1. Kisa nou pouvé désidé fè lò nou ka koumansé pran laj ?

LÒ NOU ka pran laj, pitèt nou pouvé pè pa sèrvi anyen ankò annan òrganizasyon-an. A vré, pitèt nou pa gen bokou fòrs ankò, mé nou gen plis sajès ké plis èspéryans pasé anvan. Donk nou pouvé désidé idé sa-ya ki pi jenn pou yé vin pi vayan é pou yé asèpté nouvo rèsponsabilité annan òrganizasyon Jéova-a. Men sa roun ansyen ka di asou sa : « Lò mo koumansé santi ki mo té ka koumansé las paské laj té ka rantré, mo té kontan savé ki i té gen jenn frè annan asanblé-a ki té pouvé kontinyé travay-a. »

2. Kisa nou ké wè annan sa artik-a ?

² Annan artik nou wè anvan-an, nou wè ki sa-ya ki pi jenn ka jwenn bénédiksyon lò yé ka alé wè sa-ya ki pi vyé. Annan sa artik-a, nou ké palé di kat kalité : lò nou ka fè nou kò toupiti, lò nou ka rékonnèt nou limit, lò nou ka montré nou rékonésans, é lò nou kontan bay. Sa kat kalité-ya ké pousé sa-ya ki pi vyé travay ansanm ké sa-ya ki pi jenn, é sa ké mennen bénédiksyon pou tout asanblé-a.

3. Dapré Philippiens 2:3, 4, ki mantalité roun krétyen ki gen imilité divèt gen ?

³ Si roun frè ouben roun sò ki ja gen laj ka fè so kò toupiti, sa ké pèrmèt li idé sa-ya ki pi jenn. Roun moun ki gen imilité ka wè ròt-ya kou moun ki pi fò pasé li (li Philippiens 2:3, 4). Roun frè ouben roun sò ki ja gen laj, ka rékonnèt ki a pa rounsèl fason ki bon pou fè roun travay. I pouvé gen plizyèr fason pou fè l’ ki ka alé ké sa  Labib-a ka di é ki ka maché. Donk yé pa ka doumandé tout moun fè bagaj-ya kou yé menm té ka fè (Eccl. 7:10). A vré, yé gen bokou èspéryans pou bay sa-ya ki pi jenn. Mé yé ka konprann ki « a chanjé sa monn-an ka chanjé » é ki yé divèt adapté yé kò lò bagaj-ya ka chanjé (1 Cor. 7:31).

4. Kou Lévit-ya, ki bèl mantalité rèsponsab sirkonskripsyon-yan gen ?

⁴ Krétyen-yan ki gen imilité ka rékonnèt ki pi laj ka rantré, pi yé pa pouvé fè bokou bagaj kou anvan. Annou palé parèkzanp di rèsponsab sirkonskripsyon-yan. Lò yé gen 70 an, yé ka doumandé yé arété sèrvis sirkonskripsyon-an. Sa pouvé rèd pou yé. Yé kontan sa yé ka fè paské sa ka pèrmèt yé idé yé frè ké sò-ya, é yé té ké lé kontinyé fè l’. Mé yé ka konprann ki yé bézwen frè ki pi jenn kontinyé travay-a. Yé ka fè kou Lévit-ya ki té divèt arété travay annan tabèrnak-a lò yé té gen 50 lannen. A pa té travay yé té ka fè annan tabèrnak-a ki té ka fè si Lévit-ya té kontan. Lò yé té pran yé rétrèt, yé té ka fè tousa yé té pouvé pou idé sa-ya ki té pi jenn fè yé travay (Nomb. 8:25, 26). Jòdla, sa ki té rèsponsab sirkonskripsyon anvan, pa ka alé wè frè-ya annan plizyèr asanblé ankò, mé yé ka fè bokou bon bagaj annan asanblé-a koté yé fika.

