1. Ano ang puede naton himuon kon nagaedad na kita?

KON nagaedad na kita, mahimo mabalaka kita kay diutay na lang ang aton mahimo para kay Jehova kon ikumparar sang bataon pa kita. Bisan pa maluya na kita subong, puede naton magamit ang aton kaalam kag eksperiensia para mapalig-on ang mga pamatan-on nga batunon ang mga responsibilidad sa organisasyon ni Jehova kag suportahan ini sing bug-os. Nagsiling ang isa ka madugay na nga gulang: “Bangod tigulang na ako, limitado na lang ang mahimo ko subong. Gani nagapasalamat gid ako nga may pamatan-on nga mga brother nga kalipikado hatagan sang mga responsibilidad.”

2. Ano ang binagbinagon naton sa sini nga artikulo?

² Ginbinagbinag sa nagligad nga artikulo nga makabenepisyo gid ang mga pamatan-on kon mangin suod sila sa mga tigulang. Binagbinagon sa sini nga artikulo kon ngaa importante nga ipakita sang mga tigulang nga mapainubuson sila, maugdang, pirme nagapasalamat, kag maalwan para mabuligan nila ang mga pamatan-on. Kon ipakita nila ini nga mga kinaiya, makabenepisyo gid ang bilog nga kongregasyon.

3. Suno sa Filipos 2:3, 4, ano ang ginahimo sang isa ka mapainubuson nga utod, kag ano ang kaayuhan sini sa iya?

³ Dapat mangin mapainubuson ang mga tigulang para mabuligan nila ang mga pamatan-on. Kon mapainubuson ang isa ka tawo, ginakabig niya ang iban nga labaw sila sangsa iya. (Basaha ang Filipos 2:3, 4.) Nahangpan sang mapainubuson nga mga tigulang nga puede himuon ang isa ka asaynment sa madamo nga paagi nga wala sing malapas nga prinsipio sa Biblia, kag epektibo ini nga mga paagi. Gani wala nila ginapaabot nga ilugon  gid sang iban ang ila paagi. (Man. 7:10) Madamo sila sing natun-an nga makabulig sa mga pamatan-on. Pero nahangpan man nila nga “ang danyag sini nga kalibutan nagabag-o,” gani dapat handa man sila mag-adjust sa mga pagbag-o.—1 Cor. 7:31.

4. Paano ginailog sang mga manugtatap sang sirkito ang mga Levinhon?

⁴ Nahangpan sang mapainubuson nga mga tigulang nga indi na nila mahimo ang masarangan nila himuon sang una. Halimbawa, binagbinaga ang aton mga manugtatap sang sirkito. Kon mag-70 anyos na sila, ginahatagan sila sang bag-o nga asaynment. Posible nga mabudlay ini nga pagbag-o sa ila. Nalipay gid sila nga mag-alagad sa ila mga kauturan. Nanamian gid sila sa pag-alagad sa sirkito, kag gusto gid nila kuntani nga magpadayon sa sini nga asaynment. Pero nahangpan nila nga mas maayo kon bataon nga mga brother ang maghimo sini nga asaynment. Ginailog nila ang mga Levinhon sa Israel sang una nga ginapauntat na sa pag-alagad sa tabernakulo kon mag-50 anyos na sila. Malipayon gihapon ining tigulang na nga mga Levinhon bisan ano man nga asaynment ang ihatag sa ila. Ginahimo nila ang ila bug-os nga masarangan sa mga puede pa nila himuon, kag ginabuligan nila ang bataon nga mga Levinhon. (Num. 8:25, 26) Subong, kon mag-70 anyos na ang isa ka manugtatap sang sirkito, wala na sia nagaduaw sa madamo nga kongregasyon. Ginaasayn sia sa isa na lang ka kongregasyon, kag daku gihapon ang mahatag niya nga bulig kag pagpalig-on.

