1. Soˈlin ecato kalecad to saˈayaway ko ˈicel ita, ngaˈayho samaan ko demak?

ANO taˈangay taˈangay ko mihecaan, pakaynien ci Yihofaan ecato kalecad to saˈayaway a ciepoc ko niyah saan kita a calemcem alatek. Soˈlin ecato kalecad to saˈayaway ko ˈicel ita, wa ngaˈayho misaka dademak to taneng ato nalifetan no niyah padama to kaemangay tamdaw malo ciepocay a tamdaw, mitamorong to adihayay ˈinorong. Cecay halafinay malo malohemay malitengay salikaka sanay: “Tiya taˈangayto ko mihecaan ako, cato pakadangar to demak i, itihi iraay ko citatodongay a kaemangay salikaka ngaˈayay milaheci to tayal, tada miakoˈiday kako to Kawas.”

2. Oniya lalakaw wa milengo to maanan?

² Itini fafekangay lalakaw mananamay ita, talaˈayaw ko kaemangay salikaka mafanaˈ to matoˈasay salikaka, wa milifok to adihayay a epoc. Oniya lalakaw wa milengo, o matoˈasay salikaka ira ko misapoeneray, misamimingay, miakoˈiday ato hinapaladaˈay a harateng, wa ngaˈay kalacafay to kaemangay salikaka a matayal, paira to haepoc no kasakopang.

3. Mikitini Filipi 2:3, 4, o manan ko misapoeneray? O misapoeneray tamdaw wa samaan ko demak hani?

³ O matoˈasay salikaka ano sapadamaaw to kaemangay salikaka, wa mitafo to misapoeneray. Saan ko pinengneng no misapoeneray tamdaw ikakaay ko tao to niyah. (ˈOsien ko Filipi 2:3, 4.) Ano ira ko misapoeneray a waywayan no matoˈasay salikaka wa cipinang, itini adihayay a pakayraan, matatodongay to safalod no Fangcalay Cudad anca ciepocay a pakayraan cowa ka cecay aca. Mansa, o isaˈayaway a pakayraan no niyah o sangaˈayay a pakayraan cowa ko mamihaen ko piharateng nangra. (Patnakay 7:10) Soˈlin adihayay ko kalimlaan nalifetan  no matoˈasay salikaka, kawra mafanaˈay cangra ‘padotocay mafalic ko pakayraan noniya hekal,’ mansa misaaliay cangra padotoc minanam a misalof alatek.—1 Korinto 7:31.

4. O kasakilac kantok paihkalay to manan malecaday to nolitengan Lifi tamdaw a waywayan hani?

⁴ Ano misapoeneray ko matoˈasay salikaka, wa mihayi to midemakan nangra cowa ka mahaen to saˈayaway a adihay. Haratengen ko aniniay a kasakilac kantok, tahira 70 ko mihecaan nangra wa manilnil tayra i faelohay a katayalan, pakayni cangranan hatiniay a kafalic cowa ko madoloay alatek. Maolahay cangra to milisoˈay a tayal, maolahay itini toniya katayalan padama to salikaka, kawra mafanaˈay cangra ano o kaemangay salikaka ko midemak wa ikaka ko kangaˈay. O paihkalan nangra a waywayan malecaday to nolitengan Lifi a tawdaw. Tahira 50 ko mihecaan no Lifi tamdaw wa mihawad to tayal no fangcalay kopang, kawra wa itini cecay katayalan ngaˈ ira ko lipahak cowa ka saan ko harateng nangra, ao misaˈicel milaheci to ngaˈayay demaken no niyah a demak, misarocod padama to kaemangay tamdaw. (Saˈosi 8:25, 26) Malecaday, isaˈayaw malo kasakilac kantok a salikaka soˈlin cowato pilisoˈ to kasakopang, kawra kamayan cangra ngaˈay mihadak to ˈicel a padama to kitiraan a kasakopang nohatini.

