1-2. (a) Go ya ka Diema 16:31, re swanetše go lebelela bjang batšofadi ba ka phuthegong? (b) Re tlo araba dipotšišo dife sehlogong se?

GO NA le phaka e nngwe kua United States yeo e nago le ditaamane. Eupša ditaamane tšeo ga se tša tšwa di pholišiwa. Ka baka leo batho ba bantši ba ka no se di lemoge gomme ba di feta.

² Ka tsela e swanago, batšofadi ba ka phuthegong ba swana le ditaamane tšeo. Ba bohlokwa kudu. Lentšu la Modimo le swantšha dihlogo tša bona tše putswa le mphapahlogo. (Bala Diema 16:31; 20:29) Eupša go ka ba bonolo gore re se ke ra ba bona ba le bohlokwa. Bafsa bao ba lebelelago batšofadi bao ba botegago ba le bohlokwa ba ka holega kudu. Sehlogong se re tlo araba dipotšišo tše tše tharo: Ke ka baka la’ng Jehofa a lebelela batšofadi ba botegago ba le bohlokwa? Ke ka baka la’ng batšofadi ba le bohlokwa ka mokgatlong wa Jehofa? Re ka dira’ng gore re ithute go bona?

3. Go ya ka Psalme 92:12-15, ke ka baka la’ng batšofadi bao ba botegago ba le bohlokwa go Jehofa?

³ Batšofadi bao ba botegago ba bohlokwa kudu go Jehofa Modimo. O a tseba gore ke batho ba mohuta mang e bile o tseba le dika tša bona tše dibotse le go di lebelela di le bohlokwa. Jehofa o a thaba ge a bona batšofadi ba botša bafsa kamoo ba holegilego ka gona ge ba be ba dutše ba mo hlankela ka mengwaga e mentši. (Jobo 12:12; Die. 1:1-4) Le gona o a thaba ge a bona gore ba kgotleletše. (Mal. 3:16) Le ge ba bile le mathata a mantši bophelong, ba tšwela pele ba na le tumelo yeo e tiilego go Jehofa go feta ge ba be ba sa thoma go ithuta therešo. Tumelo ya bona ya gore Jehofa o tlo re direla dilo tše dibotse nakong e tlago e tiile kudu go feta ge ba be ba sa thoma go ithuta  ditherešo. Le gona Jehofa o a ba rata ka gobane ba tšwela pele ba botša batho ka leina la gagwe le ge ‘ba tšofetše.’—Bala Psalme 92:12-15.

4. Ke dilo dife tšeo di swanetšego go kgothatša batšofadi ka phuthegong?

⁴ Ge e ba o thomile go tšofala, kgonthišega gore Jehofa a ka se lebale mediro yeo o e dirilego go mo hlankela. (Baheb. 6:10) O be o dutše o thekga modiro wa go bolela ditaba tše dibotse ka mafolofolo gomme seo se thabiša Tatago rena wa legodimong kudu. O kgotleletše mathata a magolo le ao a kwešago bohloko kudu, wa dula o phela ka go dumelelana le melao ya Modimo. E bile o be o na le maikarabelo a mantši ka phuthegong le go tlwaetša ba bangwe. O dirile sohle seo o ka se kgonago go sepedišana le mokgatlo wa Jehofa woo o sepelago ka lebelo kudu. O ile wa thekga ba bangwe le go ba kgothaletša gore ba tsenele tirelo ya nako e tletšego. Jehofa Modimo o go rata kudu ka ge o ile wa dula o mmotegela gomme o tshepiša gore “a ka se tlogele bao ba mmotegelago”! (Ps. 37:28) Jehofa o tshepiša batho bao ba mmotegelago gore ‘o tla dula a ba rwele le botšofading bja bona.’ (Jes. 46:4) Eupša o se ke wa nagana gore ka ge bjale o tšofetše, ga o sa le bohlokwa ka mokgatlong wa Jehofa. O sa le bohlokwa kudu!

