1-2. (a) Shi ikolelela kOmayeletumbulo 16:31, otu na okutala ko ngiini aakokele? (b) Omapulo geni tatu ka yamukula moshitopolwa shika?

MOAMERIKA omu na oparka yontumba moka to vulu okumona uuwe wu li pevi. Nonando ongawo, uuwe mboka inawu tetwa natango. Nomolwaashono aantu oyendji haye wu pitilile owala inaaya dhimbulula kutya owu li oshinima shi na ongushu.

² Aakokele yetu aadhiginini nayo oya fa uuwe mboka. Oohapu dhaKalunga otadhi yelekanitha oomvi dhawo noshishani. (Lesha Omayeletumbulo 16:31; 20:29) Ihe otashi vulu okukala oshipu kaatu kale twe ya tala ko ngawo. Aagundjuka mboka ya lenga aakokele, ohaya vulu okwiilonga sha kuyo. Moshitopolwa shika, otatu ka yamukula omapulo gatatu taga landula: Omolwashike Jehova a tala ko aakokele aadhiginini ye li eliko li na ondilo? Omolwashike aakokele aadhiginini ye na oshilonga mehangano lyaJehova? Oshike tatu vulu okuninga tu mone mo uuwanawa pakuudha miiholelwa yawo?

3. Metsokumwe nEpisalomi 92:12-15, omolwashike Jehova a lenga aakokele aadhiginini?

³ Aakokele aadhiginini oye na ongushu momeho gaJehova. Oku shi omaukwatya gawo omawanawa nokwe ga lenga. Oha kala e shi pandula uuna aakokele haya kwathele aagundjuka yi ilonge sha kowino ndjoka ya mona sho ya kala taya longele Jehova uule womimvo. (Job 12:12; Omayel. 1:1-4) Jehova okwa pandula wo eidhidhimiko lyawo. (Mal. 3:16) Oya pita momaupyakadhi ogendji, ihe inaya etha nando eitaalo lyawo muJehova li nkundipale. Etegameno lyawo lyonakuyiwa olya kolelela  shi vulithe sho opo yi ilongo oshili. Jehova oku ya hole, molwaashoka otaya tsikile okutseyitha edhina lye “nomuukokele wawo.” (OB-1954) — Lesha Episalomi 92:12-15.

4. Oshike tashi vulu okuhekeleka aamwatate naamwameme aakokele?

⁴ Ngele owu li omukokele, kala wu na uushili kutya Jehova oku shi iilonga ayihe mbyoka we mu longela monakuziwa. (Heb. 6:10) Owa kala to ambidhidha nuulaadhi iilonga yokuuvitha, naashoka Jehova okwe shi pandula. Owa kala nokwiidhidhimikila omaupyakadhi, mwa kwatelwa naangoka ge ku yemateka noonkondo. Owa kala nokudhiginina omithikampango dhOmbiimbeli dhi li pauyuuki nowa kala to gwanitha po nuudhiginini iinakugwanithwa ya simana mehangano lyaJehova. Owa kala to ningi ngaashi to vulu, wu endele pamwe nalyo. Owa kala wo to ambidhidha nokutsa omukumo mboka ye li miilonga yethimbo lyu udha. Jehova Kalunga oku ku hole noonkondo omolwuudhiginini woye. Oku uvaneka kutya ite ke “etha aantu ye aainekelwa.” (Eps. 37:28) Okwe ku uvanekela wo a ti: ‘Otandi ku gamene, sigo to kulupa wu ninge oomvi.’ (Jes. 46:4) Onkene ino thika pehulithodhiladhilo kutya sho ngashingeyi wu li omukokele ku na we oshilonga mehangano lye. Natango owu na oshilonga!

5. Oshike shoka aakokele ye na okudhimbulukwa?

⁵ Aakokele otaya vulu okulongithwa kuJehova mehangano lye momikalo odhindji. Nonando otashi vulika kaaye na we oonkondo ndhoka ya li ye na nale, oye na ontseyo oyindji ndjoka ya mona sho ya kala taya longele Jehova uule womimvo. Jehova ota vulu natango oku ya longitha momikalo odhindji, ngaashi tatu ke shi kundathana muutendo tawu landula.

