1-2. (a) Unfa u musu ta si dee baaa ku dee sisa fuu dee ko gaandi, kumafa Nöngö 16:31 ta taki? (b) Fuun soni woo taki a di woto aki?

WAN kamian dë na Amëëkanköndë ka sëmbë sa go köi. A di kamian dë i sa feni djamati sitonu a goon. Ma dee djamati sitonu aki an ta dë seekaseeka koti, kumafa de ta dë te i go bai soni a wan kamian ka sëmbë ta sei dee lö soni aki. Di soni aki ta mbei taa sömëni u dee sëmbë dee ta si dee djamati sitonu aki an ta fusutan taa djamati sitonu de ta si dë, nöö de ta waka pasa u de.

² Wë u sa taki taa dee baaa ku dee sisa fuu dee ko gaandi dë kuma dee djamati sitonu aki. De dë kuma gaan gudu. Di Wöutu u Gadu ta tei di weti uwii u dee baaa ku dee sisa aki, maaka ku wan könu kaapusa. (Lesi Nöngö 16:31; 20:29.) Ma a sa pasa hesihesi seei taa wa si dee baaa ku dee sisa dee ko gaandi kuma gaan gudu. Dee njönkuwan dee ta fusutan taa dee baaa ku dee sisa aki dë kuma gaan gudu, ta feni wan soni di dii möön tuutuu gudu seei. Woo taki u dee soni aki a di woto aki: Faandi mbei Jehovah ta si dee baaa ku dee sisa dee ko gaandi kaa kuma gaan gudu? Faandi mbei di ölganisaasi u Jehovah ta kai dee baaa ku dee sisa aki gaan soni? Andi u sa du fuu sa feni wini tuutuu u di öndöfeni di de abi?

3. Faandi mbei Jehovah ta kai dee baaa ku dee sisa dee ko gaandi kaa gaan soni, te u luku Psalöm 92:12-15?

³ Dee baaa ku dee sisa dee ko gaandi dë kuma gaan gudu da Jehovah Gadu. A sabi ambë de dë tuutuu, söseei a sabi dee  bunu fasi di de abi. Dee baaa ku dee sisa aki ta dini Jehovah sömëni jaa longi kaa, nöö Jehovah ta wai seei te de ta heepi dee möön njönkuwan, u deseei ko abi di köni di de abi (Jöpu 12:12; Nöng. 1:1-4). Jehovah ta tei di hoi di de ta hoi dou u bigi tu (Mal. 3:16). De bi abi bookohedi a di libi, ma tökuseei de hoi deseei a Jehovah. Di biibi di de abi taa Jehovah o mbei de feni gaan bunu a di ten di ta ko, ko möön taanga möön fa a bi dë, di de bi bigi dini Jehovah. Nöö Jehovah lobi de, u di de ta konda soni fëën go dou, hii fa de ko gaandi.​—Lesi Psalöm 92:12-15.

4. Andi sa da dee baaa ku dee sisa fuu dee ko gaandi kaa taanga?

⁴ Kandë i ta booko i hedi u di i ta ko gaandi. Ma i sa dë seiki taa Jehovah an o fëëkëtë hii dee wooko dee i bi du dëën a di ten di pasa (Heb. 6:10). I bi ta du hii soni di i sa du u mbei di peleikiwooko go a fesi, nöö di soni dë ta mbei di Tata fuu di dë a liba ala ta wai. I bi hoi dou hii fa i bi abi bookohedi, söseei hii fa so u dee bookohedi dë bi ta mbei i ta tjali gaanfa seei. I bi libi ku dee wëti u Bëibel. I tja sömëni faantiwöutu a di ölganisaasi u Jehovah. Söseei i bi heepi wotowan u de ko sabi unfa de sa dini Jehovah a wan möön bunu fasi. I bi mbei hii möiti u wooko makandi ku di ölganisaasi u Jehovah, hii fa sömëni soni bi tooka nëën. I bi heepi dee sëmbë dee ta du di hii-ten diniwooko, söseei i bi da de taanga. Jehovah Gadu lobi i gaanfa seei, u di i ta hoi iseei nëën. A ta paamusi u taa an o go disa dee sëmbë dee ta hoi deseei nëën! (Ps. 37:28) A ta taki tu taa: ’Aluwasi hedi uwii u de ko weti, mi o ta heepi de’ (Jes. 46:4). Fëën mbei ja musu ta si kuma di ölganisaasi u Jehovah an ta kai i gaan soni möön, u di i ko gaandi. Jehovah ku di ölganisaasi fëën ta kai gaan soni!

