1. ¿Edadankipstjjasajj kun lurañsa amtsna?

 EDADANKIPSTJJTAN ukhajja, Jehová Diosar janiw nayrjam serviñ puedjjäti sasaw ajjsarayassna. Cheqas janiw wayn tawaqöpkayätan ukham chʼamanëjjtanti. Ukampis kunanaktï yateqawaytan, kuna experiencianaktï jikjjatawaytan ukampejj wayn tawaqonakaruw Diosan markapar jukʼamp yanaptʼapjjañapataki, jukʼamp luräwinak katoqapjjañapataki yanaptʼapjjsna. Walja maranak ancianot serviri mä jilatajj akham siwa: “Edadanëjjataj laykojj jan nayrjam lurañ puedjjataj amuyasisajja, luräwinak lurañatak wakichtʼat wayna jilatanakan utjatapat wal yuspärta” sasa.

2. ¿Kunsa aka yatichäwin yatjjataskañäni?

² Pasïr yatichäwinjja, kunjamsa wayn tawaqonakarojj edadani jilat kullakanakan amigopäñajj yanaptʼi, ukwa yatjjataniwaytanjja. Humilde chuymanïñasa, qhawqtï lurañ puedktan uk amuyasiñasa, yuspärasirïñasa, wajjtʼasirïñas edadani jilat kullakanakarojj wayn tawaqonakamp chika trabajipjjañapatakiw yanaptʼaspa, ukajj congregacionar wal yanaptʼani, ukwa aka yatichäwin yatjjataskañäni.

3. 1) Filipenses 2:3, 4 textorjamajja, ¿humilde chuyman jaqejj kunjamasa? 2) ¿Kunjamsa humilde chuymanïñajj mä cristianor yanaptʼi?

³ Edadani jilat kullakanakatï wayn tawaqonakar yanaptʼañ munapjjchi ukhajja, humildëpjjañapawa. Humilde chuyman jaqejja, mayninakajj jupat sipansa jilankkaspas ukhamwa amuyi (Filipenses 2:3, 4 liytʼañataki). Humilde chuymani edadani jilat kullakanakajja, kunayman toqetwa mä kunajj  Biblian ewjjtʼanakap jan pʼakintasa sum lurasispa, ukwa yatipjje. Ukhamajja, kunjamtï jupanakajj lurapjjerïkäna ukham taqenin lurapjjañap janiw suyapkiti (Ecl. 7:10). Experiencianakapampejj wayn tawaqonakar walsa yanaptʼapkchispajja, ‘kunanakatejj aka mundon pasaski ukanakan mayjtʼaskatapwa’ yatipjje, ukatwa kunjamtï jichhajj lurasjje ukanak yateqapjjañapajj wakisi (1 Cor. 7:31).

4. ¿Kunjamsa superintendente de circuitot serviri jilatanakajj levitanakjam lurapjjatap uñachtʼayapjje?

⁴ Humilde chuymani edadani jilat kullakanakajja, marat maratjamajj janiw nayrjam lurañ puedjjapjjaniti, uk yatisipjjewa. Superintendente de circuito jilatanakat amuytʼañäni. Jupanakajj 70 maranëjjapjje ukhajja, yaqha asignacionwa katoqjjapjje. Inas ukajj jupanakatak chʼamakïchispa, kunattejj jilat kullakanakar ukham serviñajj wal jupanakar gustäna. Uka asignacionarus wal munasipjjäna, jichhas munasisipkakiwa. Ukampis ‘waynäsipki ukanakan encargasipjjañapaw jukʼamp walïspa’ sasaw amuyapjje. Jupanakajj nayra Israel markankir levitanakjamaw amuyapjjaraki, levitanakajj 50 maranak phoqjjasajj tabernaculon serviñ jaytjjapjjänwa. Kuna asignación katoqasas kusisitakïpjjarakïnwa. Taqe chuymaw qhawqtï lurañ puedipkäna uk lurapjjäna, waynanakarus yanaptʼapjjarakïnwa (Núm. 8:25, 26). Superintendente de circuitot nayrajj servipkäna uka jilatanakajj janis jichhajj congregacionanakar visitjjapjjchejja, kawkïr congregacionantï servisipki ukan wal yanaptʼapjje, chʼamañchtʼapjjaraki.

5. ¿Kunsa Dan jilatampita Katie esposapampit yateqawayta?

