1-2. a) Karakory tokony fiheverantsika iro matoentsika aby io, izikoa dinihin̈y Ohabolana 16:31? b) Ino aby fan̈ontanian̈a handeha hivaliantsika ato?

HAFA hely parky araiky zay an Etazonỳ. Mety hahita diaman mipetrapetraka anao, izikoa fa mitsidiky parky io. Fa diaman aby io fo mbala tsy araiky voadio amy bizòtie in̈y, ke tsy taitry aby olo mahita izio fotony iro mihevitry vato aby io tsisy valera.

² Iro rahalahy ndreky ranabavintsika matoe aby io mira diaman. Iro io ten̈a valera. Baiboly mampiran̈a volofotsindro io amy satroboninahitry. (Vakia Ohabolana 16:31; 20:29) Kanefa, ndraikindraiky mety tsy ho azontsika onon̈o aby fa valera iro matoentsika aby io. Izikoa tanora man̈eky fa ten̈a ilain̈a iro matoe aby io, ho maro hatsaran̈a ho azondro, mandilatra vola amankarian̈a. Hamaly fan̈ontanian̈a telo aby ty atsika ato: Nan̈ino ma iro matoentsika tsy mivadiky aby io ten̈a valera amy Jehovah? Nan̈ino iro io ten̈a ilainy fandaminan̈any Jehovah? Ino raha mety hianarantsika baka amindro?

3. Izikoa zahan̈a Salamo 92:12-15, nan̈ino ma iro matoentsika tsy mivadiky aby io ten̈a valera amy Jehovah?

³ Valera amy Jehovah iro panomponany matoe tsy mivadiky aby io. Hainy Jehovah olo karakory iro, avio hitany koa toetry tsarandro. Ravoravo izy izikoa iro matoe aby io mba mizara fahendrena ndreky raha niain̈andro tan̈atiny taon̈o maro nanompoandro Jehovah zay. (Joba 12:12; Ohab. 1:1-4) Valera amy Jehovah koa iro, fotony iro miaritry. (Mal. 3:16) Mety maro problemo navy nandalovandro io, kanefa iro mifen̈y fo hanan̈a finoan̈a matanjaka ndreky hatoky Jehovah fo. Mahaifatatra fo fatokisandro fampan̈antinan̈any Jehovah, mandilatra taminiro vo nianatra fahamarin̈ana. Tiany Jehovah mare koa iro, fotony  iro tsy vôly miaro an̈aranany ‘ndray iro efa matoe.’​—Vakia Salamo 92:12-15.

4. Ino raha mety hankahery iro rahalahy ndreky ranabavy efa matoe aby io?

⁴ Aleva onon̈o fa anao ndray efa matoe, tsy adin̈any Jehovah foeky raha jiaby vitanao tamy fanompoan̈a. (Heb. 6:10) Ravoravo Babantsika andan̈itry an̈y mahita anao mbala mazoto mitory. Maro koa raha niaretanao, ary sasany tamy raha aby zen̈y mety namparary fônao, kanefa anao niaritry fo. Nifen̈y fo anao nan̈araka fitsipikiny Baiboly, avio nataonao tsara zay andraikitry nankin̈iny taminao. Niezaka anao baka haharaka fan̈ovoan̈a jiaby nataony fandaminan̈a. Maro koa olo nampianao ke lôso panompo manontolo andra. Farandraha tiany Jehovah Zan̈ahary eky anao, fotony anao tsy mivadiky. Izy efa nampan̈anten̈a fa “izy tsy mety hiala olo tsy mivadiky aminany.” (Sal. 37:28) Mbala nivolan̈a koa Jehovah fa ‘hanohan̈a anao fo izy, firaka anao feno volofotsy.’ (Isaia 46:4) Ke izikoa anao efa mahazoazo taon̈o, aza mieritreritry foeky fa efa tsisy raha ilavan̈a anao eky amy fandaminan̈any Jehovah. Matokisa fa anao io ten̈a valera, sady mbala ilain̈a mare!

5. Ino raha tsy tokony hadin̈anolo matoe?

⁵ Maro raha ilavan̈a olo matoe an̈ivony fandaminan̈a. Marin̈y ndraiky fa iro io mety efa tsy dia matanjaka loatra, kanefa maro raha efa niain̈andro ndreky raha haindro. Ke mbala maro fomba mety ampiasàny Jehovah iro matoentsika aby io. Mankamarin̈y zen̈y tantarany panompony Jehovah sasany taloha tan̈y ndreky amy zioty.