5. Kisa èkzanp Dan ké Katie ka anprann nou ?

 ⁵ Annou palé di Dan, ki té rèsponsab sirkonskripsyon pannan 23 an. Lò i pran so 70 an, li ké so madanm Katie divini pyonyé èspésyal. Kisa yé ka fè pou santi yé kò byen annan sa nouvo sèrvis-a ? Dan ka di ki i pa jen travay bokou konsa. I gen bokou bagaj pou fè annan asanblé-a, i ka idé frè-ya pou yé divini asistan é i ka fòrmé frè ké sò-ya ki ka partisipé annan travay prédikasyon-an annan gran vil-ya ouben annan lajòl. Nou gangan-yan, ki zòt annan sèrvis a plen tan-an ouben ki zòt pa annan sèrvis a plen tan-an, zòt pouvé fè bokou bagaj pou ròt-ya. Kouman zòt pouvé fè sa ? A pou zòt adapté ké zòt nouvo sitiasyon, chaché fè nouvo bagaj, é pasé zòt mété zòt lidé asou sa zòt pa pouvé fè ankò, mété zòt lidé asou sa zòt pouvé fè aprézan.

6. Poukisa nou divèt rékonnèt nou limit ? Bay roun èkzanp.

⁶ Roun moun ki ka rékonnèt so limit ka asèpté ki pi laj ka rantré, pi sa i pouvé fè ka chanjé (Prov. 11:2). A sa ki ka pèrmèt li kontinyé travay ké tchò kontan. Nou pouvé di ki roun moun ki ka rékonnèt so limit, a kou roun moun ki ka éséyé monté roun pant ké so loto. Pou i kontinyé monté pant-a, i divèt chanjé vitès. I ké roulé mwen vit, mé loto-a ké kontinyé monté. Menm fason-an, roun moun ki ka rékonnèt so limit savé kitan i divèt « chanjé vitès » pou kontinyé travay pou Jéova (Phil. 4:5).

7. Annan ki sitiasyon Barzilay montré i té ka rékonnèt so limit ?

⁷ Annou pran èkzanp Barzilay. I té gen 80 lannen lò rwa David propozé li vini sèrvi annan so palè. Mé paské i té ka rékonnèt so limit, Barzilay pa asèpté sa rwa-a té ka propozé li. I rékonnèt ki, akoz di so laj, i té gen bagaj i pa té pouvé fè. I propozé li pran Kimam, roun mouché ki té pi jenn (2 Sam. 19:35-37). Kou Barzilay, frè-ya ki gen yé laj tou kontan bay sa-ya ki pi jenn okazyon pou idé asanblé-a.

8. Annan ki sitiasyon David montré i té ka rékonnèt so limit ?

⁸ David osi ka bay nou roun bon èkzanp annan zafè rékonnèt nou limit. I té vréman anvi konstrwi roun kaz pou so Bondjé. Mé lò Jéova di li ki i té ké bay Salomon sa lònò-a, i asèpté sa désizyon-an épi i soutni sa projè-a ké tout so tchò (1 Chron. 17:4 ; 22:5). I pa di annan so tchò ki kou Salomon té ‘jenn é i pa té gen èspéryans’, a li ki té pou fè Tanp-a (1 Chron. 29:1). I té savé ki a pa té ni laj ni èspéryans ki té ké fè projè Tanp-a maché, mé pito bénédiksyon Jéova-a. Kou David, frè ké sò-ya ki ja gen yé laj ka kontinyé travay pou Jéova menm lò i ka bay yé rounòt travay pou fè, é yé savé Jéova ké béni sa-ya ki ranplasé yé é ki pi jenn.

