DILONGI 35
Kinzika Zikhomba Zima Nuna
“Zimvu zidi kolowa yi nzitusu.”—ZINGA. 16:31.
NKUNGA 138 Kitoku ki Minlengi mi Phembi
MAMBU TUANLONGUKA *
1-2. (a) Dedi bummonisina Zingana 16:31, buidi tufueti tadila zikhomba zikuikama bama nuna? (b) Biuvu mbi tunkuiza baka mimvutu mu dilongi adidi?
BATU bawombo mu thangu bankuendanga kue tala kibuangu kimboti kidi ku divula di Arkansas ku U.S.A., banyesinanga mamanya ma diamante mu khambu zaba. Kibila bo ka basukudiabu ko mamanya beni, diawu bawombo mu bawu bavisanga ko ti, mamanya ma thalu badi mu kunyesina.
2 Bo buawu mvandi zikhomba zitu zikuikama zima nuna; badi buka zi diamante voti kiuka ki luvalu. Buawu Diambu di Nzambi dintubila ti, zimvu ziawu zidi kolowa yi nzitusu. (Tanga Zingana 16:31; 20:29) Vayi khumbu ziwombo batu bavuanga ko nkinza zikhomba aziozi zima muna. Matoko ba kuvua nkinza zikhomba aziozi bawu balenda baka ndandu yilutidi kuvioka na mamanya mathalu. Mu dilongi adidi, tunkuiza baka mimvutu mi biuvu bitatu. Kibila mbi Yave Nzambi kammuenanga zikhomba aziozi zikuikama banga kiuka ki luvalu? Kibuangu mbi kinkiza Yave kantulanga zikhomba aziozi mu kimvuka kiandi? Mbi tulenda vanga muingi tubaka ndandu yiwombo mu kifuani kiawu ki lukuikumunu?
KIBILA MBI YAVE KANTADILANGA ZIKHOMBA ZIMA NUNA BANGA KIUKA KI LUVALU?
Zikhomba zima nuna luvalu luwombo badi va meso ma Nzambi ayi kuidi dikabu diandi (Tala lutangu 3)
3. Dedi bummonisina Minkunga 92:12-15, kibila mbi zikhomba zima nuna badidi buka kiuka ki luvalu va meso ma Yave?
3 Zikhomba zima nuna badi beni luvalu va meso ma Yave Nzambi. Nandi wuba tadilanga mu kimutu kiawu ki khati ayi wumvananga beni luvalu zikhadulu ziawu zimboti. Yave wunkuangalalanga beni mu thangu zikhomba aziozi banlonga matoko nduenga yo bawu bama baka mu kisalu kiandi. (Yobi 12:12; Zinga. 1:1-4) Yave mvandi wumvuanga beni nkinza phila bama kindimina mu kisalu kiandi. (Mala. 3:16) Kheti bawu baviokila mu ziphasi, vayi kiminu ayi kivuvu kiawu mu zikhanu zi Yave kikhidi kingolo, kuvioka na mu thangu bawu bazaba kiedika. Ayi Yave wuba zolonga kibila bawu bantatamana kusamuna kheti mu “ziphasi zi bununu.”—Tanga Minkunga 92:12-15.
4. Mambu mbi malenda kindisa zikhomba zima nuna?
4 Boti ngie manuna, ba lufiatu ti Yave wuntebukila monyo kisalu ngie mavanga kumbusa. (Ebe. 6:10) Nandi wuntebuka monyo ti ngie wukivana mu kifuza mu kisalu ki kusamuna ayi Tat’itu ku diyilu wunkuangalala mu mawu. Ngie wukindama mu zithotolo ziwombo vayi —wutatamana kudiatila mu zithumu zisonga zi Kibibila. Ngie mvaku wukeba biyeku biwombo mu kimvuka ki Yave. Ayi mvandi makubika zikhomba ziwombo ayi wuvanga mamoso maba mu kitesu kiaku muingi kutatamana kutuadisa ndembama mu kimvuka ki Yave. Mvandi ngie wutatamana kukindisa zikhomba zinkaka muingi batatamana mu kisalu ki thangu ka thangu. Yave Nzambi wuku zolanga beni mu kibila ki lukuikumunu luaku ayi wunkanikisa mambu amama: “Nate mu bununu buinu, Minu yalasa mukuekula ko”! (Minku. 37:28) Yave wunkanikisa ti: “Nate mu thangu muela ba zimvu, yala tatamana kulukieba.” (Isa. 46:4) Diawu bika kuyindulanga ti bo weka kiboba wusiedi ko luvalu vayi tebuka monyo ti luvalu luwombo widi mu kimvuka ki Yave!
