1, 2. ა) მუჭოთ იგავეფიშ 16:31-ის ჭარჷ, მუჭო ოკო ვუჯინედათ ხანშამიშულირეფს? ბ) მუ კითხვეფს გუვარჩიენთ თე სტატიას?

 დამუშებულ ვა რენ ფერ ბრილიანტ ვა რწკინუნს დო ვა რე თოლშამალაფარ. ათეშენ პიროვნებაქ თინა თეცალ მდგომარეობას ქოძირ-და, შილებე ვა გოხვადას, მუ რენ დო ელულუას.

² თე ბრილიანტეფცალო ართგურ ხანშამიშულირეფ ხოლო ძვირფას განძ რენა. ღორონთიშ სიტყვა ჭაღარა თუმას გვირგვინს უგურუანს (წეკითხით იგავეფიშ 16:31; 20:29). მარა შილებე თე განძიქ ადვილო გაგშმოსქიდან ყურადღებაშე. თი ახალგაზრდეფ, მიდგას არჩქილენა, მუნერ ძვირფასეფ რენა ხანშამიშულირეფ, სიმდიდრეშე უმოს მეტ ჯგირობუას ღებულენა. თე სტატიას სუმ კითხვას ქიმეფჩანთ პასუხის: მუშენ უჯინე იეჰოვა ართგურ ხანშამიშულირეფს, მუჭოთ განძის? მუ ადგილ აფჷ იეჰოვას თინეფშა მეჩამილ მუშ ორგანიზაციას? მუშ კეთება შემლებნა, ნამდა სრულ სარგებელ მიბღათ ხანშამიშულირეფიშ მაგალითშე?

3. ფსალმუნიშ 92:12—15-იშ მიხედვით, მუშენ რენა ართგურ ხანშამიშულირეფ იეჰოვაშო ძვირფასეფ?

³ ხანშამიშულირეფ ძვირფასეფ რენა იეჰოვაშო. ღორონთ ორწყე, თინეფ სინამდვილეს მუნერეფ რენა დო აფასენს თინეფიშ ძვირფას თვისებეფს. თის ოხიოლ, მუჟამსით ხანშამიშულირეფ წანეფიშ დინახალე ართგურ მსახურებაშ პერიოდის შაყარელ სიბრძნეს ახალგაზრდეფს გინოჩანა (იობ. 12:12; იგავ. 1:1—4). იეჰოვა თინეფიშ მოთვინებას ხოლო აფასენს (მალ. 3:16). თიშ უმკუჯინუო, ნამდა ხანშამიშულირეფქ ცხოვრებას ბრელ პრობლემას შეხვადეს, რწმენა ვა დასუსტებნა. თინეფს მომავალიშ გურშენ თიშე ბრელით უმოს ძალიერ იმენდ უღნა, ვინემ თიმწკუმა უღდეს, მუჟამსით ახალ  გაგებულ აფდეს ჭეშმარიტება. იეჰოვას უჸორს თინეფ, მუშენდა ხანშამიშულირობაშ დროს ხოლო აგრძელენა თიშ სახელიშ გაცხადებას (წეკითხით ფსალმუნიშ 92:12—15).

4. ნამ აზრეფქ შილებე გურშა ეუქექუას ჩქინ ხანშა მიშულირ და დო ჯიმალეფს?

⁴ ხანშამიშულირ ქორეთ-და, დარწმუნებულ რდათ, ნამდა იეჰოვას შჷ თი ხანდა, ნამუთ ულირს გიკეთებნა (ებრ. 6:10). თქვა შურდოგურით უკინენდით ხუჯის ქადაგებაშ საქმეს, მუთ გურს უხარენს ზეციერ მუმას. ურზუდით სირთულეეფს — თინეფშე ნამთინე გურიშ გუმატახალ რდჷ — მეჸუნდით ბიბლიაშ სამართლიან ნორმეფს, ართგურო ასრულენდით თქვან პასუხიშმგებლობეფს დო ოგურუანდით შხვეფს. თქვა ირფელს ორთუდით, ნამდა იეჰოვაშ ორგანიზაციას მოხვალამირ ცვლილებეფშა ქიმეიჸუნალდესკო. ხუჯის უკინენდით დო გურშა ელუკინანდით სრულ დროთ მსახურეფს. იეჰოვა ღორონთის ართგურობაშ გურშენ მანგარო უჸორთ. თინა პირობას გარზენა, ნამდა „ვემიოტენს მუშ ართგურეფს!“ (ფსალმ. 37:28). თინა გარწმუნენა: „თუმაშ დარჩიალებაშახ მა გილაიჸონანთ“ (ეს. 46:4). ვეფიქრათ, ნამდა ხანიშ გურშენ ღორონთიშ ორგანიზაციას მნიშვნელოვან ადგილ ვაიღნა. სინამდვილეს თქვა მანგარ ძვირფასეფ რეთ!

