1. ¿Mbaʼépa iporãta jajapo ñandeedavévo jahávo?

AMÁSKE ñandeeda ikatu hína jakyhyje nañandedeprovechovéirõ g̃uarã Jehovápe yma ñanemitãvérõ guaréicha. Ikatu oime nañanembaretevéima anteve guaréicha, péro jaipurukuaa pe arandu ha experiénsia jarekóva ñamboʼe hag̃ua umi imitãvévape. Péicha ideprovéchota hikuái Jehová organisasiónpe ha ikatúta ojagarra hetave rresponsavilida. Peteĩ ermáno oservímava heta tiémpore de ansiáno heʼi: “Ndaikatuvéirõ guare ajapo heta mbaʼe cheedáma rupi, aagradeseterei oĩ haguére umi ermáno imitãvéva ha ikatupyrýva ojapo hag̃ua pe traváho”.

2. ¿Mbaʼépa jahecháta ko artíkulope?

² Pe artíkulo ohasa vaʼekuépe jahecha kuri mbaʼéichapa umi imitãvape ou porãta oñemoag̃uíramo umi ijedávare. Ko artíkulope jahecháta umi ijedáva tekotevẽha iñumílde, orrekonose la ndaikatúiva ojapo, ijagradesído ha ipojera. Koʼã kualida oipytyvõta chupekuéra ombaʼapo porã hag̃ua umi imitãvandi, ha upéva haʼéta peteĩ vendisión pe kongregasión kompletoitépe g̃uarã.

3. Heʼiháicha Filipenses 2:3, 4, ¿mbaʼépa ojapóta peteĩ kristiáno iñumíldeva, ha mbaʼéichapa oipytyvõta chupe upéva?

³ Umi ijedáva ningo iñumílde vaʼerã oipytyvõséramo umi imitãvape. Peteĩ persóna iñumíldeva ohecha umi ótrope tuichavévaramo chugui (elee Filipenses 2:3, 4). Umi ijedáva ohechaukáva ko kualida ontende peteĩ mbaʼe ikatuha ojejapo porã heta hendáicha, ha oĩ porãtanteha avei la Biblia heʼiháicha. Upévare haʼekuéra nohaʼarõi ojejapo entéro mbaʼe haʼekuéra ojapo haguéicha ymave (Ecl. 7:10). Umi ijedáva ikatu oipytyvõ umi imitãvape omombeʼúvo chupekuéra umi mbaʼe oaprende vaʼekue. Péro  haʼekuéra ontende avei ‘la oikóva ko múndope okambiaha hína’ ha upévare tekotevẽha ojadapta umi kámbiore (1 Cor. 7:31, nóta).

4. ¿Mbaʼéichapa umi superintendénte de sirkuíto osegi umi levita ehémplo?

⁴ Umi ermáno ijedáva ha iñumíldeva ohechakuaa ndaikatuveimaha ojapo heta mbaʼe yma guaréicha. Ñapensamíntena por ehémplo umi superintendénte de sirkuítore. Haʼekuéra ningo ohupytývo 70 áño oñemeʼẽ chupekuéra ótra asignasión, ha upéva oiméne ijetuʼu chupekuéra. Haʼekuéra ningo ovyʼaiterei kuri ikatu haguére oservi péicha umi ermánope. Ohayhueterei hikuái la iñasignasión ha ikorasõ mbytete guive osegise ojapo upe traváho. Péro haʼekuéra ontende iporãveha umi imitãva ojapo koʼág̃a upéva. Koʼã ermáno ijedáva osegi umi levita Israel tiémpope guare ehémplo, umíva ningo ohupytývo 50 áño ojerretiráma ha nombaʼapovéima vaʼekue pe tavernákulope. Péro koʼã levita ijedáva nodependéi vaʼekue peteĩ priviléhiore ovyʼa hag̃ua. Haʼekuéra kyreʼỹme ojapo la ikatumíva ha oipytyvõ umi imitãvévape (Núm. 8:25, 26). Koʼág̃arupi umi oĩ vaʼekue de superintendénte de sirkuíto ndovisitavéima umi kongregasión, péro tuicha oipytyvõ ha omokyreʼỹ pe kongregasión oñeasignahápe chupekuéra.