5. Ke selo sefe seo batšofadi ba swanetšego go se gopola?

⁵ Batšofadi ba bohlokwa ka ditsela tše dintši ka mokgatlong wa Jehofa. Le ge ba ka ba ba se sa na matla ao ba bego ba na le ona, ba na le phihlelo e ntši yeo ba e hweditšego ge ba be ba hlankela Jehofa ka mengwaga e mentši. Jehofa a ka tšwela pele a ba diriša ka ditsela tše dintši. Ka mohlala, a re kweng ka batšofadi bao a ilego a ba diriša mehleng ya kgale le bao a ba dirišago gona bjale.

6-7. Nea mehlala ya batšofadi ba ka Beibeleng bao Jehofa a ilego a ba šegofatša ka ge ba be ba mo hlankela ka go botega.

⁶ Ka Beibeleng go na le mehlala e mebotse ya batšofadi ba botegago, bao ba ilego ba hlankela Jehofa ka mafolofolo gaešita le ge ba be ba tšofetše. Ka mohlala, ge Moshe a be a thoma go ba moporofeta wa Jehofa le moetapele wa setšhaba sa Isiraele, o be a na le mengwaga e ka bago e 80. Ge Daniele a be a na le mengwaga  e fetago e 90, Jehofa o ile a no tšwela pele a mo diriša gore e be moporofeta wa gagwe. Le gona, go ka direga gore moapostola Johane o be a na le mengwaga e fetago e 90, ge Jehofa a be a mo diriša gore a ngwale puku ya Kutollo.

⁷ Batho ba bantši bao ba botegago ba be ba se ba tuma. Le gona go be go ka ba bonolo gore ba tshedišwe mahlo. Eupša Jehofa o be a na le taba le bona e bile o ile a ba šegofatša ka ge ba be ba mmotegela. Ka mohlala, Simeone yoo a bego “a lokile e bile a boifa Modimo,” go bolelwa ka yena ka makga a sego kae ka Beibeleng eupša Jehofa o be a mo tseba gabotse. E bile o ile a mo fa tokelo ya gore a bone Jesu ge e be e sa le leseana le go mo dira gore a porofete ka lesea leo le mmago lona. (Luka 2:22, 25-35) Mohlala o mongwe ke wa Anna yoo e bego e le mohlologadi e bile e le moporofeta. Le ge a be a na le mengwaga e 84, eupša “o be a sa ke a hlokwa tempeleng.” Ka ge a be a dula a eya tempeleng, Jehofa o ile a mo šegofatša kudu ka go dira gore a bone Jesu ge e be e sa le leseana. Simeone le Anna ba be ba le bohlokwa kudu go Jehofa.—Luka 2:36-38.

8-9. Batšofadi ba dira’ng go tšwela pele ba thuša ka mokgatlong wa Jehofa? Nea mohlala.

⁸ Lehono re na le batšofadi ba bantši ba botegago bao ba beelago bafsa mohlala o mobotse. Nagana ka mohlala wa kgaetšedi Lois Didur. Ge a be a thoma go ba mmulamadibogo yo a kgethegilego kua Canada o be a na le mengwaga e 21 feela. Ka morago ga moo, yena le monna wa gagwe John, ba ile ba fetša mengwaga e mentši ba le modirong wa bosepedi. Ka morago ba ile ba hlankela Bethele ya Canada ka mengwaga ya ka godimo ga e 20. Ge Lois a be a na le mengwaga e 58, yena le John ba ile ba newa kabelo ya gore ba yo hlankela Ukraine. Ba be ba tla dira’ng? Na ba be ba tla nagana gore ba tšofetše gore ba ka ya go hlankela nageng e nngwe? Aowa, ba ile ba amogela kabelo yeo, gomme John a kgethwa go hlankela Komiting ya Lekala la moo. John o ile a hlokofala ka morago ga mengwaga e šupago gomme Lois a tšwela pele kabelong ya gagwe. Gona bjale Lois o na le mengwaga e 81 gomme o tšwela pele a hlankela Jehofa ka go botega Bethele ya Ukraine. E bile batho ka moka ba mo rata kudu moo.

⁹ Batho ba ka no lebala ka bahlologadi ba go swana le Lois ka ge bjale banna ba bona ba hlokofetše, eupša Jehofa o sa ba lebelela ba le bohlokwa kudu. Jehofa o lebelela dikgaetšedi tšeo di ilego tša thekga banna ba tšona ka mengwaga e mentši di le bohlokwa kudu go yena, tšeo gona bjale di sa tšwelago pele di mo hlankela ka go botega. (1 Tim. 5:3) Le gona dikgaetšedi tše di kgothatša bafsa kudu.

