1. Us fayn gol wi go sɛt as wi de ol?

 AS WI de ol, sɔntɛm wi go fred se Jiova nɔ go yuz wi igen lɛk aw i bin de yuz wi we wi yɔŋ. Pan ɔl we i go bi se wi nɔ gɛt bɛtɛ trɛnk igen lɛk trade, wi kin stil yuz di sɛns ɛn di tin dɛn we wi dɔn lan fɔ tich yɔŋ wan dɛn so dat Jiova in ɔganayzeshɔn go ebul fɔ yuz dɛn fɔ du mɔ wok. Wan brɔda we dɔn bi ɛlda fɔ lɔng tɛm bin tɔk se: “We a nɔ bin ebul fɔ du bɛtɛ wok dɛn igen lɛk aw a bin de du trade bikɔs a dɔn ol, a bin gladi we yɔŋ brɔda dɛn bin de we kwalifay fɔ du di wok.”

2. Wetin wi go tɔk bɔt insay dis atikul?

² Di atikul we de bifo dis wan bin sho wi aw yɔŋ wan dɛn kin bɛnifit we dɛn mek padi wit di wan dɛn we dɔn ol. Insay dis atikul, wi go si aw kwaliti dɛn lɛk fɔ put yusɛf dɔŋ, fɔ no se nɔto ɔltin yu ebul fɔ du, fɔ sho se yu gɛt tɛnki, ɛn fɔ de du gud, go ɛp di wan dɛn we dɔn ol fɔ wok wit di yɔŋ wan dɛn, ɛn dat go mek ɔlman na di kɔngrigeshɔn bɛnifit.

3. Wetin Filipians 2:​3, 4 se Kristian we de put insɛf dɔŋ go du, ɛn aw dat go ɛp am?

³ Di ol wan dɛn fɔ put dɛnsɛf dɔŋ if dɛn want fɔ ɛp di yɔŋ wan dɛn. Pɔsin we ɔmbul de tink se ɔda pipul dɛn bɛtɛ pas am. (Rid Filipians 2:​3, 4.) Ol wan dɛn we gɛt dis kwaliti no se bɔku ɔda we dɛn de fɔ du sɔntin we de akɔdin to wetin di Baybul se ɛn we de wok fayn fayn wan. So dɛn nɔ de tink se ɔlman fɔ du tin di sem we lɛk  aw dɛn bin de du am trade. (Ɛkli. 7:​10) Dɛn kin ɛp di yɔŋ wan dɛn bay we dɛn tɛl dɛn wetin dɛn bin dɔn lan. Bɔt dɛn no bak se “di wɔl we wi de si naw de chenj,” ɛn dɛn go nid fɔ lan nyu we dɛn fɔ du tin.—1 Kɔr. 7:​31.

4. Aw sakit ovasia dɛn de falamakata di Livayt dɛn?

⁴ Ol wan dɛn we ɔmbul kin mɛmba se as dɛn de ol, dɛn nɔ go ebul fɔ du bɔku tin dɛn we dɛn bin de du trade. Fɔ ɛgzampul, lɛ wi tɔk bɔt wi sakit ovasia dɛn. We dɛn rich 70 ia, dɛn kin gi dɛn difrɛn asaynmɛnt. Sɔntɛm, dat go at fɔ du. Dɛn bin rili gladi fɔ ɛp dɛn brɔda dɛn. Dɛn bin lɛk di wok we dɛn bin de du, ɛn dɛn rili want fɔ du da wok de. Bɔt dɛn ɔndastand se i bɛtɛ fɔ mek yɔŋ brɔda dɛn du di wok. Dɛn de sho kwaliti we fiba lɛk di Livayt dɛn we bin de trade na Izrɛl. Dɛn nɔ bin de fos di Livayt dɛn fɔ wok na di tabanakul we dɛn rich 50 ia. Dɛn Livayt dɛn de we bin dɔn ol bin gladi ilɛk uskayn wok dɛn gi dɛn. Dɛn bin de du dɛn bɛst pan ɛni wok we dɛn bin gɛt. Dɛn bin de du ɔl wetin dɛn ebul fɔ ɛp di yɔŋ wan dɛn. (Nɔm. 8:​25, 26) Tide, we sakit ovasia dɛn rich 70 ia, dɛn de stɔp fɔ go na bɔku kɔngrigeshɔn dɛn, bɔt dɛn de gi bɔku ɛp ɛn ɛnkɔrejmɛnt na di kɔngrigeshɔn we dɛn de sav.

