36-زەرتتەۋ ماقالاسى
جاستاردىڭ كۇش-قايراتىن باعالاڭىز
«جاستاردىڭ ٴسان-سالتاناتى — كۇش-قايراتى» (ناق. س. 20:29).
88-ٵن اق جولىڭنان تايمايىن
اڭداتپا *
1. جاسىمىز ۇلعايعاندا قانداي ماقساتتار قويساق بولادى؟
جاسىمىزعا جاس قوسىلىپ، قارتتىققا اياق باسقان سايىن، ەحوباعا بۇرىنعىداي قىزمەت ەتە المايتىن بولدىم دەپ ۋايىمدايتىن شىعارمىز. ٴبىراق ٴبىز ومىردە جيناپ-تەرگەن تاجىريبەمىز بەن دانالىعىمىزدى جاستاردىڭ يگىلىگىنە جۇمساي الامىز. مىسالى، ولاردىڭ پوتەنسيالىن تولىق اشۋعا، قاۋىمدا جاڭا مىندەتتەر الۋعا كومەكتەسسەك بولادى. كوپ جىلدان بەرى اقساقال بولىپ قىزمەت ەتكەن ٴبىر قارت باۋىرلاس بىلاي دەيدى: «كەيبىر ىسكە شامام كەلمەي قالعاندا، قاۋىمداعى ىستەردى الىپ كەتەتىن جاس ەر باۋىرلاستاردىڭ بولعانىنا قاتتى قۋاندىم».
2. بۇل ماقالادا نە تالقىلايمىز؟
2 وتكەن ماقالادا ٴبىز جاسى كىشى باۋىرلاستار جاسى ۇلكەن باۋىرلاستارمەن ارالاسقاندارىنىڭ قانداي پايداسىن كورەتىنىن قاراستىردىق. ال بۇل ماقالادا جاسى ۇلكەندەر كىشىپەيىلدىلىك، قاراپايىمدىلىق، ريزاشىلدىق پەن جومارتتىق قاسيەتتەرىن تانىتا وتىرىپ، جاسى كىشىلەرمەن قالاي قىزمەتتەسە الاتىنىن جانە بۇنىڭ پايداسىن بۇكىل قاۋىم كورەتىنىن تالقىلايمىز.
كىشىپەيىل بولىڭىز
3. فىلىپىلىكتەرگە 2:3، 4 كە ساي، كىشىپەيىلدىلىك دەگەن نە جانە كىشىپەيىل ٴماسىحشى نەنى تۇسىنەدى؟
3 جاسى ۇلكەندەر جاسى كىشىلەرگە كومەكتەسكىلەرى كەلسە، كىشىپەيىل بولۋلارى كەرەك. كىشىپەيىل ادام وزگەلەردى وزىنەن جوعارى سانايدى (فىلىپىلىكتەرگە 2:3، 4 وقىڭىز). كىشىپەيىل قارت باۋىرلاستار بارلىق نارسە ولار ۇيرەنىپ قالعان جولمەن شەشىلەدى دەپ كۇتپەيدى. ولار قانداي دا ٴبىر ٸستى اتقارۋدىڭ كيەلى كىتاپقا نەگىزدەلگەن وزگە دە ٴتيىمدى جولدارى بار ەكەنىن مويىندايدى (ۋاع. 7:10). تاجىريبەلەرى مول بولسا دا، ولار «بۇل دۇنيە وزگەرىپ» جاتقاندىقتان، جاڭا جاعدايلارعا بەيىمدەلۋ كەرەكتىگىن تۇسىنەدى (قور. 1-ح. 7:31).
