1. Ntshipatshila kayi tshimpe tshitudi mua kudifundila patudi tuenda tukulakaja?

 PATUDI tuenda tukulakaja, bidi mua kututonda bua mutuikale katuyi kabidi mua kuenzela Yehowa mudimu bu kumpala to. Nansha mutudi katutshiyi ne makanda a buena a patutshivua bansonga, tudi mua kuambuluisha bansonga ne meji ne mamanya atukadi bapete bua bafike ku dienzela Yehowa mudimu ne makanda abu onso ne bangate kabidi midimu mikuabu. Mukulu mukuabu ukadi ne bidimu bia bungi wakamba ne: “Pangakabanga kumvua ne: bukulakaja bukavua bumpangisha mua kuenza amue malu, mvua ne disanka dia bungi bua muvuaku bansonga bakavua bakumbane bua kuenza midimu.”

2. Ntshinyi tshituamona mu tshiena-bualu etshi?

² Tshiena-bualu tshishale tshivua tshileje malu mimpe adi bansonga bapeta padibu basomba ne bana betu bakadi bakulakaje. Mu tshiena-bualu etshi, netumone mudi ngikadilu bu mudi budipuekeshi, dimanya mikalu yetu, kuleja dianyisha, ne kuikala ne muoyo wa kufila mua kuambuluisha bakulakaje bua kueleshangana diboko ne bansonga. Kuenza nunku kudi kuambuluisha muntu yonso wa mu tshisumbu.

3. Bilondeshile Filipoyi 2:3, 4, muntu muena budipuekeshi udi umona bakuabu mushindu kayi?

³ Bana betu bakadi bakulakaje bobu basue kuambuluisha bansonga, badi ne bua kuikala ne budipuekeshi. Muntu muena budipuekeshi udi umona bakuabu bu bamupite yeye. (Bala Filipoyi 2:3, 4.) Bana betu bakulakaje badi ne ngikadilu eu mbamanye ne: misangu ya bungi, kutu mishindu mishilashilangane idi muntu mua kukumbaja mudimu kampanda bimpe, ne mishindu yonso ayi mikale  anu ipetangana ne tshidi Bible wamba. Nanku kabena bindila bua muntu yonso enze malu anu muvuabu bobu baenza kale to. (Muam. 7:10) Nansha mukadibu bamanye malu a bungi a kuambila bansonga, mbamanye ne: “Malu a panu apa adi enda ashintuluka,” mbamanye kabidi ne: bidi mua kubalomba bua balonge mishindu mipiamipia ya kuenza amue malu.​—1 Kol. 7:31.

4. Mmunyi mudi batangidi ba bijengu baleja mudibu ne lungenyi lua buena lua bena Lewi?

⁴ Bana betu bakulakaje mbamanye ne: pakadibu bakulakaje, kabena kabidi mua kuenza malu a bungi muvuabu benza kumpala to. Tuangata tshilejilu tshia bana betu batangidi ba bijengu. Padibu bakumbaja bidimu 70, batu babambila bua kuangata mudimu wa mushindu mukuabu. Bidi mua kubakolela. Bua tshinyi? Bavua basanka bua diakalenga divuabu nadi dia kuenzela bena Kristo nabu mudimu. Bavua banange mudimu wabu au, ne dijinga dia kutungunuka ne kuwenza ditshidi ditema bikole mu mioyo yabu. Kadi mbamanye bimpe ne: badi dijinga ne bansonga bua kuenza mudimu eu. Ke bualu kayi badi baleja mudibu ne lungenyi lua buena lua bena Lewi ba mu Isalele wa kale. Bavua babambile ne: pavuabu bakumbaja bidimu 50, bavua balekela dienza mudimu ku ntenta wa tshitendelelu. Disanka dia bena Lewi abu kadivua disuikila ku mudimu kampanda to. Pavua mpunga umueneka bua kuenza midimu mikuabu bavua bayenza ne muoyo mujima, benza tshionso tshivuabu mua kuenza bua kuambuluisha bansonga. (Nom. 8:25, 26) Lelu, bana betu bavua batangidi ba bijengu kale badi bambuluisha bisumbu bikadibu mpindieu bikole ne babikankamija nansha mudibu kabatshiyi kabidi benda bakumbula bisumbu.

