1. Ania ti nasayaat a kalat a mabalintayo nga aramiden bayat a tumataengantayo?

BAYAT a tumataengantayo, mabalin a maamaktayo a basbassiten ti maaramidantayo iti panagserbi ken Jehova no idilig idi kabambannuagantayo. Agpayso a nakapkapuytayon. Ngem mausartayo ti sirib ken kapadasantayo a tumulong kadagiti agtutubo a naan-anay nga agpausar iti organisasion ni Jehova ken umawat iti baro a responsabilidad. Imbaga ti maysa a nabayagen a panglakayen, “Idi nariknak a limitadon dagiti maaramidak gapu ta lakayakon, maragsakanak ta adda dagiti kualipikado nga agtutubo a lallaki a nawaya a mangawat iti trabaho.”

2. Ania ti usigentayo iti daytoy nga artikulo?

² Iti napalabas nga artikulo, napagsasaritaantayo no kasano a magunggonaan dagiti agtutubo no makigayyemda kadagiti nataengan. Iti daytoy nga artikulo, usigentayo no kasano a dagiti kualidad kas iti kinapakumbaba, kinaemma, kinamanagyaman, ken kinaparabur ket makatulong kadagiti nataengan a makipagtrabaho kadagiti agtutubo, a mangyeg iti bendision iti intero a kongregasion.

3. Sigun iti Filipos 2:3, 4, ania ti kinapakumbaba, ken kasano a makatulong dayta iti maysa a Kristiano?

³ Masapul a napakumbaba dagiti nataengan no kayatda a tulongan dagiti agtutubo. Ti napakumbaba a tao ibilangna a nangatngato ti sabsabali ngem iti bagina. (Basaen ti Filipos 2:3, 4.) Dagiti napakumbaba a nataengan bigbigenda a kaaduanna a saan la a maymaysa ti Nainkasuratan ken epektibo a pamay-an  a panangaramid iti maysa a banag. Isu a realistiko ti panangmatmatda iti pamay-an ti panangaramid kadagiti bambanag iti napalabas. (Ecl. 7:10) Adu a napateg a kapadasan ti mairanudda kadagiti ub-ubing a henerasion, ngem ammoda nga “agbaliwbaliw ti buya ti lubong” isu a masapul a makibagayda kadagiti baro a situasion.​—1 Cor. 7:31, ftn.

4. Kasano a dagiti manangaywan iti sirkito tultuladenda dagiti Levita?

⁴ Bigbigen dagiti napakumbaba a nataengan a bayat a tumataenganda, saanen a kas iti dati ti maar-aramidanda. Alaentayo a pagarigan dagiti manangaywan iti sirkitotayo. No 70 ti tawendan, maikkanda iti sabali nga asaynment. Mabalin a narigat dayta. Nakaragragsakda nga agserserbi kadagiti kakabsat. Ipatpategda unay dayta nga asaynment, ken kayatda la unay ti agtalinaed koma iti dayta. Ngem matarusanda a nasaysayaat a dagiti ub-ubing a kakabsat a lallaki ti mangaramid iti dayta a trabaho. No kasta, tultuladenda dagiti Levita iti nagkauna nga Israel, a no 50 ti tawendan, agretirodan iti trabahoda iti tabernakulo. Ti ragsak dagita a nataengan a Levita ket saan a nakadepende iti pribilehioda. Naan-anay a ginundawayanda dagiti pribilehio a silulukat kadakuada​—ti panangaramid iti amin a kabaelanda a tumulong kadagiti ub-ubing. (Num. 8:25, 26) Ita, dagiti dati a manangaywan iti sirkito, nupay saandan nga agserserbi iti adu a kongregasion, pampaneknekanda a pudno a bendisionda iti kongregasion a nakaitimpuyoganda.

