1-2. (a) A doltirakl er a Osisechakl 16:31, e ngkirel mo uangera osenged er a reblak a rengrir el mechudelang el odam me a odos? (b) Ngera el ker a bo donger er tia el suobel?

A RECHAD el mora klou el park er a Arkansas er a beluu er a Merikel a locha mo mes a diamond er a chutem. Me nguaisei engdi aika el diamond a dirkak le tuk e le btanget el mo besiich. Sei a uchul me a rebetok a locha diak lolechesuar el kmo aika diamond e di merael el engelakl er ngii.

² A remechudelang el odam me a odos a di uaika el diamond. Te kmal mekreos. A Tekingel a Dios a omekesiu a chebellir el mora krone. (Monguiu er a Osisechakl 16:31; 20:29) Me nguaisei te sebechir el di beot el mora kemikr. A remekekerei el mtebengii a kerresir a remechudelang a ngmai a tekoi el lmuut el mekreos er a ilteet. Ngar tia el suobel e kede mo onger aika el edei el ker. Ngera uchul me a Jehovah omes er tirka el blak a rengrir el mechudelang el ua mekreos el klalo? Ngera uchul me te kmal meklou a ultutelir er a cheldebechelel a Jehovah? Ngera sebeched el meruul me dengai a klungioled er a kerebai er tir?

3. A doltirakl er a Psalm 92:12-15, e ngera uchul me a reblak a rengrir el mechudelang a kmal mekreos er osengel a Jehovah?

³ A reblak a rengrir el mechudelang a kmal mekreos er osengel a Jehovah. Ngkmal ungil medengelterir. Ngmes e dirrek el mengreos a ungil blekerdelir. Ngkmal dmeu a rengul lomes er a remechudelang louchais er a remekekerei aike el bla lesuub er a omesiungir el betok el rak. (Job 12:12, 13; Osi. 1:1-4) A Jehovah a dirrek el kmal mengreos er a ducherreng er tir. (Mal. 3:16) Te mlo chobangel a betok el tekoi engdi klaumerang er tir er a Jehovah melemolem el mesisiich. Nglmuut el mesisiich a omeltkir er chelechang er sel taem er a lekot el mo  medengelii a klemerang. A Jehovah a kmal betik a rengul er tir e le te melemolem louchais el kirel a ngklel alta te mla mo “mechuodel.”​—Monguiu er a Psalm 92:12-15.

4. Ngera sebechel mengelaod er a mechudelang lodam me a odos?

⁴ A lsekum e ke chudelang, e bo lulterekokl a rengum el kmo a Jehovah a kmal diak bo lobes a meringel el urerem. (Heb. 6:10) Kau tia er a oblak a rengum el omerk er a klumech, el ngii a kmal lodeuir a rengul a Demad el ngar er a eanged. Ke mla outekangel a ringel el bebil er ngii a kmal mlo uchul a kngtil a rengum. Ke oltirakl e dirrek el mesebechakl er a Biblia, kiltmokl a meklou a ultutelel el ngerachel er a cheldebechel a Jehovah, e train er a rebebil. Ke mlora tkurrebab el sebechem loltirakl a beches el omelodech er a cheldebechel a Jehovah. Ke mla ngosuterir e smisicheterir a rebebil el ngar er a mui el taem el omesiou. A Jehovah kmal betik a rengul er kau er a blakerreng er kau el mo er ngii. Ngdmu el kmo, “ngkmal diak bo lechititerir a reblak a rengrir el chedal.” (Psa. 37:28, NW) Ngtibir el kmo: “Ngak a . . . mo omekerreu er kemiu el dimerkmo cho bo mechuodel el mo cheball a bdelmiu.” (Isa. 46:4) Me nguaisei, engdi lak bo momdasu el kmo, ngmla mo diak a ultuteliu er a cheldebechelel a Jehovah e le kemiu el mechudelang. Kemiu a kmal mekreos!