5. Tshilejilu tshia Dan ne Katie tshidi tshikulongesha tshinyi?

 ⁵ Tuangate tshilejilu tshia Dan uvua mutangidi wa tshijengu bidimu 23. Pakakumbajaye bidimu 70, bakabashiya yeye ne mukajende Katie bampanda-njila ba pa buabu. Mmushindu kayi uvuabu bafike ku dibidilangana ne mudimu wabu mupiamupia au? Dan udi uleja ne: mpindieu udi ne bia bungi bia kuenza bipite ne kumpala! Udi ukumbaja midimu yende ya mu tshisumbu, wambuluisha bana betu bua kuluabu basadidi, ne ulongesha bakuabu mua kuyisha mu bimenga binene ne mu maloko. Nuenu bana betu bakadi bakulakaje, nansha nuenu mu mudimu wa ku dîba ne ku dîba anyi kanuyimu, nudi mua kuambuluisha bakuabu bikole. Mushindu kayi? Ibidilanganayi ne nsombelu mupiamupia unudi nende, difundilayi bipatshila bipiabipia, ne tumayi meji ku tshinudi mua kuenza pamutu pa kuatuma ku tshinudi kanuyi mua kuenza.

6. Bua tshinyi mbimpe kumanya mikalu yebe? Fila tshilejilu.

⁶ Muntu udi mumanye mikalu yende (anyi muntu mupuekele) mmumanye ne: kudi malu adiye mua kukokesha bua kuenza ne adiye kayi mua kukokesha bua kuenza. (Nsu. 11:2) Bu mudiye mumanye mikalu yende, kena utekemena bua kuenza bia bungi kupita bidiye mua kuenza to. Ke bualu kayi udi ushala ne disanka ne utungunuka ne kuenza mudimu bikole. Tudi mua kufuanyikija muntu udi mumanye mikalu yende ne muntu udi wendesha mashinyi wenda ubanda mukuna. Bidi bikengela bua akepeshe lubilu lua mashinyi bua atungunuke ne kubanda mukuna. Bushuwa, neende uya pamuapa bitekete bitekete, kadi neikale anu wenda uya. Ke mudibi kabidi bua muntu udi mumanye mikalu yende. Mmumanye dîba didi dikengela kushintulula amue malu bienze anu bu udi utekesha lubilu bua apete mushindu wa kutungunuka ne kuenzela Yehowa mudimu ne kuambuluisha bakuabu.​—Filip. 4:5.

7. Ntshinyi tshivua Bâzilai muenze bua kuleja ne: uvua mumanye mikalu yende?

⁷ Tuangate tshilejilu tshia Bâzilai. Uvua ne bidimu 80 pavua mukalenge Davidi mumuambile bua ikale pende mu lubanza luende lua bukalenge. Bu muvua Bâzilai mumanye mikalu yende, wakabenga. Uvua mumanye ne: kavua ne tshia nsongo tshivuaye mua kuya kuenza kuntu aku to, bualu ukavua mikolo ku tshina; ke kulombaye bua bangate Kimehama baye nende pa muaba wende bu mutshivuaye nsonga. (2 Sam. 19:35-37) Anu bu Bâzilai, bana betu bakadi bakulakaje batu basanka bua kupesha bansonga mpunga wa kuenza mudimu.

8. Mmunyi muvua mukalenge Davidi muleje ne: uvua mumanye mikalu yende mu mudimu wa dibaka dia ntempelo?

⁸ Mukalenge Davidi uvua pende tshilejilu tshimpe tshia kulonda tshia muntu uvua mumanye mikalu yende. Uvua ujinga kuibakila Yehowa nzubu wamba kufua. Kadi pakamuambila Yehowa ne: muanende Solomo utshivua nsonga ke uvuaye ne bua kupesha diakalenga adi, wakitaba dipangadika dia Yehowa adi, yeye kudianjila kulongolola bintu ne muoyo wende mujima bua kutua mudimu au mpanda. (1 Kul. 17:4; 22:5) Davidi kavua muele meji ne: yeye ke uvua ukumbana bua kuibaka nzubu au bu mutshivua Solomo ‘muana ne kayi ne dimanya dia bungi’ to. (1 Kul. 29:1) Davidi uvua mumanye ne: ntempelo uvua ne bua kuibakibua bualu Yehowa uvua ubenesha mudimu au, kadi ki mbua bungi bua bidimu bivua nabi bantu bavua balombola anyi dimanya diabu to. Bia muomumue, lelu bana betu bakadi bakulakaje badi batungunuka ne kuenzela Yehowa mudimu anu bu Davidi nansha midimu idibu babapeshe yoyi mishintuluke. Mbamanye ne: Yehowa neabeneshe bansonga badi benza midimu ivuabu benza kumpala ayi.