10. Tony o re beetše mohlala o fe o mobotse?

¹⁰ Batšofadi ba bantši ba botegago bao ba dulago mafelong ao go hlokomelwago batšofadi ba bohlokwa kudu. Ka mohlala, gona bjale ngwanabo rena Tony o dula go le lengwe la mafelo ao. O kolobeditšwe kua Pennsylvania, U.S.A., ka August 1942 a na le mengwaga e 20.  Ka morago ga gore a kolobetšwe o ile a gapeletšwa go tsenela bošole gomme a gana. Ke moka a golegwa mengwaga e mebedi le seripa. Yena le mosadi wa gagwe Hilda, ba godišeditše bana ba bona ba babedi ka phuthegong. Tony o hlanketše diphuthegong tše tharo e le molebeledi yo a okamelago yoo ga bjale a bitšwago molomaganyi wa sehlopha sa bagolo, e bile o feditše mengwaga e mentši e le molebeledi wa kopano ya tikologo. O be a etela kgolego e itšego a swara dithuto tša Beibele le diboka. Tony ga bjale o na le mengwaga e 98, gomme o sa tšwela pele a hlankela Jehofa. O sa dutše a dira sohle seo a ka se kgonago go hlankela Jehofa le go šoma le bana babo le dikgaetšedi ka phuthegong ya gabo!

11. Re ka bontšha bjang gore re na le taba le bana babo rena le dikgaetšedi bao ba dulago mafelong ao go hlokomelwago batšofadi?

¹¹ Re ka bontšha bjang gore re na le taba le bana babo rena le dikgaetšedi bao ba dulago mafelong ao go hlokomelwago batšofadi? Ge e ba go kgonega, bagolo ba ka ba thuša gore ba tle dibokeng goba go di theetša le go ya tšhemong. Re ka bontšha gore re na le taba le bona ka gore re ba etele goba ka go boledišana le bona re diriša bidio. Re nyaka go bontšha gore re na le taba le bana babo rena le dikgaetšedi bao ba dulago mafelong ao go hlokomelwago batšofadi ao a lego kgole le diphuthego tša gabo bona. Re swanetše go hlokomela gore re se ke ra lebala batšofadi ba. Ba bangwe ba bona ba ka no nagana gore ke phošo gore ba re botše ka bona. Eupša re tlo holega kudu ge e ba re ipha nako ya gore re ba botšiše dipotšišo le go ba theetša ge ba dutše ba re botša kamoo ba ipshinnego ka gona ka mokgatlong wa Jehofa.

12. Re ka hwetša bana babo rena le dikgaetšedi ba mohuta mang ka diphuthegong tša gabo rena?

¹² Re ka makatšwa ke go hwetša gore ka diphuthegong tša gabo rena go na le mehlala e mebotse kudu ya batšofadi bao ba botegago. Kgaetšedi Harriette o ile a hlankela Jehofa ka go botega ka mengwaga e mentši phuthegong ya gabo kua New Jersey, U.S.A. Ka morago ga moo o ile a tloga a yo dula le morwedi wa gagwe. Bana babo rena le dikgaetšedi ba phuthegong yeo a bego a hudugetše go yona ba ile ba ipha nako ya go mo tseba gakaone gomme ba bona gore o bohlokwa kudu. O ile a ba kgothatša ka go ba botša dilo tšeo di bego di direga tšhemong ge a be a sa thoma go ithuta Beibele ka bo-1920. Ka nako yeo o be a dula a sepela le poratšhe ya go hlapa meno ge a eya tšhemong gore a tle a kgone go e diriša ge a ka golegwa. Ge e le gabotse, ka 1933 o ile a golegwa gabedi gomme nako e nngwe le e nngwe ge a be a golegwa o be a fetša beke a le kgolegong. Nakong yeo, monna wa gagwe yo a bego a mo thekga eupša e se Hlatse ya Jehofa o ile a hlokomela bana ba bona ba bararo ba banyenyane. Ruri re swanetše go hlompha batšofadi bao ba botegago bao ba swanago le Harriette!

