1-2. (a) Mwakamulana ni Misyungu 16:31, ana tukusosekwa twawoneje chamtuli abale ni alongo ŵetu ŵachikulile ŵakulupichika? (b) Ana chitupate kwanga kwa yiwusyo yapi munganiji?

ŴANDU ŵakusajawula kumalo gane gakunguluchila ga ku United States, akusagasimana maganga ga dayamondi gali pamalo panepakwe. Magangaga gakusaŵa kuti nganaŵe kugalinganya kuti agakamulichisye masengo. Myoyo ŵandu ŵakusagawona magangaga akusagamba kugapita, soni ŵangamanyilila kuti gali gakusosekwa mnope.

² Nombe abale ni alongo ŵachikulile ŵali ŵakulupichika, ali mpela maganga gelega. Jemanjaji ali ŵakusosekwa mnope. Maloŵe ga Mlungu gakusasala kuti wuli sya jemanjaji sili mpela chisoti. (Aŵalanje Misyungu 16:31; 20:29) Ndaŵi sine mpaka yiŵe yangasawusya kwawona jemanjaji kuti ali ŵangasosekwa. Naga ŵachinyamata akwawona ŵachikulile kuti ali ŵakusosekwa mnope, mpaka alijiganye yejinji kwa jemanjaji. Munganiji chitupate kwanga kwa yiwusyo yiŵili yakuyichisyayi. Ligongo chichi Yehofa akusiŵawona ŵachikulile ŵakulupichika kuti ali ŵakusosekwa mnope? Ligongo chichi ŵachikulileŵa ali ŵakusosekwa mnope m’gulu ja Yehofa? Ana tukusosekwa kutenda chichi kuti tulijiganye yejinji kwa ŵachikulile?

3. Mwakamulana ni Salimo 92:12-15, ligongo chichi ŵachikulile ali ŵakusosekwa mnope kwa Yehofa?

³ Yehofa akusiŵawona abale ni alongo ŵachikulile ŵali ŵakulupichika kuti ali ŵakusosekwa. Jwalakwe akusamanyilila mwaŵelele jemanjaji, soni akusayamichila ndamo syawo syambone. Yehofa akusayamichilasoni pakwawona ŵachikulileŵa ali mkwasalila  ŵachinyamata ya yindu yapatile pandaŵi jaŵele ali mkumtumichila jwalakwe. (Yob. 12:12; Mis. 1:1-4) Yehofa akusalolasoni kupilila kwaŵele mkulosya jemanjaji. (Mal. 3:16) Atamose kuti jemanjaji aŵele ali mkusimana ni yakusawusya paumi wawo, nambope nganaleka kumkulupilila Yehofa. Chikulupi chawo chili chakulimba mnope pakulandanya ni mwachaŵelele pandanda. Yehofa akusiŵanonyela jemanjaji ligongo akusapitilisyape kulalichila ya lina lyakwe ‘atamose ali achekulwipe.’—Aŵalanje Salimo 92:12-15.

4. Ana ni maloŵe gapi gampaka galimbikasye abale ni alongo ŵachikulile?

⁴ Naga apano ali ŵachikulile, amanyilile kuti Yehofa akusakumbuchila masengo gosope gaŵele ali mkutenda munyumamu. (Aheb. 6:10) Atati ŵetu ŵakwinani akusasangalala mnope ligongo lyakuti wawojo aŵele ali mkukamuchisya nawo pamasengo gakulalichila. Jemanja aŵele ali mkupilila yakusawusya yejinji. Nambosoni aŵele ali mkukuya malamusi gakulungama ga m’Baibulo, kukola maudindo gekulungwa m’guluji soni kwajiganya ŵane. Jemanja atesile yampaka akombole pakukuya yindu yejinji yajichenjile gulu jetu. Aŵele mkwalimbikasya ŵandu ŵane ŵakutenda utumiki wandaŵi syosope. Yehofatu akusiŵanonyela mnope jemanja ligongo lyakuŵa ŵakulupichika. Jwalakwe ŵasasile kuti ngasiŵajasa “ŵandu ŵakwe ŵali ŵakulupichika.” (Sal. 37:28) Jwalakwe akwasimichisya jemanja kuti, “Mpaka timmele wuli tinjimsamalila nditu.” (Yes. 46:4) Myoyo, akaganisyaga kuti ligongo lyakuti achekulwipe nikuti nganaŵa ŵakusosekwa mnope m’gulu ja Yehofaji. Jemanja ali ŵakusosekwa nditu.

