ua haka seho ya kama ku vandumbuetu va kele na ku kuasa vamala vavo mu miaka ya ingi, kaha ve ku tualelelaho ku mu pangela na lukakatela vutuhu va kala lika liavo. (1 Tim. 5:3) Ku vueza hali evi, ve ku kaniamesa naua vakuendze na vahumbe mu cikungulukilo.

10. Lungano luka lua cili ua tu sila muanetu Tony?

¹⁰ Cingi ca vamuanetu va kala ku vindzivo via ku niungila vakulupe, kasi va pua vupite vua kama mu lukungulukilo. Ca ku muanako, lelo lino muanetu Tony, ua yoyela ku ndzivo yaco. Va mu mbatizile mu Agosto ya 1942 tele  ali na miaka 20 ku Pensilvânia, EUA. Mu nima ya ntsimbu, va mu kakateyele ku lisonekesa ku vusualale, kaha ua vianene, ngeci va mu sokele mu kamenga mu miaka ivali na mutamba. Neni na mpueyeni Hilda, va kele na vana vavali vaze va va longesele naua vusunga. Mu nima ya miaka muanetu Tony, ua pangele mu vikungulukilo vitatu ku pua mukua ku kuatasanesa civunga ca vakuluntu na mukuluntu ua viuano via limbo. Ua putukile ku endesa ciuano, na vilongesa via Mbimbiliya mu kamenga. Vutuhu ali na miaka 98, muanetu Tony ka tondo ku kosa mu kali, ku tuala ha ku pangela Yehova. Kasi ue ku tualelelaho ku lihakela kapandi kose mu ku pangela hamo na cikungulukilo!

11. Vati tu hasa ku muesa ngecize tua haka seho ku vamuanetu va yoyela ku vindzivo vi ve ku niungila vakulupe?

¹¹ Vati tu hasa ku muesa kavumbi ku vamuanetu va yoyela ku vindzivo ku ve ku niungila vakulupe? Vakuluntu ve ku linga cose mu ku haka vamuanetu vaco mu vipanga via mu cikungulukilo kuliya na vuhasi vuavo. Kaha muntu ku muntu, tu hasa ku muesa seho kuli ava vamuanetu mu kuya mu ku va meneka, ni ku va sana mu video conferência. Cikuavo naua, tu tonda ku muesa seho ya ku lifuila ku vamuanetu va kala ku vindzivo ku ve ku niungila vakulupe, vize via kala ku laako na cikungulukilo. Muomu nga ka tua zangamene, tu hasa ku suva vamuanetu vaco. Vamo ce ku va puila ca cikalu ku handeka viavo, ni ve ku singanieka ngecize ka ca puile ca cili ku lingamo. Vunoni nga tu pua na ku uana ntsimbu ya ku sikama navo na ku va halakana, tu ka lilongesa via vingi ku vutongue vuavo mu ku pangela Yehova.

12. Vika tu hasa ku uana mu cikungulukilo cetu mpundu?

¹² Nga tu hilula mu cikungulukilo cetu, tu ka komoka mu ku mona ngecize namuo mua kala vamuanetu va vakulupe va pua lungano lua cili. Ca ku muenako, umo ndumbuetu ua lizina Harriette ua pangelele Yehova mu miaka ya ingi mu cikungulukilo cavo ku Nova Jersey, EUA. Mu nima ya ntsimbu ua nungulukilile mu ku ka yoya na muaneni ua mpuevo. Vamuanetu va mu cikungulukilo ca nungulukilile, va tondele ntsimbu ya ku ka sikama-sikama neni, kaha va nongonuene ngecize ua pua vupite vua seho. Ua va kaniamesele cikuma na vimona via mu ku ambulula via lihitile navio mua lilongesele vusunga mu 1925. Ntsimbu yose ya kele na kuya mu ku ambulula, ua kele na kuenda na cikumbo ceni ca mu kanua, linga a ka hase ku ci pangesa nga va ka mu kuata na ku mu soka mu kamenga. Mu 1933, va mu tualele mu kamenga, ua kalamo simano. Ha vintsimbu viaco, yalieni ua kele na ku mu kuasa na ku niunga vana vavo vatatu, vutuhu ka puile Mukaleho. Mua vusunga, vamuanetu va vakulupe vakua lutsilielo ngeci mua vaHarriette va fuila ku va haka seho!

