1. Гава әм кал-пир дьбьн, әм дькарьн чь нете хԝәрʹа дайньн?

ГАВА әм кал у пир дьбьн, әм дьбәкә дьтьрсьн ԝәки рʹожәке, әме ида нькарьбьн ча бәре хьзмәт кьн. Рʹаст ә, дьԛәԝьмә ԛәԝата мә ԝе дьһа кем бә, ле әм дькарьн бь сайа билани у әʹмьре хԝәйә щерʹьбанди али щаһьла бькьн, ԝәки әԝана рʹӧһʹанида пешда һәрʹьн у щабдарийед тʹәзә бьстиньн. Рʹуспики щерʹьбанди ӧса дьбежә: «Чахе әз һеди-һеди кал дьбум у ԛәԝата мьн кем дьбу, әз ша бум ԝәки щьватеда щаһьлед жир у сәрхԝә һәнә, йед кӧ һазьр ьн шьхӧлед щьвате дәԝса мьн бькьн».

2. Ве готареда, әме дәрһәԛа чь хәбәр дьн?

² Готара пешийа веда, мә дит ԝәки кәсед щаһьл ча дькарьн жь һәвалтийа тʹәви хушк-бьред әʹмьрда мәзьн кʹаре бьстиньн. Ле ве готареда әме бьвиньн чаԝа һʹӧнӧред ӧса ча мьлукти, бәрбьһери, шекьрдари у мәрʹдани дькарьн али кәсед әʹмьрда мәзьн бькьн ԝәки тʹәви кәсед щаһьл һәвкʹарийе бькьн.

3. Ль гора Филипи 2:3, 4, мьлукти чь йә, у әв һʹӧнӧр бона мә чьрʹа фәрз ә?

³ Сәва кӧ кәсед әʹмьрда мәзьн бькарьбьн али кәсед щаһьл бькьн, лазьм ә ԝәки әԝана мьлук бьн. Мәрьвед мьлук кәсед дьн жь хԝә бьльндтьр һʹәсаб дькьн (Филипи 2:3, 4 бьхунә). Кәсе мьлук ԛәбул дькә кӧ ль гора Кʹьтеба Пироз изьн һәйә ԝәки һьнә шьхӧлед щьвате бь щурʹә-щурʹә метода бенә кьрьне. Ләма жи ԝе  баш бә ԝәки йед әʹмьрда мәзьн мьлук бьн у нәфькьрьн кӧ гәрәке һәр кәс ван шьхӧла бь методед бәре бькьн (Ԝаиз 7:10). Әԝана чьԛас щерʹьбанди бьн жи, гәрәке фәʹм бькьн кӧ «әв дьнйа әʹйан дәрбаз дьбә» у лазьм ә ԝәки мәрьв һини дәрәщед тʹәзә бә (1 Корьнтʹи 7:31).

4. Ԝе чьма баш бә кӧ бәрпьрсийаред мьһале чʹәʹв бьдьнә Леԝийа?

⁴ Кәсед әʹмьрда мәзьн гәрәке бь мьлукти ԛәбул кьн кӧ ԛәԝата ԝан ида мина йа бәре нинә. Мәсәлә, бьфькьрьн дәрһәԛа бәрпьрсийаред мьһале. Гава әԝана дьбьн 70 сали, әԝана кʹьфшкьрьнәкә дьн дьстиньн. Бона һьнә бәрпьрсийара йед кӧ ве хьзмәте гәләк һʹьз дькьн, зор те ве кʹьфшкьрьна хԝә бьһельн. Ԝана бь дьл у щан али хушк-бьра дькьр, ле әԝана фәʹм дькьн кӧ ԝәхт һатийә ԝәки ве щабдарийе бьдьн дәсте кәсед жь ԝан щаһьлтьр. Бь ве йәке әԝана чʹәʹв дьдьнә Леԝийед Исраела бәре: Гава Леԝи дьбун 50 сали, ԝана хьзмәта хԝә коне пирозда дьда сәкьнандьне. Йәкә Леԝийа шабуна хԝә ӧнда нәдькьр, чьмки шабуна ԝан шьхӧләки йан кʹьфшкьрьнәкива гьредайи нибу. Чь дәсте ԝан дьһат ԝана дькьр, ԝәки бь дьл у щан пьштгьрийа щаһьла бькьн (Жьмар 8:25, 26). Иро, гава бәрпьрсийаред мьһале дьбьн 70 сали, әԝана ве кʹьфшкьрьне дьһельн, ле әԝана диса жи бь дьл у щан пьштгьрийа щьвата хԝә дькьн.