 ⁵ Dan sat jilatat parltʼañäni, jupajj 23 maranakaw superintendente de circuitot serviwayi. 70 maranëjjäna ukhajja, Katie sat esposapampirojj precursor especialatwa asignjjapjjäna. ¿Uka machaq asignacionapan kunjamäsipkisa? Dan jilatajj jan tiemponiw congregacionapan trabajiski, jilatanakaruw siervo ministerialat servipjjañapataki yanaptʼaski, ukatjja carcelanakana, kawkjantï walja jaqenakajj utjki ukan predicapjjañapatakiw yaqhanakar yatichaskaraki. Edadani jilat kullakanaka, precursoratsa servisipksta janisa, jumanakajj mayninakar wal yanaptʼapjjasma. ¿Kunjamsa? Kunjamantï jichhajj servisipkta ukan kusisita serviñ yateqasa, kunanaktï Diosar serviñan lurapkasma ukanak lurañ amtasa. Qhawqtï lurañ puedipkta ukanak lurasa.

6. Kunatsa qhawqtï lurañ puedktan uk amuyasiñajj wakisi uk mä uñachtʼäwimp qhanañchtʼam.

⁶ Qhawqtï lurañ puedki uk amuyasiri jaqejja, janiw qhawqtï lurañ puedki ukat jukʼamp lurañ suykiti, ukhamïpanwa kusisitak jakasi, wali sum trabajiskakiraki. Akham amuytʼañäni, mä jaqejj autompi amstar makatañatakejja, kʼachatakwa auto apañapa, kʼachataksa apkchinejja amstar makataskakiniwa. Qhawqtï lurañ puedki uk amuyasiri jaqejja, ukar uñtasitarakiw kunapachas kʼachatak sarañajj wakisi uk yati. Ukhamatwa Jehová Diosar serviskakini, mayninakarus yanaptʼaskakirakini (Filip. 4:5).

7. ¿Kunjamsa Barzilái chachajj qhawqtï lurañ puedkäna uk amuyasitap uñachtʼayäna?

⁷ Barzilái chachat parltʼañäni, 80 maranëjjäna ukhaw palacion serviñapatak Davidajj invitäna. Barzilái chachajj qhawqtï lurañ puedkäna uk amuyasïnwa, ukatwa Davidan invitacionaparojj jan iyawskänti. Edadanëjjatap laykojj janiw waljanak lurañ puedjjaspänti, uk jupajj sum amuyasïna, ukatwa Kimham sat jukʼamp wayna chachan jupa lanti sarañapatak mayïna (2 Sam. 19:35-37). Barzilái chachjamarakiw edadani jilatanakajj wayna jilatanakar luräwinak jaytasajj kusisipjje.

8. Davidajj Jehová Diosatak mä templo lurañ munkäna ukhajja, ¿kunjamsa qhawqtï lurañ puedkäna uk amuyasitap uñachtʼayäna?

⁸ David reyejj ukhamarakiw qhawqtï lurañ puedkäna uk amuyasitap uñachtʼayäna. Jehová Diosatak mä templo lurañ wal munäna. Ukampis Salomón yoqamaw lurani sasin Jehová Diosajj säna ukhajj istʼänwa, taqe chuymaw yoqapar yanaptʼarakïna (1 Crón. 17:4; 22:5). Salomón yoqajajj waynakïskiwa, janiw experiencianïkiti, ukhamajj nayaw uk lurañajajja sasin janiw siskänti (1 Crón. 29:1). Jehová Diosan bendicionapampikiw uka utajj lurasispäna, janiw lurañan pʼeqtʼapki ukanakan edadanïñapasa, experiencianïñapas wakiskapunïnti, ukwa Davidajj yatïna. Jichhürunakanjja, edadani jilatanakan luräwinakapajj cambiyjjchisa, Davidjamarakiw Diosatak wal trabajisipkaki. Kuntï nayrajj lurapkäna uk jichhajj wayna jilatanakaw lurjjapjje, Jehová Diosaw jupanakar bendisini sasaw edadani jilatanakajj amuyapjje.

9. ¿Kunjamsa Comité de Sucursalan serviri mä jilatajj qhawqtï lurañ puedki uk amuyasirïtap uñachtʼayäna?

⁹ Jichha tiemponjja, Shigeo sat jilatajj qhawqtï lurañ puedktan uk amuyasiñ toqet wali yateqaskayawa. 1976 maran 30 maranïkäna ukhajj Comité de Sucursalan serviñapatakiw uttʼayapjjäna. 2004 maransti, uka Comité de Sucursalan sarayirïñapatakiw uttʼayapjjarakïna. Tiempompejja, jan nayrjam chʼamanëjjatapa, trabajop jan jankʼak lurjjatapwa  amuyasïna. Ukatsti, Jehová Diosaruw uk yatiyäna, ‘nayat sipans jukʼamp wayna jilataw kuntï nayajj lurkta uk sum phoqaspa’ sasaw amuytʼasirakïna. Jichhajja, janiw Comité de Sucursalan sarayiripäjjeti, ukampis Comité de Sucursalan serviskakiwa, walirak ukan yanaptʼaski. ¿Kunsa Barzilái chachatsa David reyitsa Shigeo sat jilatats yateqsna? Humilde chuymani ukat qhawqtï lurañ puedki uk amuyasiri mä jaqejja, kuntï waynanakajj jan lurañ yatipki ukanakak uñchʼukiñat sipansa, kuntï yatipki ukanakwa uñji. Luräwinakap apaqerirjam uñjañat sipansa, compañeronakaparjamaw uñji (Prov. 20:29).