جاسى ۇلكەندەر تاجىريبەلەرىمەن جومارتتىقپەن بولىسەدى (4، 5-ابزاستاردى قاراڭىز) *
4. بۇرىن اۋداندىق باقىلاۋشى بولعاندار لەۋىلىكتەردەن قانداي ۇلگى الادى؟
4 كىشىپەيىل قارت باۋىرلاستار بۇرىنعىداي كوپ قىزمەت ەتە المايتىندارىن مويىندايدى. مىسالى، اۋداندىق باقىلاۋشىلاردى الايىق. جاستارى جەتپىسكە كەلگەندە، ولاردىڭ تاعايىندالۋلارى اۋىسادى. بۇل وزگەرىس ولارعا وڭاي تيمەۋى مۇمكىن. ويتكەنى ولار قاۋىمدارعا اۋداندىق باقىلاۋشى رەتىندە كومەكتەسۋدى قاتتى جاقسى كورگەن. وسى سۇيىكتى قىزمەتتەرىن اتقارا بەرۋگە دەگەن ىقىلاستارى ٵلى دە جانىپ تۇرعان شىعار. ٴبىراق ولار ەندى جاستارعا جول بەرۋ كەرەكتىگىن تۇسىنەدى. ولار ەجەلگى يسرايلدەگى لەۋىلىكتەردەن ۇلگى الادى. لەۋىلىكتەر ەلۋ جاستان كەيىن كيەلى شاتىرداعى قىزمەتتەرىن توقتاتاتىن. ٴبىراق ولاردىڭ قۋانىشتارى قانداي دا ٴبىر تاعايىندالۋعا بايلانباعان ەدى. ولار قولدارىنان كەلەتىن كەز كەلگەن ٸستى جان-تاندەرىمەن اتقاراتىن جانە جاستارعا كوپ كومەكتەسەتىن (مۇس. 4-ج. 8:25، 26). بۇگىندە دە اۋداندىق باقىلاۋشىلار جەتپىس جاستان كەيىن قاۋىمداردى ارالاۋدى دوعارسا دا، تاعايىندالعان جاڭا قاۋىمدارى ٷشىن ناعىز باتا بولىپ ٴجۇر.
5. دان مەن كەتيدەن قانداي ۇلگى الدىڭىز؟
5 دان دەگەن باۋىرلاس 23 جىل بويى اۋداندىق باقىلاۋشى بولىپ قىزمەت ەتكەن. جاسى جەتپىسكە كەلگەندە، ايەلى كەتي ەكەۋى ارنايى ٸزاشار بولىپ تاعايىندالادى. ولار بۇل وزگەرىسكە قالاي بەيىمدەلدى؟ دان باۋىرلاس جاڭا قىزمەتىنە قۇلشىنا كىرىسىپ كەتتى. ول قاۋىمداعى مىندەتتەرىن اتقارىپ، ەر باۋىرلاستارعا قىزمەت كومەكشىسى بولۋعا كومەكتەسىپ، باۋىرلاستارعا ادام كوپ شوعىرلانعان جەرلەردە جانە تۇرمەلەردە ۋاعىزداۋدى ۇيرەتىپ ٴجۇر. قىمباتتى قاريا باۋىرلاسىمىز، قازىرگى تاعايىندالۋىڭىز قانداي بولماسىن، ٴسىز وزگەلەرگە كوپ كومەكتەسە الاسىز. بۇل ٷشىن جاڭا جاعدايدان قۋانىش تابۋدى ۇيرەنە بەرىڭىز، جاڭا ماقساتتار قويىڭىز. ىستەي المايتىن ەمەس، ىستەي الاتىن ىستەرگە كوز تىگىڭىز.
قاراپايىم بولىڭىز
6. قاراپايىم بولۋدىڭ ماڭىزدىلىعىن مىسالمەن ٴتۇسىندىرىپ بەرىڭىز.