5. Тӧ жь сәрһатийа Дан у Катийе чь дәрсе дьстини?

 ⁵ Ԝәрә бьфькьрьн сәр мәсәла бьре мә Дан, йе кӧ зедәтьри 23 сала ча бәрпьрсийаре мьһале хьзмәт дькьр. Гава Дан бу 70 сали, әԝ у жьна ԝи Кати ча пешәнгед мәхсус һатьнә кʹьфшкьрьне. Гәло әԝана жь кʹьфшкьрьна хԝәйә тʹәзә шабуне дьстиньн? Бәле! Дан һьм шьхӧлед щьвате дькә, һьм жи али бьред дьн дькә ԝәки әԝ рʹӧһʹанида пешда һәрʹьн у бьбьнә бәрдәстийед щьвате. Ӧса жи, әԝ хушк-бьра һин дькә, чаԝа нава шәһәрда у кәлада хьзмәт бькьн. Фьрԛи тʹӧнә, кәсед әʹмьрда мәзьн хьзмәта һәртʹьмда бьн йан на, әԝана һʹәму дькарьн али кәсед дьн бькьн. Ԝе баш бә ԝәки әԝана һини һʹале хԝәйи тʹәзә бьн у хԝәрʹа нетед тʹәзә дайньн. Дәԝса кӧ дьле ԝан сәр кʹьфшкьрьнед ԝанә бәре бьминә, ԝе баш бә әԝана нетед тʹәзә дайньн пешийа хԝә у дина хԝә бьдьн тьштед кӧ ԛәԝата ԝан дьгьһиже бькьн.

6. Чьрʹа фәрз ә синоред хԝә бьзаньбьн? Мәсәле биньн.

⁶ Мәрьвед мьлук синоред хԝә заньн (Мәтʹәлок 11:2). Ләма, һәгәр әԝана ида нькарьн һьнә тьшта бькьн жи, әԝана шабуна хԝә ӧнда накьн. Һʹале ԝан мина һʹале мәрьвәки йә кӧ дьхԝазә һьлкʹьшә чʹийаки. Әԝ дьбәкә нькарә зу рʹе һәрʹә, ле һеди-һеди әԝе бьгьһижә сәре чʹийе. Мина ве йәке, кәсед кӧ синоред хԝә заньн, фәʹм дькьн ԝәки щарна лазьм ә әԝана «һеди-һеди бьмәшьн», сәва кӧ бькарьбьн бәрдәԝам кьн Йаһоԝарʹа хьзмәт кьн у али кәсед дьн бькьн (Филипи 4:5).

7. Барзиллай чаԝа нишан кьр ԝәки әԝ синоред хԝә занә?

⁷ Щарәке, Даԝьд Пʹадша мәрьвәки бь наве Барзиллайрʹа гот ԝәки әԝ тʹәви ԝи һәрʹә Оршәлиме у щәм ԝи бьминә. Ле Барзиллай ида 80 сали бу, у  әԝи синоред хԝә заньбу, ләма тʹәглифа Даԝьд Пʹадша ԛәбул нәкьр. Дәԝсе әԝи гот ԝәки бьра щаһьләки бь наве Кимһам дәԝса ԝи һәрʹә (2 Самуйел 19:35-37). Мина Барзиллай, ԝе баш бә ԝәки бьред әʹмьрда мәзьн мәщале бьдьн бьред щаһьл кӧ щабдарийа һьлдьн сәр хԝә.

8. Гава лазьм бу кӧ пʹарьстгәһ бьһата авакьрьне, Даԝьд Пʹадша чаԝа синоред хԝә ԛәбул кьрьн?