5. Ania ti masursurom iti ulidan da Dan ken Katie?

 ⁵ Usigentayo ti ulidan ni Dan, a nagserbi kas manangaywan iti sirkito iti 23 a tawen. Idi 70 ti tawennan, nagbalinda nga special pioneer ken Katie a baketna. Kasanoda a nakibagay iti baro a situasionda? Imbaga ni Dan nga ad-adu ngem idi ti ar-aramidenna ita! As-asikasuenna dagiti responsabilidadna iti kongregasion, tumultulong kadagiti kakabsat a lallaki a makualipikar kas ministerial nga adipen, ken mangsansanay kadagiti makiraman iti metropolitan witnessing ken panangasaba iti pagbaludan. Dakayo a nataengan, addakayo man iti amin-tiempo a panagserbi wenno saan, adu ti maaramidanyo a tumulong iti sabsabali. Kasano? Makibagaykayo iti baro a situasionyo, mangaramidkayo kadagiti baro a kalat, ken agpokuskayo kadagiti maaramidanyo, saan a kadagiti diyo maaramidan.

6. Apay a nainsiriban ti panagbalin a naemma? Iyilustrar.

⁶ Bigbigen ti naemma a tao dagiti limitasionna. (Prov. 11:2) Gapu ta naemma, dina namnamaen ti ad-adu ngem iti kabaelanna nga aramiden. Kas resultana, agtultuloy a naragsak ken ad-adu ti maaramidanna. Mabalintayo nga ikompara ti naemma a tao iti drayber ti lugan nga agpasang-at. Masapul nga agsegunda wenno agprimera ti drayber tapno agtultuloy a makasang-at ti lugan. Wen, mabalin a nabumbuntog ti panagbiahe ngem agtultuloy nga umabante. Iti umasping a pamay-an, ammo ti naemma a tao no kaano nga “agsegunda wenno agprimera” tapno maitultuloyna ti aktibo ken nabunga a panagserbina ken Jehova.​—Fil. 4:5.

7. Kasano nga impakita ni Barzillai ti kinaemma?

⁷ Panunotem ti ulidan ni Barzillai, nga agtawen iti 80 idi inawis ni Ari David nga agbalin a maysa kadagiti mamalbalakadna. Sieemma a nagkedked ni Barzillai ta binigbigna a limitadon dagiti maaramidanna gapu iti edadna. Inrekomendana ti ub-ubing a lalaki a ni Kimham kas kasukatna. (2 Sam. 19:35-37) Kas ken Barzillai, maragragsakan dagiti nataengan a lallaki a mangipaay kadagiti ub-ubing a lallaki iti gundaway nga agserbi.

8. Kasano nga impakita ni Ari David ti kinaemma no maipapan iti panagibangon iti templo?

⁸ Nagsayaat met ti kinaemma nga inyulidan ni Ari David. Kayatna unay ti agibangon iti balay para ken Jehova. Ngem idi imbaga ni Jehova a dayta a pribilehio ket maited iti agtutubo a ni Solomon, inawat ni David ti desision ni Jehova ken impaayna ti amin-puso a suporta iti proyekto. (1 Cron. 17:4; 22:5) Saan a narikna ni David a nasaysayaat nga isu ti agibangon imbes a ni Solomon nga “ubing pay ken awanan iti kapadasan.” (1 Cron. 29:1) Ammo ni David a ti panagballigi ti proyekto a panagibangon ket nakadepende iti bendision ni Jehova, saan nga iti edad wenno kapadasan dagiti mangidadaulo iti dayta. Kas ken David, naregta latta dagiti nataengan uray nagbalbaliwen ti asaynmentda. Ken ammo dagiti nataengan a bendisionan ni Jehova dagiti agtutubo a mangar-aramid itan iti dati a trabahoda.

9. Kasano a ti maysa a miembro ti Branch Committee impakitana ti kinaemma?

⁹ Ti maysa nga ulidan ita iti kinaemma ket ti kabsat nga agnagan Shigeo. Agtawen iti 30 idi naapointaran kas miembro ti Branch Committee idi 1976. Idi 2004, nagbalin a koordineytor ti Branch Committee. Idi agangay, nariknana a kumapkapuyen ti salun-atna ken saanen a kas idi ti kinasiglatna nga agtrabaho. Inkararagna dayta ken pinampanunotna a naimbag no apay a nasaysayaat nga ub-ubing a kabsat ti agbalin a koordineytor. Nupay saanen a ni Shigeo ti koordineytor, agserserbi latta kas mannakikooperar a miembro ti  Branch Committee. Kas makitatayo iti inyulidan da Barzillai, Ari David, ken Shigeo, ti napakumbaba ken naemma a tao ket agpokus iti agdaman nga abilidad dagiti ub-ubing, saan a kadagiti sursuruendanto pay laeng. Ibilangna ida saan a kas kakompetensia, no di ket kas katrabahuan.​—Prov. 20:29.

