1-2. (a) Mwakubverana na Mimwani 16:31, kodi tin’funika kumbawawona tani abale wacikulire? (b) Kodi tin’tawira mibvunzo iponi mu nkhani ino?

KU ESTADOS UNIDOS kuna mbuto inango yomwe ina diamante izinji, yomwe ni minyala yakuumira kwene-kwene. Tsono pakuti minyalayo iri pantsi ndipo idasanganikana na mataka, wanthu azinji omwe ambaiwona ambacita lini nayo kaso ndipo ambadziwa lini kuti minyalayo njakufunika kwene-kwene.

² Mwakundendemerana na bzimwebzi, abale wathu wacikulire ali ninga minyala yakuumira ire; iwo mbakufunika kwene-kwene. Fala la Mulungu limbandendemezera invi zawo na korowa. (Werengani Mimwani 16:31; 20:29) Tsono, tingasiye kuwawona kuti mbakufunika mwakusaya kunesa. Maswaka yomwe yambazindikira kufunika kwa acikulire, yangagumane phindu likulu kuposa cuma. Mu nkhani ino, tin’tawira mibvunzo mitatu: Thangwe ranyi Yahova ambawona acikulire wakukhulupirika kuti mbakufunika kwene-kwene? Thangwe ranyi acikulire mbakufunika mu gulu la Yahova? Kodi n’ciyani comwe tingacite kuti tigumane phindu na ciratizo cawo?

3. Mwakubverana na Masalimo 92:12-15, thangwe ranyi acikulire omwe mbakukhulupirika mbakufunika kwa Yahova?

³ Acikulire omwe mbakukhulupirika mbakufunika kwa Yahova Mulungu. Iye ambadziwa kuti iwo adakhala tani, ndipo ambakomedwa na makhalidwe yawo yabwino. Iye ambakomedwambo kuwona acikulire akupasa maswaka cidziwiso comwe acigumana pomwe akhala akucita utumiki bwawo mwakukhulupirika magole mazinji. (Djobi 12:12; Mimwani 1:1-4) Yahova ambakomedwambo na kupirira kwawo. (Malakiya 3:16) Napo kuti iwo adagumana mabvuto pa moyo wawo, cikhulupiro  cawo kwa Yahova ciribe kutekenyeka ndipo cidikhiro cawo pakulewa bza kutsogolo n‘cakulimba kwene-kwene kuposa pomwe adapfunza cadidi. Ndipo Yahova ambawafuna thangwe rakuti akupitiriza kudziwisa dzina lace napo kuti iwo akalamba.—Werengani Masalimo 92:12-15.

4. Kodi ni makumbukidwe yaponi yomwe yangatsangalaze abale na mpfumakazi zathu zacikulire?

⁴ Penu imwepo mwafika pa ucikulire, tsimikizani kuti Yahova ambakumbukira basa lomwe mudalicita kale-kale. (Ahebereu 6:10) Imwepo mudapalizira na nyongo, ndipo bzimwebzi bzimbakondwesa Baba wathu wakudzulu. Imwepo mudapirira mazunzo napo kuti yakhali yakuwawa kwene-kwene, mudakhala na moyo mwakubverana na mitemo yakulungama ya m’Bibliya, mudakhala na maudindo makulu ndipo mudapfunzisambo winango bzinthu bzizinji. Mudacita ciri-centse pa moyo wanu kuti mucite bzinthu mwakubverana na kucinja kwa bzinthu mu gulu la Yahova ndipo mudathandiza na kulimbikisa abale winango omwe akucita utumiki bwa nthawe zentse. Dziwani kuti Yahova Mulungu ambakufunani kwene-kwene thangwe rakuti ndimwe wakukhulupirika. Iye adalewa kuti ‘an’dzalekerera lini wanthu wace wakukhulupirika’! (Masalimo 37:28) Iye akukutsimikizirani kuti: ‘Nin’dzakusamalirani mpaka tsisi lanu litacoka invi.’ (Zaiya 46:4) Tenepo lekani kukumbuka kuti thangwe rakuti mwakalamba, imwepo ndimwe lini wakufunika pomwe mu gulu la Yahova. Imwepo ndimwe wakufunika kwene-kwene!

