1. Wat da wahn gud goal wi ku set fi wiself az wi di geh oalda?

AZ WI di geh oalda, wi mait frayd dat wi mait noh bee az yoosful tu Jehoava az wi yoostu bee wen wi mi yonga. Eevn doa wi mait noh az schrang az wen wi mi yong, wi ku stil yooz di wizdom ahn di skilz wi mi laan oava di yaaz fi teech yonga wanz fi bee moa yoosful eena Jehoava aaganaizayshan ahn tek aan moa rispansabiliti. Wan elda mi seh: “Wen Ah mi staat tu feel dat Ah mi kyaahn du az moch az Ah yoostu, Ah mi soh tankful fi di yonga bradaz weh mi kwalifai ahn redi fi du di werk.”

2. Weh wi wahn diskos eena dis aatikl?

² Eena di aatikl bifoa dis wan, wi mi laan how di yonga bradaz ahn sistaz benifit wen dehn geh fi bee frenz wid di oalda bradaz ahn sistaz. Eena dis aatikl, wi wahn si how oalda wanz ku werk lang wid yonga wanz ahn shoa dat dehn hombl, graytful, jenaros, ahn dat dehn noa dehn limits. Wen dehn du dis, evribadi eena di kangrigayshan benifit.

3. Weh Filipiyanz 2:3, 4 seh wahn hombl Kristyan wahn du, ahn how dat ku help ahn?

³ If di oalda bradaz ahn sistaz waahn help di yonga bradaz ahn sistaz, dehn need fi bee hombl. Wahn hombl persn  kansida adaz fi bee moa impoatant dan hihn. (Reed Filipiyanz 2:3, 4.) Oalda wanz weh hombl andastan dat moas a di taim dehn ga moa dan wan way fi du wahn asainment weh goh lang wid di Skripchaz ahn weh werk. Soh dehn noh ekspek evribadi fi du tingz di way how dehn yoostu du it eena di paas. (Eccl. 7:10) Eevn doa dehn ga lata gud ekspeeryens fi shayr wid di yonga wanz, dehn noa dat “di werl laik how wi noa it now di chaynj” soh ih impoatant fi mek dehn laan fi du tingz eena difrent wayz.—1 Kor. 7:31.

4. How di serkit oavaseeya dehn ku shoa di saym atichood laik di Leevait dehn?

⁴ Hombl oalda wanz noa dat az dehn geh oalda, dehn kyaahn du az moch az dehn yoostu du. Fi egzampl, wen di serkit oavaseeya dehn 70 yaaz oal, dehn geh invaitid fi tek op wahn difrent asainment. Dat mait noh eezi fi dehn bikaaz dehn hapi fi serv dehn bradaz. Da wahn asainment weh dehn lov fi du ahn da sohnting weh deh waahn kantinyu du. Bot dehn andastan dat ih beta fi mek di yonga bradaz du da werk. Soh dehn shoa di saym atichood laik di Leevait dehn eena aynshent Izrel, hoo mi haftu stap serv da di tabernakl wen dehn mi 50 yaaz oal. Di oalda Leevait dehn mi hapi noh mata weh asainment dehn mi gat. Dehn mi du az moch az dehn kud, ahn dehn mi help di yonga wanz. (Num. 8:25, 26)  Tudeh, bradaz weh yoostu serv az serkit oavaseeya kyaahn vizit aal di kangrigayshan dehn weh dehn yoostu vizit, bot dehn help an inkorij di bradaz ahn sistaz eena di kangrigayshan weh dehn geh asain.

