1, 2. 1) Proverbios 16:31 nisqanman jina, ¿imaynatá machitu hermanosninchejta qhawananchej tiyan? 2) ¿Ima tapuykunamantaj kay yachaqanapi kutichisun?

ESTADOS UNIDOSPA ujnin parquenpi pampapi diamante nisqa valorniyoj rumis tiyan. Chay rumis pampapi choqarayashajtinpis mana rejsej runasqa, ni qhawarillankupischu. Imajtinchus chay rumisqa manaraj sumaj llosqʼochasqachu kashanku. Chayrayku mana reparayta atillankuchu mashkhachus valesqanta.

² Cheqa sonqo machitu hermanosninchejqa, chay valorniyoj diamante rumis jina kanku. Diospa Palabranqa paykuna yuraj umitas kasqankuta uj pilluwan kikinchan (Proverbios 16:31 leey; 20:29). Jinapis ichá paykunamanta qonqakapushasunman. Machitu hermanosta jatunpaj qhawaj jovenesqa, diamante rumimantapis chay hermanos aswan valorniyoj kasqankuta reparanku. Kay yachaqanapeqa kay kinsa tapuykunaman kutichisun: ¿Imaraykutaj Jehová machitu hermanosta may valorniyojpaj qhawan? ¿Imaraykutaj machitu hermanos Diospa llajtanpi may valorniyoj kanku? ¿Imatá ruwasunman machitu hermanosninchejmanta sumajta yachakunapaj?

3. Salmo 92:12-15 nisqanman jina, ¿imajtintaj Jehová machitu hermanosta may valorniyojpaj qhawan?

³ Jehová Diosninchejqa may valorniyojpaj qhawan machitu hermanosninchejta. Payqa yachan imayna runaschus kasqankuta. May allinpajtaj qhawan kʼacha cristianos kasqankuta. Jehovaqa mayta kusikun machitu hermanos watas pasasqanman jina imastachus yachakusqankuta joven hermanosman yachachejtinku (Job 12:12; Pro. 1:1-4). Chantapis Jehovaqa allinpaj qhawan chay hermanos llakiykunata aguantasqankuta  (Mal. 3:16). Sinchʼi llakiykunapi kaspapis paykunaqa Jehová Diosmanta manapuni karunchakorqankuchu. Chantapis kunanqa wiñay kausayta japʼinankuta suyakusqanku aswan sinchʼi, qallariymanta nisqaqa. Jehovaqa paykunata munakun, imaraykuchus “machu kayninkupipis” sutinmanta willashallankupuni (Salmo 92:12-15 leey).

4. ¿Imataj machitu hermanosninchejta kallpachanman?

⁴ Qanpis viejoyapushanki chayri viejayapushanki chayqa, Jehová Diosqa imastachus paypaj pasaj wataspi ruwasqaykita mana qonqapunchu (Heb. 6:10). Qanqa predicacionpi kusiywan yanapakorqanki, chaytaj Tatanchej Jehovata mayta kusichin. Llakiykunata aguantarqanki, wakin mana aguantay atina kajtinpis. Bibliaj yuyaychaykunasninta kasukorqanki, nitaj saqerqankichu wajkuna pisipaj qhawanankuta. Diospa llajtanpi jatuchaj ruwanasta japʼisqaykita allinta juntʼarqanki, wajkunatapis sumajta wakicherqanki. Mayta kallpachakorqanki Jehovaj llajtanpi wakin cambios kajtin, chayman usqhayllata yachaykukunaykipaj. Diospaj tukuy atisqankuta llankʼajkunatapis yanaparqanki, kallpacharqankitaj. Chayrayku Jehovaqa maytapuni munakusunki payta tukuy sonqo sirvisqaykimanta. Chantapis Diosqa niwanchej “paypaj tʼaqasqa kajkunamanta” mana qonqapunanta (Sal. 37:28). Jehovaqa nillasunkitaj: ‘Yuraj chujchallaña kanaykikama wawata jina apaykachasqayki’, nispa (Isa. 46:4). Ama yuyaychu viejitaña chayri viejitoña kasqaykirayku Diospa llajtanpi niña imata ruwayta atisqaykita. Jehovapajqa may valorniyojllapuni kanki.

5. ¿Imatá yuyarikunanku kanman machitu hermanos?

