1-2. a) Lá nkilika Woongo 16:31, wopo wɔkɔnge w’oyɛso ladjɛ ndɔsaka nkokolo djelekɔ la nkɔmano? b) Weepó wɛkɔnge wɔkɔpaso nkadjimola lá djamba djɛnɛ?

LÁ PARKƐ kɛmɔtshi kelá États-Unis, okoka ntana ayama wa wɔlɔ wakadje lá looko. Koko, ayama wasɔ watilama lá wamatshinyi djɛ ndjewa wopo wɔ nkamba la wakɔ djɛ nkfumba dɛngalɛnga. Djɛkondeke, anto walenda ayama wakɔ nkoka ndaalekana ngo nghonyi ipa nsipisoyɛ ambɔ oyɛwɔnde nkete djɛ ntshina efula djekoka ndaakamoyɛ.

² Lá topo tɔmɔtshi, nkokolo djɛso djɛ nkɔmano walekɔ etengo ayama wasɔ, iwɔ walekɔ la ntshina efula. Otepela wɔ Ndjambe ndaawɛdjɛka l’imbandjo yɛ nkoso. (Wala Woongo 16:31; 20:29) Koko, nkoka ndjala ko topasipisoyɛ la nkeke ntshina kelekɔ l’anto wasɔ. Dangala djesipisoyɛ mbala kɛkɔ kɛmɔ ntshina kelekɔ la wananyɔ l’ankaana yɛ nkokolo, mbaka ekete kɛmɔtshi kɛ ntshina efula mewɔ. Lá djamba djɛnɛ, tongokadjimola lá weepó esato wɛnɛ: Lamo Yehova ɔsakande wananyɔ l’ankaana yɛ nkokolo la ntshina? Lamo wananyɔ l’ankaana yɛ nkokolo oyɛwɔ la ntshina l’olonghanyelo wɔ Yehova? Kɛkɔnge k’okokaso nangha djɛ mba wapɔ má ndjɔmbɔmba yɛwɔ?

3. Lá ndjɛdjɛ la Yeembo 92:12-15, lamo nkokolo djɛso djelekɔ la nkɔmano oyɛwɔ la ntshina le Yehova?

³ Yehova Ndjambe ndɔsaka wananyɔ l’ankaana yɛ nkokolo la ntshina efula. Nde nyɛnaka wopo w’anto w’oyɛwɔ nsɔsɔlɔ l’eteyi kɛwɔ, edjinge nde ndɔsaka wekeka wawɔ wa wɔlɔ la ntshina. Nde ndjalaka l’osasa winá wɔ nkokolo okapanawɔ la dangala balo dj’iyawa l’efula k’ɛnɔnyi k’olemo wɔwɔ wɔ la nkɔmano.  (Djɔ. 12:12; Woo. 1:1-4) Lonkina, Yehova ndɔsaka okfulumeyelo wɔwɔ la ntshina. (Mal. 3:16) Iwɔ wapomanaka l’ekakasano lá mbiko yɛwɔ, koko wakindjɛ ndjala la djawo djɛ wolo te Yehova. Nkongi djɛwɔ dj’etsho weyaye dekɔ wolo ndeka lá winá wɔ yeke akambo wa nsɔsɔlɔ. Edjinge Yehova ndaakɔpaka mande iwɔ nkindjɛka ndjewoyɛ djiina djɛnde ‘kaanga yombokoma nkokolo.’​—Wala Yeembo 92:12-15.