5. მუ ოკო შუდან ხანშამიშულირეფს?

⁵ ხანშამიშულირეფს ბრელ მუდგარენიშ კეთება შეულებნა იეჰოვაშ ორგანიზაციას. მართალ რე, თინეფს შილებე ჯვეშობურო ვა უღდან ძალეფ, მარა წანეფიშ დინახალე დიდ გამოცდილება აფნა შაყარელ. იეჰოვას კინ შეულებ თინეფიშ ბრელნერო გიმორნაფა, მუჭოთ თეს ჯვეშ დო თანამედროვე მაგალითეფშე ვორწყეთ.

6, 7. ქიმიჸონით ბიბლიაშე მაგალითეფ, სოვრეშეთ იძირე, ნამდა ხანშამიშულირეფქ მუნეფიშ ართგურ მსახურებაშენ კურთხევეფ მიღეს.

⁶ ბიბლიას ჯგირ მაგალითეფიშ ძირაფა შემლებნა თიცალ ართგურ პიროვნებეფიშ, მით ხანშა მიშულას დროს ხოლო აქტიურო ომსახურდეს იეჰოვას. მაგალთო, მოსე სოდგარენ 80 წანერ რდჷ, მუჟამსით იეჰოვაშ წინასწარმეტყველო დო თიშ ხალხიშ წინამძღოლო დიჭყჷ მსახურება. იეჰოვა აგრძელენდჷ დანიელიშ გიმორნაფას მუშ სიტყვაშ შხვეფშა გინაჩამალო, მუჟამსით თინა საეგებიოთ 90 წანას გინოჩილათირ  რდჷ. მოციქულ იოანე ხოლო სოდგარენ 90 წანას რდჷ გინოჩილათირ, მუჟამსით ღორონთიქ გამოცხადებაშ წიგნ ოჭარაფუ.

⁷ შხვა ბრელ ართგურ მსახურ ვა რდჷ ცნობილ დო შილებე ადვილო ქუდოსქიდესკო შხვეფიშ ყურადღებაშ უმშო. მარა იეჰოვას ვექშასქილად თინეფ დო დაჯილდოვ მუნეფიშ ართგურობაშ გურშენ. მაგალთო, მართალ დო ღორონთიშ მოშიშ კოჩ სიმონშე ბიბლია ბრელ მუთუნს ვეჩიებ, მარა იეჰოვას უჩქუდ, მი რდჷ თინა დო მეჩჷ პატი, ქუძირუდკო ჭიჭე იესო დო იწინასწარმეტყველკო თე ბაღანაშ დო თიშ დიდაშ გურშენ (ლუკ. 2:22, 25—35). დეფიქრით ქომონჯღურელ წინასწარმეტყველ ანაშ გურშენ ხოლო. თინა 84 წანერ რდჷ, მარა „ვათხუდ ტაძარს“ დო რეგულარულო გილეშ თექ, ათეშენ იეჰოვაქ მანგარო აკურთხჷ დო თის ხოლო ქიმეჩ საშვალება, ჭიჭე იესო ქოძირკო. სიმონ დო ანა, ჟირხოლო, ძვირფასეფ რდეს იეჰოვაშო (ლუკ. 2:36—38).

8, 9. მუშ კეთება შეულებნა ქომონჯღურელ ოსურეფს იეჰოვაშ ორგანიზაციას?

