1-2. (a) Mobverana na Miyambo 16:31, ko timbawawone tani abale na alongo wathu wachikulire? (b) Ko tidawire mibvunzo yaponi mu nkhani ino?

KU ESTADOS UNIDOS kuli malo yochemerewa Arkansas yomwe yanaminyala yantengo wapatali. Koma minyala mwaya niyosatsukiwa na mashini kuti yambawoneke yoyetima. Vimwevi vichitisa kuti wanthu akambagwata pa malo mwaya aleke kuwona kufunika kwa minyala mwaya.

² Mwakulingana na minyala mwaya, abale na alongo wathu wachikulire niwofunika maninge. Mawu ya Mulungu yachalinganiza invi zawo na chisote chaulemelero. (Lewengani Miyambo 16:31; 20:29) Koma nivosashupa kumbawanyalanyaza abale na alongo mwawa. Alumbwana womwe achayikhira nzeru abale na alongo wachikulire, angaphindule maninge kuposha munthu yemwe wagumana chuma chayicho. Mu nkhani ino tidawire mibvunzo yatatu aya: Ndawa chani Yahova achawona kuti abale na alongo wathu wachikulire ni chuma cha ntengo wapatali? Ko Yahova wawapasa udindo uponi abale na alongo wachikulire? Ko tingachite chani kuti tiphindule mwakukwana na chitsanzo chawo?

3. Mobverana na Salimo 92:12-15, ndawa chani wachikulire ni wofunika kwa Yahova?

³ Wachikulire wokhulupirika niwodikana maninge kwa Yahova Mulungu. Iye achakwanisa kuwona momwe iwo alili mu mtima mwawo ndipo achadziwa na kulemekeza makhalidwe yawo yabwino. Iye achatembeja maninge wachikulire akafotokozerambo wachilumbwana nzeru zomwe adazigumana pangachita utumiki wawo mokhulupirika. (Yobu 12:12; Miy. 1:1-4) Yahova achalemekeza soti kupirira kwawo. (Mal. 3:16) Iwo adagumana  na mavuto yazinji pamoyo wawo, koma adapitiriza kukhala wokhulupirika kwa Yahova. Chidikhiro chawo chidapitiriza kukhala champhanvu kuposha panthawe yomwe adapfunzira choonadi. Ndipo Yahova ankukondwa nawo ndawa yopitiriza kulengeza va dzina yake ‘olo panthawe yomwe akalamba.’​—Lewengani Salimo 92:12-15.

4. Nchani chingalimbikise abale na alongo wathu wachikulire?

⁴ Peno imwepo munkukalamba, dziwani kuti Yahova ankukumbukira basa yomwe mudamuchitira kalekale. (Aheb. 6:10) Imwepo mudathandizira mwakhama basa yolalikira, ndipo vimwevi vichakondweresa Ababa wathu wakudzulu. Imwepo mpakana mudapirira mabvuto yomwe yangakuchitisani kukhala wokwinyirira. Mudakhala wobvera ndipo mungayikhira kumbuyo mpfundo za m’Baibolo zachilungamo ndipo mungatherena anango. Mungayesesa kubvera virivose vomwe gulu yathu yachinja. Imwepo mudalimbikisa anango kuti achitembo utumiki wa nthawe zose. Yahova achakukondani maninge ndawa ya kukhulupirika kwanu. Iye ankupolomisa kuti ‘adzasiyelini wanthu wake wokhulupirika.’ (Sal. 37:28) Iye ankukutsimikizirani kuti: ‘Munthu wokalamba nidzapitirize kumunyamula.’ (Yes. 46:4) Ayi kuthamingira kuganiza kuti ndimwelini wofunika mu gulu ya Yahova ndawa yakuti mwakalamba. Dziwani kuti imwepo ndimwe wofunika maninge.