4. Kɛkɔnge kekoka nkembɛ wananyɔ l’ankaana yɛ nkokolo?

⁴ Ntsha ombotshunda, yashikikɛ ente Yehova mvungɔka olemo wɔko wɔ ngananghe l’etsho wemboheta. (Heb. 6:10) Wɛ osukaka olemo w’ipoposanyɛ l’entete kenkfumɔ, ko nkambo djɛsɔ nsasangɛka Papa kɛso kel’olongo. Wɛ okfulumeyɛka ekakasano ndjila edjinge wɛnɛ wɛkɔkɔtisa l’oloko, osukaka tɔkfɔ tɔ sii telá Bible, ɔwɛmbaka edjito wɛ nkekete l’olonghanyelo wɔ Yehova la nkɔmɛ nkfumɔ, edjinge okfumbaka anto ankina. Wɛ onanghaka la wolo djɛ ndjekesanela la etshikitano efula wenanghema l’olonghanyelo wɔ Yehova. Wɛ osukaka la okembɛka wanɛ walekɔ l’olemo wɔ winá enkfumɔ. Yehova Ndjambe nkɔkɔpaka efula mande olekɔ la nkɔmano. Nde alakaka ante ‘apakadjɛki enkambi wɛnde wɛ nkɔmano’! (Yee. 37:28) Nde akɔpɛyɛ eshikikelo kɛnɛ ante: ‘Tii winá wɔ ngongoposa ndjé, lemi langokindjɛ nkɔwɛmba.’ (Iza. 46:4) Djɛkondeke, tɔfɛnyɛke ente mande ombokoma ekokolo, lasɔ opalekɔ la ntshina l’olonghanyelo wɔ Yehova. Wɛ olekɔ nsɔsɔlɔ la ntshina efula!

5. Kɛkɔnge kɛ wananyɔ l’ankaana yɛ nkokolo oyɛwɔ ladjɛ mvungɔka?

⁵ Nkokolo nkoka nkotshɛ l’olonghanyelo wɔ Yehova lá topo efula totshikitanyi. Kaanga okokawɔ ndjala wapalekɔ la wolo wɔ demba winá wɔsɔ etengo iyayalaka ntondo, iwɔ wambewáká akambo efula l’ilá k’ɛnɔnyi. Yehova akindjɛ nkamba lawɔ lá topo totshikitanyi, etengo ndjɔmbɔmba y’etsho wɛ ntondo la y’etsho wɛso wɛnɛ, ɛnyɛwɔ.

6-7. Kɔpɛyɛ ndjɔmbɔmba yemá Bible yɛ nkokolo djewayisa etshɔkɔ m’olemo wɔwɔ wɔ la nkɔmano.

⁶ Tokoka mba ndjɔmbɔmba yɛ wɔlɔ má Bible yɛ nkokolo djɛ nkɔmano djekindjisa nkambela Yehova kaanga lá lotshundo lɔwɔ. Ndjɔmbɔmba, Mɔsɛ ayalaka l’ɛnɔnyi 80 winá wɔ ndawange nkambela Yehova etengo ɔprɔfɛtɛ la ilɔndjɛ y’owila w’Isariyɛlɛ. Yehova akindjɛka nkamba la Danyɛlɛ etengo ɔprɔfɛtɛ kaanga winá wɔ ndayale l’ɛnɔnyi ndekana 90. Lonkina, ɔpɔstɔlɔ Djɔanɛ ayalaki l’ɛnɔnyi 90 la ndjakfe winá wɔ ndatateyɛ mfuna onkanda wɔ Ndjiso.

 ⁷ Nkokolo nkina efula djeyalaki la nkɔmano watayala anto wa lomo kana wewama, edjinge anto ankina watakokaki ndaawila yimba efula. Koko, Yehova awilaki yimba la aafutaka má nkɔmano djɛwɔ. Ndjɔmbɔmba, Bible ntepelaka ngo ndambo daambi toko lá nkambo djɛ Simɛɔna mpame k’onto ‘wɔlɔ la k’okaki Ndjambe wɔma,’ koko Yehova ɔpɛyɛka mpeyi kɛ nyɛna ɔlɛngɛ wɔ Yeso la kɛ ndjewoyɛ akambo walendana la wɔna edjinge la nyɔ kɛnde. (Luka 2:22, 25-35) Kokanela lonkina nkambo djelendana la ɔprɔfɛtɛ wɔ omoto Anna kanga loyalaki wadj’odjo. Nde Ayalaki l’ɛnɔnyi 84 koko ‘lako lofu lɔ ndahetshɛ ntshɔ tá tɛmpɛlɔ.’ Nde atshɔkwamaka efula má wingelo wɔnde wɔ ‘nsanghanyɛ wɔ la nkɔmano’ mande edjinge nde awaka mbamba kɛ nyɛna ɔlɛngɛ wɔ Yeso. Ayale Simɛɔna kana Anna, wayalaki la ntshina le Yehova.​—Luka 2:36-38.

8-9. Osukɔ wɔkɔnge ankaana yɛ wadj’edjo ɔpɛyɛwɔ tii winá wɔsɔ?

