1-2. (a) Base ed Proverbio 16:31, anto dapat so pakanengneng tayo ed saray maedad lan agagi? (b) Anto ran tepet so ebatan tayo ed sayan artikulo?

WALAY park ed Arkansas, U.S.A ya ditan et nayarin makanengneng ka na saray diamond diad dalin. Pero, agni mankirlap irayan diamond lapud agni apino, aliwan singa saramay nanenengneng tayo ya iiyan da ed alahas. Kanian saramay ompapasyar ditan et ompan labas-labasan da labat irayan mabmablin bato ta agda amta ya diamond manaya iratan.

² Saray maedad lan agagi tayo et singa saratan ya diamond, mabmabli ira ed si Jehova. Ibabaga na Biblia ya say uban odino amputin buek da et singa korona. (Basaen so Proverbio 16:31; 20:29) Pero, ompan agtayo naiimano irayan kayamanan tan singa tayo labat ira labas-labasan. Maabig sirin no lanang tayon panonotan so sarili tayo ya mabmabli ira. Diad tua, saray naaralan tayod sikara et mas mabli ni nen say literal ya kayamanan. Kanian diad sayan artikulo, ebatan tayo so taloran tepet: Akin et mabmabli ed si Jehova iray maedad lan lingkor to? Akin et importante ira ed organisasyon to? Antoy gawaen tayo pian makaaral tayod alimbawa ra?

3. Base ed Salmo 92:12-15, akin et mabmabli ed si Jehova iray maedad lan lingkor to?

³ Diad pakanengneng nen Jehova, mabmabli iray maedad lan lingkor to. Amta to no antoy walad puso da, tan nanenengneng to iray balibalin ugali ra. Sikatoy naliliketan no ibabangat dad saray mas ugaw nin agagi so karunongan ya naaralan da diad abayag ya impanlingkor da. (Job 12:12; Pro. 1:1-4) Say labalabay met nen Jehova ed sikara et say inkaanos  da. (Mal. 3:16) Dakel lay subok tan problema ya dinalan da, pero ag-iran balot inmikban ed sikato. Diad itatatken da, mas lalon ombibiskeg so tiwala da ed saray sipan to. Mas lalo iran naaaro nen Jehova ta ag-ira ontutunda ya mangipapakabat ed ngaran to “anggano matatken la ra.”—Basaen so Salmo 92:12-15.

4. Anto ray nepeg ya nonoten na saray maedad lan agagi ya mamabiskeg ed liknaan da?

⁴ No sakey kayo ed saray ontatatken la ya lingkor nen Jehova, tandaan yo ya agton balot lingwanan so amin ya ginawa yo parad sikato nensaman. (Heb. 6:10) Naliliketan si Jehova ed sikayo ta makulikuli kayon nampulong tan agkayo tinmundan nanlingkor anggano amayamay so problema tan ansakisakit ya subok ya dinadalan yo. Ginawa yoy anggaay nayarian yon unoren so estandarte na Biblia. Mabulos yon ginawa iray responsabilidad yod kongregasyon tan impasal yoy arum. Nansagpot kayo met pian makapibansag kayo ed saray pananguman ed organisasyon nen Jehova. Pinaseseg tan sinuportaan yo ray agagi ya nandesisyon ya onloob ed full-time. On, inar-aro kayo nen Aman Jehova ta matoor kayo. Insipan to ya “agto paulyanan iray matoor ed sikato”! (Sal. 37:28) Oniay ipapaseguro tod sikayo: “Anggad magmaliw lan ubanan so ulo yo et [itultuloy] ta kayon tulongan.” (Isa. 46:4) Kanian anggano maedad kayo la, agyo komon iisipen ya agkayo la importante ed organisasyon nen Jehova. Dakel ni so nagawaan yo!

5. Antoy nepeg a tandaan na saray maedad la?

⁵ Dakel ni so nitulong na saray maedad lan agagi ed organisasyon nen Jehova. On tua ya aliwa lan singa dati so biskeg da, pero dakdakel lay eksperiensya ra diad kabayag da lan manlilingkor. Usaren ni ran siansia nen Jehova diad nanduruman paraan, ya singa sarayay pantongtongan tayon alimbawa na saray lingkor to nensaman tan natan.

6-7. Mangiter na saray alimbawa ed Biblia ya benendisyonan nen Jehova lapud nansiansia ran matoor anggano maedad la ra.

⁶ Wala ray nabasad Biblia ya anggano maedad la ra et aktibo ni ran siansia ya manlilingkor ed si Jehova. Singa bilang, manga 80 lay  taon nen Moises nen ginmapon nanlingkor ya propeta nen Jehova tan pinili Ton mangidaulo ed bansan Israel. Si Daniel et tuloytuloy ya inusar nen Jehova bilang propeta anggano masulok lan 90 so taon to. Tan si apostol Juan et posiblin masulok met lan 90 so taon to nen impaisulat ed sikato nen Jehova so libron Apocalipsis.

