1-2. (a) Cimida ishanttanne michchontta nuuni waati xeellana koshshiyaakko Leemiso 16:31ppe ay tamaarana danddayiyoo? (b) Nuuni ha huuphe yohuwan zaarana oyshati awugeetee?

ALMAAZE giyo alˈˈo shuchchaa massidi giigissana xayikko, phoolenna woy xeellanawu loˈˈenna. Yaatiyo gishshawu, issi uri giigibeenna almaaziyaa beˈiyaakko, I beˈiyoobay aybakko akeekennan aggananne he alˈˈobaa yedhdhi kanttana danddayees.

² Cimida ishanttinne michchontti he almaazetudan keehi alˈˈo. Xoossaa Qaalay cimidaageetu puuluntta kallachchan leemisees. (Leemiso 16:31 nabbaba; 20:29) Gidoppe attin, he alˈˈobaa nuuni akeekennan aggana danddayoos. Yelagati cimidaageeti alˈˈo gidiyoogaa akeekiyo wode, duretettaappe keehi aadhdhiya alˈˈobaa demmoosona. Ha huuphe yohuwan heezzu oyshatu zaaruwaa beˈana: Yihooway ammanettida cima ishanttanne michchontta alˈˈobadan xeelliyoy aybissee? Cimida ishanttinne michchontti Yihoowa dirijjitiyawu keehi koshshiyoy aybissee? Nuuni eti oottidobaappe tamaaranawu waatana danddayiyoo?

3. Mazamure 92:12-15y yootiyoogaadan, Yihooway ammanettida cima ishanttanne michchontta alˈˈobadan xeelliyoy aybissee?

³ Ammanettida cima ishanttinne michchontti Xoossaa Yihoowawu alˈˈo. I eti ay mala asakko ereesinne etassi deˈiya keehi loˈˈo eeshshata nashshees. Cimidaageeti ammanettidi daro layttawu haggaaziyoogan demmido aadhdhida eratettaa yelagatuyyo yootiyo wode I ufayttees. (Iyy. 12:12; Lee. 1:1-4) Eti  gencciyoogaakka Yihooway nashshees. (Mil. 3:16) Metoy eta gakkikkonne, eti Yihoowa mintti ammanidi deˈidosona. Eta hidootay tumaa eti koyro erido wodeegaappe aaruwan mino. Eti “ceeggidikka” Yihoowa sunttaa ubbatoo awaajjiyo gishshawu I eta siiqees.—Mazamure 92:12-15 nabbaba.

4. Cima ishanttanne michchontta minttettana danddayiyaabay aybee?

⁴ Intte cimidaba gidikko, kase oottidobaa Yihooway hassayiyoogaa ammanettite. (Ibr. 6:10) Sabbakiyo oosuwaa intte minnidi oottidoogee saluwan deˈiya nu Aawaa ufayssees. Keehi azzanttiya metootakka intte genccideta. Geeshsha Maxaafay yootiyo xillotettaa maarata intte naagidetanne etawu exatideta, keehi koshshiya oosota Yihoowa dirijjitiyan ammanettidi oottidetanne harata loohissideta. Yihoowa dirijjitee laammido darobaa meezetanawu intteyyo danddayettida ubbabaa oottideta. Ubba wode haggaaziya harata intte minttettideta. Intte ammanettiyaageeta gidiyo gishshawu Xoossaa Yihooway inttena keehi siiqees. ‘Xoossay ba asata yeggennan’ agganawu qaalaa geliis. (Maz. 37:28) I hagaadan giis: “Intte puulummana gakkanaashinkka, taani inttena maaddana.” (Isi. 46:4) SHin, intte cimido gishshawu hagaappe simmin Yihoowa dirijjitiyan maaddikke giidi qoppoppite. Intte keehi maaddeeta!