5. Weh wi ku laan fahn Dan ahn Katie egzampl?

⁵ Kansida di egzampl a Dan, hoo mi serv az wahn serkit oavaseeya fi 23 yaaz. Wen Dan mi 70 yaaz oal, hihn an ih waif, Katie, mi geh asain fi serv az speshal painyaaz. Yu tink dehn di injai dehn nyoo asainment? Dan seh dat hihn bizi now moa dan eva bifoa! Hihn tek kayr a di rispansabiliti dehn weh ih gat eena di kangrigayshan, hihn help bradaz fi kwalifai fi bee ministeeryal servants, an ih di chrayn adaz soh dat dehn ku preech eena di big siti ahn di prizn dehn. Unu oalda wanz, unu ku stil help adaz eevn if unu noh deh eena ful-taim servis. How? Ajos tu unu nyoo serkomstans, set nyoo goalz, ahn foakos pahn weh unu ku du insteda weh unu kyaahn du.

6. Wai ih impoatant fi mek wi noa wi limits? Yooz di egzampl eena di paragraaf.

⁶ Wahn persn weh noa ih limits noa humoch ih ku du. Dis wahn help ahn fi bee hapi ahn fi kantinyu du ih bes. Wi ku kompyaa wahn persn weh noa ih limits wid sohnbadi weh di jraiv wahn veekl op wahn hil. Ih need fi put it eena loa gyaa soh dat ih ku kantinyu jraiv op di hil. Da chroo, di veekl wahn goh sloa, bot ih wahn kantinyu goh op di hil. Sayhn way soh, wahn persn weh noa ih limits noa wen da taim fi mek chaynjiz ahn goh sloa soh dat ih ku kantinyu serv Jehoava ahn help adaz.—Fil. 4:5.

7. How Barzilai mi shoa dat ih mi noa ih limits?

⁷ Tink bowt Barzilai egzampl, hihn mi 80 yaaz oal wen King Dayvid mi invait ahn fi bee wahn kongsla da di raiyal koat. Bikaaz Barzilai mi noa ih limits, ih neva tek aan di privilij weh Dayvid mi aafa ahn. Barzilai mi noa dat hihn mi kyaahn du wahn lat bikaaz a ih ayj, soh hihn mi sojes tu Dayvid fi invait wahn yonga man weh naym Kimham insted. (2 Sam. 19:35-37) Jos laik Barzilai, oalda bradaz eena di kangrigayshan hapi fi giv yonga bradaz di apachooniti fi du di werk.

8. How King Dayvid mi shoa dat ih mi noa ih limits wen ih mi waahn bil di templ?

⁸ King Dayvid da wahn gud egzampl a sombadi weh noa ih limits. Hihn mi reeli waahn bil wahn hows fi Jehoava. Bot wen Jehoava mi tel ahn dat yong Salaman mi wahn geh di privilij fi du dis werk, Dayvid mi hapi an ih mi giv aala ih sopoat tuwaadz di kanschrokshan a di templ. (1 Chron. 17:4; 22:5) Dayvid neva feel laik if hihn kuda mi du wahn beta jab fi bil di templ jos bikaaz Salaman mi “yong ahn neva ga ekspeeryens.” (1 Chron. 29:1) Dayvid mi noa dat di kanschrokshan mi wahn ga sokses bikaaz Jehoava mi-di bles di werk, da noh bikaaz a ayj er ekspeeryens a di persn weh di tek di leed. Laik Dayvid, oalda wanz eena di kangrigayshan tudeh ku kantinyu werk haad eena dehn servis tu Jehoava, eevn wen dehn asainment chaynj. Ahn dehn noa dat Jehoava wahn bles di yonga wanz weh di du di werk weh dehn yoostu du.