⁸ Даԝьд Пʹадша жи синоред хԝә ԛәбул дькьр. Әԝи гәләк дьхԝәст бона Йаһоԝа пʹарьстгәһе ава кьра. Ле гава Йаһоԝа ԝирʹа гот ԝәки кӧрʹе ԝи Сьлеман ԝе ви шьхӧли бинә сери, Даԝьд ԛьрара Йаһоԝа ԛәбул кьр у бь дьл у щан пьштгьрийа ве сафикьрьне кьр (1 Дирок 17:4; 22:5). Даԝьд нәдьфькьри ԝәки Сьлеман һе «щаһьл ә» у нәщерʹьбанди йә, у ԝе дьһа баш бә ԝәки әԝ хԝәха ви шьхӧли бькә (1 Дирок 29:1). Даԝьд заньбу кӧ пешдачуйина авакьрьне кʹәрәма Йаһоԝава гьредайи йә, нә кӧ ве йәкева кӧ сәркʹар чәнд сали йә йан чьԛас щерʹьбанди йә. Чахе щабдарийа кәсед әʹмьрда мәзьн те гӧһастьне у ида лазьм ә ԝәки әԝана шьхӧлед щьвате тʹәсмили бьред дьһа щаһьл бькьн, әԝана диса жи щьватеда шьхӧлед дьн дькьн. Әԝана баԝәр ьн ԝәки Йаһоԝа ԝе хирәта бьред щаһьл кʹәрәм бькә.

9. Әндәмәки Комитейа Филиале чаԝа нишан кьр, ԝәки әԝ синоред хԝә занә?

⁹ Дина хԝә бьдә сәрһатийа бьре мә Шигео. Сала 1976-да, гава әԝ 30 сали бу, әԝ ча әндәме Комитейа Филиале һатьбу кʹьфшкьрьне. Сала 2004-да, әԝ бу координаторе Комитейа Филиале. Паше, әԝи фәʹм кьр кӧ ԛәԝата ԝи ида  мина йа бәре нинә, у ԝирʹа ида чәтьн бу щабдарийед хԝә бинә сери. Ләма, әԝи дӧа кьр у фәʹм кьр ԝәки ԝе дьһа баш бә щабдарийед хԝә тʹәсмили бьраки дьһа щаһьл бькә. Шигео ида координатор нинә, ле әԝ диса жи ча әндәме Комитейа Филиале хьзмәт дькә. Ча мә жь сәрһатийед Барзиллай, Даԝьд Пʹадша у Шигео фәʹм кьр, кәсед кӧ мьлук ьн у синоред хԝә заньн, әʹщьз набьн кӧ кәсед щаһьл щерʹьбанди ниньн, ле дәԝсе әԝана дина хԝә дьдьн һʹӧнӧред ԝан у ԛәԝата ԝан. Әԝана щаһьларʹа накʹәвьнә ләще, у ча һәвалкʹаред хԝә һʹәсаб дькьн (Мәтʹәлок 20:29).

10. Гәрәке кәсед әʹмьрда мәзьн сәр хушк-бьред щаһьл чаԝа бьньһерʹьн?

¹⁰ Кәсед әʹмьрда мәзьн хушк-бьред щаһьл ча пʹешкʹешед жь Йаһоԝа һʹәсаб дькьн, у әԝана бона ван пʹешкʹеша рʹази нә. Чьԛас ԛәԝата кәсед әʹмьрда мәзьн кем дьбә, әԝана ша нә ԝәки кәсед щаһьл һазьр ьн дәԝса ԝан шьхӧлед щьвате бькьн.

11. Ль гора Рʹутʹ 4:13-16, ԛәбулкьрьна аликʹарийа кәсед щаһьл чьрʹа керһати йә?

