1. Lebuh kitai mansang tuai, nama juluk ati ke ulih ditetapka kitai empu?

LEBUH kitai mansang tuai, kitai engka ngasaika enda ulih ngereja mayuh pengawa ke Jehovah baka suba. Taja pan kitai nadai pengering baka ke suba, tang kitai ulih ngena penemu sereta pengelandik ke udah dipelajar kitai kena ngajar sida ke biak ngambika sida ulih dikena gerempung Jehovah sereta nerima mayuh agi tanggung pengawa. Seiku menyadi lelaki ke udah lama nyadi tuai gempuru madahka: “Lebuh aku ngasaika diri enda ulih ngereja mayuh pengawa ketegal majak tuai, aku beterima kasih laban bisi menyadi lelaki ke biak ti ulih ngereja pengawa nya.”

2. Nama deka dikerandauka kitai ba artikel tu?

² Ba artikel sebedau tu, kitai udah berandau baka ni bala menyadi ke biak bulih penguntung lebuh sida begulai enggau menyadi ke udah tuai. Ba artikel tu, kitai deka meda baka ni kualiti baka baruh ati, nemu utai ke ulih digaga diri, beterima kasih, sereta gerah jari ulih nulung menyadi ke tuai sama besaup enggau sida ke biak. Tu ulih meri penguntung ngagai semua menyadi ba eklisia.

3. Nitihka Pilipi 2:3, 4, nama reti baruh ati, lalu baka ni kualiti nya ulih nulung orang Kristian?

³ Bala menyadi ke udah tuai patut baruh ati enti deka nulung sida ke biak. Orang ke baruh ati ngumbai orang bukai pama agi ari iya. (Bacha Pilipi 2:3, 4.) Menyadi ke tuai ti baruh ati nemu, sesiti pengawa agi ulih dikereja ngena mayuh macham chara, lalu agi sejalai enggau prinsip Bup Kudus sereta ulih mujur. Nya alai, sida enda ngarapka bala menyadi ngereja utai nitihka chara sida suba. (P-jar. 7:10) Taja pan sida ke tuai tu mayuh peneleba ti ulih dikunsi ngagai sida ke biak, tang sida sedar “gaya dunya ti diatu benung berubah.” Ketegal nya, sida ke tuai patut nelebaka diri enggau chara ti baru.—1 Kor. 7:31.

4. Baka ni tuai ti ngabas nunjukka ulah ti sama baka orang Lewi?

⁴ Menyadi Kristian ke tuai ti baruh ati nemu, sida enda ulih ngereja mayuh pengawa maya umur udah tuai. Ambika chunto, tuai ti ngabas. Lebuh umur sida manggai 70 taun, sida deka diberi pengawa bukai. Tu engka tusah ba sida. Sida gaga ati nulung bala menyadi Kristian. Nya pengawa ti amat dikerinduka sida, lalu sida agi deka ngereja pengawa nya. Tang sida nemu, pengawa tu begunaka sida ke biak. Bala tuai ti ngabas nunjukka teladan ti manah baka ulah orang Lewi maya jeman orang Israel kelia. Lebuh umur orang Lewi manggai 50 taun, sida diasuh ngetu gawa ba rumah sembiang Jehovah. Taja pia, sida orang Lewi ke udah tuai tu  berasai gaga ati enda ngira nama pengawa ke diberi ngagai sida. Sida ransing ngereja pengawa ke ulih digaga sereta nulung sida ke biak. (P-pau. 8:25, 26) Kemayaharitu, taja pan bala tuai ti ngabas udah badu megai pengawa sida, tang sida ulih nulung sereta meransang bala menyadi ba eklisia alai sida ke diatu.

