1-2. (a) I le Faataoto 16:31, o le ā le auala e tatau ona tatou vaai ai i o tatou uso ma tuafāfine matutua faamaoni? (e) O ā fesili o le a tatou taliina i lenei suʻesuʻega?

E IAI se nofoaga matagofie e tafafao ai tagata i Arkansas i Amerika e maua ai taimane. Peitaʻi, e faigatā ona iloa e tagata na taimane e ui lava ina latou vāai i ai. O le toʻatele la o tagata e savavali lava e aunoa ma lo latou iloaina o mea o loo vāai i ai, o ni maa tāua.

² E pei o tatou uso ma tuafāfine matutua faamaoni o na taimane tautele. Ua faatusa e le Afioga a le Atua o latou lauao sinasina o se pale matagofie. (Faitau le Faataoto 16:31; 20:29) E faigofie lava ona tatou lē amanaʻiaina o tatou uso ma tuafāfine matutua. E maua e talavou aogā e sili atu i lo o ʻoa faaletino, pe a latou amanaʻia le tāua o uso ma tuafāfine matutua. O le a taliina i lenei suʻesuʻega ni fesili se tolu: Aiseā e silasila ai Ieova i uso ma tuafāfine matutua faamaoni o ni maa tāua tautele? Aiseā e matuā tāua ai uso ma tuafāfine matutua i le faalapotopotoga a Ieova? O le ā e tatou te faia ina ia aogā atoatoa ai a latou faaaʻoaʻoga iā i tatou?

3. E tusa ai o le Salamo 92:12-15, aiseā e matuā tāua ai iā Ieova uso ma tuafāfine matutua faamaoni?

³ E matuā tāua iā Ieova le Atua o tatou uso ma tuafāfine matutua faamaoni. E silafia e Ieova ituaiga tagata moni e iai i latou, ma e tāua iā te Ia o latou uiga matagofie. E fiafia le finagalo o Ieova, pe a faasoa e tagata matutua i talavou le atamai ua latou maua mai i le tele o tausaga o latou auauna faamaoni  iā Ieova. (Iopu 12:12; Faata. 1:1-4) E matuā tāua foʻi iā Ieova lo latou tumau faamaoni. (Mala. 3:16) E ui i le tele o luʻi na latou fesagaʻia, ae e leʻi maluelue ai lo latou faatuatua iā Ieova. Ua matuā faamalosia lo latou faamoemoe mo le lumanaʻi talu mai le taimi na latou aʻoaʻoina ai le upu moni. E alofa Ieova iā i latou, ona o loo latou faalauiloa atu pea lona suafa seʻia oo lava “ina ulusinā.”​—Faitau le Salamo 92:12-15.

4. O le ā e mafai ona faalaeiauina ai o tatou uso ma tuafāfine matutua?

⁴ Pe afai ua faasolo ina matua lou soifua, ia mautinoa e lē galo iā Ieova au galuega faamaoni. E matuā faafiafiaina lo tatou Tamā i le lagi, ona o lou maelega i le lagolagoina o le galuega talaʻi. Ua e onosaia faafitauli e aofia ai faafitauli ogaoga, pipii i tapulaa amiotonu a le Tusi Paia, faatino le tele o tiute tauave tāua ma toleni isi. Ua e faia le mea sili e faamasani ai i le tele o suiga ua faia e le faalapotopotoga a Ieova. Ua e lagolagoina ma faalaeiau isi o loo faaauilumaina le galuega faataimi atoa. E alofa tele Ieova le Atua iā te oe ona o lou faamaoni. (Epe. 6:10) Ua folafola mai e Ieova, “e na te lē tuua foʻi o ē e faamaoni iā te ia.” (Sala. 37:28) O lana faamautinoaga lenei iā te oe: “Ou te tauave pea le avega mamafa pe a oo foʻi ina ulusinā se tasi.” (Isa. 46:4) O lea, ia aua lava neʻi e manatu ua lē o toe tāua oe i le faalapotopotoga a Ieova ona ua matua lou soifua. Ioe, e matuā tāua oe i le faalapotopotoga a Ieova.