6-7. Gandja iiholelwa okuza mOmbiimbeli yaakokele mboka ya li ya lalekwa nuuyamba omolwiilonga yawo yuudhiginini.

⁶ MOmbiimbeli otatu vulu okwaadha mo iiholelwa yaapiya yaJehova aadhiginini, mboka ya kala taye mu longele sigo omuukulupe. Pashiholelwa, Moses okwa li e na omimvo 80 lwaampono, sho a tameke okulonga e li omuhunganeki gwaJehova nomukwatelikomeho gwoshigwana shaIsraeli. Nonando Daniel okwa li e na omimvo 90 nasha, Jehova okwa tsikile natango oku mu longitha e li omupopikalelipo gwe.  Shimwe ishewe, omuyapostoli Johannes otashi vulika a li e na omimvo 90 nasha sho a nwethwa mo a nyole embo lyEhololo.

⁷ Aapiya yaJehova yalwe oyendji aadhiginini kaya li aanamadhina nenge ye shiwike nawa, naashoka osha li tashi vulu oku ya ningitha kaaya kale ye niwe nayo. Nonando ongawo, Jehova okwa kala e shi iilonga yawo yuudhiginini nokwe ya yambeke omolwuudhiginini wawo. Pashiholelwa, Simeon ngoka a li ‘omulumentu omuyuuki noha tila Kalunga,’ okwa popiwa mo owala lwiikando yontumba mOmbiimbeli, ihe Jehova okwa li e shi iilonga ye yuudhiginini nokwe mu pe uuthembahenda wokumona okahanona Jesus nosho wo okuhunganeka kombinga yako noyayina. (Luk. 2:22, 25-35) Dhiladhila wo kombinga yomuselekadhi Anna, ngoka a li omuhunganeki. Okwa li e na omimvo 84 ‘nokwa li aluhe ha kala motempeli.’ Jehova okwa li e mu yambeke sho a kala aluhe ha yi kotempeli, sho oshikando shimwe naye a mono okahanona Jesus. Simeon naAnna oya li ye na ongushu momeho gaJehova. — Luk. 2:36-38.

8-9. Omumwameme gumwe okwa li a tsikile ngiini okulongela Jehova sho a ningi omuselekadhi?

⁸ Kunena aakokele oyendji aadhiginini oye li oshiholelwa oshiwanawa kaagundjuka. Natu taleni koshimoniwa shomumwameme Lois Didur. Okwa li owala e na omimvo 21, sho a ningi omukokolindjila i ikalekelwa moKanada. Konima yaashoka, ye nomusamane gwe, John, oya kala miilonga yuuyendi omimvo odhindji. Konima yaashono oya ka longela moBetel yaKanada uule womimvo dhi vulithe po 20. Sho Lois e na omimvo 58, ye naJohn oya pulwa ya ka longele koUkraine. Mbela oya li ya ningi po shike? Mbela oya li yi ipopile kutya oya kulupa uunene noku ka longela koshilongo shilwe? Aawe! Oya taamba ko oshinakugwanithwa shoka, na omumwatate John okwa ningi oshilyo shOkomitiye yOshitayimbelewa shaahoka. Konima yomimvo 7 John okwa si, ihe Lois okwa tokola a tsikile noshinakugwanithwa she. Ngashingeyi Lois oku na omimvo 81 nota tsikile okulongela Jehova nuudhiginini moBetel yaUkraine, noku holike kaamwahe noonkondo.

⁹ Aaselekadhi ngaashi Lois, otashi vulika ya kale ya talika ko kaaye na we oshilonga sho aasamane yawo ya sa, ihe okukala omuselekadhi itashi ti kutya ku na we oshilonga. Jehova okwa lenga noonkondo aamwameme mboka ya kala taya ambidhidha aasamane yawo uule womimvo, notaya tsikile natango oku mu longela nuudhiginini. (1 Tim. 5:3) Shimwe ishewe, ohaya kala lela ekwatho enene kaagundjuka.