10. Ania koma ti pangibilangan dagiti nataengan kadagiti agtutubo iti kongregasion?

¹⁰ Dagiti nataengan ibilangda a sagut ni Jehova dagiti agtutubo, banag a pagyamyamananda. Bayat a kumapkapuy dagiti nataengan, maragragsakanda ta situtulok ken kabaelan dagiti agtutubo ti agserbi iti kongregasion.

11. Kasano nga ipakita ti Ruth 4:13-16 a pagsayaatan dagiti nataengan no awatenda ti tulong ti maysa nga ub-ubing?

¹¹ Ti karakter iti Biblia a ni Noemi ket nagsayaat ken mapagwadan a nataengan a siyayaman a nangawat iti tulong ti maysa nga ub-ubing. Idi damo, pinaregta ni Noemi ti balo a manugangna a ni Ruth nga agsubli iti pamiliana. Ngem idi impapilit ni Ruth ti kumuyog ken Noemi nga agsubli iti Betlehem, inawatna ti tulong ni Ruth. (Ruth 1:7, 8, 18) Nagsayaatanda a dua dayta! (Basaen ti Ruth 4:13-16.) Dagiti nataengan a napakumbaba tultuladenda ti ulidan ni Noemi.

12. Kasano nga impakita ni apostol Pablo ti panagyamanna?

¹² Agyamyaman ni apostol Pablo kadagiti tulong a naawatna. Kas pagarigan, nagyaman kadagiti Kristiano idiay Filipos a nangipatulod kenkuana iti material a sagsagut. (Fil. 4:16) Inyebkasna ti panagyamanna iti tulong nga impaay kenkuana ni Timoteo. (Fil. 2:19-22) Ken nagyaman ni Pablo iti Dios gapu kadagiti napan nangparparegta kenkuana idi  nayakar idiay Roma kas balud. (Ara. 28:15) Nakaregregta ni Pablo nga uray la nagbiahe iti rinibu a kilometro tapno mangasaba ken pabilgenna dagiti kongregasion. Ngem sipapakumbaba nga inawatna ti tulong dagiti kapammatianna.

13. Kasano a maipakita dagiti nataengan ti panagyamanda kadagiti agtutubo?

¹³ Dakayo a nataengan, maipakitayo ti panagyamanyo kadagiti agtutubo iti kongregasionyo iti adu a pamay-an. No kayatdakayo nga ilugan, tulongandakayo nga ag-shopping, wenno dadduma pay, siyayaman nga akseptarenyo ti tulongda. Ibilangyo dagita kas ebidensia ti ayat ni Jehova kadakayo. Baka agbalin pay a nasinged a gayyemyo ti mangtultulong kadakayo. Kanayon a tulonganyo dagiti agtutubo a gagayyemyo nga agbalin a nasingsinged ken Jehova ken ibagayo a maragsakankayo ta rumagragpat dagiti agtutubo kadagiti pribilehio iti kongregasion. Ken iyestoriayo met koma kadakuada dagiti kapadasanyo. No aramidenyo dayta, ‘ipakpakitayo nga agyamyamankayo’ ken Jehova gapu kadagiti agtutubo nga inyasidegna iti kongregasion.​—Col. 3:15; Juan 6:44; 1 Tes. 5:18.

14. Kasano nga impakita ni Ari David ti kinaparabur?

¹⁴ Makitatayo iti ulidan ni Ari David ti sabali pay a napateg a kualidad a masapul nga ipakita dagiti nataengan​—ti kinaparabur. Nagadu ti indonarna manipud iti bukodna a kinabaknang tapno masuportaran ti panagibangon iti templo. (1 Cron. 22:11-16; 29:3, 4) Inaramidna dayta uray no ti anakna a ni Solomon ti kangrunaan a mapadayawan iti dayta a proyekto. Uray no ditayon kabaelan ti makiraman iti panagibangon kadagiti pasilidad ti organisasion, maitultuloytayo a suportaran dagitoy a proyekto babaen kadagiti donasiontayo, agingga nga ipalubos ti kasasaadtayo. Ken matulongantayo dagiti agtutubo a magunggonaan iti kapadasantayo iti panaglabas dagiti tawen.