5. O le ā e tatau ona manatua pea e uso ma tuafāfine matutua?

⁵ E tele mea e mafai ona faia e o tatou uso ma tuafāfine matutua. E ui atonu e latou te lē o toe mauaina le malosi na iai muamua, ae o loo iā i latou le tele o le poto masani na latou maua mai i le tele o tausaga talu ona soifua. E mafai ona faaaogā pea e Ieova i latou i auala eseese e pei ona faaalia e faaaʻoaʻoga o le a tatou talanoaina.

6-7. O ā ni faaaʻoaʻoga i le Tusi Paia o tagata matutua na mauaina faamanuiaga ona o lo latou auauna faamaoni?

⁶ E tatou te maua i le Tusi Paia faaaʻoaʻoga o tagata faamaoni na auauna pea iā Ieova seʻia oo lava ina matutua. O se faaaʻoaʻoga o Mose,  ina ua 80 ona tausaga na amata ai ona auauna o se perofeta a Ieova, ma na tofia foʻi o ia e taʻitaʻia le nuu o Isaraelu. Na faaaogā pea e Ieova le perofeta o Tanielu e avea ma ana fofoga fetalai, e ui lava ua silia ma le 90 ona tausaga. E silia foʻi ma le 90 tausaga o Ioane ina ua faaaogā o ia e Ieova e tusia le tusi o Faaaliga.

⁷ E toʻatele isi auauna faamaoni a Ieova e lē iloa e le toʻatele o uso ma tuafāfine ma e faigofie lava ona lē amanaʻiaina. Ae e amanaʻia i latou e Ieova ma tauia lo latou faamaoni. O se faataʻitaʻiga, e ui e puupuu le faamatalaga a le Tusi Paia e faatatau iā Simeona le tagata “amiotonu ma amioatua,” ae na silafia e Ieova le ituaiga tagata e iai o ia. O lea, na Ia avatu ai iā Simeona le faaeaga e vaai iā Iesu a o pepe meamea, ma fai se valoaga e faatatau i le pepe ma lona tinā. (Luka 2:22, 25-35) Seʻi mafaufau foʻi i le perofeta fafine o Ana ua oti lana tane. Ua 84 ona tausaga, ae na “iai pea o ia i le malumalu.” Na faamanuia foʻi o ia e Ieova e vaai iā Iesu a o pepe meamea, ona o lona auai e lē aunoa e tapuaʻi i le malumalu. Na matuā tāua Simeona ma Ana iā Ieova.​—Luka 2:36-38.

8-9. O ā galuega tāua o loo faia pea e tuafāfine matutua ua maliliu a latou tane?

⁸ I aso nei, e toʻatele tagata matutua faamaoni ua avea ma faaaʻoaʻoga mataʻina mo talavou. Seʻi mātau le faaaʻoaʻoga a le tuafafine o Lois Didur. E na o le 21 ona tausaga ina ua amata ona auauna o se paeonia faapito i Kanata. Mulimuli ane, na la auauna ai ma lana tane o John i le galuega femalagaaʻi mo le tele o tausaga. Ina ua uma lenā, na la auauna ai i le Peteli i Kanata i le silia ma le 20 tausaga. Ina ua 58 tausaga o Lois, na valaaulia ai i laʻua ma John e auauna i Ukraine. O le ā na la faia? Pe na la manatu ua la matutua tele e auauna i se isi atunuu? Na la talia le valaaulia, ma na tofia John o se sui o le Komiti o le Lālā i Ukraine. Na maliu John i le fitu tausaga mulimuli ane ai, ma na filifili Lois e nofo pea i Ukraine. Ua 81 nei tausaga o Lois, ae o loo auauna pea o ia i le aiga Peteli i Ukraine ma e alolofa tele le aiga Peteli iā te ia.

⁹ O tuafāfine matutua faamaoni ua maliliu a latou tane e pei o Lois, atonu ua tau lē amanaʻiaina e lē pei o le taimi a o soifua a latou tane. Ae e matuā tāua pea i latou. E matuā tāua iā Ieova na tuafāfine na lagolagoina a latou tane mo le tele o tausaga, ma o loo auauna faamaoni pea e oo mai i le asō. (1 Timo. 5:3) O i latou foʻi o ni faalaeiauga moni mo talavou.