⁸ L’etsho wɛso wɛnɛ, nkokolo efula djɛ nkɔmano walekɔ ndjɔmbɔmba yɛ wɔlɔ le dangala. Tokolenda ndjɔmbɔmba kɛ nkaana Lois Didur. Nde ayalaka ngo l’ɛnɔnyi 21 toko winá wɔ ndawange nkamba olemo wɔ yat’ekalo yetshikitanyi lá Canada. M’ɔkɔngɔ wɔ lasɔ, nde nya womɛnde John wahetshɛka ɛnɔnyi efula l’olemo w’edjingadjinga. M’ɔkɔngɔ, wayɛka ndokamba lá Betɛlɛ djɛ Canada l’ilá k’ɛnɔnyi ndekana 20. Winá wɔ Lois ndawa ɛnɔnyi 58, nde nya John wawaka leeta lɔ ntokamba l’owila wɔ Ukraine. Yananghe mo? Watepelaka ambɔ mande tomboyala nkokolo topakoke ntokamba l’owila onkina? Lako, iwɔ wawolaka leeta lɔsɔ, ko John awaka odjito wɔ nkamba etengo ose Kɔmite kɛ filialɛ l’eteyi. M’ɔkɔngɔ w’ɛnɔnyi esambele, John avɔka, ko Lois ɔsaka nkano djɛ ntshikala ngo l’edjena kɛ yatome kɛsɔ. Winá wɔsɔ, Lois alekɔ l’ɛnɔnyi akumi 81, nde akindjɛ nkambela Yehova la nkɔmano esanga l’ase nkfumbo kɛ Betɛlɛ kelá Ukraine edjinge iwɔ yankfumɔ ndɔɔkɔpaka efula.

⁹ Nkoka ndjala ko, wadji w’edjo efula w’etengo Lois wapawɔsa la ntshina etengo yawɔsaka winá wɔ wame wawɔ yayalaka la mbiko, koko kaanga oyɛwɔ wadji w’edjo, walekɔ ngo la ntshina efula. Yehova ndɔsaka la ntshina efula ankaana yesukaki wame wawɔ l’ilá k’ɛnɔnyi efula edjinge yekindjɛ ndookambela la nkɔmano tii winá wɔsɔ. (1 Ti. 5:3) Lonkina, iwɔ nkembɛka dangala djɛ lɔɔko kɛnɛ.

10. Ndjɔmbɔmba kɛkɔnge kɛ wɔlɔ kɛtɔpɛyisa Tony?

¹⁰ Nkokolo mɔtshi djɛ nkɔmano dj’intansɛ l’amvulu y’olamawɔ anto wambotshunda, walekɔ lonkina la ntshina. Ndjɔmbɔmba, wɔnanyɔ wɔso w’etawɔ Tony intansɛ lá mvulu kɛmɔtshi kɛ nghɔsɔ. Nde alongolaka batisimo lá Pennsylvanie, l’États-Unis, lá Ngɔndɔ k’enanɛyi 1942 l’ɛnɔnyi 20. Ndambo m’ɔkɔngɔ wɔ  batisimo djɛnde, w’oshimelaka djɛnde ndjingela l’olemo w’angala, ko mande nde atonaka, w’owilaka lá lokando l’ilá k’ɛnɔnyi epe l’etenyi. Nde nya wadjɛnde Hilda, wafudjɛka wana wawɔ ape lá nsɔsɔlɔ. L’ilá k’ɛnɔnyi efula, Tony akambaka lá ntshumano ntshato etengo onami wɔ tokokolo (lɔɔko kɛnɛnde ilɔndjɛ y’oloyi wɔ tokokolo) la etengo onami wɔ losanghanyɛ l’edjingadjinga. Nde atshɔki ntowembola ase lokando, alɔndjɛki nsanghanyɛ l’eteyi la ekaki l’anto Bible. Kaanga ndombowa ɛnɔyi 98, Tony atatshike nkambela Yehova. Nde akindjɛ nangha kenkfumɔ k’okokande nangha djɛ nkambela Yehova edjinge akamba mpɛka la mpɛka l’ase otshumano wɔnde!

11. Wopo wɔkɔnge okokaso nyɛnyɛ ente iso ndɔsaka wananyɔ wa nkokolo w’intansɛ lá amvulu y’olamawɔ anto wambotshunda la ntshina?