5. Ko wachikulire achadikana kukumbukira chani?

⁵ Panavizinji vomwe abale na alongo wathu wachikulire angachite. Podiya kuti iwo alibe mphanvu ninge kalekale, angakwanise kusimba vinthu vomwe achita kwa magole yazinji. Yahova angapitirize kuwaphatisa basa mu njira zosiyanasiyana, ninge momwe tiwonere mu vitsanzo vakalekale na va ntsiku zino.

6-7. Fotokozani vitsanzo va m’Baibolo va wanthu wachikulire womwe adadalisiwa ndawa yotumikira mokhulupirika.

⁶ Tingagumane vitsanzo vabwino maninge m’Baibolo va atumiki wokhulupirika omwe adatumikira Yahova podiya kuti enze wokalamba. Mwakulinganiza, Mose wenze na magole 80 pa nthawe yomwe adatumikira ninge mneneri wa Yahova na mtsogoleri wa Aizirayeli.  Yahova adapitiriza kuphatisira basa Danieli ninge womuyankhulira pewenze na magole ya m’ma 90. Ndipo vinkuwoneka kuti mtumi Yohane wenzembo na magole ya m’ma 90 pomwe adawuziwa kuti anembe bukhu ya Chivumbulutso.

⁷ Atumiki anango azinji enze wosadziwika kwa wanthu azinji, ndipo venze vosashupa kuwanyalanyaza. Koma Yahova ambawawona ndipo adawadalisa ndawa ya kukhulupirika kwawo. Mwamuna ‘wokhulupirika na wodzipereka’ Simiyoni andogumiwa mwachigwato m’Baibolo. Koma Yahova ambamudziwa ndipo adamutsimikizira kuti adzafelini kamangu mpakana adzawone kubadwa kwa Yesu ndipo adalosera vomwe vidzachitikire mwana moyu na amayi wake. (Luka 2:22, 25-35) Ganizirani pomwe nkazi wamasiye yemwe wenze mneneri Ana. Iye wenze na magole 80 koma ‘ambagumanika pa kachisi mosashotashota.’ Kugumanika kwake ‘pamisonkhano mokhulupirika’ kudamubweresera madaliso pa nthawe inango pomwe adawona Yesu ali mwana. Simiyoni na Ana enze wodikana kwa Yahova.​—Luka 2:36-38.

8-9. Ko mulongo Lois adachita chani mu gulu ya Yahova padakhala wamasiye?

⁸ Ntsiku zino, wachikulire wokhulupirika azinji ni vitsanzo vabwino kwa alumbwana. Wonani chitsanzo cha mulongo Lois Didur. Iye wenze na magole 21 pomwe adayamba upainiya ku Canadá. Patsogolo pake, iye na mwamuna wake John adamala magole yazinji ankuphata basa yonyang’anira dera. Patsogolo pake iwo adatumikira ku Beteli ya ku Canadá kwa magole yoposha 20. Lois padafikisa magole 58, iye pabodzi na John adakumbiriwa kuti akatumikire ku Ukraine. Ko iwo adakachita tani? Ko adakaganiza kuti akalambisa maninge kuti angakatumikire kudziko inango? Iwo adabvuma utumiki ule, ndipo John adaikhiwa kuti atumikire mu Komiti ya Nthambi mu dziko mweire. Pomwe John adamwalira magole 7 patsogolo pake, Lois adasaina kuti apitirize pa utumiki wake. Manjeuno anamagole 81 ndipo ankupitiriza basi kuchita utumiki wake ndipo achakondewa maninge na banja ya Beteli ya ku Ukraine.

⁹ Panango wanthu achakwanisalini kuona vomwe alongo wamasiye ninge Lois adachita pa nthawe yomwe ambatumikira na amuna wawo. Olo kuti viritene, umasiye wawo uchitisalini kuti iwo akhale wosafunika. Yahova achayikhira nzeru alongo omwe adatumikira pabodzi na amuna wawo kwa magole yazinji ndipo olo manje ankupitiriza kukhala odzipereka. (1 Tim. 5:3) Kuingizira mwapa, chitsanzo chawo ni cholimbikisa maninge kwa alumbwana.