10. O le ā le faaaʻoaʻoga mataʻina na faia e le uso o Tony?

¹⁰ E toʻatele uso ma tuafāfine matutua faamaoni o loo i nofoaga e tausia ai tagata matutua ma e tāua foʻi i latou. O se faataʻitaʻiga, o se uso e igoa iā Tony o loo tausia i na nofoaga. Na papatiso o ia i Pennsylvania i Amerika iā Aokuso i le 1942 ina ua 20 ona tausaga. E leʻi umi ae ona fesagaʻia se luʻi na tofotofoina ai  lona solitū, ma na faafalepuipui ai o ia mo le lua ma le ʻafa tausaga. Na la tausia aʻe ma lana avā o Hilda se fanau e toʻalua i le upu moni. E tele tausaga na auauna ai Tony o se ovasia taʻimua (lea ua taʻua nei o le sooupu a le ʻautoeaina) i ni faapotopotoga se tolu. Na auauna foʻi o ia o se ovasia mo fonotaga matagaluega. Na asiasi foʻi o ia i se falepuipui ma faia ai sauniga ma suʻesuʻega faale-Tusi Paia. Ua 98 nei tausaga o Tony ma o loo auauna faamaoni pea o ia iā Ieova. O loo ia faia pea le mea sili na te mafaia e auauna ai iā Ieova ma galulue soosootauʻau ma ona uso ma tuafāfine i le faapotopotoga.

11. E faapefea ona tatou faaalia e tāua iā i tatou uso ma tuafāfine matutua, o loo i nofoaga e tausia ai tagata matutua?

¹¹ E faapefea ona tatou faaalia le faaaloalo i uso ma tuafāfine matutua o loo i nofoaga e tausia ai tagata matutua? E taumafai toeaina e fesoasoani iā i latou i le tele e mafai ai, ina ia auai i sauniga ma talaʻiga a le faapotopotoga. E mafai ona tatou asiasi i ai, pe talanoa foʻi iā i latou i luga o le Initaneti. E tatou te mananaʻo foʻi e tausia lelei manaʻoga o uso ma tuafāfine matutua o loo i nofoaga o tagata matutua e mamao ese mai i le faapotopotoga. E mafai ona tatou lē amanaʻia na uso ma tuafāfine matutua, pe a tatou lē mataala. O nisi o i latou atonu e faigatā ona faamatala mai mea na tutupu i la latou auaunaga. Ae e tatou te maua le tele o aogā, pe a faaalu se taimi e fesili ai iā i latou ma faalogologo lelei a o faamatala mai le olioli ua latou maua mai i le faalapotopotoga a Ieova.

12. O le ā e mafai ona tatou maua i a tatou lava faapotopotoga?

¹² Atonu e faateʻia i tatou i le iloaina, e iai foʻi uso ma tuafāfine matutua faamaoni i le tatou faapotopotoga, e mataʻina a latou faaaʻoaʻoga. E tele tausaga na auauna faamaoni ai iā Ieova le tuafafine o Harriette i lana faapotopotoga i New Jersey i Amerika. Mulimuli ane, na siitia atu le tuafafine e nonofo ma lana tama teine. Na faaalu e uso i le faapotopotoga fou a Harriette se taimi e faamasani ai iā te ia, ma na latou iloa ai ua latou mauaina se maa tāua tautele. Na matuā faalaeiauina i latou ina ua faamatala i ai e Harriette mea na tutupu i le talaʻiga, ina ua ia faatoʻā aʻoaʻoina le upu moni i le 1925. I lenā taimi, e alu le tuafafine i le talaʻiga ma ave se pulumu fulu nifo ina neʻi puʻea o ia e leoleo. O le mea lenā na tupu i le 1933, e taʻi vaiaso na loka ai o ia i le falepuipui i taimi e lua na puʻea ai o ia e leoleo. A o i ai i le falepuipui, na tausia e lana tane le la fanau lāiti e toʻatolu. E lē o se Molimau a Ieova lana tane ae na lagolagosua o ia i le tuafafine. O lea, e tatau ona tatou matuā faatāuaina uso ma tuafāfine matutua faamaoni e pei o Harriette.