5. Wetin yu lan frɔm Dan ɛn Keti dɛn ɛgzampul?

 ⁵ Lɛ wi tɔk bɔt wan brɔda in ɛgzampul we nem Dan, we bin du di sakit wok fɔ 23 ia. We Dan bin rich 70 ia, dɛn bin tɛl in ɛn in wɛf Keti fɔ bi spɛshal payɔnia dɛn. Aw dɛn dɔn ajɔst to dɛn nyu asaynmɛnt? Dan se na naw i bizi pas trade. I de kia fɔ in kɔngrigeshɔn wok dɛn, i de ɛp brɔda dɛn fɔ kwalifay fɔ bi ministerial savant dɛn, ɛn i de tren ɔda brɔda ɛn sista dɛn aw fɔ prich na siti ɛn na prizin dɛn. Brɔda ɛn sista dɛn we dɔn ol, ilɛksɛf yu de na ful-taym savis ɔ yu nɔ de na ful-taym savis, yu go ebul du bɔku tin fɔ ɛp ɔda brɔda ɛn sista dɛn. Aw? Lan fɔ ajɔst to wetin de apin to yu, sɛt nyu gol dɛn, ɛn nɔ pe atɛnshɔn pan wetin yu nɔ ebul fɔ du. Bifo dat, pe atɛnshɔn pan wetin yu go ebul fɔ du.

6. Wetin mek i mek sɛns fɔ lɛ wi bi pɔsin we no se nɔto ɔltin wi ebul fɔ du? Gi wan ɛgzampul.

⁶ Pɔsin we no se nɔto ɔltin i ebul fɔ du kin no usay i fɔ stɔp. (Prɔv. 11:​2, NWT) Bikɔs i no se nɔto ɔltin i ebul fɔ du, i nɔ de ɛkspɛkt insɛf fɔ du pas wetin i ebul fɔ du. So dat kin mek i kɔntinyu fɔ gɛt gladi-at ɛn wok tranga wan. Wi go kɔmpia pɔsin we no se nɔto ɔltin i ebul fɔ du to pɔsin we de drayv motoka ɔp il. Di drayva go nid fɔ chenj in gia to gia wan ɔ tu so dat i go ebul fɔ kɔntinyu fɔ klem di il. Na tru se i nɔ go gɛt bɛtɛ spid we i de klem di il, bɔt i go kɔntinyu fɔ go bifo. Semweso, pɔsin we no se nɔto ɔltin i ebul fɔ du no di tɛm we i fɔ mek chenj dɛn ɛn ridyus in spid so dat i go kɔntinyu fɔ sav Jiova ɛn ɛp ɔda pipul dɛn.—Fil. 4:​5.

7. Aw Bazilay bin sho se nɔto ɔltin i ebul fɔ du?

⁷ Tink bɔt Bazilay in ɛgzampul. We i bin ol 80 ia, Kiŋ Devid bin invayt am fɔ bi wan pan in advaysa dɛn. Bikɔs Bazilay bin no se nɔto ɔltin i go ebul fɔ du, i nɔ bin gri. Bazilay bin no se bɔku tin dɛn de we i nɔ go ebul fɔ du bikɔs i dɔn ol. So i bin tɛl Devid fɔ mek Kimam, we na yɔŋman, tek in ples. (2 Sam. 19:​35-37) Lɛk Bazilay, brɔda dɛn we dɔn ol kin gladi fɔ alaw yɔŋ brɔda dɛn fɔ du di wok.

