1. ¿Kʼãrẽ nebia oita krĩchaseabʉ dayi zõna babʉrʉdera?

DAYI zõna babʉrʉdera krĩchaseabʉ nemejãcha obe ẽãta Jeowaita nãã obada kĩrãkʼa. Dayi mejãcha zarea neẽmina zokʼaseabʉ dayi krĩchata, daya kʼawua zebʉrʉta, warrara kʼarebaya, ãyabida nekʼãrẽ owãnamarẽã Jeowaita akʉza iyi organizasione. Mebẽã abaʉba jarada kĩrãkʼa: «Mʉ̃a nekʼãrẽ mejãcha obe ẽã wãsidera zõna babʉrʉ kʼarea, mʉ̃a biga diasi Jeowaʼa, basi baera mebẽrã warrara trajo oseabʉta Jeowaita».

2. ¿Kʼãrẽta akʉdai naʉ̃ artikulodera?

² Nããrabema artikulo kʼawuasida warraraitara yibiata zõnapanʉraʉ̃me neũdukʼawua bʼaita. Naʉ̃ artikulodera akʉdayi bedʼea kimare, edabʉta krĩchaibarata, sainʉ oita kʼawuabaibarata, biga diadaita akʉza daya erbʉra diaseabʉta. Naʉ̃ba kʼarebayi zõnapanʉrata warraraʉ̃me ãba bia trajadaita kongregasionʼita.

3. (1) Filipenses 2:3, 4de jarabʉdera, ¿kʼãrẽta oibara eda krĩchabʉ ũdubita? (2) ¿Kʼãrẽa yibia eda krĩchabʉ ũdubira?

³ Zõnapanʉraba warrarata kʼarebakĩrãbʉbʉrʉ eda krĩchabaibara. Ẽbẽra eda krĩchabʉbara akʉbʉ wuabemarãra ʉ̃tabʉta iyira (akʉra Filipenses 2:3, 4). Ãya maʉ̃ nebia ũdubibʉba biʼia kʼawuabʉ Daizeze Bedʼeadebara nekĩrãtana oseabʉta akʉza yibiata, mawũẽra  ãya obada kĩrãkʼa omarẽã (Ecl. 7:10). Ãya nemejãcha jaradiaseabʉmina ãya kʼawuadata, kʼawuapanʉ naʉ̃ drʉadera nekʼãrẽ awuara owãnata, maʉ̃ba edaʉde bigata nekʼãrẽ awuara odaita (1 Cor. 7:31).

4. ¿Kongregasion akʉbari zõrãrãbara sãwũã ũdubipanʉ lebitarane kĩrãkʼa opanʉta?

⁴ Mebẽrã zõnapanʉra eda krĩchabʉbara kʼawuapanʉ poaga berabari wãba nemejãcha obe ẽãta nãã obada kĩrãkʼa. Bari jaradaita krĩchadaya mebẽã kongregasion akʉbari zõrãrãta, iyi 70 poaga babʉrʉdera maʉ̃ trajora obe ẽ, awuarabʉrʉ diapanʉ trajo yiwidita. Ãyitara maʉ̃ra zareamina biʼia kʼawuapanʉ audre bigata mebẽrã warraraba odamarẽã. Ãya mawũã obʉdeba ũdubibʉ lebitara Israeldebemara kĩrãkʼa panʉta. Lebitarabara ãyi 50 poaga babʉrʉdera wua obe ẽ basi trajo tabernakulode obʉra, mamina ãyi sobiara adua ẽ basi kʼarebapanasi baera warrarasida audre trajadamarẽã Jeowaita (Núm. 8:25, 26). Idi naʉ̃ra mebẽrãba kongregasionza akʉ wãbʉ ẽ mina, ãya so zareata diabʉ akʉza mejãcha kʼarebabʉ ãyibʉ kongregasione.

5. ¿Bʉara kʼãrẽta kʼawuaseabʉ Dan yizadeba akʉza Katie yizadeba?