10. Ko Tony ankutipasa chitsanzo chabwino chiponi?

¹⁰ Wachikulire azinji okhulupirika omwe ali kumalo yosungira okalamba, ni chuma chauzimu. Mwakulinganiza, m’bale munango dzina yake Tony, manjewuno ali ku malo yosungira okalamba. Iye adabatizikira ku Pennsylvania, EUA, mu Agosto 1942 anamagole 20. Kanthawe  pang’ono iye adaiyimbiwa mulandu ndawa yosangenerera ndale ndipo adakhala magole yawiri na hafu ali mudjeri. Iye pabodzi na nkazi wake Hilda, adalera wana wawo awiri mu chonadi. Kwa magole, Tony adatumikira mmipingu yatatu ninge mtumiki wa mpingu (yemwe ntsiku zino achachemerewa kuti wogwirizanisa) ndipo adatumikira pomwe ninge wonyang’anira nsonkhano wa dera. Iye ambayenda kudjeri kukachitisa misonkhano na mapfunziro ya Baibolo. Pomwe anamagole 98, ni voshupa kuti achite vizinji. Podiya viri tene, iye ankupitiriza kuchita vomwe angakwanise pakutumikira Yahova na kuthandizana na abale wa mumpingu mwake.

11. Ko tingawonese tani kuti tinkuwayikhira nzeru achikulire omwe ali kumalo yosungira okalamba?

¹¹ Ko tingawonese tani kuti tinkulemekeza achikulire omwe ali ku malo yosungira wokalamba? Akulu angambawathandize kugumanika pamisonkhano na pabasa yolalikira peno ni vokwanisika. Tingawonese kuti patekha tichawaganizira mwa kuwazungira panango kuwafonera na vidiyo. Tichadekana kuwayikhira nzeru wachikulire mwawa omwe ali kumalo yosungira okalamba omwe achakhala kutali na mpingu wawo. Timbakhale wosamala kuti osati tiwayebwe wachikulire mwawa. Achikulire anango achashupika kufotokoza bwinobwino maganizo yawo. Koma isepano tingaphindule maninge tikambapatula nthawe yokhala nawo pafupi kuti tiwabvesere akambafotokoza momwe adakhalira wokondwa pakuchita vizinji mu gulu ya Yahova.

12. Ko tingagumane chani mu mpingu mwathu chaimo?

¹² Tingadabwe kuona kuti mu mpingu mwathu chaimo muna wachikulire wokhulupirika omwe ni vitsanzo vabwino. Mulongo munango dzina yake Harriette adatumikira Yahova mokhulupirika kwa magole yazinji mu mpingu wa kwawo ku Nova Jersey, EUA. Patsogolo pake iye adafuluka nkukakhala na mwana wake nkazi. Abale na alongo wa mu mpingu wadafikira, adayesesa kuti amudziwe bwino ndipo adagumanadi chuma. Iye adawalimbikisa pakuwasimbira vomwe adagumana navo mu utumiki padandoti wapfunzira manjemanje chonadi m’magole ya 1920. Pa nthawe mweyi, akafuna kuyenda mu umboni nthawe zose angatakula shikova yokweshera manu pakudziwa kuti nthawe iliyose angamangiwe. Mu gole ya 1933 adamangiwa maulendo yawiri nkuyikhiwa mudjeri. Pa nthawe yoshupa mweyi, mwamuna wake yemwe angamusamalira podiya kuti wenzelini Mboni, adapitiriza kusamalira wana wawo wachilumbwana atatu. Shuwadi, wachikulire wokhulupirika ninge Harriette tichadekana kumbawalemekeza.

