1, 2. 1) Chuna la wan Proverbios 16:31, ¿la xlilat nakaʼakxilhaw kinatalankan tiku linkgoya kata? 2) ¿Tuku takgalhskinin nakgalhtiyaw kʼuma artículo?

AKXNI diamantes nina kamakxakakanit ni lakgskgokgo chu ni lu xtapalh o ni lu lakstlan kaliʼakxilhaw. Wa xlakata, komo chatum lataman naʼakxilha akgtum diamante nema ni tamakxakanit max ni katikatsilh tuku akxilhma chu ni kuenta katitlawanilh.

² Kinatalankan tiku linkgoya kata chu ni makgxtakgkgo Jehová, xtachuna la diamantes: lu xtapalh litaxtukgo. Xtachuwin Dios tamalakxtumi xʼaktsasatkan la akgtum corona (kalikgalhtawakga Proverbios 16:31; 20:29). Pero max ni kuenta natlawayaw la xlilhuwa xtapalh litaxtukgo. Lakgkgawasan chu laktsuman tiku lu xtapalh kaliʼakxilhkgo natalan tiku linkgoya kata tekgskgo tuku tlakg xtapalh nixawa diamantes. Kʼuma artículo nakgalhtiyaw umakgolh akgtutu takgalhskinin: ¿tuku xlakata lakpuwan Jehová pi kinatalankan tiku linkgoya kata lu xtapalh litaxtukgo?, ¿la xlilakaskinka litaxtukgo kxkachikin? chu ¿tuku tlan natlawayaw xlakata nalitamakgtayayaw xliʼakxilhtitkan?

3. Chuna la wan Salmo 92:12-15, ¿tuku xlakata Jehová lu xtapalh kaliʼakxilha natalan tiku linkgoya kata?

³ Jehová lu xtapalh kaliʼakxilha natalan tiku linkgoya kata. Liwana kalakgapasa chu lu xtapalh kaʼakxilha lakstlan xtayatkan. Lu paxuwa xlakata kamatitaxtinikgo lakgkgawasan chu laktsuman liskgalala nema kgalhikgo xlakata akglhuwata kata skujnanikgonita Dios (Job 12:12; Prov. 1:1-4). Na lu xtapalh kaliʼakxilha xlakata lhuwa tuku tayanikgonit (Mal. 3:16). Maski kgalhikgonit taʼakglhuwit kxlatamatkan, ankgalhin limasiyakgonit  pi lu lipawankgo Jehová. La uku tlakg matliwakglhkgonit xtakgalhkgalhinkan nixawa akxni lakgapaskgolh xaxlikana. Chu Jehová kapaxki xlakata chuntiya lichuwinamakgolh xtukuwani maski linkgoya kata (kalikgalhtawakga Salmo 92:12-15).

4. ¿Tuku tlan nakamaʼakgpuwantini natalan tiku linkgoya kata?

⁴ Komo wix lipinata kata, liwana kakatsi pi Jehová lakapastaka putum tuku tlawanita kkilhtamaku nema titaxtunita (Heb. 6:10). Xatapaxuwan lichuwinanita xatlan tamakatsinin chu uma lu makgapaxuwa kinTlatkan xalak akgapun. Tayaninita taputsan, makgapitsi lu nitlan mamakgkatsininitan, kgalhmakgtayanita xaʼakgstitum xtastakyaw Biblia, makgantaxtinita lu xlakaskinka talakgatay chu kamasiyaninita amakgapitsin. Xlakata xkachikin Dios lhuwa tuku lakgpalinit wix na lu liskujnita xlakata natlawaya tuku talakaskin. Nachuna, kamakgtayanita chu kamaʼakgpuwantininita tiku skujnanimakgo Dios xliputum kilhtamaku. Jehová lu paxkiyan xlakata ni makgxtakga, chu xla malaknu pi «ni katikamakgxtakgli tiku ni makgxtakgkgo» (Sal. 37:28). Na liwana waniyan: «Asta akxni naʼaktsasana, akit chuntiya nakmakgtayayan» (Is. 46:4). Wa xlakata ni kalakpuwanti pi xlakata lipinata kata nialh xlakaskinka litaxtuya kxkachikin Jehová. ¡Xlikana pi xlakaskinka litaxtuya!

5. ¿Tuku xlilakapastakatkan natalan tiku linkgoya kata?

