1-2. (a) Olsem Provep 16:31 i kamapim, yumi mas i gat wanem tingting long ol lapun bratasista? (b) Yumi bai skelim wanem ol askim long dispela atikol?

I GAT wanpela pak long Arkansas, long Amerika we yu inap painim ol daimon i slip nating long graun. Na ol dispela daimon em ol i no bin katim na polisim long en. Olsem na planti man em ol i wokabaut i go, ol i no inap luksave olsem em ol daimon na ol i wokabaut abrusim tasol ol dispela samting i dia tumas.

² Ol lapun bratasista i kain olsem ol dispela daimon; ol i samting i dia tumas. Baibel i tok waitpela gras bilong ol i olsem kraun long het bilong ol. (Ritim Provep 16:31; 20:29) Tasol sampela taim yumi no inap luksave olsem ol i dia tumas. Taim ol yangpela i luksave olsem ol lapun bratasista i dia tumas, dispela inap helpim ol. Long dispela atikol, yumi bai bekim 3-pela askim: Wai na Jehova i tingim ol lapun bratasista olsem ol samting dia tumas? Wai na ol lapun i dia tumas long oganaisesen bilong Jehova? Yumi inap mekim wanem long kisim skul long eksampel bilong ol?

3. Olsem Buk Song 92:12-15 i kamapim, wai na ol lapun i dia tumas long Jehova?

³ Ol lapun em ol i stap gut long God Jehova, ol i dia tumas long em. Em i lukim bel bilong ol, na em i save long ol i wanem kain man na meri na em i tingim tru ol gutpela pasin bilong ol. Em i amamas taim ol lapun i trenim ol yangpela long ol savetingting em ol i bin kisim insait long planti yia ol i bin mekim wok bilong God. (Jop 12:12; Prov. 1:1-4) Jehova i tingim tu  pasin bilong ol long sanap strong na karim hevi. (Mal. 3:16) Ol i bin karim planti hevi, tasol ol i holimpas bilip bilong ol long Jehova. Bilip bilong ol long ol samting bai kamap bihain i strong moa, winim namba 1 taim ol i bin kisim save long tok i tru. Na Jehova i laikim ol bikos ol i wok yet long tokaut long nem bilong em “maski ol i lapun pinis.”​—Ritim Buk Song 92:12-15.

4. Wanem samting inap strongim ol lapun bratasista bilong yumi?

⁴ Sapos yu wok long kamap lapun, orait yu ken save olsem Jehova i tingim tru ol wok yu bin mekim long bipo. (Hib. 6:10) Yu bin givim bel tru long sapotim wok bilong autim tok, na dispela i amamasim Papa bilong yumi long heven. Yu bin sanap strong long karim ol hevi, na ol bikpela hevi tu—yu bin bihainim ol stretpela lo bilong Baibel, na mekim planti bikpela wok, na trenim ol narapela. Yu bin givim bes bilong yu long sapotim ol senis em oganaisesen bilong Jehova i wok long mekim. Yu bin sapotim na strongim ol narapela taim ol i insait long fultaim sevis. Jehova God i laikim yu tru long yu stap gut long em. Em i promis olsem “em bai i no inap givim baksait long ol man i stap gut long em.” (Sng. 37:28) Em i mekim dispela promis olsem: “I go inap gras bilong yupela i kamap waitpela, mi bai sapotim yupela yet.” (Ais. 46:4) Olsem na no ken ting olsem yu wok long kamap lapun na nau yu no dia tumas long oganaisesen bilong Jehova. Yu dia tumas!

5. Ol lapun i mas tingim wanem samting?

⁵ Ol lapun inap mekim planti samting long oganaisesen bilong God. Maski ol i no gat wankain strong olsem bipo, ol i gat planti ekspiriens em ol i bin kisim long ol yia i go pinis. Jehova inap wok yet long yusim ol long kain kain rot, olsem ol eksampel bilong bipo na bilong nau i soim.

6-7. Baibel i stori long wanem ol lapun em Jehova i blesim ol long pasin bilong ol long stap gut long em?

⁶ Long Baibel yumi inap painim ol gutpela eksampel bilong ol bilipman em ol i mekim wok bilong Jehova i go inap long ol i lapun tru. Olsem, Moses i bin gat 80 krismas taim em i kirap long mekim wok olsem wanpela  profet na mausman bilong Jehova long lain Israel. Jehova i yusim yet profet Daniel olsem mausman bilong em taim em i gat 90 krismas. Na tu, aposel Jon i gat 90 krismas samting taim God i stiaim em long rot bilong holi spirit long raitim Buk Revelesen.

