1-2. (a) Olsem Proverbs 16:31, NW storyim, hao nao iumi shud ting lo olketa olo brata and sista? (b) Olketa wanem kwestin nao bae iumi ansarem lo disfala study?

PIPOL wea go wakabaot lo wanfala area lo Arkansas, U.S.A. maet lukim samfala ston lo graon bat no luksavve hem diamond. Olketa luk olsem ston nomoa from samwan no katem and polishim yet. From olketa no luksavve olketa ston hia spesol bae olketa just leavim nomoa.

² Olketa olo brata and sista lo kongregeson barava spesol olsem olketa diamond. Dastawe Bible sei white hair blo olketa hem olsem kraon. (Readim Proverbs 16:31 *; 20:29) Nomata olsem, maet iumi no tingim tumas olketa olo brata and sista. Bat hem gud for tingim iumi savve lanem staka gudfala samting from olketa olo. Lo disfala study, iumi bae ansarem thrifala kwestin hia: Why nao Jehovah ting lo olketa olo brata and sista olketa spesol? Wanem important samting nao olketa duim insaed organization blo Jehovah? And hao nao iumi savve lane from example blo olketa?

3. Olsem Sams 92:12-15 storyim, wanem nao mekem Jehovah tinghae lo olketa olo brata and sista?

³ Jehovah God barava tinghae lo olketa olo brata and sista. Hem luksavve and tinghae lo gudfala wei blo olketa. Hem hapi taem olketa storyim lo narawan samfala naes experience wea olketa kasem from olketa stap insaed organization blo Jehovah for staka year. (Job 12:12;  Provebs 1:1-4) Jehovah tinghae lo olketa olo hia from olketa gohed and no givap. (Malakae 3:16) Olketa kasem staka hard samting lo laef, bat olketa gohed faithful lo Jehovah and hol strong lo hope for future. Jehovah lovem olketa bikos olketa gohed for preach ‘nomata olketa olo finis.’​—Readim Sams 92:12-15.

4. Wanem nao hem gud for olketa olo brata and sista for ting abaotem wea bae encouragem olketa?

⁴ Sapos iu olo distaem, tingim hao Jehovah no forgetim olketa samting wea iu duim for hem lo bifor. (Heb. 6:10) Olsem example, iu busy lo preaching waka, iu no givap taem iu kasem olketa hard taem, iu evritaem followim olketa Bible principle, iu waka hard insaed organization, and iu trainim olketa narawan tu. Nara samting, iu willing for change followim organization blo Jehovah, and iu barava encouragem olketa wea duim pioneer waka. Jehovah God lovem iu from iu barava faithful, and hem promis for no lusim man wea faithful lo hem! (Sams 37:28) Jehovah sei tu: “Bae mi nao mi gohed fo lukaftarem yufala, go-go hea blong yufala hemi kamap waet.” (Aesaea 46:4) So no tingse from iu olo iu no important insaed organization blo Jehovah. Iu barava important lo Jehovah!

5. Wanem nao hem gud for olketa olo brata and sista luksavve lo hem?

⁵ Olketa olo brata and sista savve duim yet samfala samting for Jehovah. Nomata olketa no strong olsem bifor, olketa garem staka experience insaed lo organization. Bae iumi storyim example blo samfala olo lo bifor and distaem wea Jehovah iusim olketa for duim difren waka.

6-7. Storyim samfala example lo Bible abaotem olketa olo wea Jehovah iusim from olketa faithful.

⁶ Bible storyim example blo olketa wea duim samting for Jehovah nomata olketa olo. Olsem example, Moses hem samting olsem 80 years taem Jehovah chusim hem for kamap profet and for leadim nation blo Israel. Jehovah iusim Daniel tu for talemaot toktok blo Hem nomata  Daniel winim 90 years. And tu, Jehovah iusim aposol John for raetem Bible buk Revelation taem hem winim 90 years.