5. Kodi n’ciyani comwe abale wacikulire an’funikira kumbakumbukira?

⁵ Pana bzinthu bzizinji bzomwe acikulire angacite mu gulu la Yahova. Napo kuti iwo angakhale alibe mphanvu ninga zomwe akhanazo kale-kale, iwo ambadziwa bzinthu bzizinji thangwe rakuti adabadwa kale-kale. Yahova angapitirize kuwaphatisa basa ninga momwe bzikulatizira bziratizo bzakale-kale na bza tsapano, bzomwe titi tiwone.

6-7. Fotokozani bziratizo bza atumiki wakukhulupirika wa m’Bibliya, omwe adasimbidwa thangwe ra kukhulupirika kwawo.

⁶ M’Bibliya, ifepano tingagumane bziratizo bzabwino bza wanthu wakukhulupirika omwe adapitiriza kutumikira Yahova napo pomwe  akhadakalamba. Mwa ciratizo, pomwe Mozeji adayamba kutumikira Yahova ninga mpolofeta na muimikiri kuna mtundu wa Jirayeri, iye akhana magole 80. Pomwe Daniyeri akhana magole yakupitirira 90, Yahova akhapitiriza kumuphatisa basa ninga mpolofeta. Ndipo mpostolo Juwau pinango-pentse akhana magole yakupitirira 90 pomwe iye adafuliziridwa kuti anembe bukhu la Apokalipse.

⁷ Acikulire winango wakukhulupirika akhabvekera lini, ndipo bzimwebzi bzikhacitisa kuti iwo aleke kuwonedwa kuti mbakufunika na wanthu azinji. Tsono napo bzikhali tenepo, Yahova akhawawona, ndipo adawasimba thangwe ra kukhulupirika kwawo. Mwa ciratizo, munthu “wakulungama na wakubzipereka” wakucemeredwa Simiyoni ambandogumidwa pang’ono basi m’Bibliya. Tsono Yahova akhadziwa kuti iye akhali yani, ndipo adamupasa mwayi wakuwona Jezu pomwe akhali tcece na kulewa polofesiya yakulewa bza mwanayo pabodzi na mai wace. (Luka 2:22, 25-35) Kumbukiranimbo bza mpolofeta mkazi, Ana, omwe akhali mamsiwa. Iye akhana magole 84, tsono “nthawe zentse akhagumanika mu templo.” Yahova adamusimba thangwe ra “kumbagumanika kawiri-kawiri mu templo,” ndipo iye adakhala na mwayi wakuwona Jezu pomwe akhali tcece. Wentse awiri, Simiyoni na Ana, akhali wakufunika kwene-kwene kwa Yahova.—Luka 2:36-38.

8-9. Kodi n’ciyani comwe mpfumakazi inango idacita mu gulu la Yahova pomwe iyo ikhali mamsiwa?

⁸ Mu ntsiku zathu zino, acikulire azinji wakukhulupirika ni ciratizo cabwino kuna maswaka. Onani ciratizo ca mpfumakazi Lois Didur. Iye akhana magole 21 pomwe adayamba kutumikira ninga mpainiya wakupambulika ku Canadá. Pambuyo pa bzimwebzi, iye na bayace John, adamala magole mazinji akutumikira ninga anyakunyang’anira dera. Na kupita kwa nthawe iwo adadzakatumikira ku Beteli ya ku Canadá magole yakupitirira 20. Pomwe Lois akhana magole 58, iye na John adakumbiridwa kuti akatumikire ku Ucrânia. Kodi iwo adacita ciyani? Kodi adayamba kukumbuka kuti an’kwanisa lini kukatumikira ku dziko linango thangwe rakuti mbacikulire? Ne! Iwo adabvuma utumikibo ndipo John adakatumikira m’Komiti ya Mthambi kumweko. Pomwe padapita magole manomwe, John adasaika, tsono Lois adawona kuti bzikhali bwino kupitiriza kucita utumikibo. Tsapano Lois ana magole 81 ndipo iye akupitiriza kutumikira pabodzi na abale pa Beteli ya ku Ucrânia, ndipo iwo ambamufuna kwene-kwene.

⁹ Akazi mamsiwa ninga Lois, pinango angawonedwe lini kwene-kwene ninga momwe wanthu akhawawonera pomwe azibayawo akhana moyo. Tsono napo bziri tenepo, iwo mbakufunika kwene-kwene. Yahova ambawona kuti mpfumakazi zomwe zidathandiza azibayawo magole mazinji n’zakufunika kwene-kwene ndipo tsapano zikadapitiriza kumutumikira mwakukhulupirika. (1 Timotio 5:3) Kuthimizira bzimwebzi, mpfumakazizo zimbalimbikisa maswaka kutumikira Yahova.