5. Ana abale ni alongo ŵachikulile akusosekwa kukumbuchilaga chichi?

⁵ Mu gulu ja Yehofa mwana yindu yejinji yampaka atende ŵandu ŵachikulile. Atamose kuti jemanjaji nganaŵa akwete machili mpela gaŵakwete munyumamu, nambope akusamanyilila yejinji. Mwamti Yehofa mpaka apitilisyepe kwakamulichisya masengo m’matala gejinji. Mu yisyasyo yakuyichisyayi chitulole mwatendele Yehofa yeleyi kwa ŵandu ŵakala soni ŵamasiku agano.

6-7. Asale yisyasyo ya m’Baibulo ya ŵandu ŵaŵapochele upile ligongo lyakumtumichila Mlungu mwakulupichika.

⁶ M’Baibulo tukusapata yisyasyo ya ŵandu ŵakulupichika ŵaŵamtumichilagape Yehofa nambo  ali achekulwipe. Mwachisyasyo, Mose jwatandite kutumichila mpela jwakulochesya jwa Yehofa soni mlongola jwa mtundu wa Aisalaeli ali akwete yaka chiŵandika 80. Yehofa ŵapitilisyepe kumkamulichisya masengo Daniele atamose kuti ŵakwete yaka ya m’ma 90. Nombe ndumetume Yohane, msimu wamlongolele kuti alembe buku ja Chiwunukuko ali ni yaka ya m’ma 90.

⁷ Abale ni alongo ŵakulupichika ŵajinji ŵali ŵachekulupe, ngakusaŵa ŵakumanyika kapena kupikanika. Yeleyi yikusaŵa yangasawusya kwaliŵalila jemanjaji. Nambope Yehofa akusiŵamanyilila soni akusiŵapa upile ligongo lyakulupichika kwawo. Mwachisyasyo, Baibulo jangasala yejinji yakwamba Simiyoni, juŵaliji “jwakulungama soni jwakogopa Mlungu.” Nambope Yehofa ŵammanyililaga jwalakwe soni ŵampele upile wakum’wona Yesu ali likandi. Simiyoni jwalochesyesoni yayichimtendechela Yesu soni Maliya ŵaŵaliji mamagwe. (Luk. 2:22, 25-35) Aganichisyesoni ya jwakulochesya jwamkongwe jwamasije lina lyakwe Ana. Jwalakwe ŵakwete yaka 84, nambope nganasoŵaga “pa nyumba ja Mlungu.” Ligongo lyakuti jwanonyelaga kwawula kunyumba ja Mlungu “kukusongana,” Yehofa ŵampele upile wakumwona Yesu ali likandi. Simiyoni nambosoni Ana, ŵaliji ŵakusosekwa mnope kwa Yehofa.—Luk. 2:36-38.

8-9. Ana mlongo jwine jwasagwile kutenda chichi ŵamkwakwe ali ajasiche?

⁸ Masiku agano abale ni alongo ŵajinji ŵachikulile ali yisyasyo yambone kwa ŵachinyamata. Aganichisye yaŵasimene nayo Mlongo Lois Didur. Mlongoju ali akwete yaka 21, ŵatandite kutumichila mpela mpayiniya jwapadela ku Canada. Kaneko jwatumichile kwa yaka yejinji yimpepe ni ŵamkwakwe lina lyakwe John. Utumiki wakwe waliji wakulolela dela. Kaneko jemanjaji ŵatumichile ku Beteli ja ku Canada kwa yaka yakupunda 20. Mlongoju ali akwete yaka 58, ŵaŵilanjidwe pampepe ni ŵamkwakwe kuti akatumichileje ku Ukraine. Ana akatesile uli pelepa? Ana jemanjaji akaganisisye kuti ali ŵachikulile mwamti nganaŵa atumichile m’chilambo chine? Jemanjaji ŵajitichisye utumiki wasambanowu, soni John ŵamsagwile kuti akatumichileje mu Komiti ja Nyambi. Panyuma pa yaka 7 chiwile John, mlongojo jwapitilisyepe kutenda utumiki wakwe. Apano jwalakwe akwete yaka 81, soni abale ni alongo ŵa ku Beteli ja Ukraine akusamnonyela mnope.

⁹ Achakongwe ŵali ŵamasije mpela mlongo jwatumkolasileju, komboleka nganaŵa amanyiche mnope mpela mwayaŵelaga achiŵamkwawo ali umi. Nambopetu kuŵa jwamkongwe jwamasije, kwangamtendekasya mundu kuti aŵe jwangasosekwa. Yehofa akusiŵawona alongoŵa kuti ali ŵakusosekwa mnope, ligongo kwa yaka yejinji aŵele ali mkwakamuchisya achiŵamkwawo soni akupitilisyape kutumichila Yehofa mwakulupichika. (1 Tim. 5:3) Konjechesya pelepa, jemanjaji akusiŵalimbikasyasoni ŵachinyamata.