8. Aw Kiŋ Devid bin sho se nɔto ɔltin i ebul fɔ du, we i bin want fɔ bil di tɛmpul?

⁸ Kiŋ Devid bak bin sɛt fayn ɛgzampul fɔ sho se nɔto ɔltin i ebul fɔ du. I bin rili want fɔ bil os fɔ Jiova. Bɔt we Jiova bin tɛl am se na yɔŋ Sɔlɔmɔn go du da wok de, Devid bin gri wit wetin Jiova disayd, ɛn i bin du ɔl wetin i ebul fɔ ɛp fɔ pripia di tin dɛn we Sɔlɔmɔn go nid fɔ bil di tɛmpul. (1 Kro. 17:​4; 22:​5) Devid nɔ bin tink se i go bɛtɛ fɔ mek in bil di tɛmpul bikɔs Sɔlɔmɔn bin ‘yɔŋ ɛn i nɔ gɛt ɛkspiriɛns.’ (1 Kro. 29:​1) Devid bin no se na Jiova in blɛsin go mek dɛn ebul fɔ bil di tɛmpul, nɔto di ej ɔ di ɛkspiriɛns we di wan dɛn we de bifo gɛt. Lɛk Devid, ol wan dɛn tide de kɔntinyu fɔ wok tranga wan na Jiova in savis, pan ɔl we di wok we dɛn bin de du dɔn chenj. Ɛn dɛn no se Jiova go blɛs di yɔŋ wan dɛn we de du di wok we dɛn bin de du.

9. Aw wan Branch Kɔmiti mɛmba sho se nɔto ɔltin i ebul fɔ du?

⁹ Insay wi yon tɛm, wan brɔda we  nem Shigio bin sho se nɔto ɔltin i ebul fɔ du. Insay 1976, we i bin ol 30 ia, dɛn bin apɔynt am fɔ sav na wan Branch Kɔmiti. Insay 2004, i bin bi di kɔdinetɔ fɔ di Branch Kɔmiti. Bɔt leta, i bin si se i nɔ strɔng igen lɛk trade, ɛn i de tek lɔng tɛm fɔ dɔn in wok. I bin pre bɔt dat ɛn tink bɔt wetin mek i go bɛtɛ fɔ mek yɔŋ brɔda bi di kɔdinetɔ. Shigio nɔto di kɔdinetɔ igen fɔ di Branch Kɔmiti, bɔt stil in na mɛmba na di Branch Kɔmiti. As wi dɔn lan frɔm Bazilay, Kiŋ Devid, ɛn Shigio dɛn ɛgzampul, pɔsin we ɔmbul ɛn we no se nɔto ɔltin i ebul fɔ du nɔ go pe atɛnshɔn pan di ɛkspiriɛns we yɔŋ wan dɛn nɔ gɛt, bɔt i go pe atɛnshɔn pan dɛn trɛnk. I nɔ go si dɛn as rayval, bɔt i go si dɛn as in kɔmpin wokman dɛn.—Prɔv. 20:​29.

10. Aw di wan dɛn we dɔn ol kin fil bɔt di yɔŋ wan dɛn na di kɔngrigeshɔn?

¹⁰ Di wan dɛn we dɔn ol de si se di yɔŋ wan dɛn na gift frɔm Jiova, ɛn dɛn gladi fɔ wetin di yɔŋ wan dɛn de du. As ol wan dɛn trɛnk de dɔn, dɛn gladi bikɔs di yɔŋ wan dɛn we gɛt trɛnk rɛdi ɛn ebul fɔ du di wok, ɛn fɔ sav di kɔngrigeshɔn.

11. Aw Ruth 4:​13-16 sho se di wan dɛn we dɔn ol go bɛnifit we dɛn gri fɔ mek yɔŋ wan dɛn ɛp dɛn?

¹¹ Insay di Baybul, Naomi na fayn ɛgzampul bɔt pɔsin we dɔn ol we bin gri fɔ mek pɔsin we yɔŋ ɛp am. Fɔs, Naomi bin ɛnkɔrej in dɔtɛn-lɔ we in man dɔn day, we na Ruth, fɔ go bak to in pipul dɛn. Bɔt Ruth nɔ bin gri fɔ lɛf Naomi, ɛn i bin go bak na Bɛtliɛm wit am. Naomi bin rili gladi we Ruth  bin go wit am, ɛn i bin gri fɔ mek Ruth ɛp am. (Ruth 1:​7, 8, 18) Ɛn dat na bin big blɛsin fɔ dɛn ɔl tu. (Rid Ruth 4:​13-16.) Di wan dɛn we dɔn ol we ɔmbul, go falamakata Naomi in ɛgzampul.

