1-2. (a) Ha gutadila Ishima 16:31, luholo lutshi tudi naye gutadila aphangi agukola? (b) Mu longo edi tuza muhana mvutu gu mihu itshi?

GU ÉTAT-UNIS guana khala nu park imoshi yana khala nu diama diavula mu mavu. Uvi athu ajiyilego gukalegela diama diene ha gulondela misanga nga ima iko ya ndando. Hene, athu avula ana mona diama diene, ana gudizula ndo nu ndando. Ana gudimona gifua maseso a gituhu.

² Luholo lumoshi nji aphangi’etu agukola adi gifua diama, ana khala nu ndando yavula. Mbimbi ya Nzambi idi mufuanesa jinvi jiawo nu gipho gia lutumbu. (Tanga Ishima 16:31; 20:29) Uvi matangua ako tuajiya gumona gifua aphangi agukola ashigo nu ndando. Mavuala mbaheta gubonga guavula, gula adi mujiya egi aphangi agukola adi nu ndando yavula. Mu longo edi tuza muheta mvutu gu mihu eyi thathu: Mukunda natshi Yehowa wana zula aphangi agukola nu ndando yavula? Mukunda natshi aphangi agukola adi nu ndando yavula mu ulondegi wa Yehowa? Itshi tuajiya gutshita ha guheta malongo mu ifezegeselo yawo?

3. Ha gutadila Ngimbo 92:12-15, mukunda natshi aphangi agukola adi nu ndando gu meso a Yehowa?

³ Aphangi agukola adi nu ndando yavula gu meso a Yehowa Nzambi. Wana guajiya muabonga. Wana zula nji makalegelo awo abonga nu ndando yavula. Yehowa wana suanguluga tangua aphangi agukola ana wambela mavuala ndaga ahetele mu monyo wawo, tangua akhalele mukalagala mudimo wenji. (Yobo 12:12; Ish. 1:1-4) Wana suanguluga nji nu khadilo diawo dia gukolesela. (Mal. 3:16) Aphangi’awa agukola atagenele nu malamba avula mu monyo wawo, uvi abambele gutshigina  guakola gudi Yehowa. Felela diawo mukunda nu masugu adi muza didi diakola gubalega tangua ajiyile giamatshidia. Yehowa wana guazumba handaga ana landula gulongesa jina dienji, ‘ikhale ene adi athu agukola.’—Tanga Ngimbo 92:12-15.

4. Ndaga tshi jiajiya guhana aphangi’etu agukola gikhesa?

⁴ Gula udi muthu wagukola, jiya egi Yehowa wana jiya mudimo wa mukalegele mu masugu abalega. (Heb. 6:10) Wadihanele muavula mu mudimo wa gulongesa, ndaga yene yasuanguluishile diago Sh’etu wa mu dilu. Wakolesele mu malamba a luholo nu luholo, ikhale anyi agubatele gikenene giavula. Wakhalele munemesa mikhuala ya Biblia nu guyilongesa athu ako. Wakhalele nji mutagenesa muabonga inemo yakoma wakhalele nayo mu ulondegi wa Yehowa nu guhana athu ako formasio. Wakhalele mukalagala ngolo ha gujidila nu usombegeshi wagasue wakhalele mukalegewa mu ulondegi wa Yehowa nu guhana gikhesa gudi athu akhalele mutshita mudimo wa tangua diagasue. Jiya egi Yehowa Nzambi wana guguzumba muavula diago, handaga wana khala ya gujinginyina gudi muene. Udi mulaya egi: ‘Mbaabembigo athu enji agujinginyina’! (Ngi. 37:28) Udi nji gugulaya egi: ‘Mbangulandula gugubamba uu nu tangua mbawuzoga jinvi mu muto.’ (Yesh. 46:4) Utangizago egi ushigo nu ndando mu ulondegi wa Yehowa handaga wakola. Udi diago nu ndando yavula!

