1-2. a) Guya khu Mavingu 16:31, hi yede gu va wona kharini vandriyathu va dandridego khu tanga? b)  Siwudziso muni si na hlamudwago avba nya ndrima yeyi?

 ESTADOS Unidos gu na ni Parque Arkasas, mu si vbevbugago gu mana dzidhiyamanti vbavbatshi. Ganiolu kha nga olu siwindri sesi si tadego khu ndzilo nigu si nga si limparwi, vathu nya vangi kha va tuguli gu khavo iso siwindri nya lisima. Khu ndziya yoyo va si vbindra nya mba siti.

² Khu ndziya nyo khaguri vandriyathu va dandrigedo khu tanga va ngu fana ni dzidhiyamanti dzedzi. Avo thomba nya lisima ngudzu. Lito la Nungungulu la gu fananisa ndzudzu wawe nya dzinvi ni gihugo nya wudhumo. (Leri Mavingu 16:31; 20:29.) Ganiolu, si ngu vbevbuga gu mba yi wona thomba yeyi. Tepo vaphya va pwisisago gu khavo vandriyathu va dandridego khu tanga va na ni lisima, avo va ngu wuyedwa khu silo nya lisima ngudzu gu vbindra dzithomba nya mafu yaya. Ga ndrima yeyi hi na wona mihlamulo nya siwudziso siraru: Khu ginani Jehovha a wonago vandriyathu va dandridego khu tanga kha nga vathu nya lisima? Khu ginani vandriyathu va dandrigedo khu tanga va gu na ni lisima hengeledzanoni ya Jehovha? Ginani hi nga girago gasi gu phasega khu giyeyedzo gyawe?

3. Guya khu Ndzimo 92:12-15, khu ginani vandriyathu nyo tumbege va dandridego khu tanga va gu na ni lisima ga Jehovha?

³ Vandriyathu nyo tumbege va dandridego khu tanga va na ni lisima mahoni ga Jehovha. Uye a ngu wona esi si gu romo myonyoni ya vandriyathu vava. A ngu dziti gu khuye vathu nya vadi, nigu a ngu tsaka khu makhalelo yawe nya yadi. Jehovha a ngu tsaka ngudzu tepo vandriyathu va dandrigedo khu tanga va bhuleyago vaphya  matshango va ma manidego ndrani nya womi wawe. (Joba 12:12; Mav. 1:1-4) Jehovha gambe a ngu ninga lisima gu timiseya gwawe. (Mal. 3:16) Avo va tshanganide ni sigaradzo womini gwawe, ganiolu va simamide gu tiyisa gukhodwa gwawe ga Jehovha. Gutumba va gu nago khu wumindru, gu tiyide ngudzu olu gu vbindra tepo va nga hevbula lisine. Nigu Jehovha a ngu va haladza kholu ambari olu va ‘gumbidego’ avo va ngo simama gu huweleya lina laye. — Leri Ndzimo 92:12-15.

4. Ginani gi nga tiyisago vandriyathu va dandrigedo khu tanga?

⁴ Abari gu wa gu gumba, tiyisega gu khuwe Jehovha a ngu drundruga satshavbo esi u mu giredego. (Hebh. 6:10) Uwe u pategide khu sighingi thumoni nya gu tshumayele, ni gu isoso si ngu tsakisa ngudzu Papayi wathu wa ndzadzini. U tshanganide ni sigaradzo nya sikhongolo ngudzu. U ngu engisa u bwe u emeya milayo nya Bhibhiliya, u khataleya mithumo nya lisima hengeledzanoni ya Jehovha u bwe u trenari vambe. Uwe tepo yatshavbo wa gu gira esi u sikodzago gasi gu dzi pwananisa ni gwevbini gu vbindrugedza gu girwago hengeledzanoni ya Jehovha. Uwe gambe u phasedzede ni gu tiyisa ava va gomogo thumoni nya tepo yatshavbo. Jehovha a ngu gu haladza ngudzu kholu u tumbegide. Uye a gu tumbisa gu khuye: “Gima kha digi avo va khodwago gwaye.” (Ndzi. 37:28) Nigu uye a gu tumbisa ava va dandridego khu tanga gu khuye: “Kala mu buga dzinvi eni nyi na simama nyi mi sayisa.” (Isa. 46:4) Khu kharato u nga pimisi gu khuwe olu u dandridego khu tanga u mwalo lisima hengeledzanoni ya Jehovha. Khu lisine uwe u nani lisima ngudzu!

