1. Ita buruka ita lao neganai, dahaka ita karaia be namo?

ITA BURUKA ita lao neganai, reana do ita laloa Iehova ena orea lalonai gaukara momo do ita karaia diba lasi, guna bamona. Reana ita goada lasi, to bema iseda aonega bona diba gaudia be matamata taudia dekenai ita hadibaia, unai ese idia do ia durua Iehova ena orea lalonai maduna idauidau idia huaia totona. Lagani daudau elda gaukara ia karaia tadikaka ta ia gwau: “Lau mamia lau buruka dainai gaukara momo lau karaia diba lasi, to lau moale badina tadikaka matamata be idia hegeregere gaukara idia karaia totona.”

2. Inai atikol ai dahaka do ita herevalaia?

² Atikol 35 ai, matamata taudia be buruka taudia idia bamoa karana amo idia davaria namo ita herevalaia. Inai atikol ai kara namodia haida do ita herevalaia, hegeregere manau, goada ena hetoana, tanikiu karana hahedinaraia, bona hariharibada karana. Unai ese buruka taudia do ia durua matamata taudia ida idia gaukara hebou totona, bona kongrigeisen ai namo do ia vara.

3. Filipi 2:3, 4 hegeregerena, manau karana ena anina be dahaka, bona edena dala ai Keristani tauna ia durua diba?

³ Buruka taudia idia manau be namo bema idia ura matamata taudia idia durua. Manau tauna ena lalohadai be ma haida ese ia idia hereaia. (Filipi 2:3, 4 duahia.) Idia manau buruka taudia do idia laloparara, Baibel ena hakaua herevadia hegeregerena, gaukara ta be dala idauidau ai idia karaia diba. Unai dainai, idia laloa lasi ma haida ese edia gaukara karaia dalana do idia badinaia. (Had. 7:10) Momokani, idia ese matamata taudia dekenai gau momo idia hadibaia diba, to idia laloparara “inai tanobada ena toana be ia idau ia lao noho” dainai, idia ese gaukara karaia dala  matamatadia idia dibaia be namo.​—1 Kor. 7:31.

4. Edena dala ai sekit naria taudia be Levi taudia idia tohotohoa?

⁴ Idia manau buruka taudia idia laloparara idia buruka dainai, guna idia karaia gaukaradia do idia karaia diba lasi. Hegeregere, sekit gaukara idia karaia taudia mani ita laloa. Edia mauri lagani be 70 ia abia neganai, orea ese idia noidia asainmen ma ta idia karaia totona. To, unai be auka, badina edia tadikaka taihu idia durua gaukarana idia laloa bada. Unai gaukara idia ura henia bada, bona idia ura do idia karaia noho. To, idia laloparara matamata taudia ese unai gaukara idia karaia be namo. Idia ese Levi taudia edia kara idia tohotohoa, edia mauri lagani be 50 ia abia neganai, dubu helaga dekenai edia hesiai gaukara idia hadokoa. Idia buruka idia lao Levi taudia be gaukara idauna idia karaia, to idia moale noho. Bona idia karaia diba gaukarana idia karaia goadagoada, bona matamata taudia idia durua. (Num. 8:25, 26) Hari, sekit taudia be mauri lagani 70 ia abia neganai, kongrigeisen ta ta vadivadi henia gaukarana idia hadokoa, to edia kongrigeisen idia durua bona hagoadaia noho.

5. Dan bona Katie edia haheitalai amo dahaka oi dibaia?

⁵ Mani Dan ena haheitalai ita laloa, ia be lagani 23 lalonai sekit gaukara ia karaia. Dan be ena mauri lagani 70 ia abia  neganai, ia bona ena adavana, Katie, be spesel painia gaukara ena asainmen idia abia. Edia asainmen be edena bamona idia laloa? Dan ia gwau hari ia bisi momokani! Ia ese ena kongrigeisen ai maduna idauidau ia naria, tadikaka ia durua hesiai tauna ena maduna idia abia totona, bona ma haida dekenai treinini ia henia troli haroro bona dibura ruma ai idia haroro totona. Buruka taudia e, ena be umui be ful-taim hesiai gaukara umui karaia eiava lasi, to gau momo umui karaia diba ma haida umui durua totona. Edena dala ai? Emu noho dala matamata oi moalelaia, tahua gaudia matamata oi atoa, bona oi karaia diba gaudia sibona oi laloa.

