1-2. (a) Eaa ta Maseli 16:31 e akakite maira no runga i te aronga pakarikari? (e) Eaa te au uianga te ka pauia i roto i teia atikara?

PENEI ka kite te au turoto i te taimana i runga i te one me aere ratou ki Arkansas, i Marike. Inara kare teia au taimana i tipuia e i akamaneaia. Te ka tupu, ka aere ua atu rai te tangata e kare ratou e kite e e taimana te reira.

² Kua aite te au taeake e te au tuaine pakarikari ki teia au taimana; e mea akaperepereia ratou. Kua akaaite te tuatua a te Atua i to ratou rouru inaina ki te korona. (E tatau ia Maseli 16:31; 20:29) Inara, penei ka māmā ua i te akangaropoina i teia au taeake akaperepere. Te au mapu tei kite i teia aronga pakarikari, ka rauka ia ratou i tetai apinga meitaki atu i te au mea materia. I roto i teia atikara, ka pau tatou e toru uianga: Eaa a Iehova i akaperepere ei i teia aronga pakarikari? Eaa ratou i puapinga ai i roto i to Iehova akaaerenga? Eaa ta tatou ka rave kia puapingaia mei to ratou akaraanga?

3. Ia Salamo 92:12-15, eaa a Iehova i akaperepere ei i te aronga pakarikari?

³ E akaperepere ana a Iehova i te aronga pakarikari. Kua kite meitaki aia ia ratou e te akaperepere ra aia i to ratou au tu manea. E mareka ana aia me oronga te aronga pakarikari ki te au mapu, te kite pakari ta ratou i rauka mai mei te tavini anga ia Iehova. (Iobu 12:12; Mase. 1:1-4) E akaperepere katoa ana a Iehova i to ratou tu akakoromaki. (Mala. 3:16) Maata to ratou au manamanata;  kare ra to ratou akarongo ia Iehova i paruparu. Kua ketaketa atu to ratou manakonakoanga mei te tuatau i apii ei ratou i te tuatua mou. Inangaro maata a Iehova ia ratou no te mea te akakite aere nei rai ratou i tona ingoa i to ratou “ruaine anga.”​—E tatau ia Salamo 92:12-15.

4. Eaa te ka akamaroiroi i to tatou au taeake e te tuaine pakarikari?

⁴ Me te pakarikari atura koe, ka papu ia koe e kare rava e ngaropoina ia Iehova te au angaanga taau i rave ana. (Ebe. 6:10) Kua rave maroiroi koe i te angaanga tutu aere, e kua akamareka koe i toou Metua i te rangi. Kua akakoromaki koe i te au timataanga​—te au tu taitaia tikai​—kua turu i te au kaveinga Pipiria, kua rave i te au apainga puapinga, e kua tereni atu i tetai ke. Kua tauta koe i te rave i taau ka rauka noatu te au taui anga e manganui a te akaaerenga o Iehova. Kua tauturu e kua akamaroiroi koe i tetai ke kia tavini tamou ia Iehova. Inangaro maata a Iehova ia koe no toou tu tiratiratu. Taputou aia e kare rava aia e “akaruke i tona au tavini tiratiratu”! (Sala. 37:28, NW) Teia tana i akapapu mai: “E tae ua atu ki te inaina anga o to kotou upoko naku kotou e apai.” (Isa. 46:4) No reira, auraka e manako e no te mea kua pakarikari koe, kare oou puapinga i roto i to Iehova akaaerenga. Te tika, e apainga puapinga taau!

5. Eaa ta te aronga pakarikari ka akamaara?

⁵ E maata ta te aronga pakarikari ka rauka i te rave. Noatu kare ratou e maroiroi ana mei te taime mua, e maata ra ta ratou i kite mai i roto i ta ratou tavinianga. Ka rauka rai ia Iehova i te taangaanga ia ratou, mei ta tatou ka kite mai i roto i te au akaraanga i taito e i teia tuatau.

6-7. Oronga mai i tetai akaraanga no te aronga pakarikari tei akameitakiia no to ratou tu tiratiratu?

⁶ E maata te au akaraanga i roto i te Pipiria no te aronga tei tavini maroiroi atu ia Iehova e tae ua atu ki to ratou ruaine anga. Ei akaraanga, e 80 o Mose  mataiti, i tavini ei aia ia Iehova ei peroveta e ei arataki no te ngati Iseraela. Kua taangaanga a Iehova ia Daniela ei peroveta, penei te tae anga tona mataiti ki te 90 tuma. Pera katoa, penei e 90 tuma o te apotetoro ko Ioane mataiti, te akauruia anga aia kia tata i te puka o Apokalupo.

