1-2. (a) Kon Proverbionan 16:31 ta yuda nos mira ku nos rumannan di edat ta presioso? (b) Ki pregunta nos lo analisá den e artíkulo akí?

NA ARKANSAS, Merka, tin un parke kaminda bo por haña djamanta gewon abou na pleno bista. Pero, mayoria di e djamantanan akí no ta kòrtá ni ta di pòlish. Ta p’esei hopi hende ta kana pasa nan forbei sin realisá ku ta djamanta.

² Nos fiel rumannan di edat ta masha presioso. Den un sentido, nan ta manera e djamantanan ei. Beibel ta kompará nan kabei blanku ku korona. (Lesa Proverbionan 16:31; 20:29) Pero, masha fásil nos por keda sin ripará kon presioso e rumannan ei ta. Ora esnan mas yòn tuma tempu pa realisá ku e rumannan di edat ei ta presioso, nan lo haña algu ku ta mas balioso ku kualke rikesa. Den e artíkulo akí nos lo analisá tres pregunta: Dikon nos rumannan di edat ta presioso pa Yehova? Dikon nan ta asina importante den su organisashon? Kiko nos por hasi pa nos siña for di nan ehèmpel?

3. Segun Salmo 92:12-15, dikon nos rumannan di edat ta presioso pa Yehova?

³ Nos rumannan di edat ta presioso pa Yehova. E konosé nan karakter i ta balorá nan bunita kualidatnan. I algu ku e ta apresiá masha tantu ta ora nan ta pasa e sabiduria ku nan a haña durante añanan di sirbishi fiel pa esnan ku ta mas yòn. (Yòb 12:12; Pro. 1:1-4) Algu tambe ku Yehova ta balorá ta nan perseveransia. (Mal. 3:16) Nan no tabatin un bida sin problema, pero nan fe den Yehova  nunka a tambaliá. Nan speransa pa futuro ta mas fuerte ku tempu nan a drenta den e bèrdat. I Yehova ta stima nan tambe pasobra nan ta sigui deklará su nòmber “asta den nan behes.”—Lesa Salmo 92:12-15.

4. Kiko por animá nos rumannan di edat?

⁴ Segun boso edat ta subiendo, sea sigur ku Yehova ta kòrda tur e trabounan ku boso a hasi den pasado. (Heb. 6:10) Semper boso tabata kla pa sali den sirbishi i kla pa duna tur di boso; esei ta hasi Yehova masha kontentu. Boso a pasa den hopi prueba, asta esnan hopi difísil. Boso a para pa prinsipionan di Beibel. Boso a karga responsabilidatnan pisá den e kongregashon i tambe a entrená otronan. Boso a hasi boso esfuerso pa keda pareu ku Yehova su organisashon segun ku e ta kore riba un spit hopi haltu. Boso a yuda i animá otronan pa nan kuminsá ku e trabou di tempu kompleto. E lealtat ku boso a demostrá ei ta pone ku Yehova Dios ta stima boso mas i mas. El a bisa ku lo e no bandoná esnan ku ta leal na dje. (Sal. 37:28) Anto e ta primintí boso, nos rumannan di edat: “Te na boso añanan di kabei blanku lo mi karga boso!” (Isa. 46:4) P’esei, no pensa mes ku debí ku boso edat ta subiendo boso no ta importante mas den Yehova su organisashon. E bèrdat ta ku boso ta masha balioso mes!

5. Kiko nos rumannan di edat mester keda kòrda?

⁵ Nos rumannan di edat tin hopi di ofresé. Aunke ku kisas nan no tin e forsa ku un tempu nan tabatin, loke sí nan tin ta un sin fin di eksperensia ku nan a haña durante añanan. Anto debí na esei, Yehova por sigui usa nan na diferente manera. Nos lo wak esei for di ehèmpelnan di pasado i tambe for di esnan di awendia.

6-7. Usa Beibel pa mustra kon Yehova a rekompensá su fiel sirbidónan di edat.

⁶ Den Beibel nos por lesa di hopi sirbidónan fiel di Yehova, ku a sirbié aunke  ku nan tabata di edat. Por ehèmpel, Moises tabatin 80 aña ora el a kuminsá sirbi komo profeta di Yehova i komo Su representante pa e nashon di Israel. Anto aunke Daniel tabatin 90 i piku aña, te ainda Yehova Dios tabata us’é komo su profeta. Apòstel Huan tambe tabatin 90 i piku aña ora ku Yehova a inspir’é pa skirbi e buki di Revelashon.