9. Mmunyi muvua muena mu Komite wa filiale kampanda muleje muvuaye mumanye mikalu yende?

⁹ Muanetu Shigeo udi tshilejilu tshia matuku etu aa tshia muntu udi mumanye mikalu yende. Mu 1976 pavuaye ne bidimu 30, wakalua muena mu Komite wa filiale. Mu 2004, yeye kulua mutangidi wa malu a Komite wa filiale au. Pashishe wakalua  kumona ne: bukole buende buvua buenda bukepa ne katshivua kabidi ne mushindu wa kukumbaja mudimu wende bimpe to. Ke yeye kusambila bua bualu abu ne kuelaye meji bua kumona bua tshinyi mbimpe kushila muanetu utshivua nsonga mudimu wende wa mutangidi au. Nansha mudi muanetu Shigeo katshiyi mutangidi wa malu a Komite wa filiale, udi utungunuka ne kueleshangana diboko ne bena mu komite nende bakuabu. Anu mutudi bamone mu tshilejilu tshia Bâzilai, tshia mukalenge Davidi, ne tshia Shigeo, muntu udi ne budipuekeshi ne mumanye mikalu yende kena wimanyina pa malu atshidi bansonga bapange to, kadi udi wimanyina pa tshidibu mua kuenza. Kena ubamone bu bantu ba kutembangana nabu to, kadi bu benzejanganyi nende ba mudimu.​—Nsu. 20:29.

10. Mmushindu kayi udi bana betu bakulakaje ne bua kumona bansonga mu tshisumbu?

¹⁰ Bana betu bakulakaje batu bamona ne: bansonga ndipa dia kudi Yehowa ne batu baleja dianyisha dia bualu abu. Padi bukole buabu buenda bukepa, batu ne disanka dia kumona ne: bana betu batshidi ne makanda a bunsonga mbasue kuenza mudimu, bikale bakumbane bua kuwenza bua kuambuluisha tshisumbu.

11. Mmunyi mudi Luta 4:13-16 uleja ne: padi bakulakaje bitaba diambuluisha dia kudi bansonga bidi bibambuluisha?

¹¹ Naomi udibu batele mu Bible ntshilejilu tshimpe tshia bakulakaje batudi mua kuidikija. Muoyo wa kuleja dianyisha wakamusaka bua kuitaba diambuluisha dia kudi nsongakaji kampanda. Kumpala, Naomi wakanji kulomba Luta mukaji wa muanende uvua mukaji mukamba bua kupingana kuabu. Kadi Luta wakabenga bua kushiya Naomi, kupinganabu nende ku Beteleheme. Naomi uvua ne disanka dia bungi bua muvua Luta muye nende ne uvua witaba diambuluisha dia kudiye. (Luta 1:7, 8, 18) Bualu abu buvua buimpe bua dikema bua bakaji bonso babidi abu! (Bala Luta 4:13-16.) Bana betu bakadi bakulakaje nebalonde tshilejilu tshia Naomi.

12. Mmunyi muvua Paulo muleje muvuaye ne dianyisha?

 ¹² Mupostolo Paulo uvua muleje dianyisha bua diambuluisha divuaye mupete. Tshilejilu, wakela bena Kristo ba ku Filipoyi tuasakidila bua bintu bivuabu bamutumina. (Filip. 4:16) Wakaleja muvuaye ne dianyisha bua muvua Timote mumuambuluishe. (Filip. 2:19-22) Paulo wakela kabidi Nzambi tuasakidila bua bantu bavua balue kumukankamija pavuabu bamukuate bu muena buloko benda baya nende ku Lomo. (Bien. 28:15) Paulo kavua mufuyila to; uvua wenda ngendu ntanta ya kilometre binunu ne binunu bua kuyisha lumu luimpe ne kukolesha bisumbu. Nansha nanku, uvua ne budipuekeshi ne witaba diambuluisha dia kudi bena Kristo nende.

13. Mmunyi mudi bana betu bakulakaje mua kuleja mudibu ne dianyisha bua bansonga?

¹³ Nuenu bana betu bakadi bakulakaje, kudi mishindu ya bungi inudi mua kuleja munudi ne dianyisha bua bansonga banudi nabu mu tshisumbu. Bobu basue kuikala banuambula bua kunushiya muaba kampanda, kunuyila mu tshisalu, anyi kunuenzela malu makuabu, itabayi bua nuleje munudi ne dianyisha. Monayi diambuluisha diabu bu mushindu udi Yehowa unuleja mudiye mununange. Nudi mua kufika ku didia nabu bulunda bukole. Ikalayi nutabalela bena dienu abu bua bakole mu nyuma, ne nubambile munudi ne disanka panudi numona bansonga bafika ku dienza midimu minene mu tshisumbu. Ikalayi kabidi nusomba nabu nubambila malu anukadi bamonemone. Nuenu nuenza nanku, ‘nenuleje munudi bena dianyisha’ kudi Yehowa bua bansonga badiye mukoke mu tshisumbu.​—Kolos. 3:15; Yone 6:44; 1 Tes. 5:18.