⁸ ამდღა ბრელ ართგურ ხანშამიშულირ ირზენს ჯგირ მაგალითის ახალგაზრდეფშო. გუვარჩუათ და ლოის დიდურიშ შემთხვევა. თინა 21 წანერ რდჷ, მუჟამსით კანადას სპეციალურ პიონერო დიჭყჷ მსახურება. თეშ უკულ თინა დო თიშ ქომონჯ, ჯონი, წანეფიშ დინახალე გილმალ მსახურეფ რდეს. უმოს გვიანო თინეფ კანადაშ ბეთელს 20 წანაშე მეტ ხანს მსახურენდეს. მუჟამსით ლოისი 58 წანერ რდჷ, თიქ დო ჯონიქ უკრაინას მიღეს ახალ დანიშნულება. მუ აფდეს თინეფს ოკეთებელ? ხომ ვა ფიქრენდეს, ნამდა შხვა ქიანას მსახურებაშო ნაბეტან ხანშამიშულირეფ რდეს? თინეფქ ქიმიაჸუნეს თე დავალებას დო უკრაინაშა გეგნორთეს, სოდეთ ჯონიქ დანიშნულქ იჸუ თექიან ფილიალიშ კომიტეტიშ წევრო. ჯონიშ ღურაშე შქვით წანაშ უკულ, ლოისიქ გეგნოჭყვიდ, ქუდოსქიდკო თე დანიშნულებას. ასე თის 81 წანა თებულ აფჷ დო ბეთელიშ ოჯახიშ ართგურ დო საჸოროფო მსახურ რე.

⁹ ლოისცალ ქომონჯღურელ დალეფს შილებე თიზმა ყურადღება ვექციებდას, მუჭოთ თენა მეუღლეშ სიცოცხლეშ დროს ხვადუდ, მარა თეშ გურშენ ფას ვა უდინნა თინეფს. იეჰოვა მანგარო აფასენს თი დალეფს, მით ხუჯის უკინენდეს მუნეფიშ ქომონჯეფს დო ასე ხოლო ართგურო მსახურენა (1 ტიმ. 5:3). თეს გეძინელ, თინეფ ახალგაზრდეფს მანგარო ელუკინანა გურშა.

10. მუ ჯგირ მაგალით მუჩეს ტონიქ?

¹⁰ თი ართგურ ხანშამიშულირეფ, მიდგას ჸუდეშე ვეგმართინენა, ძვირფასეფ რენა. მაგალთო, თეცალ მდგომარეობას რე ჯიმა ტონი, ნამუთ თავშესაფარს ცხოვრენს. თიქ 1942 წანას 20 წანერ რდუნ თეშ ინათ პენსილვანიას (აშშ). ტონიქ ხეთეშე ნეიტრალიტეტწკუმა დაკავშირებით პრობლემას ქეშეხვად დო ჟირ წანა დო გვერდის ციხეს აჸუ დახუნალქ. თიქ დო თიშ მეუღლე ჰილდაქ მუნეფიშ ჟირ სქუა ჭეშმარიტებას მორდეს. ტონი წანეფიშ დინახალე სუმ შხვადოშხვა კრებას მსახურენდჷ თავმჯდომარე ზედამხედველო (ამდღა თე პასუხიშმგებლობას უხუცესეფიშ საბჭოშ კოორდინატორ  ჯოხო) დო რაიონულ კონგრესიშ ზედამხედველო. თინა ციხეშა ხოლო მიშჷ დო თექ შეხვალამეფს დო ბიბლიაშ გურაფეფს ატარენდჷ. ასე ხოლო, მუჟამსით 98 წანერ რე, ტონის ვემუტებ ხანდა იეჰოვაშო დო მუთ შეულებ, ირფელს ორთჷ, ნამდა ემსახურას ღორონთის მუშ კრებაშ და დო ჯიმალეფწკუმა ართო.

11. მუჭო შემლებნა ვოძირუათ, ნამდა ვაფასენთ თი ხანშამიშულირეფს, მიდგას ჸუდეშე ვეგმართინენა?