⁷ Samfala nara olo wea Jehovah iusim bifor, Bible no storyim staka samting abaotem olketa. Bat Jehovah savve lo olketa and rewardim olketa from olketa faithful. Olsem example, Jehovah iusim Simeon wea “hem wanfala raeteous man wea worshipim God.” Nomata Bible no storyim staka samting abaotem Simeon, Jehovah savve gud lo hem. Jehovah givim hem privilege for lukim datfala baby wea bae kamap Messiah, and for talem profesi abaotem Jesus and Mary, mami blo Jesus. (Luke 2:22, 25-35) Jehovah iusim Anna for talem profesi tu. Hem wanfala widow wea 84 years, bat hem savve go worship long temple evritaem. Anna hem olsem staka olo sista distaem wea no misstim olketa meeting, and Jehovah rewardim hem for garem chance for karem baby Jesus. Jehovah barava tinghae lo Simeon and Anna.​—Luke 2:36-38.

8-9. Wanem nao Sista Lois duim bihaen hasband blo hem dae?

⁸ Distaem tu, staka olo brata and sista showim nambawan example for iumi. Wanfala example hem Sista Lois Didur. Taem hem 21 years, hem start for duim spesol full-taem service lo Canada. Bihaen hem maritim John, tufala duim spesol pioneer waka firstaem and then duim traveling waka for staka year. Gogo, tufala waka lo Canada Bethel for winim 20 years. Taem Lois hem 58 years tufala kasem assignment for go lo Ukraine. Waswe, tufala tingse tufala olo nao and no fit for go lo nara kantri? Nomoa. Tufala acceptim datfala assignment and John hem kamap wanfala member blo Branch Komiti. Bihaen seven years John hem dae, bat Lois stap lo assignment blo hem. Nomata distaem Lois hem 81 years hem gohed waka lo Bethel lo Ukraine, and olketa lo Bethel barava lovem hem.

⁹ Taem John, hasband blo Lois dae, masbi laef blo hem change. Nomata olsem, Jehovah tinghae lo olketa sista olsem Lois wea sapotim hasband blo hem for staka year, and wea bihaen hasband dae hem gohed duim best blo hem lo waka for Jehovah. (1 Tim. 5:3) Olketa sista olsem Lois barava encouragem olketa narawan tu.

10. Storyim nambawan example blo Brata Tony.

¹⁰ Iumi tinghae lo olketa olo brata and sista nomata olketa no fit for go lo olketa meeting. Wanfala example hem Brata Tony. Lo August 1942, taem Tony 20 years, hem baptaes lo Pennsylvania, U.S.A. No longtaem bihaen datwan gavman sei hem mas joinim army, and from hem no joinim army olketa putim hem lo prison for tu and haf year. Gogo, hem  maritim Hilda and tufala garem tufala pikinini, wanfala boy and wanfala gele. Tony hem gud spiritual hed for famili blo hem. Thrifala taem famili muv lo difren kongregeson wea Tony hem chairman blo olketa elder, and hem assembly overseer tu. Nara samting, hem savve visitim pipol lo prison for duim olketa Bible study and conductim olketa meeting. Distaem Tony hem 98 years, bat hem no laek for stap nating. Nomata olketa narawan mas lukaftarem hem, hem gohed duim wanem hem fit for duim for Jehovah!

11. Hao nao iumi savve showimaot iumi tingim olketa olo brata and sista wea no fit for kam lo olketa meeting?

¹¹ Hao nao iumi savve showimaot iumi tingim olketa olo brata and sista wea no fit for kam lo olketa meeting? Sapos fitim, olketa elder maet mekem arrangement for olketa attendim or lisin lo meeting, and helpem olketa for preach. Iumi savve showimaot iumi tinghae lo olketa olo hia taem iumi visitim olketa, or story witim olketa lo phone. Bat important samting, hem for iumi no forgetim olketa. Taem iumi story witim olketa olo brata and sista maet samfala hol bak for storyim experience blo olketa. Iumi bae kasem gud samting sapos iumi askem kwestin and lisin gud lo olketa naes experience blo olketa.