13. Ko tapfunzira chani pa udindo womwe Yahova adapasa wachikulire mu gulu yake?

¹³ Abale na alongo wathu wachikulire niwofunika maninge kwa Yahova na mu gulu yake. Iwo adachita kuwona na maso yawo momwe Yahova adadalisira gulu yake mu njira zosiyanasiyana na momwe iye wawadalisira. Iwo adapfunzira vizinji maninge pa vinthu vomwe adaphonyesa. Naboni timbawawone ninge ‘nkhokwe za nzeru’ ndipo timbawatetekere akambatisimbira vomwe vidawachitikira. (Miy. 18:4) Imwepo mukambapatula nthawe kuti muwadziwe bwino, chikhulupiriro chanu chidzalimbe maninge ndipo mudzapfunzirepo kanthu.

14. Ko lemba ya Deuteronomo 32:7 inkulimbikisa alumbwana kuchita chani?

¹⁴ Mumbakhale wakuyamba kucheza na wachikulire mwawa. (Lewengani Deuteronomo 32:7.) Ni shuwadi kuti iwo angambakangire kuwona, angambachebwe kuchita vinthu ndipo angambashupike kuyankhula. Podiya kuti  viri tene, iwo adakali alumbwana mu mtima ndipo adadzikonzera ‘dzina yabwino’ kwa Yahova. (Mla. 7:1) Mumbaganizire nthawe zose vomwe vichachitisa Yahova kuwawona kuti niwofunika. Pitirizani kumbawalemekeza. Khalani ninge Elisa yemwe adapitiriza kubverana na Eliya mpakana pa ntsiku yomalizira. Elisa adalewa maulendo yatatu kuti: ‘Nikusiyenilini.’​—2 Maf. 2:2, 4, 6.

15. Ko ni mibvunzo yaponi yomwe tingawabvunze wachikulire?

¹⁵ Wonesani kuti munkuwayikhira nzeru wachikulire mwakumbachita nawo vinthu mwachifundo. (Miy. 1:5; 20:5; 1 Tim. 5:1, 2) Mungawabvunze mibvunzo ninge aya: ‘Pemwenze mulumbwana, ko nchani chomwe chidakutsimikizirani kuti mwachigumana chonadi?’ ‘Ko vomwe vidakuchitikirani vidakuthandizani tani kukhala pa ushamwali na Yahova?’ ‘Kuti munthu apitirize kukhala wokondwa pomwe ankutumikira Yahova, ko chintsintsi chagona paponi?’ (1 Tim. 6:6-8) Patsogolo pake atetekereni bwinobwino akambakusimbirani mbiri yawo.

16. Ku kucheza kungaphindulise tani wachikulire na wachilumbwana?

¹⁶ Wachikulire na wachilumbwana akambacheza, wose achaphindula. (Aro. 1:12) Imwepo alumbwana mudzakhale wotsimikiza maninge kuti Yahova achaikhiradi nzeru atumiki wake wokhululupirika, ndipo wachikulire adzazibve kuti ni wofunika. Iwo adzakondwe kumbakusimbirani madaliso yomwe adatambira kwa Yahova.

17. Ndawa chani tingalewe kuti abale na alongo wathu wokhulupirika achakhala wokhuza magole yakambapita?

¹⁷ Kukhuza kwa thupi kuyenda kuchimala magole yakambapita, koma wanthu wokhulupirika kwa Yahova kukhuza kwawo kuyenda kuchiingizirika gole iliyose. (1 Ates. 1:2, 3) Ndawa chani tingalewe kuti vimwevi ni shuwadi? Ndawa yakuti gole na gole iwo achabvuma kuumbiwa na mzimu wake na kuchinja makhalidwe. Tikambachita khama kuti tiwadziwe abale na alongo wathu wachikulire, kuwalemekeza, kupfunzira vizinji kwa iwo, tidzazindikire kuti iwo nichumadi.

18. Ko tidzakambirane chani mu nkhani yomwe inkubwera?

¹⁸ Sikuti mpingu uchakhala wolimba ndawa yakuti alumbwana ankulemekeza wachikulire chabe, koma ndawa yakuti wachikulire ankulemekezambo wachilumbwana. Mu nkhani yomwe inkubwera, tidzakambirane momwe wachikulire angaonesere kuti ankulemekeza wachilumbwana mu mpingu.