⁵ Akʉdaya yiza Dan ʉ̃rʉ, iyira 23 poagabayedabasi Kongregasion akʉbari  zõrãrãne. 70 poaga babʉrʉdera iyaʼa akʉza yi kima Katieʼa jarasida yi nãã edebari 130 ora obarita odamarẽã. ¿Ãyira sãwũã wãpe? Danbara jarabʉ ãyira wabida nekʼãrẽ opanʉta kongregasionera. Ãyara kʼarebabʉ warrarãra zõrãrã kʼarebabari bamarẽã akʉza kʼarebapanʉ mebẽrãta Daizeze ʉ̃rʉ pʉwʉrʉ zroma kabananʉmʉmae jaradia kʼawuadamarẽã adewara karseldebida. Mebẽrã zõnapanʉra, marata Daizezeita ewari jõmaʉ̃nẽ trajapanʉbʉrʉ mawũã ẽ bʉrʉ maʉ̃ne trajapanʉ ẽ mina mejãcha kʼarebaseabʉ wuabemarãra. ¿Sãwũã oseapanʉ? Nekĩrãtana awuara obʉdade, krĩchaseapanʉ maraba nekʼãrẽ wabida oseabʉta.

6. ¿Kʼãrẽa yibia sainʉ oita kʼawuabaira? Jarada yizata.

⁶ Ẽbẽra sainʉ oita kʼawuabʉbara kʼawuabʉ iyara jõma obe ẽãta (Prov. 11:2). Maʉ̃ kʼarea sobiabʉ akʉza iya obʉra bia obʉ. Bari jaraita, ẽbẽra karrude wãnera, iyita ʉ̃ta wãbʉrʉ, iyi karrura pikãga wãbarimae kutaibara, mawũãtrʉ ʉ̃ta wãita pikãga wãibaramina. Maʉ̃ kĩrãkʼa ẽbẽra sainʉ oita kʼawuabʉbara pikãga wãbarimae kui kĩrãkʼa oibara, mawũã Jeowaba jarabʉ oita akʉza wuabemara kʼarebaita (Filip. 4:5).

7. ¿Sãwũã ũdubisi Barziláibara iyara sainʉ oita kʼawuabasita?

⁷ Barzilái yiza ʉ̃rʉ bedʼeadayi, nokʼo Davidba iyi kʼawa trajamarẽã jarasidera, Barziláira 80 poaga chuasi. Mamina iyara maʉ̃ra ĩjã ẽ basi, awuarabʉrʉ iya kʼawuabʉ baera sainʉ pai oseabʉta, jarasi Kimhamba oseabʉta, warrara baera (2 Sam. 19:35-37). Barziláide kĩrãkʼa mebẽrã zõnabapepanʉrabara sobia trajabipanʉ warrarata, mawũã odamarẽã ãya oibadata.

8. ¿Nokʼo Davidbara sãwũã ũdubisi iyara sainʉ oseabʉta, Jeowaita de parãkĩrãbasidera?

⁸ Nokʼo Davidbida kʼawuabasi iyara sainʉ oseabʉta. Iyara soiduba okĩrãbasi deta Jeowaita, mamina Jeowabara Salomónta jʉrʉsi maʉ̃ de parãmarẽãra, iyira kĩrʉ ẽ basi awuarabʉrʉ soiduba kʼareba jʉ̃drʉsi Salomónta (1 Crón. 17:4; 22:5). Davidbara krĩcha ẽ basi Salomónbara obe ẽãta warrara baera akʉza mejãcha krĩcha neẽãta (1 Crón. 29:1). Davidbara biʼia kʼawuabasi mejãcha krĩcha kʼawua bʼaibara ẽãta maʉ̃ de parãnʉmʉita awuarabʉrʉ Jeowabʉrʉ kʼarebaseabʉta maʉ̃ biʼia parãira. Idira zõnabapepanʉrãra David kĩrãkʼa trajapanʉ idibasidu, nããra trajabada kĩrãkʼa trajapanʉ ẽ mina. Adewara biʼia kʼawuapanʉ ãya nããra trajo opananara warrarabara biʼia opanʉta Jeowaba kʼarebanʉmʉ baera.

9. ¿Sãwũã ũdubisi Mebẽrã betel akʉbari abaʉba iya kʼawuabʉta sainʉ oseabʉta?