12. Wanem nao iumi savve faendemaot abaotem samfala olo brata and sista lo kongregeson blo iumi?

¹² Maet iumi faendemaot samfala olo brata and sista lo kongregeson blo iumi garem olketa naes experience. Olsem example, Hariette hem faithful sista wea stap for staka year lo kongregeson blo hem lo New Jersey, U.S.A. Then hem go stap witim dota blo hem lo nara ples. From olketa brata lo niu kongregeson blo hem story witim hem, olketa faendaot hem garem staka naes experience. Olketa kasem encouragement from olketa herem experience blo hem lo ministry taem hem lanem truth lo samting olsem 1925. Lo datfala taem police savve arrestim olketa wea preach, so hem storyim hao hem keepim toothbrush insaed lo preaching basket blo hem nogud olketa arrestim hem. Hem storyim hao lo 1933 tufala taem olketa putim hem lo prison for wan week. Hasband blo hem no wanfala Witness, bat hem willing for lukaftarem thrifala smol pikinini blo tufala taem Hariette lo prison. Iumi barava tinghae lo olketa faithful olo brata and sista olsem Harriette!

13. Why nao iumi savve sei olketa olo brata and sista important lo organization blo Jehovah?

¹³ Olketa olo brata and sista important lo organization blo Jehovah. Olketa experiencem hao Jehovah blessim organization lo staka difren wei and hao hem blessim olketa tu. And tu, olketa lane from olketa mistek blo olketa. So iumi savve kasem gud samting from wisdom and experience blo olketa. (Provebs 18:4) Sapos iumi spendem taem for savve gud lo olketa, datwan savve strongim faith blo iumi and bae iumi lanem staka samting!

14. Wanem nao Diutronomi 32:7 encouragem iumi for duim?

¹⁴ Go story witim olketa olo brata and sista. (Readim Diutronomi 32:7.) Nomata olketa olo no lukluk gud, wakabaot slow, or olketa no savve story big, olketa fren gud witim Jehovah, and olketa  interest lo staka samting yet. (Eccl. 7:1, NW) Remember, Jehovah tinghae lo olketa, so iumi mas tinghae lo olketa tu. Iumi laek for followim example blo Elisha wea hem no laek for lusim Elijah lo last day wea tufala stap tugeta. Thrifala taem Elisha sei lo Elijah: “Bae mi no lusim yu.”​—Mektu Kings 2:2, 4, 6.

15. Olketa wanem kwestin nao iumi savve askem olketa olo brata and sista?

¹⁵ Showimaot iumi interest lo olketa olo brata and sista lo wei for askem olketa naesfala kwestin. (Provebs 1:5; 20:5; 1 Tim. 5:1, 2) Iumi maet ask olsem: “Taem iu young yet, wanem nao mekem iu sure diswan nao truth?” “Wanem nao samfala samting wea happen lo laef blo iu wea mekem iu barava trustim Jehovah?” or “Wanem nao helpem iu for gohed hapi taem iu worshipim Jehovah?” (1 Tim. 6:6-8) Bihaen iumi askem kwestin, lisin gud taem hem story.

16. Taem iumi story witim olketa olo lo kongregeson, wanem gud samting nao bae iumi and olketa kasem?

¹⁶ Taem iumi story witim olketa olo lo kongregeson, iumi and olketa bae kasem encouragement. (Rome 1:12) Iumi bae luksavve Jehovah lukaftarem olketa wea faithful for worshipim hem, and datfala olo bae hapi from iumi interest lo hem. Bae hem hapi for storyim olketa blessing wea hem kasem from Jehovah.

17. Why nao iumi tinghae lo olketa olo brata and sista?

¹⁷ Nomata body blo olketa olo gogo daon, Jehovah tinghae lo strongfala faith and olketa gudfala wei blo olketa. (1 Thess. 1:2, 3) Lo laef blo olketa, olketa changem olketa nogud wei and letem holy spirit helpem olketa for garem olketa gudfala wei. Bae iumi barava tinghae lo olketa olo brata and sista taem iumi story lo olketa, savve gud lo olketa, and lane from example blo olketa!

18. Wanem nao bae iumi storyim lo next study article?

¹⁸ Taem iumi tinghae lo olketa olo brata and sista, datwan savve strongim kongregeson. Bat olketa olo brata and sista tu need for tinghae lo olketa wea young lo olketa. Lo next study article, bae iumi storyim hao olketa olo brata and sista savve showimaot olketa tinghae lo olketa lo kongregeson wea young lo olketa.