⁷ Wala met iray lingkor na Dios nensaman ya agmasyadon kabkabat tan ompan ag-ira naiimano na arum. Pero kabkabat ira nen Jehova tan benendisyonan toy katooran da. Singa bilang, daiset labat so nabasa ed Biblia tungkol ed si Simeon, sakey a lakin “matunong tan matakot ed Dios.” Pero naimano nen Jehova so katooran to, tan inikdan To na pribilehyo ya nanengneng so ugaw nin Jesus tan manpropesiya tungkol ed sayan ugaw tan ed ina to. (Luc. 2:22, 25-35) Say sakey nin alimbawa et say abalo lan propetesa ya si Ana. Anggano 84 lay edad to, “naynay ya oonlad templo.” Lapud “ag-onaabsent” ed saray pantitipon, anengneng to met so ugaw nin Jesus. Inter nen Jehova iyan pribilehyo ed si Simeon tan si Ana ta inar-aro to ra.—Luc. 2:36-38.

8-9. Antoy nitutulong na saray abalo lan sister ed organisasyon nen Jehova? Mangiter na alimbawa.

⁸ Dakel met iray maedad lan agagi tayo natan ya maabig so alimbawa ra ed saray mas ugaw ni. Say sakey et si Sister Lois Didur. Nen 21 so taon to, sikato tan say asawa ton si John et nanlingkor bilang espisyal payunir diad Canada. Ag-abayag, inyasain ira ed kimey ed sirkito. Insan ira atawag ed Bethel diad Canada, tan masulok ya 20 taon iran nanlingkor diman. Nen 58 lay taon nen Lois, naimbitaan ira nen John ya manlingkor ed Ukraine. Sarag da komon ya irason ya agda la nayarian so manlingkor ed arum ya bansa ta matatken la ra. Pero inawat da itan ya asainmin, tan nanlingkor si John bilang membro na Branch Committee diman. Pero kayari labat na pitoy taon, inatey si John. Nandesisyon balet si Lois ya mansiansia ed asainmin to. Natan et 81 to la, pero makulikuli nin siansia ya manlilingkor ed Ukraine Branch tan sikatoy inar-aro na pamilyan Bethel.

⁹ Ompan agla masyadon naiimano na agagi iray abalon sister ya singa si Lois kompara nen mabilay ni asawa ra. Pero tandaan tayo ya sarayan sister et mabmabli ed si Jehova, ta abaybayag dan sinuportaan so asawa da tan matoor iran manlilingkor anggad natan. (1 Tim. 5:3) Baleg met so nagagawaan da pian napaseseg iray kabataan.

10. Akin et maabig ya alimbawa si Brother Tony?

¹⁰ Diad pakanengneng nen Jehova, anggan saramay maedad lan agagi tayo ya agla makaalis ed panaayaman da et singa ra mabmablin kayamanan. Say sakey ed sikara et si Brother Tony ya aasikasoen la natan ed home for the aged. Sikatoy abautismoan nen Agosto 1942 diad Pennsylvania, U.S.A nen 20 so edad to.  Ag-abayag, sikatoy apriso na duara tan kapalduan taon ta agto labay so mansundalo. Sikato tan say asawa ton si Sister Hilda et awalaan na duaran anak ya pinabaleg da ed katuaan. Diad inlabas na saray taon, aka-taloran kongregasyon si Brother Tony tan sikato so presiding overseer (say tawag la natan et coordinator na saray ulop na mamatatken) tan nanlingkor met bilang circuit assembly overseer. Asali toy angikondukta na saray aral ed prisoan tan wala ray inyaralan ton priso. Natan et 98 la nen Brother Tony pero gagawaen to nin siansia so anggaay nayarian to parad si Jehova. Tan aktibo ni ed kongregasyon to.

11. Panon tayon nipanengneng ya papablien tayo iray maedad lan agagi tayo ya agla makaalis ed abung?

¹¹ Panon tayon nipanengneng ya papablien tayo iray maedad lan agagi tayo ya agla makaalis ed abung? Manggawa na uksoyan iray elder pian makapiaral ni ran siansia tan makapibiang ni rad panagpulong anggad posible. Ontan met, nipalikna tayon inar-aro tayo ra no pasyaren tayo rad abung da odino i-video call tayo ra. Agtayo met lilingwanan iray maedad lan agagi tayo ya anggapoy kaiba rad abung odino bukbukor day Tasi ed pamilya da. Kaukolan day atension pian agda nalikna ya anggapoy mangaaro ed sikara. Wala ray agagi tayon maedad la ya mabaing tan ag-ira maistorya. Pero no tepetan tayo ra, ompan dakel manayay makapaseseg ya naistorya ra.