5. Nama ulih dipelajarka nuan ari chunto Dan enggau Katie?

⁵ Peratika chunto menyadi Kristian ke benama Dan. Iya udah gawa nyadi tuai ti ngabas pengelama 23 taun. Lebuh umur iya manggai 70 taun, iya enggau bini iya, Katie, diasuh nyadi pengerintis spesial. Baka ni seduai iya nelebaka diri enggau ubah ti baru tu? Dan madahka diatu iya kisuk agi ari suba. Iya bisi tanggung pengawa ba eklisia, nulung bala menyadi lelaki ngambika layak nyadi penulung gempuru, lalu ngelatih bala menyadi nginjil ba bandar sereta ba jil. Bala menyadi Kristian ke tuai, sekalika kita gawa penuh jam ke Jehovah tauka enda, kita ulih nulung bala menyadi Kristian. Baka ni? Gaga ati enggau pengawa ti baru, tetapka juluk ati ti baru, lalu beratika utai ke ulih digaga kita, ukai utai ke enda ulih digaga.

6. Nama kebuah nya manah nemu tatak diri? Padahka siti sempama.

⁶ Orang ke nemu tatak diri ngereja utai ke ulih iya, ukai utai ke enda ulih. (J-lam. 11:2) Asil iya, iya ulih mengkang gaga ati sereta bebendar gawa. Tu ulih disemaka baka seiku orang ke deka deriba niki bukit. Iya patut ngubah ngagai gear mit ngambika ulih niki bukit nya. Taja pan iya engka lubah, tang kerita iya tetap bejalai. Sama mega, orang ke nemu tatak diri sedar bisi maya sida patut “nukar ngagai gear mit,” reti nya ngaga ubah enggau belubah-lubah ngambika iya ulih terus nyembah Jehovah sereta nulung bala menyadi Kristian gawa ke Jehovah.—Plp. 4:5.

7. Baka ni Barsilai nunjukka iya nemu tatak diri?

⁷ Peratika teladan Barsilai. Iya beumur 80 taun lebuh Raja David mai iya gawa ba Istana. Barsilai nemu utai ke ulih digaga diri. Nya alai iya nulak pengawa ke diberi Raja David. Nya kebuah Barsilai ngasuh Raja David meri pengawa ngagai Kimham. (2 Sam. 19:35-37) Baka Barsilai, menyadi lelaki ke tuai gaga ati meri peluang ngagai menyadi lelaki ke biak ngereja pengawa.

8. Baka ni Raja David ngayanka diri nemu tatak diri lebuh iya deka nirika Rumah Sembiang Jehovah?

⁸ Raja David mega ngayanka teladan ti manah pasal nemu tatak diri. Iya amat keran deka nirika Rumah Sembiang ke Jehovah. Tang lebuh Jehovah madahka David pengawa nya deka diberi ngagai anak iya ke agi biak, iya nya Solomon, iya nyukung pemutus Jehovah lalu nyukung pengawa nya enggau pengabis ati. (1 Ban. 17:4; 22:5) David enda ngasaika diri landik agi ngereja pengawa nya ketegal Solomon “agi biak lalu kurang peneleba.” (1 Ban. 29:1) David nemu pengawa nya semina ulih mujur ketegal berekat Jehovah, ukai ketegal umur tauka peneleba ngiring pengawa nya. Baka David, menyadi lelaki ke tuai kemayaharitu terus bebendar gawa ba gerempung Jehovah, taja pan pengawa sida bisi ubah. Sida nemu Jehovah deka merekatka menyadi lelaki ke biak ti megai pengawa ke kala digaga sida.

9. Baka ni seiku ari Komiti Pampang Opis ngayanka iya nemu tatak diri?

⁹ Kemayaharitu mega bisi bala menyadi ke nunjukka teladan nemu tatak diri. Ambika chunto, Shigeo. Ba taun 1976, maya iya beumur 30 taun, iya dipilih nyadi seiku ari  Komiti Pampang Opis. Kena taun 2004, iya dipilih nyadi tuai ti ngatur Komiti Pampang Opis. Tang udah nya iya nemu diri enda kering baka suba, lalu begunaka mayuh awak endur nembuka pengawa iya. Nya alai, iya besampi ngambika nemu pasal pemanah ke diulih enti sema menyadi lelaki ke biak megai pengawa nya. Diatu, Shigeo ukai agi tuai ti ngatur Komiti Pampang Opis, tang iya agi seiku ari raban nya. Teladan Barsilai, Raja David, enggau Shigeo nunjukka orang ke baruh ati sereta nemu tatak diri deka beratika pengering sida ke biak, ukai pengurang peneleba sida. Menyadi lelaki ke tuai tu enda bepekit enggau sida ke biak, tang sama bekereja enggau sida.—J-lam. 20:29.