5. ¿Mbaʼépa omboʼe umi ijedávape Dan ha Katie ehémplo?

⁵ Jahechami ermáno Dan ehémplo. Haʼe ningo oservi vaʼekue de superintendénte de sirkuíto 23 áñore. Péro ombotýrõ guare 70 áño, chupe ha hembireko Kátiepe oñeasigna de  prekursór espesiál. ¿Mbaʼetekópa oho hese hikuái la iñasignasiónpe? Dan heʼi núnka nahembiapohetáiva la peichaite peve. Haʼe oreko heta rresponsavilida ikongregasiónpe, oipytyvõ umi ermánope oiko hag̃ua chuguikuéra siérvo ministeriál, ha umi ótrope omboʼe opredika hag̃ua siudaháre ha umi kárselpe. Peẽ ermanokuéra ijedáva, peẽ ningo tuichaiterei ikatu peipytyvõ umi ótrope, peservi térã ndapeservíriramo jepe de tiémpo kompléto. ¿Mbaʼéichapa ikatu pejapo upéva? Upearã peñehaʼã vaʼerã pejadapta umi kámbiore, pemoĩ méta pyahu, ha pepensa meme umi mbaʼe ikatúvare pejapo, ani umi mbaʼe ndaikatúivare pejapo.

6. ¿Mbaʼérepa iporã peteĩ persóna orrekonose la ndaikatúiva ojapo? Emoĩ peteĩ ehémplo.

⁶ Pe persóna orrekonoséva umi mbaʼe ndaikatúiva ojapo ojadapta la isituasiónre, ha ndoikói ojeexihieterei ojapo hag̃ua peteĩ mbaʼe ndaikatumoʼãiva ojapo (Prov. 11:2, nóta). Upéicha rupi haʼe osegi ovyʼa ha ombaʼapo jejopy. Ikatu ñakompara chupe peteĩ omanehávare ohóvo peteĩ arrivádare. Pe chofér tekotevẽta voi omboguejy la ikámbio osegi hag̃ua oarriva. Oho mbeguevéta ningo añete, péro osegíta oho hese. Ha upéicha avei pe persóna orrekonoséva umi mbaʼe ndaikatúiva ojapo. Haʼe oikuaa mbaʼe moméntopepa “omboguejy vaʼerã la ikámbio”, osegi hag̃ua oservi Jehovápe ha oipytyvõ ótrope (Filip. 4:5).

7. ¿Mbaʼéichapa Barzilái ohechauka vaʼekue orrekonoseha umi mbaʼe ndaikatúiva ojapo?

⁷ Ñapensamína Barzilái ehémplore. Haʼe orekórõ guare 80 áño, rréi David oinvita vaʼekue chupe oiko hag̃ua chugui peteĩva umi ikonsehéro pe palásiope. Péro Barzilái orrekonose la ndaikatúiva ojapo ijedáma haguére, ha orrechasa pe rréi oofreséva chupe. Upémarõ heʼi pe rréipe oho hag̃ua ivése peteĩ kuimbaʼe imitãvéva hérava Kimham (2 Sam. 19:35-37). Ojapo haguéicha Barzilái, umi ermáno ijedáva ovyʼa omeʼẽ haguére oportunida umi ermáno imitãvévape ombaʼapove hag̃ua.

8. ¿Mbaʼéichapa rréi David orrekonose vaʼekue umi mbaʼe ndaikatúiva ojapo omopuʼãsérõ guare pe témplo?