ZIKHOMBA ZIMA NUNA NKINZA BADI MU KIMVUKA KI YAVE
5. Mbi zikhomba bama nuna bafueti tebukanga monyo?
5 Zikhomba bama nuna mawombo makhidi yawu muingi kuvanga. Kheti bawu basiedi ko zingolo dedi bo babela kumbusa, vayi luzabu luwombo lueka yawu mu kisalu bama vanga kumbusa. Ayi dedi bo bifuani binlanda binkuiza monisina, Yave kalenda tatamana kuba sadila mu ziphila ziwombo. Bifuani beni binkuiza tubila batu bazinga mu thangu yikhulu ayi mu thangu’itu.
6-7. Lusakumunu mbi Simoni ayi Ana batambula mu kisalu kiawu kikuikama mu Yave?
6 Mu Kibibila mu ke bifuani bi bisadi bi Yave bansadila mu bununu. Dedi Mose, wuba 80 di mimvu bo katona kisalu ki mbikudi ayi ntuadisi wu dikabu di Isaeli. Mbikudi Danieli wuba nduka 90 di mimvu vayi kheti bobo Yave wutatamana kunsadila. Mvandi mvuala Yoane ḿba wuba nduka 90 di mimvu bo kasonika buku yi Nzaikusu.
7 Bawombo mu bisadi bi Yave bakhambu ba beni bazabakana khanu baba zimbakana, vayi Yave wumona kisalu kiawu kikuikama bavanga. Ayi wuba vana mfutu mu lukuikumunu luawu. Dedi dibakala dimueka “disonga ayi dikuikama” bantedilanga Simoni Kibibila kisintubila ko beni matedi nandi, vayi Yave wumvana luaku muingi kamona Yesu bo kaba muana kilezi ayi kubikula mambu matedi nandi ayi mam’andi. (Luka 2:22, 25-35) Yindula mvandi mu kifuani ki mfuisi Ana. Nandi wuba 84 di mimvu vayi nandi “wutatamana kusadila ku tempelo.” Yave wusakumuna kisalu kiandi “Kikuikama ku tempelo” mu kumvana luaku lu kumona Yesu bo kabutuka. Bukiedika Simoni ayi Ana baba luvalu va mesu ma Yave.—Luka 2:36-38.
Khomba Didur, weka 80 di mimvu, vayi wuntatamana wukuikama mu kisalu kiandi (Tala lutangu 8)
8-9. Buidi mimfuizi dedi yaya Lois bantatamana kubuela mioko kimvuka ki Yave?
8 Mu bilumbu bitu, bisadi biwombo bikuikama bamvananga kifuani kimboti kuidi matoko. Tala kifuani ki khomba yi nkieto yaya Lois Didur. Bo kaba 21 di mimvu wutona kisalu ki ntuami ntuala wufilu ku Canadá. Bo kakuela nandi ayi nnuni’andi John, basala mimvu miwombo mu kukengidila bimvuka. Bosi bo vavioka thangu bawu bayenda kue sadila ku Beteli yi Canadá kuvioka 20 di mimvu. yaya Lois bo kadukisa 58 di mimvu ayi nnuni’andi John baba tumisa muingi besadila ku tsi yinkaka Ucrânia. Mbi bayenda kuevanga kuna? Bukiedika ti bawu bayindula ti beka binunu ayi balendi buevanga ko diambu dimvela? Ndamba, bawu bakikinina kiyeku kimona batambula, ayi John wutambula kiyeku ki kuba wumueka mu Dingumba di Filiali. Bo vavioka sambuadi di mimvu yaya John wuyiza fua vayi kheti bobo yaya Lois wutatamana mu kiyeku kiandi. Bubu nandi weka 81 di mimvu ayi wukhidi tatamana mu kiyeku kiandi. Mvandi dikanda di Beteli ku Ucrânia baku nzolanga beni.
9 Mimfuizi buka yaya Lois balenda monikina buka ti, basiedi ko luvalu kena mu thangu banuni bawu baba ba moyo vayi luvalu luawu lusa dekuka ko va meso ma Yave mu kuba mimfuizi. Kibila Yave wumvuanga nkinza zikhomba aziozi zi bakieto babuela mioko banuni bawu ayi bubu bantatamana bakuikama mu kisalu kiawu. (1 Timo. 5:3) Bukiedika zikhomba beni badi kifuani kimboti ayi bankindisanga matoko.