10. Omumwatate Tony okwa tula po oshiholelwa oshiwanawa shini?

¹⁰ Aakokele oyendji aadhiginini mboka haya zi momagumbo gokusila oshimpwiyu aakokele nayo oye na ongushu momeho gaJehova. Pashiholelwa, omumwatate gwedhina Tony, ngashingeyi naye oha zi megumbo lya tya ngawo. Okwa ninginithwa muAguste mo 1942 moAmerika, sho e na omimvo 20. Konima yokuninginithwa,  okwa li i ithanwa kuukwiita. Molwashoka okwa li a tindi okuya muukwiita, okwa tulwa mondholongo, moka a kala uule womimvo mbali netata. Ye nomukadhi, Hilda, oya li ya putudhile oyana yaali moshili. Uule womimvo, Tony okwa li omuunganeki gwolutu lwaakuluntugongalo momagongalo gatatu, nokwa li wo omuunganeki gwiigongi yoshikandjo. Okwa li wo ha ka kwatela komeho omakugongala mondholongo, nokuninga omakonakonombiimbeli. Omumwatate Tony ngashingeyi oku na omimvo 98, nota tsikile okulongela Jehova. Oha ningi ngaashi ta vulu megongalo a longele Jehova.

11. Ongiini tatu vulu okuulika kutya otwa lenga aakokele mboka haya kala momagumbo gokusila oshimpwiyu aakokele?

¹¹ Ongiini tatu vulu okuulika kutya otwa lenga aakokele mboka haya kala momagumbo gokusila oshimpwiyu aakokele? Aakuluntugongalo otaya vulu okukala haye ya kwathele momikalo dhontumba, ngaashi oku ya kwathela ya kale haya kala pokugongala nosho wo okuya muukalele. Otatu vulu okukala hatu ya ulukile kutya otu na ko nasha nayo, mokukala hatu ya dhengele nenge hatu popi nayo okupitila momakwatathano gopaintaneta. Otu na wo okukala hatu gandja eitulomo olindji kaakokele mboka haya zi kokule negongalo. Ngele inatu kotoka, otashi vulika tu kale kaatu na ko nasha nayo. Aakokele yamwe otashi vulika ya kale kaaye hole okupopya kombinga yawo. Ihe otashi ke tu etela uuwanawa ngele otwa kala hatu kutha ethimbo tu ya pule omapulo nokupulakena sho taye tu lombwele kombinga yiimoniwa mbyoka ya mona sho ya kala taya longele Jehova uule womimvo.

12. Momagongalo getu otatu vulu ngaa okwaadha mo aamwatate naamwameme aakokele aadhiginini? Gandja oshiholelwa.

¹² Otashi vulika tu kale twa kumwa okumona kutya momagongalo getu namo omu na aakokele aadhiginini mboka ye li oshiholelwa oshiwanawa. Omumwameme gwedhina Harriette okwa kala ta longele Jehova nuudhiginini uule womimvo odhindji megongalo lyawo moNew Jersey, moAmerika. Konima yethimbo okwa tembuka mo a ka kale pamwe nokamwanakadhona. Aamwatate yomegongalo epe moka a tembukile oya ningi oonkambadhala ye mu tseye nawa, noya mono nkene e hole Jehova noonkondo. Okwa kala he ya hokololele kombinga yiimoniwa ye okuza sho i ilongo oshili mo 1920 nasha. Pethimbo ndyono, ngele te ku uvitha okwa li ha faalele aluhe okaikushitho ke kokomayego, a ningila ngele a kwatwa po e ta tulwa mondholongo. Mo 1933 okwa li nokuli a tulwa mondholongo iikando iyali, moka a kala uule woshiwike. Pethimbo a li mondholongo, omusamane gwe ngoka kee shi Onzapo oye a kala ta sile oshimpwiyu aanona yawo yatatu. Aakokele aadhiginini ngaashi Harriette oya gwana okusimanekwa.