⁹ Idi ewadebidabʉ yiza biara sainʉ oita kʼawuabaibara ʉ̃rʉra, bari jaraita mebẽã Shigeoba. 1976de iyira Mebẽrã betel akʉbarita trʉ̃gasida 30 poaga chuaside. Yi nãã edebari mebẽrã betel akʉbaribasi 2004de. Poaga berabari wãne iya kʼawuasi zareabʉ ẽãta nããra bada kĩrãkʼa akʉza ñabasea traja ẽãta. Mawũẽ iya Jeowaʼa jarasi maʉ̃ ʉ̃rʉ, mõbe krĩchasi kʼãrẽa yibiata audre warraraba oita maʉ̃ trajora. Idira Yi nãã edebari mebẽrã betel akʉbari ẽ  mina wabida trajabʉ Mebẽrã betel akʉbarirabawara. Barzilái yizabara akʉza Nokʼo David yizabara adewara Shigeo yizadeba kʼawuapanʉ ẽbẽra eda krĩchabʉra akʉza kʼawuabʉra sainʉ oseabʉta, akʉ ẽ warrarãra krĩcha neẽãta, awuarabʉrʉ akʉpanʉ ãya kʼãrẽta oseapanʉta. Maʉ̃ kʼarea ãya akʉ ẽ warrarata ãyi nejʉra kĩrãkʼa awuarabʉrʉ ãyi neũdukʼawuara kĩrãkʼa (Prov. 20:29).

10. ¿Mebẽrã zõnabapepanʉrabara sãwũã akʉpanʉ warrara kongregasionebemarãra?

¹⁰ Mebẽrã zõnabapepanʉrabara akʉbʉ warrarãra Jeowaba diada kĩrãkʼa. Ãyira zarea neẽ baera nããra bada kĩrãkʼa, biga diapanʉ warraraba oseapanʉ baera kongregasione nesidabʉmae trajaita.

11. Rut 4:13-16 bayeda jarabʉdera, ¿naʉ̃ testoba sãwũã ũdubibʉ zõnapanʉraitara yibiata ãya yi idu kʼarebabibʉde warraraʼa?

¹¹ Noemíra Daizeze Bedʼeadera yiza biatabʉ. Yõdrabasidera ĩjãsi audre warrarabʉba iyita kʼarebamarẽã. Noemí wau beida tẽã, Noemíbara jarasi Rutʼa jẽda wãmarẽã iyi mebẽrãinʉ. Mamina Rutbara jarasi wã ẽãta awuarabʉrʉ kopayaita Belénʼinʉ, mawũẽra Noemíbara idu zebisi iyi kʼaidu (Rut 1:7, 8, 18). Maʉ̃ra ãyiʉ̃meitara yibiabasi (akʉra Rut 4:13-16). Mebẽrã zõnapanʉra eda krĩchapanʉrabara Noemí yiza biata opanʉ.

12. ¿Sãwũã ũdubisi Pablobara iyara biga diabʉta?

¹² Pablobida biga diabasi iyi kʼarebasidadera, bari jaraita mebẽrã Filipodebemaraba iyi kʼarebasidadera iyara maʉ̃ kʼareara biga diasi (Filip. 4:16).  Adewara Timoteoʼabida biga diasi iyi bari nekʼãrẽ osi baera (Filip. 2:19-22). Romanebema karselʼeda edesidadera, mebẽrãbara akʉ jʉ̃ẽsida so zarea diaita, maʉ̃ kʼarea biga diasi Pablobara Jeowaʼa (Hech. 28:15). Pablora jĩgara wãbasi Daizeze Bedʼea jaradiaita akʉza mebẽrã so zarea diaita. Mamina mebẽrãʼabida idu yi kʼarebabibasi ʉ̃tabʉta krĩcha ba ẽ basi baera.

13. ¿Mebẽrã zõnabapepanʉrabara sãwũã ũdubiseabʉ biga diabʉta warrara kongregasionebemaraba obʉ kʼarea?

¹³ Mebẽrã zõnapanʉra, marabara nekĩrãtana ũdubiseabʉ biga diabʉta warrara kongregasionebemaraba opanʉ kʼarea. Bari jaraita warraraba jarara, bʉta kopayakĩrãbʉta mawũã ẽ bʉrʉ bʉme ãba ne eda wãkĩrãbʉta akʉza nekʼãrẽ awuara odaita, ãyaʼa idu yi kʼarebabira mõbe biga diara. Ũdubira bʉara krĩchabʉta ãyi sãwũã wãta Jeowaʉ̃me. Jarada bʉra mejãcha sobiabʉta ãyira zarea opanʉ baera audre nekʼãrẽ oita kongregasione. Akʉza ewari jʉrʉda ãyibawara berabarita, ãyaʼa nebʉraita bʉ ʉ̃rʉ, bʉa nekʼãrẽ ozebʉrʉta Jeowa ode. Akʉra warrarãra Jeowaba nebiatabʉ kʼãrẽta bʉitaʼa akʉza biga diara ãyitapanʉ baera bʉ kongregasione (Col. 3:15; Juan 6:44; 1 Tes. 5:18).

14. ¿Nokʼo Davidbara sãwũã ũdubisi iya diakĩrãta iya erbʉra?

