1, 2. a) Proverbios 16:31-pi nishca shinaca ¿mayorlla huauqui panicunataca ima shinataj valorana canchij? b) ¿Cai yachaipica ima tapuicunatataj ricushun?

DIAMANTE rumicunaca valishcami can. Pero pambamanta mana llujchishpa, mana pꞌichajpi, mana alajata allichijpica imapaj mana valishca shinami ricurin. Chaimantami huaquincunaca diamante rumi paicunapaj cꞌuchullapi cajpipish mana cuentata cuncuna.

² Mayorlla huauqui panicunaca diamante rumi shina valishcacunami can. Diospaj Shimipica yuyajlla huauqui panicunapaj yurajlla ajchacunaca shuj sumaj corona shinami can ninmi (Proverbios 16:31-ta liyipai; 20:29). Maipica mayorlla huauqui panicuna valishca cashcata cuentata cunaca mana facilchu can. Pero joven huauqui panicuna, mayorlla huauqui panicunata valorajcunaca paicunamantami achcata beneficiarincuna. Cai yachaipica cai tapuicunatami yachashun. ¿Jehová Diospajca mayorlla huauqui panicunaca imamantataj valishca can? ¿Paicunaca imamantataj Diospaj organizacionpica valishca can? ¿Mayorlla huauqui panicunapaj ejemplomanta yachashpaca ima shinataj beneficiarishun?

3. Salmo 92:12 al 15-pi nishca shinaca ¿Jehová Diosca imamantataj mayorlla huauqui panicunataca valoran?

³ Jehová Diospajca mayorlla huauqui panicunaca valishcami can. Yayitu Diosca paicuna ima shina cajta, ima cualidadcunata charijtaca allimi yachan. Mayorlla huauqui panicuna jovencunaman paicunapaj experienciamanta parlashpa yachachijpica Yayitu Diosca cushillami sintirin (Job 12:12; Proverbios 1:1-4).  Shinallataj paita sirvingapaj ahuantashcatapish achcatami valoran (Malaquías 3:16). Mayorlla huauqui panicunaca problemacunata charishpapish paicunapaj fetaca Jehová Diospimi sinchiyachishcacuna. Paicunaca Diosta rijsi horasmantaca Dios cusha nishcacunapipish paicunapaj fetami sinchiyachishcacuna. Jehová Diospaj shutitapish mayoryangacamami gentecunaman predicashpa catishcacuna. Chaimantami Jehová Diosca paicunataca achcata cꞌuyan (Salmo 92:12-15-ta liyipai).

4. ¿Mayorlla huauqui panicunaca imamantataj mana desanimarina can?

⁴ Mayorlla huauqui panicuna cancuna Jehová Diosta sirvingapaj esforzarishcataca paica manataj cungaringachu (Hebreos 6:10). Cancunaca predicashpaca Jehová Diostami cushichishcanguichij. Llaquicunatapish ahuantashpami Yayitu Diospaj mandashcacunataca difindishcanguichij. Shinallataj Diospaj mingashca responsabilidadcunatapish allimi pajtachishcanguichij, shujtajcunatapish yachachishpami ayudashcanguichij. Jehová Diospaj organizacionpi ima cambiocuna tiyajpipish cushillami chasquishcanguichij. Tiempo completopi sirvij huauqui panicunatapish Yayitu Diosta ashtahuan sirvichunmi animashcanguichij. Chaimantami Diosca paita sirvingapaj esforzarishcamantaca manataj saquishachu nin (Salmo 37:28). Ashtahuancarin: “Cancuna puzujlla uma tucungacamapish ñucallatajmi charirasha” ninmi (Isaías 46:4). Chaimanta: “Ñami mayorlla canchij, Diospaj organizacionpica mana tanto sirvi tucushunchu” nishpaca ama yuyaichijchu. Cancunaca Jehová Diospajca valishcami canguichij.

5. ¿Mayorlla huauqui panicunaca imatataj mana cungarina can?

⁵ Mayorlla huauqui panicunaca Diospaj organizacionpimi ayudai tucuncuna. Paicunaca ñaupa layaca manachari fuerzata charincuna. Shinapish paicunapaj experienciahuanmi ayudai tucuncuna. Ñaupa punllacunapi shina, cunan punllacunapipish mayorlla huauqui panicunata Jehová Dios ima shina utilizashcatami ricushun.

6, 7. ¿Ñaupa punllacunapica Jehová Diosca paita sirvij mayorlla runacunataca ima shinataj bendiciarca?

⁶ Bibliapica mayorlla huauqui panicuna  Jehová Diosta sirvinata manataj saquishcatami parlan. Por ejemplo, Moisesca 80 huatacunata charishpami profeta tucurca. Shinallataj israelitacunata pushaj tucurca. Danielpish casi 90 huatacunata charishpapish Jehová Diostami profeta shina sirvishpa catirca. Apóstol Juanpish 90 yalli huatacunata charishpami Apocalipsis librota Jehová Diospaj ayudahuan quillcarca.