13. Oshike tatu ilongo kombinga yankene aakokele ya simana mehangano lyaJehova?

¹³ Aamwatate naamwameme aakokele oya simana kuJehova nokehangano lye. Oya mona nkene Jehova a kala nokuyambeka ehangano lye momikalo odhindji dha yoolokathana nankene e ya yambeke pauhandimwe. Oyi ilonga wo oshindji komapuko ngoka ya ninga. Natu kale twe ya tala ko ye li ‘oluthithiya lwowino’ nokwiilonga sha kiimoniwa yawo. (Omayel. 18:4) Ngele otwa kala hatu kutha ethimbo tu ya tseye nawa, otatu ki ilonga oshindji kuyo, shoka tashi ka koleka eitaalo lyetu.

14. Deuteronomium 32:7 ota ladhipike aagundjuka ya ninge shike?

¹⁴ Kala ho kongo oompito wu popye naakokele. (Lesha Deuteronomium 32:7.) Odhoshili kutya otashi vulika ihaaya mono ko we nawa,  haya ende kashona, haya popi unene pevi, ihe nando ongawo, natango oya halelela okulonga oshindji noyi iningila ‘edhina ewanawa’ naJehova. (Omuuv. 7:1) Ano natu kale tu shi kutya Jehova natango okwe ya tala ko ye na oshilonga. Natu tsikile okukala twe ya simaneka. Natu kale ngaashi Elisa. Sho ya li pamwe naElia oshikando shahugunina, Elisa okwa li a tokola okutsikila okukala pamwe naye. Okwa li a lombwele Elia iikando itatu, a ti: “Itandi ku thigi po.” — 2 Aak. 2:2, 4, 6.

15. Omapulo geni tatu vulu okupula aakokele?

¹⁵ Kala ho ulike kutya owu na ko nasha lela naakokele, mokukala ho ya pula omapulo. (Omayel. 1:5; 20:5; 1 Tim. 5:1, 2) Ya pula omapulo ngaashi: “Sho wa li omugundjuka, oshike sha li she ku tompa kutya owa mona oshili?” “Iinima mbyoka ye ku ningilwa monkalamwenyo oye ku kwathela ngiini wu hedhe popepi naJehova?” “Oshike she ku kwathela wu kale wa nyanyukwa sho to longele Jehova?” (1 Tim. 6:6-8) Opo nduno pulakena neitulomo sho taye ku yamukula.

16. Ngele aakokele naagundjuka oya kala haya popi, otashi ke ya etela ngiini ayehe uuwanawa?

¹⁶ Uuna aakokele naagundjuka haya popi, otashi ke ya etela ayehe uuwanawa. (Rom. 1:12) Ngele aagundjuka oya kala haye shi ningi, otaya ka kala ye na uushili kutya Jehova oha sile oshimpwiyu aapiya ye aadhiginini, naakokele otaya ka kala ye uvite kutya oye holike, notaya ka nyanyukilwa wo oku ya lombwela nkene Jehova a kala te ya laleke nuuyamba.

17. Omolwashike tatu vulu okutya aamwatate naamwameme aakokele ohaya ende taya ningi aawanawa momeho gaJehova?

¹⁷ Eopalo lyetu lyokombanda ohali ende tali kana po sho omimvo dhu uka komeho, ihe mboka aadhiginini kuJehova omumvo kehe ohaya ende taya ningi aawanawa lela momeho ge. (1 Tes. 1:2, 3) Omolwashike tatu tile ngawo? Omolwaashoka momukokomoko gwomimvo oya etha ya zulwe kombepo yaKalunga noya kokeke omaukwatya omawanawa. Ngele otwa kala hatu ningi oonkambadhala tu tseye nawa, tu simaneke nokwiilonga sha kaamwatate naamwameme aakokele, kungawo otatu ka kala twe ya lenga notatu ka kala twe ya tala ko ye na oshilonga megongalo.

18. Oshike tatu ka kundathana moshitopolwa tashi landula?

¹⁸ Egongalo ohali kala lya kola uuna aagundjuka ya lenga noya simaneka aakokele nosho wo uuna aakokele ya lenga aagundjuka megongalo. Moshitopolwa tashi landula, otatu ka kundathana nkene aakokele taya vulu okuulika kutya oya lenga aagundjuka megongalo.