1-2. (a) Molingana na Miyambo 16:31, kansi tufunika kuŵaona tyani Akhristu acikulile? (b)  Nanga tilaŵizhyane makonsho otyani m’nkhani ino?

 M’CALO ca United States of America, muli nkhalango iyakine yamene yupezeka ku dela ya Arkansas. M’nkhalango iyi, muli miyala inyinji ya dayamondi yamene ili tyala poonekela. Koma ŵanthu anyinji ozindikila lini kuti ni miyala ya dayamondi cifukwa ni yosang’animila. Tetyo, miyala iyi yamtengo wapatali yankhala yunyalanyaziwa kwa vyaka vinyinji.

² Akhristu acikulile ni amtengo wapatali ngako monga ni miyala ya dayamondi. Baibo yulaŵila kuti imvwi zao zili monga ni cisote cacifumu ca ulemelelo. (Ŵelengani Miyambo 16:31; 20:29) Koma nthawi ziyakine tingotaya mwai woonesha cikondi na ulemu kuli Akhristu aŵa, ndipo tingoŵanyalanyaza. Acilumbwana angapindule m’njila zinyinji ngako ngati ozindikila kuti akwasu na azilongosi acikulile ni amtengo wapatali. M’nkhani ino, tilaŵizhyane makonsho atatu aŵa: Ndaŵa yanji Yehova oona acikulile kuti ni amtengo wapatali? Ndaŵa yanji akwasu na azilongosi amene ni acikulile ni ofunika ngako m’gulu ya Yehova? Nanga tingacitenji kuti tikopindula na cisanzo cao?

3. Molingana na Salimo 92:12-15, ndaŵa yanji Yehova oona kuti Akhristu acikulile ni amtengo wapatali?

³ Yehova oona Akhristu acikulile kuti ni amtengo wapatali. Yove oziŵa umunthu wao ndipo oŵakonda ngako cifukwa ca minkhalidwe iweme yaali nayo. Ndipo osangalala ngako ngati akwasu na azilongosi acikulile ouzhyako Akhristu acilumbwana madaliso yapeza cifukwa cotumikila Yehova. (Yobu 12:12; Miy. 1:1-4) Kuyangizhyila apo, Yehova okondwela ngako akaona mzimu wopilila wakuonesha Akhristu acikulile. (Mal. 3:16) Ove opitilizhya kum’tumikila mokhulupilika olo kuti okumana na mavuto osiyanasiyana mu umoyo wao. Mosiyana na mweenzele peenzophunzila cendi, lomba oyembekezela mwacidwi koma soti mwacidalilo  kukwanilishiwa kwa malonjezo a Yehova. Ndipo Yehova oŵakonda ngako cifukwa opitilizhya kulengeza za zina yake “olo kuti ni okalamba.”​—Ŵelengani Salimo 92:12-15.

4. Kansi ni mfundo zotyani zamene zingalimbikishe Akhristu okalamba?

⁴ Ngati nimwe Mkhristu wacikulile, ziŵani kuti Yehova okukondani ngako ndipo angaluŵe lini zemwemucitila. (Aheb. 6:10) Yove osangalala ngako cifukwa mupitilizhya kulalikila mwacimwemwe olo kuti mukumana na mavuto osiyanasiyana. Kufumila pemwephunzila cendi, mupitilizhya kukonkha mfundo za m’Baibo, kutumikila pa maudindo osiyanasiyana mumpingo nophunzisako ayakine. Mucita zilizonse zamungakwanishe kuti mukocita zinthu mokatizhyana na masinthidwe a m’gulu ya Yehova. Ndipo mupitilizhya kulimbikisha Akhristu ayakine kuti akwanilishe zolinga zao zauzimu. Yehova okukondani ngako cifukwa mupitilizhya kunkhala okhulupilika. Yove olonjeza kuti “angasiye lini ŵanthu ŵake okhulupilika.” (Sal. 37:28) Olonjeza soti kuti, ‘Munthu wa imvwi akomunyamula nthawi zonse.’ (Yes. 46:4) Koma nthawi ziyakine, mungoziona kuti nimwe osafunika m’gulu ya Yehova cifukwa cakuti lomba nimwe okalamba. Koma zacendi n’zakuti nimwe ofunika ngako soti.