⁵ Natalan tiku linkgoya kata lhuwa tuku tlan tlawakgo. Maski max nialh kgalhikgo litliwakga chuna la makgasa, lhuwa tuku katsinikgonit xlakata lhuwa kata latamakgonit. Jehová tlan chuntiya nakamaklakaskin xlakata naskujnanikgo, chuna la naʼakxilhaw kliʼakxilhtit xalamakgasa chu xalak kinkilhtamakujkan.

6, 7. Kalichuwinanti makgapitsi liʼakxilhtit xalak Biblia xlakata xlakskujnin Dios tiku xlinkgoya kata chu makgamakglhtinankgolh tasikulunalin xlakata ni makgxtakgnankgolh.

⁶ Anta kBiblia tekgsaw xliʼakxilhtitkan tiku chuntiya skujnanikgolh Jehová maski xlinkgoya kata. Chatum wa Moisés, tiku max 80 kata xkgalhi akxni palakachuwina litaxtulh chu xpulalima kachikin Israel. Atanu liʼakxilhtit wa Daniel, tiku max liwaka 90 kata  xkgalhi chu chuntiya kskujnanima Jehová chuna la palakachuwina. Chu nachuna apóstol Juan tiku liwaka 90 kata xkgalhi akxni Dios timalakpuwanilh natsokgwili libro xla Apocalipsis.

⁷ Maski ni lu xkalakgapaskan, latamakgolh makgapitsi xlakskujnin Dios tiku ni makgxtakgkgolh, tiku max ni lu kuenta xkatlawanikan. Pero Jehová kuenta katlawanilh chu kasikulunatlawalh xlakata ni makgxtakgkgolh. Akgtum liʼakxilhtit, Biblia ni lhuwa tuku wan xpalakata «chatum chixku tiku xwanikan Simeón», tiku «xaʼakgstitum xwanit chu kskujnani Dios», pero Jehová liwana xlakgapasa chu maxkilh talakgalhaman naʼakxilha Jesús akxni skgataku xwanit, chu maxkilh talakaskin nawan xpalakata Jesús chu xpalakata xtse tuku xʼama kgantaxtu kkilhtamaku nema aku xmima (Luc. 2:22, 25-35). Na kalakapastakwi palakachuwina Ana, tiku xninita xchixku chu xkgalhi 84 kata. Xla putum kilhtamaku xʼan ktemplo. Jehová sikulunatlawalh xlakata ni makgxtakgli chu maxkilh talakaskin naʼakxilha Jesús akxni skgataku xwanit. Xlikana pi Jehová lu xtapalh xkaʼakxilha Simeón chu Ana (Luc. 2:36-38).

8, 9. ¿Tuku chuntiya limakgtayanankgo natalan lakpuskatin tiku nialhtu lamakgo xchixkukan?

⁸ Kkinkilhtamakujkan, lhuwa natalan tiku linkgoya kata tlan liʼakxilhtit kalitaxtunikgo lakgkgawasan chu laktsuman. Kaʼakxilhwi xliʼakxilhtit tala puskat tiku wanikan Lois Didur. Akxni kajku 21 kata xkgalhi, tsukulh skuja la precursora especial kCanadá. Alistalh, xla chu xchixku, John, akglhuwa kata skujkgolh la superintendente de circuito. Alistalh, skujkgolh kBetel xalak Canadá liwaka 20 kata. Akxni xkgalhi 58 kata, kawanika pi xʼankgolh skujnanikgo Dios kʼUcrania. ¿Tuku xtlawakgolh? ¿Xlakpuwankgolh pi xlinkgoya kata chu pi nila xʼankgolh latamakgo kʼatanu país? Makgamakglhtinankgolh invitación, chu John lakgayawaka namakgtapakgsi kComité de sucursal. Titaxtulh akgtujun kata, John nilh, chu Lois tamakgxtakgli niku kskujnanimakgolh Dios. La uku Lois kgalhi 81 kata chu chuntiya skujnanima Jehová kBetel xalak Ucrania, chu natalan lu paxkikgo.

⁹ Max makgapitsi natalan lakpuskatin, chuna la Lois, ni lu kalakgapaskan nixawa akxni xlamakgolh xchixkukan, pero Jehová chuntiya lu xtapalh kaliʼakxilha. Xla lu xtapalh liʼakxilha tamakgtay nema akglhuwa kata kamaxkikgolh xchixkukan, chu chuntiya skujnanimakgolh Jehová chu ni makgxtakgkgo (1 Tim. 5:3). Nachuna, umakgolh natalan, lu kamakgpuwantinikgo lakgkgawasan chu laktsuman.

