1-2. (a) Mukuzwirana no Mazwi Akangwara 16:31, tinodikana kuvona kudini hama no hambzaji jaavasharuka? (b) Tinozodavira muvhunjo japi pa musoro uno?

VANDHU pavanoenda kovhakacira parki iri ku Arkhansa, Estadhus Unidhus yo Amerika, vanowana madhiyamati ari pasi. Asi madhiyamati aya aazivi kunasirihwa kuti amunikire. Inga muviyo, vandhu vazinji pavanovona madhiyamati aya, avatonasi kuzwisisa kuti ivona vari kutovona zviro zvinosisira maningi.

² Mu njira yakafanana, hama no hambzaji jedu jaavasharuka jakadari inga madhiyamati aya. Soko ra Mwari rinoezanisa invhi javo no junguja. (Verenganyi Mazwi Akangwara 16:31; 20:29) Zvakareruka maningi kutama kuvona kusisira kwavanoita. Majaha paanozwisisa kuti hama no hambzaji jaavasharuka jinosisira, ivona vanobesereka maningi. Pa musoro uwu tinozodavira muvhunjo mutatu: Ngenyi Jehovha anoreremeja hama no hambzaji jaavasharuka? Ngenyi hama no hambzaji jaavasharuka jinosisira maningi mu sangano ra Jehovha? Zvicinyi zvatinodikana kuita kuti tinase kubesereka ngo muezaniso wavo?

3. Mukuzwirana na Nduyo 92:12-15, ngenyi hama no hambzaji jaavasharuka jinosisira maningi pamberi pa Jehovha?

³ Hama no hambzaji jaavasharuka jinosisira maningi kuna Jehovha Mwari. Iyena anokwanisa kuvona zviya zvavari ngo mukati. Cimwenizve anonasa kuziva no kureremeja mugariro javo jaushoni. Iyena anodakara vasharuka pavanovhunja majaha zviro zvavakajija pa kushandira kwavo Jehovha. (Jobe 12:12; Mazwi Akangwara 1:1-4) Jehovha anoreremeja maningi kucungirira kwavo. (Malakia 3:16) Ivona vanosongana no zvineso zvakawanda mu upenyu hwavo. Pikija zvakadaro, vano rutendo hwakavanga kuna Jehovha. Vetero yavo kuitira kumbeji yakavanga  maningi kupinda paya pavakatanga kujija cokwadi. Jehovha anovada maningi ngokuti ivona vari kwenderera mberi vecitokotesa zina rake mu ‘ukarahwa hwavo kamare.’—Verenganyi Nduyo 92:12-15.

4. Ngozvapi zvingavangisa hama no hambzaji jaavasharuka?

⁴ Kudari imwimwi maamusharuka, ivanyi no cokwadi co kuti Jehovha, anoceukija mabasa ese omakamuitira. (Vahebheru 6:10) Imwimwi no kuvangisira kwese makabesera basa ro kucumaera. Zvondhozvo, zvakadakajisa maningi Baba wedu vo mugore. Imwimwi makacungirira zvineso zvizinji, kubatanijavo no zvimweni zvakamusiya makanyangajwa. Pikija zvakadaro, imwimwi makazwira no kujivirira ndhungamiriro jakarungama ja Jehovha no kujijisa vamweni kuti vabesere sangano ra Jehovha. Makaita zvese zvamaikwanisa kuti muite cinjo kuti mufambe pamwepo no sangano rake. Imwimwi makabesera no kuvangisa vaya vari mu nguva yakazara. Jehovha Mwari anomuda maningi ngo kuva kwenyu makagondeka. Iyena anogondesa kuti ‘aazorasi vatendi vake.’ (Nduyo 37:28) Anomugondesazve kudari: “Mbhera mucene vhuji, ndinondomuthwara.” (Isaia 46:4) Ngo kudaro, mucadorangarira kuti ngo kuva kwenyu musharuka amucasisiri mu sangano ra Jehovha. Imwimwi munosisira maningi kamare!