10. Nama asai ati menyadi ke tuai ngagai sida ke biak dalam eklisia?

¹⁰ Menyadi ke tuai ngumbai menyadi ke biak nya pemeri ari Jehovah. Lebuh pengering sida nyau majak kurang, menyadi ke tuai tentu beterima kasih ke menyadi ke biak, ke bisi pengering deka ngereja pengawa sereta gawa ke eklisia.

11. Baka ni Rut 4:13-16 nunjukka menyadi ke tuai tau bulih penguntung lebuh nerima tulung ari sida ke biak?

¹¹ Dalam Bup Kudus bisi teladan ti manah pasal orang tuai ke nerima tulung ari orang ke biak. Tu ulih dipeda ba Naomi. Pengudah anak lelaki Naomi mati, Naomi ngasuh menantu iya, Rut, pulai ngagai bansa iya empu. Taja pia, Rut enggai ninggalka Naomi lalu iya deka nitihka Naomi pulai ngagai Betlehem. Naomi amat gaga ati laban Rut bisi enggau iya, lalu iya pan nerima tulung ari Rut. (Rut 1:7, 8, 18) Naka meh pemesai berekat ke diterima seduai iya! (Bacha Rut 4:13-16.) Nya alai, pemaruh ati ulih meransang menyadi ke tuai nunda teladan Naomi.

12. Baka ni Rasul Paul ngayanka ulah beterima kasih?

 ¹² Rasul Paul amat beterima kasih ke tulung ti udah diterima iya. Ambika chunto, iya beterima kasih ngagai orang Kristian di Pilipi ketegal ngirumka tulung ke diguna iya. (Plp. 4:16) Iya mega beterima kasih ke tulung ari Timoti. (Plp. 2:19-22) Lalu Paul beterima kasih ngagai Petara laban ngena bala menyadi datai meransang iya lebuh iya dianjung ngagai rumah jil di Rome. (SKR. 28:15) Paul orang ti bagas gawa, nya alai iya sanggup bejalai beribu batu kena nginjil sereta ngeringka eklisia. Taja pia iya baruh ati sereta nerima tulung ari bala menyadi Kristian.

13. Baka ni menyadi ke tuai ulih nunjukka diri beterima kasih ngagai menyadi ke biak?

¹³ Bala menyadi Kristian ke tuai, nuan ulih nunjukka terima kasih ngagai bala menyadi ke biak dalam eklisia nuan. Enti sida deka nulung nuan bebelika barang, ngambi enggau nganjung nuan pulai ke rumah tauka nulung ba utai bukai, terima meh tulung nya. Kingatka, tulung ari sida nya siti chara Jehovah nunjukka pengerindu ngagai nuan. Nuan ulih ngembuan kaul ti rapat enggau sida ke biak ti udah nulung nuan. Pia mega, nuan ulih nulung iya majak semak enggau Jehovah, lalu nuan deka gaga ati meda sida ke biak ti keran ngereja mayuh agi pengawa ba eklisia. Nambahka nya, beri meh awak nuan begulai enggau sida sereta kunsika peneleba nuan ngagai sida. Lebuh nuan ngereja nya, nuan deka “seruran beterima kasih” ngagai Jehovah laban udah mai sida ke biak tu ngagai eklisia.—Kol. 3:15; Jhn. 6:44; 1 Tes. 5:18.