5. Kansi acikulile ocilikiza tyani gulu ya Yehova?

⁵ Akwasu na azilongosi acikulile ocilikiza gulu ya Yehova m’njila zosiyanasiyana. Olo kuti lomba okwanisha lini kucita zinyinji monga ni mwenzocitila kale, ove ali na nzelu koma soti ciziŵiso cifukwa atumikila Yehova kwa nthawi itali. Ndipo monga ni mwati tionele m’visanzo va ŵanthu a m’nthawi zakale koma soti a masiku ŵano, Yehova opitilizhya kuseŵenzesha Akhristu acikulile m’njila zosiyanasiyana.

6-7. Fotokozani visanzo va m’Baibo va Akhristu amene edalisiwa cifukwa copitilizhya kutumikila Yehova mokhulupilika.

⁶ M’Baibo, muli visanzo va Akhristu amene epitilizhya kutumikila Yehova olo kuti enze okalamba. Mwacisanzo, Mose enze na vyaka pafupifupi 80 peciyamba kutumikila monga mneneli koma soti msogoleli wa Aisiraeli. Olo kuti Danieli enze na vyaka vopitilila 90, Yehova epitilizhya kumuseŵenzesha monga mneneli wake. Ndipo mtumwi Yohane enze na vyaka vopitilila 90, pamene mouzhyiliwa eyamba kulemba buku ya Chivumbulutso.

 ⁷ M’Baibo, muli soti visanzo va Akhristu acikulile amene enze okhulupilika, koma enzoziŵika lini ngako. Olo n’tetyo, Yehova enzoŵaziŵa bwino ndipo eŵadalisa cifukwa ca kukhulupilika kwao. Mwacisanzo, Simeoni enze ‘wolungama ndipo enzoyopa Mulungu,’ koma otomolewa lini ngako m’Baibo. Olo n’tetyo, Yehova enzomuziŵa bwino ngako ndipo em’pasa mwai wolosela zokhuza Yesu na amai ŵake. Pavuli pake, yove enkhala na mwai woona Yesu peenze lucece. (Luka 2:22, 25-35) Ganizilani soti za mneneli Anna wamene enze munakazi wamasiye. Olo kuti enze na vyaka 84, ‘enzoluta ku kacisi nthawi zonse.’ Ndipo Yehova emudalisa cifukwa ca khama yeenze nayo ‘yopezeka pa misonkhano’ cakuti naye enkhala na mwai woona Yesu peenze lucece. N’zoonekelatu kuti Simeoni na Anna enze amtengo wapatali kwa Yehova.​—Luka 2:36-38.

8-9. Fotokozani cisanzo cuonesha mwamene azilongosi amene azinalume ŵao emwalila opitilizhyila kutumikila Yehova mokhulupilika.

⁸ Masiku ŵano, pali soti akwasu na azilongosi anyinji acikulile amene otumikila Yehova mokhulupilika. Ndipo cisanzo cao cupindulisha Akhristu acilumbwana. Ganizilani za kalongosi Lois Didur. Peenze na vyaka 21, eyamba kutumikila monga mpainiya wapadela ku Canada. M’kuluta kwa nthawi, yove na mulume wake John etumikila m’dela kwa vyaka vinyinji. Pavuli pake, enkhala na mwai wotumikila pa Beteli ya ku Canada kwa vyaka vopitilila 20. Kalongosi uyu peenze na vyaka 58, eŵasenga kuti akatumikile pa Beteli ya ku Ukraine. Kansi eona kuti enze akulu ngako cakuti angatumikile lini m’calo ciyakine? Yai. Ove evomela ciitano ici ndipo pavuli pake mkwasu John eyamba kutumikila m’Komiti ya Msambo. Pavuli pa vyaka 7, mkwasu uyu emwalila. Koma kalongosi Lois epitilizhya kutumikila pa Beteli. Lomba ali na vyaka 81, koma opitilizhya kutumikila Yehova mokhulupilika pa ofesi ya msambo ya ku Ukraine. Ndipo akwasu na azilongosi omukonda ngako.

⁹ Nthawi ziyakine, anakazi amasiye monga kalongosi Lois angonyalanyaziwa pavuli pakuti azinalume ŵao amwalila. Koma tufunika kupitilizhya kuŵaonesha cikondi na ulemu noŵapangisha kuzimvwa kuti akali ofunika mumpingo. Yehova oŵakonda ngako azilongosi amene enzocilikiza azinalume ŵao kwa vyaka vinyinji, ndipo opitilizhya kum’tumikila mokhulupilika olo pavuli pakuti azinalume ŵao amwalila. (1 Tim. 5:3) Yove oŵayamikila ngako cifukwa opitilizhya kulimbikisha acilumbwana mumpingo.