5. Hama no hambzaji jaavasharuka jinodikana kuceukijenyi?

⁵ Hama no hambzaji jaavasharuka jingabesera sangano ra Jehovha mu njira jakasiyana-siyana. Pikija ivona avacina simba rovainga naro kare, ivona vano zviro zvaushoni zvakavaitikira zvingabesera maningi. Jehovha angaenderera mberi ecivashandisa mu njira jakawanda, inga zvatinoda kuvona pa muezaniso jo kare no jo wari.

6-7. Ipanyi muezaniso jinokhombija kuti Jehovha wakakomborera vaya vakaenderera mberi vecimushandira pikija vainga vaavasharuka.

⁶ Itusu tingawana muezaniso jaushoni maningi mu Bhaibheri jo vandhu vakashandira Jehovha pavainga vaavasharuka. Inga muezaniso, Mosi wainga waano makumasere o makore paakatanga kushanda inga muporofeti wa Jehovha no paakasanwaya kuti ave  mutungamiriri wo jinja ro Iziraeri. Pikija Danieri wainga waano makumapfumbhamwe o makore, Jehovha wakaenderera mberi ecimushandisa inga muporofeti wake. Mupostori Johani waingavo waano makumapfumbhamwe o makore paakafemehwa kuti atare bhuku ra Apokaripsi.

⁷ Vashandiri vamweni vakagondeka va Jehovha avacaitonasa kuzivika ngo vamweni. Asi Jehovha waivavona, wovakomborera ngo kugondeka kwavo. Inga muezaniso, Simiyoni mundhu “wakarurama, waithya Mwari,” anonangwa kashoma basi mu Bhaibheri. Asi Jehovha anomuziva i wakamukomborera ngo kumuita kuti iyena akwanise kuvona Jesu paainga mwana mutete no kunanga zviro zvinganani ngo pamusoro po mwana na mai wake. (Ruka 2:22, 25-35) Amborangariranyivo ngo pamusoro po muporofitakaji Ana. Iyena wainga waano makumasere na marongomuna o makore, asi tingatonanga kuti iyena “aacaishwa kuenda ku themberi.” Jehovha wakamukomberera ngo kutama kwake kushwa kwenda ku themberi no kuimuita kuti avone mwana mutete Jesu. Vovaviri, Simiyoni na Ana vaisisira maningi kuna Jehovha.—Ruka 2:36-38.

8-9. Hambzaji jiri noni jinobesera kudini sangano ra Jehovha?

⁸ Nyamasi uno, vashandiri vazinji vakagondeka va Jehovha i muezaniso jakanaka maningi kuno majaha. Vonanyi basi muezaniso wa hambzaji Ruiza Dhedhuri. Ivona vakatanga kushanda inga piyona anosisira ku Kanadhaa, pavainga no makumaviri na rimwe o makore. Tevere, ivona no mwamuna wavo vakapeja makore akawanda veciita basa ro kuvhakacira ungano. Pakufamba ko nguva ivona vakazoshanda ko makumaviri o makore pa Bheteri ro Kanadhaa. Hambzaji Ruiza povainga no makumashanu no masere o makore, ivona no mwamunavo vakakokwa kuti vaende koshandira ku Ukraniya. Zvicinyi zvovakaita? Kunanga kuti ivona vakarangarira kuti vaavasharuka maningi kuti vatendere mukoka uwu here? Haiwa, ivona vakatendera mukoka uwu. Povakaguma kondhoyo mwamunavo vakagajwa kuti vashande inga umwe wo vo komisau yo Bheteri ro kondhoyo. Mwamunavo povakatamika makore manomwe akatevera, hambzaji Ruiza vakatema civaringo co kuenderera mberi vecishanda kondhoyo. Wari ivona vaano makumasere o makore no gore rimwe. Asi vari kuenderera mberi vecishanda ngo simba inga umwe wo mbhuri yo Bheteri ro Ukraniya.

⁹ Noni jakadari inga hambzaji Ruiza kazinji avacavoniwi maningi inga povaingaya no mwamunavo, asi ivona vanosisira maningi kamare. Jehovha anoreremeja maningi hambzaji jakabesera mwamunajo ko makore akawanda. Mukuengejera, ivona vari kwenderera mberi vecimushandira vakagondeka. (1 Timoti 5:3) Ivona vanovangisa maningi majaha.