⁷ Maata katoa te au tavini tiratiratu kare o ratou turanga rongonui, e penei ka akangaropoinaia ratou. Noatu rai, kua kite a Iehova ia ratou e kua akameitaki ia ratou no to ratou tu tiratiratu. Ei akaraanga, kua taiku potoia te tangata “akono i te Atua, e te tuatua tika” ko Simeona i roto i te Pipiria, noatu ra kua kite meitaki a Iehova iaia e kua oronga kiaia i te tikaanga kia kite mata i te pepe ko Iesu e kua totou katoa no runga iaia e tona metua vaine. (Luka 2:22, 25-35) Akamanako katoa i te peroveta vaine takaua ko Ana. E 84 ona mataiti, inara “kare rava aia i akaruke i te iero.” Kua “tae putuputu aia ki te uipaanga” e kua akameitaki katoaia aia na te kite mata anga i te pepe ko Iesu. Kua akaperepere a Iehova ia Simeona e Ana.​—Luka 2:36-38.

8-9. Eaa ta tetai tuaine takaua i rave ua atu i roto i to Iehova akaaerenga?

⁸ I teia tuatau, e maata te aronga pakarikari tei akanoo i te akaraanga meitaki no te au mapu. Akamanako i tei tupu ki te tuaine ko Lois Didur. E 21 ona mataiti te akamataanga aia i te tavini ei painia takake i Kanata. I muri ake, kua tavini raua ko tana tane, ko John, i roto i te angaanga akaaere tutaka. I muri mai, kua tavini raua i ko i te Betela i Kanata tere atu e 20 mataiti. Te tae anga to Lois mataiti ki te 58, kua patiia raua ko John kia tavini i Ukraine. Eaa ta raua ka rave? Ka manako ainei raua e kua ruaine roa raua no te tavini i tetai enua ke? Kua āriki raua i teia patianga, e kua ikiia a John kia tavini ki runga i te Kumiti Betela i reira. E itu mataiti i muri mai, kua takake atu a John, e kua iki a Lois kia angaanga ua atu rai i reira. I teianei, e 81 o Lois mataiti, e te angaanga nei rai aia ei tuaine inangaroia i Betela, i Ukraine.

⁹ Penei kare e kitea maata akaouia te au vaine takaua mei ia Lois rai mei te tuatau e ora ra ta ratou tane; inara, noatu te tu takaua, te akaperepere ra rai a Iehova ia ratou. Akaperepere maata a Iehova i te au tuaine tei turu i ta ratou tane no tetai tuatau roa, e te maroiroi nei rai i te tavini iaia. (1 Timo. 5:3) E kua akamaroiroi katoa ratou i te au mapu.

10. Eaa te akaraanga meitaki ta Tony i akanoo?

¹⁰ Akaperepere maata katoa ana a Iehova i te au taeake tiratiratu i roto i te au are no te aronga ruaine. Ei akaraanga, e noo ana te taeake ko Tony ki roto  i tetai o teia are. Kua papetitoia aia i Pennslyvania, Marike, ia Aukute 1942, e 20 ona mataiti. Kare i roa i muri mai, kua tiriaia aia ki roto i te are auri no tetai rua e te apa mataiti no tei kore aia i piri ki te tamaki. Kua utuutu mai aia e tana vaine ko Hilda e rua tamariki i roto i te tuatua mou. Kua tavini ana a Tony ei taeake akaaere i roto e toru putuputuanga (kapikiia i teianei e taeake tauturu no te pupu aronga pakari), e ei akaaere no te akaputuputuanga kotinga. Kua rave aia i te au uipaanga e te au apii Pipiria i roto i te are auri. E 98 ona mataiti i teianei, e kare aia i akamarie mai i tana angaanga. Te tavini maroiroi nei rai aia ia Iehova e te putuputuanga!

11. Akapeea tatou me akaperepere i te aronga pakarikari i roto i te are o te aronga ruaine?

¹¹ Akapeea tatou me akangateitei i te aronga pakarikari i roto i te are o te aronga ruaine? Ka rauka i te aronga pakari i te kapiti mai ia ratou ki roto i te angaanga a te putuputuanga. Ka atoro tatou ia ratou, me kore ka komakoma na runga i te vitio karangaranga. Ka akono tatou i te aronga te noo mamao ra mei ta ratou putuputuanga. Me kare tatou e rave i teia, ka ngaropoina ia tatou teia aronga pakarikari. Penei kare i te māmā no ratou kia tuatua no runga i to ratou turanga. Inara ka puapingaia tatou me pukapuka tatou kia ratou e me akarongo i te au tupuanga mataora ta ratou i kite i te tavini anga ia Iehova.