5. Mikitini ci Taenan aci Kaytian ngaˈay kita minanam to manan hani?

⁵ Nengnengen ita ko tinakoan no salikaka ci Taen. Malo kasakilac kantok cingra 23 miheca, 70 ko mihecaan minilnilan kalacafay  to fafahi ci Kayti malo mikiriwiˈay misakafahay. Samanay ko demak nangra i faelohay katayalan hani? Sowal ni Taen mikikakaay ko ˈifowa ningra to iˈayaway. Misaysayay cingra to adihayay demak no kasakopang, padama to kaemangay salikaka ira ko tatodong malo dama sikawdan, pahatatanamayho to roma mitosilay itini kaˈalomanan anca itini kapalitan a misawacay. Matoˈasay salikaka, ano mieminay to toki ko tayal iso nohatini hokira, wa taˈangay ko sapadama to tao. Samaan ko demak ngaˈ madangar konini hani? Ngaˈayay mananam kamo to faelohay a kaˈorip, patireng to faelohay patosokan, misaˈicel midemak to madangaray a demak, eca ka tangoˈol to cowa ko mamadangar a demak.

6. O misamimingay tamdaw hano iraay ko taneng hani? Tano tinakoan mitadtad.

⁶ O misamimingay tamdaw mihaiyay to citolasay ko ˈicel no niyah, caay ka ˈakawang ko pitokel to niyah. (Taneng 11:2) Mihaen, wa ngaˈay padotoc a lipahak cingra, padotoc a mihadak to sadama. Ngaˈayay patinakoen ita ko misamimingay tamdaw to parakatay to paliding macokacok. Saka cokacokaw, fafalicen ningra tayni manaˈonay ko kolaci, soˈlin mamanaˈon ko cikay no paliding, kawra ngaˈayho talaˈayaw ko paliding. Malecaday, o cecay misamimingay tamdaw mafanaˈay hahacowa ‘minaˈon to kolaci,’ mihaen wa ngaˈay cingra padadotoc fanekfek matayal saki Yihofaan ato padama to tao.—Filipi 4:5.

7. Tada misamimingay ci Parcilayan hano haenen ko sowal hani?

⁷ Sinanoten ko tinakoan ni Parcilayan, mitahidang ci Tafiti cingranan malacafay to niyah tayra i lomaˈ no hongti i, 80 ko mihecaan ningra. Tada misamimingay cingra, mafanaˈay cingra matoˈasayto ko niyah, cowato ka adihay ko madangaray a demak, minaˈayay to satahidang, mitahidangay cingra to kaemangay a Kimhanan mikotay cingranan. (2 Samuil 19:35-37) Malecad ci Parcilayan, ˈalomanay matoˈasay salikaka makahiay pafeli to toki i kaemangay salikaka matayal saki Yihofaan.

8. Itini patireng to fangcalay sefi, itini misamimingay pakayraan samanay ci Tafiti patireng to ngaˈayay a taˈarawan hani?

⁸ Itini misamimingay a pakayraan patirengay ci Tafiti to ngaˈayay a taˈarawan. Tada makalimay cingra patireng to fangcalay sefi ni Yihofa, kawra pasowalan ni Yihofa cingra, oniya patirengay a tayal wa oyaan kaemangay a Solomon ko mamidemak. Micadaan ni Tafiti ko saˈosi ni Yihofa, misarocoday midama to patirengay to fangcalay sefi a tayal. (1 Rayray 17:4; 22:5) Samanen ‘kaemangayho, awaay ko nalifetan’ ni Solomon, o niyah aca ko matatodongay cowa ka saan ko harateng ni Tafiti. (1 Rayray 29:1) Mafanaˈay ci Tafiti sakalaˈosi noniya patirengay a tayal, o kalimlaan i o sapalemed ni Yihofa, cowa ko hakowaay ko mihecaan no mikeriday tamdaw, hakowaay ko kadofah no nalifetan. Anini, ˈalomanay matoˈasay salikaka mitodongay ci Tafitian, mafalic ko katayalan kamayan padadotoc misaˈicel matayal, mafanaˈay cangra papalemeden ni Yihofa ko mikotayay cangranan matayal a kaemangay salikaka.

9. Cecay Iing no Fenpo samanay paihkal to misamimingay a waywayan?

⁹ Cecay faˈinayan salikaka ci Congsiyong, itini misamimingay patirengay cingra to ngaˈayay taˈarawan. Itini 1976 miheca malo Iing no Fenpo cingra, itiya 30 ko mihecaan. Itini 2004 miheca, malo misatenokay tamdaw no Iing no Fenpo. Ikor matoˈasayto cingra, mahapinangay to cangoˈotay ko ˈicel no niyah, cowato ka kahnay malahci ko tayal. Orato, misongilaˈay cingra a mitolon, ato misongilaˈ  miharateng to kangaˈayan no pipatorod to tayal i kaemangay salikaka. Roma salikaka mikotayay cingranan malo misatenokay tamdaw ikor, kamayan misaˈicel cingra malacafay to roma Iing no Fenpo a matayal. Wa ngaˈay kita mikitini tinakoan ni Parcilayan, Tafitian, aci Congsiyongan mihapinang, o cecay misapoeneray misamimingay a tamdaw cowa ko haharateng saan to cangoˈotay ko nalifetan no kaemangay, o mamasemer to kangaˈayan nangra, minengneng to kaemangay o hacafay a matayal, cowa ko sakalalifet a tamdaw.—Taneng 20:29.