6 قاراپايىم ادام ٶزىنىڭ شاما-شارقىن بىلەدى (ناق. س. 11:2). ونداي ادام قولىنان كەلمەيتىندى ىستەۋگە تىرىسپايدى. سونىڭ ارقاسىندا ول قۋانىشىن جوعالتپايدى، ٵرى قولىنان كەلەتىن ٸستى جەمىستى اتقارادى. قاراپايىم ادامدى جۇك كولىگىمەن تاۋعا قاراي كوتەرىلىپ بارا جاتقان جۇرگىزۋشىگە تەڭەۋگە بولادى. مۇندايدا ول جىلدامدىعىن ازايتىپ، جوعارىعا قاراي اقىرىن ٴجۇرىپ وتىرادى. ول باياۋ قوزعالعانمەن، دىتتەگەن جەرىنە قاراي كەتە بەرەدى. سول سياقتى، قاراپايىم ادام قاي كەزدە جىلدامدىقتى وزگەرتۋ كەرەكتىگىن بىلەدى. سونىڭ ارقاسىندا ول ەحوباعا جەمىستى قىزمەت ەتە بەرەدى (ٴفىلىپ. 4:5).
7. بارزيلايدىڭ قاراپايىم بولعانى نەدەن كورىندى؟
7 سەكسەن جاستا بولعان بارزيلايدىڭ وقيعاسىن الايىق. ٴداۋىت پاتشا ونى وزىمەن بىرگە پاتشا سارايىندا تۇرۋعا شاقىرعاندا، ول بۇدان باس تارتتى. ويتكەنى جاسى كەلىپ قالعاندىقتان، ول ٶزىنىڭ شاما-شارقىن ەسكەردى. سودان ورنىنا جاستاۋ كيمحامدى جىبەردى (سام. 2-ج. 19:35—37). بارزيلايدىڭ قاراپايىمدىلىعىنا ەلىكتەگەن بۇگىندەگى كوپ قاريالارىمىز دا قىزمەتتەرىن جاستاۋ باۋىرلاستارعا قۋانا تاپسىرادى.
قۇداي داۋىتكە عيباداتحانانى ونىڭ ۇلى سوعاتىنىن ايتقاندا، ول مۇنى كىشىپەيىلدىلىكپەن قابىلدادى (8-ابزاستى قاراڭىز)
8. قۇدايدىڭ عيباداتحاناسىن سوققىسى كەلگەن ٴداۋىت قالاي قاراپايىمدىلىق تانىتتى؟
8 داۋىت پاتشا دا قاراپايىمدىلىق تانىتقان. ول ەحوبانىڭ ٷيىن سوعۋدى بار جۇرەگىمەن قالاعان. ٴبىراق ەحوبا ٷيدى جاس سۇلەيمەن سوعاتىنىن ايتادى. سوندا ٴداۋىت مۇنىمەن كەلىسىپ، جوبانىڭ قۇرىلىسىنا جان-تانىمەن قولداۋ كورسەتەدى (شەج. 1-ج. 17:4؛ 22:5). ول «سۇلەيمەن جاس ٵرى تاجىريبەسىز، سوندىقتان بۇل عيباداتحانانى مەنىڭ سوققانىم جاقسىراق بولار ەدى» دەپ ويلامادى (شەج. 1-ج. 29:1). ويتكەنى بۇل جوبا سول ٸستى قولعا العانداردىڭ جاسى مەن تاجىريبەسىنە ەمەس، ەحوبانىڭ باتاسىنا بايلانىستى ەكەنىن جاقسى ٴبىلدى. ٴداۋىت سياقتى قارت باۋىرلاستار قىزمەتتەرى اۋىسسا دا، بەلسەندىلىكتەرىن جوعالتپايدى. سونداي-اق ولاردىڭ ورنىن باسقان جاستارعا ەحوبا باتاسىن بەرەتىنىن بىلەدى.