10. Kifuani mbi kimboti yaya Tony katuvana?
10 Zikhomba zi kuikama zima nuna banzingilanga ku kibuangu bankiebilanga biboba mvawu bake kiuka ki luvalu. Dedi khomba bantedilanga Tony bubu wunzingilanga ku kibuangu akioki. Nandi wubotama ku Pensilvânia, U.S.A., mu ngonda nana mu mvu 1942 bo kaba 20 di mimvu. Nandi bankotisa mu buloku mu mimvu miodi bo kamanga kukota mu mambu ma politika. Nandi ayi nkazi’andi Hilda, banyozula bana buadi mu kiedika. Nandi wusadila mu bimvuka bitatu mu kuba ntuadisi wu dingumba di bakulutu ba kimvuka mvandi wusala buka nkengididi wu bimvuka ayi waba tuadisanga ndogukulu yi Kibibila mu buloku. Bubu mu 98 di mimvu yaya Tony wukhidi vana mangolo mandi moso mu kisalu ki Yave mu kusala va kimueka na zikhomba mu kimvuka.
11. Buidi tulenda monisina ti tumvuanga nkinza zikhomba zima nuna banzingilanga ku kibuangu bankiebilanga biboba?
11 Buidi tulenda monisina ti tumvuanga nkinza zikhomba zima nuna banzingilanga ku kibuangu bankiebilanga biboba? Dedi, bakulutu ba kimvuka balenda kuba vana biyeku bio bawu bannunga. Ayi mvandi tulenda monisa ti tuba vuanga nkinza mu kue batalanga voti kutubana yawu mu telefoni ove kusadila ziphila zinkaka zio tulenda kuba muena. Kheti banzingilanga ku kibuangu kitatuka na kimvuka, befu tuntomba kuba monisa ti tuku bavuanga nkinza. Diawu tufueti ba keba keba muingi tubika kuba zimbakana. Bawombo mu bawu balenda mona phasi kukoluka voti bankaka bazolanga ko kukoluka matedi bawu veka. Vayi tulenda baka ndandu befu kubotulanga thangu muingi kuba kuwa bo bantuba mayangi babaka mu kisalu ki Yave.
12. Bifuani mbi bimboti bi zikhomba zitu tulenda bakula mu kimvuka?
12 Befu tulenda kuituka bo tumbakula bifuani bimboti bi lukuikumunu bi zikhomba zima nuna mu kimvuka. Khomba mueka yinkieto bantedilanga Harriette wusadila Yave mu lukuikumunu mu mimvu miwombo ku Nova Jersey ku Estados Unidos. Bosi nandi wuyenda kuezingila kuidi muan’andi wunkieto. Zikhomba mu kimvuka kio kabaluka basadila luaku lu kunzaba buboti ayi babakula kiuka. Yaya Harriette wuzaba kiedika mu mvu 1920 nandi wukindisa zikhomba mu kuba kamba buidi kazabila kiedika ayi mu kuba zabikisa mambu kaviokila. Dedi bawu baba nantanga kikova ki menu mu kisalu ki kusamuna, kibila ḿba balenda—kuba tula mu buloku. Ayi mu mvu 1933 mu viazi wadi nandi wuviokisa sabala wadi mu buloku. Mu thangu beni nnuni’andi kasaba ko Mbangi yi Yave. Vayi kheti bobo nnuni’andi wuba nkua mamboti ayi wukieba bana bawu batatu. Bukiedika, zikhomba aziozi zima nuna dedi yaya Harriette, bafueti tambula luzolo luitu!
13. Mbi tulenda longuka mu kiyeku kinkinza zikhomba zima nuna badi mu kimvuka ki Yave?
13 Zikhomba zi babakala ayi zi bakieto zima nuna bake kiyeku kinkinza mu kimvuka ki Yave. Bawu bamona buidi Yave kaba sakumunina mu ziphila ziwombo ayi balonguka mu zinzimbala bavanga. Diawu tulenda longuka mawombo mu “ndueng’awu” ayi mu kifuani kiawu kimboti. (Zinga. 18:4) Ngie kubotula thangu muingi kuba zaba buboti, kiminu kiaku kiala luta kinda ayi wala longuka mambu mawombo!