10. Samanay ko pinengneng no matoˈasay salikaka to kaemangay tamdaw i kasakopang?

¹⁰ Miharateng ko matoˈasay salikaka to kaemangay o sapakaolah ni Yihofa, samanen tiya cato kalecad to saˈayaway ko ˈicel nangra i, makahiay ko kaemangay hanaca iraay ko ˈicel matayal saki kasakopang. Tada miakoˈiday cangra to kaemangay tamdaw!

11. Itini Rucu 4:13-16 samanay mitadtad, micada ko matoˈasay salikaka to sapadama no kaemangay tamdaw wa milifok to adihayay haepoc?

¹¹ Ci Naomi makahiay micada to sapadama no kaemangay tamdaw hanaca miakoˈiday ko falocoˈ toniya demak, o ngaˈayay taˈarawan cingra toniya pakayraan. Ikor no mapatay ko wawa papinokayan ningra ko kadafo i lomaˈ no wina, padadotocay ci Rucu kalacafay cingranan minokay i Piclihim, makahiayto cingra micada. (Rucu 1:7, 8, 18) Oniya saˈosi milifokay to taˈangayay sapalemed cangranan tatosa! (ˈOsien ko Rucu 4:13-16.) Ano misapoener ko matoˈasay salikaka, wa minanam to ngaˈayay taˈarawan ni Naomi, miakoˈid to sapadama no kaemangay tamdaw cangranan.

12. Ci Pawlo iraay ko miakoˈiday a falocoˈ hano mahaen ko sowal? Tadtaden.

¹² O tarokos ci Pawlo iraay ko miakoˈiday  falocoˈ. Tinakoen, miakoˈiday cingra to Filipiay a salikaka pafeli to dafong cingranan. (Filipi 4:16) Itini adihayay pakayraan padamaay ci Timoti cingranan, miakoˈiday cingra tonini. (Filipi 2:19-22) Tiya mamapalit cingra tayra i Loma i, mikiriwiˈay ko itiraay a salikaka tayra pakalalok cingranan, miakoˈiday cingra to Kawas toniya demak. (Dmak 28:15) Talifakay ci Pawlo, milakowitay to lotok milakecay to ˈalo talacowacowa mitosil, pakalalok to adihayay a kasakopang, kawra cowa ka pakayni a misatakaraw cingra ecato kakahi micada to sapadama no salikaka.

13. Matoˈasay salikaka samaan paihkal to piakoˈid to kaemangay tamdaw hani?

¹³ O matoˈasay salikaka, ngaˈay kamo tano adihayay pakayraan paihkal to piakoˈid to kaemangay tamdaw. Ano talaˈayaw cangra micada tisowanan, padama tisowanan micakay to dafong anca roma demakan, akoˈiden cangra, cadaen ko sapadama nangra, oniya sapadama o olah ni Yihofa tisowanan han ko pinengneng. Wa pakayni a mala ngaˈayay widang kamo alatek. Roma i, saˈicelen padama ko kaemangay tamdaw miingid ci Yihofaan, pasowalen cangra maˈaraw iso ko pisaˈicel nangra matayal i kasakopang tada mahemekay. Ngaˈayho kiso paladaˈ cangranan to nalifetan iso i nokaˈorip. Mihaen ko demak iso o ‘paihkalay to miakoˈiday falocoˈ,’ miakoˈid ci Yihofaan misolot to kaemangay tamdaw tayni kasakopang.—Kolosay 3:15; Yohani 6:44; 1 Tisalonika 5:18.