⁵ Machitu hermanosqa Diospa llajtanpi sumajta yanapakuyta atinku. Paykunaqa manaña jóvenes jina kallpayoj kaspapis, ashkha watasta Jehovata sirvisqankurayku sumaj experienciayoj kanku. Paykunaqa Jehovaj llajtanpi tukuy imaymanamanta yanapakuyta atillankupuni. Qhepan parrafospi qhawarisun Diospa kamachisnin ñaupa tiempomanta, kay tiempomanta ima machitusña kaspapis llajtanpi yanapakullasqankumantapuni.

6, 7. ¿Pikunataj Jehovata machitu kashaspa sirverqanku, chanta ima bendicionestataj japʼerqanku?

⁶ Bibliata leespaqa reparanchej Diospa ashkha cheqa sonqo kamachisnin, viejitusña  kaspapis payta sirvillasqankutapuni. Paykunamanta ujqa Moisés karqa. Payqa 80 watasniyoj kashaspa profetaman, israelitaspa kamachejninkumantaj tukorqa. Wajtaj Daniel karqa. Payqa 90 watas kurajniyoj jinaña kashaspapis, Jehová Diosta profeta jina sirvishallarqapuni. Apóstol Juanpis 90 watas kurajniyojñasina karqa, Dios yuyaychasqanman jina Apocalipsis librota qhelqashaspa.

⁷ Diospa wakin kamachisnenqa mana ancha rejsisqaschu karqanku. Runaspis ichá paykunataqa mana valechejchu kanku. Jinapis Jehovaqa paykunata allinpaj qhawaj, tukuy sonqo sirvisqankuraykutaj bendicerqa. Paykunamanta ujqa Simeón karqa. Bibliaqa paymanta pisillata parlan. “Payqa cheqan runa karqa, Diostataj manchachikoj”. Jinapis Jehová Diosqa payta allinta rejserqa, saqerqataj Jesusta wawita kashajtin rejsinanta. Chantapis Simeonqa Jesusmanta, maman Mariamanta ima uj profeciata willarqa (Luc. 2:22, 25-35). Anamantañataj parlarina. Payqa Diospa profetan karqa. Anaqa 84 watasniyoj viuda karqa, templomantaj rillajpuni. Chayrayku Jehovaqa paytapis saqellarqataj Jesusta wawita kashajtin rejsinanta. Jehovaqa Simeontawan, Anatawan may valorniyojpajpuni qhawarqa (Luc. 2:36-38).

8, 9. ¿Imatataj viuda hermanasninchej ruwashallankupuni?

⁸ Kay tiempopipis machitu hermanosninchejmantaqa jóvenes kajkuna mayta yachakusunman. Hermananchej Lois Didurmanta parlarina. Payqa 21 watasniyoj kashaspa Canadá suyupi precursora especial jina sirviyta qallarerqa. Chaymantataj qosan Johnwan khuska ashkha watasta congregacionesta waturispa sirverqanku. Aswan qhepamantaj 20 watas kurajta, chay suyullapitaj Betelpi sirverqanku. Hermana Lois 58 watasniyoj kashajtintaj, Ucrania suyupi sirvinankupaj invitasqas karqanku. Ichapis paykunaqa mayoresña kasqankurayku, niña waj suyuman riyta atinankuta yuyankuman karqa. Jinapis paykunaqa rerqanku. Ucraniapeqa qosanta Sucursalta Kamachejkunamanta ujnin kananpaj churarqanku. Hermano Johnqa qanchis watasninman wañuporqa. Hermana Loistaj Ucraniallapipuni qhepakorqa. Kunantaj 81 watasniyojña, tukuy sonqotaj Jehovata sirvishallanpuni Ucrania suyumanta Betelpi. Paytaqa tukuy hermanos mayta munakunku.

⁹ Wakin hermanasninchejqa ichapis Lois jina viudasllataj kanku. Paykunamantataj wajkunaqa ichá qonqakapunkuman. Jinapis Jehovaqa paykunata may valorniyojllapajpuni qhawan. Chay hermanasqa qosasninkuta ashkha watasta sumajta yanaparqanku, tukuy sonqotaj Jehovata sirvishallankupuni. Chaytaj Jehovata mayta kusichin (1 Tim. 5:3). Chantapis chay hermanasqa joven hermanosta, hermanasta ima mayta kallpachanku.