BAKA NDANDU MU BIFUANI BI ZIKHOMBA ZIMA NUNA
Dedi bo mbikudi Elisa kabakila ndandu mu kuba va khonzo mbikudi Elia, zikhomba zi babakala ayi zi bakieto balenda baka ndandu mu bifuani bi Zikhomba bama sadila Yave mu mimvu miwombo (Tala lutangu 14-15)
14. Mbi lutangu lu Deutelonomi 32:7 lunkindisa matoko kuvanga?
14 Tuama ntuala mu kukolukanga na zikhomba zima nuna. (Tanga Deutelonomi 32:7.) Bukiedika ti bawombo mu bawu basiala bue mona ko buboti, mangolo mawu mama dekuka ayi kheti bantubanga malembi. Vayi bawu bakhidi buka matoko mu ntima ayi bawu bama vanga “dizina dimboti” va meso ma Yave. (Mpovi 7:1) Tebuka moyo kibila mbi Yave kaba vaninanga luvalu. Tatamana kuba monisa luvalu. Ba buka mbikudi Elisa, nandi wutatamana wufikama na mbikudi Elia mu bilumbu biandi bitsuka. Mu khumbu zitatu nandi wutuba “yisi kubika ko.”—2 Minti. 2:2, 4, 6.
15. Biuvu mbi tulenda vana kuidi zikhomba zima nuna?
15 Monisa ti wumvuanga nkinza zikhomba zima nuna. (Zinga. 1:5; 20:5; 1 Timo. 5:1, 2) Bo wunkoluka yawu wuba vana biuvu mu lukinzu dedi: “Mu thangu wuba ditoko, mbi bi kuvana bivisa ti wubakula kiedika?” “Buidi mambu wuviokila mu luzingu maluta kuvanga kufikama Yave?” “Mbi bi kusadisa muingi kutatamana kuba mu mayangi mu kisalu ki Yave?” (1 Timo. 6:6-8) Ayi teka matu mu thangu bantuba binongu biawu.
16. Buidi ditoko ayi khomba weka kiboba balenda bakila ndandu bo bansolula?
16 Mu thangu ditoko kankoluka na khomba weka kiboba, bawu babuadi bambakanga ndandu. (Loma 1:12) Dedi matoko balenda baka ndandu mu kumona phila Yave kankiebilanga basadi biandi bikuikama ayi zikhomba beka biboba bankuiza baka ndandu mu kumona phila matoko ba kuba vaninanga luvalu. Bawu bankuiza yangalala beni bo banzabikisa matoko ziphila ziviakana Yave kaba sakumunina.
17. Kibila mbi tulenda tubila ti zikhomba zima nuna badi bakuikama bambuelamanga kitoko bumviokila mimvu?
17 Kitoku ki nyitu bumviokila mimvu kindekukanga, vayi bo badi bakuikama mu Yave, kitoku kiawu kimbuelamanga bumviokila mimvu. (1 Tesa. 1:2, 3) Kibila mbi tulenda tubila ti mawu madi makiedika? Kibila bumviokila mimvu, zikhomba aziozi zima nuna bawu babika phevi yi Nzambi yiba tuadisa ayi mvandi yiba diodisa. Diawu bo tumvanga mangolo muingi kuzaba buboti zikhomba aziozi zima nuna ayi kubavana nzitusu, befu tulenda longuka kuidi bawu ayi kuba tadila buka kiuka ki luvalu.
18. Mbi tuala tubila mu dilongi dinkuiza?
18 Kimvuka kinluta banga kikinda kubika to mu thangu matoko bammonisa luvalu kuidi zikhomba zima nuna, vayi mvandi bo zikhomba zima nuna bammonisa luvalu kuidi matoko. Mu dilongi dinkuiza, befu tuala mona buidi zikhomba zima nuna balenda monisina ti matoko mu kimvuka luvalu badi.
NKUNGA 144 Tadidila mu Mfutu!
^ Lut. 5 Zikhomba zitu zima nuna, badi buka kiuka ki luvalu. Dilongi adidi dinkuiza tukindisa kubuela kuba vana luvalu ayi mvandi tunkuiza tubila ndandu tulenda baka mu ndueng’awu ayi kifuani kiawu kimboti mu kisalu ki Yave. Dilongi adidi mvandi dinkuiza buela lufiatu lu zikhomba beni mu kiyeku kinkinza badi mu kimvuka ki Yave.