5. Andi dee baaa ku dee sisa fuu dee ko gaandi musu hoi a pakisei?

⁵ Sömëni soni dë di dee baaa ku dee sisa dee ko gaandi sa du a di ölganisaasi u Jehovah. Hii fa kandë de an dë sö kaakaa möön kuma fosu, tökuseei u sa lei sömëni soni a de. Jehovah sa mbei dee gaansëmbë aki du peipei soni dëën. Woo si di soni aki te woo luku woto u sëmbë u di ten di pasa, söseei u di ten fuu aki.

6-7. Konda unfa Jehovah bi mbei so dinima fëën di bi ko gaandi, feni gaan bunu?

 ⁶ Sömëni woto a di Bëibel ta taki u dinima u Jehovah, di bi ta dini ën ku hii de hati u te de ko gaandi. Mosesi bi abi söwan 80 jaa di a bi toon wan tjabukama u Jehovah, söseei di a bi toon fesima u dee Isaëli sëmbë. Hii fa Daniëli bi abi möön leki 90 jaa, tökuseei Jehovah bi ta dëën bosikopu faa ta tja dëën jeti. Apösutu Johanisi seei bi abi möön leki 90 jaa, di Jehovah bi heepi ën ku di santa jeje fëën faa sikifi di buku Akoalimbo.

⁷ Sömëni woto dinima u Jehovah an bi dë nëbai sëmbë, nöö kandë sëmbë an bi buta pakisei a de wan apaiti. Ma Jehovah bi buta pakisei a de, nöö a bi mbei de feni gaan bunu, u di de bi ta hoi deseei nëën. Di soni dë u ta si te u buta pakisei a di womi de kai Simion. „A bi dë wan gaan bumbuu sëmbë ta libi kumafa Gadu kë ta hoi dee wëti fëën.” Di Bëibel an ta taki hia soni fëën. Ma Jehovah bi sabi ën, nöö a bi dëën di gaandi faa si Jesosi di Jesosi bi dë miii. Söseei a bi dëën di gaandi faa taki wan tjabukama woto, di nama ku di mii ku hën mama (Luk. 2:22, 25-35). Buta pakisei tu a di mujëë tjabukama de kai Ana. A bi abi 84 jaa, ma hii juu a bi „ta dë a di Wosu u Masa Gadu”. Jehovah bi mbei Ana feni gaan bunu, u di a bi nango a di Wosu fëën hii juu. A bi mbei Ana seei si Jesosi, di Jesosi bi dë miii. Jehovah bi ta kai Simion ku Ana tuu gaan soni.​—Luk. 2:36-38.

8-9. Andi dee sisa di manu u de dëdë kaa ta du go dou?

⁸ A di ten aki, dee njönkuwan sa lei soni a dee baaa ku dee sisa dee ko gaandi. Buta pakisei a di woto u Sisa Lois Didur. Di sisa aki bi abi 21 jaa nöö, di a bigi du di apaiti pioniliwooko a di köndë Kanada. Baka di dë, hën ku hën manu John bi du di keling-wooko sömëni jaa longi. Bakaten de bi wooko möön leki 20 jaa longi a di Bëtëli u Kanada. Di Sisa Lois bi abi 58 jaa, hën de bi hakisi hën ku John u de go dini Jehovah a di köndë Ukalaini. Andi de bi du? De bi taki taa de ko gaandi poi u de go dini Jehovah a wan woto köndë u? Wë nönö. De bi go. Nöö baaa John bi ko dë wan u dee baaa u di bëikantoo komite u di köndë. Di baaa John ko lasi libi seibi jaa baka di dë, hën Sisa Lois fika ala faa du di wooko fëën go dou. Nöunöu Sisa Lois abi 81 jaa. A ta dini Jehovah ku hii hën hati go dou a di Bëtëli u Ukalaini, nöö dee baaa ku dee sisa fëën lobi ën tee.