5. Ndaga tshi aphangi agukola ashigo naye gujimbila?

⁵ Aphangi agukola adi nu ndaga jiavula jia gukalagala mu ulondegi wa Yehowa. Yajiya gukhala egi ashigo nu ngolo jiavula, uvi adi nu ba eskperianse avula a gutuwambela handaga ajingile gale ivo yavula. Yehowa wajiya gulandula guakalegela mu maluholo avula, gifua luholo tuza guyimona mu ifezegeselo ya mu tangua dikulu nu ya mu tangua dietu.

6-7. Hana ifezegelo ya Biblia idi mumonesa luholo Yehowa washimbigile akombeledi enji a gujinginyina agukola?

⁶ Tudi nu ifezegeselo yabonga mu Biblia, idi mumonesa luholo akombeledi a gujinginyina a Yehowa akhalele gumukalegela mudimo tangua akhalele athu agukola. Ha gufezegesa, Moize wakhalele nu ivo 80 tangua Yehowa wamutombele ha gukhala profete nu  ha gutuameza enya Isalele. Tangua Daniele wakhalele nu ivo gubalega 90, Yehowa walanduile gumukalegela gifua profete. Yajiya gukhala egi mupostolo Yone wakhalele nu ivo gubalega 90 tangua Yehowa wamukalegela ha gusonega mukanda wa Yatuwuwe.

⁷ Athu ako akhalele mukombelela Yehowa nu mutshima umoshi akhalelego mujiyiwa muavula, yajiya gukhala egi athu ako akhalelego guazula nu ndando. Uvi Yehowa wakhalele guajiya nu waashimbigile mukunda nu khadilo diawo dia gujinginyina. Ha gufezefesa, Simeone wakhalele muthu ‘wabonga nu wakhalele muvuila Nzambi woma.’ Ngatshima Biblia yanago gumuzuelela muavula, uvi Yehowa wakhalele gumujiya nu wamuhanele luendu lua gumona Yesu hakhalele muene mona wazonda. Luko Simeone wazuelele profesi yatadila Yesu nu Madiya. (Luka 2:22, 25-35) Tangiza nji gifezegeselo gia profete Ana. Wakhalele mukhetu wa gafunda, wakhalele nji nu ivo 84, uvi ‘gabembelego nga hazonda guya mu tempelo.’ Yehowa wa mushimbigile handaga ‘wakhalele muya tangua diagasue mu tempelo’ nu wamuhanele luendu lua gumona Yesu hakhalele muene mona wazonda. Yadiago, Simeone nu Ana akhalele nu ndando yavula gu meso a Yehowa.—Luka 2:36-38.

8-9. Ndaga tshi phangi mumoshi wagukola walanduile gukalagala mu mudimo wa Yehowa tangua mulumi’enji wafile?

⁸ Mangino aphangi avula agukola anahana ifezegeselo yabonga gudi mavuala. Tutadilenu eksperianse ya phangi wa mukhetu Loïs Didur. Wakhalele nu ivo 21 tangua diabuile muene pionye spesiale gu Canada. Gungima wabelegesele ivo yavula nu mulumi’enji John mu mudimo wa mutadi muwendji. Akalegele nji mudimo gu Betele ya gu Canada ivo gubalega 20. Tangua phangi Loïs watagenesele ivo gubalega 58, aatumile nu phangi John ha guya mukalagala mudimo gu Ukraine. Itshi atshitshile? Azuelele egi adi gale gawo athu agukola ha guya mukalagala mudimo mu gifutshi giko ba? Ndo! Ayile mu gifutshi gia Ukraine. Phangi John wasendesele gukalagala mudimo gu Komite ya Filiale yene. Gungima dia ivo 7 phangi John wafile, uvi phangi Loïs walanduile gukalagala mudimo wenji. Henyaha udi nu ivo 81, udi mulandula gukalegela Yehowa mudimo gu Betele ya gu Ukraine. Aphangi a gu Betele yene ana gumuzumba muavula diago.

⁹ Yajiya gukhala egi akhetu a gafunda gifua phangi Loïs, ana zudiwa diago ndo nu ndando yavula gifua tangua alumi’awo akhalele nu monyo. Uvi Yehowa wana zula nu ndando yavula aphangi a akhetu akalegele mudimo hamoshi nu alumi’awo ivo yavula nu adi mulandula gumukalegela nu gujinginyina guagasue. (1 Tim. 5:3) Aphangi’awa ana hana mavuala gikhesa.