¹¹ მუჭო შემლებნა პატიცემა გიმიფრჩქინათ თი ხანშამიშულირეფიშ მიმართ, მიდგას ჸუდეშე ვეგმართინენა? მუჟამსით თენა შეიოლებერ იჸი, უხუცესეფს შეულებნა მონაწილება მიოღებაფუან თინეფს კრებაშ საქმეეფს. ჩქი შემლებნა მივაკითხუათ თინეფს ვარდა ვიდეოზარიშ საშვალებათ დურაგადუათ დო თეშნერო პირადო გეგმიფრჩქინათ ყურადღება. თეშ კეთება განსაკუთრებულო თი ხანშამიშულირ და დო ჯიმალეფწკუმა მოკონა, მით კრებაშე შორს ცხოვრენა, მუშენდა, თაშ ვემიფქცით-და, შილებე თინეფქ უყურადღებოთ ქუდმოსქიდან. ნამთინეს შილებე უჭირდას ვარდა საჭიროთ ვემიორჩქუდას მუშ დუდიშ გურშენ ჩიება. მარა ჩქი დიდ ჯგირობუას მომღანა, მუჟამსით ხანშამიშულირეფს დროს გეგმურთუნთ დო მიფრჩქილუანთ თინეფიშ ისტორიეფს დო თის, მუ ხიოლ გიმოცადეს იეჰოვაშ ორგანიზაციას მსახურებაშ დროს.

12. მუ საინტერესო მუდგარენეფ შილებე მიფრჩქილუათ ჩქინ კრებაშ და დო ჯიმალეფშე?

¹² ჩქი შილებე მანგარო მიმეწონან ჩქინ კრებას რენან თი ართგურ ხანშამიშულირეფიშ მაგალითიქ. ართ და, ჰარიეტი, წანეფიშ დინახალე ართგურო ომსახურუდ იეჰოვას მუშ მშობლიურ კრებას, ნიუ-ჯერსის (აშშ). უკულ თიქ მუშ ოსურსქუაწკუმა ართო შხვადო გეგნორთჷ ოცხოვრებშა. ახალ კრებას ჯიმალეფქ დრო გეგმურთეს თიშ გაჩინებაფას დო ქიმეხვადეს, ნამდა თინა რწმენაშ ჯგირ მაგალითის ირზენდჷ. ჰარიეტიქ გურშა ელუკინ თინეფს მსახურებაშ დროს მოხვალამირ შემთხვევეფიშ ჩიებათ, მუდგას თიქ 1920-იან წანეფს, ჭეშმარიტებაშ გაგებაშ უკულ, შეხვად. თი დროს ჰარიეტის მსახურებაშა ირიათო გილუღუდ კიბირიშ ჩოთქ, მუშენდა ნებისმიერ დროს შილებედ ოჭოფესკო დო ციხეს ქიმთახუნესკო. 1933 წანას თის ჟირშა აჸუ ართ მარათ ციხეს მითახუნალქ. თის ოხვარუდ ქომონჯ, ნამუთ ვა რდჷ იეჰოვაშ მოწმე დო თიმწკუმა, მუჟამსით ჰარიეტი ჭოფილ აფდეს, ხვალე ულუანდჷ სუმ სქუას. მუშო ოკო რაგად, ჰარიეტცალ ართგურ ხანშამიშულირეფ ნამდვილო იმსახურენა დაფასებას!

13. მუ ადგილ უკინებნა ხანშამიშულირეფს იეჰოვაშ ორგანიზაციას?

¹³ ხანშამიშულირ და დო ჯიმალეფს მნიშვნელოვან ადგილ უღნა იეჰოვაშ ორგანიზაციას. თინეფქ მუნეფიშ თოლო ქოძირეს, მუსხით აკურთხჷ იეჰოვაქ მუშ ორგანიზაცია დო პირადო მუნეფ. თე ხანშამიშულირ და დო ჯიმალეფქ მნიშვნელოვან მუდგარენეფ დიგურუეს მუნეფიშ დაშებულ შეცდომეფშე. ათეშენ, თინეფს უჯინით, მუჭოთ „სიბრძნეშ წყაროს“ დო ქიდიგურეთ თინეფიშ გამოცდილებაშე (იგავ. 18:4). ხანშამიშულირეფიშ უჯგუშო გაჩინებაფას დროს გეგმურთუნთ-და, რწმენა გეგემანგარებნა დო ბრელ მუდგარენს ქიდიგურუანთ!

14. მუშ კეთებას ელუჩანს კანონიშ 32:7 ახალგაზრდეფს?