10. ¿Kunjamsa edadani jilat kullakanakajj congregacionankir wayn tawaqonakar uñjapjje?

¹⁰ Edadani jilat kullakanakajj wayn tawaqonakarojj Jehová Diosan regaloparjamaw uñjapjje, kunanaktï lurapki ukanakatsa wal yuspärapjjaraki. Niyakejjay marat maratjamajj jukʼa chʼamanikëjjapjjchejja, wayn tawaqonakan congregacionan wal yanaptʼañ munapjjatapsa, kunantï yanaptʼajj munaski ukan yanaptʼapjjataps wali valoranitwa uñjapjje.

11. Edadani jilat kullakanakajj wayn tawaqonakan yanaptʼap katoqasipjje ukhajj bendicionanakwa jikjjatapjje, ¿kunjamsa Rut 4:13-16 textojj uk uñachtʼayi?

¹¹ Biblian qellqatäki uka Noemí warmejj wali yateqaskayawa, edadani uka warmejj wali yuspärasirïnwa, mä tawaqon yanaptʼapsa taqe chuymaw katoqasïna. Yoqapajj jiwjjäna uka qhepatjja, Rut yojjchʼaparojj ‘familiaman ukar kuttʼjjam’ sasaw säna. Ukampis Rut tawaqojj janiw jaytañ munkänti, Belén markar jupamp kuttʼañwa mayïna, Noemí warmisti iyaw sänwa (Rut 1:7, 8, 18). Ukajj panpachanitakiw mä suma bendicionäna (Rut 4:13-16 liytʼañataki). Humilde chuymani edadani jilat kullakanakajj Noemí warmitwa yateqasipjjaraki.

12. ¿Kunjamsa apóstol Pablojj yuspärasirïtap uñachtʼayäna?

 ¹² Apóstol Pablojja, jupar yanaptʼapjjatapat ukhamarakiw wal yuspäräna. Mä kutejja, Filipos markankir cristianonakarojj jupar yanaptʼa apayapjjatapat wal yuspäräna (Filip. 4:16). Janiw ukakïkiti, kuntï Timoteojj jupa layku lurkäna ukatsa wal yuspärarakïna (Filip. 2:19-22). Pablor Roma markar carcelar apasipkäna ukhajja, jilatanakaw jupar chʼamañchtʼañatak sarapjjäna, uk uñjasajj Jehová Diosar wal yuspäräna (Hech. 28:15). Pablojj wali trabajtʼirïnwa, predicañatakisa congregacionanakar chʼamañchtʼañatakis walja kilometronakwa viajäna. Ukhamäkchïnsa, jilat kullakanakan yanaptʼap humilde chuymampiw katoqasïna.

13. ¿Kunjamsa edadani jilat kullakanakajj wayn tawaqonakan luratanakapat yuspärapjjatap uñachtʼayapjjaspa?

¹³ Edadani jilat kullakanaka, wayn tawaqonakajj kuntï congregacionan lurasipki ukat yuspärapjjatam kunayman toqetwa uñachtʼayapjjasma. Jupanakatï ‘autot apäma, nayaw alañamp yanaptʼäma’ sapjjätam jan ukajj yaqha ukhamanakan yanaptʼañ munapjjätam ukhajja, taqe chuymaw iyaw sapjjañama. Jehová Diosaw munasiñap uñachtʼayasipktam uk amtapjjapunim. Yanaptʼapktam uka jilat kullakanakajj suma amigomaruw tukupjjaspa. Jupanakarojj Diosar serviñan nayrar sartapjjañapatakejj yanaptʼapjjañamapuniwa. ‘Congregacionan jukʼamp yanaptʼañatak wayn tawaqonakajj wal chʼamachasipjje uk uñjañajj wali kusiskañawa’ sasaw jupanakar sapjjañama. Jupanakampïñatakisa, experiencianakam cuenttʼañatakis tiempo apsusipjjañamawa. Ukham lurapjjäta ukhajja, Jehová Diosajj wayn tawaqonakar congregacionar irpanitapat ‘yuspäratamwa’ uñachtʼayapjjäta (Col. 3:15; Juan 6:44; 1 Tes. 5:18).

14. ¿Kunjamsa David reyejj wajjtʼasirïtap uñachtʼayäna?

