1, 2. a) Junam rukʼ ri kubʼij Proverbios 16:31, ¿jas rajawaxik kqabʼan che kilik ri e qachalal nim chi kijunabʼ? b) ¿Jas kqatzalij na uwach pa wajun kʼutunem riʼ?

PA JUN parque re Arkansas (Estados Unidos), keriqitaj jeʼlik taq abʼaj kechupchutik. Rumal che waʼ taq abʼaj riʼ kʼa kʼo na ri tzʼil chrij, weneʼ e jujun chke ri keʼopan chilaʼ xaq keqʼax bʼi chkixukut y kkil taj che sibʼalaj nim kibʼanik.

² Ri e sukʼ taq qachalal che nim chi kijunabʼ kejunamataj rukʼ ri e abʼaj riʼ: e jun nimalaj qʼinomal. Ri uTzij ri Dios kujunamaj ri kiwiʼ che saq chik rukʼ jun corona (chasikʼij uwach Proverbios 16:31; 20:29). Are kʼu weneʼ kqil ta ri utz taq kibʼantajik. Ri alabʼom alitomabʼ che nim kekil wi ri e qachalal nim chi kijunabʼ, kkiriq jun nimalaj qʼinomal pa kikʼaslemal. Pa wajun kʼutunem riʼ kqatzalij na uwach wariʼ: ¿jasche ri Jehová kuchomaj che nim kibʼanik ri qachalal nim chi kijunabʼ?, ¿jas keʼukoj wi pa ri utinamit? y ¿jas kqabʼano rech kqariq ri utzilal che kuya ri kikʼutbʼal?

3. Junam rukʼ ri kubʼij Salmo 92:12-15, ¿jasche ri Jehová nim keril wi ri e qachalal nim chi kijunabʼ?

³ Ri Jehová sibʼalaj nim keril wi ri qachalal nim chi kijunabʼ. Retaʼm ri kʼo pa kanimaʼ y nim kril wi ri utz taq kibʼantajik. Y, kkikotik rumal che ri qachalal nim chi kijunabʼ kkiqʼaxej ri nim ketaʼmabʼal chke ri alabʼom alitomabʼ (Job 12:12; Prov. 1:1-4). Xuqujeʼ nim kril wi che kʼi jastaq kichʼijom  pa ri kikʼaslemal (Mal. 3:16). Paneʼ kiriqom kʼi kʼax, amaqʼel kikubʼsam kikʼuʼx chrij ri Jehová. Kimik sibʼalaj nim chi ri keyebʼal. Y ri Jehová sibʼalaj keʼuloqʼoqʼej rumal che «puneʼ kʼu e riʼjobʼinaq chik» kʼa kkitzijoj na ri ubʼiʼ chke ri winaq (chasikʼij uwach Salmo 92:12-15).

4. ¿Jas kyoʼw kichuqʼabʼ ri qachalal nim chi kijunabʼ?

⁴ We tajin krijobʼ la, qas chetaʼmaj la che ri Jehová knaʼtaj che ronojel ri bʼanom la (Heb. 6:10). Rukʼ ronojel animaʼ tobʼanaq la che utzijoxik ri utzij ri Dios y wariʼ kuya kikotemal che ri qaTat kʼo pa ri kaj. Chʼijom la nimaʼq taq kʼax, kʼutum la che are kaj la kbʼan la pa ri kʼaslemal la ri ktaqan wi ri Dios, bʼanom la nimaʼq taq chak pa ri utinamit ri Jehová y yaʼom la tijonik chke nikʼaj chi qachalal. Paneʼ kʼo kʼi jastaq aninaq tajin kkʼextaj pa ri utinamit ri Jehová, kojom chuqʼabʼ la rech tajin kbʼan la ri ktaqan wi. Xuqujeʼ yaʼom la kichuqʼabʼ ri tajin kkipatanij más ri Jehová. Ri Jehová sibʼalaj kloqʼoqʼen che la rumal che yaʼom ta kan la upatanexik y ri areʼ kubʼij che «keʼuwonobʼa ta kanoq ri e jik che» (Sal. 37:28). Xuqujeʼ kubʼij: «Are taq saq chik ri ijolom, xaq are kixintoqʼej na» (Is. 46:4). Rumal laʼ, kchomaj ta la che kʼo ta chi patan la pa ri utinamit ri Jehová rumal che nim chi ri junabʼ la. ¡Sibʼalaj nim bʼanik la!

5. ¿Jas rajawaxik knaʼtaj chke ri e qachalal nim chi kijunabʼ?