10. Ngowapi muezaniso waushoni wakagajwa ndi hama Toni?

¹⁰ Hama no hambzaji jaavasharuka jinogara  ku nyumba inokorondhehwa vasharuka, jinosisiravo maningi. Inga muezaniso, hama Toni wari vanogara ku ndau iyi. Ivona vakabhabhatijwa mu mweji wa Agosto wo 1942 povainga no makumaviri o makore ku Pennsylvania, Estadhus Unidhus yo Amerika. Pakupera mukuvo mushoma no vapera kubhabhatijwa, ivona vakavhunjwa kuti vaidikana kunghwina mu basa ro usoca. Zvecivoneka kuti ivona vakaramba, vakagara makore maviri no meya mu kadheya. Ivona no mukaji wavo Hildha, vakarera vana vavo vaviri mu cokwadi. Pakufamba ko makore, hama Toni vakashanda mu ungano ndhatu inga superintendente presidente (wari anozivika inga murongi wo dare ro vakuru). Vakashandazve inga muvonereri wo gungano ro ndharaundha. Ivona vaiitisa musongano no kujijisa Bhaibheri mu kadheya. Wari vaano makore anokwana kuita makumapfumbhamwe na masere, avazivi kusiya kushandira Jehovha. Ivona vari kuita zvese zvavanokwanisa kuti vashandire Jehovha pamwepo no hama no hambzaji javo.

11. Tingakhombijisa kudini kuti tinoreremeja hama no hambzaji jinogara ku ndau inokorondhehwa vasharuka?

¹¹ Tingakhombijisa kudini kuti tinoreremeja hama no hambzaji jaavasharuka jinogara ku nyumba inokorondhehwa vasharuka? Pazvinokwanisika weya, vakuru vangavabesera kuti vapurukire musongano kana kutocumaera navo. Itusu tingakhombija kuti tinovadakarira ngo kwenda kovavona kana kutobhuya navo ngo vhidhiyo shamadha. Tinodikavo kukhombija kuti tinodakarira hama no hambzaji jaavasharuka jinogara ku ndau iyi, jogarazve ndhambo no ungano yavo. Tinodikana kungwarira maningi kuti titame kuvakanganwa. Vamweni vavo, vanovona zvecinesa maningi kubhuya ngo pamusoro po zviro zvakavaitikira. Asi zvinozotivangisa maningi patinopsaka nguva kuti tibhuye navo no kuvapurukira pavanonga vecinanga mudakaro wovakava nawo pa kushandira Jehovha.

12. Mushovonyi wo hama no hambzaji jatingawana mu ungano yedu?

¹² Tingatoshamaisika maningi ngo kuvona kuti mu ungano mwedu kamare muno hama jino muezaniso jakanaka maningi. Hambzaji Hariyeti yakashandira Jehovha yakagondeka ko makore akawanda ku ungano yayo ku Novha Jersei, ku Estadhus Unidhus yo Amerika. Asi ivona vakazothutha voenda kogara no mwana wavo wokaji. Hama jo ungano imbza iyi jakapsaka nguva kuti jibhuye nayo, jakazozwisisa kuti iyona inosisira maningi. Iyona yakavavangisa ngo kuverenga zvakaiitikira poyainga yecicumaera poyakatanga kujija cokwadi mu makore o 1925. Pa vhaza jese joyaienda kocumaera iyona yaienda no shikovha kuti izokwanise kucukuca meno, ikazodihwa mu kadheya. Kunasa kunanga, mu gore ro 1933 ivona vakafungihwa vhaza mbiri. Pa vhaza jese iji ivona vakagara sumana imwe. Pa mukuvo uwu, mwamuna wavo vacikaripi Capupu wakavabesera maningi. Povainga mu kadheya mwamunevo vaikorondha vana vavo vatatu. Zvokadi kamare, hama no hambzaji jaavasharuka kudari inga hambzaji Hariyete vanofanera kureremejwa!