9. How Brada Shigeo, weh serv az wahn memba a di Branch Komiti, shoa dat ih noa ih limits?

⁹ Brada Shigeo da wahn gud egzampl a  sombadi weh noa ih limits. Eena 1976, wen hihn mi 30 yaaz oal, dehn mi apoint ahn fi serv pahn wahn Branch Komiti. Eena 2004 dehn mi apoint ahn az di koardinayta a di Branch Komiti. Laytaraan, hihn mi riyalaiz dat ih neva az schrang az bifoa an ih wuda tek langa fi du ih werk. Soh hihn mi pray bowt di mata an ih mi tink bowt difrent reezn wai ih wuda beta fi mek wahn yonga brada ga da rispansabiliti. Aldoa Shigeo noh serv az di koardinayta nohmoh, hihn kantinyu fi werk lang wid ada membaz a di Branch Komiti. Laik weh wi si eena di egzampl dehn a Barzilai, King Dayvid, ahn Shigeo, wahn persn weh hombl ahn weh noa ih limits foakos pahn weh yong wanz noa aredi ahn noh pahn weh dehn need fi laan. Ih wahn werk lang wid dehn; ih noh wahn feel laik if dehn di kompeet wid ahn.—Prov. 20:29.

10. How di oalda wanz feel bowt di yonga wanz eena di kangrigayshan?

¹⁰ Di oalda wanz vyoo di yonga wanz az wahn gif fahn Jehoava, ahn dehn graytful fi weh dehn du. Dehn tankful dat di yonga wanz ga di schrent fi du di werk ahn dehn wilin fi serv di kangrigayshan.

11. How Ruth 4:13-16 shoa wi dat oalda wanz benifit wen dehn aksep help fahn di yonga wanz?

¹¹ Eena di Baibl, Nayomi da wahn gud egzampl a sohnbadi weh mi graytful ahn weh mi aksep help fahn wahn yonga persn. Afta Nayomi son mi ded, shee mi tel ih daata-in-laa Root fi goh bak tu ih famili. Bot Root neva waahn lef Nayomi an ih gaahn bak da Betlihem wid ahn. Nayomi mi veri hapi dat Root mi gaahn wid ahn, an shee mi aksep ih help. (Ruth 1:7, 8, 18) Dehn da-mi wahn blesin fi eech ada!  (Reed Ruth 4:13-16.) * Oalda bradaz ahn sistaz weh hombl wahn benifit wahn lat if dehn fala Nayomi egzampl.

12. How di apasl Paal mi shoa dat hihn graytful?

¹² Di apasl Paal mi shoa dat ih graytful fi di help weh ih mi geh fahn di bradaz. Fi egzampl, hihn mi gi tanks tu di Kristyanz da Filipai weh mi sen gifs far ahn. (Fil. 4:16) Hihn mi aalso shoa dat hihn mi graytful fi aal di help weh Timoti mi giv ahn. (Fil. 2:19-22) Ahn Paal mi tank Gaad fi dehn wan weh mi inkorij ahn wail ih mi-di chravl az wahn prizna tu Roam. (Aks 28:15) Paal da-mi wahn persn weh mi ga lata enerji an ih mi chravl towznz a mailz fi preech ahn fi schrentn di kangrigayshan dehn. Bot, hihn mi hombl an ih mi aksep di help ahn sopoat fan ih bradaz ahn sistaz.

13. How oalda bradaz ahn sistaz ku shoa dat dehn graytful fi di yonga bradaz ahn sistaz eena di kangrigayshan?

¹³ Oalda bradaz ahn sistaz, unu ku shoa dat unu graytful fi di yonga bradaz ahn sistaz eena difrent wayz. If dehn aafa fi gi yu wahn raid fi goh sohn weh, er fi help yu wid yu shapin, er aafa fi help yu wid eniting els, bee graytful an aksep dehn help. Memba dat fi dehn help da wahn way how Jehoava di shoa yoo dat ih lov yu. Yu mait bee sopraiz dat yu ku geh fi bee kloas frenz wid dehn wanz weh help yu. Aalwayz help dehn fi jraa kloasa tu Jehoava, ahn tel dehn dat yu hapi fi si how yong wanz di du moa fi di kangrigayshan. Bee wilin fi spen taim wid dehn ahn shayr yu ekspeeryens wid dehn. Wen yu du dis, yu wahn shoa Jehoava dat yu tankful fi di yonga wanz weh hihn gat eena di kangrigayshan.—Kol. 3:15; Jan 6:44; 1 Tes. 5:18.