10. Kansi mwaphunzilapo cinji pa cisanzo ca mkwasu Tony?

¹⁰ Pali soti akwasu na azilongosi acikulile amene opitilizhya kutumikila Yehova mokhulupilika olo kuti onkhala ŵeka. Mwacisanzo, mkwasu Tony ebatizika mu August 1942 ku Pennsylvania, U.S.A.,apo n’kuti ali na vyaka 20. Pavuli pake, emangiwa kwa vyaka viŵili na hafu cifukwa cokana kuloŵa usoja. Pecifuma, yove na mkazi wake Hilda enkhala na ŵana aŵili ndipo eŵaphunzisa cendi. Kwa vyaka vinyinji, mkwasu Tony enzotumikila m’mipingo itatu monga woyanganila  womasogolela. (wamene lomba oziŵika kuti mgwilizanisi wa bungwe ya akulu) Ndipo enzotumikila soti monga woyanganila msonkhano wadela. Kuyangizhyila apo, yove enzophunzila Baibo na akaidi nocita nao misonkhano ya mpingo. Olo kuti lomba ali na vyaka 98, mkwasu uyu opitilizhya kutumikila Yehova mwakhama. Ndipo osangalala kulalikila pamozi na ofalisa osiyanasiyana a mumpingo mwao.

11. Tingacitenji kuti tioneshe cikondi kuli acikulile amene onkhala ŵeka?

¹¹ Kansi tingacitenji kuti tikoonesha cikondi kuli Akhristu acikulile amene onkhala ŵeka? Ngati n’zokwanishika, akulu angaŵayavye kupeza mayendedwe pakuya ku Ng’anda ya Ufumu olo kuŵalumikiza ku misonkhano na pa makambilano ya mu utumiki kupitila pa zipangizo zalomba. Ndipo tonse tingaoneshe cikondi kuli akwasu na azilongosi aŵa mwa kuyoŵaonako olo kuŵatumila foni. Tufunika soti kuonesha cikondi kuli Akhristu acikulile amene onkhala kutali na ku Ng’anda ya Ufumu. Tufunika kucita zilizonse zatingakwanishe kuti tiŵaoneshe kuti ni ofunika ngako nopewa kuŵanyalanyaza. Patulaŵizhyana na akwasu koma soti azilongosi acikulile, ayakine angomasuka lini kulaŵila za umoyo wao cifukwa ca cibadwa cao. Tetyo, tingapindule ngako ngati tingacite kuŵasenga kuti atiuzhyeko madaliso yapeza cifukwa cotumikila Yehova.

12. Kansi tingapindule tyani na cisanzo ca Akhristu acikulile a mumpingo mwasu?

¹² Tonse tingalimbikishiwe ngako na cisanzo ca Akhristu okalamba a mumpingo mwasu. Mwacisanzo, kalongosi Harriette etumikila Yehova kwa vyaka vinyinji mumpingo wao ku New Jersey, U.S.A. Pavuli pake, eyamba kunkhala na mwana wake munakazi ndipo ekukila mumpingo uyakine. Akwasu na azilongosi mumpingo uyu, enzopatula nthawi kuti amuziŵe bwino, ndipo ezindikila kuti enze wamtengo wapatali ngako. Yove enzoŵauzhya mweyenzoyendela nchito yolalikila peciphunzila cendi ca m’ma 1920. Pa nthawi iyo, kalongosi uyu enzoluŵa lini kunyamula nswaci yosukila m’menu pakuya mu ulaliki cifukwa enzoziŵa kuti nthawi iliyonse angamumange. Mwacisanzo, mu 1933, apolisi emumanga kaŵili konse cifukwa colalikila ndipo enkhala m’jele kwa mawiki yaŵili. Olo kuti mulume wake enze lini Mboni, enzomucilikiza ngako. Mwacisanzo, yove peenze m’jele, mulume wake niye enzosamalila ŵana ŵao atatu. Mosakaikila, tufunika kuonesha cikondi na ulemu kuli Akhristu acikulile monga kalongosi Harriette.