5. Ano ang matun-an mo sa halimbawa ni Dan kag ni Katie?

 ⁵ Binagbinaga ang halimbawa ni Dan. Nag-alagad sia bilang manugtatap sang sirkito sa sulod sang 23 ka tuig. Sang mag-70 anyos si Dan, gin-asayn sila ni Katie nga iya asawa bilang mga espesyal payunir. Kamusta sila sa ila bag-o nga asaynment? Nagsiling si Dan nga madamo gid sia sing ginahimo subong. Ginaatipan niya ang iya mga responsibilidad sa kongregasyon, ginabuligan niya ang mga brother nga mangin kalipikado nga mga ministeryal nga alagad, kag ginahanas niya ang iban sa pagbantala sa siudad kag sa mga prisuhan. Mga kauturan namon nga tigulang na, madamo gid kamo sing mabulig sa iban. Makabulig pa gani kamo bisan indi ninyo masarangan magpayunir. Paano? Panikasugi ninyo nga mag-adjust sa inyo bag-o nga kahimtangan, maghunahuna sang mga puede pa ninyo himuon, kag magpokus lang sa inyo masarangan himuon.

6. Ngaa dapat kita mangin maugdang? Maghatag sing ilustrasyon.

⁶ Ginabaton sang maugdang nga tawo ang iya mga limitasyon. (Hulu. 11:2) Ginahimo niya kon ano lang ang iya masarangan. Gani pirme sia malipayon kay may mahimo gihapon sia. Makumparar naton ang maugdang nga tawo sa isa ka drayber nga nagaagi sa taklaron nga dalan. Dapat sia magkambya sa low gear para makataklad ang iya salakyan. Posible nga magahinay ang dalagan sang salakyan, pero ang importante sigesige ang pagtaklad sini. Gani kabalo man ang maugdang nga tawo nga maabot ang tion nga dapat man sia maghimo sang mga pagbag-o kag maghinayhinay. Kon himuon niya ini, padayon sia nga makaalagad kay Jehova kag makabulig sa iban.—Fil. 4:5.

7. Paano ginpakita ni Barzilai nga maugdang sia?

⁷ Binagbinaga ang halimbawa ni Barzilai. Sang 80 anyos na sia, ginpangabay sia ni Hari David nga mag-upod sa iya kag mangin isa sa iya mga manuglaygay. Maugdang si Barzilai, gani nangindi sia. Kabalo si Barzilai nga limitado na lang ang iya mahimo bangod tigulang na sia, gani ginrekomendar niya ang mas bataon nga si Kimham nga ibulos sa iya. (2 Sam. 19:35-37) Pareho kay Barzilai, nalipay ang mga tigulang nga hatagan sang kahigayunan ang bataon nga mga brother sa pag-alagad.

8. Paano ginpakita ni Hari David nga maugdang sia sang gusto gid niya nga maghimo sang templo?

⁸ Maugdang man si Hari David. Gusto gid niya nga maghimo sing templo para kay Jehova. Pero sang ginsilingan sia ni Jehova nga ihatag ini nga pribilehiyo sa bata pa nga si Solomon, ginbaton ni David ang desisyon ni Jehova kag ginhimo niya ang iya bug-os nga masarangan para suportahan ini nga proyekto. (1 Cron. 17:4; 22:5) Wala ginhunahuna ni David nga mas maayo kon sia ang maghimo sang templo bangod “lamharon pa kag wala sing eksperiensia” si Solomon. (1 Cron. 29:1) Kabalo si David nga matapos ang paghimo sang templo bangod pakamaayuhon ini ni Jehova, kag wala ini nagadepende sa edad ukon sa eksperiensia sang mga nagadumala sini. Pareho kay David, bisan pa magbag-o ang mga asaynment sang mga tigulang subong, padayon sila nga nagapanikasog sa pag-alagad kay Jehova. Kag kabalo sila nga pakamaayuhon ni Jehova ang mga bataon nga nagbulos sa ila para himuon ang mga asaynment nga ginahimo nila sang una.

9. Paano ginpakita sang isa ka miembro sang Branch Committee nga maugdang sia?

⁹ Ginpakita sang isa ka brother nga si Shigeo nga maugdang sia. Sang 1976, sang 30 anyos sia, nag-alagad sia bilang miembro sang Branch Committee. Sang 2004, nangin coordinator sia sang Branch Committee. Sang ulihi, narealisar niya nga nagaluya na ang iya lawas kag mas madugay na niya matapos ang iya mga ginahimo.  Ginpangamuyo niya ang iya sitwasyon kag ginhunahuna niya ang benepisyo kon bataon nga brother ang mangin coordinator. Subong, indi na coordinator si Shigeo, pero padayon sia nga nagabulig sa kaupod niya nga mga miembro sang Branch Committee. Ano ang matun-an naton sa halimbawa ni Barzilai, ni Hari David, kag ni Shigeo? Kabalo ang mapainubuson kag maugdang nga tawo nga madamo pa sang dapat matun-an kag pauswagon ang mga bataon, pero wala sia nagapokus sa sini. Sa baylo, nagapokus sia sa ila ikasarang kag kusog. Wala niya ginahunahuna nga ginakompetensiahan sia sang mga bataon, kundi mga kaupod niya sila sa pag-alagad.—Hulu. 20:29.