10. Ligongo chichi M’bale Tony ali chisyasyo chambone?

¹⁰ Abale ni alongo ŵajinji ŵakulupichika ŵakusaŵa chitamile pamlango ligongo lya uchekulu, ali ŵakusosekwa mnope. Mwachisyasyo, M’bale Tony akutama kumalo gakusamalila ŵachekulupe.  Jwalakwe ŵabatisidwe ali ni yaka 20 mu Ogasiti 1942 ku Pennsylvania, U.S.A. Ali agambile kubatisidwa kwene, jwalasile mnope ligongo lyakukana kwinjila usilikali, mwamti ŵamlamwile kuti akatame ku ndende kwa yaka yiŵili ni hafu. Jwalakwe ni ŵamkwakwe ŵakamuchisye ŵanache ŵawo kuwumanyilila usyesyene. Kwa yaka yejinji, Tony jwatumichile m’mipingo jitatu mpela jwakulondesya masengo ga achakulungwa. Nambosoni jwatumichile mpela jwakulolela msongano wadela. Jwalakwe jwajawulaga kuja kutendesya misongano soni kwajiganya ŵandu Baibulo kundende. Atamose kuti apano Tony akwete yaka 98, nambope akupitilisya kumtumichila Yehofa soni akupitilisyape kutumichila yimpepe ni abale ni alongo ŵamumpingo mwakwe.

11. Ana abale ni alongo ŵachikulile mpaka twalosye chamtuli kuti ali ŵakusosekwa?

¹¹ Ana mpaka tulosye chamtuli kwachimbichisya ŵachikulile ŵayikusasawusya kutyoka panyumba ligongo lya uchekulu? Achakulungwa ŵamumpingo mpaka ŵakamuchisye jemanjaji kuti atendeje nawo misongano soni kulalichila. Mpaka tulosyesoni kwanonyela jemanjaji, mwakwawula kuja kukwalola kapena kuŵechetana nawo pafoni. Tukusosekwa twakumbuchileje jemanjaji ligongo naga ngasamala, mpaka twaliŵalile nditu. Patukunguluka nawo tukumbuchileje kuti ŵane mwa jemanjaji nganaŵa akombwele kuŵecheta chenene kapena kulondesya mwayiŵelele yindu paumi wawo. Nambope mpaka atulimbikasye mnope patukupata ndaŵi ja kwawusya yiwusyo soni kwapikanila pakusala yindu yakusangalasya yasimene nayo m’gulu ja Yehofaji.

12. Ana ni ŵandu ŵane ŵapi ŵampaka asimanikwe mumpingo mwetu?

¹² Mpaka tusimonje kuti mumpingo mwetu mwana yisyasyo ya abale ni alongo ŵachikulile ŵali ŵakulupichika. Mlongo Harriette ŵamtumichilaga Yehofa mwakulupichika kumpingo wakumangwakwe ku New Jersey, U.S.A. Kaneko jwasamile kuti akatameje ni mwanache jwakwe jwamkongwe. Abale ni alongo ŵa mumpingo wa kweleko ŵamanyigene chenene ni mlongoju. Mwamti jemanjaji ŵayiweni kuti mlongoju ali jwakusosekwa mnope. Mlongo Harriette jwasalaga yindu yambone yakwamba utumiki pandaŵi jiŵagambile kulijiganya kwene usyesyene m’ma 1920. Pandaŵiji jwalakwe jwajigalaga mswachi pakwawula kukulalichila, ligongo jwamanyililaga kuti mpaka ataŵidwe ndaŵi jilijose ni kuŵichidwa mundende. Mwamti mu 1933, ŵamŵisile mundende kwa maulendo gaŵili, soni pa ulendo uliwose jwatamaga wiki jamtundu. Pandaŵijo ŵamkwakwe ŵele nganaŵa ŵa Mboni sya Yehofa ni ŵaŵasamalilaga ŵanache ŵakwe ŵatatu. Kusala yisyene, tukusosekwa kwachimbichisya ŵachikulile ŵali ŵakulupichika mpela Mlongo Harriette.