¹⁴ Nokʼo Davidbara nebiata ũdubisi zõnapanʉraba ũdubidaibarata: nekʼãrẽ daya erbʉta diai ʉ̃rʉ. Jeowaita templo parãsidadera Davidbara nemejãcha diasi maʉ̃ templota parãnamarẽã (1 Crón. 22:11-16; 29:3, 4). Iya mawũã osi wuabemarabara jaradaibasimina Salomónba parãsita. Bʉta idi zõnabapebʉbʉrʉ akʉza zarea neẽbʉrʉ de parãbaribʉmae trajaita, kʼarebaseabʉ plata diaide donasione, bʉya diaseabʉidu. Adewara warraraʼa jaradiara bʉ nebia kʼawua zebʉrʉta.

15. ¿Kʼãrẽ nebiata jaradiasi Pablobara Timoteoʼara?

¹⁵ Pablobida ũdubisi iya diakĩrãta iya nekʼãrẽ erbʉra. Jarasi Timoteoʼa iyita kopayamarẽã jĩgara jaradia wãita, mõbe jaradiasi sãwũã Daizeze Bedʼea jaradiaibarata (Hech. 16:1-3). Mawũẽ iyara Daizeze Bedʼeara biʼia jaradia kʼawuasi Pablodeba (1 Cor. 4:17). Timoteobara wuabemara nejaradiasi Pabloba iyaʼa jaradiabadadeba.

16. ¿Kʼãrẽa yibiabasi Shigeoba wuabemara nejaradiaira?

¹⁶ Idira mebẽrã zõnapanʉrãra Pablo kĩrãkʼa perada ẽ mebẽrã warrara jaradiaita, odamarẽã ãya nããra obadata kongregasione. Bari jaraita mebẽã Shigeobara, parrapo 9de jarabʉba, iya mejãcha jaradia zebʉrʉ Mebẽrã betel akʉbaridebema audre warraraʼa. Iya maʉ̃ta osi Daizeze Nokʼodebemata audre oi kʼarea iyibʉ pʉwʉrʉde. Maʉ̃ kʼarea iya Yi nãã edebari mebẽrã betel akʉbaridebema idubʉsidera, basi mebẽã biʼia oseabʉta maʉ̃ trajota iya obadara. Shigeobara mebẽrã warrara jaradia zebʉrʉ iya 45 poagade nekʼawua zebʉrʉta Mebẽrã betel akʉbaride. Mebẽrã Shigeo kĩrãkʼa panʉra nebiatapanʉ Jeowa pʉwʉrʉdera.

17. ¿Kʼãrẽta kʼawuaseabʉ wuabemarabara zõnabapepanʉraba jaradiabʉdeba akʉza nebʉrabʉdeba? (Lucas 6:38).

 ¹⁷ Mebẽrã zõnapanʉra, marabara ũdubibʉrʉ bia obʉta Jeowaita kʼẽrẽpa trajabʉdeba. Akʉza ũdubipanʉ wãrĩnu Daizeze Bedʼeadebema oũdubira jipade yibiata. Marabara kʼawuapanʉ nekʼãrẽra sãwũã opanasita nããrãra, adewara akʉpanʉ kʼãrẽa bigata nekʼãrẽ awuara odaira. Ʉ̃kʉrʉ maranebemata dããraba ẽ bʉrʉ buru kʼoedata, nebʉraseabʉ kʼãrẽa mejãcha sobiasita Jeowa ũdukʼawuasidera zõnabasimina. Warrarabara ũrĩkĩrãnañi maraba nekʼawua zebʉrʉra. Adewara maraba erbʉta diapanʉbʉrʉ Jeowaba nemejãcha diayi maraʼa (akʉra Lucas 6:38).

18. ¿Sãwũã yiya kʼarebaseapanʉ zõnapanʉrata warrarabawarara?

¹⁸ Zõnapanʉrata warrarabawara ãbabʉbʉrʉ yiya kʼarebaseapanʉ (Rom. 1:12). Aba abakaʉba nebiata erbʉ wuabemaraba neẽãta. Zõnapanʉrabara erbʉ krĩcha biata akʉza ãya nebia kʼawua zebʉrʉta. Warrarabara erbʉ zareata mejãcha. Warrarata zõnapanʉraʉ̃me ãba trajabʉdadera yi neũdukʼawuara kĩrãkʼa, Jeowa ʉ̃rʉ ibia bedʼeabibʉ akʉza nebiatapanʉ kongregasionera.