10. Ndaga tshi jiabonga phangi Tony wakalegele?

¹⁰ Aphangi avula agukola anyi ana jinga hakhawo ana khala nu ndando yavula. Tutadilenu  gifezegeselo gia phangi Tony wana jinga gu jinzo ana bamba athu agukola. Wabatijiwe tangua diakhalele muene nu 20 gu Pennsylvanie, gu État-unis mu Aout 1942. Gungima amuwambele ha gungina mu mudimo wa gisuta, uvi watunyile, hene amumbile mu bologo. Wakalegele guene ivo mbadi nu mbeji 6. Phangi Tony nu mukaji’enji Hilda avualele ana mbadi nu alongesele giamatshidia. Wakalegele mudimo ivo yavula mu mahungu agudisha gifua surveillant président (mangino wana tamegewa egi mutuameji wa hunji dia akulu). Wakhalele nji mutuameza asamble a lusugu lumoshi. Wakhalele muya mutuameza gudibungisa gua mu hungu mu bologo nu gulonguga nu athu Biblia. Mangino phangi Tony udi nu ivo 98, udi mulandula gukalegela Yehowa mudimo hamoshi nu aphangi a mu hungu dienji!

11. Luholo lutshi tuajiya gumonesa egi tuana zula aphangi agukola anyi ana jinga hakhawo nu ndando?

¹¹ Luholo lutshi tuajiya gumonesa egi tuana nemesa aphangi agukola anyi ana jinga hakhawo? Gula luholo ludi guene akulu ajiya guakuatesa ha guya mu gudibungisa gua mu hungu nga ha gutegelela gudibungisa guene. Ajiya nji guakuatesa ha gukalagala mudimo wa gulongesa. Tuajiya nji gumonesa egi tuana gudisagesa mukunda nu ene, gula tudi muya guatala nga tudi guatamega mu appel video. Tudi nji naye gudisagesa mukunda nu aphangi agukola anyi ana jinga hakhawo gualeha nu hungu, gula ndo tuajiya guabuita mutshima. Yakhala lamba gudi aphangi ako agukola ha guzuelela ndaga adi mutagana najio. Uvi mbatuheta diago gikhesa, gula tudi muzula tangua dia guahula mihu nu guategelela tangua adi gutuwambela gusuanguluga ahetele mu ulondegi wa Yehowa.

12. Ndaga tshi tuajiya gujiya gudi aphangi agukola a mu hungu dietu?

¹² Tuajiya gudihula diago gula tuakotelesa egi gudi nu aphangi agukola mu hungu dietu adi nu ba eskperianse abonga adi muhana gikhesa. Phangi Harriette wakalegela Yehowa mudimo nu gujinginyina guagasue ivo yavula yabalega gale mu hungu dimoshi gu New Jersey, gu États-Unis. Gungima wayile mukhala gumbo dia mun’enji wa mukhetu. Aphangi a mu hungu diawo dihe-dihe abalegesele nenji tangua hamoshi ha gumujiya muabonga. Akotelesele nji egi udi nu ndando yavula. Phangi Harriette wakhalele guatela mene jidi muhana gikhesa jia ndaga atagenele najio mu mudimo wa gulongesa, tangua dialongugile muene giamatshidia mu givo hehi nu 1925. Mu tangua diene, hakhalele muya muene mu mudimo wa gulongesa, wakhalele mubata tangua diagasue mungindu (brosse à dents) wenji, handaga wakhalele mujiya egi wajiya gukuatewa. Mu 1933, amumbile mu bologo iphungu mbadi. Mu mahugo ene agasue mbadi wakhalele mukalagala phoso imoshi mu bologo. Mulumi’enji gakhalelego Temue wa Yehowa, uvi wamukuatesele. Hakhalele muene mu bologo, mulumi’enji wakhalele mubamba ana. Yadiago tudi naye guzula aphangi agukola adi a gujinginyina gifua phangi Harriette nu ndando yavula!