10. ¿Imatá yachakunchej hermano Tonymanta?

¹⁰ Ashkha machitu hermanosninchejqa, maypichus awelitusta qhawanku chay wasispi tiyakunku. Paykunatapis may valorniyojpaj  qhawanchej. Hermano Tonymanta parlarina. Payqa maypichus awelitusta qhawanku chaypi tiyakun. Agosto de 1942 watapi 20 watasniyoj kashaspa Pensilvaniapi (Estados Unidos) bautizakorqa. Pisi tiemponmantaj mana cuartelman riyta munasqanrayku iskay wata khuskanniyojta carcelpi wisqʼasqa karqa. Paywan señoran Hildawantaj, iskaynin wawitasninkuta Diosmanta yachachispa uywarqanku. Hermano Tonyqa watas pasasqanman jina, kinsa congregacionespi superintendente presidente jina yanapakorqa. (Kunantaj chay cargoyoj kaj hermano coordinador nisqa anciano). Payqa yanapakullarqataj asamblea de circuito nisqamanta encargado jina. Chantapis carcelpi reunionesta ruwaj, runasmantaj Bibliamanta yachachej. Kunanqa 98 watasniyojña. Jehovapajtaj llankʼashallanpuni. Payqa tukuy atisqanta kallpachakushallanpuni Jehovata sirvinanpaj, congregacionpi yanapakunanpajtaj.

11. ¿Imaynatá awelitosta qhawanapaj wasispi tiyakoj hermanosta chayri congregacionninchejmanta machitu hermanosta jatunpaj qhawasqanchejta rikuchisunman?

¹¹ ¿Imaynatá awelitosta qhawanapaj wasispi tiyakoj hermanosta chayri congregacionninchejmanta machitu hermanosta jatunpaj qhawasqanchejta rikuchisunman? Ancianosqa atikusqanman jina, paykunata yanapankuman predicanankupaj, reunionesman rinankupaj chayri uyarinankupaj. Noqanchejpis paykunata munakusqanchejta rikuchisunman waturikoj rispa chayri wajyarispa. Awelitosta qhawanapaj wakin wasisqa congregacionmanta karupi kashan. Paykunataqa astawanraj waturikunanchej tiyan. Amapuni paykunamanta qonqakunachu. Wakin machitu hermanosninchejqa ichá mana imatapis willariyta atillawasunchu chayri manchachikonqanku. Jinapis tiempochakusunman paykunawan parlarinapaj, tapurisunmantaj: “Diospa llajtanpi, ¿imasta ruwaspataj kusisqa karqanki?”, nispa. Willariwajtinchejtaj sumajta uyarisunman. Chaytaj mayta kallpachawasun.

12. Congregacionninchejmanta machitu hermanoswan parlarinapaj tiempochakuspa, ¿imatá reparasunman?

¹² Congregacionninchejpipis ichá wakin machitu hermanosninchejqa unaytaña Jehovata sirvishanku. Hermana Harriettemanta parlarina. Payqa Estados Unidosmanta. Ashkha watastataj Nueva Jersey llajtapi Jehovata sirverqa. Chaymantataj payqa warmi wawanpaman tiyakoj riporqa. Mosoj congregacionninmanta hermanostaj payta astawan rejsinankupaj tiempochakorqanku, repararqankutaj ashkha experienciayoj kasqanta. Payqa hermanosman willarerqa Bibliamanta yachakuyta qallarishajtin 1925 wata chaynejpi imaynachus predicación kasqanta. Chay wataspi payqa predicacionman rispa kiruta mayllakunapaj cepillota apakojpuni, imajtinchus yuyaj ima ratollapis carcelman apanankuta. Paytaqa 1933 watapi iskay kutispi uj semanata carcelman wisqʼaykorqankupuni. Hermananchej carcelpi kanankamataj qosan kinsantin wawitasninta cuidarqa. Payqa mana testigochu karqa, nitaj hermanaman churanakojchu. Chayrayku Harriette jina tukuy sonqo Jehovata sirvej machitu hermanosninchejtaqa, jatunpaj qhawana.

13. ¿Imaynatataj Jehová machitu hermanosninchejta qhawan, chanta imaynatá noqanchejpis qhawanchej?