10. Ano ang pagtan-aw sang mga tigulang sa mga pamatan-on sa kongregasyon?

¹⁰ Para sa mga tigulang, regalo halin kay Jehova ang mga pamatan-on, gani nagapasalamat gid sila sa ginahimo sini nga mga pamatan-on. Bangod maluya na ang mga tigulang, nagapasalamat sila nga may mga pamatan-on nga handa sa pag-alagad kag may ikasarang sa paghimo sang mga hilikuton sa kongregasyon.

11. Paano ginapakita sang Rut 4:13-16 nga pakamaayuhon gid ang mga tigulang kon batunon nila ang bulig sang mga bataon?

¹¹ Mabasa naton sa Biblia ang maayo gid nga halimbawa sang tigulang nga si Noemi. Ginbaton niya ang bulig sang isa nga mas bataon sangsa iya kag ginpasalamatan niya ini. Sang primero, ginsilingan ni Noemi ang iya umagad nga si Rut nga balo na nga magbalik sa iya pamilya. Pero indi gusto ni Rut nga biyaan si Noemi, gani gin-updan sia ni Rut pabalik sa Betlehem. Nalipay gid si Noemi nga batunon ang bulig ni Rut. (Rut 1:7, 8, 18) Ginpakamaayo gid sila nga duha. (Basaha ang Rut 4:13-16.) Ginailog sang mapainubuson nga mga tigulang ang halimbawa ni Noemi.

12. Paano ginpakita ni apostol Pablo nga pirme sia nagapasalamat?

 ¹² Pirme nagapasalamat si apostol Pablo sa bulig nga iya nabaton. Halimbawa, ginpasalamatan niya ang iya mga kauturan sa Filipos bangod nagpadala sila sang iya mga kinahanglanon. (Fil. 4:16) Ginpasalamatan man niya ang pagbulig ni Timoteo sa iya. (Fil. 2:19-22) Kag sang nabilanggo si Pablo kag gindala sia sa Roma, nagpasalamat sia sa Dios bangod sang mga kauturan nga nagkadto sa iya para palig-unon sia. (Binu. 28:15) Naglakbay si Pablo sing linibo ka kilometro para magbantala kag palig-unon ang mga kongregasyon, kag daw wala sia ginakapoy. Pero mapainubuson sia kay ginbaton niya ang bulig sang iya mga kauturan.

13. Paano mapakita sang mga tigulang nga nagapasalamat sila sa mga pamatan-on?

¹³ Mga kauturan namon nga tigulang na, madamo sing paagi para mapakita ninyo nga nagapasalamat kamo sa mga pamatan-on sa inyo kongregasyon. Kon gusto nila magbulig sa inyo, batuna ang ila bulig. Halimbawa, basi gusto nila kamo sugaton kag idul-ong sa inyo kaladtuan, ukon basi gusto nila kamo buligan sa pagbakal sang inyo mga kinahanglanon. Tandai nga ang pagbulig nila sa inyo isa ka paagi ni Jehova para ipakita nga palangga niya kamo. Posible pa gani nga mangin suod ninyo sila nga mga abyan. Mangita pirme sang kahigayunan nga mabuligan sila nga mangin suod pa gid kay Jehova, kag sugiri sila nga nalipay kamo nga makita nga nagapanikasog ang mga pamatan-on nga madugangan ang ila ginahimo para sa kongregasyon. Makig-upod man sa ila kag isugid sa ila ang inyo mga eksperiensia. Kon himuon ninyo ini, ‘mapakita ninyo nga mapinasalamaton kamo’ kay Jehova nga nagbuyok sa sini nga mga pamatan-on nga mangin bahin sang kongregasyon.—Col. 3:15; Juan 6:44; 1 Tes. 5:18.