¹⁴ David reyitjja, edadani jilat kullakanakajj wajjtʼasirïñwa yateqasipjjarakispa. Jupajj templo lurasiñapatakejj walja qollqepampiw yanaptʼäna (1 Crón. 22:11-16; 29:3, 4). Salomonan templopa sasas jaqenakajj uka templor uñtʼapjjañapäkchïnjja, taqe chuymaw uk lurasiñapatakejj yanaptʼäna. Jumatï edadanëjjsta, construccionan yanaptʼañatakis chʼamamajj jan utj-jjchi ukhajja, contribución churasaw qhawqtï puedkta ukampi yanaptʼasma. Diosar walja maranak servisajj kunanaktï yateqawaykta uk wayn tawaqonakar cuenttʼasaw yanaptʼarakisma.

15. ¿Kuna wali wakiskirinaksa Pablojj Timoteor yatichäna?

¹⁵ Apóstol Pablotjja, ukhamarakiw wajjtʼasirïñ yateqassna. Jupajj misionerot servisa viajkäna ukhajja, Timoteo waynaruw compañtʼañapatak invittʼäna, kunjamsa jupajj predicäna, yatichäna ukanakwa Timoteor yatichäna (Hech. 16:1-3). Pablon ukham yatichatapaw Timoteorojj Diosan arunakap sum predicañataki, sum yatichañatak yanaptʼäna (1 Cor. 4:17). Timoteosti, kunanaktï Pablojj yatichkäna ukanakampejj yaqhanakaruw yaticharakïna.

16. ¿Kunatsa Shigeo jilatajj kuntï yatkäna ukanak mayninakar yatichäna?

¹⁶ Jichha tiemponjja, edadani jilatanakajj congregacionan kuntï nayrajj lurapkäna ukanakat encargasjjapjjañapatakejj wayna jilatanakaruw yatichapjje, ukham lurasajj janis kunan yanaptʼañ puedjjapjjaspa ukham janiw amuyasipkiti. Sañäni, párrafo 9 ukan parlaniwayktan uka Shigeo jilatajja, Comité de Sucursalan serviri jupat sipan wayna jilatanakarojj kuntï yatkäna ukanak walja maranakaw yatichäna. ¿Kunatsa uk luräna? Uka markan  Diosan Reinopat jukʼamp yatiyasiñap munasaw uk luräna. Comité de Sucursal saraykäna uka asignacionap jaytjjäna ukhajja, wakichtʼat mä jilatajj uk sarayañapatakejj utj-jjänwa. Shigeo jilatajj kuntï 45 jila maranak Comité de Sucursalan servisajj yateqkäna ukanakjja, jupat sipan wayna jilatanakarojj yatichaskakiwa. Uka kasta jilatanakajj Diosan markapan mä suma bendicionäpjjewa.

17. ¿Kunsa edadani jilat kullakanakajj mayninakar churapjjaspa? (Lucas 6:38).

¹⁷ Edadani jilat kullakanaka, Jehová Diosar confiyaña, jan jitheqtas Jupar serviñaw taqe kunat sipansa jukʼamp sumajja, ukwa jumanakar uñjasajj yateqapjjta. Biblian wiñay yatichäwinakap uñtʼañataki, ukarjam sarnaqañatak chʼamachasiñajj kunja wakiskirisa ukwa jumanakat yateqapjjarakta. Nayrajj kunjamas taqe kunas lurasïna uk sumwa yatipjjtajja, ukampis cambionak utjawayki ukarjam lurañajj kunja wakiskirisa uksa amuyapjjaraktawa. Inas jumanakat yaqhepajj jichhak bautisasipjjsta, jumanakas ukhamarakiw yaqhanakar yanaptʼapjjasma. Edadanëjjasas kunatsa Jehová Diosar uñtʼañajj wal kusisiyapjjtam ukwa cuenttʼapjjasma. Wayn tawaqonakajj experiencianakam istʼañsa, kunanaktï yateqapkta ukanak istʼañsa wal munapjjani. Kuntï yatipkta uk ‘yaqhanakar churasipkakïta’ ukhajja, Jehová Diosajj walja bendicionanakwa churapjjätam (Lucas 6:38 liytʼañataki).

18. ¿Kunjamsa edadani jilat kullakanakampi wayn tawaqonakampejj purapat yanaptʼasipjjaspa?

¹⁸ Edadani jilat kullakanakatï wayn tawaqonakampi chikachasipjjani ukhajja, purapatwa chʼamañchtʼasipjjani (Rom. 1:12). Cheqas sapa mayninwa kunapatï jan utjki ukajj maynin utji. Sañäni, edadani jilat kullakanakajja, Diosar walja maranak servisajj yatiñanïpjjewa, experiencianïpjjarakiwa. Wayn tawaqonakasti, chʼamanïpjjewa. Wayn tawaqonakampi edadani jilat kullakanakampejj amigonakjam yanaptʼasipjje ukhajja, alajjpachankir Awkisarojj wal jachʼañchapjje, congregacionatakis mä suma bendicionäpjjarakiwa.