¹¹ Кʹьтеба Пироз бәʹса жьнәбикә бь наве Наһоми дькә. Гава әԝ пир бу, әԝ һазьр бу аликʹарийе жь кәсе дьһа щаһьл ԛәбул кә, у әԝ бона ве аликʹарийе шекьрдар бу. Пешийе, Наһомйе бука хԝә Рʹутʹерʹа гот, ԝәки әԝ вәгәрʹә щәм мьләте хԝә. Ле Рʹутʹе сафи кьр ԝәки тʹәви Наһомйе һәрʹә Бәйтләһʹме, у әԝе аликʹарийа Рʹутʹе ԛәбул кьр (Рʹутʹ 1:7, 8, 18). Ахьрийеда, һәр дӧ жьна жи кʹәрәмед мәзьн стандьн (Рʹутʹ 4:13-16 бьхунә). Ԝе баш бә кӧ кәсед әʹмьрда мәзьн бь мьлукти мина Наһомйе аликʹарийе ԛәбул бькьн.

12. Паԝлос рʹазибуна хԝә ча да кʹьфше?

 ¹² Паԝлосе шанди бона аликʹарийа кӧ әԝи жь кәсед дьн дьстанд, шекьрдар бу. Мәсәлә, әԝи хушк-бьред бажаре Филипйайеда бона пʹешкʹешед кӧ ԝана ԝирʹа шандьбун, рʹазибуна хԝә да кʹьфше (Филипи 4:16). Әԝ бона аликʹарийа Тимотʹейо жи шекьрдар бу (Филипи 2:19-22). Ӧса жи, гава Паԝлосе шанди ча гьрти дьчу Рʹоме у чәнд бьра һатьн пешийа ԝи, әԝи шькьри да Хԝәде (Кʹаред Шандийа 28:15). Паԝлос бьраки жир у сәрхԝә бу, йе кӧ бь һʹәзара километьра рʹе дьчу ԝәки мьзгине бәла кә у щьвата ԛәԝи кә. Диса жи, әԝ нәдьфькьри ԝәки әԝ һʹәԝще аликʹарийа хушк-бьра нинә.

13. Кәсед әʹмьрда мәзьн ча дькарьн нишан кьн кӧ әԝана бона хушк-бьред щаһьл рʹази нә?

¹³ Гәло тӧ ча дькари нишан ки, ԝәки тӧ бона хушк-бьред щаһьл шекьрдар и? Мәсәлә, һәгәр әԝана тә тʹәглиф кьн бь әʹрәбе тә бьвьн щики йан бона тә һәрʹьн дькʹане, аликʹарийа ԝан бь рʹазибуне ԛәбул кә. Бь рʹасти аликʹарийа ԝан нишан дькә, ԝәки Йаһоԝа тә һʹьз дькә у бона тә хәм дькә. Сәрда жи, кәсед кӧ али тә дькьн ԝе дьбәкә ԝәʹдә шунда бьбьнә достед тәйә незик. Ӧса жи, тӧ дькари али ԝан бьки, ԝәки әԝана дьһа незики Йаһоԝа бьн. Ԝанрʹа бежә ԝәки дьле тә чьԛас ша дькә әв йәк кӧ әԝана хьзмәта хԝә зедә дькьн. Тʹәви ԝан ԝәʹдә дәрбаз кә у бәʹса сәрһатийед хԝә бькә. Бь ви щурʹәйи тӧ дькари нишан ки, ԝәки тӧ бона хушк-бьред щаһьл шекьрдар и, йед кӧ Йаһоԝа кʹьшандьнә щьвате (Колоси 3:15; Йуһʹәнна 6:44; 1 Тʹесалоники 5:18).

14. Даԝьд Пʹадша мәрʹданийа хԝә чаԝа нишан кьр?

¹⁴ Ԝе баш бә ԝәки кәсед әʹмьрда мәзьн мина Даԝьд Пʹадша дәствәкьри бьн. Мәсәлә, Йаһоԝа шьхӧле авакьрьна пʹарьстгәһе да дәсте Сьлеман, ле Даԝьд диса жи бь мәрʹданийе пьштгьрийа ви шьхӧли кьр (1 Дирок 22:11-16; 29:3, 4). Һәгәр ԛәԝата мә ида нагьһижә проектед авакьрьнеда бьхәбьтьн, әм диса жи дькарьн бь сайа ԛӧрбанкьрьнед хԝә пьштгьрийа ван проекта бькьн. Ӧса жи, әм дькарьн тьштед ӧса щаһьла һин кьн, чь кӧ ԝе кери ԝан бе.