13. Ndaga tshi jidi mumonesa egi aphangi agukola ana khala nu ndando mu ulondegi wa Yehowa?

¹³ Aphangi agukola ana khala nu ndando yavula gu meso a Yehowa nu mu ulondegi wenji. Amonele luholo Yehowa wakuatesele ulondegi wenji mu maluholo avula nu luholo waakuatesele nji. Azudile malongo a ndando mu ndaga jiabola akalegele. Hene khala guazula gifua “gito gia ndunge,” khala nji muzula malongo mu ifezegeselo yawo. (Ish. 18:4) Gula udi mubalegesa nawo tangua hamoshi ha guajiya muabonga, mbawukolesa gutshigina guaye. Mbawulonguga nji ndaga jiavula!

14. Mukanda wa Mikhuala 32:7, udi mutoga mavuala ha gukalagala itshi?

¹⁴ Khala muta maga nu aphangi agukola. (Tanga Mikhuala 32:7.) Yajiya gukhala agi aphangi ako agukola ana mona ndo muabonga, ana wenda ndo muabonga, nga ana zuela ndo luko muabonga. Uvi ana landula gukalegela Yehowa mudimo, adi nu “jina diabonga” gu meso a Yehowa. (Mulo. 7:1) Ujimbilago mukunda natshi Yehowa wana guazula nu ndando. Khala guanemesa. Khala gifua Elisha, handaga wabubidile Eliya ha gusala hamoshi nenji gutuama dia gudikhapha nenji. Wawambelele Eliya iphungu thathu egi: “Mbangugubembigo.”—2 Maf. 2:2, 4, 6.

15. Mihu itshi tuajiya guhula aphangi agukola?

¹⁵ Tuajiya gumonesa egi tuana zula aphangi agukola nu ndando gula tudi guahula mihu nu gisemo giagasue. (Ish. 1:5; 20:5; 1 Tim. 5:1, 2) Wajiya guahula mihu eyi: “Tangua wakhalele muvuala itshi ya gutshiginyishile egi wahetele giamatshidia?” “Luholo tshi ndaga watagenele najio jia gukuatesele ha gukolesa ufuta waye nu Yehowa?” “Itshi ya gukuatesele ha gubamba gusuanguluga guaye mu mu mudimo wa Yehowa?” (1 Tim. 6:6-8) Gungima ategelele muabonga tangua adi gugutela ba eksperianse awo.

16. Gubonga gutshi aphangi agukola nu mavuala ajiya guheta gula adi muta maga?

¹⁶ Gula phangi wagukola nu wa muvuala adi muta maga, muyadi awo ana gudihana gikhesa. (Lomo 1:12) Aye nji gula udi mutshita ngenyi mbawukotelesa diago egi, Yehowa wana bamba akombeledi enji. Phangi wagukola mbawumona diago egi wana gumuzumba. Mbawukhala nji nu gusuanguluga ha guguwambela luholo Yehowa wa mushimbigile.

17. Mukunda natshi tuajiya guzuela egi aphangi agukola anabua awaha diago lusugu nu lusugu?

¹⁷ Gula muthu wakola, wana khala ndo luko wawaha gifua tangua akhalele muvuala. Uvi akombeledi a Yehowa anabua awaha gumeso enji lusugu nu lusugu. (1 Tes. 1:2, 3) Mukunda natshi tuazuela ngenyi? Handaga mu ivo yavula abalegesa gale mu mudimo wa Yehowa, nyuma yenji yana gualongesa nu guakuatesa ha gukudisa makalegelo abonga. Gula tudi mukalagala ngolo ha gudijiya muabonga nu aphangi’etu agukola, ha guanemesa nu ha guzula malongo mu ba eksprianse awo, mbatuazula diago nu ndando yavula!

18. Ndaga tshi mbatumona mu longo dialandula?

¹⁸ Hungu diana gudikolesa gula mavuala adi munemesa aphangi agukola nu gula aphangi agukola nji adi munemesa mavuala. Mu longo dialandula mbatumona luholo aphangi agukola ajiya gumonesa egi ana zula mavuala nu ndando mu hungu.