⁸ Rréi David orrekonose vaʼekue avei umi mbaʼe ndaikatúiva ojapo ha oheja ñandéve peteĩ ehémplo iporãitereíva. Haʼe ningo ikorasõ mbytete guive ojapose vaʼekue Jehovápe la hogarã. Péro Jehová oavisa chupe upe priviléhio oñemeʼẽtaha itaʼýra Salomónpe. David oasepta la Jehová odesidíva, ha ojapo ikatúva guive oprepara hag̃ua la oñekotevẽtava oñemopuʼã hag̃ua pe témplo (1 Crón. 17:4; 22:5). Upérõ ningo Salomón “imitã ha ndoikuaái gueteri heta mbaʼe”. Upéicharõ jepe David nopensái vaʼekue ivaleveha chugui omopuʼã hag̃ua pe témplo (1 Crón. 29:1). David oikuaa vaʼekue pe projékto osẽ porã hag̃ua odependeha Jehová vendisiónre, ha ndahaʼéi pe experiénsia orekóvare umi oñenkargátava hese ni mboy áñopa oreko hikuái. Ojapo haguéicha David, koʼág̃arupi umi ijedáva osegi ombaʼapo jejopy Jehová servísiope oñekambiáramo jepe iñasignasión. Ha oikuaa hikuái Jehová ovendesitaha umi imitãvéva ojapóvape pe traváho anteve haʼekuéra ojapo vaʼekue.

9. ¿Mbaʼéichapa peteĩ ermáno oĩva pe komite de sukursálpe orrekonose umi mbaʼe ndaikatúiva ojapo?

⁹ Ñane tiémpope peteĩ ermáno hérava Shigeo ohechauka kuri orrekonoseha umi mbaʼe ndaikatúiva ojapo. Áño 1976-pe, haʼe orekórõ guare 30 áño oñenombra vaʼekue chupe oĩ hag̃ua peteĩ komite de sukursálpe, ha áño 2004-pe oiko chugui koordinadór pe komite de sukursálpe. Upéi haʼe ohechakuaa naimbareteveimaha yma guaréicha, ha imbeguevemaha ojapo hag̃ua umi traváho orekóva iñasignasiónpe. Upémarõ Shigeo oñemboʼe Jehovápe, ha oñepyrũ opensa iporãvetaha oikóramo koordinadór peteĩ ermáno  imitãvévagui. Koʼág̃a Shigeo osegi ombaʼapo kyreʼỹ pe komite de sukursálpe ndahaʼevéiramo jepe pe koordinadór. Ohechaukaháicha Barzilái, rréi David ha Shigeo ehémplo, pe persóna iñumíldeva ha orrekonoséva umi mbaʼe ndaikatúiva ojapo, oñesentra umi mbaʼe si oikuaávare umi ermáno imitãvéva, ha ndahaʼéi umi mbaʼe ofaltávare chupekuéra oaprende. Haʼe nopensamoʼãi umi ermáno imitãvéva okompetiseha hendive, síno ohecháta chupekuéra ikompañéro de traváhoramo (Prov. 20:29).

10. ¿Mbaʼéichapa umi ijedáva ohecha umi imitãvéva oĩvape kongregasiónpe?

¹⁰ Umi ijedávape g̃uarã ningo umi imitãva haʼe hína peteĩ rregálo oúva Jehovágui, ha oagradeseterei umi mbaʼe ojapóva hikuái. Umi ijedáva ningo naimbaretevéima, ha upévare oagradese oĩ haguére umi imitãvéva, ikyreʼỹ ha imbaretéva ojapo hag̃ua umi traváho kongregasiónpe.

11. ¿Mbaʼéichapa Rut 4:13-16 ohechauka umi ijedávape ou porãha ohejáramo umi imitãvéva oipytyvõ chupekuéra?

¹¹ La Bíbliape jatopa Noemí ehémplo porãite. Haʼe ningo ijagradesída vaʼekue ha oheja oipytyvõ chupe inuéra Rut, imitãvéva chugui. Opyta rire viúda, Noemí omokyreʼỹ Rútpe oho jey hag̃ua oĩháme ihentekuéra. Péro Rut heʼi jey jey vaʼekue Noemíme ndohejamoʼãiha chupe ha oho hendive Belénpe. Noemí ovyʼaiterei Rut oho haguére hendive ha oheja Rútpe oipytyvõ chupe (Rut 1:7, 8, 18). Upéva ningo añetehápe ou porãiterei kuri mokõivévape (elee Rut 4:13-16). Umi ermáno ijedáva ha iñumíldeva osegi Noemí ehémplo.