5. Ginani egi vandriyathu va dandrigedo khu tanga va yedego gu gi dundruga?

⁵ Vandriyathu va dandridego khu tanga va nga phasa hengeledzanoni ya Jehovha khu dzindziya nya dzingi. Lisine gu adzina avo va mwalo tshivba nya nga eyi va nga ba vari nayo gale, ganiolu avo va na ni matshango nya mangi va ma manidego ndrani nya myaga yi vbindridego. Jehovha a nga simama gu va thumisa khu dzindziya nya hambanehambane. Siyeyedzo sa gale ni esi sa olu, si ngu hi phasa gu pwisisa isoso. Hongoleni hi si wona.

6-7. Khu sevbini siyeyedzo sa omu nya Bhibhiliya, nya vathu va dandridego khu tanga va kategisidwego khu Jehovha khu thumo wawe nya gu tumbege?

⁶ Omu nya Bhibhiliya gu na ni siyeyedzo nya sadi nya sithumi nyo tumbege si simamidego gu thumeya Jehovha ambari si nga mba si dandride  khu tanga. Khu giyeyedzo, Mosi a di ri ni 80 myaga tepo a nga pheya gu thuma kha nga muprofeti wa Jehovha a bwe a thangeya Vaisrayeli. Tepo Dhaniyeli adzina a nga ba ari ni 90 myaga, Jehovha simamide gu mu thumisa kha nga muprofeti. Nigu adzina Johani a di ri ni 90 myaga ni gu vbindra tepo Jehovha a nga mu thumisa gasi gu lova libhuku la Gutuledwa.

⁷ Simbe sithumi nya gu tumbege kha sa nga ba siri ni malungelo nya mangi, khu kharato si di hadzi vbevbuga gu mba tidwa khu vathu. Ganiolu, Jehovha vegide gupima gwaso nigu a si tshatshazede khu gu tumbega gwaso. Khu giyeyedzo, mwama moyo nyo “lulame ni githawo” nyo pwane khu Simiyoni, kha khumbugwi ngudzu umo nya Bhibhiliya, ganiolu Jehovha a di gu muti gwadi. Nigu a mu ningide lithomo nyo wone Jesu na ngari gyanana a bwe a profeta silo nyo khaguri khu Jesu ni mamayi waye. (Luka 2:22, 25-35) Nga dundrugeya khu gikhosane gimwegyo nya nyamayi gi nga ba gi ri muprofeti nyo pwane khu Ana. Uye a diri ni 84 myaga, ganiolu gima a di si digi gu “hongola nyumbani ga Nungungulu.” Khu kharato, Jehovha a mu kategiside khu gu mu gira a wona Jesu na ngari gyanana. Somo guagani gu khiso Simiyoni ni Ana va diri ni lisima mahoni ga Jehovha. — Luka 2:36-38.

8-9. Ninga giyeyedzo gi yeyedzago gu khigyo vandriyathu nya vanyamayi nya dzinoni va na ni lisima ngudzu hengeledzanoni ya Jehovha?

⁸ Gu tala nya vandriyathu nyo tumbege va dandrigedo khu tanga siyeyedzo nya sadi ga vaphya va muhuno. Wona matshango ya ndriyathu moyo nya nyamayi nyo pwane khu Lois Didur. Uye a diri ni 21 myaga basi tepo a nga pheya gu thuma kha nga piyonero nyo hathege Canadá. Hwane nya isoso, uye ni mwama waye John va thumide khu myaga nya yingi kha nga vawoneleyi nya gipandre. Khu gu landreya va thumide Bheteli ya Canadá khu gu vbindra 20 myaga. Tepo Lois a nga ba ari ni 58 myaga, uye ni John va di konvhidarwi gasi guya thumeya Ucrânia. Ginani va giridego tepo va nga hakha konvhiti yeyi? Ina va pimiside gu khavo va gumbide ngudzu gasi gu fuluga va hongola limbe litigo? Ahihi. Avo va dzumede konvhiti, nigu John a di emiswa kha nga givbango nya Kometi nya Litamo ya Ucrânia. Hwane nya 7 myaga John a difa, ganiolu Lois a di hunga gu simama gu thumeya eyi. Lois olu a na ni 81 myaga nigu a nga ngu simama gu thumeya Jehovha khu gu tumbega Bheteli ya Ucrânia. Nigu vatshavbo eyi va ngu mu haladza ngudzu.

⁹ Dzinoni nya nga Lois, adzina kha va vegedwi ngudzu gupima nya nga edzi va nga ba va vegedwa khidzo na va ngo vbanya vama vawe. Ganiolu, lisine khu gu avo va ngari ni lisima ngudzu. Vandriyathu vava nya va nyamayi va seketede ngudzu vama vawe nigu va ngo simama gu thumeya Jehovha khu gu tumbega. (1 Thim. 5:3) Nigu avo gambe va ngu tiyisa ngudzu vaphya.