9. ٴبىر كوميتەت مۇشەسى قالاي قاراپايىمدىلىق تانىتتى؟
9 بۇگىندە دە كوپ قارت باۋىرلاس قاراپايىمدىلىق تانىتىپ ٴجۇر. سولاردىڭ ٴبىرى — شيگەو باۋىرلاس. ول 1976-جىلى 30 جاسىندا فيليال كوميتەتىنىڭ مۇشەسى بولىپ تاعايىندالادى. ال 2004-جىلى فيليال كوميتەتىنىڭ ۇيلەستىرۋشىسى بولادى. كەيىن ٵل-قۋاتى كەتىپ قارتايعاندا، بۇل قىزمەتتى ٵرى قاراي اتقارا المايتىنىن تۇسىنەدى. ٴسۇيتىپ، دۇعا ەتىپ، ۇيلەستىرۋشىلىك قىزمەتتى جاستاۋ باۋىرلاس اتقارسا دۇرىس بولادى دەگەن توقتامعا كەلەدى. قازىر شيگەو ۇيلەستىرۋشى بولماسا دا، وزگە كوميتەت مۇشەلەرىمەن يىق تىرەسە قىزمەت ەتىپ ٴجۇر. بارزيلاي، ٴداۋىت پاتشا جانە شيگەو باۋىرلاس سياقتى قاراپايىم دا كىشىپەيىل ادام جاستاردىڭ تاجىريبەسىزدىگىنە ەمەس، ولاردىڭ مول كۇش-قايراتىنا نازار اۋدارادى. جاستاردى باقتالاستارىم دەپ ەمەس، قىزمەتتەگى سەرىكتەرىم دەپ بىلەدى (ناق. س. 20:29).
ريزاشىل بولىڭىز
10. جاسى ۇلكەن باۋىرلاستار قاۋىمداعى جاستاۋ باۋىرلاستارعا قالاي قارايدى؟
10 جاسى ۇلكەندەر جاسى كىشىلەردى ەحوبادان كەلگەن سي دەپ بىلەدى، ٵرى وسى سي ٷشىن ولار ەحوباعا ريزا. ولار كۇش-قايراتى مول جاستاردىڭ قاۋىمنىڭ ىستەرىن اتقارۋعا دايىن ەكەندەرىنە قاتتى قۋانادى.
11. جاستاردىڭ كومەگىن ريزاشىلىقپەن قابىلداعاندا، قاريالار قانداي باتاعا كەنەلەدى؟ (رۋت 4:13—16)
11 جاستاردىڭ كومەگىن ريزاشىلىقپەن قابىلداعان قاريالاردىڭ ٴبىرى — ناعيما. العاشىندا ناعيما جەسىر قالعان كەلىنى رۋتتى ٶز ەلىنە قايتارىپ جىبەرمەك بولادى. ٴبىراق رۋت ەنەسىمەن بىرگە بەتلەحەمگە بارامىن دەپ العان بەتىنەن قايتپايدى. سوندا ناعيما ادال كەلىنىنىڭ بۇل كومەگىنەن باس تارتپايدى (رۋت 1:7، 8، 18). وسىنىڭ ناتيجەسىندە ەكەۋى دە مول باتاعا كەنەلدى (رۋت 4:13—16 وقىڭىز). كىشىپەيىل قاريالار ناعيمادان ۇلگى الادى.
12. پاۋىلدىڭ ريزاشىل ەكەنى نەدەن كورىندى؟
12 ەلشى پاۋىل دا وزگەلەردىڭ كومەگىن ريزاشىلىقپەن قابىلداعان. مىسالى، وعان جىبەرگەن سيلىقتارى ٷشىن فىلىپىدەگى ماسىحشىلەرگە راقمەت ايتقان (ٴفىلىپ. 4:16). تىموتەگە قولعابىس بولعانى ٷشىن ريزاشىلىعىن بىلدىرگەن (ٴفىلىپ. 2:19—22). سونداي-اق تۇتقىندالىپ، ريمگە بارا جاتقان كەزىندە جىگەرلەندىرۋگە كەلگەن باۋىرلاستارى ٷشىن قۇدايعا ريزاشىلىق بىلدىرگەن (ەل. ٸس. 28:15). پاۋىل بەلسەندى، قۋاتتى ادام بولعان. ول مىڭداعان شاقىرىمدار ٴجۇرىپ ۋاعىزداعان جانە ٴتۇرلى جەردەگى قاۋىمداردى نىعايتقان. ٴبىراق ول باۋىرلاستاردىڭ كومەگىن قابىلداۋعا نامىستانباعان.