15. Паԝлосе шанди чь хьзнә дан Тимотʹейо?

¹⁵ Хенщи ве йәке, дина хԝә бьде кӧ Паԝлосе шанди мәрʹданийа хԝә ча нишан дькьр. Әԝи Тимотʹейо тʹәви хԝә дьбьр хьзмәте у методед һинкьрьне у бәлакьрьна мьзгине ԝи һин дькьр (Кʹаред Шандийа 16:1-3). Бь сайа һинкьрьна кӧ Тимотʹейо жь Паԝлос станд, әԝ бу мьзгинван у дәрсдарәки баш (1 Корьнтʹи 4:17). Тимотʹейо жи әве йәке чь кӧ жь Паԝлос һин бьбу, кәсед дьн һин дькьр.

16. Шигео чьрʹа кәсед дьн һин дькьрьн?

¹⁶ Иро жи, кәсед әʹмьрда мәзьн нафькьрьн кӧ һәгәр әԝана кәсед щаһьл һин кьн шьхӧлед щьвате бькьн, әԝана ԝе ида бекер бьн. Мәсәлә, бьре мә Шигео бь сала әндәмед дьһа щаһьл йед Комитейа Филиале һин дькьрьн. Бь ви щурʹәйи, әԝи шьхӧле Пʹадшатийе пешда дьбьр, у гава ԝәхт һат, бьраки һинкьри дькарьбу дәԝса ԝи бьбә координатор. Шигео зедәтьри 45 сала ча әндәме Комитейа Филиале хьзмәт кьрийә, у әԝ һʹәта ньһа бәрдәԝам дькә али бьред щаһьл бькә. Әм чьԛас ша нә кӧ нав мәда бьред ӧса дәлал һәнә!

17. Ль гора Луԛа 6:38, кәсед әʹмьрда мәзьн дькарьн чь бькьн?

¹⁷ Хушк-бьред әʹмьрда мәзьн, һун бь амьнийа хԝә зәлал избат дькьн, ԝәки  жийина ль гора ԛьрара Йаһоԝа, жийина һәри баш ә. Баԝәри у беԛьсуртийа ԝә әшкәрә дькә кӧ принсипед Кʹьтеба Пироз чьԛас ԛимәт ьн, у һежа йә кӧ әм ван принсипа һин бьн у ль гора ԝан бьжин. Бьред щерʹьбанди, һун методед бәре заньн, ле һун ӧса жи фәʹм дькьн ԝәки щарна лазьм ә ида һини һʹале хԝәйә тʹәзә бьн. Һун жи, йед кӧ әʹмьре хԝәйи мәзьнда һатьнә ньхӧмандьне, дькарьн щаһьла гәләк тьштед ԛимәт һин кьн. Һун ша нә ԝәки ԝә әʹмьре хԝәйи мәзьнда Йаһоԝа нас кьр. Хушк-бьред щаһьл дькарьн жь сәрһатийед әʹмьре ԝә гәләк кʹаре бьстиньн. Һәгәр һун дәрсед кӧ ԝә жь әʹмьре хԝә һин бунә, бь мәрʹдани щаһьларʹа гьли кьн, һуне жь Йаһоԝа гәләк кʹәрәма бьстиньн (Луԛа 6:38 бьхунә).

18. Кәсед әʹмьрда мәзьн у кәсед щаһьл чаԝа дькарьн али һәвдӧ бькьн?

¹⁸ Чьԛас йед әʹмьрда мәзьн у йед щаһьл һәврʹа һәвалтийе бькьн, әԝана ԝе бькарьбьн пьштгьрийа һәв бькьн (Рʹомайи 1:12). Бал һәр кәси тьштәки ԛимәт һәйә, кӧ бал кәсед дьн тʹӧнә йә. Мәсәлә, кәсед әʹмьрда мәзьн бь сала гәләк билани ԛазанщ кьрьнә. Бал кәсед щаһьл жи ԛәԝат һәйә. Һәвкʹарийа кәсед щаһьл тʹәви кәсед әʹмьрда мәзьн һьм Йаһоԝа хԝәш те, һьм жи бона щьвате гәләк керһати йә.