9. Annan ki sitiasyon roun frè ki annan roun komité filyal montré i té ka rékonnèt so limit ?

⁹ Jòdla osi, i gen roun patché frè ké sò ki ka bay roun bon èkzanp annan zafè rékonnèt nou limit. Annou palé di Shigeo. An 1976, lò i té gen 30 an, yé doumandé li fè parti di roun komité filyal, é an 2004, i divini koòrdinatèr sa komité-a. Mé plizyèr lannen apré, i randé so kò kont ki i pa té gen fòrs kou anvan é ki i té ka pran plis tan pou fè travay yé té ka  bay li fè. I priyè Jéova pou sa, é i réfléchi pou i konprann poukisa sa té ké pi bon ki roun frè pi jenn pran so plas. Jòdla, Shigeo ka kontinyé travay annan sa komité filyal-a menm si a pa li ki koòrdinatèr-a ankò. Kou nou wè l’ annan èkzanp Barzilay, David ké Shigeo, roun moun ki gen imilité é ki ka rékonnèt so limit pa ké gadé sa jennjan-yan pa konnèt fè, mé yé pito ké gadé annan ki bagaj yé fò. Yé pa ké wè yé kou moun ki lé pran yé plas, mé pito kou moun ki lé travay ansanm ké yé (Prov. 20:29).

10. Kouman frè ké sò-ya ki ja granmoun divèt wè sa-ya ki pi jenn ?

¹⁰ Frè ké sò-ya ki ja granmoun ka wè sa-ya ki pi jenn kou roun bèl kado di Jéova. Sa ka rasiré yé lò yé ka wè ki menm si yé menm pa gen fòrs kou anvan, sa-ya ki gen fòrs paské yé jenn, la pou bay asanblé-a sa i bézwen.

11. Kouman Ruth 4:13-16 ka montré ki frè ké so-ya ki ja granmoun ké gen bénédiksyon si yé ka asèpté sa-ya ki pi jenn idé yé ?

¹¹ Noémi ka bay nou roun bon èkzanp asou zafè di mèrsi. Lò i té vyé, i asèpté roun fanm pi jenn idé l’. Lò so pitit mouri, pou koumansé i di so bèlfi routounen annan so fanmi. Mé Rit pa té lé lésé so bèlmè, a pou sa i ensisté pou alé Bètléem ké li, é finalman Noémi asèpté so bèlfi idé l’ (Ruth 1:7, 8, 18). É a té roun bon bagaj pou yé toulédé ! (li Ruth 4:13-16). Imilité-a ké fè nou frè ké sò-ya ki ja granmoun, swiv èkzanp Noémi.

12. Kisa ki ka montré ki Pòl té gen rékonésans ?

¹² Apot Pòl té ka di so frè ké sò-ya mèrsi pou sa yé té ka fè pou idé l’.  Parèkzanp, i di krétyen-yan ki té Filip mèrsi paské yé té bay li plizyèr bagaj i té bézwen (Phil. 4:16). I di Timoté osi mèrsi pou tousa i té fè pou idé li (Phil. 2:19-22). É lò yé fè li alé Ròm, i di Bondjé mèrsi paské i té voyé plizyèr frè jwenn li pou ankourajé li (Actes 28:15). Pòl té gen bokou fòrs. I té fè bokou chimen pou préché épi pou fè asanblé-ya vin pi fò. Mé i pa té tro fyèr pou asèpté so frè ké sò-ya idé li.

13. Kouman frè ké so-ya ki ja gen laj pouvé montré yé rékonésans ?

¹³ Nou gangan-yan, montré sa-ya ki pi jenn ki zòt kontan yé la annan zòt asanblé. I gen plizyèr bagaj zòt pouvé fè pou sa. Parèkzanp, si yé lé mennen zòt ké yé loto, fè déztrwa komisyon pou zòt, ouben randé zòt rounòt sèrvis, a pou zòt asèpté yé idé zòt, ké tout zòt tchò. A pou zòt wè sa kousidiré a té Jéova ki té ka di zòt ki i kontan zòt. Pitèt menm zòt ké vin zanmi. Éséyé idé yé osi fè yé lanmityé ké Jéova vin pi fò. É di yé ki zòt kontan wè yé chaché fè plis pou asanblé-a. Pran osi roun tibi tan pou palé di zòt, ké sa zòt anprann annan zòt lavi. Men déztrwa bagaj zòt pouvé fè pou ‘montré zòt rékonésans’ paské Jéova fè asanblé-a kado sa jennjan-yan ki paré pou fè bokou bagaj (Col. 3:15 ; Jean 6:44 ; 1 Thess. 5:18).