10. Khu gevbini giyeyedzo nya gyadi egyi Tony a hi ningago?

¹⁰ Vandriyathu nya vangi va dandridego khu tanga va guromo umo nya dzixipitali, anavo thomba nya lisima ngudzu. Khu giyeyedzo, ndriyathu moyo nyo pwane khu Tony anuye womo ga malanga nya nga ayoyo. Uye bhabhatisidwe nari ni 20 myaga khu Agosto nya 1942 Pennsylvania,  Estados Unidos. Nya mba hweya uye a di khotedwa myaga mivili pasoni kholu a nga bomba gu dzi bedzedzeya omu nya politika. Uye ni mwangadzi waye Ilda va hevbudzide lisine sanana sawe sa sivili. Ndrane nya myaga nyo khaguri, Tony thumide umo nya mabandla mararu kha nga Superitendenti Presidente (muhuno si thulago Mutshanganisi nya Huwo nya Madhota), nigu thumide gambe kha nga muwoneleyi nya tshangano nya gipandre. Uye a di gu gira mitshangano ni gu gimbidzisa sihevbulo nya Bhibhiliya pasoni. Tony muhuno a na ni 98 myaga nigu kha vbweti gu ema gu thumeya Jehovha. Uye a ngo simama gu dzi garadzeya gu thumeya Jehovha gumogo ni vandriyathu va libandlani gwaye.

11. Hi nga yeyedza kharini gu khethu hi ngu ninga lisima vandriyathu va dandridego khu tanga va vbanyago ga malanga gu khataledwago vadwali?

¹¹ Hi nga yeyedza kharini gu khethu hi ngu ninga lisima vandriyathu va dandrigedo khu tanga va gomogo ga malanga aya gu khataledwago vadwali? Madhota ma nga va phasa khu gu va pata avba nya mithumo nya libandla, nya nga gu engiseya mwendro gu beya misthangano ni gu patega avba nya thumo nya gu tshumayele. Hi nga yeyedza gu khethu hi ngu khatala khavo khu gu va wuseya mwendro gu va ligareya khu video chamada. Ha gu ba hiti ndriyathu a dandridego khu tanga a vbanyago ga malanga gu khataledwago vadwali, ganiolu na gu vbanya hwindzo ni libandla laye, hi yede gu mu khataleya gwadi. Ha gu mba dzi woneya, si nga gira hi divala vandriyathu vava va dandrigedo khu tanga. Vambe vandriyathu va dandridego khu tanga, adzina kha si va vbevbugeyi gu bhula mwendro gu ganeya khu matshango yawe, ganiolu ha gu va gira siwudziso hi bwe hi va engiseya na va hi bhuleya khu gutsaka va gu manidego thumoni wa Jehovha, si na hi tiyisa ngudzu.

12. Libandlani gwathu hi nga mana vandriyathu nyo khale kharini?

¹² Libandlani gwathu hi nga mana vandriyathu nyo tumbege va dandrigedo khu tanga va gu na ni giyeyedzo nya gyadi gwathu. Ndriyathu moyo nya nyamayi nyo pwani khu Harriette, thumede Jehovha khu myaga nya yingi libandlani gwaye Nova Jersey Estados Unidos. Khavbovbo, uye a di fuluga aya vbanya ni gyanana gyaye nya gyadzyana. Vandriyathu va libandlani laye nya liphya va dzi garadzede gu muti gwadi nigu va tugude gu khavo uye na ni lisima ngudzu. Ndriyathu Harriette, a va tshamusede matimu nyo khaguri maningano ni thumo nyo tshumayele ga tepo a nga hevbula khiyo lisine umo nya 1925. Ga tepo yile, a gu ba a hongola thumoni nya gu tshumayele, uye tepo yatshavbo a di gu theya xikovha pastani, kholu a di gu dziti gu khuye ga dzimbe dzi tepo uye a di hadzi modwa a khotedwa. Khu lisine, khu 1933 modwe guvili, aya vbedza semana mweyo pasoni. Mwama waye a di siri Fakazi, ganiolu a di gu mu seketeya, nigu ga tepo a nga ba ari pasoni, uye a di gu khataleya sanana sawe sa siraru. Khu lisine, vandriyathu nyo tumbege nya nga Harriette va dandridego khu tanga va ngu ninganedwa khu gu hakha githavo gyathu.