14. How King Dayvid mi shoa dat hihn jenaros?

¹⁴ King Dayvid da-mi wahn jenaros persn, dat da wahn nada impoatant kwaliti weh oalda wanz ku shoa. Hihn mi doanayt wahn lata moni ahn wahn lata gud tingz weh hihn mi oan fi sopoat di kanschrokshan a di templ. (1 Chron. 22:11-16; 29:3, 4) Hihn mi du dis eevn doa peepl mi wahn seh dat da mi Salaman bil di templ. Wi noh mait ga di schrent fi tek paat eena di difrent kanschrokshan proajek dehn, bot wi ku kantinyu sopoat dehndeh proajek wid wi doanayshan dehn weh wi ku giv. Ahn wi ku help di yonga wanz fi benifit fahn di ekspeeryens weh wi gat.

15. Weh gud gifs di apasl Paal mi shayr wid Timoti?

¹⁵ Tink bowt how di apasl Paal mi jenaros. Hihn mi invait Timoti fi jain ahn eena di mishineri werk, ahn hihn neva hoal bak fahn teech dis yong man evriting weh ih mi need fi noa fi preech ahn teech beta. (Aks 16:1-3) Bikaaz Paal mi chrayn Timoti, dis mi help ahn fi du beta eena di preechin ahn teechin werk. (1 Kor. 4:17) Den, Timoti mi yooz weh Paal mi teech ahn fi chrayn adaz.

16. Wai Brada Shigeo mi chrayn adaz?

¹⁶ Oalda bradaz tudeh noh feel laik  if dehn noh wahn bee yoosful if dehn chrayn yonga bradaz fi du di werk weh dehn yoostu du. Memba Brada Shigeo? Hihn mi chrayn yonga membaz a di Branch Komiti. Hihn mi du dis fi help sopoat di preechin werk eena di konchri wehpaat hihn serv. Wen Brada Shigeo kudn serv az di koardinayta nohmoh, wahn yonga brada weh mi geh di chraynin mi redi fi aksep da asainment. Shigeo da wahn memba a di Branch Komiti fi moa dan 45 yaaz now, ahn hihn kantinyu fi shayr ih ekspeeryens wid di yonga bradaz. Bradaz laik Shigeo da wahn reel blesin fi Gaad peepl!

17. Akaadn tu Look 6:38, weh oalda wanz ku shayr wid adaz?

¹⁷ Unu faytful ahn laayal oalda bradaz ahn sistaz da proof dat fi serv Jehoava da di bes way a laif. Unu shoa dat ih impoatant fi laan Baibl prinsiplz an aplai dehn eena wi laif. Unu noa how tingz yoostu geh don eena di paas, bot unu redi fi ajos tu di difrent chaynjiz. Eevn unu oalda wanz weh jos geh baptaiz, unu ku stil help adaz eena lata wayz. Unu ku tel dehn how hapi unu feel fi geh fi noa Jehoava joorin dis taim a unu laif. Di yonga wanz wahn hapi fi hyaa bowt unu ekspeeryens dehn ahn bowt di tingz weh unu laan. If unu “kantinyu giv tu adaz” ahn shayr di lesn dehn unu laan eena laif, Jehoava wahn bles unu wahn lat.—Reed Look 6:38.

18. How di oalda wanz ahn di yonga wanz ku help eech ada?

¹⁸ Az unu dyaa oalda wanz jraa kloasa tu di yonga wanz, unu wahn ku inkorij eech ada. (Roam. 1:12) Eech wan a unu ga sohnting gud fi shayr wid eech ada. Oalda wanz ga di wizdom ahn di ekspeeryens dehn geh eena laif. Yonga wanz ga enerji ahn schrent. Wen di oalda wanz ahn yonga wanz da frenz ahn dehn werk tugeda, dehn bring prayz tu wi hevnli Faada ahn dehn da wahn blesin tu evribadi eena di kangrigayshan.