14. Hongti ci Tafiti samanay paihkal to hinapaladaˈay hani?

¹⁴ O matoˈasay Krisciyang wa ngaˈay mikitini ci Tafitian minanam to roma kalimlaan a capeling, o hinapaladaˈay. Pakayni sapidamaaw to patirengay to fangcalay sefi a tayal, adihayay ko mihadakan ningra a hafay no niyah. (1 Rayray 22:11-16; 29:3, 4) Soˈlin mafanaˈay cingra ikorto o ngangan noniya fangcalay sefi i, ci Solomon ko cinganganay, kamayanho mihaen ko demak ningra. Citolasay ko ˈicel ita alatek, awaay ko pakayraan mirienang to patirengay a tayal no likakawa no Kawas, kawra itini madangaray no ˈicel ita wa ngaˈay pakiyaho a midama. Ngaˈayay paladaˈen ita ko kaemangay tamdaw to adihayay ngaˈayay nalifetan.

15. Cowa ka ˈidi ci Pawlo paladaˈ to manan ci Timotian hani?

¹⁵ O tarokos ci Pawlo o ngaˈayay taˈarawan to hinapaladaˈay. Mitahidangan ni Pawlo koya kaemangay a Timoti malacafay cingranan talacowacowa a mitosil, hanaca cowa ka ˈidi paladaˈ ci Timotian to pakayraan no niyah a mitosil. (Dmak 16:1-3) Micada to sapahatatanam ni Pawlo ikor, padamaay ci Timotian malo idahiay a mitosilay ato singsi no Fangcalay Cudad. (1 Korinto 4:17) Ikor, misaka dademakan ni Timoti ko sapasifanaˈ ni Pawlo cingranan a pakayraan a pahatatanam to tao.

16. Salikaka ci Congsiyong misamanay hano mipahatatanam to roma tamdaw hani?

¹⁶ ˈAlomanay matoˈasay salikaka misaˈicelay pahatatanam to kaemangay salikaka mikotay to tayal, cowa ka calemcem cangra awato ko kapo no niyah i likakawa no Kawas. Tinakoen, masowalay i fafekang ci Congsiyong salikaka sapicowataw to tayal no Hongti Kitakit itira, adihayay a mihecaan padadotocay misaˈicel pahatatanam to roma kaemangay a Iing no Fenpo. Telocto, ecato ko malo misatenokay cingra i, o cecay micadaay to ngaˈayay a sapahatatanam a salikaka ngaˈayay tangsol mikotay to tayal ningra. Nohatini matayal ci Congsiyong salikaka i Iing no Fenpo mataˈlifay to ko 45 miheca, kamayan cingra padadotoc paladaˈ to kalimlaan a nalifetan ningra i  kaemangay salikaka. Ira ko hatiniay a salikaka i likakawa no Kawas tada ngaˈayayto!

17. Matoˈasay salikaka ngaˈay samaan ‘micerid a paladaˈ’ hani? (Luka 6:38)

¹⁷ O matoˈasay salikaka maemin, o maˈoripay a wacay kamo, misawacay to o sangaˈayay no kaˈorip ko madimadiay a midoko ci Yihofaan! O ngaˈayay taˈarawan kamo padamaay tamiyanan mihapinang, misaˈicel minanam ato misaka dademak to safalod no Fangcalay Cudad tada ciepocay. Soˈlin adihayay ko mahopeday iso a nalifetan, kawra mafanaˈay kiso pakayni kafalic no pakayraan, misaaliay kiso to papadotoc a misalof. Ano matoˈasto kiso micada to paputisem, wa ngaˈayho mihadak to sapadama. Ngaˈayay pasowalen iso ko kaemangay tamdaw ikor no mafanaˈ kiso ci Yihofaan hakowaay ko kalipahak, ngaˈay paladaˈ to nalifetan ato mananamay no niyah, o mamahemek cangra mitengil to pipasowal iso toniya demak. Toniya pakayraan ‘micerid a paladaˈ’ kiso, wa adihay ko sapalemed ni Yihofa tisowanan.—ˈOsien ko Luka 6:38.

18. Matoˈasay tamdaw ato kaemangay tamdaw ngaˈay samaan madadama hani?

¹⁸ Matoˈasay a salikaka, ano misawidang kiso to kaemangay tamdaw, kiso ato cangra o mamicada to sapakalalok. (Loma 1: 12) O matoˈasay tamdaw adihayay ko mahopeday a taneng ato nalifetan, o kaemangay tamdaw talifakay ciˈicelay, ngaˈayay kamo madadama. Malacafay ko matoˈasay ato kaemangay a matayal, o papalemed to polong a tamdaw no kasakopang, o papaira to sapakahemek to sidaˈitay a Wama i kakarayan!