⁵ Ri e qachalal nim chi kijunabʼ kʼo kʼi jastaq kekunik kkibʼano. Paneʼ kʼo ta chi kichuqʼabʼ are kʼu kʼo nim ketaʼmabʼal. Ri Jehová pa kʼi jastaq kkunik keʼukoj wi, junam rukʼ ri kqil na pa taq ri e kʼutbʼal re ojer kanoq y rech ri qaqʼij.

6, 7. Chayaʼ jujun kʼutbʼal kech ri upatanelabʼ ri Dios nim chi kijunabʼ che xetewchix rumal ri kisukʼilal.

⁶ Pa ri uTzij ri Dios kqariq kʼutbʼal kech e sukʼ taq winaq che xkipatanij ri Jehová pa ronojel kikʼaslemal. Jun chke are ri Moisés, paneʼ 80 chi ujunabʼ xux qʼaxal tzij re ri Dios y kʼamal ubʼe ri tinamit,  Israel. Ri jun chik are ri Daniel, weneʼ más che 90 ujunabʼ are kʼu xuya ta kan upatanixik ri Jehová. Xuqujeʼ ri apóstol Juan kʼo chi más che 90 ujunabʼ are chiʼ xutzʼibʼaj ri wuj Apocalipsis.

⁷ Xuqujeʼ e kʼo chi nikʼaj upatanelabʼ ri Dios che xeʼux sukʼ, tekʼuriʼ weneʼ qas ta xetaʼmax kiwach y weneʼ qas ta nim xeʼilik. Are kʼu, xesachan ta che ri Jehová y xetewchix rumal ri kisukʼilal. Jun kʼutbʼal, qas ta kʼi jastaq xtzʼibʼax kan pa ri Biblia chrij jun achi «Simeón ubʼiʼ [...] sukʼ, nimanel che ri Dios», are kʼu xsachan ta pa ujolom ri Jehová, rumal laʼ xkunik xril ri Jesús are chiʼ kʼa neʼ na y xubʼij jujun taq tzij che kbʼantaj rukʼ ri Jesús y ri unan are chiʼ kqʼax ri tiempo (Luc. 2:22, 25-35). Xuqujeʼ chojchoman chrij ri Ana ri qʼaxal tzij re ri Dios. Are jun ixoq malkaʼn che kʼo chi 84 ujunabʼ are kʼu «mawi jubʼiqʼ kel bʼik chupam ri rachoch Dios» o amaqʼel kopan chilaʼ. Xtewchix ri usukʼilal rumal ri Jehová y xkunik xril ri Jesús are chiʼ kʼa neʼ na. Wariʼ kukʼutu che ri Simeón y ri Ana sibʼalaj nim xeʼil wi rumal ri Jehová (Luc. 2:36-38).

8, 9. ¿Jas nimalaj tobʼanik tajin kkiya ri e qachalal ixoqibʼ e malkaʼn?

⁸ Pa taq ri qaqʼij, e kʼi qachalal nim chi kijunabʼ e jun utzalaj kʼutbʼal chkiwach ri alabʼom alitomabʼ. Chqilampeʼ ri xukʼulmaj pa ri ukʼaslemal jun qachalal ixoq Lois Didur ubʼiʼ. Chiʼ kʼateʼ 21 ujunabʼ xux precursora especial pa Canadá. Are chiʼ kʼulan chi rukʼ ri qachalal John, pa kʼi junabʼ xepatanin che kisolixik ri e qachalal pa taq ri circuitos. Tekʼuriʼ xesikʼix pa ri Betel re Canadá y chilaʼ xekʼojiʼ más che 20 junabʼ. Are chiʼ ri qachalal Lois kʼo chi 58 ujunabʼ xbʼix chke we kkaj kepatanin pa Ucrania. ¿Jas xkibʼano? ¿La xkichomaj che sibʼalaj nim chi kijunabʼ rumal laʼ kekun ta chik kebʼe pa jun chi tinamit? Xebʼek y xbʼix che ri qachalal John che kpatanin pa ri Comité re Sucursal. Are chiʼ xqʼax siete junabʼ ri qachalal John xkamik, are kʼu ri qachalal Lois xkanaj kan chilaʼ. Kimik, paneʼ 81 chi ujunabʼ, ri qachalal rukʼ ronojel ranimaʼ tajin kupatanij ri Jehová pa ri Betel re Ucrania y sibʼalaj kloqʼoqʼex kumal konojel ri qachalal.

⁹ Weneʼ e kʼo jujun qachalal are chiʼ kekanaj kan malkaʼn qas ta nim chi keʼilik. Are kʼu, ri Jehová sibʼalaj nim kril ri kisukʼilal y ksachan ta che ri tobʼanik xkiya chke ri kachajil pa kʼi junabʼ (1 Tim. 5:3). Xuqujeʼ kkiya nimalaj tobʼanik chke ri alabʼom alitomabʼ.