12. Antoy nadiskobre tayo no kabaten tayon maong iray maedad lan kakongregasyon tayo?

¹² No kabaten tayon maong iray maedad lan kakongregasyon tayo, ompan nadiskobre tayo ya talagan makapaseseg so katooran da. Singa bilang, si Sister Harriette et abayag ya nanlingkor ed si Jehova diad New Jersey, U.S.A. Asabi panaon et akiayam la ed anak ton bii ya say abung to et arawi ed datin kongregasyon to. Pero sikatoy kinabat na agagi ed balon kongregasyon to tan apaseseg iran maong ed katooran to. Inistorya tod sikara no panon ton naamtaan so katuaan nen 1920’s, tan no panon so panagpulong nensaman. Lanang kuno ya walay awi-awit ton toothbrush kada no manpulong ta amta to ya posiblin arestoen tan ipriso da. Diad tua nen 1933, sikatoy amiduan apriso ya tig-sakey simba. Aliwan Tasi so asawa to pero maong labat ta agton balot sinebelan. Sikato ni ingen so angasikaso ed taloran ananak da nen apriso si Sister Harriette. Talagan inar-aro tayon maong iray matoor ya maedad lan agagi tayo, ya singa si Sister Harriette.

13. Akin et importante ed organisasyon nen Jehova iray maedad la?

¹³ On, importantin maong iray maedad lan agagi tayo ed organisasyon nen Jehova. Diad inlabas na dakel ya taon, anengneng da no panon ya benendisyonan nen Jehova so organisasyon to tan apaneknekan da la ya sikatoy maasikaso tan maar-aron Dios. Anggano akagawa met iray lingo, akaaral irad saratan. Singa ra “subol na karunongan”—dakel so naasol tan naaralan mod eksperiensya ra. (Pro. 18:4) Kanian no kabaten mo ran maong, seguradon ombiskeg so pananisiam tan makaaral kad sikara.

14. Antoy ipapaseseg na Deuteronomio 32:7 ya gawaen na saray kabataan?

¹⁴ Manggawa tayoy paraan pian nakaistoryaan tayo iray maedad la. (Basaen so Deuteronomio 32:7.) Tua, makapuy lay mata da, matantan la ran onakar, tan makalna lay panagsalita ra, pero agkinmapuy so panangaro dad si Jehova. Tan diad tua, akagawa la ray “maabig a ngaran” ed arapan to. (Ecl.  7:1) Atan so rason no akin ya pabpablien ira nen Jehova. Agtayo komon itan lilingwanan. Itultuloy tayon pagalangan iray maedad la. Aligen tayoy Eliseo, agton balot tinaynanan si Elias diad samay sampot ya agew ya sankaiba ira. Amitlon imbaga nen Eliseo ed sikato: “Agak onsian ed sika.”—2 Ara. 2:2, 4, 6.

15. Anto ray balibalin itepet tayo ed saray maedad la?

¹⁵ Nipanengneng mon labalabay mon nakabat iray maedad la no tepetan mo ra pian mangistorya ra. (Pro. 1:5; 20:5; 1 Tim. 5:1, 2) Singa bilang, tepetan mo ra: “Nen ugaw kayo ni, antoy akakombinse ed sikayo ya saya so katuaan?” “Anto ray agawad bilay yo ya akatulong pian lalo kayon onapit ed si Jehova?” “Antoy sekreto yo akin et malikeliket kayo nin siansia ed panlilingkor yod si Jehova?” (1 Tim. 6:6-8) Insan dengel kan maong no mangistorya la ra.

16. No pangistoryaen tayo iray maedad la, antoy maabig ya epekto ed sikatayo tan ed sikara?

¹⁶ No pangistoryaen tayo iray maedad la, napaseseg tayo tan pati sikara. (Roma 1:12) Legan mon dedengelen so istorya da, mas nakombinse ka ya agpapaulyanan nen Jehova iray matoor ed sikato. Diad biang met na saray maedad la, nalikna dan importante irad sikatayo. Tan seguradon naligliwa ra legan dan sasansakeyen iray bendisyon nen Jehova ed sikara.

17. Akin ya saray maedad lan agagi tayo ya matoor ed si Jehova et lalon onggagana tan ongguaguapo diad pakanengneng to?

¹⁷ No say sakey et ontatken la, maslak et onkupas so inkagana tan inkaguapo to. Pero diad pakanengneng nen Jehova, saramay matoor ed sikato et lalon onggagana tan ongguaguapo diad ilalabas na panaon. (1 Tes. 1:2, 3) Akin ey? On ta legan iran ombabayag ed panaglingkor tan diad tulong na espiritu nen Jehova, mas lalo dan nipapanengneng iray ugali tan kualidad ya labalabay to. Kanian no kabaten tan pagalangan tayo iray maedad lan agagi, tan aligen tayoy alimbawa ra, lalo tayo ran napabli ya singa mabmablin diamond!

18. Antoy aralen tayo ed ontumbok ya artikulo?

¹⁸ Naaralan tayod sayan artikulo ya saray mas ugaw et kaukolan dan pablien iray maedad la. Pero kaukolan met ya pablien na saray maedad la iray mas ugaw nin agagi pian ombiskeg so interon kongregasyon. Panon ya nipanengneng na saray maedad la ya papablien da iray mas ugaw ni? Atan so aralen tayo ed ontumbok ya artikulo.