14. Mmunyi muvua mukalenge Davidi muleje muvuaye ne muoyo wa kufila?

¹⁴ Mu tshilejilu tshia mukalenge Davidi mudi ngikadilu mukuabu wa mushinga udi bakulakaje ne bua kuleja eu: kuikala ne muoyo wa kufila. Wakafila makuta ende a bungi ne bintu biende bua kukuatshisha mudimu wa dibaka dia ntempelo. (1 Kul. 22:11-16; 29:3, 4) Wakenza nanku nansha muvua bantu mua kulua kubikila ntempelo au ne: ntempelo wa Solomo. Tuetu katutshiyi ne bukole bua kubuela mu mudimu wa luibaku lua nzubu ya bulongolodi buetu, tudi mua kutungunuka ne kufila bintu bietu mutudi petu bakokeshile bua kutua mudimu eu mpanda. Tudi kabidi mua kusambulujila bansonga dimanya ditukadi bapete mu kupika kua bidimu.

15. Mbintu kayi bia mushinga bivua mupostolo Paulo mupeshe Timote?

¹⁵ Tukonkonone kabidi tshilejilu tshidi mupostolo Paulo mutushile mu bualu bua dipeshangana bintu. Wakambila Timote utshivua nsonga bua bikale baye nende mu mudimu wa bumisionere ne uvua umulongesha mishindu yende ya kuyisha ne ya kulongesha kayi uyilaminyina to. (Bien. 16:1-3) Malu avua Paulo mulongeshe Timote akamuvuija mulongeshi ne muyishi muimpe wa lumu luimpe. (1 Kol. 4:17) Timote wakalua kuangata mishindu ya kuyisha ne kulongesha ivua Paulo mumulongeshe ayi, yeye kuyilongesha pende bakuabu.

16. Bua tshinyi Shigeo uvua ulongesha bakuabu?

¹⁶ Lelu bana betu bakadi bakulakaje kabatu batshina bela meji ne: bobu balongeshe bansonga bua kuenza mudimu uvuabu benza mu tshisumbu kabakuikala kabidi ne tshidibu mua kuenza to. Tshilejilu, muanetu Shigeo utukadi batele kuulu eku wakenza bidimu bia bungi ulongesha bana betu batshivua bansonga bavua babuela mu Komite wa filiale mua kuenza amue malu. Uvua wenza nanku bua mudimu wa Bukalenge wa mu ditunga didiye uya kumpala. Ke bualu kayi, pakakumbana tshikondo, kukavua muanetu uvua ne dimanya dikumbane uvua mua kuangata muaba wende wa mutangidi wa malu a Komite wa filiale. Muanetu Shigeo ukadi mu Komite wa filiale bidimu bipite pa 45 ne udi utungunuka ne kuangata dimanya dikadiye mupete adi udilongesha bansonga. Bana betu badi benza malu bu Shigeo ndibenesha dia dikema kudi bantu ba Nzambi!

17. Anu mudi Luka 6:38 uleja, ntshinyi tshidi bana betu bakulakaje mua kupesha bakuabu?

 ¹⁷ Nuenu bana betu bakulakaje nudi bushuwa baleje ne: kuenzela Yehowa mudimu ne ditabuja ne muoyo mutoke mmushindu muimpe mutambe wa kuenza malu mu nsombelu. Tshilejilu tshienu ntshituambuluishe bua kumona ne: mbimpe tuikale tulonga mêyi manene a mu Bible ne tuatumikila. Nudi bamanye bimpe muvua malu enda kale, kadi nudi bamone kabidi ne: bidi bikengela kuibidilangana ne ngenzelu wa malu mupiamupia. Nuenu bana betu bakulakaje badi babatijibue matuku adi panshi aa, nudi penu mua kuambila bakuabu mudi kumanya Yehowa kunupeteshe disanka, nansha munudi balue kumumanya ku bukulumpe. Bansonga nebikale ne disanka dia kuteleja malu anukadi bamonemone ne tshidiwu manulongeshe. Nuenu “nupeshangana bintu,” mmumue ne: nulongesha bakuabu malu anudi bamanye, Yehowa neanubeneshe bikole.​—Bala Luka 6:38.

18. Mmushindu kayi udi bana betu bakulakaje ne bansonga mua kueleshangana diboko?

¹⁸ Panudi nuenu bana betu bakulakaje nudia bulunda ne bansonga, nenuikale ne mushindu wa kukankamijangana. (Lomo 1:12) Yonso wa kunudi udi ne tshintu tshia mushinga tshidi mukuabu kayi natshi to. Bana betu bakadi bakulakaje badi ne dimanya ne mbamonemone malu bua bungi bua bidimu bikadibu benze. Bansonga bobu badi ne bukole ne makanda. Padi bansonga ne bakulakaje benza mudimu pamue bu balunda, badi batumbisha Tatu wetu wa mu diulu udi mutunange ne badi bambuluisha bena mu tshisumbu bakuabu bonso.