10. ¿Tuku kinkamasiyaniyan xatlan xliʼakxilhtit Tony?

¹⁰ Lhuwa natalan tiku akglhuwata kata kgalhikgo chu wilakgolh niku kakuentajtlawakan tiku linkgoya kata, na lu xtapalh litaxtukgo. Akgtum liʼakxilhtit, chatum tala tiku wanikan Tony, tamunulh kPensilvania (Estados Unidos) agosto kkata 1942 akxni xkgalhi  20 kata. Titaxtulh kilhtamaku, tamaknuka kpulachin akgtiy kata aitat xlakata ni tlawaputulh servicio militar. Xla chu xpuskat Hilda, makgastakkgolh chatiy xkamanankan kxaxlikana. Titaxtulh kilhtamaku, Tony liskujli la superintendente presidente kʼakgtutu congregaciones (tuku la uku lilakgapaskan coordinador del cuerpo de ancianos) chu na liskujli la superintendente de asamblea de circuito. Na xpulalin tamakxtumit chu xlimakgalhtawakgenan Biblia kʼakgtum pulachin. Maski la uku kgalhi 98 kata, ni lakpuwan pi nialhla tu natlawa. Chuntiya tlawa putum tuku matlani xlakata naskujnani Jehová chu lu makgtayanama kxcongregación.

11. ¿La tlan nalimasiyayaw pi kamaxkiyaw kakni natalan tiku wilakgolh niku kakuentajtlawakan tiku linkgoya kata o nialhla taxtukgo kxchikkan?

¹¹ ¿Tuku natlawayaw xlakata nakalimasiyaniyaw kakni natalan tiku wilakgolh niku kakuentajtlawakan tiku linkgoya kata o nialhla taxtukgo kxchikkan? Chuna la matlanikgo, lakgkgolotsin xalak congregación tlan nakamakgtayakgo xlakata nalichuwinankgo Dios chu naʼankgo ktamakxtumit o nakgaxmatkgo. Tlan nakalimasiyaniyaw pi kalilakgaputsayaw komo nakalakgapaxialhnanaw o nakatlawaniyaw videollamada. Xlakaskinka kuenta nakatlawayaw tiku ni lakatsu wilakgolh niku wi congregación. Xlakaskinka ni nakapatsankgayaw. Max makgapitsi tuwa makgkatsikgo nalichuwinankgo xpalakatakan o lakpuwankgo pi nichuna xlilat. Pero tlan nakinkakitaxtuniyan akxni nalimaxtuyaw kilhtamaku komo nakakgalhskinaw tuku tlan titaxtukgonit kxkachikin Jehová chu kuenta natlawayaw tuku nakinkalitachuwinankgoyan.

12. ¿Tuku tlan natekgsaw kkincongregacionkan?

¹² Max kaks nalilakawanaw akxni naʼakxilhaw pi kkincongregacioneskan wilakgolh natalan tiku linkgoya kata chu lu tlan liʼakxilhtit litaxtukgo xlakata ni makgxtakgkgo Dios. Chatum tala xalak Estados Unidos tiku wanikan Harriette akglhuwa kata skujnanilh Jehová kxcongregación anta kNueva Jersey. Alistalh alh latama niku xwi xtsumat. Kxasasti congregación niku chalh, natalan limaxtukgolh kilhtamaku xlakata nalakgapaskgo chu akxilhkgolh pi xla lu xtapalh xlitaxtu. Xla kalimakgpuwantinilh tuku xtitaxtunit akxni xlichuwinan Dios, max kkata 1925, akxni lakgapasli xaxlikana. Amacha kilhtamaku, akxni xlichuwinan Dios, ankgalhin xlin cepillo nema xlikgalhchakgalh komo xlinka kpulachin. Kkata 1933, tamaknuka kpulachin akgtum semana. Makgtiy chuna titaxtulh. Akxni xtanuma kpulachin, xchixku, tiku ni xtatayana Jehová xlitaxtu, xmakgtaya chu xkakuentajtlawa kgalhtutu xkamanan. Xlikana, natalan tiku linkgoya kata chu ni makgxtakgkgo Dios chuna la Harriette kalakgchan pi lu xtapalh nakaliʼakxilhaw.

13. ¿Tuku katsinitaw xlakata la kaʼakxilha Jehová natalan tiku linkgoya kata?