6-7. Azovy olo matoe koran̈iny Baiboly fa tsy nivadiky foeky ke nahazo hatsaran̈a baka amy Jehovah?

⁶ Maro olo koran̈iny Baiboly fa nazoto nanompo Jehovah fo ndray efa matoe. Ohatra iziô, kadiriny 80 taon̈o i Mosesy tamy Jehovah nifidy izy hanjary paminan̈y ndreky nanomboko nitariky firenenany Israely. Karaha zen̈y koa Daniela. Mety efa nandilatra 90 taon̈o izy tamy Jehovah nan̈iraka izy hitondra hafatranany. Mety efa nandilatra 90 taon̈o koa apostoly Jaona taminizy nahazo fan̈ahy masin̈y, ke nanoratra bokiny Apokalypsy.

⁷ Maro amindro matoentsika aby io ten̈a tsy mivadiky, kanefa iro tsy maro olo mahay na  tsy misongadin̈y. Tsy azonolo onon̈o aby raha tsara vitandro. Fa Jehovah ndraiky mahita raha vitandro, ke namezany hatsaran̈a iro fotony tsy mivadiky aminany. ‘Olo marin̈y sady navozo Zan̈ahary’ iziô i Simeona. Hely fo raha koran̈iny Baiboly momba izy. Ndray zen̈y, hainy Jehovah tsarabe olo karakory izy. Namezany voninahitry hahita Jesosy izy, tamy Jesosy vo teraka. Nirahiny Jehovah naminan̈y momba Jesosy ndreky reniny koa Simeona. (Lioka 2:22, 25-35) Miniminia koa baka paminan̈ivavy Ana. Izy tsy vôly nandeha tamy tempoly, kanefa izy tamy zen̈y efa 84 taon̈o sady efa maty vady. Nitahiany Jehovah izy, ke nambelany izy hahita Jesosy zazamena. Hitantsika baka amy zen̈y fa ten̈a valera tamy Jehovah i Simeona ndreky Ana.​—Lioka 2:36-38.

8-9. Ino ma raha tsara mbala vitany ranabavy maty vady?

⁸ Maro amindro matoe tsy mivadiky aby io koa avahizo ten̈a ohatra tsara arehantsika. Karaha zen̈y iziô Ranabavy Loïs Didur. Vo 21 taon̈o fo izy taminizy komansy nan̈ano pisava lalan̈a manokan̈a ta Kanada. Tafaranizen̈y, iro roeny vadiny nan̈ano asany faritry tan̈atiny taon̈o maro. John an̈arany vadiny io. Iro baka tio nanompo tamy Betelany Kanada, tan̈atiny 20 taon̈o mandilatra. Navoatendry hanompo ta Ukraine iro roeny vadiny, tamy Loïs kadiriny 58 taon̈o. Akory nataondro? Iro ma nihevitry fa iro efa matoe loatra ke efa tsy mahavita manompo amy firenena hafa eky? Aha. Nikendro fanendrena io, ke iro nifindra ta Ukraine. Tan̈y i John navoatendry ho an̈isany Komitiny Sampan̈a. Fito taon̈o tafara, naty i John. Fa Loïs mbala tapakevitry hidôko ta Ukraine fo hanohy fanompoan̈anany. Loïs iziô efa 81 taon̈o, ary izy mbala tsy mivadiky sady manompo Jehovah fo, miaraka amy fianakavian̈any Betelany Ukraine. Tiandro mare izy.

⁹ Maro ranabavy maty vady karaha Loïs io. Mety tsy ho azoazonolo onon̈o iro io izikoa fa naty vadindro. Kanefa zen̈y tsy mivolan̈a fa mihen̈y valerandro. Mbala ten̈a valera amy Jehovah iro, fotony iro nifen̈y nan̈ampy vadindro tan̈atiny taon̈o maro, baka io iro miezaka fo tsy hivadiky. (1 Tim. 5:3) Tsy vitanizen̈y fo fa, miezaka koa iro mampahery tanora.