5. Cimidaageeti hassayana koshshiyoobay aybee?

⁵ Cimidaageeti Yihoowa dirijjitiya daro ogiyan maaddana danddayoosona. Etayyo kaseegaa keena wolqqay baynnaba gidikkonne, eti daro layttan demmido keehi darobay etawu deˈees. Kaallidi deˈiya beni wodenne ha wodiyan hanidabati bessiyoogaadan, Yihooway eta ubbatoo dumma dumma ogiyan goˈettana danddayees.

6-7. Yihooway baayyo ammanettidi oottida cimidaageeta waati anjjidaakko Geeshsha Maxaafaappe yoota.

⁶ Cimido wodekka Yihoowawu aggennan minni oottiyoogan ammanettida loˈˈo leemiso gidiya asatubaa Geeshsha Maxaafay yootees. Leemisuwawu, Muusee Yihooway kiittin hananabaa yootiyaagaa gididi oottiyoogaa doommido wodenne Israaˈeela deriyaa kaalettiyaagaa gidanaadan doorettido  wode ayyo layttay 80 heera. Hananabaa yootiya Daaneelayyo layttay 90ppe darennan waayi aggana, gidikkonne Yihooway ba gishshaa haasayanaadan A goˈettiyoogaa aggibeenna. Qassi kiitettida Yohaannisi ayyaanay denttettin Ajjuutaa maxaafaa xaafiyo wode ayyo layttay 90ppe darennan waayi aggana.

⁷ Ammanettida hara daroti erettida asa gidokkona, qassi etabaa asay akeekennan aggana danddayees. SHin Yihooway etabaa akeekiisinne ammanettido gishshawu eta woytiis. Leemisuwawu, “Xoossau yayyiya xillo asa” giidi Geeshsha Maxaafay Simoonabaa guuttaba xallaa yootikkonne, Yihooway abaa erees; qassi guutta naˈaa Yesuusa beˈiyo, he naˈaanne A aayyiyo xeelliyaagan hananabaa yootiyo maataa ayyo immiis. (Luq. 2:22, 25-35) Hananabaa yootiya amˈˈee Haannibaakka qoppa. Iyyo layttay 84 gidikkonne A “Beeta Maqidasiyaappe kiyennan de7aasu.” A ubbatoo beeta maqidasiyaa biyo gishshawu guutta naˈaa Yesuusa beˈanaadan oottiyoogan Yihooway O anjjiis. Simoonikka Haannakka Yihoowawu alˈˈo.—Luq. 2:36-38.

8-9. Amˈˈe gidida issi michchiyaa Yihoowa dirijjitiyan oottidobay aybee?

⁸ Ha wodiyan, ammanettida daro cimati yelagatussi keehi loˈˈo leemiso. Michchee Loys Dideri hanotaa qoppa. A Kanaadan dumma aqinye gidada haggaaziyoogaa doommiyo wode iyyo layttay 21. Hegaappe simmin, anne I azinay Jooni yuuyidi xomoosiyo oosuwaa daro layttawu oottidosona. Guyyeppe eti Kanaada Beeteelen 20ppe dariya layttawu haggaazidosona. Loysiyyo layttay 58 gidido wode, anne Jooni Yukreenen haggaazanaadan odettiis. Eti waatanee? Hara biitti biidi haggaazanawu keehi cimida giidi qoppanee? Eti maddabettido sohuwaa bin, Jooni yan Macara Konttiyaa yara gididi haggaazanaadan sunttettiis. Laappun layttappe guyyiyan Jooni hayqqin, yan maddabettido sohuwan takkanawu Loysa kuuyaasu. Haˈˈi Loysiyyo layttay 81. A Yukreene Beeteele keetta asaara Yihoowawu ammanettada haggaazawusu, qassi eti O keehi siiqoosona.