13. O le ā ua tatou aʻoaʻoina e faatatau i le vaega tāua a uso ma tuafāfine matutua i le faatulagaga a Ieova?

¹³ E iai le vaega tāua a o tatou uso ma tuafāfine matutua i le faatulagaga a Ieova. Ua latou molimauina auala eseese ua faamanuia ai Ieova iā i latou ma le faalapotopotoga. Ua latou aʻoaʻoina foʻi ni lesona tāua mai i mea sesē na latou faia. Seʻi o tatou vaai iā i latou o ni “vaieli o le atamai” ma faaaʻoaʻo i a latou faaaʻoaʻoga. (Faata. 18:4) Pe a e taumafai e faaalu se taimi e iloa lelei ai i latou, o le a faamalosia ai lou faatuatua ma e aʻoaʻo mai ai le tele o mea.

14. I le Teuteronome 32:7, o le ā o loo faalaeiauina talavou e fai?

¹⁴ Ia tausolomua ona talanoa atu i o tatou uso ma tuafāfine matutua. (Faitau le Teuteronome 32:7.) E ui atonu ua faalētonu la latou vaai, telegese la latou gaoioi ma vaivai la  latou tautala, ae ua latou faia le mea sili i le auaunaga iā Ieova ma ua latou faia foʻi se “igoa lelei” ma ia. (Fai. 7:1) Ia manatua le māfuaaga e matuā tāua ai i latou iā Ieova, ma ia faaalia pea le faaaloalo iā i latou. Ia pei i tatou o Elisaia. Na matuā naunau o ia e faatasi pea ma Elia i le aso mulimuli o le la mafutaga. E faatolu ona taʻutino atu Elisaia: “Ou te lē tuua lava oe.”​—2 Tu. 2:2, 4, 6.

15. O ā fesili e tatou te ono fesili ai i uso ma tuafāfine matutua?

¹⁵ Ia faaalia le naunau moni i uso ma tuafāfine matutua e ala i le fesili atu i ai ma le agalelei. (Faata. 1:5; 20:5; 1 Timo. 5:1, 2) Ia fesili i ai: “O le ā na e mautinoa ai ua e maua le upu moni?” “Ua faapefea ona e vavalalata iā Ieova ona o mea na e tofo i ai i lou olaga?” “O le ā ua fesoasoani iā te oe e olioli ai pea i le auaunaga iā Ieova?” (1 Timo. 6:6-8) Ia faalogologo lelei a o latou faamatala mai mea na latou tofo i ai i le auaunaga.

16. E faapefea ona maua e tagata matutua ma talavou aogā, pe a fefaalaeiauaʻi le tasi i le isi?

¹⁶ Pe a fefaalaeiauaʻi se tagata matua ma se talavou, o le a la maua uma ai aogā. (Roma 1:12) O le a faateleina ai e talavou lo latou talisapaia o le auala o loo tausia ai e Ieova ana auauna faamaoni matutua, ma o le a faamamaluina ai foʻi tagata matutua. E fiafia tagata matutua e faamatala atu i talavou auala ua tauia ai i latou e Ieova.

17. Aiseā e tatou te faapea atu ai, e faateleina le aulelei o o tatou uso ma tuafāfine matutua faamaoni a o faasolo ina matutua?

¹⁷ E faasolosolo ina mou atu le aulelei faaletino pe a avea ma tagata matua, a o i latou e faamaoni iā Ieova e faateleina lo latou aulelei iā te Ia. (1 Tesa. 1:2, 3) Aiseā e moni ai lenā manatu? Talu ai ua tele tausaga o latou faatagaina le agaga o le Atua, e toleni ma atiaʻe uiga matagofie iā i latou. O le tele e tatou te iloa lelei ai uso ma tuafāfine pele matutua, faaaloalo i ai ma aʻoaʻo mai iā i latou, o le tele foʻi lenā e tatou te vaai ai iā i latou o ni maa tāua tautele.

18. O le ā o le a tatou talanoaina i le mataupu o sosoo mai?

¹⁸ O le a faamalosia le faapotopotoga, pe a fefaalaeiauaʻi uso ma tuafāfine matutua ma talavou ma faatāua e le tasi le isi. O le a tatou talanoaina i le mataupu o loo sosoo mai, auala e faatāua ai e uso ma tuafāfine matutua talavou i le faapotopotoga.