6. Dahaka dainai ta be ena goada ena hetoana ia lalopararalaia be namo? Haheitalai gwauraia.

⁶ Ta be ena goada ena hetoana ia lalopararalaia dainai, ia karaia diba gaudia sibona ia laloa. Unai amo, do ia moale noho bona ia gaukara goada. Unai bamona tauna be ororo dekenai motuka ia taria daekau tauna ida ita hahegeregerea diba. Ororo ia heau daekau totona motuka taria tauna be gia ia senisia bona ia abia diho be namo. Momokani, motuka be metairametaira ia heau, to do ia daekau noho. Unai hegeregerena, bema ta ia mamia ena goada ia ore ia lao neganai, namona be senisi ia karaia bona gaukara haida sibona do ia karaia. Unai amo Iehova do ia hesiai henia bona ma haida ia durua noho.​—Fili. 4:5.

7. Edena dala ai Barasilai be ena goada ena hetoana ia lalopararalaia?

⁷ Mani Barasilai ena haheitalai ita laloa. Iena mauri lagani be 80 neganai, King Davida ese ia boiria ena ruma ai do ia noho bona do ia gaukara. To, Barasilai ese king ena hereva ia abia dae lasi, badina ia mamia ena goada be hegeregere lasi. Bona ia gwau tau matamata, Kimuhamu, ese ena gabu ia abia be namo. (2 Sam. 19:35-37) Barasilai hegeregerena, tadikaka burukadia be idia moale tadikaka matamatadia ese gaukara idia karaia totona.

8. Edena dala ai King Davida ese ena goada ena hetoana ia lalopararalaia?

⁸ King Davida danu be ena goada ena hetoana ia lalopararalaia. Ia ura bada Iehova ena ruma ia haginia. To, Iehova ese ia hamaoroa unai gaukara be matamata tauna Solomona dekenai do ia henia neganai, Davida be unai ia abia dae bona mai kudouna ibounai ida dubu helaga haginia totona kohu momo ia hegaegaelaia. (1 Siv. 17:4; 22:5) Davida ia laloa lasi ia be mai ena diba dainai dubu helaga ia haginia be namo, bona Solomona be “mero matamata bona gau momo ia do diba lasi.” (1 Siv. 29:1) Davida ia diba dubu helaga haginia gaukarana be Iehova ese do ia hanamoa, bona ta ena mauri lagani eiava ena diba be gau badana lasi. Davida hegeregerena, hari buruka taudia momo be Iehova idia hesiai henia noho, ena be edia asainmen ia idau. Bona idia diba guna idia karaia gaukaradia be matamata taudia ese idia karaia namonamo diba, badina Iehova ese idia do ia hanamoa.

9. Edena dala ai Brens Komiti tadikaka ta be ena goada ena hetoana ia lalopararalaia?

⁹ Hari inai negai, tadikaka ta ladana Shigeo, be ena goada ena hetoana ia lalopararalaia. Lagani 1976 ai, ena mauri lagani be 30 neganai Brens Komiti gaukara ia karaia bona lagani 2004 ai, Brens Komiti ena kodineita ai ia lao. Gabeai, ia laloparara ena goada be hegeregere lasi unai maduna  ia huaia namonamo totona. Unai ia gurigurilaia bona ia laloa matamata tadikaka ta ese unai gaukara ia karaia be namo. Ena be hari, kodineita gaukara ia karaia lasi, to Brens Komiti gaukara ia durua noho. Barasilai, King Davida, bona Shigeo edia haheitalai amo ita itaia, idia be manau bona sibona edia goada ena hetoana idia lalopararalaia. Unai bamona taudia be idia laloa lasi matamata taudia be gau momo idia diba lasi. To, idia ese matamata taudia edia goada idia laloa bada bona mai moale danu idia ida idia gaukara hebou.​—Aon. 20:29.