14. Annan ki sitiasyon David montré i té kontan bay ?

¹⁴ Èkzanp David ka montré nou ki frè ké sò-ya ki ja granmoun divèt gen rounòt kalité ankò : yé divèt kontan bay. David pran annan sopa richès bokou soumaké ké bokou bagaj ki té gen valò pou yé té pouvé konstrwi Tanp-a (1 Chron. 22:11-16 ; 29:3, 4). Pourtan, i té byen savé ki a so pitit Salomon yé té ké félisité pou sa travay-a. Si nou pa gen fòrs ankò pou bay roun lanmen annan chantyé konstriksyon-yan, nou pouvé bay sélon sa nou gen pou kontinyé soutni sa chantyé-ya, é nou pouvé fè pi jenn-yan profité di nou èspéryans.

15. Ki bèl bagaj Pòl partajé ké Timoté ?

¹⁵ Pòl li menm osi ka bay nou roun bon èkzanp annan zafè kontan bay. Lò Timoté té jenn toujou, i di li vini ké li annan so vwayaj misyonèr, é a ké tout so tchò i partajé ké li tout so métòd pou préché ké ansényé (Actes 16:1-3). Sa fòrmasyon-an pèrmèt Timoté divini vayan annan prédikasyon-an ké ansèyman-an (1 Cor. 4:17). Apré sa, Timoté li menm partajé sa Pòl té anprann li ké ròt moun.

16. Poukisa Shigeo fòrmé ròt frè ?

¹⁶ Frè-ya ki ja granmoun, pa pè yé pa sèrvi anyen ankò annan asanblé-a si yé ka anprann frè-ya ki pi jenn fè bagaj yé menm té abitchwé fè. Parèkzanp, Shigeo nou palé anvan-an, fòrmé plizyèr ròt frè annan komité filyal-a ki té pi jenn pasé li. I fè sa pou soutni entérè Rwayonm-an annan so péyi. A konsa roun frè ki té byen fòrmé rivé ranplasé l’ lò i pa té pouvé rété koòrdinatèr ankò. Jòdla, Shigeo ka kontinyé partajé ké sa ki pi jenn tout èspéryans i trapé pannan pasé 45 lannen i fè annan roun komité filyal. Frè-ya ki kou Shigeo sa roun bèl bénédiksyon pou pèp Bondjé-a !

17. Kouman frè ké sò-ya ki ja granmoun pouvé fè sa Luc 6:38 ka di ?

¹⁷ Nou gangan-yan, lò nou ka gadé zòt,  nou ka vréman wè ki sèrvi Jéova ké lafwa ké fidélité, a sa ki lavi ! Zòt èkzanp ka byen montré ki apliké prensip ki annan Labib-a vo lapenn. Zòt rivé gen bokou èspéryans mé zòt ka konprann ki zòt bézwen adapté zòt kò. É zòt menm ki granmoun é ki batizé i pa gen lontan, zòt gen bokou bagaj pou bay osi. Zòt pouvé èspliké sa-ya ki pi jenn poukisa anprann konnèt Jéova jòdla ka fè zòt tchò kontan. Yé ké kontan kouté zòt rakonté sa ki rivé zòt annan zòt lavi, é palé di sa zòt anprann. Èspéryans zòt gen-an, a roun vré trézòr. Si zòt abitchwé pran annan sa trézòr-a pou bay ròt-ya, Jéova ké béni zòt bokou (li Luc 6:38).

18. Kisa sa ki pi vyé ké sa ki pi jenn pouvé fè pou yé konpanyen ?

¹⁸ Nou gangan-yan, chaché vin pi pròch di sa-ya ki pi jenn ; zòt ké jwenn bénédiksyon é yé menm osi (Rom. 1:12). Nou tout gen roun bagaj ki gen valò pou bay. Frè ké sò-ya ki ja granmoun rivé gen sajès ké èspéryans lannen apré lannen. Sa-ya ki pi jenn yé menm, yé plen ké fòrs. Lò nou tout zanmi é lò nou tout ka travay ansanm, sa ka bay nou Papa ki annan syèl-a lònò, épi sa bon pou tout asanblé-a.