13. Ginani hi gi hevbudego khu lisima eli vandriyathu va dandrigedo khu tanga va gu nalo hengeledzanoni ya Jehovha?

¹³ Vandriyathu va dandridego khu tanga va na ni lisima ga Jehovha ni ga hengeledzano yaye. Avo va si kodzide gu wona edzi Jehovha a va kategisedego khidzo ni idzo a kategisago khidzo hengeledzano yaye khu dzindziya nyo hambanehambane. Avo gambe va hevbude silo nya singi khu sihoso sawe. Wona vandriyathu vava kha nga “gifefe nya womi’ u bwe u hevbula silo nya singi khu matshango yawe. (Mav. 18:4) Wa gu dzi ninga tepo nya gu vati gwadi, gukhodwa gwago gu na tiya nigu u na hevbula nya singi gwawe.

14. Ginani egi Dhewuteronome 32:7 a hi kutsago gu gira?

¹⁴ Dzi emiseye gu bhula ni ava va dandrigedo khu tanga. (Leri Dhewuteronome 32:7.) Adzina saye avo kha va kodzi gu wona gwadi, nigu va mwalo tshivba nya gu ganeye ni gu gimbiya, ganiolu  avo va ngu dzina gu gireya nya singi Jehovha nigu va dzi girede “lina nya gu dzundzege” mahoni ga Jehovha. (Muh. 7:1) Tepo yatshavbo dundruga gu khuwe khu ginani Jehovha a wonago vandriyathu nyo dandre khu tanga kha nga vathu nya lisima. Simama gu yeyedza githavo khu vandriyathu va dandridego khu tanga. Gira esi a giridego Elisewu. Uye simamide gu khala ni Eliya ga matshigu yaye nyo hegise. Elisewu ganede dzitepo nya dzingi ga Eliya khuye: “Gima kha nyi na nga gu diga.” —  2 Kor. 2:2, 4, 6.

15. Siwudziso muni hi nga gireyago vandriyathu va dandridego khu tanga?

¹⁵ Yeyedza gu khuwe u ngu khathala khu vandriyathu va dandridego khu tanga khu gu va gira siwudziso nya sadi. (Mav. 1:5; 20:5; 1 Thim. 5:1, 2) U nga va gira siwudziso nya nga esi: “Tepo u nga ba uri muphya, ginani gi nga gu gira u tiyisega gu khuwe u di li mane lisine?” “Siemo u tshanganidego naso si gu phaside kharini gu dzipwa vbafuvbi ni Jehovha?” “Ginani gi gu phasidego gu simama gu thumeya Jehovha khu gu tsaka”? (1 Thim. 6:6-8) Khu ndziya yoyo va engiseye gwadi tepo va tshamuseyago matshango yawe.

16. Vandriyathu nyo dandre khu tanga ni vaphya va nga phasega kharini va gu dzi ninga tepo nya gu bhule vatshavbo?

¹⁶ Tepo vandriyathu va dandrigedo khu tanga ni vaphya va bhulago vatshavbo, va gu tiyisana. (Rom. 1:12) Vaphya va gu engedzeya gu tumba nya gu khavo Jehovha a ngu sayisa sithumi saye nyo tumbege, nigu ava va dandridego khu tanga va gu dzipwa na va gu haladzwa. Vandriyathu va dandridego khu tanga va na tsaka ngudzu khu gu gu tshamuseya matshango yawe nya edzi Jehovha a va kategisidego khidzo womini wawe.

17. Khu ginani hi nga ganeyago gu khethu vandriyathu nyo tumbege va dandridego khu tanga va gu engedzeya gu mbura tepo myaga yi vbindrago?

¹⁷ Khu lisine gumbura nya givili gu ngu vbeya tepo vathu va gumbago, ganiolu vale va simamago na va tumbegide Jehovha a gu wona na va mburide tshigu ni tshigu. (1 Tes. 1:2, 3) Khu ginani hi ganeyago isoso? Khu gu avo tepo yatshavbo va di gu dzumeya gu gimbidziswa khu liphuvbo la Nungungulu, li bwe li va phasa gu haguleya makhalelo nya yadi. Tepo hi tigo gwadi vandriyathu vava nya gu hathege hi bwe hi hevbula nya singi gwawe ho dzegeya gu si wona gu khethu khu lisine avo sinigwa nya lisima.

18. Ginani hi na gi wonago avba nya ndrima yi landreyago?

¹⁸ Libandla la gu engedzeya gu tiya tepo vaphya va wonago vandriyathu va dandridego khu tanga kha nga vathu nya lisima, ni tepo vandriyathu va dandridego khu tanga va wonago vaphya kha nga vathu nya lisima. Avba nya ndrima yi landreyago hi na wona edzi vandriyathu va dandridego khu tanga va nga yeyedzago khidzo gu khavo va ngu ninga lisima vaphya va gomogo libandlani.