⁷ Planti narapela lapun em ol i stap gut long God, stori bilong ol i no stap long Baibel na ol man i no luksave long ol. Maski i olsem, Jehova i luksave long ol na em i blesim pasin bilong ol long stap gut long em. Eksampel, Simeon em man bilong “mekim stretpela pasin na daun long God,” tasol Baibel i no stori planti long em. Maski i olsem, Jehova i save long em na onarim em taim em i larim Simeon i lukim bebi Jisas na mekim tok profet long dispela bebi na mama bilong em. (Luk 2:22, 25-35) Tingim tu profet meri Ana, em i wanpela wido. Em i gat 84 krismas, tasol “em i save go long tempel long olgeta taim.” Em i lukim bebi Jisas, na dispela em blesing em i kisim long God long pasin bilong em long go oltaim long tempel. Simeon na Ana wantaim i dia tumas long Jehova.​—Luk 2:36-38.

8-9. Hau ol wido i wok yet long sapotim oganaisesen bilong God?

⁸ Long nau, planti lapun em ol i stap gut long God, ol i stap gutpela eksampel long ol yangpela. Tingim ekspiriens bilong Sista Lois Didur. Em i gat 21 krismas taim em i kirap long mekim wok olsem spesel painia long Kanada. Bihain long dispela, em na man bilong em John i mekim wok wasman raun inap planti yia. Bihain ol i mekim wok long Betel long Kanada winim 20 yia. Taim Lois i gat 58 krismas, em na John i kisim asainmen long i go wok long Yukren. Tupela bai mekim wanem? Yu ting tupela bai kisim tingting olsem ol i lapun pinis na ol i no inap mekim wok long narapela kantri? Tupela i orait long kisim dispela asainmen, na ol i makim John long mekim wok olsem wanpela memba bilong Brens Komiti long hap. Inap 7-pela yia bihain John i dai, na Lois i tingting strong long stap yet long asainmen bilong em. Nau Lois i gat 81 krismas, na em i mekim yet wok bilong Jehova wantaim Betel famili long Yukren na ol i laikim em tru.

⁹ Ating ol narapela i no luksave long ol wido kain olsem Lois taim man bilong ol i dai; maski i olsem, ol i dia tumas long God. Jehova i tingim tru ol sista husat i sapotim man bilong ol inap planti yia na nau ol i wok yet long stap gut long em. (1 Tim. 5:3) Na tu, ol i strongim tru ol yangpela.

10. Hau Tony i stap gutpela eksampel tru?

¹⁰ Planti lapun em ol i bin stap gut long God em nau ol i stap long ol nesing hom, ol tu i dia tumas. Olsem, wanpela brata nem bilong em Tony, nau em i stap long nesing hom. Em i kisim baptais long Pennsylvania, long Amerika long Ogas 1942 taim em i gat 20 krismas. Bihain stret long em i kisim baptais, ol i tokim em long insait long ami tasol em i no laik  mekim olsem, so ol i salim em i go stap 2 na hap yia long kalabus. Em na meri bilong em Hilda, i mekim bikpela long tupela pikinini insait long tok i tru. Insait long ol yia i go pinis, Tony i mekim wok long 3-pela kongrigesen olsem wasman siaman (nau ol i kolim kodineta bilong lain elda) na wasman bilong kibung sekit. Na em i save mekim ol miting na ol Baibel stadi long wanpela haus kalabus. Nau Tony i gat 98 krismas na em i mekim yet wok bilong Jehova. Em i givim bes bilong em long mekim wok bilong Jehova na em i wok gut wantaim kongrigesen long hap bilong em.

11. Hau yumi ken soim ona long ol lapun em ol i stap ol yet o ol i stap wantaim ol wanfamili em ol i no Witnes?

¹¹ Hau yumi ken soim ona long ol lapun em ol i stap ol yet o ol i stap wantaim ol wanfamili em ol i no Witnes? Taim rot i op, ol elda i ken helpim ol long insait long ol miting o long putim yau long miting, na tu, long autim tok. Yumi ken soim olsem yumi tingim ol long rot bilong visitim ol o toktok wantaim ol long rot bilong vidio. Yumi laik tingim tru ol lapun em ol i stap ol yet o ol i stap wantaim ol wanfamili em ol i no Witnes na ol i stap longwe long kongrigesen bilong ol. Sapos yumi no was gut, yumi inap lusim tingting long ol dispela lapun bratasista. Taim yumi stori wantaim ol lapun bratasista, sampela bilong ol inap pilim olsem i no stret long ol i stori long ol yet. Tasol yumi bai kisim bikpela helpim tru taim yumi lusim haptaim long toktok wantaim ol na putim gut yau taim ol i stori long ol ekspiriens na ol amamas ol i kisim insait long oganaisesen bilong Jehova.