12. Eaa ta tatou ka kite i roto i te putuputuanga?

¹² Penei ka poitirere koe i te kite e e au akaraanga meitaki to te aronga pakarikari i roto i taau putuputuanga. Kua tavini tiratiratu tetai tuaine ko Harriette ia Iehova no tetai tuatau roa i New Jersey, Marike. I muri mai, kua neke atu aia kia noo i ko i tana tamaine. Kua akaoaoa te au taeake i roto i tana putuputuanga ou kiaia e kua kite mai i tana au angaanga meitaki i rave. Kua riro tona au tupuanga no te angaanga tutu aere i te au mataiti o te 1920 i te akamaroiroi ia ratou. I tera tuatau, e apai ua ana aia i tetai uru nio me aere aia i te tutu aere​—penei ake ka apainaia aia e te akava. Te tika, e rua ona taime te tiriaia anga ki roto i te are auri i te 1933. Iaia i reira, kua akono meitaki tana tane, kare i te Kite, i ta raua tamariki e toru. Ka akaperepere tatou i te aronga pakarikari tiratiratu mei ia Harriette rai!

13. Eaa ta tatou i kite mai no runga i te aronga pakarikari i roto i te akaaerenga a Iehova?

¹³ E puapinga te aronga pakarikari i roto i te akaaerenga a Iehova. Kua kite ana ratou akapeea a Iehova i te akameitaki anga i tona akaaerenga e ia ratou katoa. E maata te au apiianga puapinga ta ratou i kite mai mei te au tarevake ta ratou i rave. Mei te “punavai o te pakari ra” ratou, no reira kia apii mai tatou i to ratou kite. (Mase. 18:4) Me akapou koe i tetai tuatau kia komakoma kia ratou, ka akamatutuia toou akarongo e ka maata taau ka apii mai!

14. Eaa te akamaroiroi anga no te au mapu i roto ia Deuteronomi 32:7?

¹⁴ E aere tatou e komakoma ki te au aronga pakarikari. (E tatau ia Deuteronomi 32:7.) Penei kua poepoe to ratou mata, kua marie mai ta ratou aere, e kua paruparu te tangi o to ratou reo, inara te maroiroi ra rai to ratou ngakau e e ingoa meitaki to ratou i mua ia Iehova.  (Kohe. 7:1) E akamaara i te tumu i akaperepere ei a Iehova ia ratou. E akangateitei ia ratou. Mei ia Elisaia rai, kua noo vaitata aia ki te pae ia Elia. E toru taime kua tuatua a Elisaia: “Kare au e akaruke ia koe.”​—2 Ari. 2:2, 4, 6.

15. Eaa te au uianga ka ui tatou ki te aronga pakarikari?

¹⁵ Akaari i te tu aroa ki te aronga pakarikari na te komakoma anga kia ratou. (Mase. 1:5; 20:5; 1 Timo. 5:1, 2) E ui i teia au uianga: “I toou mapu anga, eaa tei akapapu e kua kitea e koe te tuatua mou?” “Akapeea te au mea tei tupu i te akavaitataanga ia koe kia Iehova?” “Eaa tei tauturu ia koe kia vai mataora ua i te tavini anga ia Iehova?” (1 Timo. 6:6-8) E oti, akarongo meitaki ki ta ratou tua.

16. Akapeea tetai tangata pakarikari e tetai mapu e puapingaia ai me pukapuka raua?

¹⁶ Me pukapuka tetai tangata pakarikari e tetai mapu, ka puapingaia raua roa ai. (Roma 1:12) Ka maata atu te tu mareka o te au mapu no te tu e akono ana a Iehova i tona au tavini tiratiratu, e ka akangateiteiia te tangata pakarikari. Ka mataora aia i te akakite i te au akameitakianga ta Iehova i oronga kiaia.

17. Eaa te tumu ka vai manea ua atu rai te aronga pakarikari tei vai tiratiratu?

¹⁷ E ngaro ana te kopapa manea me ruaine tetai tangata, inara ka manea ua atu rai te aronga tei vai tiratiratu kia Iehova. (1 Tesa. 1:2, 3) Eaa ra te tumu? No te mea kua akatupu te vaerua o te Atua i te au tu manea i roto ia ratou. Te maata atu ta tatou ka apii mai mei te au taeake pakarikari e te akangateitei ia ratou, ka akaperepere maata atu tatou ia ratou!

18. Eaa ta tatou ka uriuri i roto i te atikara ka aru mai?

¹⁸ Ka matutu atu te putuputuanga me akaperepere te au mapu i te aronga pakarikari e me akaperepere katoa te aronga pakarikari i te au mapu. I te atikara ka aru mai, ka uriuri tatou akapeea te aronga pakarikari me akaperepere i te au mapu i roto i te putuputuanga.