10. Thangwe ranyi tingalewe kuti Tony ni ciratizo cabwino?

 ¹⁰ Abale wacikulire azinji wakukhulupirika omwe ambakhala okha, mbakufunikambo kwene-kwene. Mwa ciratizo, m’bale wakucemeredwa Tony tsapano ambakhalambo yekha. Iye adabatizidwa mu Agosto, 1942, ku Pennsylvania, Estados Unidos, pomwe akhana magole 20. Pomwe padandopita nthawe pang’ono kucokera pomwe adabatizidwapo, adauzidwa kuti ayende ku nkhondo, tsono iye adalamba. Tenepo, adafungiridwa m’kawoko magole mawiri na meya. Iye na mkazace Hilda adabereka wana awiri pomwe akhali kale Mboni za Yahova. Magole mazinji Tony adatumikira m’magwere matatu ninga woyang’anira wotsogoza (omwe tsapano ni nyakubveranisa bungwe la akulu) na nyakunyang’anira mtsonkhano wadera. Iye akhambatsogolera mitsonkhano na mapfunziro ya Bibliya m’kawoko. Napo tsapano ana magole 98, Tony akadapitiriza basi kutumikira Yahova. Iye akupitiriza kucita bzentse bzomwe angakwanise kuti atumikire Yahova pabodzi na abale na mpfumakazi mu gwere lomwe iye ambatsonkhana.

11. Kodi tingalatize tani kuti timbacita thupo na acikulire omwe ambakhala okha?

¹¹ Kodi ifepano tingalatize tani kuti timbalemekeza acikulire omwe ambakhala okha? Akulu wa m’gwere angawapasembo acikulirewo mabasa yanango m’gwere bzikakhala kuti an’kwanisa. Ifepano tingalatizembo kuti timbawakumbukira mwa kuwazungira ayai mwa kuwauza kuti ticeze nawo mwakucita kumbawonana pa mtedwe. Ifepano tin’funika kumbakumbukira maka-maka acikulire wale omwe pinango ambakhala okha kutali na gwere lawo. Tin’funika kucita bzentse bzomwe tingakwanise kuti tileke kumbawayebwa acikulirewo. Tikambaceza na abale na mpfumakazi wacikulire, winango wa iwo pinango angakhale lini wakutsudzuka kuti afotokoze bza moyo wawo. Tsono tin’dzagumana phindu likulu kwene-kwene tikapambula nthawe yakuceza nawo na kuwatetekera pomwe akufotokoza momwe adakhalira wakukondwa na bzomwe adagumana nabzo m’gulu la Yahova.

12. Kodi n’ciyani comwe ifepano tingagumane m’gwere mwathu?

¹² Ifepano tingadabwe tikagumana bziratizo bzakulimbikisa bza acikulire wakukhulupirika wa m’gwere mwathu. Mpfumakazi yakucemeredwa Harriette, idamala magole mazinji ikutumikira Yahova mwakukhulupirika ku gwere lace ku Nova Jersey, Estados Unidos. Patsogolo pace idafuluka iciyenda kukakhala na mwana wace wacikazi. Abale wa m’gwere lomwe iye adayendalo akhapambula nthawe yakuti amudziwe bwino ndipo iwo adazindikira kuti iye akhali wakufunika kwene-kwene. Iye adalimbikisa abalewo mwa kuwafotokozera bza upalizi pomwe iye adayamba kupfunza cadidi mu gole la 1925. Pa nthawe imweyo, iye nthawe zentse akhambanyamula eskova ya m’mano pakuyenda kukapalizira thangwe rakuti akhadziwa kuti nthawe iri-yentse angamangidwe aciikhidwa m’kawoko. Ndipo mu 1933 iye adamangidwadi kawiri acikhala mu kawoko sumana ibodzi. Pa nthawe imweyo, bayace omwe akhali lini Mboni ya Yahova adamuthandiza kufuwa wana wawo atatu. Kulewa cadidi, mpsakufunika kuti timbawalemekeze abale wacikulire wakukhulupirika ninga Harriette.