12. Aw apɔsul Pɔl bin sho se i gɛt tɛnki?

¹² Apɔsul Pɔl bin gladi fɔ di ɛp we di brɔda dɛn bin ɛp am. Fɔ ɛgzampul, i bin tɛl di Kristian dɛn na Filipay tɛnki fɔ di gift dɛn we dɛn bin sɛn fɔ am. (Fil. 4:​16) I bin sho se i gladi fɔ di ɛp we Timoti bin de ɛp am. (Fil. 2:​19-22) Ɛn Pɔl bin tɛl Gɔd tɛnki fɔ di wan dɛn we bin kam fɔ ɛnkɔrej am we dɛn bin de kɛr am go na Rom as prizina. (Akt 28:​15) Pɔl na bin pɔsin we bin gɛt trɛnk, we bin de travul go fa fa say dɛn fɔ prich ɛn fɔ ɛnkɔrej di kɔngrigeshɔn dɛn. Bɔt in na pɔsin we bin ɔmbul, ɛn i bin gri fɔ mek in brɔda ɛn sista dɛn ɛp am.

13. Aw ol wan dɛn go sho tɛnki fɔ di yɔŋ wan dɛn?

¹³ Ol wan dɛn, bɔku we dɛn de we una go sho se una gladi fɔ wetin di yɔŋ wan dɛn de du na di kɔngrigeshɔn. If dɛn want fɔ ɛp yu wit transpɔt, fɔ go bay bay, ɔ ɔda tin dɛn we yu go nid pɔsin fɔ ɛp yu wit, na fɔ gladi ɛn gri fɔ mek dɛn ɛp yu. Mɛmba se di ɛp we dɛn de ɛp yu na wan we aw Jiova de sho se i lɛk yu. Yu go gɛt tayt padi biznɛs wit di wan dɛn we de ɛp yu. Tray ɔltɛm fɔ ɛp yu yɔŋ padi dɛn fɔ gɛt tayt padi biznɛs wit Jiova, ɛn tɛl dɛn aw yu gladi fɔ si we yɔŋ wan dɛn de du mɔ fɔ ɛp na di kɔngrigeshɔn. Ɛn rɛdi fɔ spɛn tɛm wit dɛn ɛn tɛl dɛn bɔt yu ɛkspiriɛns dɛn. We yu du dat, yu de “sho se [yu] gɛt tɛnki” fɔ we Jiova dɔn briŋ yɔŋ wan dɛn na di kɔngrigeshɔn.—Kol. 3:​15; Jɔn 6:​44; 1 Tɛs. 5:​18.

14. Aw Kiŋ Devid bin sho se i gɛt fri-an?

¹⁴ Kiŋ Devid in ɛgzampul ɛp wi fɔ si wan ɔda impɔtant kwaliti we di wan dɛn we dɔn ol nid fɔ gɛt, dat na fri-an. I bin gi bɔku mɔni ɛn valyu tin dɛn frɔm in yon jɛntri fɔ ɛp fɔ bil di tɛmpul. (1 Kro. 22:​11-16; 29:​3, 4) I bin du dis pan ɔl we i no se pipul dɛn go kɔl di tɛmpul Sɔlɔmɔn in tɛmpul. We wi nɔ gɛt bɛtɛ trɛnk igen fɔ ɛp pan di bildin projɛkt dɛn na Jiova in ɔganayzeshɔn, wi kin stil kɔntinyu fɔ sɔpɔt dɛn projɛkt dɛn de, bay we wi de gi di kɔntribyushɔn we wi ebul fɔ gi. Ɛn wi go ebul fɔ ɛp yɔŋ wan dɛn fɔ bɛnifit frɔm di ɛkspiriɛns we wi dɔn gɛt.