⁷ Pero, tabatin otro sirbidónan fiel di edat ku no tabata asina bon konosí, i ta fásil pa lubidá riba nan. Ma, Yehova sí no a lubidá nan; el a rekompensá nan pa nan lealtat. Por ehèmpel, aunke Beibel no a papia masha hopi di Simeon, “un hòmber hustu i temeroso di Dios,” Yehova sí tabata konos’é. Anto el a dun’é un privilegio masha spesial: mira e bebi Hesus i profetisá tokante e yu ei i su mama. (Luk. 2:22, 25-35) Pensa tambe riba Profeta Ana, kende tabata biuda. Aunke e tabatin 84 aña, “nunka e no tabata falta tèmpel.” Yehova Dios a bendishon’é pasobra fielmente e tabata “bai reunion,” i El a permitié wak e bebi Hesus. Ta bisto ku tantu Simeon komo Ana tabata presioso pa Yehova.—Luk. 2:36-38.

8-9. Kiko ta hasi nos rumannan biuda presioso?

⁸ Den nos tempu tin hopi ruman di edat ku ta un ekselente ehèmpel pa esnan mas yòn. Wak Ruman Lois Didur. Ku su 21 aña el a kuminsá traha komo pionero spesial na Canada. Despues, e ku su kasá, John, a traha algun aña komo sirkuito. Ora ku e tabatin 58 aña, e ku John a haña invitashon pa bai sirbi na Ukrania. Kiko nan lo a hasi? Nan lo a pensa: ‘aino, nos ta muchu bieu pa bai un otro pais’? Nò! Nan a aseptá e asignashon, anto John a sirbi komo miembro di Komité di Sukursal. John a muri shete aña despues, pero Lois a keda den su asignashon na Ukrania. Awor e tin 81 aña, i ketu bai e ta sirbi Yehova fielmente huntu ku e famia di Bètel na Ukrania. Nan ta stim’é masha hopi mes!

⁹ Rumannan biuda manera Lois, kisas no ta haña e mesun atenshon ku tempu nan kasá tabata na bida. Pero, e echo ku nan ta biuda no ta baha nan balor. Yehova ta stima e ruman muhénan ei, kende a duna sosten na nan esposo pa añanan i ku te ainda ta sigui demostrá nan lealtat na dje. (1 Tim. 5:3) Ademas, nan ta animá esnan mas yòn.

10. Ki bon ehèmpel Tony ta pa nos?

¹⁰ Tur e fiel rumannan di edat ku ta biba den kas di kuido tambe ta masha balioso. Por ehèmpel, un ruman ku yama Tony ta biba den un di e kasnan ei. El a batisá na òktober 1942, na Pennsylvania. E tempu ei, e tabatin 20 aña. No a tarda masha ku el a hañ’é ku e kuestion  di neutralidat, i debí na esei el a hañ’é ta pasa dos aña i mei den prizòn. E huntu ku su kasá Hilda, a lanta dos yu den e bèrdat. Durante e añanan Tony a sirbi na tres kongregashon komo superintendente presidente (konosí awor komo koordinadó di e kuerpo di ansiano) i tambe komo superintendente di asamblea di sirkuito. E tabata dirigí reunion i estudio di Beibel na prizòn. Aunke aworakí Tony tin 98 aña, e no ke baha man. Ketu bai e ta hasi su esfuerso pa sirbi Yehova i pa traha mas serka posibel huntu ku e kongregashon lokal.

11. Kon nos por laga rumannan di edat ku ta biba den kas di kuido sinti ku nan ta presioso pa nos?

¹¹ Kon nos por laga rumannan di edat ku ta biba den kas di kuido sinti ku nan ta presioso pa nos? Ansianonan por inkluí nan den e aktividatnan di e kongregashon te kaminda ku por. Nos kada un por mustra atenshon na nan ora ku nos ta bai bishitá nan òf video call nan. Nos lo ke pone atenshon foral na e rumannan ku ta biba den un kas di kuido ku ta leu for di nan kongregashon. Si nos no paga tinu, sin ripará nos por lubidá riba nan. Algun di nan no ta gusta papia tokante nan mes òf nan no ta haña esei nèchi. Pero, nos lo benefisiá masha tantu mes si nos tuma tempu anto nos keda papia ku nan te ora ku nan mes habri i konta nos e goso ku nan tabatin den e sirbishi di Yehova.