13. Kodi tin’funika kumbawawona tani abale na mpfumakazi zathu zacikulire mu gulu la Yahova?

¹³ Abale na mpfumakazi zathu zacikulire mbakufunika kwene-kwene kwa Yahova na kwa gulu lace. Iwo adawona momwe Yahova adawasimbira mu njira zakusiyana-siyana na momwe adasimbirambo gulu lace. Iwo adapfunza bzinthu bzizinji kwene-kwene kucokera pa bzinthu bzomwe adaphonya. Tenepo, mbawawonani ninga ntsantsa ya nzeru ndipo pfunzani nawo. (Mimwani 18:4) Imwepo mukapambula nthawe yakuti muwadziwe, cikhulupiro  canu cin’dzalimba ndipo mun’dzapfunza nawo bzinthu bzizinji.

14. Kodi Bzakutonga 32:7 ambalimbikisa maswaka kucita ciyani?

¹⁴ Mbapambulani nthawe yakuti mumbaceze na abale wacikulire. (Werengani Bzakutonga 32:7.) Bzingakhale bzakunesa kwa iwo kuwona, kufamba na kulewalewa bwino-bwino, tsono adabzikonzera ‘dzina labwino’ kuna Yahova. (Mpalizi 7:1) Kumbukirani thangwe race Yahova ambawawona kuti iwo mbakufunika ndipo pitirizani kulatiza kuti mumbawalemekeza. Khalani ninga Elizeu. Iye adangingimira kuti akhale pabodzi na Eliya pa ntsiku yawo yakumalizira kukhala pabodzi. Katatu kentse Elizeu adalewa kuti: ‘Cipo ndicidzakusiyani.’—2 Wamambo 2:2, 4, 6.

15. Kodi ni mibvunzo iponi yomwe tingabvunze acikulire?

¹⁵ Latizani kuti mumbawakumbukira acikulire mwa kuwabvunza mibvunzo mwa kudeka mtima. (Mimwani 1:5; 20:5; 1 Timotio 5:1, 2) Abvunzeni mibvunzo ninga iyi: “Pomwe imwepo mukhali tswaka, kodi n’ciyani comwe cidakutsimikizirani kuti mwagumana cadidi?” “Kodi bzomwe bzidacitika pa moyo wanu bzidakuthandizani tani kukhala pa uxamwali na Yahova?” “Kodi n’ciyani comwe cidakuthandizani kupitiriza kukhala wakukondwa pa kutumikira Yahova?” (1 Timotio 6:6-8) Mukamala atetekereni pomwe iwo akukufotokozerani bza moyo wawo.

16. Kodi ni phindu liponi lomwe m’bale wacikulire na tswaka ambakhala nalo akambaceza pabodzi?

¹⁶ M’bale wacikulire na tswaka akambaceza pabodzi, wentse ambagumana phindu. (Aroma 1:12) Imwepo maswakamwe mun’dzakulisa mtima wanu wakutenda momwe Yahova ambathandizira atumiki wace wakukhulupirika, ndipo m’bale wacikulireyo an’dzabzibva kuti ambafunidwa. Ndipo m’baleyo an’dzakufotokozerani momwe Yahova adamusimbira.

17. Thangwe ranyi tingalewe kuti acikulire wakukhulupirika na kupita kwa nthawe iwo ambayenda acideka?

¹⁷ Kudeka kwa mawonekedwe ya munthu na kupita kwa nthawe kumbamala, tsono kwa omwe akutumikira Yahova mwakukhulupirika, kudeka kwawo kumbayenda kucithumizirika na kupita kwa magole. (1 Atesalonika 1:2, 3) Thangwe ranyi tikulewa tenepo? Thangwe ndakuti na kupita kwa nthawe, iwo ambabvuma kuti mzimu wa Mulungu uwapfunzise na kuwathandiza kukulisa makhalidwe yabwino. Tikawadziwa bwino-bwino abale na mpfumakazi zathu zacikulire ndipo tikambawalemekeza na kupfunza na bzomwe bzidacitika pa moyo wawo, tin’dzawawona kuti mbakufunika kwene-kwene.

18. Kodi mu nkhani yakutewera tin’dzacezerana ciyani?

¹⁸ Gwere limbakhala lakulimba sikuti kokha maswaka yakambawona acikulire kuti mbakulimba, koma acikulirewo akambawonambo kuti maswakayo njakufunika. Mu nkhani yakutewera tin’dzacezerana momwe acikulire angalatizire kuti ambalemekeza maswaka m’gwere.