15. Ania dagiti napateg nga inranud ni apostol Pablo ken Timoteo?

¹⁵ Maipapan iti kinaparabur, usigentayo ti ulidan ni apostol Pablo. Inawisna ni Timoteo a makikadua kenkuana iti trabaho a panagmisionero. Impakita ni Pablo ti kinaparaburna idi inranudna dagiti pamay-an ti panangasaba ken panangisuro iti daytoy nga agtutubo. (Ara. 16:1-3) Gapu iti panangsanay ni Pablo, nagbalin ni Timoteo nga epektibo a manangiwaragawag iti naimbag a damag. (1 Cor. 4:17) Insuro met ni Timoteo iti sabsabali dagiti nasursurona ken Pablo.

16. Apay a sinanay ni Shigeo ti sabsabali?

¹⁶ Saan a madanagan dagiti nataengan a masuktanda ken sabalin ti mangaramid kadagiti trabahoda iti kongregasion no sanayenda dagiti ub-ubing a kakabsat. Kas pagarigan, iti panaglabas dagiti tawen, ni Shigeo a nadakamat itay ket nangipaay kadagiti praktikal a panangsanay kadagiti ub-ubing a miembro ti Branch Committee. Inaramidna daytoy tapno makatulong iti trabaho ti Pagarian iti pagilian a pagserserbianna. Isu nga idi dinan maibaklay ti annongenna kas koordineytor, addan ti nasanay a sumukat kenkuana. Agingga ita, iranranud latta ni Shigeo ti nasurok nga 45 a tawen a kapadasanna kas miembro ti Branch Committee kadagiti ub-ubing a kakabsat. Talaga a bendision iti ili ti Dios dagiti nataengan a kas kenkuana!

17. Maitunos iti Lucas 6:38, ania ti maited dagiti nataengan iti sabsabali?

¹⁷ Dakayo a nataengan a kakabsat ket sibibiag a pammaneknek a ti napnuan-pammati ken matalek a panagserbi ken Jehova ti kasayaatan  a pamay-an ti panagbiag. Babaen ti ulidanyo, ipakpakitayo a saan a sayang ti panagregget a mangammo ken mangyaplikar kadagiti prinsipio ti Biblia. Manipud kadagiti kapadasanyo, ammoyo no kasano a maar-aramid idi dagiti bambanag, ngem makitkitayo met a kasapulan itan ti makibagay iti agbaliwbaliw a kasasaad. Dakayo a nataengan a kakabsat a nabiit pay a nabautisaran, adu met ti maitedyo. Mabalinyo nga iranud ti ragsakyo a nangam-ammo ken Jehova uray nataengankayon. Apresiaren dagiti agtutubo ti dumngeg kadagiti kapadasan ken nasursuroyo. No “iyugaliyo ti mangted” wenno mangiranud iti adu a kapadasanyo, sibabaknang a bendisionannakayo ni Jehova.​—Basaen ti Lucas 6:38.

18. Ania ti maitulong dagiti nataengan ken agtutubo iti maysa ken maysa?

¹⁸ Dakayo nga ipatpategmi a nataengan, itultuloyyo ti makisinninged kadagiti agtutubo. Iti kasta, ad-adda a masuportaranyo ti maysa ken maysa. (Roma 1:12) Tunggal maysa ket addaan iti napateg a banag nga awan iti sabali. Nakagun-od dagiti nataengan iti sirib ken kapadasan iti panaglabas dagiti tawen. Addaan met dagiti agtutubo iti pigsa ken bileg. No agdanggay nga agtrabaho dagiti agtutubo ken nataengan kas aggayyem, maidaydayawda ti naayat a nailangitan nga Amatayo ken agbalinda a bendision iti intero a kongregasion.