14. Paano ginpakita ni Hari David nga maalwan sia?

¹⁴ Dapat man ipakita sang mga tigulang ang isa pa ka importante nga kinaiya nga ginpakita ni Hari David. Amo ini ang kaalwan. Madamo gid ang ginhatag niya halin sa iya mismo manggad para suportahan ang paghimo sang templo. (1 Cron. 22:11-16; 29:3, 4) Ginhimo niya ini bisan pa nga si Solomon ang kilalahon nga nagpahimo sang templo. Kon indi na naton masarangan magboluntaryo sa konstruksion sang mga pasilidad sang organisasyon ni Jehova, puede gihapon naton masuportahan ini nga mga proyekto paagi sa pag-amot suno sa aton masarangan. Kag makabulig kita sa mga pamatan-on kon isugid naton sa ila ang mga natun-an naton sa madamo nga tinuig.

15. Ano ang gintudlo ni apostol Pablo kay Timoteo?

¹⁵ Binagbinaga ang kaalwan nga ginpakita ni apostol Pablo. Gin-upod niya ang pamatan-on nga si Timoteo sa iya paglakbay bilang misyonero. Maalwan gid si Pablo kay gintudlo niya kay Timoteo ang iya mga paagi sang pagbantala kag pagtudlo. (Binu. 16:1-3) Ginhanas ni Pablo si Timoteo para mangin maayo sia sa pagbantala kag pagtudlo sang maayong balita. (1 Cor. 4:17) Dayon, gingamit ni Timoteo ang natun-an niya kay Pablo para hanason man ang iban.

16. Ngaa ginhanas ni Shigeo ang iban?

¹⁶ Wala nabalaka ang mga tigulang nga basi indi na sila makabulig sa kongregasyon sa ulihi kon hanason nila ang mga pamatan-on para buslan sila sa ila asaynment. Ang isa ka halimbawa amo si Shigeo nga ginsambit kaina. Madamo nga tinuig nga ginhanas niya ang bataon nga mga miembro sang Branch Committee. Ginhimo niya ini para makabulig sia sa hilikuton sang Ginharian sa ila pungsod. Gani sang kinahanglan na sia buslan bilang coordinator, may brother nga nahanas gid sing maayo para sa sini nga asaynment. Sobra 45 ka  tuig nga nag-alagad si Shigeo bilang miembro sang Branch Committee kag padayon niya nga ginatudlo ang iya mga natun-an sa bataon nga mga brother. Pagpakamaayo gid sa katawhan sang Dios ang mga brother nga pareho kay Shigeo.

17. Suno sa Lucas 6:38, ano ang puede ihatag sang mga tigulang sa iban?

¹⁷ Mga kauturan namon nga tigulang na, pamatuod kamo nga wala na sing mas maayo pa nga himuon sangsa magtuo kay Jehova kag alagaron sia sing matutom. Ginpakita ninyo paagi sa inyo halimbawa nga maayo gid kon tun-an naton kag sundon ang mga prinsipio sa Biblia. Kabalo kamo kon paano ginahimo ang aton mga hilikuton sang una, pero nahangpan man ninyo nga dapat kamo mag-adjust sa mga pagbag-o. Bisan pa ang iban sa inyo bag-o lang nabawtismuhan, madamo kamo gihapon sing mabulig sa iban. Puede ninyo masugid sa ila ang inyo nabatyagan nga kalipay kay nakilala ninyo si Jehova bisan pa tigulang na kamo. Malipay ang mga pamatan-on nga mabatian ang inyo mga eksperiensia kag ang inyo mga natun-an. Kon ‘himuon ninyo nga kinabatasan ang paghatag sa iban’ sang inyo mga natun-an paagi sa paghanas sa ila, pakamaayuhon gid kamo ni Jehova.—Basaha ang Lucas 6:38.

18. Paano mapalig-on sang mga tigulang kag mga pamatan-on ang isa kag isa?

¹⁸ Pinalangga namon nga mga kauturan nga tigulang na, kon mangin suod kamo sa mga pamatan-on, mapalig-on ninyo ang isa kag isa. (Roma 1:12) May kinaiya ang tigulang nga wala sa pamatan-on, kag may kinaiya ang pamatan-on nga wala sa tigulang. Ang mga tigulang may kaalam kag eksperiensia bangod sang ila edad. Kag ang mga pamatan-on may kapagsik kag kusog. Kon magbuligay ang mga pamatan-on kag ang mga tigulang kag tinguhaan nila nga mangin abyan nila ang isa kag isa, madayaw nila ang aton mahigugmaon nga Amay sa langit kag makabenepisyo gid ang bilog nga kongregasyon.