¹³ Jehovaqa, machitu hermanosninchejta may valorniyojpaj qhawan. Noqanchejpis ajinallatataj paykunata qhawanchej. Machitu hermanosqa rikorqanku Jehová llajtanta, paykunata ima mayta bendecisqanta. Paykunaqa pantasqasninkumantapis mayta yachakorqanku. Machitu hermanosninchejqa sumaj yachayniyoj, sumaj experienciayojtaj kanku. Paykunamantataj mayta yachakusunman (Pro. 18:4). Paykunata allinta rejsinapaj kallpachakusun chayqa, creeyninchej astawan sinchʼiyanqa, ashkha imastataj paykunamanta yachakusun.

14. Deuteronomio 32:7 nisqanman jina, ¿imatataj jóvenes ruwananku tiyan?

¹⁴ Machitu hermanosninchejwan parlarinapaj kallpachakuna (Deuteronomio 32:7 leey). Ichapis paykunaqa manaña sutʼitachu rikunku, ñakʼayta purikunku, ñakʼayllatataj parlakunku. Jinapis paykunaqa Jehovapaj llankʼayllatapuni munanku, Jehovaj ñaupaqenpitaj “sumaj runapaj rejsisqa” kanku (Ecl. 7:1). Jehovaqa paykunata may valorniyojpaj qhawan tukuy sonqo sirvisqankurayku. Noqanchejpis ajinallatataj paykunata qhawana. Eliseomanta parlarina. Payqa Eliaswan kashaspa manapuni sapanta saqerpayta munarqachu. Chay diapi kinsa kutita nerqa: ‘Mana sapaykita saqerpasqaykichu’, nispa (2 Rey. 2:2, 4, 6). Noqanchejpis pay jina kanapaj kallpachakuna.

15. ¿Imastataj machitu hermanosninchejta tapurisunman?

¹⁵ Machitu hermanosninchejwanqa kʼachallamanta parlarisunman. Ajinamanta rikuchisun paykunata mayta munakusqanchejta (Pro. 1:5; 20:5; 1 Tim. 5:1, 2). Paykunataqa tapurisunman: “Joven kashajtiyki, ¿imataj yanapasorqa Jehovaj testigosnin, Diospa llajtanpuni kasqanta yachanaykipaj?”, “¿Imataj yanapasorqa Jehovaman astawan qayllaykunaykipaj?”, “¿Imataj yanapasorqa Jehovata kusisqallapuni sirvinaykipaj?”, nispa (1 Tim. 6:6-8). Chantá paykuna willariwajtinchej sumajta uyarina.

16. ¿Imajtintaj nisunman uj jovenwan, machitu hermanowan parlarispa purajmanta kallpachanakusqankuta?

¹⁶ Uj jovenwan machitu hermanowan parlarispa purajmanta kallpachanakunku (Rom. 1:12). Joven hermanoqa sutʼita reparanqa tukuy sonqo sirvej kamachisninta Jehová sumajta cuidasqanta. Machitu hermanotaj reparanqa munasqa kasqanta, kusiywantaj willarenqa imaynatachus Jehová kausayninpi yanapasqanta.

17. ¿Imajtintaj ninchej machitu hermanosta watas pasasqanman jina Jehová aswan alajitospaj qhawasqanta?

¹⁷ Jóvenes kashaspaqa alajitos kanchej, watas pasasqanman jinataj kʼusuyapunchej. Jinapis Jehovaqa watas pasasqanman jina, payta tukuy sonqo sirvej kamachisninta aswan alajitospaj qhawan (1 Tes. 1:2, 3). Imajtinchus paykunaqa watas pasasqanman jina Dios atiyninwan yachachinanta, cheqanchananta ima saqerqanku. Machitu hermanosninchejta aswan sumajta rejsispa, astawan respetaspa, astawan paykunamanta yachakuspa ima, paykunata aswan valorniyojpaj qhawasun.

18. ¿Imatataj qhepan yachaqanapi yachakusun?

¹⁸ Jóvenes, machitu hermanosta may valorniyojpaj qhawajtinku, machitu hermanospis jovenesta kikillantataj qhawajtinku, congregacionmanta hermanosqa sumaj kallpachasqas kanku. Qhepan yachaqanapi yachakusun, imaynatachus machitu hermanos congregacionmanta jovenesta, allinpaj qhawayta atisqankuta.