13. Vika tu lilongesa ku cihela ci va kala naco vakulupe mu lukungulukilo lua Yehova?

¹³ Vamuanetu va vakulupe va kala na cihela ca seho cikuma, mu lukungulukilo lua Yehova. Va limuena vati Yehova ua va vezikisa na ku vezikisa lukungulukilo lueni mu vinjila via ku liseza-seza. Va lilongesa viuma via seho ku visevuka viavo. Ngeci mukemuo, tu puenu na ku va mona ngue “ndundzi ya mangana” na ku lilongesa ku vutongue vuavo. (Visi. 18:4) Nga mu pua na ku uana ntsimbu ya ku va tantekeya na ku sikama navo, lutsilielo luenu lu ka kaniama kaha mu ka lilongesa via vingi!

14. Vika Ndeutelonomi 32:7, ya kaniamesa vakuendze?

¹⁴ Lihakelenu kapandi ka ku pua na ku simutuila na vakulupe. (Tandenu Ndeutelonomi 32:7.) Vutuhu va tsitsivala meso, kaha ka va  kele na vuasi vua kuenda cipue ku handeka, vunoni kasi va pua vakuendze mu mitima. Cikuavo naua, va panga “lizina lia cili” ku meso a Yehova. (Ekel. 7:1) Puenu na ku vuluka viuma via lingisa Yehova ku va haka seho. Tualelelenuho ku va muesa kavumbi. Puenu ngeci mua Elisa, uze ua kakatelele kuli Eliya na ha litangua lia ku manusuila, uze ua handekele ngueni: “Ka nji ka tava ku ku seza.”—2 Vam. 2:2, 4, 6.

15. Vika tu hasa ku hula vakulupe?

¹⁵ Puenu na ku muesa seho ku vakulupe, mu ku va linga vihula na kasingimiko. (Visi. 1:5; 20:5; 1 Tim. 5:1, 2) Citava ku vehula viuma ngeci mua: “Mu mua puile mu vakuendze, vika via mi lingisile ku tava ngecize mua uana vusunga?” “Vati viuma vi mua lihita navio mu muono, via kaniamesa vusamba vuenu na Yehova?” “Mu ku mona cenu, lihungu lika lia kala ha ku tualelelaho ku pangela Yehova na ndzolela?” (1 Tim. 6:6-8) Kaha va halakanenu vuino omo va mi leka via muono uavo.

16. Vati ku simutuila ca kala ha kati ka mukulupe na mukuendze ci hasa ku kuasa vose vavali?

¹⁶ Ku simutuila ca mukulupe na mukuendze, ce ku kuasa vose vavali. (Loma 1:12) Mukuendze, ue ku kala na vusunga ngecize nkuma cili vene Yehova ue ku niunga vangamba veni va lukakatela, kaha mukulupe co ue ku livua ngecize kasi ua kala na seho ku vantu. Kaha eci ce ku mu vuisa ndzolela ya ku leka mukuendze, vivezikiso via tambula kuli Yehova.

17. Omo lia vika tu hasa ku handekela ngecize ve ku tualelelaho ku vuaha cikuma mu ku hita ca miaka?

¹⁷ Ku vuaha ca muvila ce ku tepuluka omo muntu aya na ku kulupa. Vunoni vakua lukakatela kuli Yehova ve ku tualelelaho ku vuaha ambe nga vali na ku kulupa. (1 Tes. 1:2, 3) Omo lia vika? Muomu mu ku hita ca miaka ve ku tavesa sipilitu santu ya Yehova i va munge na ku va kuasa ku kala na vifua via cili. Nga tu tualelelaho ku lihakela kapandi ka ku tantekeya vuino vamuanetu va vakulupe, ku va singimika, na ku lilongesa ku malungano avo, seho i tua va haka nayo i ka livuezelela!

18. Vika tu ka simutuila mu cilongesa ci na hatako?

¹⁸ Cikungulukilo ce ku kaniama, nga vakuendze va haka seho ku vakulupe na vakulupe ku vakuendze. Mu cilongesa ci na hatako, tu ka simutuila ha vati vakulupe va hasa ku muesa ngecize va haka seho ku vakuendze mu cikungulukilo.