13. Ndaŵa yanji acikulile ni ofunika ngako m’gulu ya Yehova?

¹³ Yehova oŵakonda ngako Akhristu acikulile ndipo oŵaona kuti ni ofunika ngako m’gulu yake. Akwasu na azilongosi aŵa aona umboni wakuti Yehova odalisa atumiki ŵake koma soti gulu yake. Ndipo ephunzilapo kanthu pa vinthu vaaliyocite bwino peenze acilumbwana. Tetyo, mukoŵaona monga ni “cisime ca nzelu,” ndipo mukocita zilizonse zamungakwanishe kuti mukopindula na nzelu koma soti ciziŵiso cao. (Miy. 18:4) Ngati mupatula nthawi yotandala nao kuti muŵaziŵe bwino, mungaphunzile zinyinji ngako kufumila kuli ove. Ndipo cikhulupililo canu citang’e.

14. Molingana na Deuteronomo 32:7, kansi acilumbwana ofunika kucita cinji?

¹⁴ Mukopeza nthawi yotandala na Akhristu acikulile. (Ŵelengani Deuteronomo 32:7.) N’cendi kuti cifukwa ca ukulukazi, Akhristu aŵa angovutika kulolesha, kuyenda olo kulaŵila. Koma ezipangila “mbili yabwino” kwa Yehova ndipo akalufuna kucita zinyinji pom’tumikila. (Mla. 7:1) Nthawi zonse, mukokumbukila kuti Yehova oona acikulile kuti ni amtengo wapatali. Tetyo, mukocita zilizonse zamungakwanishe kuti mukoŵaonesha kuti muŵakonda noŵalemekeza. Ndipo mukotolela cisanzo ca Elisa wamene aliyolole kuti Eliya amusiye pa siku  yosilizhyila ya umoyo wake. Katatu konse, Elisa euzhya Eliya kuti: “Ningakusiyeni lini.”​—2 Maf. 2:2, 4, 6.

15. Ni makonsho yotyani yatingakonshe Akhristu acikulile?

¹⁵ Mukoonesha cidwi kuli Akhristu acikulile mwa kuŵakonsha makonsho yangakuyavyeni kuti muŵaziŵe bwino. (Miy. 1:5; 20:5; 1 Tim. 5:1, 2) Mungaŵakonshe kuti: “Pemwenze mlumbwana, kansi n’cinji cekusimikizhyilani kuti mwapeza cendi?” “Kansi n’cinji cekuyavyani kuti munkhale pa ushamwali wotang’a na Yehova?” “Nanga n’cinji cakuyavyani kuti mupitilizhye kutumikila Yehova mwacimwemwe koma soti mokhulupilika mpaka lomba?” (1 Tim. 6:6-8) Pavuli pake, mukomvwishila mosamala pakukuuzhyani mbili ya umoyo wao.

16. Kansi acikulile na acilumbwana angapindule tyani ngati opatula nthawi yotandala?

¹⁶ Ngati acikulile opatula nthawi yotandala na acilumbwana, onse opindula ngako. (Aro. 1:12) Mwacisanzo, ngati Mkhristu wacikulile ofotokoza madaliso yawapeza cifukwa cotumikila Yehova, zingayavye mkwasu olo kalongosi wacilumbwana kunkhala na cidalilo cakuti Yehova odalisa cendi atumiki ŵake. Kuyangizhyila apo, kucita izi kungacitishe Mkhristu wacikulile kuzimvwa kuti ni wofunika ngako m’gulu ya Yehova. Ndipo kungamuyavye kuti akumbukile madaliso yawapeza cifukwa cotumikila Yehova.

17. Ndaŵa yanji tingalaŵile kuti kukongola kwa Akhristu kuyangizhyilika pakupitilizhya kutumikila Yehova?

¹⁷ Ngati munthu okulukazhya, kukongola kwake kusila patontho-patontho. Koma Yehova oona kuti kukongola kwa atumiki ŵake kuyangizhyilika caka ciliconse. (1 Ates. 1:2, 3) Izi zili tetyo cifukwa caka ciliconse ophunzisiwa kufumila ku gulu yake ndipo oyesayesa kukulisha minkhalidwe ya mzimu utuŵa. Ngati tupatula nthawi yoziŵana na akwasu na azilongosi acikulile, kuŵaonesha cikondi, ulemu, noyesayesa kutolela minkhalidwe yao yabwino, niye patingaone kuti ni ofunika ngako mumpingo.

18. Kansi tikaphunzile cinji m’nkhani yokonkhapo?

¹⁸ Mpingo unkhala wotang’a ngati acikulile koma soti acilumbwana ooneshana cikondi na ulemu. Tetyo, m’nkhani yokonkhapo, tikaone mwamene Akhristu acikulile angaoneshele kuti oyamikila mwai wotumikila pamozi na acilumbwana mumpingo.