10. ¿Jas kqetaʼmaj chrij ri utz ukʼutbʼal ri qachalal Tony?

¹⁰ E kʼo qachalal nim chi kijunabʼ che xaq kitukel e kʼolik, ri e areʼ e jun nimalaj qʼinomal pa ri utinamit ri Dios. Jeriʼ ubʼanik ri ukʼaslemal jun qachalal, Tony ubʼiʼ.  Xubʼan uqasanjaʼ pa Pensilvania (Estados Unidos) pa ri agosto 1942 are chiʼ 20 ujunabʼ. Are chiʼ xqʼax jubʼiqʼ tiempo xkʼojiʼ kebʼ junabʼ rukʼ nikʼaj pa cárcel rumal che xraj taj xbʼe pa ri ejército. Ri areʼ y ri al Hilda, ri rixoqil, xekikʼiyisaj ri e kalkʼwal pa ri utinamit ri Jehová. Pa kʼi junabʼ ri qachalal Tony xux kʼamal bʼe kech ri e kʼamal taq bʼe pa oxibʼ congregaciones (kimik kbʼix ri jachal kichak ri kʼamal taq bʼe che) xuqujeʼ xux kʼamal bʼe re nimaʼq taq riqbʼal ibʼ re circuito. Xuqujeʼ xubʼan riqbʼal taq ibʼ y xuya etaʼmanik re ri Biblia chke ri e kʼo pa cheʼ. Paneʼ kʼo chi 98 ujunabʼ kuchomaj taj che kuxlanik. Xaneʼ kraj kukoj ronojel uchuqʼabʼ che upatanexik ri Jehová y che uyaʼik tobʼanik chke ri e qachalal.

11. ¿Jas kojkunik kqabʼano rech nim keqil wi ri e qachalal che xaq kitukel e kʼolik o kekun ta chik keʼel lo pa ri kachoch?

¹¹ ¿Jas kqabʼano rech nim keqil wi ri qachalal nim chi kijunabʼ che kitukel e kʼolik o kekun ta chik keʼel lo pa ri kachoch? We kbʼanik, ri e kʼamal taq bʼe re ri congregación kekunik kekitoʼ che utzijoxik ri utzij ri Dios y rech kkil ri e riqbʼal ibʼ. Kojkunik kqakʼutu che kel qakʼuʼx chke are chiʼ keqasolij o kojtzijon kukʼ pa videollamada. Nim ubʼanik che kojchoman chkij ri naj e kʼo wi che ri congregación. Weneʼ kʼo jujun chke ri qachalal qas ta kkaj kechʼaw chrij ri kkinaʼo, are kʼu sibʼalaj utz we kqatas qatiempo rech kqataʼ chke ri kikotemal kinaʼom pa ri utinamit ri Jehová y keqatatabʼej are chiʼ kechʼawik.

12. ¿Jas kojkunik keqariq pa ri qacongregación?

¹² Kqamay riʼ are chiʼ kqilo che pa ri qacongregación e kʼo qachalal ri kkiya jun utzalaj kʼutbʼal re sukʼilal chqawach. Jun qachalal ixoq aj Estados Unidos re ri congregación Nueva Jersey, Harriette ubʼiʼ, xupatanij ri Jehová rukʼ sukʼilal pa kʼi junabʼ. Xbʼek jawiʼ kʼo wi ri ral. Ri e qachalal re ri kʼakʼ congregación xkitas kitiempo rech xketaʼmaj más uwach y xkilo che sibʼalaj nim ubʼanik. Ri areʼ xutzijoj ri xukʼulmaj pa ukʼaslemal che utzijoxik ri utzij ri Dios pa taq ri junabʼ veinte, are chiʼ kʼateʼ xretaʼmaj ri qas kukʼut ri Biblia. Xubʼij chke ri qachalal che pa taq riʼ ri tiempo amaqʼel krukʼaj jun cepillo re chʼajbʼal uware, rumal che kuchomaj weneʼ xaq kʼateʼ kkʼam bʼi pa cárcel. Y jeʼ xkʼulmatajik, pa ri 1933 kamul xchap bʼik. Are chiʼ kʼo pa cheʼ, ri rachajil che Testigo taj, xerilij ri oxibʼ kalkʼwal. Ri e qachalal nim chi kijunabʼ junam rukʼ ri qachalal Harriette taqal chke che nim keqil wi.

13. ¿La nim kibʼanik ri qachalal nim chi kijunabʼ pa ri utinamit ri Jehová y jasche?