15. Us valyu gift dɛn we apɔsul Pɔl bin gi Timoti?

¹⁵ We i kam to fɔ sho fri-an, tink bɔt apɔsul Pɔl in ɛgzampul. I bin invayt Timoti fɔ jɔyn am pan di mishɔnari wok, ɛn Pɔl bin sho se i gɛt fri-an bay we i bin sho am di difrɛn we dɛn aw fɔ prich ɛn tich. (Akt 16:​1-3) Pɔl bin tren Timoti fɔ bi pɔsin we sabi prich ɛn tich gud gud wan. (1 Kɔr. 4:​17) Dɔn, Timoti bin yuz wetin Pɔl bin tich am fɔ tren ɔda pipul dɛn fɔ sabi prich ɛn tich.

16. Wetin mek Shigio bin tren ɔda brɔda dɛn?

¹⁶ Tide, ol brɔda dɛn nɔ de fred se dɛn nɔ go yuz dɛn igen if dɛn tren yɔŋ brɔda dɛn fɔ du di wok we dɛn bin de du na di kɔngrigeshɔn. Fɔ ɛgzampul, dɛn biɛn tɛm ya, Shigio, we wi bin dɔn  tɔk bɔt, bin tren yɔŋ mɛmba dɛn na di Branch Kɔmiti. I bin du dis fɔ ɛp di Kiŋdɔm wok fɔ go bifo na di kɔntri usay i de sav. So dat bin mek we i nɔ bin ebul fɔ bi kɔdinetɔ igen, wan brɔda we i bin dɔn tren gud gud wan bin ebul fɔ tek in ples. I dɔn pas 45 ia we Shigio na mɛmba na di Branch Kɔmiti, ɛn i de kɔntinyu fɔ yuz wetin i bin dɔn lan fɔ ɛp yɔŋ brɔda dɛn. Brɔda dɛn lɛk Shigio na blɛsin to Gɔd in pipul dɛn.

17. Akɔdin to Lyuk 6:​38, wetin ol wan dɛn go gi to ɔda pipul dɛn?

¹⁷ Una di ol brɔda ɛn sista dɛn na klia pruf we de sho se fɔ sav Jiova fetful wan na di bɛst we fɔ liv wi layf. Bay una ɛgzampul, una de sho se i fayn fɔ mek wi lan Baybul prinsipul dɛn ɛn aplay dɛn na wi layf. Una no frɔm ɛkspiriɛns aw dɛn bin de du tin trade, bɔt una si bak di nid fɔ ajɔst to chenj dɛn. Di wan dɛn we dɔn ol we jɔs baptayz, unasɛf gɛt bɔku tin fɔ du fɔ ɛp; una kin ebul fɔ tɔk bɔt di gladi-at we una gɛt we una dɔn kam fɔ no Jiova. Yɔŋ wan dɛn go gladi fɔ yɛri bɔt yu ɛkspiriɛns dɛn ɛn di lɛsin dɛn we yu dɔn lan. If yu de “gi” bay we yu de yuz di lɛsin dɛn we yu dɔn lan na layf fɔ tren ɔda pipul dɛn, Jiova go rili blɛs yu.—Rid Lyuk 6:​38.

18. Aw ol wan dɛn ɛn yɔŋ wan dɛn go ɛp dɛnsɛf?

¹⁸ We una ol wan dɛn we wi valyu de tray fɔ go nia yɔŋ wan dɛn, una go ebul fɔ sɔpɔt unasɛf. (Rom. 1:​12) Una ɔl tu gɛt sɔntin we valyu we di ɔda pɔsin nɔ gɛt. Ol wan dɛn gɛt sɛns ɛn ɛkspiriɛns. Yɔŋ wan dɛn gɛt trɛnk. We yɔŋ wan dɛn ɛn ol wan dɛn de wok togɛda as padi dɛn, dɛn de briŋ prez to wi Papa we de na ɛvin we lɛk wi, ɛn dɛn na blɛsin to ɔlman na di kɔngrigeshɔn.