5. Ngera diak el kirir el obes er ngii a remechudelang?

⁵ A remechudelang a kmal betok a sebechir el meruul el olengeseu er a cheldebechelel a Jehovah. Alta ngdikea lemesisiich a bedengir el ua ngar er a mong, engdi ngkmal betok a bla lesuub er aika el betok el rak. A Jehovah sebechel melemolem lousbech er tir el ngar er a kakerous el rolel el ua bo desa er tirka lungil kerebai er a ngar er a mong me chelecha el taem.

6-7. Mouchais a bebil kerebai er a Biblia er a remechudelang el Jehovah a ulemekngeltengat er tir e le te mle blak a rengrir el mesiou er ngii.

⁶ Ngsebeched el metik a ungil kerebai er a Biblia er a remechudelang el kmal mle blak a rengrir el mesiou er a Jehovah. El ua tiang, a Moses a mle 80 a rekil er a lomuchel el mesiou el profet er a Jehovah e dirrek el lomtechei er ngii er a rechad er a Israel. A Jehovah dirk uluusbech er a profet el Daniel el melekingel  er a loketiu me a derengel a rekil. A apostol Johanes me ngdirrek el mle oketiu me a derengel a rekil er a lemukreng el mo meluches er a babier er a Ocholt.

⁷ A rebetok el blak a rengrir a dimlak a rechad el kmal ungil medengelterir me te mle beot el mora kemikr. Engdi a Jehovah a mle ungil medengelterir e ulemekngeltengat er tir er a blakerreng er tir. El ua tiang, a Simeon el ngii el chad a mle “melemalt e meluu ra Dios,” a diak a kmal omesodel er a Biblia. Me nguaisei, engdi a Jehovah a mle medengelii e ulemekngeltengat er ngii. Ngmla er ngii a ileakl el techellel el mesa Jesus er a letolechoi, ngdirrek el ulemlaoch el kirel ngii el ngalek me a delal. (Lk. 2:22, 25-35, BT) Ka mdirrek el melatk er a melakl el dil el profet el Hana. Ngika mle 84 a rekil “e kmal dimlak bo le cheroid er a Templo.” A blakerreng er ngii el mora templo a uchul me a Jehovah dirrek el ulemekngeltengat er ngii me ngmla er ngii a techellel el mesa Jesus el tolechoi. A Simeon me a Hana a kmal mekreos er osengel a Jehovah.​—Lk. 2:36-38.

8-9. Ngera te meruul a remelakl el dil lolengeseu er a cheldebechelel a Jehovah?

⁸ Chelecha el taem er kid e te kmal betok a reblak a rengrir el mechudelang el kmal ungil kerebai el kirir a remekekerei. Molatk er a kerebil a odos el Lois Didur. Ngika mle 21 a rekil er a lomuchel el mesiou el special pioneer er a Canada. A uriul e ngii me a bechil er a John a milsiou el oldingel a ongdibel el betok el rak. Uriul er isei e te milsiou er a Canada Bethel el betok er a lluich el rak. Sera bo le 58 a rekil a Lois e ngii me a bechil a ngiluu ongit el mo mesiou er a beluu er a Ukraine. Me ngera te mirruul er ngii? Te mlo omdasu el kmo te kmal mechudelang me ngdiak el sebechir el mesiou er a ngodech el beluu? Te kilengei er tia el assignment er tir me a John a miltutk el mo ta er a chedal a Chelechad el Omekerreu a Obis er a Resioning er a Jehovah. Euid el rak er uriul e ngmlo smecher a John, engdi a Lois a di millemolem el ngar tia el assignment er ngii. Chelecha ngmla mo 81 a rekil a Lois e dirk blak a rengul el chedal a telungalek er a Ukraine Bethel. Te rokui el kmal betik a rengrir er ngii.