10. Kongrigeisen lalonai buruka taudia ese matamata taudia be edena bamona idia laloa?

¹⁰ Buruka taudia idia abia dae matamata taudia be Iehova ena harihari gaudia, bona gaukara namona idia karaia dainai idia moale. Bona ena be buruka taudia edia goada ia ore ia lao, to idia moale badina matamata taudia be mai edia goada kongrigeisen lalonai gaukara idia karaia totona.

11. Ruta 4:13-16 hegeregerena, buruka taudia ese matamata taudia edia heduru idia abia dae neganai, dahaka do ia vara?

¹¹ Baibel ai Naomi be haheitalai namona, badina ia ese hahine matamata ta ena heduru ia abia dae. Matamanai, Naomi ese ena ravana hahinena Ruta ia hamaoroa ena famili dekenai do ia giroa lou totona. To, Ruta ia ura Naomi ida do ia lao, unai dainai Naomi be mai moale ida ena heduru ia abia dae. (Ruta 1:7, 8, 18) Oibe, unai abia hidi dainai hahenamo idia davaria! (Ruta 4:13-16 duahia.) Momokani, manau karana ese buruka taudia do ia durua Naomi ena haheitalai idia tohotohoa totona.

12. Edena dala ai aposetolo Paulo be tanikiu karana ia hahedinaraia?

 ¹² Aposetolo Paulo ia moale badina tadikaka ese idia durua. Hegeregere, ia ese Filipi tadikaka ia tanikiu henia, badina ia dekenai harihari gaudia idia siaia. (Fili. 4:16) Danu Timoteo ese ia durua dainai, ia totona hanamoa hereva ia gwauraia. (Fili. 2:19-22) Bona Paulo ese Dirava ia hanamoa, badina dibura tauna bamona Roma dekenai idia abia lao neganai, tadikaka taihu ese ia idia hagoadaia. (Kara 28:15) Paulo be mai ena goada, badina haroro gaukara bona kongrigeisen hagoadaia totona gabu daudau ia lao. To, ia manau bona tadikaka taihu edia heduru ia abia dae.

13. Edena dala ai buruka taudia ese matamata taudia dekenai tanikiu karana idia hahedinaraia diba?

¹³ Buruka taudia e, kongrigeisen lalonai dala idauidau ai matamata taudia dekenai tanikiu karana umui hahedinaraia diba. Bema idia ura umui idia durua, hegeregere edia motuka amo umui idia abia, sitoa dekenai emui ura gaudia idia hoia, eiava umui totona gau ma haida idia karaia, namona be mai moale ida edia heduru umui abia dae. Namona be umui laloatao, unai be Iehova ena lalokau karana. Reana umui idia durua tadikaka taihu be emui tura namodia ai do idia lao. Danu, hanaihanai idia umui durua Iehova kahirakahira idia noho totona, bona idia umui hamaoroa kongrigeisen ai heduru bada idia henia dainai, umui moale bada. Bona nega umui atoa idia dekenai emui ekspiriens idauidau umui gwauraia totona. Unai bamona umui karaia neganai, umui ese Iehova dekenai ‘tanikiu karana umui hahedinaraia,’ badina Ia ese kongrigeisen dekenai matamata taudia ia veria mai.​—Kol. 3:15; Ioa. 6:44; 1 Tes. 5:18.