12. ¿Mbaʼéichapa apóstol Pablo oagradese vaʼekue umi mbaʼe ojejapóva hesehápe?

¹² Apóstol Pablo oagradese vaʼekue avei umi ermanokuérape oipytyvõ haguére chupe. Por ehémplo, haʼe oagradese umi ermáno oĩvape Filípospe oguerahaka haguére chupe umi mbaʼe  oikotevẽva (Filip. 4:16). Avei Pablo oagradese vaʼekue umi mbaʼe Timoteo ojapo vaʼekue hesehápe (Filip. 2:19-22). Ha oagradese vaʼekue avei Ñandejárape ou haguére umi ermáno omokyreʼỹ chupe ojeguerahárõ guare chupe préso Rómape (Hech. 28:15). Pablo ningo ikyreʼỹeterei ha oviaha vaʼekue miles de kilómetro opredika ha omombarete hag̃ua umi kongregasiónpe. Péro haʼe iñumílde ha oasepta pe ajúda omeʼẽva chupe umi ermáno ha ermanakuéra.

13. ¿Mbaʼéichapa umi ijedáva ikatu oagradese oĩ haguére kongregasiónpe umi imitãva?

¹³ Peẽ ermanokuéra ijedáva ikatu hína pehechauka heta hendáicha peagradeseha oĩ haguére kongregasiónpe umi imitãva. Por ehémplo, ikatu oime oĩ ojeofreséva pendegueraha hag̃ua Salónpe térã ótro lugárpe, ombaʼejogua hag̃ua peẽme, térã ojapo hag̃ua oimeraẽ mbaʼe peikotevẽva. Péicha jave peagradesékena ha peasepta pe ajúda oñemeʼẽséva peẽme. Penemanduʼákena upéicha Jehová ohechaukaha hína peẽme penderayhuha, ha ikatu voi upéi oiko pendehegui oñoamigoite. Siémprekena peñehaʼã avei peipytyvõ umi pene amígo imitãvape oñemoag̃uive hag̃ua Jehováre, ha peje chupekuéra mbaʼeichaitépa pevyʼa pehechávo umi imitãva ojapoha hetave mbaʼe kongregasiónpe. Pehasákena tiémpo hendivekuéra ha pekasea chupekuéra umi mbaʼe pehasa vaʼekue pende rekovépe. Pejapóvo upéicha ‘pehechaukáta peagradeseha’ Jehovápe omoag̃ui haguére umi imitãvape kongregasiónpe (Col. 3:15; Juan 6:44; 1 Tes. 5:18).

14. ¿Mbaʼéichapa rréi David ohechauka vaʼekue ipojeraha?

¹⁴ Rréi David ehémplo ñanemboʼe avei peteĩ mbaʼe iñimportantetereíva: Umi ijedáva ipojera vaʼerã. David ningo okontrivui vaʼekue hetaiterei pláta ha rrikésa imbaʼéva voi oñemopuʼã hag̃ua pe témplo (1 Crón. 22:11-16; 29:3, 4). David ojapo vaʼekue upéicha oikuaáramo jepe oñembotuichataha itaʼýra Salomónpe upe projéktore. Ha ñande, oiméramo ñandeedáma ha ndaikatuvéima ñambaʼapo umi konstruksión ojapóvape Jehová organisasión, lomímonte ikatu jasegi jaapoja koʼã projékto ñameʼẽvo ñane kontrivusión asegún la ñane situasión. Ha avei ikatu ñakomparti umi imitãvandi umi mbaʼe ñaaprende vaʼekue ñande rekove pukukuére.

15. ¿Mbaʼe rregálo iporãitévapa apóstol Pablo okomparti vaʼekue Timotéondi?