⁹ Alta ngmla mo diak deseterir a remellakl el dil el ua Lois el uai sel taem er a lechad a becherir, engdi te kmal dirk mekreos. A Jehovah kmal mengreos er a rudos el mle blak a rengrir lolengeseu er a rebecherir el betok el rak e dirk blak a rengrir el mesiou er ngii er chelechang. (1 Ti. 5:3) Te dirrek el kmal uchul a omelisiich el mora remekekerei.

10. Ngera el ungil kerebai a bla leketmeklii a Tony?

¹⁰ A rebetok el blak a rengrir el mechudelang a kiei a nursing home. Tirka me te dirrek el kmal mekreos. El ua tiang a odam el Tony a kiei er a nursing home er chelechang. Ngika miltecholb er a le 20 a rekil er a August 1942 er a Pennsylvania er a beluu er a Merikel. Uriul er a lemetecholb e ngmle kirel el mo teloi  er a klsoldau. Ngmle eru el rak me a tedobech el lekelebus e le ngdimlak el kengei el mo meruul er tiang. Ngii me a bechil er a Hilda a ulemekeroul er a reteru el ngelekir er a klemerang. Chelsel aika el rak el bla losiou er a Jehovah e ngmilsiou el presiding overseer (el chelechang e ngokedongall el tebechelel a chelechad er a remechuodel) er a edei el kakerous el ongdibel e dirrek el milsiou el circuit assembly overseer. Nguleltobed a miting er a blil a kelebus e dirrek el milsuub a Biblia lobengterir a rekelebus. Chelechang e ngmla mo 98 a rekil e kmal dirk blak a rengul. Ngmora tkurrebab el sebechel el mesiou er a Jehovah e oureor el obengkel a ongdibel er ngii!

11. Ngmekera dochotii el kmo kede mengreos er tirke el kiei a nursing home?

¹¹ Ngmekera dochotii omengull el mora remechudelang el kiei a nursing home? Remechuodel, sel lsebechel e mngesuterir el mei me a lechub e te orrenges er a miting e dirrek el mo teloi er a ureor er a berkel a klumech. E sebeched el mengoit a taem el obengterir loeak sel bo doldingel er tir me a lechub e kede ou video chat el obengterir. Tokubets el soad el mengoit a taem el obengterir a remechudelang el tir a kiei a nursing home el cheroid er a ongdibel er tir. A lak dekerekikl e ngsebeched el mo mengemikr er tir. A rebebil er tir a locha diak el sorir el di tir el mesaod er a klengar er tir. Me nguaisei, engdi ngmo uchul a klungioled sel dongoit a taem el obengterir e doker er tir a ker e dorrenges er tir el mesaod a deurreng el bla lengai er a omesiungir el mora Jehovah.

12. Ngera sebeched el metik er a ongdibel er kid?

¹² Nglocha ngar ngii a reblak a rengrir el mechudelang er a ongdibel er kid el kmal ungil kerebai. A odos el Harriette a kmal mle blak a rengul el mesiou er a Jehovah el betok el rak er a ongdibel er ngii el ngar er a New Jersey er a beluu er a Merikel. Engdi ngika millukl el mo kiei lobengkel a ngelekel el redil. A rudam er tia el beches el ongdibel er ngii a milengoit a taem el mo medengelii e mlo mtebengii el kmo, ngika kmal mekreos. A Harriette a kmal millisiich er tir. Nguluuchais er tir er sel taem er a lekot el mo medengelii a klemerang e bo lomerk er a klumech er a chelsel aike el rak er a 1920. Ngika mle blechoel loba toothbrush er ngii sel bo lomerk er a klumech el omech er ngii sel lenguu el mo kelebus. Sera 1933 e ngmle eru el taem el bo lekelebus el ta el sandei. A bechil el dimlak el Sioning a ullengeseu el omekerreu er a retedei el mekekerei el ngelekir sel bo lekelebus. A rudam me a rudos er kid el ua Harriette a kmal rredemelel a nguu omengull er kid.