14. Edena dala ai King Davida ese hariharibada karana ia hahedinaraia?

¹⁴ King Davida ena haheitalai amo, buruka taudia be kara namona ma ta idia dibaia, unai be hariharibada karana. Ia ese kohu bona moni bada ia henia, dubu helaga haginia gaukarana durua totona. (1 Siv. 22:11-16; 29:3, 4) Unai ia karaia, ena be taunimanima ese dubu helaga haginia gaukarana totona ena natuna Solomona do idia hanamoa. Ena be iseda tauanina ena goada be hegeregere lasi konstraksen gaukara ita durua totona, to iseda noho dalana hegeregerena kontribusen ita henia noho diba. Bona lagani momo lalonai ita abia diba be matamata taudia dekenai ita herevalaia, unai ese idia do ia durua.

15. Edena dala ai aposetolo Paulo ese hariharibada karana ia hahedinaraia?

¹⁵ Mani aposetolo Paulo ese ia hahedinaraia hariharibada karana ita laloa. Ia ese Timoteo ia noia misinari gaukara ai do ia bamoa totona. Bona Paulo ese unai matamata tauna dekenai haroro bona hadibaia gaukara daladia idauidau ia hadibaia. (Kara 16:1-3) Unai dainai, Timoteo be sivarai namona ia gwauraia hedinarai namonamo. (1 Kor. 4:17) Bena Timoteo be Paulo ese ia hadibaia gaudia ia gaukaralaia, ma haida ia durua edia haroro bona hadibaia gaukara idia karaia namonamo totona.

16. Dahaka dainai Shigeo be ma haida dekenai treinini ia henia?

¹⁶ Buruka taudia ese kongrigeisen lalonai matamata tadikaka dekenai treinini idia henia neganai, idia laloa lasi gabeai idia be gaukara momo do idia karaia lasi. Hegeregere, matamanai ita herevalaia tadikaka Shigeo, be lagani momo lalonai  Brens Komiti tadikaka matamatadia dekenai treinini ia henia. Unai bamona ia karaia badina ia ura hesiai gaukara ia karaia tanona ai, Basileia ena gaukara ia durua noho. Bena kodineita maduna ia rakatania neganai, ia treinia namonamo tadikaka ta ese unai gaukara ia karaia. Shigeo be lagani 45 lalonai Brens Komiti gaukarana ia karaia, bona ia dibaia gaudia be tadikaka matamatadia dekenai ia hadibaia noho. Shigeo bamona tadikaka burukadia be Dirava ena taunimanima idia durua bada!

17. Luka 6:38 hegeregerena, buruka taudia ese dahaka idia karaia be namo?

¹⁷ Buruka tadikaka bona taihu ese idia hamomokania Iehova hesiai henia karana be mauri hereadaena. Edia haheitalai ese ia hahedinaraia, namona be iseda mauri lalonai Baibel ena hakaua herevadia ita dibaia bona badinaia. Idia be guna gaukara karaia dalana idia diba, unai sibona lasi to idia vara senisi idauidau idia itaia danu. Harihari bapatiso idia abia buruka taudia danu be dala idauidau ai idia heduru diba, bona Iehova idia dibaia dainai idia abia moalena idia herevalaia diba. Bona matamata taudia do idia ura emui sivarai bona umui dibaia gaudia idia kamonai. ‘Henia karana umui manadalaia,’ anina be umui dibaia gaudia be ma haida dekenai umui hadibaia neganai, Iehova ese umui do ia hanamoa bada.​—Luka 6:38 duahia.

18. Edena dala ai buruka bona matamata taudia be ta ta idia durua diba?

¹⁸ Umui buruka taudia be matamata taudia umui tura henia neganai, ta ta do umui durua diba. (Roma 1:12) Oibe, buruka taudia be mai edia aonega bona diba, bona matamata taudia be mai edia goada. Matamata bona buruka taudia be tura namodia bamona idia gaukara hebou neganai, edia guba Tamana idia hanamoa bona kongrigeisen lalonai namo ia havaraia.