⁷ Diosta sirvijcunamanta huaquincunaca mana tanto rijsishcachu carca. Por ejemplo, Bibliapica “cashcata ruraj, Diosta manchaj” Simeonmantaca mana tanto parlanchu. Pero Jehová Diosca paitaca allimi rijsirca. Chaimantami Jesús huahuaraj cajpi Simeontaca ricuchun saquirca. Shinallataj Jesusmanta, paipaj mamamanta shuj profeciata huillachunmi ayudarca (Lucas 2:22, 25-35). Ana huarmipish profetami carca. Paica 84 huatacunata charishpa, viuda cashpapish Diospaj templopimi siempre pasaj carca. Shinallataj Diosca Anataca Jesús huahuaraj cajpi paita ricuchunmi saquirca. Simeonpish, Anapish Yayitu Diospajca valishcami carcacuna (Lucas 2:36-38).

8, 9. ¿Viuda panicunaca ima shinataj Diospaj organizacionpi apoyashpa caticuncuna?

⁸ Cunan punllacunapish mayorlla huauqui panicunaca jovenlla huauqui panicunapajmi alli ejemplocuna can. Pani Lois Didurpaj experienciamanta yachashun. Paica 21 huatacunata charishpami Canadapi precursora especial tucurca. Qꞌuipaca paipaj cusataca congregacioncunata visitachunmi invitarca. Paipaj cusahuanca Canadapi saquirij Betelpimi 20 huatacunata Yayitu Diosta sirvircacuna. Pani Lois 58 huatacunata charijpica Ucraniapi sirvichunmi invitarcacuna. ¿Paicunaca ‘ñami mayorlla canchij, chai llajtaman rinaca sinchimi canga nishpachu’ yuyarcacuna? Mana. Ashtahuanpish chaiman rinatami decidircacuna. Paipaj cusa Johntaca Comité de Sucursalpi sirvichunmi invitarcacuna. Siete huatacuna qꞌuipaca paipaj cusaca huañurcami. Pero paica Ucrania llajtapi Yayitu Dios mingashca asignaciontami pajtachirca. Cunanca pani Loisca 81 huatacunatami charin. Paica Jehová Diostami Ucrania llajtapi saquirij Betelpi cushilla sirvishpa caticun. Paitaca tucui huauqui panicunami achcata cꞌuyan.

⁹ Huaquin panicunaca paicunapaj cusacuna causacujpica rijsishcami can. Pero cusacuna huañujpica pani Lois shinachari tal vez ña mana tanto rijsishcacuna can. Chashna cajpipish paicunapaj cusacuna causacujpi Yayitu Diosta sirvichun achcata apoyashcamantami Jehová Diosca achcata valoran (1 Timoteo 5:3). Paicunaca jovenlla huauqui panicunatapish Yayitu Diosta sirvichunmi animancuna.

10. ¿Tonypaj ejemplomantaca imatataj yachanchij?

¹⁰ Huaquin mayorlla huauqui panicunaca mayorcunata cuidana huasipimi causancuna. Paicunaca tucuicunami ñucanchijpajca valishca can. Pensilvaniamanta Tony shuti huauquica 1942 huatapimi 20 huatacunata charishpa bautizarirca. Tiempo qꞌuipaca paitaca militarpi sirvinaman richunmi obligarcacuna. Pero paica  mana risha nircachu. Chaimi paitaca ishqui huatacuna yallita carcelpi churarcacuna. Tonyca paipaj huarmi Hildahuanmi ishqui huahuacunataca Diosmanta yachachishpa huiñachircacuna. Huaquin huatacunataca huauqui Tonytaca quimsa congregacioncunapi tiyaj ancianocunata pushaj cachunmi agllarca. Jatun tandanacuicunapipish pushaj cachunmi agllarca. Shinallataj paica tandanacuicunapipish pushajmi carca. Paica carcelcunapipishmi Bibliamanta yachachij carca. 98 huatacunata charishpapish paica Jehová Diostami achcata sirvingapaj esforzarishpa caticun. Shinallataj congregacionpipish sinchitami apoyacun.

11. ¿Mayorcunata cuidana huasipi causaj huauqui panicunataca ima shinataj valorashcata ricuchinchij?

¹¹ ¿Mayorcunata cuidanapi causaj mayorlla huauqui panicunataca ima shinataj valorashcata ricuchinchij? Mayorlla huauqui panicuna tal vez huillanaman llujshichun, tandanacuicunaman richun, tandanacuicunata uyachunca anciano huauquicunami ayudai tucuncuna. Ñucanchijpish mayorlla huauqui panicunata visitangapaj, videollamadata rurangapajmi tiempota surcuna canchij. Maijan huauqui panicunaca mayorcunata cuidana huasipi cashcamantami congregacionmanta carupi causancuna. Paicunamantaca manataj cungarinachu canchij. Maijancunapajca paicunapaj causaimanta parlanaca sinchimi can. Mayorlla huauqui panicunaca Diospaj organizacionpi sirvishpami alaja experienciacunata charishcacuna. Paicunamanta yachashpaca ñucanchijca cushillami sintirishun.

12. ¿Congregacionpi mayorlla huauqui panicunata rijsingapajca imatataj rurana canchij?