13. Ngera kede mla suub er a basio er a remechudelang er a chelsel a cheldebechelel a Jehovah?

¹³ A remechudelang el odam me a odos er kid a kmal meklou a ultutelir er a cheldebechelel a Jehovah. Te mla mes el ngar er a betok el rolel el kmo a cheldebechelel a oba kengei er ngii me tir me te dirrek el nguu a kengei er ngii. Te mla ngma klubelir er a cheleuid el leriruul. Me momes er tir el ua “madedok er a llomeserreng” e mngai a klubelem er a experience er tir. (Osi. 18:4) A lsekum e ke mengoit a taem el mo medengelterir e ngmo smisichii a klaumerang er kau, ngdirrek el locha ngar ngii obo msuub!

14. A Duteronomi 32:7 ngmelisiich er a remekekerei el mo mekerang?

¹⁴ Bo mongedecheduch er a remechudelang. (Monguiu er a Duteronomi 32:7.) Alta ngmla mo diak el sebechir el ungil lomes, e mla mo soro el merael, e mla mo mechitechut a oto er a ngerir, engdi te dirk oba reng er a  remekekerei el chad, me tir a mla rullii a “ungil ngakl” lobengkel a Jehovah. (Oli. 7:1, NW) Lak mobes er a uchul me a Jehovah a omes er tir el kmal mekreos. Molemolem lolecholt er a omengull el mo er tir. Bo mua Elisa. Ngika kmal dimlak el soal el mo cheroid er a Elias er sel ulebongel el sils er tir el dmak. Ngmle edei el taem el ledu er a Elias el kmo: “Ng kmal diak bo kcheroid er kau.”​—2 Ki. 2:2, 4, 6.

15. Ngera el ker a sebeched loker er a remechudelang?

¹⁵ Mochotii a klemeriarreng er kau er a remechudelang e moker er tir a ker. (Osi. 1:5; 20:5; 1 Ti. 5:1, 2) Ngsebechem loker chouaika el ker: “Ngera ulterekeklii a rengum er a omkekerei el kmo ke mla metik er a klemerang?” “Ngmekera ika el betok el experience er kau e olekeed er kau er a Jehovah?” “Ngera mla ngosukau el melemolem el dmeu a rengum er a omesiungem el mora Jehovah?” (1 Ti. 6:6-8) E morrenges er tir louchais er a klengar er tir.

16. Ngmekera e di diul mo uchul a klungiolel a klou me a kekerei sel ledak el chadecheduch?

¹⁶ A klou me a kekerei sel ledak el chadecheduch e ngdi diul mo uchul a klungiolir. (Rom 1:12) Kau el kekerei a mera el mo ulterekokl a rengum el kmo a Jehovah a omekerreu er a rechedal me ngike el chudelang a mo omelechesiu er a bltkil a rengum. Ngmo dmeu a rengul louchais er kau a rolel e a Jehovah a mla omekngeltengat er ngii.

17. Ngera uchul me ngsebeched el melekoi el kmo a remechudelang a di merael el mo klebokel er a bek el sils?

¹⁷ A klebekelir a rechad a nguemed sel lorael el mo chuodel, engdi tirke el oba blakerreng el mora Jehovah a di merael el mo klebokel er osengel er a bek el sils. (1 Th. 1:2, 3) Ngmekera e uaisei? Chelsel aika el betok el rak e te mla mechere chedaol reng er a Dios me ngmesmechokl er tir e ngosuterir el omekeroul a ungil blekeradel. Me sel dorael el lmuut el mo ungil medengelterir tirka el mechudelang el odam me a odos, e dolecholt omengull el mo er tir, e dolai a klubeled er tir, e kede mo omes er tir el ua mekreos el klalo!

18. Ngera kede mo mesaod er a ongingil el suobel?

¹⁸ A ongdibel a diak di loleketek sel longreos er a remechudelang el odam me a odos, ngdirrek el meteketek sel bo longreos er a remekekerei a remechudelang. A ongingil suobel e kede mo mesaod er a rolel e a remechudelang a sebechir lochotii el kmo, te mengreos er a remekekerei el chad er a ongdibel.