¹⁵ Ñapensami avei mbaʼeichaitépa apóstol Pablo ipojera vaʼekue. Haʼe ningo oinvita vaʼekue Timotéope, peteĩ kuimbaʼe imitãva, oho hag̃ua hendive umi viáhe ojapóvape opredika hag̃ua. Pablo noñemohakateʼỹi vaʼekue umi mbaʼe oikuaávare, síno ohechauka Timotéope mbaʼéichapa haʼe opredika ha oporomboʼe (Hech. 16:1-3). Pe entrenamiénto Pablo omeʼẽ vaʼekue Timotéope oipytyvõ chupe ivale hag̃ua opredika ha omboʼe hag̃ua umi notísia porã (1 Cor. 4:17). Upéi Timoteo oipuru avei umi mbaʼe Pablo omboʼe vaʼekue chupe ontrena hag̃ua ótrope opredika ha oporomboʼe hag̃ua.

16. ¿Mbaʼérepa Shigeo ontrena vaʼekue umi ótro ermánope?

¹⁶ Koʼág̃arupi umi ijedáva nopensái ndaideprovechomoʼãveimaha kongregasiónpe ontrenáramo umi imitãvévape. Por ehémplo Shigeo, pe ermáno ajeʼi ñañeʼẽ hague, heta áñore ontrena vaʼekue umi imitãvévape oĩva pe komite de sukursálpe. Haʼe ojapo upéicha pe Rréino rehehápe ha oapoja hag̃ua pe traváho ojejapóva pe país haʼe oservihápe. Upéicha rupi haʼe ndaikatuvéirõ guare oservi de koordinadór pe komite de sukursálpe, peteĩ ermáno oñentrena porãma vaʼekue ikatu kuri opyta hekovia. Shigeo ningo oĩma mas de 45 áño pe komite de sukursálpe, ha koʼag̃aite peve osegi oipuru umi mbaʼe oaprende vaʼekue oipytyvõ hag̃ua umi ermáno  imitãvévape. ¡Ajépa tuichaite vendisión jareko Jehová puévlope koʼãichagua ermáno!

17. Heʼiháicha Lucas 6:38, ¿mbaʼépa umi ijedáva ikatu ojapo umi imitãva rehehápe?

¹⁷ Peẽ ermáno ha ermanakuéra ijedáva, peẽ ningo pende rekove pukukuére pehechaukáma javyʼaitereiha jajeroviáramo Jehováre, ha jaservi chupe fiélmente. Pene ehémplo rupive pehechauka ovaleha la péna ñaaprende umi konsého oĩva la Bíbliape, ha ñamoĩ en práktika. Peẽ ningo peikuaa porã mbaʼéichapa yma ojejapo vaʼekue heta mbaʼe Jehová organisasiónpe. Péro pehechakuaa avei iñimportanteha jajadapta umi kámbiore. Ha peẽ ijedáva pejevautisa ramóva, peẽ peipytyvõkuaa avei ótrope heta hendáicha. Por ehémplo, ikatu pemombeʼu chupekuéra mbaʼeichaitépa pevyʼa peikuaa haguére Jehovápe pendeedámaramo jepe. Umi imitãva ningo ovyʼaitereíta peẽ pekaseáramo chupekuéra umi mbaʼe pehasa ha peaprende vaʼekue. Jehová katuete penevendesíta tuichaháicha peẽ ‘siémpre pendepojeráramo’ ha pekomparti umi mbaʼe peaprende vaʼekue pentrena hag̃ua ótrope (elee Lucas 6:38).

18. ¿Mbaʼéichapa umi ijedáva ha umi imitãva ikatu oñopytyvõ?

¹⁸ Umi ijedáva ha umi imitãva oñemoag̃ui jave ojuehe tuichaiterei ikatu oñopytyvõ (Rom. 1:12). Káda uno oreko peteĩ mbaʼe ivaliósova pe ótro ndorekóiva. Umi ijedáva ningo iñarandu ha oreko heta experiénsia ohasáma rupi heta mbaʼe hekovépe. Ha umi imitãva katu imbarete ha ikyreʼỹ. Upévare umi ijedáva ha imitãva ombaʼapóramo oñondive oñoamigoitéicha omombaʼeguasúta Jehovápe, ñande Ru yvagapegua ñanderayhuetéva, ha haʼéta hikuái peteĩ vendisión enterovépe g̃uarã kongregasiónpe.