13. Ana ŵachikulile ali ŵakusosekwa chamtuli m’gulu ja Yehofaji?

¹³ Abale ni alongo ŵachikulile ali ŵakusosekwa mnope m’gulu ja Yehofaji. Jemanjaji ayiweni yatesile Yehofa pakwakamuchisya, nambosoni yatite pakujipa upile gulu jakwe. Kupwatika pelepa, aŵelesoni mkulijiganya yindu yakusosekwa kutyochela pa yindu yiŵalemwisye munyumamu. Myoyo, twawoneje jemanjaji mpela “uliŵa wa lunda” soni tukoleje mtima wakusaka kulijiganya yindu kwa jemanjaji. (Mis. 18:4) Naga akupata ndaŵi jakuti amanyigane nawo chenene chachalimbikasya, soni chachilijiganya yindu yejinji.

14. Ana lilemba lya Detulonomo 32:7, likwalimbikasya ŵachinyamata kutenda chichi?

¹⁴ Apateje ndaŵi jakwanila jakuti akungulucheje ni abale ni alongo ŵachikulile. (Aŵalanje Detulonomo 32:7.) Yili yisyene kuti ŵachikulile mpaka alepele kwenda, kulola chenene soni kuŵecheta. Nambope mumtima akusasaka  ali mkutenda yejinji soni jemanjaji akwete “mbili jambone” pameso pa Yehofa. (Jwak. 7:1) Tukumbuchileje ligongo lyakwe Yehofa akusiŵawona jemanjaji kuti ali ŵakusosekwa. Myoyo, tukaleka kwachimbichisya jemanjaji. Tuŵeje mpela Elisa. Jwalakwe nganamleka jika Eliya palisiku lyakumalisya. Kwa maulendo gatatu jwasimichisye kuti, “Une nginaleka ŵalakwe.”—2 Ayi. 2:2, 4, 6.

15. Ana ni yiwusyo yapi yampaka ŵawusye ŵachikulile?

¹⁵ Ŵawusyeje ŵachikulileŵa yindu yakulekanganalekangana. (Mis. 1:5; 20:5; 1 Tim. 5:1, 2) Ŵawusyeje yiwusyo mpela ayi, “Ana chichi chachakamuchisye kumanyilila kuti apatile usyesyene paŵaliji ŵachinyamata?” “Ana yindu yasimene nayo paumi wawo yakamuchisye chamtuli kuŵa paunasi wambone ni Yehofa?” “Ana chichi chachakamuchisye kuti asangalaleje pakumtumichila Yehofa?” (1 Tim. 6:6-8) Ŵachikulileŵa pakwanga yiwusyoyi, akusosekwa kwapikanila chenene.

16. Ana ŵachikulile ni ŵachinyamata akusalimbikasyana chamtuli pakukunguluka?

¹⁶ Ŵachikulile soni ŵachinyamata pakukunguluka yimpepe, akusalimbikasyana. (Alo. 1:12) Ŵachinyamatamwe pamkukunguluka ni ŵachikulile yichimkamuchisya kumanyilila yakusatenda Yehofa pakwakamuchisya ŵakutumichila ŵakwe ŵakulupichika. Nambosoni ŵachikulilewo chachilipikana kuti ali ŵakusosekwa mnope. Ŵachikulileŵa akusasangalala pakwasalila ŵachinyamata yindu yambone yaŵatendele Yehofa.

17. Ligongo chichi abale ni alongo ŵachikulile akusapitilisyape kuŵa ŵakusalala mnope yaka payikupita?

¹⁷ Mundu pakukula, kusalala kwa chilu chakwe kukusatanda kumala. Nambo ŵandu ŵali ŵakulupichika kwa Yehofa akusajonjechesya kusalala mnope chaka chilichose. (1 Ates. 1:2, 3) Tukuŵecheta yeleyi ligongo lyakuti yaka payikupita, jemanjaji akusakunda kuti msimu wa Yehofa wakamuchisyeje kuti akole ndamo syambone. Patukutenda yakuti twamanyilile chenene abale ni alongo ŵachikulile, soni patukwachimbichisya nambosoni kulijiganya yejinji kwa jemanjaji, yikusakamuchisya kuti twawoneje kuŵa ŵakusosekwa mnope.

18. Ana chitukambilane chichi mungani jakuyichisya?

¹⁸ Mpingo ukusalimbaga mnope naga jwalijose mumpingomo akumwona mjakwe kuti ali jwakusosekwa mnope, chinga ali jwachinyamata kapena jwachikulile. Mungani jakuyichisya, tuchilola yampaka atende ŵachikulile pakulosya kuti akusiŵawona ŵachinyamata mumpingo kuti ali ŵakusosekwa mnope.