10. Ino ma raha ten̈a tsara nataony Rahalahy Tony, ke mety alaintsika tahaka?

¹⁰ Mbala valera amy Jehovah fo koa iro rahalahy ndreky ranabavy matoe tsy afaka miboaka tran̈o aby io. Karaha zen̈y iziô Rahalahy Tony. Mipetraka amy tany fikarakaran̈a olo matoe izy. Natao batisa izy taminizy 20 taon̈o, taminy Aoty 1942, ta Pennsylvanie, Etazonỳ. Tsy ela tafarany batisanany, izy niforsen̈a han̈ano maramila fa izy tsy nan̈eky ke nigadra izy tan̈atiny taon̈o aroe sy sasany. Nan̈ano mariazy iro roeny Hilda tafara tatỳ. Niezaka iro roeny vadiny nan̈ampy zanakandro aroe mianadahy hanompo Jehovah. Tan̈atiny taon̈o maro, izy nanompo tamy fiangonan̈a telo tamy maha piandraikitry prezidan (na antipan̈ahy pandrindra fikahian̈a izio amy  zioty), baka io izy efa navy piandraikitriny fivoriambe. Nitariky fivorian̈a ndreky fampianaran̈a Baiboly taminolo ta prizon koa izy. Rahalahy Tony iziô efa 98 taon̈o kanefa izy mbala mazoto fo sady miezaka man̈ano ny farany tsara vitany amy fanompoan̈a Jehovah, miaraka amindro rahalahy ndreky ranabavy amy fiangonan̈a misy izy.

11. Akory mety han̈aboahantsika fa valera amintsika iro matoentsika aby io?

¹¹ Akory mety han̈aboahantsika fa valera amintsika iro matoentsika aby io? Azony antipan̈ahy atao, ohatra, man̈ampy iro hitory ndreky han̈aton̈o fivorian̈a, na mampitandren̈y iro raha atao amy fivorian̈a. Atsika jiaby ndraiky afaka mamangy na mikaiky iro amy telefaony. Mety ho lavitry fiangonan̈a tany misy iro matoe aby io. Kanefa tiantsika ho tsapandro fo fa ten̈a valera amintsika iro. Sasany ndraiky mety mipetraka manokan̈a na miaraka aminy havan̈a tsy Vavolombelon̈o. Ke mila mitandrin̈y atsika tsao han̈adin̈a iro. Mety tsy ho mora amindro matoentsika aby io hahita raha koran̈iny na hikoran̈a raha momba iro. Kanefa, hahazo fampaherezan̈a atsika izikoa mahafoe fotoan̈a hikoran̈ana amindro, sady mitandren̈y tsara lera iro mitantara raha namparavoravo iro tamy fanompoan̈a.

12. Rahalahy ndreky ranabavy karakory aby mety ho hitanao amy fiangonan̈a misy anao?

¹² Mety ho gaga anao izikoa fa mifankazatra amindro matoe an̈ivony fiangonan̈anaro. Ho hitanao fa kaiky iro io nahavita tsy nivadiky ke ohatra tsara arehantsika. Karaha zen̈y iziô Ranabavy Harriette. Efa taon̈o maro nanompoany ranabavy io Jehovah tamy tany nisy izy ta New Jersey, an Etazonỳ an̈y. Izy baka tio nifindra, ke niaraka nipetraka tamy zanany man̈angy. Miezaka iro piaramanompo amy fiangonan̈a vaovao io hahay izy, ke hitandro fa ten̈a miavaka izy. Nitantarainy Harriette tamindro fanompoan̈anany, taminizy vo nianatra fahamarin̈ana kadiriny taminy 1925. Nitondra brôsy nify fo zen̈y izy isaka nandeha nitory, fotony efa hainy fa mety higadrain̈a izy izikoa takatra mitory. Taminy 1933, indroe aby izy nigadrain̈a. Ke isaka izy voasambotro, nigadraindro tan̈atiny herin̈iandra araiky. Ten̈a nan̈ampy Harriette mare vadiny, ndray lelahy io tsy Vavolombelon̈o. Nananjanaka telo mbala hely iro. Ramosenany fo nikarakara iro tsaiky aby io, lera izy nigadra. Ten̈a tokony ho valera amintsika iro matoentsika tsy mivadiky, karaha ataony Harriette io.