12. Kiko nos por deskubrí den nos kongregashon?

¹² Kisas nos lo keda sorprendí ora nos deskubrí ku den nos kongregashon tin fiel rumannan di edat ku masha bunita eksperensia. Un ruman ku yama Harriette a sirbi Yehova fielmente pa dékadanan den su kongregashon na New Jersey, Merka. Despues el a muda bai biba ku su yu muhé. E rumannan den su kongregashon nobo a tuma tempu pa siña konos’é mihó anto nan a deskubrí kon presioso Harriette tabata. El a konta nan kon e tabata bai sirbishi tempu ku el a haña e bèrdat rònt di 1925. E tempu ei, semper e tabatin su skeiru di djente huntu kuné ora ku e tabata bai prediká, djis por si akaso nan arest’é. Eigenlijk na 1933, dos biaha el a pasa un siman den prizòn. Durante e tempu ku e tabata será, su esposo ku no tabata un Testigu tabata kuida nan tres yunan chikitu. Sin duda, ta bon pa nos balorá rumannan di edat manera Harriette.

13. Dikon nos rumannan di edat ta balioso pa Yehova su organisashon?

¹³ Nos rumannan di edat ta masha balioso pa tantu Yehova komo su organisashon. Nan por a mira ku nan mes wowo kon vários biaha Yehova a bendishoná nan i tambe kon el a bendishoná su organisashon. I nan a siña hopi for di nan fayonan. Nan ta manera un “fuente di sabiduria.” P’esei, siña for di nan. (Pro. 18:4) Si abo tuma tempu pa konosé nan mihó, bo fe lo bira mas fuerte i lo bo siña hopi.

14. Kiko Deuteronomio 32:7 ta animá rumannan mas yòn pa hasi?

¹⁴ Dal e promé paso pa kòmbersá ku rumannan di edat. (Lesa Deuteronomio 32:7.) Ta bèrdat ku kisas nan bista a bai atras, nan ta kana un tiki mas pokopoko i kisas nan stèm no ta mesun fuerte mas. Pero, ketu bai nan ta aktivo i nan a  traha “un bon nòmber” serka Yehova. (Ekl. 7:1) Kòrda dikon nan ta presioso pa Yehova i sigui balorá nan. Hasi manera Eliseo. E último dia ku e ku Elías tabata huntu, e no tabata kier a bandon’é. Tres biaha Eliseo a bisa Elías: “Lo mi no laga bo.”—2 Rei. 2:2, 4, 6.

15. Ki pregunta nos por hasi rumannan di edat?

¹⁵ Ora nos hasi rumannan di edat pregunta, nos ta mustra nan ku di bèrdat nos ta interesá den nan. (Pro. 1:5; 20:5; 1 Tim. 5:1, 2) Kisas nos por puntra: “Ruman, tempu ku bo tabata mas yòn, kiko a konvensé bo ku bo a haña e bèrdat?” “Kon e kosnan ku bo a pasa aden a hala bo mas serka Yehova?” “Kiko a yuda bo sigui sirbi Yehova ku goso?” (1 Tim. 6:6-8) Segun ku nan ta kontestá, skucha nan ku atenshon.

16. Kiko lo ta e resultado ora un ruman di edat i un ruman mas yòn kòmbersá ku otro?

¹⁶ Ora un ruman di edat i un ruman mas yòn ta kòmbersá ku otro, nan tur dos ta animá otro. (Rom. 1:12) Esun di mas yòn lo bira mas konvensí ku Yehova semper ta perkurá pa su fiel sirbidónan. I esun di edat lo sinti su mes stimá i balorá. Lo e gusta un mundu pa konta bo di tur e bendishonnan ku el a haña di Yehova.

17. Dikon nos por bisa ku nos fiel rumannan di edat ta bira mas bunita segun añanan ta pasa?

¹⁷ Segun ku tempu ta pasa, generalmente un hende no ta bira mas bunita. (1 Tes. 1:2, 3) Pero, esnan ku ta leal na Yehova ta bira mas bunita p’e segun ku añanan ta pasa. Dikon nos por bisa esei? Pasobra durante e añanan, nan a permití Dios su spiritu santu moldia nan i yuda nan kultivá kualidatnan bunita. Mas tempu nos tuma pa konosé nos presioso rumannan di edat, balorá nan i siña for di nan, mas nos lo mira ku nan balor ta sin igual.

18. Kiko nos lo trata den e siguiente artíkulo?

¹⁸ E kongregashon ta bira mas fuerte no solamente ora rumannan mas yòn ta balorá esnan di edat, pero tambe ora esnan di edat ta balorá esnan mas yòn. Den e siguiente artíkulo, nos lo mira kon rumannan di edat por laga rumannan mas yòn mira ku nan ta balorá nan.