¹⁴ გეგმირჩქინით ინიციატივა, ნამდა ქუდურაგადუათ ხანშამიშულირეფს (წეკითხით კანონიშ 32:7). მართალ რე, შილებე თინეფს თოლს დაკორდეს, ჩქარას ვეგლართინენა დო წყნარაშო იჩიებნა, მარა გურით ახალგაზრდეფ რენა დო იეჰოვაშ თოლს „ჯგირ სახელ“ უღნა (ეკლ. 7:1). ვაგგოჭყორდან, მუშენ აფასენს იეჰოვა ხანშამიშულირეფს დო ვემიოტუათ თინეფიშ პატიცემა. მიაჸუნით ელისეშ მაგალითის, ნამდგაქ ელია თიწკუმა მსახურებაშ ბოლო  დღას ხოლო ვედიტუ დო სუმშა გუმეორ: „ვემგოტენქ“ (2 მეფ. 2:2, 4, 6).

15. მუ შემლებნა ბკითხათ ხანშამიშულირეფს?

¹⁵ გეგმირჩქინით გულწრფელ ინტერეს ხანშამიშულირეფიშ მიმართ დო პატიცემათ ქუდუსვით კითხვეფ (იგავ. 1:5; 20:5). ქოკითხით თეცალ მუდგარენეფ: მუქ დუგარწმუნ ახალგაზრდობას, ნამდა ჭეშმარიტებას მიოგორე? მუჭო დუგაახლოვ იეჰოვაწკუმა თი შემთხვევეფქ, მუთ ცხოვრებას გიმოცად? მუქ მიგეხვარ, ვაიდინუაფუდკო ხიოლ იეჰოვაშ მსახურებას? (1 ტიმ. 6:6—8). თეშ უკულ ყურადღებათ ქუმურჩქილეთ თინეფიშ ისტორიას.

16. მუჭო მოუღ ჯგირობუა ართიანწკუმა ჩიებას ქოთ ხანშამიშულირშა დო ქოთ ახალგაზრდაშა?

¹⁶ მუჟამსით ხანშამიშულირ დო ახალგაზრდა ართიანს ეჩიებნა, თეს ჟირხოლოშა მოუღ ჯგირობუა (რომ. 1:12). ახალგაზრდეფ, ხანშამიშულირეფწკუმა ჩიება დუგარწმუნენა, ნამდა იეჰოვა ზრუნენს მუშ ართგურ მსახურეფშე დო თიშ მარდულობას ხოლო უმოსო გაიმანგარენა. თეცალ ჩიებაშ დროს ხანშამიშულირეფ ხოლო უმოს დაფასებულო იგინანა დუდის. თინეფ თქვა ხიოლით ქიგეჩიებნა, მუ კურთხევეფ მიღეს იეჰოვაშე.

17. მუშენ შემლებნა ფთქუათ, ნამდა ხანშამიშულირეფ დროშ მიკულაწკუმა ართო უმოსო ისქვამებნა?

¹⁷ ფიზიკურ სისქვამე ხანწკუმა ართო დინუ, მარა ართგურეფ დროშ მიკულაწკუმა ართო იეჰოვაშ თოლს უმოსო ისქვამებნა (1 თეს. 1:2, 3). მუშენ შემლებნა თეშ რაგად? მუშენდა თინეფ წანეფიშ დინახალე ღორონთიშ წმინდა შურს საშვალებას არზენა, ნამდა დაგურუას დო ქიმეხვარას ძვირფას თვისებეფიშ გავითარებას. მუთ უმოს უჯგუშო გეფჩინებაფუანთ ჩქინ საჸოროფო და დო ჯიმალეფს, პატიცემას გეგმიფრჩქინანთ დო დიბგურუანთ თინეფშე, თით უმოსო დუვაფასენთ თე ძვირფას განძის!

18. მუს გუვარჩიენთ ანწიან სტატიას?

¹⁸ კრება ხვალე თიმწკუმა ვემანგარებ, მუჟამსით ახალგაზრდეფ აფასენა ხანშამიშულირეფს; თეშო საჭირო რე, ხანშამიშულირეფქ ხოლო დაფასან თინეფ. ანწიან სტატიას გუვარჩიენთ, მუჭო შეულებნა ხანშამიშულირეფს ოძირუან, ნამდა აფასენა კრებაშ ახალგაზრდეფს.