⁹ Loysi mala amˈˈeta eta azinati paxa deˈiyo wodiyaagaadan harati akeekennan aggana danddayoosona; shin eti haˈˈikka keehi alˈˈo. Yihooway daro layttawu bantta azinata maaddida, qassi ayyo ammanettidi ha wodiyan aggennan oottiya michchontta keehi nashshees. (1 Xim. 5:3) Eti qassi yelagata minttettana danddayoosona.

10. Tooni loˈˈo leemiso gidiyaabaa ay oottidee?

¹⁰ Ammanettida daro cimati sooppe kare kiyana danddayokkona. Leemisuwawu, Toona giyo ishay cimata xeelliyo sohuwan ha wodiyan deˈees. I Naase 1942n Amarkkan, Penssliveniyan xammaqettiyo wode ayyo layttay 20. I xammaqetti simmin sohuwaara, wotaaddara gidanaadan awu odettiis. I hegaa ixxis giido  gishshawu, naaˈˈu layttanne baggaa A qachchidosona. Inne A machchiyaa Hilda naaˈˈu naata tumaa keettan dichchidosona. Daro layttawu, Tooni cimata shiishshiyaagaa gididi heezzu gubaaˈiyan haggaaziis, qassi woradaa shiiquwaa xomoosiyaagaa gididi oottiis. I issi qasho keetti biidi shiiqota kaalettiisinne Geeshsha Maxaafaa xannaˈissiis. Toonayyo layttay 98, shin I Yihoowayyo oottiyoogaa aggana koyenna. I ba gubaaˈiyan deˈiya ishanttuuranne michchonttuura baassi danddayettida ubban Yihoowayyo minnidi oottees!

11. Sooppe kare kiyana danddayennaageeta nashshiyoogaa waati bessana danddayiyoo?

¹¹ Sooppe kare kiyana danddayenna cimidaageeta bonchchiyoogaa waati bessenna danddayiyoo? Danddayettikko, shiiqota shiiqanaadan woy siyanaadan qassi sabbakanaadan cimati eta maaddana danddayoosona. Nuuni eta biidi oychchiyoogan woy biiduwan etaara haasayiyoogan etawu qoppiyoogaa bessana danddayoos. Nuuni cima ishanttuuranne michchonttuura haasayiyo wode, amaridaageeti haasayanawu metootana woy banttabaa yootiyoogee bessennaba giidi qoppana danddayoosona. SHin, nuuni takki giidi eta oychchidi eti Yihoowa dirijjitiyan demmido ufayssiyaabaa yootiyo wode siyikko, hegee nuna keehi minttettana.

12. Nu gubaaˈiyan ay mala ishanttanne michchontta demmana danddayiyoo?

¹² Loˈˈo leemiso gidiya ammanettida cimidaageeta nu gubaaˈiyan demmana danddayiyoogee ufayssiyaaba. Haareti giyo michchiyaa Amarkkan, Niwu Jersen deˈiya ba gubaaˈiyan daro layttawu ammanettada Yihoowawu haggaazaasu. Guyyeppe A ba naˈeera deˈanawu harasaa baasu. A mati biido gubaaˈiyan deˈiya ishantti O loytti eranawu iira daro wodiyaa aattidosona, yaatidi A alˈˈo gidiyoogaa akeekidosona. A tumaa 1925 heeran siyido wode haggaazuwan demmidobaa yootiyoogan eta minttettaasu. He wode, A sabbakishin oyqqidi O amarida wodiyawu qachchana danddayiyo gishshawu achchaa geeshshiyo buruushiyaa ubbatoo ekkada bawusu. Qassi 1933n A naaˈˈuttoo issi saaminttaa qashettaasu. I azinay Yihoowa Markka gidenna, shin O maaddiis. A qashuwan deˈiyo wode heezzu bantta guutta naatussi koshshiyaabaa I kunttees. Haareti mala ammanettida cimidaageeta bonchchana bessiyoogee qoncce!