14. Baka ni Raja David nunjukka diri gerah jari?

¹⁴ Ari chunto Raja David, kitai ulih tetemuka kualiti ti beguna iya nya pengerah jari. Iya nyediaka mayuh duit sereta utai ti berega kena nyukung pengawa nirika Rumah Sembiang Jehovah. (1 Ban. 22:11-16; 29:3, 4) Iya sanggup ngereja nya taja pan orang bukai deka ngumbai Rumah Sembiang nya digaga Solomon. Lebuh kitai nadai agi pengering deka enggau pengawa nirika bengunan teokratik, kitai agi ulih nyukung pengawa nya lebuh kitai meri duit pemeri nitihka ulih kitai. Lalu kitai mega ulih nulung sida ke biak bulih penguntung ari peneleba kitai ke udah gawa betaun-taun.

15. Nama utai ke dikunsika Rasul Paul ngagai Timoti?

¹⁵ Peratika mega teladan Rasul Paul. Iya mai Timoti bejalaika pengawa nginjil, lalu bekunsika chara nginjil enggau ngajar ngagai Timoti. (SKR. 16:1-3) Latih ke diberi Paul nulung Timoti nyadi penginjil sereta pengajar ti landik lebuh madahka Berita Manah. (1 Kor. 4:17) Udah nya, Timoti mega ngelatih orang bukai ngena utai ke udah dipelajarka iya ari Paul.

16. Nama kebuah Shigeo ngelatih menyadi ke biak?

¹⁶ Baka Paul, kemayaharitu bala menyadi ke tuai mega ngelatih bala menyadi ke biak. Sida enda nangi nyerahka pengawa ke kala digaga sida ba eklisia ngagai bala menyadi ke biak. Ambika chunto, dalam beberapa taun, menyadi Shigeo ke disebut ba pun tadi udah meri latih ke diguna ngagai bala menyadi ke biak ti nyadi Komiti Pampang Opis. Latih ke diberi tu ngambika pengawa Perintah Petara ulih dipejalaika enggau manah ba menua nya. Asil iya, ba maya ti ngena, seiku menyadi lelaki ke udah dilatih ulih nganti iya nyadi tuai ti ngatur Komiti Pampang Opis. Shigeo udah nyadi seiku Komiti Pampang Opis pengelama 45 taun, lalu iya terus bekunsika peneleba nya enggau bala menyadi lelaki ke biak. Bala menyadi lelaki ke baka Shigeo endang tulung ti besai ke nembiak Petara!

17. Nitihka Luke 6:38, nama ulih dikunsika menyadi ke tuai ngagai menyadi ke bukai?

 ¹⁷ Bala menyadi ke tuai, kita udah nunjukka chara pengidup ti pemadu manah ari pengarap enggau penetap ati kita ngagai Jehovah. Ari teladan nuan, nuan nunjukka belajarka prinsip Bup Kudus lalu ngena nya ba pengidup ninting hari, deka meri penguntung. Ari peneleba nuan, nuan nemu chara ngereja sekeda pengawa suba, tang nuan mega nemu diri patut ngaga ubah nitihka gaya kemayaharitu. Bala menyadi Kristian ke udah tuai ti baru udah dibaptisa mega ulih nulung orang bukai dalam mayuh chara. Nuan ulih madahka pengaga ati nuan pengudah ngelala Jehovah. Sida ke biak tentu deka gaga ati ningaka peneleba nuan sereta belajar ari nuan. Enti nuan “meri” utai ke udah dipelajar nuan kena ngelatih orang bukai, Jehovah deka meri nuan mayuh berekat.—Bacha Luke 6:38.

18. Nama berekat ke deka diulih semua menyadi ke biak enggau menyadi ke tuai?

¹⁸ Lebuh menyadi ke tuai begulai rapat enggau menyadi ke biak, sida ulih terus nyukung pangan diri. (Rom. 1:12) Tiap iku kita bisi penau ti enda sama. Bala menyadi ke tuai bisi penemu-dalam sereta peneleba ke udah diulih sepemanjai pengidup sida lalu menyadi ke biak bisi pengering. Lebuh sida ke biak enggau sida ke tuai bekereja sama baka pangan ti rapat, sida ulih mai puji ngagai Jehovah sereta meri penguntung ngagai bala menyadi ba eklisia.