13. قاريالار قاۋىمدا جاستاردىڭ بارىنا ريزاشىلىقتارىن قالاي بىلدىرسە بولادى؟
13 جاسى ۇلكەن باۋىرلاستار، سىزدەر قاۋىمدا جاستاردىڭ بارىنا ريزا ەكەندەرىڭىزدى كوپ جولدارمەن كورسەتە الاسىزدار. مىسالى، ولار سىزگە كولىكپەن ٴبىر جاققا اپارىپ-اكەلۋ، دۇكەنگە بارۋ سياقتى كومەكتەرىن ۇسىنسا، بۇنى ريزاشىلىقپەن قابىلداڭىز. ولاردىڭ كومەكتەرىن ەحوبانىڭ سۇيىسپەنشىلىگى دەپ ٴبىلىڭىز. وسىلاي ارالاسقاندارىڭىز كەرەمەت دوستىققا ۇلاسۋى مۇمكىن. جاس سەرىكتەرىڭىزگە رۋحاني وسۋگە كومەكتەسىڭىز. قاۋىم ٷشىن كوپ ەڭبەك اتقارىپ جاتقاندارىن بايقاساڭىز، ماقتاۋدى ۇمىتپاڭىز. ۋاقىت ٴبولىپ، ومىردە بولعان وقيعالارىڭىزدى ايتىپ بەرىڭىز. سوندا ٴسىز ەحوباعا جاستاردى قاۋىمعا تارتقانى ٷشىن «العىس بىلدىرە» الاسىز (قول. 3:15؛ جوح. 6:44؛ سال. 1-ح. 5:18).
جومارت بولىڭىز
14. داۋىت پاتشا قالاي جومارتتىق تانىتتى؟
14 جاسى ۇلكەن كىسىلەر تانىتۋ كەرەك تاعى ٴبىر قاسيەت — جومارتتىق. مىسالى، ٴداۋىت پاتشانى الايىق. عيباداتحانانى سوققانى ٷشىن بارلىق اتاق سۇلەيمەنگە تيەتىنىن بىلسە دە، ول عيباداتحانانىڭ قۇرىلىسىنا ٶز قالتاسىنان كوپ قارجى شىعاردى (شەج. 1-ج. 22:11—16؛ 29:3، 4). ٴبىز دە تەوكراتيالىق قۇرىلىس جوبالارىنا بۇدان ٵرى قاتىسا الماي قالساق، ونى قالتامىز كوتەرگەنشە قارجىلاي قولداساق بولادى. سونداي-اق جىلدار بويى جيناعان قۇندى تاجىريبەمىزدى جاستاردىڭ يگىلىگىنە جۇمساۋ ارقىلى دا جومارت بولايىق.
15. ەلشى پاۋىل تىموتەگە قالاي جومارتتىق تانىتتى؟
15 ەلشى پاۋىل دا جومارتتىق تانىتقان. ول جاس تىموتەنى ميسسيونەرلىك ساپارىندا الىپ ٴجۇرىپ، وعان ۋاعىزداۋ مەن ٴتالىم بەرۋدىڭ قىر-سىرىن ۇيرەتتى (ەل. ٸس. 16:1—3). سونىڭ ارقاسىندا تىموتە شەبەر ۋاعىزداۋشى بولدى (قور. 1-ح. 4:17). كەيىن ول پاۋىلدان ۇيرەنگەندەرىن وزگە ماسىحشىلەرگە دە ۇيرەتتى.
16. شيگەو باۋىرلاس جاسى كىشىلەردى نە ٷشىن ۇيرەتتى؟
16 قارت باۋىرلاستار «بىلگەن-تۇيگەنىمنىڭ ٴبارىن جاستارعا ۇيرەتسەم، كەيىن مەنىڭ كەرەگىم بولماي قالادى» دەپ قورىقپايدى. مىسالى، شيگەو باۋىرلاس فيليال كوميتەتىنىڭ جاستاۋ مۇشەلەرىنە بىلگەندەرىن ۇيرەتىپ كەلگەن. ويتكەنى ول ٶز ەلىندە پاتشالىق ٸسىن العا جىلجىتقىسى كەلدى. ال كەيىن ۇيلەستىرۋشىلىك قىزمەتتى اتقارا الماي قالعان كەزدە، ونىڭ ورنىنا ٶزى ۇيرەتكەن باۋىرلاستاردىڭ ٴبىرى كەلدى. شيگەو باۋىرلاس فيليال كوميتەتىندە جيناعان 45 جىلدىق تاجىريبەسىن ٵلى دە جاستاۋ باۋىرلاستاردىڭ يگىلىگىنە جۇمساپ كەلەدى. وسىنداي جومارت باۋىرلاستار ەحوبانىڭ حالقى ٷشىن ناعىز باتا!