13. Ke karolo efe e bohlokwa yeo batšofadi ba bilego le yona ka mokgatlong wa Jehofa?

¹³ Batšofadi ba na le karolo e bohlokwa ka mokgatlong wa Jehofa. Ba bone kamoo Jehofa a šegofaditšego mokgatlo wa gagwe ka ditsela tše dintši le go ba šegofatša. Ba ithutile dilo tše dintši diphošong tšeo ba di dirilego. Ba lebeleleng e le “sediba sa bohlale,” gomme le ithuteng go bona. (Die. 18:4) Ge o ka ipha nako ya go ba tseba, tumelo ya gago e tlo tia gomme wa ithuta dilo tše dintši go bona!

14. Doiteronomio 32:7 e kgothaletša bafsa gore ba dire’ng?

¹⁴ Dira maiteko a gore o boledišane le batšofadi. (Bala Doiteronomio 32:7.) Ke nnete gore ba ka ba ba se sa kgona go bona gabotse, ba se sa sepela ka mafolofolo e bile ba bolelela  fase, eupša dipelo tša bona di duma go dira dilo go swana le mathomong. E bile ba itiretše “leina le lebotse” go Jehofa. (Mmo. 7:1) O se ke wa lebala gore ke ka baka la eng Jehofa a ba lebelela e le ba bohlokwa. Tšwela pele o ba hlompha. Swana le Elisha yoo a ilego a gana go arogana le Eliya ge a be a le kgauswi le go mo tlogela. Elisha o ile a botša Eliya ka makga a mararo gore: “Nka se go tlogele.”—2 Dikg. 2:2, 4, 6.

15. Ke dipotšišo dife tšeo re ka di botšišago batšofadi ba ka phuthegong?

¹⁵ Bontšha batšofadi ka phuthegong gore o na le taba le bona le go ba botšiša dipotšišo ka botho. (Die. 1:5; 20:5; 1 Tim. 5:1, 2) O ka ba botšiša dipotšišo tša go swana le tše di rego: “Ge o be o sa le mofsa, ke’ng seo se ilego sa go kgodiša gore o hweditše therešo?” “Dilo tšeo di ilego tša go diragalela di go thušitše bjang gore o be le segwera se sebotse le Jehofa?” “Ke eng seo se go thušitšego gore o dule o thabile ge o hlankela Jehofa?” (1 Tim. 6:6-8) Theetša gabotse ge ba go araba.

16. Ge batšofadi le bafsa ba boledišana ba ka holega bjang?

¹⁶ Ge batšofadi le bafsa ba boledišana, ka moka ga bona ba tlo holega. (Baroma 1:12) Bafsa ba tlo kgodišega gore Jehofa o hlokomela bahlanka ba gagwe bao ba mmotegelago, mola motšofadi yena a tla ikwa a le bohlokwa e bile o tlo thabela go bolela kamoo Jehofa a ilego a mo šegofatša ka gona.

17. Ke ka baka la’ng re ka re batšofadi bao ba botegago ba botsefala le go feta ge ba dutše ba tšofala?

¹⁷ Gantši ge batho ba tšofala bobotse bja bona bo a hwelela, eupša bao ba hlankelago Jehofa ka go botega, ba botsefala le go feta ge ba dutše ba tšofala. (1 Bathes. 1:2, 3) Ke ka baka la’ng se e le nnete? Ka gobane ba na le mengwaga e mentši ba dumelela Jehofa gore a ba tlwaetše le go ba thuša gore ba be le dika tše dibotse. Ge e ba re lebelela batšofadi ba ka phuthegong ba le bohlokwa, re ba hlompha e bile re ithuta go bona, seo se tla re thuša go bona gore ba na le mohola kudu!

18. Re tlo ithuta’ng sehlogong se se latelago?

¹⁸ Phuthego e a matlafala ge bafsa ba hlompha batšofadi e bile e a matlafala ge batšofadi le bona ba hlompha bafsa. Sehlogong se se latelago re tlo kwa gore batšofadi ba ka dira eng go bontšha gore ba lebelela bafsa ba le bohlokwa ka phuthegong.