¹³ Ri qachalal nim chi kijunabʼ sibʼalaj nim kibʼanik pa ri utinamit ri Jehová. Kilom jas ubʼanom ri Jehová che utewchixik ri utinamit xuqujeʼ che kitewchixik e areʼ. Nim ketaʼmam chrij ri jastaq che utz taj xkibʼan ojer. Rumal laʼ nim chqilaʼ wi ri kinojibʼal y chqakojoʼ pa qakʼaslemal ri kkikʼut chqawach (Prov. 18:4). We kqatas qatiempo che retaʼmaxik más kiwach, kkowir ri qakojonik y kqetaʼmaj kʼi jastaq chkij.

14. ¿Jas pixabʼ kuya Deuteronomio 32:7 chke ri alabʼom alitomabʼ?

¹⁴ Chqakojoʼ qachuqʼabʼ rech kojtzijon kukʼ ri e qachalal nim chi kijunabʼ (chasikʼij uwach Deuteronomio 32:7). Weneʼ qas ta kekaʼy chik, xaq nojimal kebʼin chik y qas ta ktataj chi ri kkibʼij. Are kʼu,  kʼo utz taq bʼantajik kukʼ y kbʼix «utzalaj tzijol» chkij o keqaj chuwach ri Jehová (Ecl. 7:1). Chnaʼtaj chqe che nim keʼil wi rumal ri Jehová, rumal laʼ nim cheqilaʼ wi oj. Chqabʼanaʼ qe ri xubʼan ri Eliseo, pa ri kʼisbʼal qʼij che xkʼojiʼ rukʼ ri Elías, oxibʼ mul xubʼij wariʼ che: «Kintas ta wibʼ che la» (2 Rey. 2:2, 4, 6).

15. ¿Jas kojkunik kqataʼ chke ri e qachalal nim chi kijunabʼ?

¹⁵ Kojkunik kqakʼutu che qas nim keqil wi ri qachalal are chiʼ rukʼ utz taq tzij kqabʼan preguntas chke (Prov. 1:5; 20:5). Jun kʼutbʼal, kojkunik kqataʼ wariʼ chke: «Are chiʼ kʼa majaʼ na la, ¿jas xtoʼw la che uchʼobʼik che qas are ri utinamit ri Dios xriq la?», «¿Jas jastaq qebʼsanaq la rukʼ ri Jehová?», «¿Jas toʼwinaq la rech yaʼom ta kan la upatanexik ri Jehová rukʼ kikotemal?» (1 Tim. 6:6-8). Tekʼuriʼ, chqatatabʼej ri kkibʼij chqe.

16. Are chiʼ jun ala jun ali ktzijon rukʼ jun qachalal nim chi ujunabʼ, ¿jasche e kebʼ kkiyalaʼ kichuqʼabʼ?

¹⁶ Are chiʼ jun ala jun ali ktzijon rukʼ jun qachalal nim chi ujunabʼ, e kebʼ kkiyalaʼ kichuqʼabʼ (Rom. 1:12). Ri kʼa majaʼ na qas krilo che ri Jehová keʼuchajij ri e sukʼ taq upatanelabʼ. Y ri nim chi ujunabʼ kunaʼo che sibʼalaj kajawaxik y kkikotik are chiʼ kutzijoj ri tobʼanik yaʼom che rumal ri Jehová.

17. ¿Jasche ri qachalal nim chi kijunabʼ sibʼalaj nim keʼil rumal ri Jehová are chiʼ kqʼax kʼi junabʼ?

¹⁷ Are chiʼ krijobʼ jun winaq kkʼis ri uchuqʼabʼ y ri ujeʼlikal. Are kʼu ri más nim ubʼanik chuwach ri Jehová are ri kisukʼilal ri upatanelabʼ (1 Tes. 1:2, 3). ¿Jasche? Rumal che pa kʼi junabʼ kiyaʼom bʼe rech kkʼam kibʼe rumal. We kqetaʼmaj más kiwach ri e loqʼalaj taq qachalal nim chi kijunabʼ y we kqetaʼmaj más jastaq chrij ri kikʼutbʼal, sibʼalaj nim keqil wi.

18. ¿Jas kqil na pa ri jun chi kʼutunem?

¹⁸ Are kʼu, rech kkowir ri kikojonik ri e qachalal xaq xiw ta rajawaxik che ri alabʼom alitomabʼ nim kekil wi ri nim chi kijunabʼ, xaneʼ xuqujeʼ ri nim chi kijunabʼ rajawaxik nim kekil wi ri kʼa e majaʼ na. Pa ri jun chi kʼutunem kqil na jas ri kkibʼan ri nim chi kijunabʼ rech nim kekil wi ri alabʼom alitomabʼ pa ri congregación.