17. لۇقا 6:38 گە ساي، جاسى ۇلكەندەر وزگەلەرگە نە بەرە الادى؟
17 قارت باۋىرلاستار، ٴبىز سىزدەرگە قاراپ، ەحوباعا ادالدىق پەن مىنسىزدىك ساقتاپ قىزمەت ەتۋ — ەڭ جاقسى ٶمىر جولى ەكەنىن كورەمىز. سونداي-اق كيەلى كىتاپ پرينسيپتەرىنە ساي ٶمىر سۇرگەندە عانا باقىتتى بولاتىنىمىزدى بىلەمىز. سىزدەردىڭ كوپ ىستە تاجىريبەلەرىڭىز بولسا دا، جاڭا جاعدايلارعا بەيىمدەلۋ كەرەكتىگىن تۇسىنەسىزدەر. جاقىندا شومىلدىرۋ راسىمىنەن وتكەن قاريالاردىڭ دا قاۋىمعا بەرەرى كوپ. ٴسىز وسى شاعىڭىزدا ەحوبانى بىلگەندە، قانداي قۋانىشقا كەنەلگەنىڭىزدى ايتىپ بەرە الاسىز. جاستار ٴسىزدىڭ باسىڭىزدان وتكەن وقيعالاردى، ومىردەن العان ساباقتارىڭىزدى ەستۋگە اسىق. ٴسىز جيىپ-تەرگەن قازىناڭىزدان بەرە بەرسەڭىز، ەحوبا دا ٴسىزدى مولىنان جارىلقايدى (لۇقا 6:38 وقىڭىز).
18. جاسى ۇلكەندەر مەن جاسى كىشىلەر ٴبىر-بىرىنە قالاي كومەكتەسەدى؟
18 قاۋىمدا جاسى ۇلكەندەر مەن جاسى كىشىلەر ٶزارا دوس بولسا، ٴبىر-بىرىنە دەمەۋ بولا الادى (ريم. 1:12). ەكى جاقتىڭ دا ٴبىر-بىرىنە بەرەرى بار. مىسالى، قاريا باۋىرلاستاردا دانالىق پەن تاجىريبە بولسا، جاستاۋ باۋىرلاستاردا كۇش-قايرات بار. ولار يىق تىرەسە قىزمەتتەسسە، كوكتەگى اكەلەرىنە ماداق اكەلەدى جانە قاۋىم ٷشىن باتا بولادى.
90-ٵن ٴبىر-ٴبىرىمىزدى جىگەرلەندىرەيىك
^ 5-ابزاس قاۋىمدارىمىزدا ەحوبانىڭ ۇيىمىن قولداپ جۇرگەن جاستارعا قاريا باۋىرلاستار كوپ كومەكتەسە الادى. مادەنيەتى مەن شىققان ورتاسى قانداي بولماسىن، ولار جاستاردى ەحوباعا بار كۇش-قۋاتتارىن بەرىپ قىزمەت ەتۋگە تالپىندىرا الادى
^ 55-ابزاس سۋرەت سيپاتتاماسى: اۋداندىق باقىلاۋشى جەتپىس جاسقا كەلگەن سوڭ، ايەلى ەكەۋىنىڭ قىزمەتى اۋىستى. كوپ تاجىريبە جيناعاننىڭ ارقاسىندا ولار قازىرگى قاۋىمدارىندا باسقالاردى ۇيرەتىپ ٴجۇر.