¹² Congregacionpi Jehová Diosta sirvij mayorlla huauqui panicunata rijsishpaca paicunamantami achcata beneficiarishun. Por ejemplo, Estados Unidosmanta pani Harrietteca achca huatacunatami Jehová Diostaca paipaj congregacionpi sirvirca. Qꞌuipaca paica paipaj ushushihuanmi shujtaj ladopi causanaman rirca. Shujtaj congregacionman chayajpica huauqui panicunaca paimanta rijsingapajmi tiempota surcurcacuna. Pani Harrietteca casi 1925 huatapi Yayitu Diosta ima shina rijsishcata, Yayitu Diosmanta ima shina predicashcatami huauqui panicunaman parlarca. Paica chai punllacunapica predicanaman llujshishpaca tal vez ñataj prezuman apanman nishpami quirucunata maillana cepillota apashpa llujshij carca. 1933 huatapica paitaca ishqui cutinmi shuj semanata carcelpi churarca. Pai carcelpi cai horasca paipaj cusa mana testigo de Jehovami paipaj quimsa huahuacunata cuidashpa ayudarca. Chaimanta mayorlla huauqui panicunatapish pani Harriette shina Yayitu Diosta sirvingapaj esforzarishcamantami valorana canchij.

13. ¿Mayorlla huauqui panicuna Diospaj organizacionpaj valishca cashcataca ima shinataj yachanchij?

¹³ Mayorlla huauqui panicunaca Jehová Diospajpish, paipaj organizacionpajpish valishcami can. Paicunaca Yayitu Dios paipaj organizacionta ima shina bendiciashcatami ricushcacuna. Pandarishpapish imapi mejoranatami yachashcacuna. Paicunapaj alli experienciacunamanta yachangapaj esforzarishunchij (Proverbios 18:4). Paicunata ashtahuan alli rijsishpaca ñucanchij fetami sinchiyachishun.

14. ¿Deuteronomio 32:7-mantaca jovencunaca imatataj yachai tucuncuna?

¹⁴ Mayorlla huauqui panicunahuan parlangapaj tiempota surcushunchij (Deuteronomio 32:7-ta liyipai). Paicunaca manachari jovenpi laya alli ricuncuna, sinchita purincuna o sinchita parlancuna. Pero paicunaca Jehová Diostami shungumanta sirvishpa catincuna. Diospajpish rijsishcami cancuna (Eclesiastés 7:1). Jehová Diosca paicunataca achcatami valoran.  Ñucanchijpish chashnallatajmi valorana canchij. Eliseoca Elías mayorlla cajpi, último punllapi cajpica cantaca manataj saquishachu nishpami quimsa cutin nirca (2 Reyes 2:2, 4, 6).

15. ¿Mayorlla huauqui panicunataca imacunatataj tapuna canchij?

¹⁵ Mayorlla huauqui panicunapaj experienciamanta yachangapajca respetohuan tapushunchij (Proverbios 1:5; 20:5; 1 Timoteo 5:1, 2). Por ejemplo: “¿Jovenraj cashpaca ima shinataj Jehová Diosta rijsircangui? ¿Diospajman ashtahuan cꞌuchuyangapajca imatataj rurarcangui? ¿Jehová Diosta cushilla sirvishpa catingapajca imataj ayudarca?” nishpami tapuna canchij (1 Timoteo 6:6-8). Paicuna parlajpica allimi uyana canchij.

16. ¿Shuj jovenlla huauqui, shuj mayorlla huauquihuan parlanacushpaca imamantataj ishquindij animarishca sintirincuna?

¹⁶ Jovenlla huauqui, mayorlla huauquihuan parlashpaca ishquindijmi animarishca sintiringacuna (Romanos 1:12). Jovenlla huauquica Diosta sirvijcunata Jehová Dios ima shina cuidashcatami tucui shunguhuan cringa. Mayorlla huauquica paimanta preocuparishcatami cuentata cunga. Mayorlla huauqui panicuna Jehová Dios paicunata bendiciashcata jovencunaman parlajpica Diosca cushillami sintiringa.

17. ¿Mayorlla huauqui panicunaca imamantataj tiempo pasajpipish paicunaca valishca can?

¹⁷ Mayorcunaca ña mana jovencuna shinachu can. Pero paicunaca Yayitu Diosta sirvinata manataj saquishcamantami huatacuna pasajpipish Jehová Diospajca valishca can (1 Tesalonicenses 1:2, 3). Paicunaca achca huatacunatami Yayitu Dios paipaj espíritu santohuan yachachichun saquishcacuna. Chaimanta mayorlla huauqui panicunata ashtahuan rijsishpaca paicunatami valorashun. Paicunamantapish achcatami yachashun. Chaicunata rurashpaca paicunataca shuj valishca diamante rumita shinami ricushun.

18. ¿Catij yachaipica imatataj yachashun?

¹⁸ Jovencunapish mayorcunapish, paicunapura valoranacushpaca congregaciontami achcata beneficiangacuna. Catij yachaipica mayorlla huauqui panicunapish jovenlla huauqui panicunata congregacionpi ima shina valorana cashcatami yachashun.