⁹ Sömëni woto sisa dë di manu u de lasi libi, nöö kandë sëmbë an ta buta pakisei a de möön kuma fosu. Ma Jehovah ta kai de gaan soni jeti. Sisa dë di bi heepi de manu sömëni jaa longi u de bi sa wooko da Jehovah, nöö de ta hoi deseei a Jehovah te kuma tide jeti. Jehovah ta kai dee sisa aki gaan soni (1 Tim. 5:3). Dee sisa aki ta da dee njönkuwan taanga tu.

10. Na un bunu fasi Baaa Tony bi du soni?

¹⁰ Jehovah ta kai dee baaa ku dee sisa fuu  dee ta libi a gaansëmbë wosu, gaan soni. Wan baaa de kai Tony ta libi a sö wan kamian. A dopu a tanvuuwata-liba u di jaa 1942, a Pennsylvania, na Amëëkanköndë. A di ten dë a bi abi 20 jaa. De bi kë faa go a sodati, ma u di an bi kë, mbei de bi butëën a dunguwosu tu jaa ku hafu longi. Baaa Tony ku hën mujëë Hilda kiija tu mii a di tuutuu lei. A bi dë di fesima u dee gaanwomi, a dii u dee kemeente ka a bi dë. Söseei a bi dë wan baaa di bi ta tei fesi te de bi ta seeka soni u de hoi dee keling-komakandi. A bi nango a wan dunguwosu nango ta hoi komakandi, söseei a bi ta lei sëmbë soni u Bëibel ala. Hii fa Baaa Tony abi 98 jaa, tökuseei a ta dini Jehovah ku hii hën hati go dou. A ta du hii soni di a sa u dini Jehovah, söseei u wooko makandi ku di kemeente ka a dë!

11. Unfa u sa lei dee baaa ku dee sisa fuu dee ta dë a kamian ka de ta luku gaansëmbë, taa u ta kai de gaan soni?

¹¹ Unfa u sa lei dee baaa ku dee sisa fuu dee ta dë a kamian ka de ta luku gaansëmbë, taa u ta kai de gaan soni? Wë te a sa, nöö dee gaanwomi sa seeka soni da dee baaa ku dee sisa aki u de sa dë a dee komakandi, söseei u de sa du di peleikiwooko. U sa lei taa u ta booko u hedi ku de te u nango ta luku de. Nasö u sa bëli de, nöö u seti soni a di tëlëfön fuu a sö wan fasi taa u ku de sa ta si useei. A bi o bunu fuu mbei möiti fuu ta buta pakisei a dee baaa ku dee sisa fuu dee ta dë a wan kamian ka de ta luku gaansëmbë, möönmöön ee di kamian dë longi ku di kemeente ka de dë. Ee wa du di soni dë, nöö a sa pasa taa u sa fëëkëtë de. A sa ta taanga da so u de u de konda soni u deseei da wotowan, nasö de sa ta si kuma an fiti u de du ën. Ma woo feni taanga seei ee u ta hakisi de andi de bi du a di ölganisaasi u Jehovah, di bi da de piizii. Söseei te u ta haika bunu te de ta konda dee soni dë da u.

12. Un pei baaa ku sisa u sa feni a di kemeente ka u dë?

¹² A sa bigi da u seei te u ko si taa hii fa so baaa ku sisa ko gaandi, tökuseei u sa lei te a hia soni a de. Wan sisa de kai Harriette bi dini Jehovah sömëni jaa longi a wan kemeente di dë a New Jersey, na Amëëkanköndë. Bakaten a bi foloisi go ta dë ku di mujëë mii fëën. Dee baaa ku dee sisa u di kemeente ka a bi go bi mbei möiti u de ko sabi ën, nöö de bi ko lobi ën gaanfa seei. A bi ta da de taanga te a bi ta konda da de unfa soni bi dë, di a bi bigi du di peleikiwooko a di pisiten u di jaa 1925. A di ten dë, a bi lo’ u waka ku wan tandabösö nëën tasi te a bi nango peleiki, u di a bi sa pasa taa siköutu kisi ën buta a dunguwosu u wan pisiten. Tu pasi siköutu bi kisi ën a di jaa 1933, nöö dee tu pasi tuu de bi hoi ën wan wiki longi. A di ten dë, hën manu an bi dë Kotoigi, ma a bi ta heepi ën ta luku dee dii mii u de. Dee baaa ku dee sisa dee dë kuma Sisa Harriette fiti gafa tuutuu!