12. I gat wanem kain ol brata na sista long kongrigesen bilong yumi?

¹² Yumi bai kirap nogut long save olsem i gat ol lapun em ol i stap gutpela eksampel long stap gut long God na ol i stap insait long kongrigesen bilong yumi. Wanpela sista nem bilong em Harriette, i mekim wok bilong Jehova inap planti yia long kongrigesen bilong em long New Jersey, long Amerika. Bihain em i muv i go stap wantaim pikinini meri bilong em. Ol bratasista long nupela kongrigesen bilong em i lusim haptaim long save gut long em, na ol i painimaut olsem em i gat planti gutpela ekspiriens. Em i stori long wok autim tok em i bin mekim taim em i kisim save long tok i tru long 1920 samting, na dispela i strongim ol. Long dispela taim, oltaim em i save karim wanpela tit bras i go wantaim em taim em i go autim tok bikos ol inap arestim em na putim em long kalabus. Long 1933, tupela taim ol i bin kalabusim em na em i stap wanpela wik long kalabus. Long dispela taim, man bilong em husat i no wanpela Witnes i lukautim 3-pela pikinini bilong ol. Tru tumas, ol lapun i gat strongpela bilip olsem Harriette, ol i dia tumas!

13. Yumi kisim wanem skul long ol lapun em ol i dia tumas long oganaisesen bilong Jehova?

¹³ Ol lapun bratasista bilong yumi ol i dia tumas long Jehova na oganaisesen bilong em. Long planti rot ol i bin lukim hau Jehova i blesim oganaisesen bilong em na em i blesim ol tu. Ol i kisim ol bikpela skul long ol popaia ol bin mekim. Tingim ol olsem “hulwara bilong savetingting,” na kisim skul long ekspiriens bilong ol. (Prov. 18:4) Sapos yu lusim sampela haptaim long kisim save long ol, bilip bilong yu bai kamap strong na bai yu lainim planti samting!

14. Lo 32:7 i kirapim ol yangpela long mekim wanem?

¹⁴ Yumi mas go pas long toktok wantaim ol lapun bratasista. (Ritim Lo 32:7.) Tru ai bilong ol i no gutpela, na ol i no inap wokabaut gut, na toktok bilong ol i no strong moa, tasol  ol i laik givim bel yet long mekim wok bilong God, na ol i gat “gutpela nem” long ai bilong Jehova. (Ekl. 7:1) Tingim risen na Jehova i tingim ol olsem ol i dia tumas. Wok yet long givim ona long ol. Kamap olsem Elisa. Em i strong long stap wantaim Elaija long laspela de bilong tupela long stap wantaim. Inap 3-pela taim Elisa i tok: “Mi no inap lusim yu.”​—2 Kin. 2:2, 4, 6.

15. Yumi inap givim wanem ol askim long ol lapun?

¹⁵ Soim olsem yu tingim ol lapun bratasista taim yu givim ol askim. (Prov. 1:5; 20:5; 1 Tim. 5:1, 2) Kamapim kain ol askim olsem: “Taim yu yangpela, wanem samting i kirapim yu long bilip olsem yu painim pinis tok i tru?” “Olsem wanem ol samting i painim yu i helpim yu long i go klostu moa long Jehova?” “Wanem samting i helpim yu long stap amamas yet insait long wok bilong Jehova?” (1 Tim. 6:6-8) Na yu ken putim yau taim ol i kamapim stori bilong ol.

16. Olsem wanem pasin bilong toktok gut inap helpim lapun na ol yangpela wantaim?

¹⁶ Taim wanpela lapun na wanpela yangpela i toktok wantaim, tupela inap strongim narapela narapela. (Rom 1:12) Yupela ol yangpela bai strongim pasin bilong yupela long bilip tru olsem Jehova i save lukautim lain bilong em, na dispela lapun brata o sista bai pilim olsem yupela i laikim em tru. Em bai amamas long tokim yupela long hau Jehova i bin blesim em.

17. Wai na ol bratasista em ol i stap gut long God i kamap naispela tru long ai bilong em taim ol i go lapun?

¹⁷ Taim man i go lapun, naispela lukluk bilong em i save pinis. Tasol ol man i stap gut long Jehova, ol i save kamap naispela tru long ai bilong em taim ol i go lapun. (1 Tes. 1:2, 3) Wai na dispela tok em i tru? Dispela tok em i tru bikos insait long planti yia i go pinis, ol i larim holi spirit bilong God i stretim stretim ol na helpim ol long kisim ol naispela pasin. Taim yumi lusim haptaim long save gut long ol lapun bratasista bilong yumi, onarim ol, na kisim skul long ol, yumi bai tingim ol olsem ol i dia tumas!

18. Bai yumi skelim wanem samting long neks atikol?

¹⁸ Kongrigesen i save kamap strong moa taim ol yangpela i tingim tru ol lapun olsem ol i dia tumas, na tu, taim ol lapun i amamas long ol yangpela. Long neks atikol, yumi bai stori long hau ol lapun bratasista inap soim olsem ol i tingim ol yangpela olsem ol i dia tumas insait long kongrigesen.