13. Ino ahitan̈a fa valera ankitin̈y iro matoentsika tsy mivadiky aby io?

¹³ Ten̈a valera amy Jehovah ndreky amy fandaminan̈anany iro matoentsika aby io. Hitandro akory nataony Jehovah nitahy fandaminan̈anany. Maro koa hatsaran̈a nazondro baka tamy Jehovah. Mety nan̈ano diso iro io taloha, fa iro nangala fianaran̈a baka taminy hadisovan̈andro ke efa tsy nan̈ampody zen̈y eky. Aza adin̈a fa ‘loharanony fahendrena’ iro matoentsika tsy mivadiky aby io, ke aleva tahaka finoan̈andro. (Ohab. 18:4) Ataova raha ahaizanao iro, fotony izikoa anao man̈ano zen̈y, ho maro raha ho hainao baka io ho fatatra koa finoan̈anao.

14. Mampirisiky atsika han̈ino ma Deoteronomia 32:7?

¹⁴ Ataon̈a iro matoe aby io, baka io koràn̈a iro. (Vakia Deoteronomia 32:7.) Marin̈y ndraiky fa mety efa tsy mahita tsara eky masondro, baka io iro efa tsy mahavita mandeha malaky eky. Mety efa mora koa feondro. Kanefa, iro mbala tihan̈ano mare amy fanompoan̈a. Ke manan̈a ‘laza tsara’ man̈oloan̈a Jehovah iro, nohony ezakandro zen̈y. (Mpito. 7:1) Tsaraova fa iro io ten̈a valera amy Jehovah. Ke  aboaha fo fa anao man̈aja iro. Man̈anaova karaha paminan̈y Elisa. Izy tsy nan̈eky foeky fa mila hidôko tankilany paminan̈y Elia fo, tamy fotoan̈a farany niarahandro. Intelo i Elisa nivolan̈a taminy Elia karaha ty: ‘Zaho tsy hiala anao.’​—2 Mpanj. 2:2, 4, 6.

15. Ino aby fan̈ontanian̈a mety apetrakantsika amindro matoentsika aby io?

¹⁵ Akory han̈aboahanao fa mitady raha mahatsara iro matoentsika aby io anao? Mifen̈a ho tsara fan̈ahy izikoa fa man̈ontany raha iro. (Ohab. 1:5; 20:5; 1 Tim. 5:1, 2) Anao mety man̈ontany iro karaha ty: “Ino ma raha namparesy lahatra anao fa anao nahita fahamarin̈ana? Ino aby raha nan̈ampy anao hanjary kamaradiny Jehovah? Ino aby raha nan̈ampy anao ho ravoravo fo amy fanompoan̈a?” (1 Tim. 6:6-8) Tandrin̈esa tsarabe amy zay izy koa fa mitantara raha niain̈any.

16. Ino vokany izikoa matoe ndreky tanora mifampikoran̈a? Nan̈ino?

¹⁶ Izikoa matoe ndreky tanora mifampikoran̈a, samby hahazo fampaherezan̈a iro. (Rom. 1:12) Hanjary hatoky mare anao fa Jehovah ten̈a mikarakara panomponany tsy mivadiky. Piaramanompo matoe io ndraiky ho ravoravo, fotony misy olo mankatia izy. Ho ravoravo koa izy hitantara aminao fomba nitahiany Jehovah izy.

17. Ino ivolan̈ana fa zatôvo fo fahitany Jehovah iro panomponany tsy mivadiky aby io, ndray efa matoe?

¹⁷ Olo araiky ndray zatôvo, izy tsy maintsy hatoe fo koa fa mandeha fotoan̈a. Fa olo araiky ndraiky koa tsy mivadiky amy Jehovah, zatôvo fo fahitany Jehovah izy, ndray fa mandeha taon̈o. (1 Tes. 1:2, 3) Ary marin̈y raha zen̈y, fotony tan̈atiny taon̈otaon̈o, fan̈ahy masin̈iny Jehovah nambelandro hamolavola iro ndreky han̈ampy iro han̈ana toetry tsara. Ke ataova raha ahaizanao tsara iro matoentsika aby io. Hajay iro, baka io aleva tahaka modelindro. Ho valera aminao iro, izikoa anao man̈ano zen̈y.

18. Ino ma raha hidinihintsika amy man̈araka?

¹⁸ Hitantsika tato fa tokony ho valera amy tanora iro matoe aby io. Tokony ho valera amindro matoe aby io koa iro tanora aby io. Hahaiho fatatra fo fiangonan̈a izikoa iro samby man̈ano zen̈y. Hidinihintsika amy man̈araka, akory mety han̈aboahanolo matoe an̈ivony fiangonan̈a fa ten̈a valera amindro iro tanora aby io.