13. Andi u lei u di fasi fa Jehovah ku di ölganisaasi fëën ta si dee baaa ku dee sisa dee ko gaandi?

¹³ Jehovah ku di ölganisaasi fëën ta wai seei taa dee baaa ku dee sisa dee ko gaandi, dë a di ölganisaasi fëën. Dee baaa ku dee sisa aki bi si fa Jehovah bi lei a peipei fasi taa a dë ku di ölganisaasi fëën, söseei taa a dë ku de tu. De bi tei köni a dee soni dee bi miti de. U musu ta si de kuma sëmbë di abi öndöfeni, nöö u musu ta lei soni a de (Nöng. 18:4). Ee i ta mbei möiti fii ko sabi de möön bunu, nöö di biibi fii sa ko möön taanga, söseei joo lei sömëni soni!

14. Andi Detolonomi 32:7 ta da dee njönkuwan taanga u de du?

¹⁴ Mbei möiti fii nango ta fan ku dee baaa ku dee sisa dee ko gaandi. (Lesi Detolonomi 32:7.) A kan taa de an ko ta si soni sö bunu  möön, a kan taa de an ko ta waka sö bunu möön, söseei kandë de an ko ta fan sö bunu möön. Ma de ta kë du soni da Jehovah jeti, nöö di soni dë mbei Jehovah ta feni de bunu (Peleik. 7:1). Hoi a pakisei faandi mbei Jehovah ta kai de gaan soni, nöö mbei möiti fii ta lesipeki de go dou. I sa djeesi Elisa. An bi kë go disa Elia möönsö. A bi piki Elia dii pasi taa: „Ma o go disa i.”​—2 Kön. 2:2, 4, 6.

15. Andi u sa ta hakisi dee gaansëmbë?

¹⁵ Boo lei taa u kë sabi soni u dee baaa ku dee sisa fuu dee ko gaandi. U musu ta fan ku de (Nöng. 1:5; 20:5; 1 Tim. 5:1, 2). U sa ta hakisi de soni kuma: „Di i bi njönku, andi bi mbei i bi dë seiki taa i dë a di tuutuu lei?” „Unfa dee soni dee bi miti i bi heepi i fii ku Jehovah ko dë möön gaan mati?” „Andi bi heepi i fii sa ta dini Jehovah waiwai go dou?” (1 Tim. 6:6-8) Te i hakisi de dee soni aki kaa, nöö i haika te de o konda da i.

16. Unfa di fan di njönkuwan ku gaansëmbë ta fan ku deseei sa tja wini ko da hii de tuu?

¹⁶ Te wan gaansëmbë ku wan njönkuwan ta fan, nöö hii de tuu ta feni wini u di fan dë (Lom. 1:12). Un dee njönkuwan, woon ko möön si fa Jehovah ta heepi dee dinima fëën dee ta hoi deseei nëën. Nöö dee baaa ku dee sisa dee ko gaandi o ta fii bunu seei, te de o ta toona mëni dee gaan bunu di Jehovah bi mbei de feni.

17. Faandi mbei u sa taki taa möön dee jaa ta pasa, möön dee baaa ku dee sisa dee ko gaandi, ta ko hanse?

¹⁷ Möön dee jaa ta pasa, möön wan sëmbë ta ko gaandi. Ma di sëmbë di ta hoi hënseei a Jehovah, ta ko möön hanse daka fu daka (1 Tes. 1:2, 3). Faandi mbei u sa taki sö? U di dee baaa ku dee sisa dee ko gaandi, bi da Gadu pasi faa mbei de ko toon möön bunu sëmbë. Fëën mbei boo mbei möiti fuu ko sabi dee baaa ku dee sisa aki möön bunu, boo lei taa u ta lesipeki de, söseei boo lei soni a de!

18. Andi woo luku a di woto di ta ko?

¹⁸ Dee sëmbë u di kemeente ta ko abi wan möön taanga biibi te dee njönkuwan ta lesipeki dee baaa ku dee sisa dee ko gaandi, söseei te dee baaa ku dee sisa dë ta lesipeki dee möön njönkuwan. A di woto di ta ko, woo si unfa dee gaansëmbë sa lei taa de ta lesipeki dee möön njönkuwan a di kemeente.