13. Yihoowa dirijjitee cimidaageeta nashshiyoogaappe nuuni ay tamaariyoo?

¹³ Cimida ishanttanne michchontta Yihoowaynne A dirijjitee nashshees. Yihooway ba dirijjitiyaanne eta huuphiyan huuphiyan daro ogiyan waati anjjidaakko eti beˈidosona. Eti bantta balaappe maaddiyaabaa tamaaridosona. Eta ‘aadhdhida eratettaa pulttodan’ xeella, qassi etappe tamaara. (Lee. 18:4) Neeni eta loytta eranawu baaxetikko, ne ammanoy minnananne darobaa tamaarana!

14. Zaarettido Wogaa 32:7y yelagati waatanaadan minttettii?

¹⁴ Cimidaageeta kasetada haasayissa. (Zaarettido Wogaa 32:7 nabbaba.) Eti loytti xeellennaageeta, loddan heemettiyageetanne haasayiyaageeta gidana danddayoosona. SHin eti haˈˈikka minnidi oottanawunne Yihoowa sinttan “lo77o sunttai” deˈiyoogeeta gidanawu koyoosona. (Era. 7:1) Yihooway eta nashshiyo gaasuwaa hassaya. Eta ubbatoo bonchcha. Elssaaˈa mala gida. I Eelaasaara issippe deˈido wurssetta gallassan appe shaahettennan agganawu minttidi woossiis. Elssaaˈi heezzutoo hagaadan giis: “Taani neeppe shaahettikke.”—2 Kaw. 2:2, 4, 6.

15. Nuuni cimidaageeta oychchana danddayiyo oyshati awugeetee?

 ¹⁵ Cimidaageeta kehatettan oyshata oychchiyoogan etassi qoppiyoogaa bessa. (Lee. 1:5; 20:5; 1 Xim. 5:1, 2) Hagaa mala oyshata oychcha: “Neeni yelagatettan deˈiyo wode, tumaa demmidoogaa ammananaadan oottidabay aybee?” “Nena gakkidabay neeni Yihoowakko shiiqanaadan waati maaddidee?” “Yihoowa haggaazuwan neeni ufayttada deˈanaadan nena maaddidabay aybee?” (1 Xim. 6:6-8) Yaatada eti bantta taarikiyaa yootiyo wode loytta ezgga.

16. Cimida urinne yelaga uri issippe haasayiyoogee eta waati minttettana danddayii?

¹⁶ Cimida urinne yelaga uri issippe haasayiyo wode, naaˈˈaykka minettoosona. (Roo. 1:12) Yelagatoo, Yihooway ba asawu koshshiyaabaa kunttiyoogaakka intte loytti akeekana; qassi cimidaagee bonchchettidabadan qoppana. I Yihooway bana waati anjjidaakko neeyyo yootiyoogan ufayttana.

17. Nuuni ammanettida cimidaageeti puulaa yaa gujjoosona giyoy aybissee?

¹⁷ Cimiyo wode asatettaa puulay xayiyaaba gidikkonne, Yihoowawu ammanettiyaageeti puulaa yaa gujji gujji boosona. (1 Tas. 1:2, 3) Hegee tuma giyoy aybissee? Daro layttatu giddon, Xoossaa ayyaanay banttana loohissanaadan eti eeno giido gishshataassanne loˈˈo eeshshati deˈiyoogeeta gidanaadan eta maaddido gishshataassa. Cimida alˈˈo ishanttanne michchontta nuuni loyttidi eriyo wode, eta bonchchoos, etappe tamaaroos, qassi kaseegaappe aaruwan eta keehi alˈˈobadan xeelloos!

18. Nuuni kaalliya huuphe yohuwan xannaˈanabay aybee?

¹⁸ Yelagati cimata nashshiyo wodenne cimati yelagata nashshiyo wode gubaaˈee minni minni bees. Cimidaageeti gubaaˈiyan deˈiya yelagata nashshiyoogaa waati bessana danddayiyaakko kaalliya huuphe yohuwan beˈana.