¹³ Kinatalankan tiku linkgoya kata lu xlakaskinka litaxtukgo kxkachikin Jehová. Akxilhkgonit la Jehová kasikulunatlawanit chu la sikulunatlawanit xkachikin. Lhuwa tuku katsinikgonit xlakata tuku nitlan tlawakgonit. Wa xlakata kalitamakgtayaw tuku titaxtukgonit chu kalitamakgtayaw xliskgalalakan (Prov. 18:4). Komo nalimaxtuyaw kilhtamaku xlakata liwana nakalakgapasaw, natatliwakglha kintakanajlakan chu tlakg lhuwa tuku nakatsiniyaw nixawa la xlakpuwanaw.

14. ¿Tuku tastakyaw kamaxki Deuteronomio 32:7 lakgkgawasan chu laktsuman?

¹⁴ Kakalakgtalakatsuwiniw chu kakatachuwinaw kinatalankan tiku linkgoya kata (kalikgalhtawakga Deuteronomio 32:7).  Xlikana pi max nialh liwana akxilhkgo chuna la makgasa, max lakgasiyu tlawankgo chu nialh lu takgaxmata la chuwinankgo. Pero chuntiyaku skujnaniputunkgo Dios chu kgalhikgo «akgtum tlan tukuwani» kxlakatin Jehová (Ecl. 7:1, nota). Kalakapastakwi tuku xlakata Jehová xtapalh kaliʼakxilha chu chuntiya kakamaxkiw kakni. Kalikatsiw chuna la Eliseo, tiku ni makgxtakgli Elías chu wa pi anta xʼama tatamakgxtakga. Makgtutu wanilh: «Ni ktimakgxtakgni» (2 Rey. 2:2, 4, 6).

15. ¿Tuku tlan nakakgalhskinaw natalan tiku linkgoya kata?

¹⁵ Kakalimasiyaniw kinatalankan tiku linkgoya kata pi xlikana kalilakgaputsayaw akxni tlawayaw takgalhskinin (Prov. 1:5; 20:5). Akgtum liʼakxilhtit, tlan xkakgalhskiw: «Akxni nina xlipina kata, ¿tuku makgtayan xlakata nakatsiya pi xtekgsnita xaxlikana?», «¿Tuku titaxtunita nema tlawalh pi tlakg natalakatsuwiniya Jehová?», «¿Tuku makgtayanitan xlakata xatapaxuwan naskujnaniya Jehová?» (1 Tim. 6:6-8). Alistalh kakakgaxmatniw tuku nakinkawanikgoyan.

16. Akxni chatum tiku nina lin kata tachuwinan chatum tala tiku lina kata, ¿tuku xlakata xchatiykan lamaʼakgpuwantini?

¹⁶ Akxni chatum tiku nina lin kata tachuwinan chatum tala tiku lina kata, xchatiykan lamaʼakgpuwantini (Rom. 1:12). Tiku nina lin kata liwana nakatsi pi Jehová kakuentajtlawa xlakskujnin tiku ni makgxtakgkgo, chu tiku lina kata namakgkatsi pi paxkikan chu nalipaxuwa akxni nalichuwinan la makgtayanit Jehová kxlatamat.

17. ¿Tuku xlakata wanaw pi natalan tiku linkgoya kata tlakg stlan tasiyakgo maski titaxtutilha kilhtamaku?

¹⁷ Xlikana pi chuna la titaxtu kilhtamaku la stlan tasiyakan talakgpali. Pero chuna la titaxtutilha kilhtamaku Jehová tlakg stlan kaʼakxilha xlakskujnin tiku ni makgxtakgkgo (1 Tes. 1:2, 3). ¿Tuku xlakata? Xlakata chuna la titaxtutilha kata, mastakgonit talakaskin pi xʼespíritu santo Dios nakamakgtaya xlakata nakgalhikgo tlan tayat. Akxni tlakg nakalakgapasaw kinatalankan tiku linkgoya kata chu akxni tlakg lhuwa tuku nakatsiniyaw xpalakatakan, uma natlawa pi lu xtapalh nakaliʼakxilhaw.

18. ¿Tuku naʼakxilhaw kʼartículo nema stala?

¹⁸ Xlikana pi congregación ni kajwatiya tatliwakglha akxni lakgkgawasan chu laktsuman lu xtapalh kaliʼakxilhkgo tiku linkgoya kata, wata na tatliwakglha akxni tiku linkgoya kata lu xtapalh kaliʼakxilhkgo lakgkgawasan chu laktsuman. Kʼartículo nema stala, naʼakxilhaw la nalimasiyakgo tiku linkgoya kata pi lu xtapalh kaliʼakxilhkgo lakgkgawasan chu laktsuman xalak congregación.