¹¹ Wopo wɔkɔnge w’okokaso nyɛnyɛ dj’iso ndɔsaka nkokolo djɛso dj’intansɛ l’amvulu yolamawɔ anto wambotshunda la ntshina? Tokokolo nkokaka ndaakotshɛ djɛ ndjingela kana ndɔnda nsanghanyɛ y’otshumano la djɛ mpoposanyɛ. Iso nkokaka ndaawɛnyɛ ente iso ndaawilaka yimba má ndaawembola kana má ndaaweta má video kɔnfɛransɛ. Iso nkɔpaka ndjila wananyɔ wa nkokolo w’intasɛ l’amvulu y’olamawɔ anto wambotshunda yelekɔ otale la ntshumano djɛwɔ yimba lá lɛdji lotshikitanyi. Iso ladjɛ mbadjɛ, dj’ipa mvungɛ wananyɔ l’ankaana yɛso yɛ nkokolo yɛsɔ. Amɔtshi nkoka ndjala l’okakasano wɔ ntepela akambo walendana lawɔ. Koko tongowa wapɔ efula ntsha iso ndɔsaka winá djɛ ndaawopolaka weepó la ndaawekameyɛka winá w’otoshimelawɔ osasa w’iyawa m’olonghanyelo wɔ Yehova.

12. Wananyɔ l’ankaana yɛ wopo wɔkɔnge y’okokaso ndjisola l’otshumano wɔso?

¹² Tokoka nkamɔ djɛ ndjisola ndjɔmbɔmba yɛ wɔlɔ efula yɛ nkokolo djɛ nkɔmano l’otshumano wɔso. Nkaana kɛso ketawɔ Harriette, akambelaka Yehova la nkɔmano nkfumɔ l’ilá k’ɛnɔnyi akumi l’otshumano welá mbandja kɛwɔ lá New Jersey, l’États-Unis. Masɔ, nde imaka meteyi djɛ ntintasɛ nya wɔnande wɔ omoto. Wananyɔ welá otshumano wɔ bango wɔ ndatshu wɔsaki winá djɛ ndowewa wɔlɔ, ko wisolaka ambɔ nde alekɔ nsɔsɔlɔ la ntshina. Nde aakembɛka má ndaakɔndɔla ɛkɔndɔ welendana l’olemo w’ipoposanyɛ l’etsho wɛ ndawange ndjeka Bible l’ɛnɔnyi wɛ 1920. L’etsho wɛsɔ, winá wɔ ndatshɔka t’olemo w’ipoposanyɛ, nde atatshikaki lɔkɔdji lɔnde l’akɔtshi mande nde ewaki ante iwɔ nkoka ntovunda ko ndowokela tá lokando. Ee, mbala ipe yetondo, l’ɔnɔnyi wɔ 1933 nde ahetshɛka lobengo l’otondo lá lokando. L’etsho wɛsɔ, womɛnde atayale Owakɛ wɔ Yehova koko nde osukaki la alamaki wana wawɔ asato winá wɔ ndayalaka lá lokando. Lá nsɔsɔlɔ, nkokolo djɛ nkɔmano etengo Harriette ndjɛlamaka djɛ ndɔsama la ntshina!

13. Kɛkɔnge kɛ sombeka lá kɛnɛ kelendana la mpipo kelekɔ la wananyɔ l’ankaana yɛ nkokolo yel’olonghanyelo wɔ Yehova?

¹³ Wananyɔ l’ankaana yɛso yɛ nkokolo walekɔ la ntshina efula l’olonghanyelo wɔ Yehova. Iwɔ wɛnaka wopo wɔ Yehova ndatshɔkɔla olonghanyelo wɔnde lá topo totshikitanyi la tɔ ndaatshɔkɔla iyɔmɛlɛ. Iwɔ wawaka elakanyelo wɛ djonyi efula m’evunga wɛwɔ. Tawɔshi etengo ‘ɛtɛkɔ kɛ balo,’ edjinge towa wapɔ má balo djɛwɔ. (Woo. 18:4) Ntsha wɛ ndɔsa winá djɛ ndaawewa wɔlɔ, djawo djɛko ngokemba la ongeka akambo efula wa wɔlɔ mewɔ!