13. Zvicinyi zvatingajija kuvha ku hama no hambzaji jaavasharuka jiri mu sangano ra Jehovha?

¹³ Hama no hambzaji jedu jaavasharuka, jinosisira maningi kuna Jehovha no ku sangano rake. Ivona vari kukwanisa kuvona ngo njira jakawanda kamare, kuti Jehovha ari kukomborera sangano rake na ivona kamare. Ivona vakajija zviro zvakawanda ngo kuposa kovakaita. Tinodikana kuvavona inga “cinyuke co uzivi,” tojija ngo muezaniso javo. (Mazwi Akangwara 18:4) Kudari mukapsaka nguva kuti mubhuye navo, munozovangisa rutendo hwenyu no kujija zviro zvakawanda.

14. Deuteronòmio 32:7, inovangisa majaha kuti aitenyi?

¹⁴ Tanganyi ndimwi kubhuya no hama iji. (Verenganyi Deuteronòmio 32:7.) Zvingaita kuti ivona avacatovoni ushoni, avacakwanisi kufamba ushoni kana avacatokwanisi kuvereketa ushoni. Asi ivona vacakavanga ngo mu mwoyo, cimwenizve vakaita “zina rakanaka” pamberi pa Jehovha. (Mucumaeri 7:1) Ceujanyi kuti ngenyi Jehovha anovareremeja. Endereranyi mberi mecivareremeja. Ivanyi inga Erizeu. Iyena wakagara phedo na Eriya pa njiku yo kupejisira yo vakava vese. Iyena wakananga kudari pa vhaza ndhatu jese: “Andizokusii.”—2 Majimambo 2:2, 4, 6.

15. Ngojapi muvhunjo jamungaitira hama no hambzaji jaavasharuka?

¹⁵ Vonesanyi kuti imwimwi munoda kamare hama no hambzaji jaavasharuka. (Mazwi Akangwara 1:5; 20:5; 1 Timoti 5:1, 2) Vaitenyi muvhunjo jakadari inga iji: “Pomainga mujaha, zvicinyi zvakamukhohwesa kuti mainga mawana cokwadi?” “Kuitisa kudini zviro zvakamuitikira zvakamubesera kuti mugare phedo na Jehovha?” “Zvicinyi zvakamubesera kuti murambe makadakara pa kushandira Jehovha?” (1 Timoti 6:6-8) Perapo nasanyi kupurukira pavanonga vecidavira.

16. Kuitisa kudini kubhuya kunoita vasharuka no majaha kunobesera vese?

¹⁶ Vasharuka no majaha povanobhuya vese, vese vanobesereka maningi. (Varoma 1:12) Imwimwi majaha munozova no cokwadi kamare co kuti Jehovha anotaja vashandiri vake, ivona vanojizwa kuti vanoreremejwa. Ivona vanozodakara maningi ngo kumuverengera manera ovakakomborehwa ndi Jehovha.

17. Ngenyi tingananga kuti hama no hambzaji jedu jaavasharuka, jinoseja maningi makore paanokhirira?

¹⁷ Kuseja ko mundhu kunopera makore paanokhirira, asi vaya vakagondeka kuna Jehovha vanoengejera kuseja kwavo makore paanokhirira. (1 Vatesaronika 1:2, 3) Ngenyi tingananga kuti izvi ndizvonadi? Ngokuti makore paanokhirira, ivona vanotendera kuti mujimu wa Mwari uvaumbe no kuvabesera kuti vave no mugariro jakanaka. Patinonasa kuziva hama no hambzaji jedu jaavasharuka, kuvareremeja no kujija ngo muezaniso wavo, tinozovavonadi kamare inga vandhu vanosisira.

18. Zvicinyi zvatinozovona pa musoro unotevera?

¹⁸ Ungano aivangi basi majaha paanoreremeja vasharuka, asi inovanga maningi vasharuka pavanoreremejavo majaha. Pa musoro unotevera, tinozovona kuti vasharuka vangakhombijisa kudini kuti vanoreremeja majaha.