14. Mvungo K’ɛlɛmbɛ 32:7 okembɛwɔ dangala djɛ nangha nge?

¹⁴ Ɔsa nkano djɛ nsawolaka la wananyɔ l’ankaana yɛ nkokolo. (Wala Mvungo K’ɛlɛmbɛ 32:7.) Lá nsɔsɔlɔ, iwɔ nkoka nyɛnama  etengo wapalekɔ ɛwɔngi lonkina, nkɛndaka ina ina edjinge ntepelaka ikɔkɛ ikɔkɛ koko, l’eloko iwɔ walekɔ etengo dangala, wamboyananghela ‘djiina djɛ wɔlɔ’ lá wiso wa Yehova. (Los. 7:1) Vungɔka lamo Yehova awɔsakande la ntshina. Kindjɛ ndaawɔsa l’odjito. Yala etengo Elisha. Nde ɔsaka nkano djɛ ntshikala ma ma nya Elidja lofu l’ekomo l’iyayale esanga. Mbala isato y’etondo, Elisha atepelaka ante: ‘Mpangokotshika.’​—2 Nk. 2:2, 4, 6.

15. Weepó wɛkɔnge ɛmɔtshi w’okokaso ndjopola nkokolo djɛ l’otshumano?

¹⁵ Ɛnyɛ ente wɛ ndjilaka wananyɔ l’ankaana yɛ nkokolo yimba má ndaawopolaka toopópó la nkɔmɛ nkfumɔ. (Woo. 1:5; 20:5; 1 Ti. 5:1, 2) Iso nkoka ndaawopola weepó etengo wɛnɛ: “Winá wɔ ngayalaka olangala, kɛkɔnge kekawoyisa ente ombisola nsɔsɔlɔ?” “Wopo wɔkɔnge akambo wapomanisa lawɛ yakokotshɛ djɛ ndeka ndjala entshupa nya Yehova?” “Kɛkɔnge kekokotshisa djɛ nama osasa wɔko l’olemo wɔ Yehova?” (1 Ti. 6:6-8) Masɔ, ekameyɛnde winá w’ɔkɔkɔndɔlande ɔkɔndɔ wɔnde.

16. Wapɔ wɔkɔnge wɔnanyɔ w’ekokolo la w’olangala okokawɔ mba yape kɛkɔ winá w’osawolawɔ?

¹⁶ Winá wɔ ekokolo ny’olangala osawolawɔ, yape kɛkɔ mbaka wapɔ. (Ɔrɔ. 1:12) Nyo dangala nyongoleka ndashikikɛ ente Yehova namaka enkambi wɛnde wɛ nkɔmano, ko wɔnanyɔ w’ekokolo angoyawoka djɛ nde ndɔsamaka la ntshina. Nde angoyala l’osasa wɔ nkɔkɔndɔla wopo wɔ Yehova ndɔɔtshɔkɔla.

17. Lamo okokaso ntepela ente nkokolo djɛ nkɔmano ntalekaka ndjala ɛwɔngi winá wotahete ɛnɔnyi?

¹⁷ Mbala efula, ɔwɔngi wɔ demba nshilaka winá w’onto otshundande, koko wanɛ walekɔ la nkɔmano te Yehova ntalekaka ndjala ɛwɔngi lende winá wotahete ɔnɔnyi onkfumɔ. (1 Te. 1:2, 3) Lamo nkambo djɛsɔ oyɛwɔ nsɔsɔlɔ? Mande l’ilá k’ɛnɔnyi efula, iwɔ wawolaka djɛ nyuma kɛ Ndjambe ndaakotshɛ djɛ ndjala la wekeka wa wɔlɔ. Ntsha iso ndeka ndɔsa winá djɛ ndjewa wananyɔ l’ankaana yɛso yɛ nkokolo, ndaapɛyɛ lomo, la ndjeka akambo efula mewɔ, tongoleka ndaawɔsa la ntshina efula!

18. Kɛkɔnge kɛ sɔngɛna lá djamba djeyaye?

¹⁸ Otshumano ndekaka nkemba apengo winá wɔ dangala ɔsawɔ wananyɔ wa nkokolo la ntshina toko, koko edjinge winá wɔ nkokolo ɔsawɔ dangala la ntshina. Lá djamba djeyaye, tɔngɛna wopo wɔ wananyɔ l’ankana yɛ nkokolo okokawɔ nyɛnyɛ ambɔ iwɔ ndɔsaka dangala la ntshina.